رواية زوج للايجار الفصل الثلاثون 30 - بقلم اميرة محمد

 رواية زوج للايجار كاملة بقلم اميرة محمد عبر مدونة دليل الروايات 

 رواية زوج للايجار الفصل الثلاثون 30 

 تركض الاخري وهي تمسك بالملفات سريعا وهي تدعوا الله ان يمر ذلك اليوم بسلام فالاخري منذ الصباح وهي مشتعله علي الجميع تصرخ بهذا وتطرد ذاك

لتستأذن وهي تدخل بتوتر : استاذه نايا ممكن ادخل لتقول الاخري بعصبيه : لا خليكي بره ونتواصل لاسلكي بقالك قد اي بتجيبي ملف تافه زي ده الاجتماع معدش عليه غير عشر دقايق الحق اشوفه امتي

لتقول الاخري بتوتر وهي تمسح جبهتها بخوف : والله دورت عليه كتير واسامه مش هنا عشان يجيبه لتنظر لها الاخري بأعين حمراء وهي تقول : نعم والأخ فين الساعه دي عشان يمشي فوقت زي ده

لترد الاخري بخوف : عنده اجتماع تاني مع الوفد الإيطالي وكأن محتاج شويه ملفات راح يجيبهم لتدخل نونيا سريعا وكأنها طوق نجاه لتلك الخائفه من انفجار نايا بها

نونيا بهدوء: روحي انتي يا منه دلوقتي وانا هحل الموضوع لتزفر الاخري سريعا وهي تركض للخارج لتنظر لها نايا ببرود لتكمل الاخري : اهدي شويه في اي بقالك فتره علي الحال ده الناس مش ذنبها حاجه يا نايا

لتقوم الاخري بعصبيه وهي تتحرك في جميع الاتجاهات: مش ذنبهم مش ذنبهم اي بالظبط امال ذنب مين شغل نايم وناس مكسله تقوم حتي بواجبها هناك ففرع بره كانوا زي الالات اللي بتشتغل مفيش هنا نص كفائتهم ليه التانيين احسن منهم فأي فهميني

نونيا وهي تزفر بضيق : منستعبطش علي بعض انتي مش اللي مزعلك كده انتي من ساعه اللي حصل وانتي قالبه علي الكل اي ذنبهم ان الياس معدش بيخرج من اوضته ولا بيعبر حد ومتجاهلك تماما

لتنظر لها نايا بشرار وهي تضغط علي أسنانها بعصبيه : اسمه يا نونيا اياكي ييجي قدامي من تاني فاهمه هو حر انا مش ميته عليه انا بس بحاول اشوف ملاك مش اكتر وانتي عارفه

نونيا وهي تزفر بضيق : لأمتي بقالك فوق الشهرين من يوم وفاه شروق بتحاولي ومش راضي حتي يفتحلك يبقي تتعبي نفسك ليه مش فاهمه

نايا وهي تجلس بتعب : لأني مش قادره انسي وهي بتوصيني عليها انا بكره شروق ومقدرتش اسامحها بس ده مش معناه اتجاهل وصيتها قبل متموت وكمان ملاك لسه صغيره اوي مش هتتحمل كده هي مش ذنبها ان امها عملت كل ده

نونيا بضيق : الياس معاها بلاش تدخلي نفسك في اللي ملكيش فيه انتي متقربيلهاش اي حاجه افهمي بقي يعني الياس يقدر يمنعك وملكيش سلطه عليه

نايا بضيق : عارفه بس احتراما لأمها اللي ماتت ورغبتها هجرب ومش هيأس لازم أنفذ وصيه شروق حتي لو حصل اي ويلا عشان عندي اجتماع وهروح اشوف هيفتح المرادي ولالا

لتزفر الاخري بضيق من صديقتها فهي لم تيأس لمده شهرين من مقابله الياس او ملاك تذهب يوميا له عله يفتح ويقابلها حتي ولكنه يرفض ذلك بشده

___________________

يستمع الاخري لتطبيل ذاك المزعج علي الباب لمده نصف ساعه متواصله لم ييأس ولم يكل ليذهب وهو يفتح الباب بعصبيه ليواجه ذلك المبتسم بغباء امامه

الياس وهو يضغط علي اسنانه بغيظ: عايز اي مفكره كباريه هنا نازل تطبيل بقالي نص ساعه مفتحتش متغور يعم

مؤمن بأبتسامه سمجه وهو يدفع الياس ليدخل : الياس حبيبي ليك وحشه يا راجل انا كويس والله الحمد لله بس متخانق مع تالي زي العاده يعني واي الجديد هي عايزه كيكه شوكولاته وانا عايز كيكه أناناس عشان اغنيها حبيبي اناناس بحبه يناس وبس كده يسيدي

ليمسك الاخر به من كتفه وهو يدفعه للخارج: مؤمن انا مش فايقلك وبعدين انا اي دخل امي بكل حواراتك دي ها

مؤمن بضحكه سمجه : الاااه منار حبيبتي رحتلها امبارح يرضيك كنت داخل بفتح التلاجه ادور علي حلويات تشدني من قفايا زي الحراميه وتطردني طرده كلاب بتقولي هو انت اي ملكش بيت يلمك كل متجوع تيجي تقرفني وتفتح التلاجه ولا كأنه بيت ابوك

الياس وهو يجلس ببرود : معاها حق عيل سمج مش عارفه هي مبلغتش عنك البوليس ليه كنا خلصنا

ليمسك الاخر تفاحه ببرود وهو يأكلها : ايوه ايوه صح بس لو مفكرين هتكسف واسكت ابسليوتلي ده انا مؤمن والاجر علي الله هروح تاني اصل سمعت انها عامله كنافه بالقشطه والعبد لله ضعيف خالص قدامها

الياس بسخريه: لا والحق يتقال العبد لله مبيسبش حاجه اصلا مش بيضعف قدامها ليبتسم الاخر بسماجه وهو يقول : الا عنيها بتقويني كده بس بضعف في الاخر ما الانسان بطبعه ضعيف خالث

الياس وهو يرفع حاجبيه بسخريه : خالث ها غور يا مؤمن من هنا انا مش ناقص قرف خليني فحالي

مؤمن وهو يبحث بعينه : امال فين ملاك وحشتني هي نايمه ولا اي ليتنهد الياس بتعب وهو يمسح وجهه : نايمه منامتش بقالها كتير كل متصحي تدور علي شروق وتعيط مبقتش عارف اتعامل معاها ولا اسكتها حتي روجينا مبتسكتش معاها مفيش فايده

مؤمن بهدوء : تالي قالتلي ان نايا بتيجي يوميا عايزه تشوف ملاك ليه مش عايز تسمحلها يمكن تعرف تسكتها حرام عليك يا الياس البت لسه صغيره مش حمل العداوات اللي بينكوا

الياس بعصبيه : يعني ابوها معرفش وروجينا اللي بمثابة امها التانيه برده مش بتعرف تسكتها هتيجي دي اللي مشافتهاش ولا مره عشان تسكتها انت اتجننت يا مؤمن

مؤمن بلا مبالاه: انت اللي الحقد ملاك ومش حاسس ولو سبته هتضيع بنتك زي ما هتضيع نفسك بالظبط لينظر له الياس بغيظ وهو يقول : مستحيل اسمحلها تقرب من بنتي وتجرحها زي ما بتعمل دايما مستحيل

مؤمن وهو يقف بغيظ : كفايه بقي انا ساكت لانك صاحبي ومش عايز ازودها عليك انت غلط زيك زي نايا واي حد مكانها وعنده كرامه كان عمل كده انت اتهمتها بالخيانه مش لعبه هي وضربتها قدامنا كلنا من غير متسالها كفايه جحود وتمادي واتجوزت عليها فغيابها عايز اي اكتر من كده ده هي المفروض اللي متبصش فوشك اصلا

الياس بعصبيه : وسنيني اللي اتعذبت فيها كلكوا واقفين معاها ليه محدش حس بيا فوق تعذيب الضمير وقلبي اللي اتكسر بسببها عايزني اسيبها ازاي وانا اترجيتها بدموع عشان متمشيش وخيرتها وهي اختارت تسافر فوقت كان ممكن تقعد

مؤمن وهو يرحل : انت الكلام معاك في الهوا ملوش فايده انا ماشي بس فكر فكلامي كويس قبل ما الوقت يفوت وقتها ابقي قابلني لو عرفت ترجع حاجه راحت منك سلام

لينظر له الياس بضيق له وهو يتذكر حديثه ومواقفها معه فهي تصر بشده رؤيه ملاك ولكنه يرفض

_____________________

تالي بضيق : تمارا شيلي ابنك هيكسر التسريحه وانا عيني هتطلع اصلا علي روج عندك فلو مستغنيه اخده وامشي

لتخرج الاخري من الحمام وهي تضع ماسك لتقول بحده : نعم يختي انتي عارفه ان دول ولادي التانيين لا يمكن طبعا بعدين انا خلاص خدت قراري انا هتبرع بيهم للغلابه

تالي بشهقه : هتتبرعي بيهم ومش عايزه تديهوملي اخص عليكي يتمارا معقول للدرجادي الصداقه حبل مقطوع بينا

تمارا بأستغراب: طب ليه مقولتيش انك عايزاهم يا تالي والله مكان هيغلي عليكي بالسلامه تحبي الف كل واحد لوحده فورق هدايا ولا تاخديهم كده

تالي بفرحه : لا طبعا مش محتاج انا هقوم انقي اللي عايزاه بقي وانتي كملي اللي بتعمليه لتتجه ناحيه الميكب الموضوع وهي تختار الكثير منهم لتركض تمارا لها وهي تمسك بيديها بشده

تمارا بشهقه : ولادي انتي بتعملي اي لتقول تالي بأستغراب : بنقي اللي هاخدهم مش انتي قلتي هتتبرعي بيهم واني مقولتش اني عايزه اديني بقول وبختار اهه

تمارا بصراخ : اتبرع بمين دول ولادي يما انتي بتستعبطي تاخدي اي خدك ربنا انا كان قصدي علي الخلفه السوده بتاعتي عدي و رعد عايزه اتبرع بيهم انما دول لا يمكن يحصل ابدا

تالي وهي تنظر لها بفراغ : يعني انتي هتبيعي عدي ورعد وتسيبي دول وتقولي عليهم ولادك لتومئ لها تمارا بأقتناع وهي تقول : ايوه حصل علي الاقل بستفاد من دول انما تقدري تقوليلي التانيين هيفيدوني بأي مش بشوف منهم غير المصايب

لتومئ لها تالي وهي تقول : فعلا معاكي حق طب نسربهم دلوقتي وتديني روج واحد الدرجه دي بلف عليها مش لاقياها ومقابل ده هخلصك من رعد وعدي

لتنظر لها تمارا بتفكير وهي تقول : اتفقنا يلا علي بركه الله عوضنا علي الله نجيب غيرهم

__________________

تقف أمام الباب منذ دقائق تنظر له بتفكير لتشعر بأحد يضع يده علي كتفها لتلتفت سريعا لتبتسم الاخري لها وهي تقول : بقالك شهرين بتيجي نفس الوقفه مزهقتيش

نايا وهي تزفر بضيق : مش لما يفتحلي يا روجينا حرام عليه البنت بتصحي تعيط مش بتسمعي صوتها مش راضي يدخل حد عنده ليه مش فاهمه حتي انتي فين وفين لما يخليكي تدخلي

روجينا بحزن : للأسف الياس حاسس انه السبب فموت شروق هو دايما يقول انه اللي أقنعها تدخل العمليه وهي مكانتش راضيه عشان كده قافل علي نفسه مش بيفتح

نايا بضيق : هو ملوش ذنب في الأول والآخر ده عمرها ومكتوبلها كده بيه او من غيره كانت هتموت بس اللي بيعمله في البنت ده حرام هي لسه صغيره ليه يعاقبها كده

روجينا وهي تومئ لها : حاولي تاني وانا حاسه انه قريب هيقتنع لو حابه تعالي اطلعي معايا شويه واستني لتقول الاخري بأبتسامه : لا تسلمي انا هفضل هنا لغايه لما يفتح

لتومئ لها الاخري وهي تصعد للاعلي لتنتظر نايا ساعه اخري تحاول اقناع الياس بفتح الباب ولكنه لا يجيب عليها لتستمع لصوت ملاك وهي تبكي بشده وشكل متواصل

لتضرب الباب بعنف وهي تصرخ به : الياس افتح بطل حرام عليك البنت هتموت كده منك بلاش حتي تشوف وشي بس اهديها مينفعش كده

ليتجاهلها الاخر ويزداد بكاء ملاك بشده لتبدا الاخري بضرب الباب بقدمها بشده وهي تصرخ به اعلي ليفتح بعد فتره اخيرا وهو يمسك بملاك الذي أصبح وجهها لونه احمر بشده من البكاء لتمسكها نايا سريعا وهي تحتضنها بحب

نايا : ششش خلاص يروحي انا هنا كل حاجه بخير لتهدئ الاخري بعد فتره في يديها تحت صدمه الياس مما حدث لتقول ملاك بصوت ناعس : ماما

نايا بدموع : انا هنا يروحي متعيطيش مش هسيبك تاني خلاص لتهدئ الاخري بين يديها وهي تنام بهدوء لتنظر نايا لالياس بغضب وهي تحمل ملاك للداخل لتضعها في غرفه كانت بالجانب وتخرج لالياس

نايا بعصبيه هامسه : اي الغباء اللي بتعمله ده مفكرني ميته عليك عشان اجي يوميا اقف علي بابك وتعاند علي مصلحه بنتك ومتفتحش

الياس وهو يضع راسه بين يديه : اهي نامت ياريت تروحي بقي وتقفلي الباب وراكي لتقول نايا بحده : اسمع لولا مش عايزاها تصحي كنت زعقت بعلو صوتي انما انا مش همشي من هنا وملاك هشوفها لغايه لما تبقي كويسه انا ميهمنيش ترضي او لا

الياس بعصبيه : ملاك بنتي وبنت شروق انتي مين عشان تعانديني هتعرفي مصلحه بنتي اكتر مني

لتبتلع نايا تلك الغصه وهي تقول بعصبيه : ايوه هعرف اكتر منك لما البنت تبقي هتتخنق من كتر العياط وانت سايبها عشان انانيتك وبس كمان شروق كانت مأمناني علي بنتها ولولا الامانه دي انا مكنتش هاجي ولا تشوف وشي

الياس بأستغراب: شروق وتأمنك انتي لا يشيخه عايزاني أصدق ده انا اكتر واحد عارف شروق كانت بتخاف من وجودك ازاي وبتكره وجودك حواليا يبقي تأمنك ازاي

نايا بضيق: ميهمنيش كل ده المهم انها قبل متموت فعلا وصتني اهتم بملاك واعاملها زي امها واديك شفت ملاك من اول يوم شفتها فيك مش بتناديني غير ماما فكرتها صدفه بس معرفش القدر عايز اي

الياس بسخريه : قولي انها حجه حلوه مش اكتر تتقربي فيها من هنا لتقترب منه نايا وهي ترفع حاجبيها بسخريه لتنظر له

من اعلي لاسفل بأستخفاف وهي تقول : براحه علي نفسك انت شكلك واخد مقلب فنفسك اكبر من حجمك اللي كان بينا انتهي وقريب هنطلق وانت لا اول ولا اخر واحد فحياتي لا هموت عليك ولا هموت بعدك فوق لنفسك غرورك يضيعك

لتتركه وهي تذهب لغرفه ملاك ليضغط الاخر علي اسنانه بعصبيه وهو يذهب لغرفته ليغلق الباب بحده ليجلس وهو يفكر في حديثها ليستمع لصوت هاتفه يرن

الياس بضيق : ايوه يا شادي ، مش عارف ممكن يكون هنا فأي مكان انا فاكر اني كنت جايبه بس مش فاكر حطيته فين ، طيب هقوم ادورلك عليه ، سلام يلا

ليغلق الياس الهاتف وهو ينظر بحيره حوله : وبعدين بقي هيكون الملف فين انا مش فاكر استغفر الله هو ده وقته يا شادي

ليبدا في البحث في كل مكان وهو ينظر حوله لعله يجده ليري تلك الدرج المغلق منذ وفاه شروق ليتنهد بشده وهو يجلب المفتاح كما تضعه هي دائما فهي لم تكن تجعله يفتحه ابدا ليبحث به وهو يجد اشياء لها

امسك بها وهو يغلق عينيه بحزن : انا اسف يا شروق يمكن لو كنت سبتك علي راحتك كنتي فضلتي شويه مع بنتك مش عارف اي خلاني اغصب عليكي صدقيني سامحيني هحاول انسي غروري فمصلحه بنتنا

الياس بأستغراب : مذكرات شروق غريبه اول مره اعرف انها بتكتب مذكرات

ليتلمس ذلك الدفتر وهو يفتحه ليقرا ما به بالترتيب لتزداد الدموع في عينيه كم وصفت حبها له في ذلك الدفتر وكم هو تجاهل ذلك ولم يبادلها الشعور

ليصل بعد فتره لجزء جعله يكمش ملامحه بتعجب وهو يقرأ لتبدا تغيير ملامح وجهه للصدمه وهو لا يستوعب ما يقرأه ليضحك بسخريه لتتسع ضحكه بشده وهو لا يصدق ما يقرأ

الياس وهو يقف سريعا ليتحرك في جميع الاتجاهات : مستحيل مستحيل اكيد كذب اكيد اتهبلت وكانت بتخرف مستحيل تكون هي سبب تدمير حياتي وانا اللي عملت كل ده عشانها لا مستحيل

ليمسك بالدفتر وهو يقرأ مره اخري بعدم تصديق لتتحول ضحكاته لبكاء بصوت عالي وهو يكسر ما يقع امامه كله

الياس بصراخ : لييييه ليه انا عملتلك اي وحش ده انا عاملتك احسن معامله اتجوزتك عشان اساعدك واتخليت عن نفسي عشانك وعشان اسعدك تقومي تعملي فيا كده ليه ليه شروق حرام عليكي

ليجلس وهو لا يستوعب ان حياته مجرد خدعه ليس اكثر ولا اقل الهذه الدرجه كان اعمي ام ماذا

•  يتبع الفصل التالي اضغط على ( رواية زوج للايجار ) اسم الرواية