رواية ميراث نور كاملة بقلم لينا بسيوني عبر مدونة دليل الروايات
رواية ميراث نور الفصل الواحد و الاربعون 41
” فقدان ذاكرة”
” مارو”
مرضتش أحكيلهم على اللى حصل , مرضتش أحكيلهم عن المعاناة وعن أصعب رحلة مرينا بيها فى حياتنا , مرضتش أقولهم على اللى المصيبة اللى عملتها أختى نورا وحسيتها نعمة من ربنا أنهم نسيوا كل اللى حصل , المشكلة أنهم نسوا كل حاجة!!!!!
كنت فى أوضة نورا بفوقها وسمعت صوت دوشة بره فى الكهف , طلعت بره أوضة نورا وأتفاجئت بأهلى فايقين وبيتخانقوا وبيضربوا فى بعض , سندس بتضرب أبويا.. ونصير بيضرب فى حنوش.
, جريت عليهم علشان أسلك مابينهم، لاقيتهم كلهم بيقولولى فى صوت واحد :
– أنت مين؟ !! واحنا فين ؟!!
وشاوروا على بعض وهما بيقولوا :
– ودول مين ؟!!
أدركت أنهم فقدوا الذاكرة فحاولت أفكرهم وقولتلهم :
– أنتوا عيلتى .
وشاورت عليهم وانا بقول :
– أنت أبويا ودى خالتى سندس مراتك من الانس وده نصير وده حنوش من الجن .
أبويا قال :
– أنا أبو مين ؟!! أبوك أنت يا شحط !! وانا متجوز الهبلة دى؟ !!! ودول جن ازاى !!؟ ماهم بنى آدمين اهم قدامك !!
نصير قال:
– ايوه أحنا جن ازاى يابن الكلب أنت !!
أبويا قاله :
– ماتشتمهوش بيقولك أبنى , انت قاصدك تشتمنى انا ولا أيه يابن …
نصير رد علي أبويا وشتمه , حنوش شتمهم هما الاتنين علشان عايز يعرف هو مين !!
خالتى سندس كان بتضرب أبويا علشان قالها ياهبلة ,نورا جات من ورايا وقالتلى :
– مين دول , أنا أيه اللى جابنى هنا , أنت خاطفى ؟!! وصرخت فى وشى .
مكنش قدامى غير انى أفصلهم عن بعض , حبست كل واحد فى أوضة لوحده فى الكهف.
نصير وحنوش عورونى وانا بحبسهم ,بس نجحت أحبسهم، وبدأت معاهم كورس علاج بالسحر والأعشاب المنشطة للذاكرة زى , الجنكة والعبعب المنوم وعشبة سرة الارض
قعدت مع كل واحد فيهم لوحده وحاولت أفكره بنفسه وبنوعه.
” نصير ”
صحيت لاقيت نفسى فى كهف غريب وسط ناس أغرب, وواحد ضخم ماسك فى أيده عصايا وبيقولى أنى من الجن مش من البشر !!
أنفعلت وكنت عايز أدور الضرب فيهم كلهم , فالضخم شالنى , فضلت أضرب فيه لحد ما رمانى فى أوضة وحبسنى فيها.
بصيت على شكلى فى المراية فلاقتنى بنى أدم عادى , حسست على وشى وعلى أطرافى فلاقتها لحم دم , أزاى انا جنى؟!! .. يعنى أيه جنى أصلا !!
الضخم كان بيدخل عليا الاوضة كل يوم وهو فى أيده أكل وأناء من الفخار مدوب فيه حبة أعشاب غريبة وطعمها مر علقم , وكان بيجبرنى اشربها , مرات كتير حاولت أقاومه أو أضربه وأهرب , بس دايما كان بيتغلب عليا , ولما كنت بتعصب بزيادة كان بيقول كلام غريب بعد ما أسمعه انام من غير ما أحس بنفسى.
لحد مابطلت أقاومه , وبدأت أسمعه علشان أعرف هو فى أيه ؟!!
قالى :
– أنت جنى من الجن الضوئيين وفى خدمة أبويا الساحر نور ناير , وورثك عن أجداده.
قولتله بأستهزاء :
-ياسلام هو فيه حد عاقل يصدق الكلام اللى بتقوله ده؟!! طيب لو أنا جن زى مابتقول , ليه شكلى شكل البنى أدمين ؟!
قالى :
-ده الشكل اللى دايما بتحب تتشكله.
سألته :
-وأيه اللى حصلى ؟ خلانى مش فاكر حاجه؟!
سكت ومردش عليا.
فقولتله :
أنت كداب , انا بنى أدم طبيعى وأنت خطفتنى علشان تبيع أعضائى , أنت مافيا يله صح ؟!
قالى :
أقسم بالله أنت جنى مش بنى أدم.
أنفعلت عليه ولسه هقوم علشان أضربه ,شاور عليا بعصايته الغريبة فغيبت عن الوعى.
” سندس ”
صحيت من النوم لاقيتنى فى كهف وواحد واقف جنبى ، مسكت في هدومه وقولتله :
-أنت عملت فيا أيه يابن الكلب , أنت اغتصبتنى!!!
لاقيته بيسلك أيدى من هدومه وبيقولى :
– وسعى ياولية … انتى اللى مين ؟!!
قولتله :
-أنت هتستعبط يلاه أنطق انت مين وانا مين ؟!
قالى :
معرفشى أنتى مين وأنا مين ؟!
قلعت الشبشب وكنت هنزل عليه بيه، أتفاجئت براجل بلطجى ماسك فى أيده عصايا وبيقولى أنى متجوزه أبوه الراجل قليل الزوق والرباية اللى كنت ماسكه فيه من شوية.
صرخت فيهم , فلاقيت البلطجى بيشدنى وبيرمينى فى أوضة وبيحبسنى , فضلت أصرخ وأقول :
-يالهوتييى … غيتونى ياخلق … غيتونى ياناس ..
فلاقيت البلطجى بيشاور عليا بعصاية فسورقت على طول وأغمن عليا.
البلطجى كان بيجى كل يوم يشقر عليا ويدينى اكل ويقسينى غصب عنى بتاع طعمه زفت.
حاولت اكتر من مره اخربشه واهرب , بس على طول كان بينيمنى بالعصاية.
لحد ماهديت شوية ودماغى كلتنى أعرف انا مين وايه اللى جابنى هنا، البلطجى قالى أنى مرات أبوه , وأنى بعزه وبحبه زى أبنى , وعلى طول كنت بعمله الرز بلبن اللى بيحبه وأن ليا بنت أسمها نورا , بس أنا مش مصدقاه.
“نورا”
– أنا مخطوفة !! في واحد ضخم وماسك فى أيده عصايا خطفنى مش أنا بس ده خاطف ناس تانيه وحابسهم فى الاوض اللى جنبى وعلى طول بسمعهم بيزعقوا وبيصرخوا , تقريبا بيعذبهم.
كل يوم كان بيدخل عليا وفى أيده الاكل و طبق من الفخار وكان بيجبرنى أنى أشربه غصب عنى !!!
بيقولى أنى اخته وأن اللى بره دول عيلتى , أبويا وأمى وأصدقائى من الجن … فعرفت أنه مجنون وخاطفنى وأحتمال كبير يقتلنى ويرمينى فى مصرف مجارى.. فقررت اهرب …
“حنوش”
حاسس بأحساس غريب , حاسس انى مش أنا , فى الاول كنت بنفعل وبضرب الشاب الجته اللى حبسنى فى الاوضة , بس حسيت بعد كدا انه صادق مش كداب , وحاولت اتجاوب معاه , كنت مندهش بكل كلمة بيقولها عنى , قالى أنى عفريت من الجن وأنى صديق لواحد أسمه نصير العيل الملزق اللى أول ماصحيت فى الكهف لاقيته فى وشى متنحلى , فشوطت فيه لحد ماجه الشاب الجته وسلك مابينا.
أستجبت للشاب الجته وبدأت أفتكر حاجات عن حياتى القديمة، كنت بشوفها على هيئة مشاهد كانت بتعدى قدام عينى سرعة وانا متنح فى سقف الاوضه.
” مارو ”
كلهم كوم وأبويا كوم تانى , كلهم كنت بتعامل معاهم على أنهم شخص واحد بحاول افكره بنفسه , أنما أبويا السيستم عنده ضرب خالص!!!
بقيت كل ما أدخل عليه الاوضه الاقيه متحول لشكل مختلف , مره كلب , مره قطة , مرة تمساح ومرات كتيره لممثلين مشهورين , أتحول ليوسف وهبى ولرشدى أباظة وعمر الشريف ,فاتن حمامة وكنت مضطر أتعامل معاه على هذا الوضع خاصة انى معرفتش أقلعه القميص اللى بيتحول بيه وهو نايم ,
القميص كان لازق فى جتته زى جلده.
دخلت عليه كان ساعتها متحول لكريمة مختار فقالى :
–
-أزيك يابنى ؟!!
قولتله:
-الحمد لله يافنانة.
سألنى :
– هو أبنى معتز مجاش ليه ؟!!
قولتله :
– معتز الدمرداش !!! , لا ماهو مش جاى.
قالى وهو بيخبط ايده على صدره :
– ليه يابنى هو فيه حاجه لاقدر الله.
قولتله :
– لا يافنانة هى الفكرة بس أنك الله يرحمك مش كريمة مختار.. أنتى أبويا.
أتفاجئت بيه بيتحول لعبلة كامل وبيزغرلى بعينه وبيقولى :
– أنت يالا معندكش دم .. بتقول للست أنها ميته أفرض جالها حاجة وماتت , ذنبها هيبقى فى رقبتك.
قولتله :
-معلش نسيت.
قالى :
-نسيت تاكل .. نسيت تشرب .. نسيت تشربنا البتاع المقرف اللى بتشربهولنا.
رديت :
-حقك عليا ياست عبلة , بس ممكن تدينى أبويا.
ردت :
– كان على عينى , أبوك مين ياوله ؟!!
أتفاجئت بيه بيتحول لمحمد رمضان وبيقولى :
-أنا فى الساحة واقف لوحدى .. نمبر وان وأنتوا عارفين.
قولتله :
– حبيبى يانجم .. ممكن تدينى أبويا …
رفع حاجب عينه وهو بيقولى :
-بس يابابا !!
قولتله :
– معلش يانجم , ادهونى بس.
قالى :
– بس ياحبيبى.
ولسه هيضربنى على راسى بالطبق الفخار , مسكت أيده
وقولتله :
– أعقل يانجم المسلسل خلص من بدرى ادينى أبويا أرجوك.
أتفاجأت بيه بيتحول لتنين , جسمه كان مزنوق فى الاوضة ولسه هينفث عليا النار ,جريت بره الاوضة بسرعه ورميت عليه تعزيمة بالعصايا فأغمى عليه , جسمه كش ورجع على شكل أبويا تانى.
فضلت على كده شهرين لحد ماخلاص كنت قربت افقد الامل أنهم يفتكروا حاجة.
لحد مافي يوم دخلت على حنوش وفى أيدى الأكل والدوا , وأتفاجئت بيه بيقولى :
– أزيك يامارو يابغل !!!
قولتله بأستغراب :
– حمد الله على السلامة ياحنوش !! انت افتكرت!
قالى :
– هو أيه اللى حصل؟!! أنا أخر حاجه فاكرها اننا كنا بنتعشى والكهف أتهز !!
قولتله :
– وانا برضة زيك كده، بس صحيت لاقيتكم مش فاكرين حا..
قطع كلامى صوت الدوشة فى اوضة أبويا ,روحت ناحية اوضته فلاقيته بيقولى :
– حابس ابوك ليه يابغل أنت ؟!! أفتح الباب .
سمعت صوت خالتى سندس وهى بتقول :
– سيدى … انت هنا !!؟
أبويا قالها :
– أيوه هنا ياسندس … ماتفتح يابغل حابسنا ليه !!؟
فتحت الباب وخدته فى حضنى وبكيت , فأدانى بالقفا وقال :
– ماتنطق يابغل حابسنا ليه !!؟
سمعت صوت نصير بيقول :
– أفتح يانينو أنتوا حابسنى ليه !!؟
فتحت الباب لنصير , وسمعت صوت نورا وهى بتقول :
– أفتح الباب يامارو … بطل هزارك البايخ ده , مش علشان كلت طبق الرز بلبن تقوم تحبسنى فى الاوضة !! أفتح يامارو بقولك .
جريت فتحتلها الباب ..
كلهم كانوا بيبصولى بأستغراب وفضول وقالوا فى صوت واحد :
– أيه اللى حصل ؟!!
بصتلهم وانا بضحك بعين مدمعه وقلتلهم :
– حمد الله على السلامة ياعيلتى .
قالولى فى صوت واحد :
-رد علينا يامارو أيه اللى حصل؟!
قولتلهم :
ما أعرفش أيه اللى حصل , أخر حاجه فاكرها أنه حصل زلازال فى الكهف وأحنا بنتعشي .
نورا قالت وهى بتمد أيديها ناحية العصايا اللى فى أيدى علشان تاخدها :
– أيه دى ؟!!
قولتلها وانا ببعد العصاية عنها :
– مالكيش دعوه .. وأياكى تيجى ناحيتها .
أبويا بص للعصاية بتفحص وبصلى وقالى :
– أها صح ؟ أيه العصاية دى ؟!!
قولتله :
– دى عصاية عادى … ااااا لاقيتها .. لا لا عملتها زى القوس من خشب الطقسوس.
نصير قال :
-أيوه يعنى عملتها ليه .. واد يامارو انا مش مرتاحلك .. أنت مخبى علينا حاجه يله؟!
قلتله :
-مش مخبى حاجة … هخبى أيه يعنى مانتوا زى الفل أهوه .
حنوش قال وهو متوتر:
-لا مش زى الفل … انا مش عارف أرجع جنى تانى !
نصير غمض عينه وفتحها تانى و قال بقلق وهو بيبصلى :
– وأنا كمان مش عارف أرجع جنى ..فيه أيه يامارو…
قطع كلامه لما أتفاجئنا بأبويا بيتحول بسرعة لاكتر من حيوان لسلحفاء ونمس وقطة ورجع بنى أدم .
نصير قاله :
– فيه حاجة يانور …
أبويا قاله :
– مش عارف ,القميص بيتحول لوحده , ومش قادر أسيطر عليه.
أبويا قالى :
– أنطق يامارو أيه اللى بيحصلنا ؟!!
قولتلهم :
– معرفش ياجماعة أنا زى زيكم معرفش حصلكم أيه , هو أنا هخبى عنكم أيه يعنى.
نصير قال :
– الواد ده بيتستعبط .. صح ياجماعه!!
كلهم قالوله بصوت واحد :
– أها!!
أبويا خطف من أيدى العصاية , فأتكهرب وهو ماسكها ورماها على الارض ,هز أيده فى الهوا وهو بينفخ فيها وقال :
– العصاية بتكهرب مع أنها خشب !!
خدت العصاية من على الارض وقولتله وانا مبتسم وببص على نورا :
– أها مانا معزم عليها عشان محدش يمسكها غيرى.
حنوش كان بيحاول يتحول جنى تانى وفشل وكذلك نصير , نورا كانت متنحه وبتفكر أو بمعنى أصح بتحاول تفتكر .
خالتى سندس ما أهتمش بالموضوع ودخلت المطبخ.
فقولتلها :
– ماتنسيش الرز بلبن ياخالة ..
أبوياضربنى على ضهرى وهو بيقول :
– وليك عين تاكل يابغل .. أنطق ياله كنت حابسنا ليه ؟
قولتله :
-كنت حابسكم علشان كنت بتتخانقوا مع بعض .
قالى :
-ليه بقى كنا بنتخانق مع بعض؟ !!
قولتله :
والله ماأعرف كنت بتتخانقوا مع بعض ليه ؟!!
رد عليا وهو مضيق عينه وقال :
-بس تعرف ليه نصير وحنوش مش عارفين يرجعوا جن تانى !!
قولتله :
– لا والله برضه ماعرف.
حنوش دخل فى الكلام وقال وهو جايب أخره :
– بس تعرف أيه الى حصل بعد الكهف ما اتهز!!
أبويا ونصير قالوا لحنوش فى صوت واحد :
حنوش قالهم :
– دى الحاجه الوحيده اللى فاكرها.
وبصلى وقال :
باقى القصة عند البيه اللى بيتستعبط !
لفيت وأديتهم ضهرى فأتفاجئت بيهم بينطوا عليا , أبويا ركب فوق ضهرى وحنوش ونصير مسكونى من أيديا وحاولوا كلهم يوقعونى على الارض .
نفضت أيدى فوقعوا على الارض , ونزلت أبويا من فوق ضهرى , فهجموا عليا تانى و نورا أنضمت ليهم وهجمت هي كمان عليا , نجحوا يوقعونى على الارض وقعدوا فوقيا ..
نصير وحنوش ثبتوا دراعى، نوشه قعدت على صدرى وأبويا لف أيده حوالين رقبتى وقالى وهو بيحاول يخنقنى :
– أنطق يامارو والا والله ما هتدوق طعم الرز بلبن تانى.
أتفاجئنا كلنا بباب الكهف بيتفتح من بره و دخل علينا شاب شايل شنطة على كتفه , وقف على باب الكهف وأول ماشافنا فوق بعض بصلنا بأندهاش.
قولناله كلنا فى صوت واحد واحنا على الارض :
-أنت مين ؟!
قال :
أنا … أنا بسأل على ماهر نور ناير.
سألونى وهما باصين عليه :
– مين الواد ده كمان يامارو.
قولتلهم :
– أقسم بالله ما أعرفه!!
- يتبع الفصل التالي اضغط على ( رواية ميراث نور ) اسم الرواية