رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل التاسع و الخمسون 59
نور / احمدك واشكر فضلك يارب فضلنا طول الليل نصلى و ندعى ترجع
نور تعيط حسام يمسح على راسها
حسام / بس للاسف محتاجه تستحمى زى ما انتى شايفه اللى خدوها ما هانش عليهم يغيرولها البامبرز
ندى تخرج من الاوضه بتتسند على ايدها السليمه حسام يبصلها ياخد حبيبه و يروح يقف قدامها
حسام / عارفه لقوها ازاى
ندى تبص لحسام و هى بتعيط
حسام / اللى خدها رماها و مشي راح يشوف حياته الناس سمعوا صريخ متواصل لمده ساعتين من شقه شاب عازب و الشقه فاضيه سابها جعانه لوحدها و خرج و فضلت تعيط ساعتين من الجوع
ندى تقعد فى الارض و هى منهاره من العياط على يغمز نور
نور / انا هجبلها غيار
نور تعدى تبعد حسام وتبصله برجاء حسام يبص الناحيه التانيه نور تدخل الاوضه
حسام / البامبرز سرب و فضلت ببلها لحد ما انا روحت كان نشف عليها كتر خيرهم ادوها رضعه نيمتها من تعبها … كانت فى شقه زياد
ندى تبص لحسام
على / كفايا يا حسام … الرساله وصلت
ندى و حسام يبصوا على على نور تاخد الغيار و تحاول تاخد حبيبه
حسام / سبيها فى حضنى انا اللى هحميها … كلوا انتوا الف هنا
حسام ياخد الغيار من نور و يدخل الحمام ندى تحاول تقوم نور تساعدها ندى تروح ورا حسام تلاقيه بيملا البانيو مايه يبص وراه يشوفها ندى تتكلم بتردد و هى بتعيط
ندى / ممكن انا احميها ؟
حسام / لا
ندى تعيط اكتر
ندى / ماشي غلط بس ما تقتلنيش يعني
حسام يقفل المايه و يروح ناحيه ندى
حسام / ما تعيطيش فى الحمام
حسام يشد ندى و يقفل الباب
حسام/ ايدك مربوطه لا هتقدرى تشيليها و لا تحميها و لا حتى تبلى ايدك … ساعديني اقلعها
ندى تساعد حسام و كل شويه تبصله
حسام / عاوزه تقولى ايه
ندى / انت ناوى على ايه
حسام / اللى انتى عوزاه عاوزه تطلقى و تنزلى مصر انا مش ناوى اجبرك على حاجه تاني و بصراحه مش ناوى اجى على نفسي تانى انا عملت كل اللى اقدر عليه و ما عجبش
ندى / احلف انك ما اديتنيش حاجه
حسام / هحلف بس لما نطلع من الحمام … و مش عشانك
حسام يروح يحط حبيبه فى المايه و يبدا يحميها و ندى تساعده
حسام / انا مش هدافع عن نفسي انتى كدا كدا شيفانى وحش … الحوار ده كان المفروض يدور بينا قبل اللى عملتيه … انا هحجز لعمى بكره جلسه نطمن عليه حالته مش عجبانى و واضح السبب من المكان اللى كنتى رمياه فيه … من باب الفضول مش اكتر … انتى كنتى ناويه على ايه
ندى / ما اعرفش
حسام / اه سورى نسيت … مش عارف سقطته ازاى زياد ده … قالك ايه خلاكى تصدقيه و تهربى معاه
ندى / انا ما هربتش معاه والله انا حتى ما شوفتوش خالص ولا مره انا كنت عند واحده عايشه لوحدها فى بيتها والله زياد ده
الباب يخبط
صوت نور / اجبلكوا حاجه
حسام / خلصنا ثوانى و نيجي كولوا انتوا
حسام يقفل الحنفيه و ندى تفردله الفوطه و تساعده ينشفها و يلبسوها
حسام / روحى كلى هروح اعملها ببرونه و ارضعها
ندى / انا هرضعها
حسام / انتى تعبانه و مش قادره
ندى / لا قادره انا اللى هرضعها … انت زعلان منى حقك بس لو سمحت
ندى تعيط
حسام / ما تعيطيش فى الحمام … انتى خسرتى دم كتير و من امبارح على محاليل كلى لقمه عشان تقدرى ترضعيها دا غير ان ايدك متعوره هتشيليها ازاى
ندى / بايدى السليمه عندى ايد سليمه والله بقيت كويسه هعرف بس سبنى
حسام / تعالى اساعدك
ندى تهز راسها و تفتح الحمام و تروح الاوضه و تقعد على السرير و حسام يحطلها حبيبه على رجلها
حسام / متاكده هتقدرى
ندى تهز راسها و تبصله برجاء يسيب حبيبه ندى تحضنها اوى نور تدخل
نور / انتى هترضعيها مش كانت ببرونه احسن
حسام / ما بتسمعش الكلام
حسام يطلع بره الاكل محطوط و مصطفى قاعد على كرسيه فى جنب و على واقف فى البلكونه حسام يروح يقف جنبه
حسام / احنا كنا نقف كدا و كافيه اللى اسمه زياد فى الوش كدا زيك زمان محلك اقصد
حسام ينفخ
حسام / بفكر اجر المحل اللى هناك ده و افتحه اى حاجه يمكن اعجب
على / انت بتقول ايه انت عارف انت بتقول ايه
حسام / واحد يضحك عليها بساندوتشين و التانى بكتابين
على يمسك فى حسام حسام يبتسم على يسيبه
على / انا كنت عارف انك مريض بس انت كدا بقيت مجنون
حسام / خدنا من العقل ايه اديك شايف من هم لهم
على / هو انت عاوز منى ايه بالظبط عاوز توصل لايه يعني
حسام / انت ايه اللى جابك
على / نور اللى
حسام / تؤتؤتؤتؤ عيب انا عارف ان الفلوس اللى جيتوا بيها كانت فلوس عمليه نور و الخلفه عند نور اهم بكتير من ندى
على / الكلام ده قبل ما ندى تكلم نور
حسام / انا مش عدوك
على / يا راجل
حسام / نور مبسوطه معاك و انت ما تنكرش انك مبسوط معاها
على / انت عايز ايه ما تجيب من الاخر عشان انا ثباتى الانفعالى بح كلمه كمان و صوتى هيعلا عليك و هنفرج علينا اللى يسوى و اللى ما يسواش
حسام / عاوزك مبسوط مع مراتك عاوزك راضي باللى وقفت لأهلها عشانك عاوزك ما تخسرش حاجه اقسم بالله ما هتقدر تعوضها
على / برده !! تمام يا حسام هعيد تانى انا مش هطلق نور تمام اطمنت كدا
حسام / تعال ناكل لقمه بقي
على / اتفضل انت مش جعان
حسام / تمام
حسام يدخل يلاقي نور خارجه من الاوضه
حسام / جوزك شكله محرج ياكل من غيرك اكليه و اكلى عمك وانا هاخد طبق و ادخل اكل ندى
نور / تمام … بالراحه عليها تمام ؟
حسام يبتسم و يبوس راس نور و يروح ياخد طبق و يدخل الاوضه و نور تدخل البلكونه
نور / يلا ناكل يا قلبي
على / مش جعان يا نور كلى انتى
نور / مالك مضايق ليه المفروض تكون فرحان
على / فرحان طبعا ان حبيبه رجعت بس مقلق شويه من اللى جاى
نور / ما يغركش كلام حسام دا بيحبها و بيموت فيها تعرف بس لو قالتله كلمتين حلوين هينسي اى زعل و كل حاجه ترجع زى ما كانت
على يبتسم
نور / تعرف ما هانش عليه ناكل و هى بترضع اخد الطبق جوه يا قلبي و زمانه بياكلها بايده مش بقولك بيموت فيها
على يهز راسها
نور / يلا ناكل احنا كمان انا ما اكلتش من امبارح و مستعده اكل خروف بحاله
على/ هو اللى بره ما يجبش خروف بس ممكن تتصبرى بيه و نبقي نخرج نغير جو انا و انتى البيت هنا كئيب و خانقنى
نور / بلاش النهرده خلينا على الاقل لحد ما نطمن على ندى بفكر نشوفلنا فندق و لا حاجه مش عارفه يعني نسيبهم لوحدهم يتراضوا و لا ايه
نور تغمز على
على / روحى اكلى عمك
نور / و انا مين هياكلنى
نور تبصله بطرف عينها يبتسم
نور / هو يعني حسام بيحب ندى اكتر من حبك ليا ؟ و عماله اقولك جعانه و اكل خروف بحاله و عماله اغمزلك بيحبها بيموت فيها انك تحس ابدا
على يضحك
نور / ايوه كدا اضحك
على / انتى ازاى اخته
نور / برده !! مفيش فايده فيك انا هروح اكل روح انت بقي اكل عمى
على / حاضر
نور تشهق
نور / يعني عادى تاكل عمى و انا لا
على / ايه !
نور / بتحب عمى اكتر منى
على / لا انا كدا اتاكدت انكوا اخوات
نور / ههههههههههههه يلا يلا تعال
نور و على يدخلوا على يبص على باب الاوضه مقفول يغمض و يتنهد
……………..
فى اوضه ندى
حسام بياكل ندى
ندى / انت مش هتاكل
حسام ياخد معلقه
حسام / لتفتكرى حاطتك حاجه فيه و لا حاجه
ندى تبصله
حسام / انا هطلب نقلى اى فرع تانى باى مرتب بقي مش مهم للاسف انا مرتبط بجمعيات هنا مش هقدر انزل مصر قبل ما اسدها كلها و معيش دلوقت ادفعها … حتى القرشين اللى حيلتى بفكر اديهم لنور انتى عارفه انها ضحت بفلوس العمليه عشان تدور عليكى بتحبك اوى
ندى / انا ما كانش قصدى كل ده يحصل
حسام / على فكره حاسس بيكي اوى انا كمان عملت حاجات كتير ما كانش قصدى انها تحصل كان كل همى اننا نبقي سوا بس الطريقه ازتنى و ازتك و ازت ناس كتير اوى زى ما انتى من غير قصد ازيتينا كلنا
حسام ياكل ندى و هى بصاله
حسام / انا ما حدش سامحني حتى بالرغم من انى حاولت بكل طاقتى اراضيكي و اعوضك ما نفعش
ندى / نامت
حسام يبعد الطبق و يساعد ندى تنيم حبيبه
حسام / نامى جنبها و ارتاحى و انا هطلع افرش بره و انام شويه مرهق جدا و عندى شغل الصبح ان عزرونى الفتره اللى فاتت فدا مش معناه انهم هيعزرونى الفتره الجايه و انا فى عرض دولار واحد
ندى / لو تحب نام هنا و انا
حسام / لا انا مش هنام معاكى فى اوضه واحده … كملى اكلك
حسام يشاور على الطبق و يفتح الباب و يطلع بره على و نور بياكلوا و ياكلوا مصطفى
حسام / لو حبيتي تنامى يا نور ادخلى جنب ندى و انا هفرش جوه جنب السرير و على فكره الكنبه دى بتتفتح سرير لو حد يحب يريح عليها
نور / كنا بنفكر ناخد فندق و نسيبكوا تتراضوا
حسام / انا كدا كدا هطلب نقلى فرع تانى فالشقه هتكون فاضيه هتقل عليكي بقي تاخدى بالك منها
نور / فكره كويسه عشان تبقي بعيد عن الزفته هدايه و لعلمك اللى ندى عملته ما غطاش على عملتك
حسام / فكرينى كدا مين فينا الكبير
نور / ما تحاولش انا زعلانه منك
حسام / و انا كمان والله يا نور زعلان من نفسي اوى
نور / كلك لقمه و خش ارتاح و سيب الباقي على ربنا
حسام يبتسم و يبص لعلى متابعه و يدخل الاوضه نور تروح تقعد جنب على
على / متاكده مش عوزانا نخرج من هنا
نور / نخرج حاضر هدخل اطمن على ندى و اغير و نخرج بس دلوقت كل
…………………..
فى شقه منال
منال / خير ما عملتوا و انا بكره هاخدك للدكتوره بتاعه نور شاطره اوى و تتابع حالتك من اولها
عمر يدخل من البلكونه
عمر / رجعت الحمد لله
منال / لقوا البت
أية / احمدك واشكر فضلك يا رب
منال / والله طول الليل بصلى و ادعى
أية / انا هقوم اكلم ندى
عمر / نايمين دلوقت اكيد تعبانين ضغط عصبى جامد الفتره اللى فاتت
أية / كدا على و نور هيرجعوا
عمر / مش عارف بس اكيد هيستنوا يومين تلاته كمان و لا حاجه
أية / و انت برده ناوى تسافر اسكندريه دلوقت
منال / دلوقت ايه مفيش سفر الصباح رباح الدنيا مش هتطير
نغم تدخل
نغم / يس مش راضي يخليني اللعب معاه
عمر / معلش يا يويو قومى شوفى العيال
أية تهز راسها و تقوم تدخل مع نغم جوه
عمر / انا لازم ارجع
منال / رجوعك ما لوش لزمه اصلا روح قفل الشقه و سلمها للراجل من سكات
عمر / و اسكتلهم على اللى عملوه
منال / ما عملوش حاجه كان ممكن يطلعوا زى ولاد الحرام و مش هنتكلم فى اللى عملوه
عمر يبص فى الارض
منال / من استغنى فنحن عنه اغنى
عمر / تفتكرى بقي أية هتسكت و مش هتحاول تتصل باسماء دى
منال / سبها لله اللى عاوزه ربنا هيكون
أية تدخل
أية / يس زعلان انه بطل يروح التمرين و بيقول انه عاوز يروح التمرين النهرده
عمر / طب ايه رايك نوديه النادى احنا النهرده و اهو نتفسح
منال / تصدق انت جدع انا هقوم اللبس
منال تقوم
عمر / و انتى ايه مش جايه
أية / ما انا لابسه
عمر / طب مش تقومى تلبسي العيال
أية / و انت بقي فاكر لما اولد انا اللى هعمل كل حاجه و انت هتقعد باشا
عمر / لا طبعا هعمل حاجات مهمه جدا
أية / زى ؟؟
عمر / هقعد كل شويه استعجلك
أية / يا راجل!!!
عمر / ههههههههههه هقوم اللبس يس و انتى لبسي نغم اتفضلى خلينا نمشي
أية و عمر يقوموا
أية / امال فين لما الواحده لما تحمل جوزها يقولها ارتاحى انتى و ما تقوميش و انا هعمل كل حاجه
عمر / منهم لله اللى بيروجوا للاشاعات المغرضه دى
عمر و أية يدخلوا اوضه العيال و هم بيضحكوا
…………………….
فى البلكونه عند حسام
نور / يعني ايه و سابوا الشقه بالبساطه دى
على / يعملوا ايه يكبروا الموضوع و نقلب على أية القديم و الجديد
نور / بس هم ما عملوش حاجه غلط
على / منهم لله بقي اللى كانوا السبب
نور تبص لعلى و تبص فى الارض
على / انا اللى مضايقنى ان اللى حصل ده ممكن يتكرر فى اى مكان هيروحوا فيه ان كانت أية ادارت فى النقاب عمر مش هينفع يتنقب
نور / المشكله ان اللى بيحاسب عمر واحد بيتفرج على قله الأدب دى بيحاسب عمر و ما لقيش اللى يحاسبه
على / انتى لسه مش عاوزه تخرجى انا بجد مخنوق اوى
نور / هنروح فين دلوقت الوقت اتاخر اصلا
على / اى حته بيقولوا لبنان حلوه اوى
نور / بكره الصبح نخرج و نعمل كل اللى انت عاوزه
على / بكره حسام حاجز لعمك جلسه علاج طبيعي بيقول انه حاسس ان حالته اتأخرت اوى
نور / و انا كمان حاسه بده ما هو بره اللى عاشه الفتره اللى فاتت ما كانش سهل
على / و لا اللى جاى هيكون اسهل
نور / ليه بتقول كدا تفائلوا بالخير تجدوه الحمد لله شوف كنا فين و بقينا فين دا ربنا كريم اوى انا للحظه خفت ما نلاقيهاش
على / الحمد لله دا احنا كنا نموت
نور / الحمد لله
حسام يدخل
حسام / مساء الخير
على يبص الناحيه التانيه و ما يردش
نور / مساء النور نمت كويس
حسام / والله قايم مكسر تشربوا قهوه
نور / ثوانى هعملك تشرب يا قلبي
على / ماشي
نور تمشي
حسام / هروح ابص على حبيبه
حسام يروح اوضه ندى يفتح الباب يلاقي ندى نايمه فى وضع الجنين و واخده حبيبه فى حضنها حسام يحاول يشيل حبيبه ندى تتفزع
ندى / حبيبه !!!
حسام / كنت هشيلها شويه وحشانى
ندى تتعدل و تقعد
حسام / عامله ايه
حسام يشيل حبيبه ويقعد على طرف السرير
ندى / هو انت هتاخدها
حسام / هاخدها و اروح فين هسيب بيتي و اهرب مثلا
ندى تعدل شعرها و تبص فى الارض
حسام / بصي نايمه ازاى
ندى تبص على حبيبه
حسام / لما تكبر هنحكيلها اللى حصل ده ازاى
ندى / فى حاجات كتير مش هينفع نحكيهالها لما تكبر
حسام / معاكى حق
ندى / هاتها شويه
حسام يشيل ندى حبيبه
حسام / على و نور كانوا جايين ياخدوكى معاهم مصر
ندى تبص لحسام
حسام / هتنقلى الشقه باسم حبيبه و ترجعيلى الشبكه … و كل واحد يروح لحاله
ندى / و حبيبه ؟
حسام / انتى ايه رايك
ندى / لو كانوا طلعوا عليك و هى معاك
حسام / انتى اللى خدتيها ليهم
ندى / و انت ما عملتش حاجه غلط يعنى
حسام / ههههه دا انا ما بعملش حاجه صح … انا اساسا ما اتعاشرش انا امى مسميانى دلدول بتسحل شغل و جمعيات عشان اى وقت تطلبي اى حاجه حاضر اكل فسح لبس حاضر دا حتى شغل البيت على الاقل شايل نصه
ندى / و انا ما انكرتش
حسام / انتى سبتينى و روحتى لراجل غريب وثقتى فى واحد غريب اكتر منى
ندى / و انت خنتنى
حسام / و انتى ما خنتينيش
ندى / اقسم بالله ما حصل اقسم بالله ابدا
حسام / و مرواحك لزياد و بيتانك بره البيت
ندى / قولتلك ما كانش معايا قولتلك بابا كان معايا طول الوقت
حسام / لو كان ساومك على حبيبه كنتى هتعملى ايه
ندى / انا جيتلك اول ما خدوها منى جيتلك
حسام / دلوقت افتكرتيني ما افتكرتينيش و انا رايح لزياد اترجاه يدلنى على مكانك و هو واقف قدامى يضحك على عجزى انا كنت بموت عليكوا ما سبتش بابا و لا مكان ما دورتش فيه
ندى / مش هعمل كدا تانى
حسام / انا كدا كدا قولت لعلى انى هطلقك تقدرى تاخدى ابوكى و تنزلى معاه مصر
ندى / انا ما ليش دعوه بعلى
حسام / و هو كمان ما لوش دعوه بيكي دا بمجرد ما عرف انى هطلقك بدل ما ياخد نور يعملها العمليه جالك
ندى / والله ما ليا دعوه بيه
حسام / يعني هيسيبك لما تطلقى
ندى / انا مش هخرب على اختى انا عمرى ما هجرح نور والله انا و على حوار و انتهى
حسام / وطى صوتك نور تسمع
صمت ثوانى ندى تحط حبيبه على السرير و تغطيها
حسام / انا بكره الصبح هروح الشغل و هرجع اخد عمى و على و نروح نطمن عليه انتى مش هتقدرى تيجي خليكي هنا مع نور و حبيبه و لو على عاوز يفضل معاكى
ندى / والله ما ليا دعوه بيه
حسام / كلمتى نور ليه
ندى / كلمت نور ما كلمتوش والله ما ليا دعوه بيه و الله ما ليا دعوه بيه لا هو و لا بغيره
نور تخبط على الباب
نور/ هو حقك و كل حاجه بس القهوه هتبرد
حسام / كنا بنتفق على تفاصيل الطلاق
نور تدخل و تقفل الباب و تبص لندى
نور / بتتكلموا جد
حسام / مش ده اللى كنتى جايه من مصر تكلميني فيه تمام انا موافق و مش عاوز الشقه باسمى بس باسم بنتى و انا متاكد انكوا مش هتسيبوها لوحدها
نور / و حبيبه ؟
حسام / انتى شايفه انها امينه عليها بعد اللى عملته
نور / حسام
حسام / اللى تاخد بنتها و تهرب مع راجل غريب
ندى تعيط
ندى / والله ما كان معايا والله العظيم
حسام / و انا اعرف منين احنا لقينا البنت فى بيته فى اوضه نومه ما يمكن كنتى معاه هناك
نور / حسام
حسام / طردك و خد منك البنت ما قدرتيش عليه جيتيلى
ندى / والله ما حصل والله ما كان معايا والله ما حصل
نور / كفايا يا حسام لو سمحت كفايا
حسام / ماشي هسكت شوفوا انتوا عاوزين ايه و انا هعمله عن اذنكوا
حسام يسيب الاوضه و يطلع بره ندى تبص لنور و هى بتعيط
ندى / والله ما حصل والله العظيم ما حصل
نور تحضن ندى
ندى / والله ما كان معايا والله زياد ما كان معايا والله
ندى تدوخ و يغم عليها نور تصرخ
………………………
فى النادى
ليلى / و لا هتكلم و لا ليا دعوه انا تعبت
منال / جدعه
ليلى / بس انا مش فاهمه يعني مش كفايا ساب كل بنات الدنيا و اختار واحده بظروف نور لا و بدل ما يعملوا العمليه و يفرحونة بعيالهم رايحين يتفسحوا فى لبنان وقته ده يعنى
منال مش قادره تكتم الضحك
عمر / هو بس
ليلى / المشكله اننا لو اتكلمنا بنبان ان احنا اللى وحشين حد يقول اننا خايفين عليهم و على مصلحتهم ابدا
عمر / انا بس عاوز
ليلى / انا اصلا مالى ما اللى يخلف يخلف و اللى يتجوز يجوز و اللى يسافر يسافر احرق دمى ليه انا مالى
عمر / والله عندك حق
ليلى / و انتوا بقي هتنقلوا هنا علاطول
منال / دا انا ريقي نشف من ساعه ما عرفت ان البت حامل هاتها هاتها هاتها بس تقولى لمين
ليلى / عينه واحده انتى هتقوليلى ريقي ينشف مع على و فى الاخر يقوم يبوس راسي و يمشي اكتر من كدا ما تاخديش
أية / اسماء مش بترد عليا خالص و بتكنسل
ليلى / اسماء مين
عمر / ما قولتلك كبرى مخك عنها بقي
أية / انا هقوم ابص على نغم مش شيفاها من هنا
عمر / تمام
أية تقوم
عمر / شوفتى مش هتبطل
ليلى / هو فى حاجه و لا ايه
منال / ما تاخديش فى بالك ايه يا عمر مش هتشوفلنا حوار الاكل و لا ايه
عمر / حالا ثوانى
عمر يقوم منال تبتسم لليلى
ليلى / خير ما عملتي انك كلمتيني اهو الواحد يغير جو
منال / على رايك المفروض نبقي نيجي هنا كتير
ليلى / معاكى حق قاعده البيت تخنق
……………………..
فى شقه ندى
حسام / انا علقتلها محلول شويه و هتبقي كويسه
نور / مش كنا نقلناها مستشفى احسن
حسام / هى مش محتاجه بس لو عاوزين نروح عادى
نور / لما المحلول يخلص ابقي قيسلها الضغط تانى لو لسه مش مظبوط نروح
حسام / خليكي جنبها انا هطلع بره
نور / تمام
حسام يطلع بره على يقف
على / فاقت ؟
حسام / ثوانى و تفوق المحلول يشتغل بس هبوط مش اكتر ما تقلقش اوى كدا
على / لا مش قلقان ما هو بطريقتك دى موتها مساله وقت مش اكتر النهرده بقي بكره بعده مش هتفرق
حسام / طريقه ايه مش فاهم
على / لا فاهم و فاهم اوى انت بتعمل كدا ليه و ايه لزمته الكلام السخيف اللى قولته ده
حسام / بقولك ايه يا على انا مش قادر لك
على / فى دى معاك حق ما انت ما بتقدرش غير على العيانه اللى جوه دى
نور تطلع من الاوضه
على / انا و انت عارفين كويس ان ندى ما تعملش حاجه زى دى و حتى لو زياد ده ضحك عليها فانت السبب
حسام / انا السبب !! انا السبب !!!
على / ايوه و ان كنت ناسي افكرك افكرك بكل مره كدبت عليها فيها لما خليتها تفقد الثقه فيك بكل مره استخدمت علمك اللى مش فاهم ازاى بدل ما تستخدمه تساعد بيه الناس مركزه بس انك تاذى بيه البنت الوحيده اللى بتقول انك بتحبها
حسام / ما عملتش هدايه بتكدب
على / و مين وصل هدايه لندى مين اللى دخل هدايه حياتكوا مين اللى زنى مش انت
حسام / مش عاوزه تكمل معايا تقول مش تهرب مع راجل غريب
على / و انت من امتى بتسمع ما انت من يوم ما ولدت و انت معتبر حبيبه ايدها اللى بتوجعها
حسام / و واضح ان ما طلعتش لوحدى فى غيرى كمان حاول يستخدمها برده بس الفرق ان انا مش هاذى بنتى هو رماها ما فرقتش معاه
على / هات من الاخر عاوز ايه
حسام / مش عاوز روح ارتاح شكلك تعبان
حسام يبص لنور و يدخل يقعد جنب ندى
على / انتى مقتنعه باللى بيقوله
نور / انا عارفه ندى و اخلاقها زى ما انا عارفه نفسي
على / و عارفه اخوكى و عمايله برده
نور / بس هى حطت نفسها فى موضع شبهه المفروض دورنا نهدى الجو بينهم
على / دا حتى مش مقدر تعبها ما يستنى اما تقوم حتى و بعدين يعاتب او يتكلم
نور / معاك حق بس اكيد الكلام جاب بعضه و اكيد هو موجوع انت نفسك ما تقدرش تكون مكانه و تتصرف طبيعي و بعقلك
على يروح يقعد
نور / انا مش بدافع عنه … بس المرادى الاتنين غلطانين مش حسام بس … ندى ما كانش ينفع تثق فى واحد غريب زى ما كلمتنى بعد ما هربت كان ممكن تكلمنى قبل ما تهرب
على / كلمتك لما كانت شكه انه بيديها حاجه و كلمتك لما عرفت انه بيخونها عملتى ايه
نور / ما كانش معاها دليل المرادى الوضع مختلف
على / المرادى ما قدرتش تستحمل
حسام يطلع من الاوضه
حسام / انت مش شايف انك الوحيد فينا اللى محموق اوى و شايف ان ندى ما غلطتش مع ان المفروض ان ندى تخصنا احنا ما تخصكش
على يسكت و يتصدم
نور / على بيدافع عن الحق
على و حسام يبصوا لنور
نور / بس هو ليه ديما نظره مختلفه للصح و الغلط و ان ندى ما تخصوص مخليه محايد انا حبي ليكي اوقات كتير بيخلينى اجى على ندى حبى للبيت ده سعيي ان البيت يستمر و ان حبيبه تتربى فى حضنك انت و ندى حضن ابوها و امها بيخليني اجى على ندى لانها الطرف الاضعف
حسام / واو
نور / انت غلطان زى ما هى غلطانه و غلطك اكبر لان ان كانت ندى عملت حاجه غلط فانت عملت حاجه غلط و حرام
حسام / و هروبها مع زياد
نور / زياد ما كانش فى الفيديو لما ندى ركبت العربيه هى و عمى و زياد كان فى الكافيه لما روحتله تساله عنها يعني ما راحلهاش و انت عارف اخلاق ندى اكتر منى لا هى كدابه و لا خاينه و لا ممكن تعمل اى حاجه تغضب ربنا و ان كانت غلطت و وثقت فى زياد فدا عشان انت ما خليتلهتش حد
حسام / انا !!
نور / و انا كمان شريكتك سكوتى على حاجات كتير غلط عملتها و اخرها طريقه جوازك منها مهما كانت حسنه نيتي انت خليتني شريكتك
حسام / انا عملت المستحيل عشان ارضيها و اسعدها
على / و عملت كل حاجه تكرها فيك برده ضرب و خيانه و المنيو لسه طويله
حسام / حقك طبعا حقك ما إذا كانت اختى نفسها بتقولى الكلام ده طبيعي انت تقول اكتر
ندى تقف على باب الاوضه و هى سانده على الباب بضعف
حسام/ انتى ايه اللى قومك تعالى
حسام يجرى يسند ندى جوه الاوضه نور تقرب من على
نور / كلامهم بيوجعنى
على يبصلها
نور / مهما حاولت اديك اعزار و ابررلك بس كلامهم بيوجعنى
على / ما عرفش يرد عليا فوجعك انتى عشان تردى انتى عليا و تبقوا انتوا الاتنين عليا
نور / و انا اخترتك قدام الكل اختارتك يا على
على / ايه يرضيكى و انا اعمله
نور / و لا حاجه انا مقدره انفعالك و اكيد محاوله انتحار ندى و كل الاحداث اللى بنمر بيها تعباك ادخل ارتاح
على / انا كنت بحاول اهديه عشان يبطل يجي عليها مش اكتر
نور / هدخل اطمن على ندى
نور تسيب على و على متابعها بحزن يبص لمصطفى متابعه
على / اعمل ايه ؟؟
مصطفى يبص فى الارض على يتنهد و يدخل الاوضه التانيه
…………………
فى النادى
أية تدخل تقعد و نغم فى ايدها
أية / هو عمر فين
منال / عملتى ايه فى التمرين يا نونو
ليلى / راح يجيب المنيو عشان نتعشي
نغم / الكابتن قالتلى انى شاطره انتى ليه مش جيتي تتفرجى عليا انتى مش وعدتيني
أية / ممكن موبايلك يا طنط
منال / والله رجلى بتوجعنى يا … اتفضلي يا يويو
أية تاخده و تبتسم و تروح فى جنب
منال / المره الجايه ان شاء الله هدخل معاكى جوه
أية تاخد رقم اسماء من موبايلها و تتصل بيها من موبايل منال اسماء ترد
أية / هو انتى عملالى بلوك انا ما اخدتش بالى غير لما فتحت الواتس
اسماء / أية !!
أية / هو فى ايه يا اسماء انا زعلتك فى حاجه
اسماء تقفل السكه أية تستغرب تحاول تتصل مره اتنين تلاته أية تستغرب ترجع الترابيزه
منال / هو يس هيخلص امتى
عمر يدخل
عمر / دى كل المنيوهات هنا
أية / تصدق اسماء عملالى بلوك بفتح الواتس ابعتلها رساله لقيت معمولى بلوك بكلمها من موبايل طنط اول ما عرفت انها انا قفلت السكه و عملت بلوك
منال / فى داهيه من استغنى نحن عنه اغنى
أية / بس ليه طيب انا عملتلها ايه
ليلى / دى كانت جارتك فى اسكندريه
أية / ايوه و كنا صحاب جدا
ليلى / صحبيه مصالح خلاص خلصت حاجتى من عند جارتى عرفاها العينه القذره دى
أية تبص لعمر
أية / هو انت اتخانقت مع اخوها بخصوص اقساط الموبايل
عمر / و دا ايه دخله باى حاجه
منال / هو اللى خلق اسماء دى ما خلقش غيرها يعني مضايقه نفسك ليه ما تروح يا عمر تشوف يس خلص و لا قدامه قد ايه
عمر / حاضر
عمر يمشي و أية تقعد منال تناولها المنيوهات
منال / خدى خدى شوفى تحبى تاكلى ايه ما فيش حاجه تستاهل تضايقي روحك عليها
ليلى / على فكره البيبي بيتاثر جامد بزعلك
منال / سامعه اسماء دى تستاهل تضايقي ابنك عشانها يعني
أية تحط ايدها على بطنها و تاخد المنيو تبص فيها
………………………..
فى اوضه ندى
حسام يفك الكانوله من ايد ندى
حسام / انتى بقيتي كويسه خالص اهو الحمد لله
نور / طب مش عاوز تقولها حاجه
حسام يبص لنور تبتسمله
حسام / انا اسف يا ندى
ندى / انا عارفه ان اللى عملته غلط بس
نور / بقولكوا ايه كفايا عتاب انتوا الاتنين غلطتوا و الحمد لله قدر و لطف كان ممكن تنتهى بشكل اسوء ما حدش فينا يستحمله لموا نفسكوا بقي
ندى تبص لحبيبه
نور / هسيبك تراضي مراتك يا حسام دا انت بتحبها حتى لو زعلان منها خليك انت الكبير مش شايف حالتها
حسام / تمام يا نور
نور / ربنا يهديكوا
نور تطلع بره و تقفل الباب ندى تبص لحسام
حسام / ما تخافيش انا هجيب عمى ينام جنبك و هنام انا فى الصاله و هسيب الاوضه التانيه لعلى و عمر
ندى / انا ما هربتش مع زياد
حسام / خلاص يا ندى مش عاوز اتكلم
ندى / بس انا ما عملتش كدا ما عملتش
ندى تعيط حسام يقعد جنبها و يمسح دموعها
حسام / خلاص تمام اهدى و اسف انا عارف انى كدبت عليكي بس والله كنت خايف اخسرك و بعدين … و بعدين دى والله كانت قبل ما اطلب منك تعفيني لانى ما كنتش عاوز اعمل كدا تانى لانى كنت مقروف منها و من نفسي انا بجد كنت مخنوق و جيتلك قولتلك عفيني و لما رضيتي قطعت علاقتى بيها و حاولت معايا كتير و لما ما لقتش معايا امل انتقمت منى فيكي بس انا ما عملتش كدا ما ادتكيش حاجه و بعدين لو كنت بديكي ايه اللى خلانى ابطل ما كنت فضلت اديكي و ما جتلكيش دوغرى و طلبت منك فكرى بعقلك يا ندى
ندى / انا تعبانه اوى
حسام / انا قولتك بلاش نتكلم بصي ارتاحى و انا هقعد بحبيبه و هجيب عمى ينام جنبك
حسام يحاول يشيل حبيبه
ندى / خليها جنبى خليها جنبى
حسام / مش هخطفها انا بس هقعد بيها فى الصاله و اسيبك ترتاحى عمى قاعد على الكرسي اكيد محتاج يفرد ضهره
ندى / انا نمت هاجى اقعد معاك فى الصاله
حسام / تمام لو قادره تعالى و لو تحبى تقعدى فى البلكونه
ندى / ياريت
حسام / تمام هتقدرى تمشي لوحدك و لا اسندك … انا مش هشيلك انا زعلان منك … بس هخليني جدع معاكى لحد ما تخفى و تقفى على رجلك
حسام يسند ندى يقومها
ندى / و بعد ما اخف
حسام يوطى يشيل حبيبه
ندى / و بعد ما اخف هتعمل ايه
حسام / بكره هروح الشغل و هطلب نقلى لو حبيتي تيجي معايا انا و حبيبه اكيد هكون أسعد واحد حبيتي تنزلى مصر مع على و نور و باباكى انا مش هقدر اجبرك على حاجه … بس برده مش هبقي ملزم ناحيتك انتى و ابوكى بحاجه … تعالى
ندى تبص لحسام يتحرك تتحرك معاه و هى ساكته حسام يفتح الباب يلاقي على و نور واقفين على باب الاوضه التانيه ياخد ندى ناحيه البلكونه
حسام / دخلى عمى جوه ينام شويه يا نور و ادخلى انتى و على فى الاوضه التانيه لو تحبوا انتوا ما نمتوش من الصبح
نور / والله خير ما عملت الجو فى البلكونه يرد الروح
على يبص على ندى باصه فى الارض يبص على نور بصاله يفتح باب الاوضه التانيه و يدخل نور تروح تزق عمها فى اوضه ندى و حسام يقعد ندى فى البلكونه
حسام / اجبلك حاجه تاكلى او تشربى
ندى / شكرا
حسام يقعد و حبيبه على رجله بيلاعبها ندى تبص عليه يبصلها
حسام / شبهك اوى كانى بلاعبك و انتى قدها كنت برده اقعد كدا و اخدك على رجلى
ندى تبتسم
حسام / كنت اتعصب اوى لما تعمليها عليا عمتى الله يرحمها تقولى ما حدش قالك شيلها و اقول مش هشيلها تانى و بعدين اول ما تغيرلك و استحمى و اللبس الطقم النضيف اجرى اشيلك و مهما يقولوا بلاش كنت اشيلك برده و تعمليها عليا تانى و اتعصب تانى و هكذا و هكذا و هكذا … طب والله البت دى عرفانى بصي بتضحكلى ازاى
ندى تبتسم
حسام / فى اغنيه مش فاكر بتاعه مين بتقول فى خيط رفيع رابط ما بينا و ده النصيب هتخاف عليه هخاف عليه هتسيب هسيب … بس انا عمرى ما سبت بس ما عدتش قادر امسك لوحدى اكتر من كدا
ندى / جنات … دى اغنيه لجنات
حسام /اه تقريبا طول عمرك اشطر منى فى الحاجات دى انا ما كنتش فالح غير فى المزاكره حتى لعب الكوره مع العيال ما كنتش بحب اللعب معاهم
ندى / عشان ما بتحبش تخسر
حسام / بس كنت بسيبك تغلبيني
ندى / مش ديما
حسام / لا والله ديما عمرى ما سبتك تخسرى
ندى / يعني عمرى ما كسبت بمجهودى ابدا
حسام / طب انتى عمرك كسبتى حد غيرى
ندى / كسبت نور
حسام / هى دى بتعرف تلعب
نور تدخل
نور / الله الله بقي كدا
حسام /هاتى كرسي و تعالى اشهدى مش كنت ديما بسيبها تكسب
نور / ندى كانت شاطره فى الالعاب اللى بتعتمد على الحظ من يومها حظها بومب انما بقي اللعاب الذكاء فحدث و لا حرج
ندى / و انا غبيه و لا ايه
نور / لا متسرعه مش بتفكرى قبل ما تلعبى
ندى / دا لعب يعني
نور / بقولكوا ايه انا مش قادره هخش انام و اسيبكوا تستعيدوا الزكرايات سوا
حسام / تصبحى على خير
ندى / تصبحى على خير
نور / انا حطيتلك مخده و غطا على الكنبه يلا تصبحوا على خير
نور تمشي
حسام / بفكر اتصرف فى قرشين اديهملها بدل الفلوس بتاعه العمليه
ندى / مش هيرضوا
حسام / لا هترضي انتى عارفه قد ايه نفسها تبقي ام بس بتحبك اوى ما استحملتش عليكى الهوا و جت جرى
ندى / انا كمان بحبها اوى انا ما عدليش غيرها اصلا
حسام / ناويه على ايه يا ندى تفتكرى لما نطلق حتى لو سبتلك حبيبه على هيسيبك فى حالك تفتكرى لو نور عرفت
ندى / و هو انت هتسيبلى حبيبه اصلا
حسام / و هل يضر الناقه سلخها بعد دبحها يا ندى ما انتى دبحتيني خلاص
ندى / نبقي خالصين ما انت ياما دبحتنى
حسام / بنت امك يا بت بنت امك بس انتى البامبرز ساترك … هقوم اغيرلها لحسن الريحه عمتنى
ندى تضحك حسام يشيل حبيبه و يدخل جوه تبص على الشارع و تقوم تروح وراه تلاقيه منيمها على الكنبه و بينضفها
ندى / و انا فى البلد بيسموها ضيعه
حسام يبصلها
ندى / ما كنتش عارفه هعمل ايه و لا اروح فين بس كنت محتاجه احس انى حره انى اقدر اطير انى انسي و لو للحظه ان رجلى لسه مربوطه فى القفص بحبل و انى مهما بعدت هرجعله
حسام / و حبيبه الحبل ده ؟
ندى / النصيب
حسام / القفص هيفضل طول عمره قفص طول ما انتى شيفاه كدا طول ما انتى فاكره انك مربوطه بيا عشان حبيبه او عشان جابرك او حتى عشان فلوس علاج ابوكى الغاليه او اى سبب تانى … الجواز مش اساسه الحب الجواز اساسه الموده و الرحمه و دا كلام ربنا مش كلامى و انا ما قصرتك بس مهما هعمل طول ما انتى شايفه جوازك منى قفص مش هيفرق بقي ان كان دهب و لا صفيح هيفضل قفص و انا دلوقت اهو بقولك انتى حره يا ندى طيرى الباب مفتوح
ندى / جناحاتى مكسره
حسام / خلاص خليكي لحد ما جناحاتك تخف و وقت ما تحبى تطيرى الباب مفتوح ما هو على راى اللى قال اذا اردت شيئا بشده اطلق سراحه
حسام يشيل حبيبه و يقوم يقف
حسام / و انا عمرى ما اتمنيت غيرك
ندى تبصله
حسام / تحبى تشيلى بيبو شويه
حسام يشيل ندى حبيبه على ايدها السليمه
حسام / هنضف الليله دى واعملنا اتنين نسكافيه نشربهم على أضواء القمر
ندى تهز راسها
حسام / نورتى بيتك يا ندى
ندى تبتسم ابتسامه بسيطه حسام يوطى يلم البامبرز و الوايبس و الحاجه من على الكنبه
…………………
فى اوضه نور
نور و على نايمين على السرير كل واحد مدى ضهره للتانى على يلف و يبصلها
على / نور نمتى
نور تلفله
نور / لا يا على صاحيه خير عاوز حاجه
على / انا اسف
نور / على ايه
على / اى كلام سخيف سمعتيه ضايقك انا اسف انى حطيتك فى موقف زى ده
نور / يمكن انا اللى بغير عليك بزياده او يمكن انا حساسه بزياده بس دا ما يمنعش ان ثقتى فيك مطلقه
على / لو تحبى و ياريت بصراحه نشوف فندق
نور / مش قبل ما اطمن على ندى سامحنى مش هتقدر تهتم بعمى و حبيبه بايدها دى و حسام اكيد هيرجع شغله
على / بس مش هينفع ننام كدا على الاقل ناخد اوضه و يا ستى الفتره اللى حسام فيها فى شغله ابقي تعالى انتى اقعدى معاها و لما حسام يروح ارجعيلى
نور / ما يمكن حسام ياجر شقه اكبر فى المكان اللى هيتنقله و لا انت مش عاوز تقعد مع حسام فى مكان واحد
على / مش عاوز اكون مع ندى فى مكان واحد
نور / ايه !!!
على / ان كانت مامتك علقت و حسام علق انا و ندى مش هينفع نحتك ببعض تانى انا كان لازم ابعد من زمان اوى وجودى مش بيعمل غير المشاكل ليها و ليكي و لنفسي ابعد يمكن حياتها تهدى
نور / و هو انت اللى عفرت حياتهم دا انت ركبت الطياره و انت بتخاف منها عشان تساعدها
على / و وجودى فرق يعني
نور / وجودى انا فرق و لولاك ما كنتش جيت
على / انا بحبك يا نور و مش ناوى اخسرك
نور تقرب من على و تنام فى حضنه
نور / و لا انا هقدر اخسرك يا على
……………………..
فى اوضه ندى
ندى بتكلم أية على الماسنجر
أية / عاوزه احضنك اوى وحشانى جدا و شكلك تعبانه اوى
ندى / احسن كتير الحمد لله
أية / حاولت اكلمك كتير
ندى / حسام هيجبلى شريحه جديده ان شاء الله
أية / هو عمل فيكي ايه تانى الكلب ده
ندى / المرادى مش هو المرادى انا اللى عملت فى نفسي و للاسف كنت هدفع التمن عمرى كله الحمد لله قدر و لطف
ندى عنيها تتملى دموع
أية / انا نزلت مصر عمر خلانى الم كل حاجتى فجاه قاعده عند طنط منال كنت ناويه اروح بس هستنى لما على و نور يرجعوا عشان العيال اللى هنا عمر سافر تانى اسكندريه لوحده و طنط منال نزلت المحل و انا قاعده معاهم
ندى / خليكي معاها هتاخد بالها منك و انتى حامل
أية / دا اللى خلى عمر ينزلنى مصر بيقول السفر ايام امتحانات الترم التانى مش هتكون سهله و بطنى كبيره و كمان مش هيعرف يتصرف لوحده و انا ما قدرتش اقوله حاجه معاه حق … مع انى يا دوب كنت بدات اشم نفسي هناك بقي عندى … كان عندى صاحبه بس لما جيت هنا عملتلى بلوك … بيقولوا عشان مصلحتها معايا خلصت بس حاسه ان فى حاجه تانيه
ندى / ما تعبريهاش ما تستاهلش
أية / هترجعى معاهم
ندى تبتسم بسخريه
ندى / لا مش هرجع ابدا نور و على هيخلوهم هنا يتفسحوا شويه يحللوا القرش اللى ضاع بسببى و هينزلوا و هاجر شقتى اللى فى مصر مفروش
أية / ليه يا بنتى العفش يخرب حرام
ندى / محتاجه فلوس يا أية هاجر الشقتين يطلعلى منهم قرش بدل قفلتهم او على الاقل اجر واحده منهم
أية / عاوزه فلوس ليه انتى ناقصك حاجه
ندى / لا الحمد لله بس انا مش هينفع افضل كدا لا تعليم و لا شغل و لا فلوس و لا اى حاجه حسام قالى خليكي لحد ما تقدرى تقفى على رجلك و انا عمرى ما هقدر اقف على رجلى و انا قاعده مطرحى
أية / فهمت
ندى / نور هتظبط الدنيا بتقول ان ممكن طنط تعترض على انى ادخل غريب البيت فهنقل الرفايع من شقه بابا لشقتى و على هيشوف مستاجر لشقتى و اهو اى حاجه
أية / هتقدمى عندك و لا اونلاين
ندى / اونلاين انا مش هقدر انزل او اروح فى اى حته حبيبه و بابا هسيبهم لمين
أية / معاكى حق
ندى / انا هروح ارجع الموبايل لعلى بدل ما انا محتلياه كدا و لما حسام يجبلى الخط هبقي اكلمك تانى ماشي
أية / عامله ايه معاه و حسام عامل ايه
ندى / عادى على جوز اختى و لازم اتعامل معاه عادى
أية / جوز اختك بس
ندى / و ما ينفعش يكون اكتر من كدا … لمصلحه الكل
أية / يعني خلاص
ندى / دا خلاص من زمان اوى انت ازاى لسه ما اخدتيش بالك لحد دلوقت
أية / كان لسه عندى امل
ندى تبتسم بحزن و تجيب الكاميره على حبيبه بتلعب جنبها أية تبتسم
أية / يا قلبي وحشانى اوى كبرت ما شاء الله
ندى / دى الامل اللى باقيلى دى الامل اللى عايشه عشانه
أية / ربنا يخليهالك يارب … اما لو اجيب بنت قمر كدا
ندى / هتطلع احلى ان شاء الله هتطلع وحشه لمين
أية / لعمها
ندى تبتسم
أية / روحى اديله الموبايل و ابقي كلميني بعدين و انا كمان هروح اعمل الغدى
ندى / ماشي يا قلبي سلام
أية تحدف لندى بوسه و تقفل ندى تتسند و تقوم تفتح الباب و تبص مفيش حد تروح البلكونه على و نور واقفين و مصطفى قاعد ندى تدى لعلى الموبايل
ندى / شكرا
على يبتسم و يهز راسه و ياخده منها و يبص الناحيه التانيه ندى تبتسم بسخريه
نور / اعملك حاجه
ندى / شكرا … لو حابيين تنزلوا فى جنينه قريبه حلوه اوى هتعجبكوا و فى كافيهات حلوه كتير
نور / لما حسام يروح هننزل
ندى / انا بقيت كويسه ما تربطوش نفسكوا بيا اخرجوا لبنان حلوه و لو حسام اتنقل مش هنقعد فى بيروت كتير … بس ممكن تخليكوا فى الشقه لو عاوزين
نور / سبيها لوقتها ما اكيد المدينه التانيه دى هتكون كويسه برده امال حبيبه نايمه و لا ايه
ندى / صاحيه هروح اقعد معاها خدوا راحتكوا
نور / لا والله انا قصدى تجبيها تاخد شويه شمس
ندى / ما انا فاتحه للشباك جوه ما تقلقيش هسيبكوا تاخدوا راحتكوا … تيجي يا بابا تقعد معايا
مصطفى يهز راسه ندى تيجي تشد الكرسي على يقوم
على / خليني اساعدك
على يحرك الكرسي بره البلكونه
على / هتقعدوا فين
ندى / فى اوضتى شكرا
على يدخلهولها و يمشي من غير ولا كلمه ندى تبتسم و تقفل الباب
ندى / تحب تفرد ضهرك جنب حبيبه و لا اقرالك كتاب
مصطفى يشاور على الكتاب ندى تبتسم و تمسك كتاب
ندى / تمام نقرا شويه فى التربيه الايجابيه
ندى تقعد على السرير و تبدا تقرا
………………………
فى الشركه
هدايه / انت بتتشرط على ايه لتكون فاكر ان اللى هتعمله ما حدش غيرك يقدر يعمله
عدنان / برواقه هدايه حسام قصده مو هيك
حسام / لا اقصد معلش احنا كلنا لازم نفهم اننا فى مركب واحده يعنى اللى هيتهور و يدب مسمار فيها هيكون اول واحد يغرق
عدنان / انا اللى خبرتها تسوى هيك حقك عندى و هلا مرتك و بنتك حدك شو بتريد اكتر
حسام / هعوز اكتر من كدا ايه بس انا مش هينفع افضل فى بيروت
عدنان / هيدا هو الكلام المظبوط بيروت مانا محتاجتلك هدايه قايمه بالواجب انت الداهيه اللى متلك مو محتاج ريس فوقه … بتعرف شو من يوم شفتك و انا نظرتى فيك فى محلا … اصل اللى يسوى هيك فى اغلى الغوالى ما راح يهمه حدا و هيك رجال بيعدلولى راسي
حسام يبص لهدايه
عدنان / انتوا الاتنين كتير بتشبهوا بعضكن بس هيك خدنا فى الفيزيكس الاقطاب المتشابهه بيتناقروا هههههههههه كنت كتير اكرهها لهالماده هههههههههههههه
حسام / هستلم الشغل فين وامتى
عدنان / هدايه هتظبطهالك لا تعتل هم
حسام / هدايه تانى ما كفايا خدماتها اللى فاتت
عدنان / هههههههههههههههههه بكفاياك غلاظه حسام هيدي البقلاوه ما بتتعامل هيك بتعرف شو … انا حتى امور مرتى بسيبها لهدايه تزبطها الله يباركلا من يوم يومها رافعه راسي
حسام / اللى تشوفه طبعا
عدنان / طب شو اتراضوا من شان خاطرى حتى متل ما قولت حسام نحنا بمركب واحد هيك ما بيصير
حسام / انا تمام
هدايه / و انا تمام
حسام / انا كدا تعليماتى هاخدها مباشره منك صح
عدنان / ايى صح
حسام / تمام
عدنان / بالله خبرنى شو ساوت مرتك بعد ما خدوا منها اللصغيره
حسام / هتعمل ايه يعني رجعت
حسام يبص لهدايه
حسام / و رفضت تطلق و قررت تسامح مقابل انى انا كمان اسامح
عدنان / اكيد بتسامح والله ها القلب ما شوفت اكبر منه … شايفه هدايه كان وينه هالرجال يعلمنا كيف الواحد يمشي مرته
هدايه / و هى مدام لينا عمرها زعلتك برده
عدنان / شو ما خبرتكن ما راح تصدقونى لينا ما فيها غير المصارى تفيق بكير تضهر مع رفيقاتها على النادى او المول تشترى اواعى و اسكربينات شي جوليرى بيرجع الاولاد من المدرسه الداده تهتم فيهن و اخر اليوم ترجع تشوف شو اخبارن و تهتم ببشرتها و تنام اما انا مانى ببالها اضهر امتين ما بضهر ارجع امتين ما برجع مع مين كنت و لا شو عم ساوى ما فيها تشغل حالا
حسام / رمت طوبتك يعني
هدايه / اسمها مريحه و مريحاه
حسام / لا اسمها رمت طوبته انا مش عاوزها تريحنى عاوزها تسالنى رايح فين جاى منين كنت مع مين تغير عليا و تعيش عشانى قبل ما تعيش لبنتنا و نفسها عاوز احس بحبها ليا مش لفلوسي خوفها عليا اتاخرت ليه انت كويس ما تنامش غير لما تطمن انى روحت او بخير تقلق لو ما لقتنيش جنبها ما يحلالهاش اللقمه غير و انا معاها
عدنان / مو مبين عليك هالقد رومانسي
هدايه / ما تصدقش الافلامات دى … دى عده النصب … دا انت خليتها تقطع شراينها و وقفت تتفرج
حسام / انا حاربت الدنيا عشان اوصلها و لسه بحارب و كل حرب و فيها خساير نقطتين دم مش هيخسروا
هدايه / كان ممكن ما تلحقهاش
حسام / انا اصلا ما كنتش عاوزها تعمل كدا اكيد و لو كنت شوفتها ما كنتش سمحتلها و بعدين انتى مين اداكى الحق انك تحاسبيني او تحكمى عليا انتى حتى مش قادره تدارى غيرتك منها
هدايه / انا اغير من دى
حسام / لو كان عندك اللى يعملك ربع اللى بعملهولها ما كانش ده بقي حالك
عدنان / شو صارلكن كانى مانى موجود شو فى يا حسام روقى هدايه
هدايه / هروق هسيبهالكوا خالص هروح اخلص اجراءات نقله خلينا نخلص
هدايه تقوم و تمشي
عدنان / النسوان ما فيك تعاملهن هيك ليك يوم بتحتاجون ما بينسوا هيك كلمات
حسام يبص لعدنان عدنان يهز راسه حسام يهز راسه موافق
…………………..
فى شقه ندى
نور تخبط على باب ندى و تفتح الباب تلاقي ندى قاعده بتقرا كتاب و مصطفى و حبيبه نايمين ندى تقفل الكتاب و تطلع بره و تقفل الباب وراها
نور / الغدى جاهز تحبى تاكلى
ندى / تعبتى نفسك طب ليه ما ناديتينيش اجى اساعدك
نور / ما حصلش حاجه يعني
ندى / على فكره انا طبيخي اتحسن خالص ما تخافيش منى يعني
نور / انا متاكده من ده المهم دلوقت هتاكلى معانا ولا تستنى حسام
ندى / لا كلو انتوا انا هستنى بابا يصحى … اصل ممكن حسام يتصل فى اى وقت يقول انه جاى ياخده … انا مجهزاله كل حاجه بس قولت اسيبه يرتاح
نور / خير ما عملتى … بصي احنا كنا بنفكر نخرج انا و على نلف شويه بصراحه زهقت من قاعده البيت
ندى / طب ما دى فكره حلوه كلو و انزلوا
نور / لما حسام ياخد عمى اهو اساعدك
ندى / تمام
نور / ما تيجي نخرج كلنا سوا نروح السيشن و بعدين نتفسح كلنا ايه رايك
ندى / لا كدا اليوم هيضيع حرام و كمان انا مش قادره معلش
نور / تمام … فكرى تانى اغرفلك معانا
ندى / لا شكرا مش جعانه دلوقت
نور تهز راسها ندى تدخل و نور تروح المطبخ تلاقي على غارف صينيتين
نور / بتقول مش جعانه
على / سمعت … بس عمى لازم ياكل قبل ما ينزل هيفضل لحد ما يرجع من غير اكل
نور / اكيد هتاكله قبل ما ينزلوا
على / حسام هيكلمها وهو مروح هتاكل الراجل و لا هتلبسه و لا هتلبس و لا هنقف كلنا مدربكين بقي قدام الباب
نور / هو انت بتشيل هم كل حاجه كدا
نور / مش فاهمه .. انت عاوزنى اوديلهم صينيه الاوضه طب ما يقوموا ناكل كلنا على السفره
على / انا واخد قرار انى ما ادخلش و ما اتحمقش و ما … نور هى مش هتطلع تقعد معانا هتفضل فى الاوضه طول ما احنا هنا
نور / ليه يعني .. ما تافورش
على / تمام
على يشيل صينيه و يروح يحطها على ترابيزه فى البلكونه و يقعد و نور ماشيه وراه ببطئ اول ما تدخل يشاورلها تقعد
نور / تفتكر بجد تكون جعانه و مش عاوزه تطلع تقعد معانا ؟؟ طب ليه ؟؟ اكون زعلتها فى حاجه ؟؟
على ياكل
على / ما اعرفش ممكن تكون حاجات كتير بس من الصبح ما طلعتش من الاوضه و لا هى و لا حبيبه و لا عمى
نور / طلعت مرتين الحمام
على / صد رد حتى مره منهم ما رمتش السلام و عملت مش شيفانا
نور / ما تافورش هى بس شكلها مندمجه فى كتاب مهم
على / تمام
على يكمل اكل
نور / الاضمن ادخلها الصينيه كلت كلت ما كالتش اهو يبقي جنبها صح ؟؟
على ياكل نور تبصله و تروح المطبخ على يبص على الشارع
………………………
- يتبع الفصل التالي اضغط على ( رواية سلف و دين ) اسم الرواية