رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الستون 60
نور / تفتكر بجد تكون جعانه و مش عاوزه تطلع تقعد معانا ؟؟ طب ليه ؟؟ اكون زعلتها فى حاجه ؟؟
على ياكل
على / ما اعرفش ممكن تكون حاجات كتير بس من الصبح ما طلعتش من الاوضه و لا هى و لا حبيبه و لا عمى
نور / طلعت مرتين الحمام
على / صد رد حتى مره منهم ما رمتش السلام و عملت مش شيفانا
نور / ما تافورش هى بس شكلها مندمجه فى كتاب مهم
على / تمام
على يكمل اكل
نور / الاضمن ادخلها الصينيه كلت كلت ما كالتش اهو يبقي جنبها صح ؟؟
على ياكل نور تبصله و تروح المطبخ على يبص على الشارع
………………………
فى السيشن
حسام قاعد لوحده بره تليفونه يرن يبص فيه و ينفخ و يرد
حسام/ يا نعم
هدايه / اوراق نقلك خلصت و اجرتلك شقه كويسه فى منطقه نضيفه تقدر تستلمها من بكره
حسام / و مستر عدنان ما كانش ينفع يبلغنى هو بالكلمتين دول
هدايه / مستر عدنان مش فاضي لتفاهاتك دى و على العموم مش هموت و اكلمك يعني لتكون فاكر نفسك حاجه يعني لا فوق انت بالنسبة لى كنت شغل و بس
حسام / خلصتي البقين اللى كنتى هتموتى و تسمعيهملى
هدايه تقفل السكه فى وشه يبتسم باب الاوضه يتفتح و مصطفى يطلع زاقه ممرض حسام يديله فلوس و يزق عمه
حسام / هنروح نلم حاجتنا عشان بكره هنسافر بعيد عن هنا مكان ابقي فيه انا و انت و ندى و بس
حسام يبص على مصطفى مش مهتم باللى بيقوله
حسام / لو نور و على واحشينك اوى كدا خليك معاهم و ابقي ارجع اجيبك لما يجوا مسافرين
مصطفى يلف راسه و يبص لحسام
حسام / مع انى اشك انهم هيكونوا مبسوطين بالفكره دى اكيد هيبقوا عاوزين يتفسحوا و يهيصوا و يعيشوا جو العرسان و رومانسيات لبنان … اقولك خليك معانا احسن اهو ندور على مركز تانى تكمل فيه علاجك … بهدلتك دى بنتك السبب فيها مش انا يكون فى علمك
حسام يفتح العربيه و يركب مصطفى و يلف يركب
………………….
فى نيتكلب كبير
بنات و شباب بيرقصوا على و نور يدخلوا
نور / ايه المكان ده شكله ديسكوا كنت فكراه كفيه
بنت حلوه تدخل لابسه جيب قصير
بنت / اهلين نورتونا و انستونا شكلكن اول مره بتيجوا لهون انا بحفظ زبايني و بعمرى ما بنسي حدا
نور / شاطره بس معلش اصلنا كنا فاكرينه مطعم
البنت / تكرملى عيونك مصريه؟! كتير بحب مصر و بنات مصر اول مره على لبنان ؟؟
على / الترابيزه اللى هناك فاضيه ؟
البنت / على راسي اتفضل
البنت تتحرك قدام على
نور / احنا هنقعد هنا
على / شويه و نمشي نغير جو بصراحه عجبانى الدوشه
نور / الدوشه و لا حاجه تانيه
على / حاجه تانيه
نور تبص لعلى يغمزلها و هو بيضحك و يعدلها الكرسي تقعد
البنت / انا سهر رفيقتكم للمسا كيف ما بدكن نادونى
نور / شكرا
البنت تمشي
نور / ايه دى لزقه اوى كنت فكراها مش هتمشي دى كان ناقص تجيب كرسي و تيجي تقعد جنبنا
على / انبسطى
نور / ايه المكان ده بس … ليسوقنا خمره
على / اكيد فى عصير و اكل يعني و انا بصراحه تعبت من المشي
نور / خايفه بوليس الاداب يطب علينا و احنا كدا
على / ههههههههههه انتى عبيطه يا بنتى و لا ايه اكيد المكان ده مرخص
سهر تدخل و تحط منيوهين
على / المشروبات و الاكل هنا حلال صح
سهر / كيف ما بدك حلال حرام انا بدبرلك اياهن
نور / اللهم طولك يا روح كلميني انا يا حبيبتي معلش
سهر / تكرملى عيونك اؤمريني
نور تبص فى المنيو
نور / انا مش فاهمه نص المنيو ايه تسقيه مجدره يخنة القرع مكمور الباذنجان حمص بيروتي بطاطس بوريه باللبن سلطة … دا المنيو محتاجه مترجم الروكا مكدوس
سهر / التسقيه بالمصرى فته بس من غير لحمه فيها حمص ثوم مكسرات وخبز محمص و لبن
على / لبن !!
سهر / ايى بتقولوا عنه بمصر زبادى
نور / بناقص الاكله دى خلينا فى اللى نعرفه بصي خلينا فى الفتوش و التبوله و الكبيبه ايه رايك يا على
على / لا خلينا نجرب مش هنيجي لبنان كل يوم
سهر / هيك بيكون الحكى
نور تبصلها
سهر / طب شو رايكن حضرلكن وجبه ميكس راح طعميكن من كل الاكلات اللى عنا و المره الجايه بتطلبوا اللى تعجبكن شو رايكن
على / موافق
نور تبص لعلى و تبتسم لسهر من تحت الدرس
سهر / بجيبلكن عيران مع الاكل و لا بدكن شى تانى
على / عيران !!
سهر / شي مشروب منعش من اللبن و الحليب بيهضم الاكلات و بيريح المعده كتير منعش و مشهى
نور / تمام نجربه بالمره و لا انت ايه رايك يا على
على / ماشي
سهر / خمس دقايق و برجعلكن
سهر تمشي
نور / الله يعينك يا ندى .. فاكره لما حسام خدها عيد ميلاد هدايه اتحرق دمها نفس حرقتى دى بالظبط
على / ليه بس يا بنتى هو حد كلمك
نور / مش عارفه الجو موترنى
على / فكيها فكيها
نور / بحاول
على يمسك ايدها تبتسمله سهر تدخل وراها شاب شايل صينيه عليها مقبلات و سلطات تحطها على الترابيزه
…………………….
فى شقه حسام
حسام ينيم مصطفى على الكنبه فى الصاله و يغطيه و يدخل الاوضه ندى بترتب الشنطه
ندى / ما كنت سبته ينام هنا
حسام/ و نزعجه ليه و لا انتى مضايقه ليعرفوا اننا هنام فى سرير واحد لا سمح الله
ندى / لا مش مضايقني بس بابا تعبان و اخاف الكنبه تتعبه
حسام / انتى عارفه كويس انها مريحه
ندى / خلاص انا اسفه مش هتكلم تانى
ندى تقعد على السرير
حسام / انا ما قولتلهمش اننا مسافرين بكره على فكره اصل بصراحه مش فى نيتي اخدهم معانا
ندى / احسن خليهم هنا يتفسحوا و ينبسطوا
حسام يفتح شنطه صغيره و يطلع باسبورين
حسام/ بسبور عمى و بسبورك و حبيبه منضافه عليه لو تحبى تخليكي معاهم و ترجعوا معاهم انا مش همنعك
ندى تحط الباسبورات فى الشنطه تانى
ندى / انا ما خرجتش من الاوضه و انت مش موجود نور دخلتلى الاكل هنا فلو سمحت بطل
حسام / ابطل ايه
ندى / تلميحاتك دى
حسام / انا ما لمحتش لاى حاجه انا بس عاوزك مرتاحه
ندى / شكرا
ندى تكمل لم هدوم فى صمت
حسام / انا اسف
ندى تبصله
حسام / اسف بجد
ندى / على ايه
حسام / كل حاجه
ندى / و انا كمان اسفه … اسفه انى وثقت فى واحد غريب اسفه انى هربت وما واجهتش اسفه انى كنت هضيع بنتى انا كمان اسفه اوى
حسام / تعالى ندى لنفسنا فرصه اخر فرصه
ندى / ما افتكرش ان فى حاجه اسمها اخر فرصه … هتفضل تغلط و هفضل اديك فرص
حسام / و انتى يعني مش هتغلطى خالص مش هديكي فرص ابدا
ندى / خلينا نلحق نخلص
حسام يهز راسه و يكملوا لم الهدوم
……………………
فى شقه منال
أية / يعني ايه هتصفى فى اسكندريه
عمر / انا فكرت و لقيت الدنيا كدا هتبقي صعبه عليا انا سافرت هناك عشانك بس انا حياتى هنا يا أية
أية / بالبساطه دى
عمر / زى ما سافرنا بالبساطه دى نرجع بالبساطه دى هحول البضاعه اللى هناك حبه بحبه على المحل هنا و الزياده احطه فى شقتنا كمخزن لحد ما افضي المحل و اسلمه اول الشهر و انا بلغت صاحب المحل بالموضوع خلاص
أية / يعني مش بتفكر او بتنوى دا انت قررت و نفذت
عمر / ليكي مين فى اسكندريه تبكى عليه اوى كدا
أية / ليا اسماء… صاحبتى الوحيده
عمر / زى ما صاحبتيها صاحبى غيرها … و بعدين من فلاحتها اوى ما هى طلعت واطيه فى الاخر اهو و حلقتلك اول ما مصلحتها خلصت
أية / طب … طب اقساط موبايل اخوها
عمر / خلصوها الحمد لله
أية / ازاى و امتى
عمر / ربنا كرمهم بفلوس خلصونى انتى هتكرهى الخير ليا يعني
أية / لا طبعا بس … انا فى حاجه جوايا … عمر انا مش مرتاحه
عمر / حقك بكره هروح انضف شقتنا و نرجع نقعد فيها
أية / انا مش بتكلم عن كدا مع انى برده مش معترضه بس … انا اقصد انى حاسه ان رجوعنا من اسكندريه
عمر/ ما تبقيش انانيه بقي يا أية انا ما كنتش مرتاح هناك انا سبت دنيتي كلها عشانك بس مش مبسوط هناك لوحدى انا عاوز اعيش هنا ارجوكى
أية / تمام يا عمر …تمام
……………
فى شقه حسام
على و نور يفتحوا الباب
نور / شكلهم نايمين
على يبص على مصطفى نايم على الكنبه
نور / شكلهم اتراضوا و احنا بره مش قولتلك نسيبهم لوحدهم كل حاجه هتتصلح
على يبتسم و يهز راسه و يدخل الاوضه التانيه و نور وراه يغيروا هدومهم
نور / انا منفوخه على الاخر هحط راسي على المخده وانام للصبح
على / اى خدعه لففتك العالم اهو
نور / حصل
على / عشر سنين قدام مش هنخرج من البيت
نور / عشر سنين بحالهم!!! لا دا انا كدا انتقم هنا بقي … الا هو احنا هنرجع امتى صحيح
على / وقت ما تحبى نحجز تزاكر و نطير
نور / نقعد يومين تلاته كمان لحد ما ندى تشد حيلها و تقدر تعتمد على ايدها و نسافر اهو ما نبعزقش الفلوس اللى معانا كلها
على / اللى تشوفيه
نور تنام فى السرير و تستغطى و على يدخل جنبها و ياخدها فى حضنه
على / فى حاجه كنت عاوز اكلمك فيها
نور / مع ان الوقت غريب بس سمعاك اتفضل
على / انا اكتشفت اننا احيانا بنجرى ورا حاجه فاكرين ان هى دى اللى هتسعدنا بس فى الحقيقه و احنا بنجرى ما بناخدش بالنا اننا بنوقع حاجات تانيه لانها معانا مش حاسين بقيمتها
نور / انت بتتكلم عن الخلفه يعني ؟ انت شايف اننا لاننا معناش اولاد دى ميزه ؟ بص مش هنكر ان ليا صحبات كتير لما عرفوا اننا كفلنا يس ونغم استغربوا و قالولى بقي انتوا تبقوا عرسان و بدل ما تعيشوا و تتفسحوا رايحين تجيبوا عيال تربطوا نفسكوا و تايدوا حياتكوا بيهم بس ما تنكرش انهم ادوا لحياتنا طعم جميل … بس ساعات برده بقول يا ترى لو ربنا كرمنى بطفل هقدر اعدل بينهم و لا زى ما ماما بتقول … انا مش هنكر انى ساعات بخاف بس احنا علينا السعى … و برضه انت معاك حق لازم ما ننساش النعم اللى فى حياتنا و احنا بنسعى لازم نحافظ على التوازن ده
على يبتسم و يهز راسه
نور / عندك ندى مثلا شوف حسام بيعمل عشانها ايه و معيشها هى و حبيبه ازاى بس هى مقتنعه انها لو عاشت هى و حبيبه لوحدهم هتكون اسعد و جربت و الحمد لله انها جت على قد كدا
على / هو حسام بيعمل عشانها ايه يعني بيعمل ايه اى راجل ما بيعملوش بيساعدها فى شغل البيت ما انا بساعدك
نور / و انت مين قالك ان مساعدتك ليا مش فارقه معايا وانى مش مقدره تعبك
على / بس انا عمرى ما خون
على يسكت و يتنهد
على / تصبحى على خير يا نور
على يبوس راسها
نور / و انا برده عمرى ما قصرت فى حقوقك الشرعيه و انت من اهله يا على
على / انا اقدر ارد بس انا رايي ان رايي او رايك مش هيغير فى الواقع حاجه يبقي اسكت و احافظ على الود اللى بينا احسن
نور / ما افتكرش فى حاجه فى الدنيا ممكن تاثر على الود اللى بينا
على يبوس راسها
على / تصبحى على خير يا نور
نور / و انت من اهله يا حبيبي
………………………
فى شقه أية تانى يوم
منال و أية واقفين و فى اتنين ستات بينضفوا
منال / انا مش فاهمه مش كنتى ارتاحتى فى البيت بدل وقفتك دى
أية / هو انا بعمل حاجه ما انا بتابع بس
منال / انتى حره مع انى مش فاهمه ايه لزمته اصلا هو انا قصرت معاكى فى حاجه
أية / والله ازعل منك اكيد لا طبعا
منال / امال عاوزه تسبيني ليه بس دا انا ما صدقت مليتوا عليا البيت بدل وحدتى طول الوقت
أية / هو انا جيت هنا و سبتك انا بس بنضفها
منال / ما هى هتتقفل و تترب تانى يبقي ايه لزمته
أية / يعني احنا خسرانين ايه
منال / على رايك النضافه حلوه برده هههههههههههههههههههه
……………………
فى شقه حسام
نور / طب امشوا بكره طيب
حسام/ هو انا فى اجازه انا هستلم شغل بكره يعني يادوب اسافر دلوقت و افرش و انزل اشترى الحاجات الناقصه
نور / طب كنت قولت امبارح كنت لميت حاجتى و لا
حسام / و تلمى حاجتك ليه شقه طول عرض فقلب بيروت فيها كل اللى هتحتاجيه و تلاجتك مليانه و كل حاجه خطوتين منك انبسطى
نور / يا سلام
حسام / الشقه تحت امرك لاخر الشهر اتفسحى و انبسطى و قضي هانيمون تانى انتى تستحقيه
حسام يدى لنور ظرف
حسام / خلى دول معاكى
نور / ايه ده
حسام / مبلغ صغير خليهولك يمكن حاجه تعجبك او
نور / انا معايا فلوس
حسام / يا حبيبتي انا عارف بس انتوا لما هتنزلوا مصر هيبقى وراكوا مصاريف كتير و العمليه اللى عاوزه تعمليها
نور / على مش هيوافق
حسام / و على ماله دى فلوسي و بديها لاختى مش بديهاله و انتى حره تصرفيها زى ما انتى عاوزه تشترى لبس دهب تعملى شعرك الحلو ده
حسام يلعب فى شعر نور
نور / طب خليهم معاك يمكن تحتاجهم انت هتروح بيت جديد و اكيد هتنزل تشترى حاجات و
حسام / لا ما تقلقيش على اخوكى الحمد لله انا مرتبى كبير و كمان داخل جمعيات و عارف اظبط امورى كويس
نور / طب خليهم معاك برده و لو احتاجتهم
حسام / مش هتحتاجيهم خليهم معاكى حوشيهم بصي لما تعملى العمليه و ربنا يكرمك بنونو صغير كدا شبهك ابقي سميه حسام
نور / لا دا انت تاخدهم اسهل انت عارف اللى بينك و بين على
حسام يضحك
حسام / عاجبك فيه ايه ده
نور / والله حنين و قلبه ابيض زى الاطفال بالظبط
حسام / ماشي يا اختى اشبعى بيه مش انتى مبسوطه و بيعاملك حلو
نور تبتسم و تهز راسها
حسام / هعوز ايه تانى
حسام يديها الظرف ندى تدخل
ندى / احنا لبسنا
حسام / و انا جاهز
ندى تحضن نور
نور / لما تستقروا هاجى انا و على نقضي معاكوا يوم و نتفسح سوا
ندى / انتى تنورى فى اى حته
نور تبتسم
نور / و اكيد هتيجوا تسلموا عليا قبل ما اسافر مش كدا
حسام / اكيد طبعا … بصي انا ما بحبش اللحظات دى بس لازم نلحق الطريق قبل الضلمه معاكى المفتاح هنمشي بقي
نور تحضن حسام و تحضن ندى تانى يطلعوا من الاوضه على قاعد بيلاعب حبيبه جنبه على الكنبه و مصطفى قاعد على كرسيه ندى تدخل تشيل حبيبه عنيها تيجى فى عين على يبتسم تبص لحبيبه و تروح تقف جنب حسام
حسام / هنزل الشنطه واطلع اخد عمى
ندى / هاجى معاك
حسام يشيل شنطتين و ينزل و ندى تنزل وراه شايله حبيبه و شنطتها و نور واقفه فى ايدها ظرف
على / خير كان فى حاجه و لا ايه
نور / كان بيديني ده
على / ايه ده
نور / فلوس
على يعوج راسه و يرفع حاجبه
نور / قالى حوشيهم او هاتيلك بيهم حاجه قالى ان دى حاجه بين الاخوات قالى انه عارف انك معاك فلوس و مش مخليني ناقصنى حاجه بس
على يقوم يقف و يتحرك ناحيه البلكونه حسام يدخل
حسام / ما تساعدنى انزل عمى يا على ينوبك فيه ثواب
على يلف و يرجع يسنده و نور باين عليها الزعل
………………………..
فى شقه منال
أية و عمر قاعدين فى السرير
عمر / امال نضفتى الشقه ليه
أية / ما انا كنت ناويه امشي بس صعبت عليا لما قالت ماليين عليا وحدتى بس برده حاسه اننا متقلين عليها و كمان انت اكيد مقيد حريتها
عمر / يعني انتى عاوزه ايه دلوقت
أية / مش عارفه بس بقول اسيبها لله على الاقل لحد ما نور و على يرجعوا
عمر / انتى اللى يمشي وراكى يلسع تخليه يمشي بيلف حوالين نفسه
أية / انا !!!
عمر / انتى كل يوم براى نقعد معاها نمشي لا نقعد لا نمشي لا نقعد اجبلك ورده ؟
أية / تصدق انا الغلطانه انى قاعده معاك
أية تقوم من السرير
عمر/ رايحه فين يا بت
أية / انا الغلطانه انى سايبه قاعده الانس اللى بره و جيت اقعد معاك هنا
عمر / طب اطفى النور وراكى
أية تبرق
عمر / هقيل حبه بس
أية / تصبح على خير
أية تطفى النور و تطلع و تقفل الباب و عمر ينام
…………………..
فى شقه نور
على قاعد فى البلكونه نور تدخل و تحط صينيه امل
نور / حاجه خفيفه كدا
على / جه فى وقته جعان جدا
نور تقعد
نور / انت زعلان منى؟
على / ليه ؟
نور / انت عارف
على يسيب المعلقه و يبصلها
على / مش قولتيها بين اخ و اخته
نور / والله هو اللى صمم
على / يعني انتى ما خدتيهمش عشان العمليه
نور / ما احنا صرفنا فلوسها عشان نيجي هنا
على يبص على الشارع
نور / انا عارفه انك ربنا يوسعها عليك كمان و كمان بس والله هو اللى عرض
على / و انتى ما صدقتى
نور / لا والله هو اللى اصر و كمان ندى كمان كلمتنى و قولتلها لا و اصرات
على / على فكره انا مقدر موقفك جدا بس انا كنت هتصرف على فكره انا عارف انك نفسك تعملى العمليه انا مقدر والله بس
نور تبصله برجاء على يسكت
على / انا بقول نرجع و نوفر الفلوس احسن ما نبعزق الفلوس و نروح ناخد من اخوكى
نور / ما هو قالى خلى فلوس على للعمليه و اتفسحى بدول و انبسطى
على يبتسم و يبص على الشارع
نور / خلاص اللى تشوفه
على / انتى طلبتى منى حاجه و انا رفضت مخليكي ناقصك حاجه
نور / ابدا والله هو بس عشان التوقيت بص اعتبرهم سلف و لما ربنا يكرم هبقي احطهمله فى حسابه مع ايراد الصيدليه
على / دا مفيش فايده
نور / خلاص يا على اللى تشوفه
نور تسيب الاكل و تقوم تدخل اوضتهم و تقعد تعيط على يدخل
على / العمليه دى هتعمليها بكره الصبح يعني عشان النكد ده
نور / هو انت ما نفسكش تبقي اب
على / نفسي بس مش مستعجل و مش موقف حياتى عليها
نور / طب فيها ايه بس يعني لو عمر كان محتاج فلوس مش هتديله مش هتقف جنبه و بعدين على راى ندى احنا لما اختارنا بين العمليه و بين ندى و حبيبه جينا جرى فارجوك لو بجد بتحبنى
على / انا مش عاوزله افضال عليا
نور تعيط
نور / له عليا انا اخويا و جمايله عليا من يوم ما اتولدت اخويا و طول عمره جنبى و لما كنت بحتاج اى حاجه كان اول واحد يجرى عليا قبل الكل … فيها ايه يعني لما يساعدنى احقق حلمى انا ما ليش أحلام تانيه عمرى ما اتمنيت حاجه غير انى اكون ام انت حاسس بيا عارف يعني ايه
على يحضنها
نور / ياريتها قالت مفيش امل زى كل الدكاتره اللى قبلها ياريتها سدتها فى وشى و ريحتنى الامل بيوجع يا على بيوجع اوى
على / الامل بيحيي
نور / انا عاوزه ابقي ام يا على عشان خاطرى
على / لو بايدى ما اتاخرش بس دا رزق من ربنا احنا بس علينا السعى
نور / طب خد الفلوس و نعمل العمليه و نبقي بنسعى
على / يعني اتفسح فى لبنان و اصرف فلوسي و استلف من اخوكى
نور تمسح دموعها
نور / انا هدخل الم هدومى
على / مش النهرده
نور تبصله
على / خلينا يومين كدا
نور / و الفلوس
على / انتى مالك بالفلوس هو مين فينا راجل البيت انا و لا انتى بصي يا نور دى الناهيه هنتفسح شويه و هننزل مصر نروح نحدد معاد العمليه و الفلوس اللى خدتيها من اخوكى تاخديها ترجعيها تولعى فيها ما يخصنيش لا تتصرف على بيتي و لا عليكي
نور / ما انا ساعات بصرف من مرتبى
على / ليه ما بدكيش مصروف لو ما بيكفيكيش ما بتقوليليش ليه ازودك
نور / امال انا بشتغل ليه
على / بتتسلى بتضيعى وقت
نور / يعني لو انت محتاج ما اديكش
على / لما احتاج بس الحمد لله انا مش محتاج
نور / على فكره انت اوفر اوى و مش حوار رجوله و قوامه و الكلام ده كله حوار حسام و انت قولتها افرض خدتهم من بابا كنت هتعمل كدا برضه
على / انا جعان
نور / روح كل
على / تعالى افتحى نفسي
نور / ما ليش نفس … اعتبر ان بابا اخدهم من حسام و اداهملى
على / ما خلاص بقي يا نور
نور / والله العظيم حسام ما قالى اعمل بيهم العمليه قالى اشترى بيهم اللى نفسي فيه عشان ما اتقلش عليك فى مصاريفي و كفايا عليك فلوس العمليه والله حسام مش وحش زى ما انت فاكر و بعدين حسام و لا اى كان اللى هتتصرف منه ما كلها فلوس حلال
على يبتسم
على / بحييكى على اصرارك حقيقي لا بتتعبى و لا بتزهقي
نور تسكت
على / ماشي يا نور اعملى اللى يريحك خدى الفلوس و اصرفيها زى ما انتى عاوزه بس من باب الفضول ممكن اعرف كام
نور تروح تجيب الظرف و تديه لعلى و تبصله برجاء
……………………
فى شقه حسام الجديده
حسام و ندى بيتفرجوا على التليفزيون حسام يبص فى الساعه
حسام / اخد الفلوس و ما اتكلمش يعني
ندى / ما يمكن ما قالتلوش
حسام/ دى نور يا ندى ما بيتبلش فى بقها فوله قالتله بمجرد ما نزلنا
ندى/ هو انت اديتها الفلوس عشان يتخانقوا
حسام / اكيد لا
ندى / امال فى ايه مش فهماك
حسام / لا فاهمه … سي زفت و دور الهلالى اللى عايش فيه
ندى / انت حاطه فى دماغك ليه نور مبسوطه معاه سبهم
حسام / و انا عملت ايه ما انا اديتها الفلوس عشان يخلفوا و يتربطوا ببعض اكتر
ندى / امال انت مستنى ايه
حسام / مستنى اوريكي انه حتى لو الفلوس منى هياخدها
ندى / و توريني ليه و بعدين الفلوس منك دى مالها يعني فلوس حرام هى اخ مدى لأخته فلوس فيها ايه
حسام / ما فيهاش هقوم اعمل حاجه نشربها
ندى / ياريت
حسام يبص لندى و يقوم و هى عينها على التليفزيون مش معاه
…………………….
فى مصر
عمر سايق عربيه و منال جنبه و أية و العيال ورا
أية / ما قولت نستنى معاد المتابعه ما قالتش جديد
منال / ادينا اطمنا و الدكتوره كمان عرفت الحاله و هتعرف تتابع
أية / ماشي هتفسحونا فين بقي
تليفون عمر يرن يبص فيه
منال / ركز فى الطريق
عمر / دا على
منال تاخد الموبايل
منال / هات انا ارد عليه … الو
على / احلى الو دى و لا ايه
منال / يخليك ليا اوعى تنسي الزعتر اللى قولتلك عليه
على / جبته طبعا و دى حاجه تتنسي
منال / ربنا ما يحرمنى منك لا انت و لا اخوك معلش اصله سايق
على / احنا راجعين مصر بعد بكره
منال / بالسرعه دى
على / اه ما خلاص بصي القاعده ما لهاش لزمه هنتفسح يومين و نروح
منال / تنوروا
على / قولت اقول لعمر عشان يفضي نفسه يجبنى من المطار و يفضيلى نفسه عشان محتاجه فى حوار
منال / هقوله
على / اخبار يس و نغم ايه قوليلهم جبتلهم حاجات حلوه اوى
منال / تعيش و تجيب … بابا على جابلكوا حاجات كتير اوى و هيجي بعد بكره
يس / انا مخاصمه
أية / يس
يس يربع ايديه مقموص
منال / تيجوا بالسلامه يا على و اخبار نور ايه
على / فى الحمام لما تطلع هخليها تكلمك
منال / ما لوش لزوم كفايا اطمنت عليها
أية / ندى كلمتهم
منال / كلمتوا ندى
على / اه حسام راح الشغل و هيجيب اكل و هو راجع و مش ناقصهم حاجه الحمد لله
منال / الحمد لله
على / هستاذنك اقفل لو مش عاوزين منى حاجه
منال / مع السلامه خد بالك من نفسك و من مراتك
على / فى عيني … سلام
منال / سلام
منال تقفل
منال / ينفع اللى عملته ده يا يس
يس / عشان يبقي يسافر من غيرى
أية / بس هو ما كانش مسافر يتفسح يا يس
منال / و بعدين انت زعلان انك قاعد معايا و لا ايه لحقت تهضم الكب كيك اللى عملتهولك
يس / انتى اصلا عملاه فانيلا و انا بحب الشيكولاته
منال / عدى بينا يا عمر نجيب كاكاو نعمله كب كيك يمكن يرضي علينا
نغم / انا بحب الفانيلا عادى
أية تحضن نغم
أية / و انا بحبك حب مش عادى
………………………
فى شقه ندى
حسام يفتح الباب و يدخل شايل كيس الدنيا هاديه جدا و اضاءه بسيطه يحط الكيس على السفره و يدخل الاوضه يلاقيها فاضيه يتخض و يطلع يجرى يقابل ندى خارجه من المطبخ شايله حبيبه نايمه على كتفها
حسام / ندى
ندى / كنت بطفى على اللبن كان هيفور
حسام / و شايله حبيبه كدا ليه و فين عمى
ندى / بابا نايم فى اوضته و حبيبه نامت على كتفى فى المطبخ هدخلها اوضتها اهو
حسام / هاتيها عنك
ندى تشيلهاله يدخلها الاوضه و يطلع يلاقي ندى فتحت الكيس و بتطلع اللى فيه
حسام / اسف على التاخير اول يوم بقي و كدا
ندى / ربنا معاك
حسام/ نور حجزوا تزاكر العوده بعد بكره لو تحبى تيجي معايا
ندى / ما لوش لزوم بابا و حبيبه هيتعبوا طريق رايح جاى
حسام / هوصلهم المطار و اسلم الراجل الشقه و ارجعلك
ندى / تمام … عملتلى ايه فى حوار الدراسه
حسام / كلمت واحد صاحبى فى مصر هيسالك و هيرد عليا بكره و على كمان هيسالك
ندى / و ماله على بينا
حسام / ما لوش هو اللى قال الكلام جاب بعضه يعني
ندى / تمام بس خليك فاكر انت اللى بتجيب سيرته مش انا
حسام / دا جوز اختى يعني سيرته عمرها ما هتنقطع امر واقع و مفروض علينا
ندى تفتح الاكل
ندى / بسم الله
حسام / بخصوص الشغل
ندى تبصله
حسام / مش كنتى عاوزه شغل
ندى / فكرت فيها لقيت ان صعب مع حبيبه و بابا
حسام / لا فى شغلانة حلوه و تتعمل من البيت الشركه عندنا فيها منتجات تجميل كتير هخليكي تسوقيها و ليكي عموله حلوه
ندى / انا ما افهمش فى الشغلانه دى
حسام / و لا بتفهمى فى غيرها بس سهل تتعلميها يعني
ندى تبص لحسام
حسام / دا اللى قدرت عليه لو مش عاوزه ريحتى
ندى / لا عاوزه
حسام / تمام ناكل و نفتح اللاب و نعملك الصفحه و اعلمك تعملى كل حاجه
ندى / تمام
حسام / بس هتعمليلى قهوه
ندى / هعملك
حسام/ كلى بقي
ندى تبتسم و تاكل
……………….
فى شقه نور فى مصر
امانى / الف مليون حمد الله على السلامه نورتوا بيتكوا بس مش كنتوا قعدتوا يومين تلاته كمان
على / عشان نور تولع فى بنات لبنان
نور / ايه
على / كنا ندخل الكافيه من هنا تيجي بنت تستقبلنا من هنا نور تتشال و تتهبد من هنا
نور / يعني ما كانوش مايصين اوفر
ليلى / لا ما هو علي يتغار عليه عادى
امانى / تلاقيه كان بيسايرهم
على / انا !!! طب والله ابدا بس ما انكرش انى كنت ببقي مستمتع اصل نور غيرتها عسل اوى
نور / مش غيره بس كنت بضايق من مياصتهم ما انا ممكن اتمايص عادى على فكره
ليلى / و ايه اللى حايشك
أية / تتمايص فى بيتها انما قدام الناس
على / يا جماعه مش بيتمايصوا بس هم مش زينا يعني عادى و بعدين ادينا سبنالهم البلد بحالها
عمر / المهم انبسطتوا
نور / اكيد طبعا الجو و المناظر و الطرق حقيقي كل بلد و له سحره و جماله اللى بيميزه
منال / سبحان الله
على / مش عارف ليه نفسي هفانى على حلويات شرقي
عمر / و مين سمعك تعرف انا اول امبارح جبت طبق حلويات مشكل اسالهم عليه
أية / فعلا كان حلو اوى
على / طب قشطه قوم دلنى عليه
نور / ما تطلبوها دليفرى يعنى
عمر / بصي انا عارف مكانه انما اسمه .. كان ايه يا أية مش فاكره ؟
أية / كان تقريبا لارونا لامونا
عمر / لامونا ايه يلا يا ابنى كان زمانا وصلنا
أية / ما تبقاش تستلنى تانى
منال / هاتلى بقلاوه يا على
على / عيني مش هنتاخر
على و عمر ينزلوا
أية / طب على فكره بقي لا حكايه حلويات و لا نيله دول عاوزين يستفردوا ببعض
منال / ياختى ما تسبيهم خليهم يفكوا سوا و خلينا نفك احنا كمان فكى النقاب فكى كدا و خلينا ناخد راحتنا
نور / امال بابا لسه ماجاش لحد دلوقت
امانى / راح لعمتك النهرده اروى جايلها عريس و عمتك عوزاه يقعد معاهم
أية / و العريس عارف ان عمى كان حمى اروى
امانى / فى الاول و الاخر عمها و العريس عارف طبعا ان اروى اطلقت منها لله اللى كانت السبب
نور / منه لله اللى
منال / أية … قومى ساعدى نور تعملنا شاى
أية / قمت
أية و نور يدخلوا المطبخ
امانى / انا مش فاهمه قله الادب دى
منال / بقولك ايه يا ام حسام فكيها كدا انتى عارفه الحمل و عمايله
امانى / خليكي كدا دافعى عنها لما تمريعيها اكتر ما هى ممروعه
منال / دى غلبانه
امانى / والله ما غلبان الا انتى
امانى تقوم تفتح البلكونه
ليلى / يلاهوى ربنا يهدى
منال / هههههههههههههههه
………………….
فى شقه ندى
حسام يدخل شايل كيس من محل لبس اطفال ندى قاعده بتشتغل على اللاب
حسام / مساء الخير
ندى / حمد الله على السلامه اغرفلك تاكل
حسام / ياريت
ندى تقفل اللاب و تقوم تروح المطبخ حسام يروح يقعد و يحط الكيس جنبه و يفتح اللاب و يراجع اللى ندى كانت بتعمله ندى تدخل شايله صينيه تحطها جنب حسام
ندى/ كنت بشتغل زى ما علمتنى
حسام / ما انا بشوف اهو
ندى / بس ما فيش حد عبرنى
حسام / و انتى لحقتى ادى لنفسك فرصه … هقوم اغير
حسام يقوم يدخل جوه حبيبه تصحى
حسام / قلب بابا حسيتي بيا … وحشتك صح
ندى تدخل تلاقى حسام شايل حبيبه
ندى / هاتها عنك
حسام / سبيها انا اكيد واحشها اول ما شمت ريحتى صحيت بصي بتضحكلى ازاى
ندى تبتسم
حسام / صحيح البت حبيبه ابوها… انتى حبيبه بابى انتى قلب بابى
ندى / الاكل هيبرد كدا
حسام / صحيح افتكرت تعالوا
حسام يطلع فى الصاله ندى وراه حسام يديها حبيبه و يفتح الكيس يطلع فستان ابيض منفوش
حسام / فى فرح زميل لينا يوم السبت
حسام يمد ايده فى الكيس يطلع جزمه لحبيبه
حسام / هتبقي احلى من العروسه نفسها
ندى / الفرح فى بيروت صح
حسام / لا هنا .. ليه ؟
ندى / مفيش انت جايب لحبيبه بس فقولت هتاخد حبيبه لوحدها يعني عشان … انت فاهم انا و هدايه و كدا
حسام / انتى و هدايه ايه ؟ ما هى ممكن تيجي الفرح هنا عادى
ندى تهز راسها
حسام / و بعدين انتى مالك بيها اصلا اى كان حوار و انتهى … لو مش عوزانى اروح
ندى / لا ابدا بالعكس فرصه تغير جو
حسام / و انتى ؟ مش هتغيرى جو معانا
ندى / ما اعرفش … انت عاوز ايه
حسام / فهمت … كل ده عشان ما جبتلكيش فستان جديد صح ؟ انا قولت انك عندك كتير ما حدش شافك بيهم بس لو عاوزه واحد جديد فممكن ننزل بكره انا و انتى ننقيلك فستان حلو زيك كدا
ندى / لا عادى هبقي اشوف حاجه مناسبه من اللى عندى
حسام يحط الفستان و الجزمه فى الكيس و يقعد ياكل و ندى تاخد الكيس جوه
……………………..
على قهوه
عمر / انا مش مصدق اللى بسمعه
على / كان لازم اسافر و اشوف بعيني عشان اقتنع بكلامك
عمر / كل شئ نصيب و الرضا عباده
على / كان فى جوايا امل ان الايام تدور و ربنا يعوضنى عن الايام دى و يجمعنا عرفت ان الامل ده زى السم بيسود حياتى هيخسرنى نور و يخسرها حبيبه و حياتها كان لازم اقتل الامل ده جوايا انا و ندى عمرنا ما هنكون لبعض
عمر / بس ربنا عوضك بنور بتحبك و انت بتحبها و مش بس كدا عوضك عن الاطفال باتنين مفيش زيهم
على / الحمد لله صدقنى بصلى كل يوم ركعتين شكر عليهم
عمر / خد بالك اللى جواك ده شيطان شيطان بيوهمك ان ندى هتقدر تديك اللى ناقصك بيخليك مش شايف النعمه اللى فى ايدك فتتبتر عليها و تزول من وشك
على / كل ده فهمته فى السفريه دى بس انا ما كنتش بعمل ده لنفسي انا ما كنتش قادر اشوفها بتتعذب
عمر / ما فى ستات كتير عايشين عشان العيال
على / ما اترددتش ثانيه تنهى حياتها لمجرد انها بعدت عن حبيبه ما فكرتش مرتين قبل ما تقطع شراينها
عمر / ضعف ايمان يا على ربنا يهديها
على / نور مره قالتلى ان اللى بينتحر مش شرط يكون كافر ممكن يكون مريض و مش فى وعيه و ان الاكتئاب مرض خطير ممكن يخلى الانسان يعمل حاجات مش مسؤل عنها ياذى نفسه من غير ما يحس
عمر / بتتكلم عن عبير تقصد ؟
على / حياه صعبه و فيها شعاع امل بسيط خيط رفيع رابط بالدنيا و عايش عشانه و فجاه ينقطع تسود الدنيا فى عنيك لحظه انت فيها لوحدك مش لاقي ايد تتمدلك
عمر / ما دا برضه ضعف ايمان يا على لما توقف حياتك على حاجه او على شخص انك تستنى مساعده من بشر
على / انت مش مكان حد عشان تحكم عليه
عمر / معاك حق … دا اصلا مش موضوعنا … بص خلينا نتفق ان كلكوا طلعتوا كسبانين من الرحله دى … ندى حبيبه فى حضنها و مفيش حاجه ممكن تكون عندها اهم منها و حبيبه بين ابوها و امها و انت و نور بتحبوا بعض و حياتكوا مستقره و مش ناقصكوا اى حاجه الحمد لله حتى حسام معاه مراته و بنته
على / فاكر الفيلم بتاع البت السمره دى الفيلم الكرتون بتاع الاميره الضفدع دى
عمر / اه فاكره ماله يعني
على / الساحره العجوزه العاميه كانت بتقولهم اللى انتوا محتاجينه مش اللى انتوا عاوزينه
عمر / ايوه صح و انتوا كل واحد اخد اللى محتاجه مش شرط يكون هو هواه اللى كان عاوزه بس دا اللى انتوا محتاجينه
على / هتقدر جامعه اونلاين و تدرس و تاخد شهاده و تشتغل و تقف على رجليها عشان ما تبقاش محتاجه لحد هتعوض اللى فاتها من حياتها
عمر / جدعه دا نفس اللى بقوله لأية ما ينفعش حياتنا تقف مهما كانت المحن
على / بخصوص أية لسه بتسال عن اسماء
عمر يتنهد
على / فتره و هتنسي خليها تختلط اكتر بناس تانين
عمر / ما انا كنت فرحان باسماء و قولت هتختلط و تطلع للدنيا تانى ربنا وعدنا باللى قفلها فى وشنا ورجعنا نقطه الصفر تانى
على / اللى حصل مش شرط يتكرر
عمر / و مش شرط اللى يعرف الماضي يستر زى استاذ شريف ممكن يعمل زى جيران الهنا بدلوا الفيديوهات بينهم و بين بعض و حاولوا يبتزوها
على / فى كل مكان ولاد الناس و ولاد الكلب
عمر / بقولك ايه ما تيلا بينا بدل ما زمانهم افتكرونا طمعنا فى الحلويات و اكلناها
على / هههههههههههههههه فصلتنى قوم قوم
على يقوم يقف و يشاور للقهوجى و عمر يقوم و يعدل هدومه
………………….
فى شقه حسام
ندى قاعده شغاله على اللاب حسام يطلع من الاوضه يروح يقف وراها و يعملها مساج فى رقبتها و كتافها تبصله مبتسم و باصصلها
حسام / حبيبه نامت و عمى نام
ندى / هخلص حاجه كدا و انام
حسام / ما افتكرش انها ما ينفعش تتاجل للصبح كفايا شغل كدا عشان عنيكي
ندى تبصله
حسام / كفايا كدا قومى ارتاحى
ندى تقفل اللاب تقوم معاه و يدخلوا الاوضه حسام يقفل الباب
……………………
فى شقه على
يس / يعني مش هتسافروا تانى
على / لو هنسافر تانى هناخدك معانا
يس / وعد
على / والله يا ياسو ما كنا مسافرين نتفسح و لا قدرنا نقعد بعيد عنكوا اطتر من كدا
يس / انا مش بحب ابقي كل يوم فى بيت
على / حقك طبعا بس تيته منال مش حد غريب و عموا عمر و عمتوا أية بيحبوك زى مابحبك بالظبط
يس / و انا كمان بحبهم بس بحبك اكتر
على يبوس راسه
على / و انا والله بحبك اوى يا يس
نور تدخل هى و نغم على يساعد نغم تنام فى السرير
نور / بكره باذن الله هنروح الملاهى لو ما وراكش حاجه
على / بكره صعب شويه ممكن بعد بكرا ؟
يس / بعد بكره تمرين
على يبص لنور
على / هحاول اظبط امورى سبوها لله دلوقت وقت النوم تصبحوا على خير
نغم / و انت من اهله
يس / و انت من اهله
نور تطلع بره و على وراها يوارب الباب و يطفى النور
نور / صالحته
على / هحاول اخلص اللى ورايا بدرى بدرى و اجى على المغرب كدا نخرج و نتعشا بره
نور / حلو جدا هستناك تكلمنى نلبس
على / اتفقنا دلوقت بقي وريني السرير فين لحسن بسقط
نور تبتسم و تروح هى و على اوضتهم
…………………
يوم السبت فى اوبن ايريا
عريس و عروسه و معازيم و هدايه للبسه فستان نبيتي غامق قصير تيبست قاعده على ترابيزه مع عدنان و ناس حسام يدخل مانج ندى لابسه فستان اسود سمبل و حسام شايل حبيبه
حسام / مستر عدنان قاعد هناك و لازم اروح اسلم عليه
ندى / و هدايه كمان هناك
حسام / تمام هنروح نسلم سوا تمام ؟
ندى / تمام بس مش هنقعد معاهم
حسام / تمام
حسام و ندى يروحوا ناحيه عدنان عدنان يقوم يقف
عدنان / يا الله يا الله شو هالحلا شو هالجمال محلاها لصغيره الله يباركلن اياها
حسام / ميرسي
هدايه / هاى ندى
ندى / اهلا
هدايه / حلو الفستان مرفعك
ندى / هى الغوامق كدا بترفع مش انتى لابسه نبيتي عشان كدا برده
هدايه / تؤ عشان لون الدم
عدنان / ايي صبايا هيدا عرس ما فينا نختلف على لون الفستان تنيناتكن بتاخدوا العقل تقبرنى طلاتكن
حسام / هستاذنك نروح نقعد هناك
عدنان / شو ما فيك تقعد حدى هون بكفايا حارمنا من هالطله بيكفينا هيك شو ساعه … ست الصبايا لو تاذن
عدنان يبص لندى ندى تقعد حسام يعدلها الكرسي و يقعد ندى و هدايه يبصوا لبعض شاب يدخل يحط عصير لندى و عصير لحسام
عدنان / شو مرتاحين هون عن بيروت
ندى / هنا انضف … اقصد الجو و كدا حضرتك عارف الزحمه و التلوث بقي
عدنان / بدى شي يوم اخدكن عالضيعه منظر بياخد العقل والله بنقضي احلى يوم و ننبسط
حسام / اكيد باذن الله
عدنان / شو يا ست الصبايا امتين ما بدك تنوريني
ندى / عادى وقت ما تحبوا
هدايه / ايه رايك نروح فى الويك ايند
ندى / هو انتى جايه ؟
عدنان / فى ناس حياتى ما بتمشي بلاهم هادول مانهم ناس هادول هدايه
هدايه / ههههههههههههههههه
عدنان / ما راح تلاقى متلها بتنظيم الامور شغل مواعيد حتى اواعيي بتظبطلى اياهن
ندى / ااااه لا كدا بانت طبعا
ندى تبص لحسام
ندى / بتتعبى اوى انتى يا هدايه
هدايه / تصدقى حسام كان بيقولى كدا علاطول
ندى / بس يا خساره بتتعبى على الفاضي يعني مثلا البدله اللى حضرتك لابسها يا مستر عدنان
عدنان يبص على بدلته
ندى / المنديل و الجرافاته مش لايقين خالص فاقعين و مبهرجين اكيد دول زوق هدايه صح
عدنان / ايي صح بس مانهن هيك ابدا شوفى المنديل كيف لون الزهره اللى بالجرافات
هدايه / صحيح يا ندى هو السواد اللى تحت عنيكي ده ارهاق و لا حاجه تانيه
ندى / ضعف من الرضاعه بس ما تقلقيش حسام ما سكتش اخدنى لدكتوره و عمل اللازم و ادتنى فيتامينات ان شاء الله تجيب نتيجه
هدايه / لو تحبى انا ممكن اخدك التويلت خمس دقايق اضيعهولك خالص واضح ان نوع المكياج اللى بتستخدميه مش حلو
ندى / لا والله دى كلها براندات حسام ما بيستخسرش فيا حاجه بس انا بقي اللى مش بعرف استخدمها اصلي مش بستخدمها كتير انتى عارفه بقي الجواز و الامومه بياخدوا كل وقتى
حسام / انتى اصلا حلوه حتى من غير اى مكياج
حسام يبوس ايدها ندى تبتسم لهدايه
عدنان / انا بالأصل مانى شايف اى سواد تحت هادول اللئالئ بس انا بعرف النسوان فيهم يطلعوا ادق ادق تفاصيلك فما فيني ادخل اعزرونى
هدايه / ايه ده سلامتك
حسام / جرح بسيط عدت الحمد لله
هدايه / الحمد لله .. و انتوا بقى هتفضلوا قاعدين لينا كدا
الكل يبص لبعضه بصدمه
هدايه / انا هقوم ارقص دا فرح هاف فن
عدنان / ههههههههههههه
هدايه/ تحب تيجي معايا
عدنان / بتقبريني بهيدا الحكى
عدنان يقوم مع هدايه و هى بتشاور لندى باى
ندى / هو احنا هنطول
حسام / ليه و هو انتى قصرتى دا انتى طلعتى فتاكه انا ماسك نفسي عن الضحك بالعافيه
ندى / و انا ماسكى نفسي عن انى اجيبها من شعرها بالعافيه
حسام / بموت انا لما بتغيرى عليا كدا
ندى تبصله
حسام / ما تيجي نرقص
ندى / قدام الناس كدا
حسام / دا سلو يعنى مش حوار هو انا بقولك ارقصي بلدى
ندى / و ماله ما دا اللى ناقص
حسام / تصدقى عندك حق دا اللى ناقص فعلا لما نروح نبقي نكمله
ندى / هو ايه ده
حسام / انك ترقصيلى فاكره لما رقصتيلى فى مصر يوميها جننتى امى
ندى / هروح الحمام
ندى تقوم
حسام / تحبى اوصلك
ندى تسال واحد من الوايترز يشاورلها تمشي و حسام متابعها بعينه هدايه و عدنان يرجعوا عدنان بيضحك و ينهج و هدايه سحباه من الجرافاته و ماشيه بتترقص قدامه
عدنان / وينها ست الغوالى
حسام / راحت الحمام
هدايه / ربنا يسهلها
حسام / خفى فى ايه مالك
عدنان / حسام شو حكينا شو حكينا
حسام / انا بتكلم عليها ندى عارفه اللى كان بينا يعني كل كلمه هتقوليها هتفسرها انك غيرانه منها
هدايه / هتقول غيرانه منها تانى
عدنان / يا حسام هادول نسوان مع بعضن ما فينا نحن ندخل
حسام / بشوقك
ندى تدخل تقعد
هدايه / الحمام عامل ايه
ندى / السيتر اللى انت جايبه يقعد مع بابا اتصل
حسام / خير
ندى / بقول نروح بقي
حسام / تمام … معلش اصل عمى قعيد فكنت جايبله حد يقعد بيه بس شكله مش عارف يتعامل اهو بنخبط لحد ما نعرف الناس الكويسه اللى هنا
عدنان / هستناكوا فى الويك اند
حسام / باذن الله عن اذنكوا
حسام يانج ندى و يروحوا يسلموا على العريس و يمشوا و عدنان متابعها
هدايه / لو عجباك ما تقوم وراها
عدنان / و ليش اروح وراها و هى فيها تيجي حدى
هدايه / ما افتكرش
عدنان / لو ما فيها لحالها تخلص من حسام مين غيرى يقدر يخلصها منه
هدايه / مش دا حسام اللى قولت محتاجه فى الشغل دلوقت هتبيعه عشانها
عدنان/ كتير بضعف قدام هيك طبع حامى
هدايه / انت كدا بتلعب بالنار
عدنان / اول مره و لا شو خلينا عم نتسلى
هدايه تبص الناحيه التانيه و تقوم
هدايه / هقوم اسلم على صحباتى هناك عن اذنك
عدنان / فيكي تجيبيهن هون بنتعرف احسن ما تتركييني لحالى كتير قاسيه هيك وحده
هدايه / ههههههههههههههه دا انت مسخره
……………….
فى شقه امانى
امانى / يعني هتروحوا لوحدكوا برده
نور / هتيجي معانا تعملى ايه بس هى لمه على الفاضي
امانى / و هتودى العيال عند منال برضه
نور / هتقعدى بيهم يعني
امانى / لا مش فاضيه هنزل مع عمتك نشترى حاجات لجهاز اروى
نور / امال كنتى هتيجي معايا ازاى
امانى / كنت هعتزرلها طبعا
نور / لا اله الا الله ماشي يا ماما
امانى/ لو عوزانى اقعد بيهم ممكن اعتزر لعمتك
نور / لا خليكى مع عمتى احسن كدا كدا انا رتبت مع طنط منال خلاص
امانى / احسن ما فيش أخبار البت أية دى حامل فى واد و لا بت
نور / لسه بدرى اوى يا ماما
امانى / ليه هى فى الكام
نور / فى الشهور الاولى لسه مش هو بيبان فى السادس باين
امانى / ساعات بيبان قبل كدا على حسب بقولك ايه ما تشغليش بالك و ركزى بس فى اللى انتى فيه
نور / حاضر
…………………
فى شقه منال
منال / و انتى يعني لازم تسيبى كل حاجه لاخر يوم جابلك الورق ابدئي زاكرى اول باول تيجي بقي ايام الامتحانات تكونى هتولدى و لا تعب الحمل زايد عليكي ما يبقاش وراكى حاجه
أية / ما انا ذاكرته والله
منال / لحقتى دا لسه جايبهولك امبارح
أية / هو جايبلى مجلد دا حياله ملزمه اربع ورقات
منال/ هو انا هقدر عليكي اعملى اللى يريحك
أية / ههههههههههههه طب والله ذاكرتهم تحبى اجبلك الملزمه تمتحنيني فيهم
منال / و انا افهم فى التجاره عشان امتحنك لما جوزك يجي يبقي يمتحنك هو
جرس الباب يضرب
منال/ اهو جه قومى افتحى على ما اعدل طرحتى
أية تقوم تفتح عمر يدخل
عمر / ما تقولوش محشي
منال تقوم تقف
منال / قول سلام عليكوا الاول اه محشي و سخن حماتك بتحبك هروح اغرفلك
أية الحزن يملا وشها
عمر / ربنا ما يحرمنى منك ابدا
منال تدخل المطبخ عمر يشوف أية
عمر / مالك
أية / ما فيش ادخل غير و انا هساعد طنط فى الغرف
عمر يبصلها أية تسيبه و تمشي
……………………
فى الويك اند
حسام / انتى بتتكلمى جد و لا بتهزرى
ندى / قولهم حبيبه تعبت فجاه بابا تعب انا تعبانه
حسام / و هو طبيعي تبقوا تعبانين و اسيبكوا و اروح
ندى / طب ما تعتزر يا حسام اعتزر احسن و لا انت مش قادر تبعد عن هدايه
حسام / هدايه ايه و زفت ايه يا بنتى انتى ليه مش فاهمه مستر عدنان هنا الكل فى الكل و له علاقات
ندى / مستر عدنان ده راجل مش كويس
حسام / و انتى تعرفيه عشان تحكمى عليه
ندى / هى هدايه دى مش قد بنته يقوم و يرقص و يتمايصوا على بعض
حسام / هنا غير مصر الناس هنا اوبن مايندد
ندى / يعني انا بدل ما اخد مراتى فرح اخد هدايه و بدل ما اقضي الويك اند مع مراتى و عيالي اقضيه مع هدايه انا متاكده ان فى حاجه بينهم
حسام / و احنا مالنا
ندى / لانه لو عرف ان كان فى حاجه بينكوا
حسام / هى مراته عشان يغير عليها ما هى مدوراها مع نص الشركه
ندى تبصله باستغراب
حسام / استهدى بالله و قومى اللبسي ساعتين زمن هنغير جو و نرجع
ندى / مش عاوزه اروح روح لوحدك لو عاوز
حسام / تمام يا ندى
……………………..
فى النادى
أية / يعني الدكتوره قالتلك تتعاملى عادى
نور / مش عادى اوى يعني بس يعني ما اشيلش حاجه او ابذل مجهود بس مش هفضل فى السرير يعنى
أية / اصلا مين يقدر يستحمل يفضل فى السرير طول الوقت ده
نور / اديكي قولتى
أية / و هتعرفى انك حامل و لا لا امتى
نور / هههههههههههههه لسه شويه
أية / انا زهقتك باسالتى صح
نور / ابدا ياريت كان عندى اجابه لكل الاسئله دى
أية / معاكى حق
نور / انتى و ندى صحاب من زمان
أية / لا لما اتجوزت عمر .. بتسالي ليه
نور / اصلها كانت زيك كدا زمان بتسال كتير اوى و فى كل حاجه و ورا بعض ورا بعض
أية / هى ندى اصلا تتحب منه لل… اسفه
نور تبتسم
أية / انا بقي من يوم ما عرفتها و هى مكسوره و حزينه و شايله الهم غيرى السيره غيريها
نور / حسام قال لندى انه هيطلقها و ندى رفضت … و قبل ما تقولى اى حاجه ما كانش هياخد منها حبيبه و لا اى حاجه ندى اختارت حسام بكامل ارادتها
أية / يا ترى ليه … بقولك ايه مش قولت غيرى السيره
نور / الولاد خلصوا التمرين تحبى تقعدى شويه و لا نروح
أية / اللى تعوزوه انا عادى
يس و نغم يدخلوا
نور / اهلا اهلا بالابطال
……………….
فى شقه ندى تانى يوم
جرس الباب يضرب ندى تروح تفتح تلاقى عدنان ماسك ورد
عدنان / شو ما فيني ادخل و لا شو
ندى / اعذرنى حضرتك اكيد عارف ان حسام فى الشغل دلوقت
عدنان / ما خطر ببالى انه راح يسيبكوا لحالكوا بهيك ظروف و يهتم بالشغل ما تاخذيني انا جاى من بيروت على هون بس بعرف ان الوالد موجود
ندى تبتسم بحرج و تفتح الباب عدنان يدخل و يقعد
عدنان / بعرف انى جاى بدون موعد بس انا هيك كنت مفكر حالى مو غريب
ندى / اكيد طبعا تشرب حاجه ؟
عدنان / كاسه ماى ما فيني اتعبك
ندى / تعبك راحه ثوانى
ندى تروح اوضه ابوها
ندى / معلش يا بابا هتعبك بس مدير حسام بره و كنت عوزاك تقعد معاه
ندى تساعد مصطفى يقعد على الكرسي و تزقه بره و تقفل الباب
ندى / بابا الاستاذ مصطفى عم حسام
عدنان يقوم بسرعه يساعدها
عدنان / تعبتى حالك كان فيني انا ادخله لا تؤاخذنى يا غالى
مصطفى يبتسم
………………
- يتبع الفصل التالي اضغط على ( رواية سلف و دين ) اسم الرواية