رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل الثاني و الستون 62
نور / يعني ما بتصليش و عاوزه حياتك سعيده ازاى يا ندى
ندى / اتغيرتى
نور / كلنا اتغيرنا كلنا كبرنا
ندى تبتسم
نور / ايه رايك احنا الاتنين نقفل و نقوم نصلى
ندى / قومى تعالى
نور تبتسم
نور / سلام يا حوبي
ندى / سلام يا احلى اخت فى الدنيا
ندى تقفل حسام يدخل
حسام/ نونو
ندى تطلع بره
حسام / وحشتيني
ندى / حمد الله على السلامه جيت بدرى
حسام / ما كانش فى شغل استاذنت و جيت جرى بقولك وحشانى
حسام يبص يمين و شمال
حسام / هم نايمين و لا ايه
ندى / اه نايمين شويه اغرفلك تاكل
حسام / نايمين !!! دا انا جيت فى معادى بقي
ندى / معاد ايه ؟
حسام / تعالى بس و انا اقولك
حسام يشد ندى للاوضه
ندى / انا كنت قايمه اصلى
حسام / تصلى !! دى حجتك الجديده يعني فجاه كدا قررتى تصلى
ندى / انا كنت بتكلم مع نور و
حسام / انتى اصلا بتعرفى تصلى بتعرفى تتوضى اساسا و لا هو حجكك دى مش ناويه تخلص
ندى / انت بتكلمنى كدا ليه هو انا كافره يعني ايوه ما كنتش بصلى و قررت اتوب و اصلى دا بدل ما تشجعنى دا بدل ما تقولى تعالى اعلمك بتقولى كدا
حسام / و ايه كمان على صوتك كمان يمكن يصحوا
ندى تبصله باستغراب
حسام / و هم صاحيين قعدالى على التليفزيون او على اللاب انما و هم نايمين بتصلى و تقرى قران انما جوزك ده يولع مش كدا ما تعرفيش انتى ان علاقتك بجوزك اهم بكتير من اى حاجه تانيه
ندى / مين قال كدا
حسام / عشان الرسول قال إذا دعا الرجل امرأته إلى فراشه فأبت فبات غضبان عليها لعنتها الملائكة حتى تصبح
ندى / صلى الله عليه وسلم
حسام / عليه الصلاه و السلام حديث ده و لا مش حديث تحبى اقولك احاديث غيره بتاكد كلامى
ندى / يعني الخمس دقايق اللى هصلى فيهم هيقلبوا الدنيا كان زمانى صليت
حبيبه تصحى
حسام / و خمس دقايق ليه اتفضلى العمر كله قدامك … دى ما بقتش عيشه دى
حسام يطلع بره الاوضه و ندى تبص لحبيبه و تروح تشيلها و تشمها
ندى / تعالى اغيرلك و بعدين اصلي
……………………….
فى المحل عند ليلى
ليلى / انا حطيت صوابعى العشره منه فى الشق خلاص
منال / دا جزاته انه عاوز يسد دينه
ليلى / دين ايه الوليه ام نور دى مش قايله قدامك العمليه نجحت عشان بفلوس ابنى
منال / ما هو مش عاوز حد يقوله الكلمتين دول
ليلى / يعني مش كفايا الفلوس اللى بيبعزقها على ولاد الشوارع اشى نادى و تمرين و فلوس و سفره لبنان عشان اخوها و مراته بينهم مشاكل دا سفيه اقسم بالله دا واحد غيره عارف قيمه القرش بعد ما اتحرم منه سنين كان مسك ايده بس العيب مش عليه العيب على جوزك الله يرحمه
منال/ الله الله
ليلى / كان سابه حفر فى الصخر لا كانت نور بصتله و لا كان زمانه فى اللى هو فيه
منال / و لا احنا كنا هنبقي فى اللى احنا فيه نور هى اللى حننت قلبه عليكي و خلته يدور عليكي و يجيبلك تعيشي معاه و ما تنكريش انها شالتك على راسها
ليلى / شالت حصل شالت هى تشيل و امها تحط
منال / و على كتبلك الشقه وفتحلك المحل و عززك لو ما كانش الحج عمل اللى عمره كان زمان على يا كبدى فى دوامه الفقر لا فايق لا لروحه و لا ليكي
ليلى / انا مش قصدى و بعدين انا بحب نور و الله بس هى مشجعاه على الغلط
منال / ما يمكن اللى انتى شيفاه غلط ده هو السبب فى ستر ربنا علينا نتبتر احنا
ليلى / انا هسكت خالص ما انتى كمان مشجعاه
منال / ههههههههههههههه لا بقولك ايه مش هتقدرى على الحمار هتتشطرى عالبردعه لا يا اختى انا مفرهده خلقه مش حمل تنفيض
ليلى / هى أية عامله ايه معاكى
منال / نسمه شيلانى و مدلعانى و مش مخليانى احط ايدى فى قشايه و عمر بقي ربنا يباركله ما بيخشش البيت غير شايل و محمل اشي فاكهه و اشي خضار بصراحه مالوا عليا البيت
ليلى / بس مايدينك برده
منال / ابدا دا انا اللى خنقاهم الواد يا قلبي يضرب الجرس مع انى اديته مفتاح ما يفتحش ابدا و يدخل على الحمام و منه على اوضته ما يطلعش منها الا للشديد القوى دا انا ساعات بعمل نفسي نايمه يمكن يخرج و يفك شويه
ليلى / و ايه اللى جابركوا على كدا ما يروحوا
منال / ما صدقت خدوا بحسي و البت ايه كمان لا ليها حد و لا فى اللى يراعيها و اهم بيراعونى برده
ليلى / على رايك الواحد قاعد بين اربع حيطان بيكلم نفسه و الوقت ما بيعديش ببقي مش عاوزه اسيب المحل و اروح اصلي هروح لمين اقعد قدام التليفزيون اقول انا لو مت دلوقت ما حدش هيحس بيا
منال / بعد الشر عنك يا اختى ما تقوليش كدا امال لو ما كانش على بيكلمك كل شويه
ليلى / مش قصدى بس … انا لو جاتلى ازمه و لا ضغطى على فجاه ما حدش هيلحقنى
منال / لو مكتوبلك حاجه تحصلك هتحصلك لو وسط جيش بحاله و لو زهقانه من الوحده اهى نور دلوقت محتاجاكى اكتر من اى وقت هو اللى فى بطنها ده مش حفيدك اللى مستنظراه من الدنيا
ليلى / و اعمل ايه فى لسان امها اللى عاوز حشه
منال / امها دى غلبانه بق على الفاضي كبرى دماغك
ليلى / لا يا اختى كدا اريح
منال / براحتك بس برده فكرى فى كلامى
ليلى / سبيها لله
منال / و نعم بالله
…………………..
فى شقه ندى
حسام قاعد فى البلكونه ندى تدخل و تحط ايدها على كتفه يبصلها و يبص قدامه تانى
ندى / غيرت لحبيبه و رضعتها و حطيتها جنب بابا فى اوضته
حسام / صليتي
ندى / صليت
حسام / روحى شوفى وراكى ايه بقي
ندى / انا جيتلك اهو
حسام / ما عدليش مزاج
ندى تشد كرسي و تقعد جنبه
ندى / هو انا لما احاول اقرب من ربنا عشان يقربنا من بعض ابقي كدا بعمل حاجه تضايقك
حسام / ما تربى دقنك بالمره
ندى / مش هتليق عليا
حسام يبصلها يلاقيها مبتسمه
ندى / دا بدل ما تشجعنى
حسام / و ماله هصحيكي بقي كل يوم الفجر تصلى و تلتزمى بقي ضهر و عصر و مغرب و عشا مش و انا هنا بس
ندى / و ماله شجعنى
حسام / و تتحجبى هو فى صلاه من غير حجاب
ندى / اتحجب
حسام / هتنقطيني صح
ندى / هو انت مش بتغير عليا مش تغطيني عشان ما حدش يبصلى او يعاكسنى
حسام / الحجاب يشمل البلكونه و شباك الاوضه و فتح الباب لاى حد و لبسك طبعا النص كم و التلتين و البناطيل بتاعتك دول كلهم هيترموا
ندى / هبقي اللبسهملك انت
حسام يبصلها
ندى / انا بحاول ارضيك اهو
حسام / بجد بمزاجك هو روح يا حسام يروح حسام تعال يا حسام يجي حسام
ندى / على فكره بقى لا طاعه لمخلوق فى معصيه الخالق
حسام / الصلاه ممدوده
ندى / خلينا على راحتنا احسن
حسام يبصلها و يرفع حاجبه
ندى / انا بتحايل عليك على فكره
حسام / كتر خيرك وفرى تعبك
ندى / احسن
ندى تقوم و تدخل جوه و يسمع صوت باب بيترزع يقوم يبص يلاقي باب اوضته مقفول يروح اوضه مصطفى يلاقيه ماسك كتاب و ممدد و حبيبه بتلعب جنبه
حسام / اكلت ؟؟
مصطفى يبصله و يقفل الكتاب
حسام / اضربلها الجرس خليها تيجي تاكلك
مصطفى يمسك الجرس و يناوله لحسام
حسام / انا جبت اخرى منها
مصطفى يحط الجرس جنبه و يكمل قرايه
حسام / مستنى منك ايه يعني
حسام يروح يخبط على اوضه ندى ندى تفتح
حسام / مش هتاكلى
ندى / ناكل
ندى تزقه و تروح المطبخ يروح وراها
حسام / اضايقتى انك جيتيلى و كسفتك صح حسيتي بقي باحساسي وانا بقالى شهور بجرى وراكى
ندى تبصله
ندى / بحاول ربنا يشهد انى بجاهد نفسي وبحاول و صلاتى التقيله اوى على قلبك دى بصليها برده جهاد لنفسي و عشان ربنا يوفق بينا عشان البيت ده يمشي انا بحاول بكل طاقتى كانت هتاخد قد ايه الصلاه خمس دقايق بالوضوء شوف انت بقي مضيع وقت قد ايه
حسام / ما تضحكيش على نفسك انا وانتى عارفين كويس ابوكى و حبيبه كانوا نايمين ليه فى الوقت ده عشان لما اروح يبقوا فايقين و مصههلين و لما انا فاجاتك و جيت بدرى اتحججتى بالصلاه و دلوقت بتلمى الدور بعد ما ابوكى صحي
ندى / انت شيطانك قوى اوى يا حسام
حسام / اللهم قوى ايمانك يا شيخه ندى
حسام يطلع بره
ندى / ربنا ياخدك خنقتنى
……………….
عند دكتوره النسا بعد فتره
أية / يعني هعرف امتى
الدكتوره / لسه شويه يا مدام أية دا غير انه اصلا البيبي نايم على بطنه هشوف ازاى
عمر / هو فارق معاكى يعنى اوى كدا
أية / مش اعرف هسمى ايه هشترى لبس ايه و لونه ايه بتفرق طبعا و لا استنى لما ابقي اولد بقي و اكروت كل حاجه
الدكتوره / ههههههههههههههههه وجهه نظر برده
الدكتوره تناول عمل روجته
الدكتوره / هنمشي على العلاج ده الفتره الجايه
أية / تمام حاضر
عمر/ عن اذنك
عمر و أية يطلعوا بره و على و نور يدخلوا
على / السلام عليكم
الدكتوره / اهلا بالغاليين عامله ايه
نور / مش حاسه باى حاجه
الدكتوره / طب اتفضلى على السرير
نور تروح تنام على السرير و على يساعدها الدكتوره تروح تحطلها الجيل و تبدا تكشف بالسونار
الدكتوره / انا هسمعك صوت النبض النهرده
نور تبص لعلى و يبتسموا الدكتوره تشغل السماعات
نور / دا صوت قلبه ؟
الدكتوره / دا مش قلب واحد
نور / توام
الدكتوره تقفل السونار و تقوم نور تمسك ايد على
نور / توام يا على توام
على يبوس ايدها و يساعدها تلبس و يروحوا يقعدوا
نور / توام صح مشيمه واحده و لا اتنين اسمع انهم لو نفس المشيمه
الدكتوره/ دول تلاته يا مدام نور
نور و على يبصوا لبعض
الدكتوره / احنا بنحط اكتر من جنين عشان نزود نسبه نجاح العمليه
نور / و الحمد لله نجحت اهى ليه حاسه بقي ان فى حاجه
الدكتوره / وجود التلاته بيزود احتمالات مضاعفات تانيه احنا فى غنا عنها
نور / لا
على / و الحل
الدكتوره و نور يبصوا لعلى
الدكتوره / اننا نستغنى عن واحد من التلاته
نور / ازاى دا انا ما صدقت انا مستحيل
الدكتوره / روحى لدكتور و اتنين و تلاته و الجنين اللى هيتشال مش هياثر على اخواته بالعكس هيزود فرصه نجاتهم
على / و ازاى هنشيل واحد من غير ما ياثر على الباقيين
الدكتوره / اكيد عمليه
نور تبص لعلى
نور / لا تلاته تلاته انا راضيه
الدكتوره / انتى كدا بتاثرى على حياتك و حياتهم
نور / و اللى بيجيبوا سبعه فى بطن و الحاجات اللى بنسمع عنها دى
الدكتوره / و لا حتى دول حالات طبيعيه يا مدام نور و زى ما قولتلكوا شوفوا راى اكتر من دكتور بس لازم تعرفوا ان فى معاد محدد مش هنقدر نعمل العمليه دى بعديه و المجازفه دى هتكون على مسؤليتكم انتم
نور / ماشي على مسؤليتي
على / خلينا نشوف راى حد تانى
نور / حد مين ما كلهم قالوا مفيش امل احمل و اديني حامل فى تلاته اهو
على / نفكر بالراحه و نصلى استخاره و نشوف
نور / انا قررت
على / طب ممكن نكمل كلامنا فى البيت لو سمحتى
الدكتوره / ما تنسيش ان الحاله النفسيه مهمه جدا
نور / و انتى لما تقوليلى نزلى عيل من اللى فى بطنك يبقي بتفكرى فى نفسيتي
على / نور
نور / تمام نروح دلوقت و بعدين نبقي نكلم حضرتك
نور تقف على يبتسم للدكتوره بحرج و يطلعوا بره يقابلوا عمر و أية مستنين
عمر / خير مال وشكوا
نور / انا اصلا مش مقتنعه بيها
على / نتكلم تحت يلا
أية / خير قلقتونى
الكل يمشي بره
نور / ربنا يكرمنى بتلت توائم فى بطنى تقولى نزلى واحد
على / الواحد ده ممكن يتسبب فى موت الاتنين التانين
نور / و انا اضمن منين انهم يعيشوا لما انزل ده و بعدين هو ده مش إجهاض برده
على / ازاى و الدكتوره بتقول فيه خطي على حياتك و حياه اخواته
عمر / نشوف دكتور واتنين و تلاته ان شالله نروح للدكتوره اللى كنا بنتابع معاها فى اسكندريه كانت شاطره
على / قولت كدا و الدكتوره اللى جوه كمان قالت كدا
نور / ممكن تروحنى بجد تعبانه اوى
على يفتح العربيه نور تركب و ترزع الباب
عمر / روح انت معاها و احنا هنتصرف ما تشغلش بالك
على يهز راسه أية تبص لنور من الشباك
أية / ان شاء الله خير ما تقلقيش
نور تبتسم و تهز راسها و الحزن باين عليها على يركب و يسوق
عمر / ربنا يعينهم
أية / انا رايي تسمع كلام الدكتوره و خلاص
عمر / ربنا يقدم اللى فيه الخير
……………………..
فى شقه نور
نور تدخل الشقه على اوضتها على يجي يقفل الباب يلاقي امانى طالعه على السلم يسيب الباب مفتوح و يقف
امانى / هو فى ايه ما عدتوش عليا ليه
على / الحمد لله نور حامل فى تلت توائم
امانى / يا فرج الله
على / بس الدكتوره عاوزه تنزل واحد عشان نسبه نجاح التانين تزيد
امانى / ايه الكلام ده
على / انا هحجزلها عند دكاتره تانين اتنين و تلاته و عشره لحد ما نطمن و نرسي
امانى / و هى فين دلوقت
على / فى اوضتها
امانى تدخل تلاقى باب اوضه نور مقفول تخبط
نور / عاوزه ابقي لوحدى
امانى / طب افتحى نتكلم … كلتى طيب
على / سبيها تهدى شويه و انا هتكلم معاها
امانى / طب انا عامله مكرونه بشاميل تحت اطلعلها خرطه و حته فرخه و لا اعمل ايه
على / ما تقوليش بس لحد انها حامل فى تلاته
امانى / ليه و انا هبله بس هقول ان الدكتوره عوزاها تنزل العيل عشان فيه خطر على حياتها خلينا نغزى العين اللى راشقه فى حياتنا دى
على / اللى تشوفيه
امانى / ابقي طمنى عليها شويه و هطلعلكوا تاكلوا
على / احنا هنبقي ننزل ناكل معاكوا
امانى/ احسن و احسن هعملكوا حاجه حلوه
على / تسلم ايدك
امانى/ خليك جنبها و بالراحه عليها
على يبتسم و يهز راسه امانى تنزل على يقفل الباب و يروح يحاول يفتح الباب مقفول بالمفتاح
على / نور .. ممكن تفتحى
نور / لو سمحت يا على محتاجه ابقي لوحدى
على / انا عشت كتير لوحدى ما ادتنيش حاجه و لا داوت حزنى انا محتاج ابقي معاكى لو سمحتى … طب اغير هدومى طيب
نور تفتح الباب و هى بتمسح دموعها
على / الدنيا ما انتهتش … دى حياله بتبتدى يا نونو
نور تترمى فى حضن على و تعيط يطبطب عليها
على / اللى وصلنا لهنا كريم ان شاء الله هيعوضنا و احنا برده مش هنسكت يعني انا هقعد انا و انتى دلوقت ندور على ارقام كل دكاتره النسا و المراكز الكبيره و نحجز فيها كلها فورى ان شالله يكون الكشف بمليون جنيه
نور / و انت معاك مليون جنيه
على / يعني هو فى دكتور كشفه مليون جنيه اهو كلو نخع
نور تضحك
على / ايوه كدا وريني الضحكه الحلوه
على يمسح دموع نور و يبوس راسها
…………………..
فى شقه ندى
حسام يدخل يلاقيها بتصلى يبص على محمود قدامه طبق بياكل فيه بالراحه حبيبه تشوفه تروحله يشيلها
حسام / قلبى انا وحشتيني وحشتيني
ندى تسلم فى الصلاه
ندى / السلام عليكم و رحمه الله السلام عليكم و رحمه الله
ندى تلم السجاده و تقوم
حسام / حرما
ندى/ جمعا اغرفلك
حسام / ياريت و لا اقولك هنام الاول و لما اصحى ابقي اكل معلش تعبان اوى النهرده
ندى / خير مالك
حسام / قرف فى الشغل و قرف فى مصر بصي انا بجد مش قادر
حسام يدى حبيبه لندى و يدخل اوضته ندى تنزل حبيبه فى الارض و تدخل وراه
ندى / خير قلقتنى فى ايه
حسام / بقالنا يومين بنجرد انتى عارفه
ندى / اه بس انتوا المفروض خلصتوا امبارح
حسام/ فى عجز جامد فى صنفين كدا قلبنا المخزن مليون مره على امل حد نقلهم هنا و لا هنا ابدا
ندى / و بعدين ايه اللى حصل
حسام / جت الشرطه طبعا و مستر عدنان جه بنفسه و بيراجعوا الكاميرات دلوقت بصراحه ما قدرتش اكمل مستر عدنان قالى روح ارتاح و هستنى اشوف بقي هيكلمونى امتى عشان كدا بقولك انام و ابقي اكل بعدين
ندى / طب ارتاح و انا هاخد حبيبه اوضه بابا و نقفل علينا عشان نهديلك الدنيا
حسام يبتسم و ينام
ندى / هو انت عليك اى مسؤليه فى اللى حصل
حسام / اكيد مش مدير الفرع بس ان شاء الله يمسكوا اللى عملها او يلاقوا الادويه هنا و لا هنا
ندى / ان شاء الله خير ما تقلقش انا دعيالك فى الصلاه
حسام / داهيه لتكونى دعيني لنور كمان
ندى / دعيتلها طبعا
حسام/ بس كدا عرفت اللى حصل دا كله حصل ليه هههههههههه اقفلى الباب يا ندى خليني اريح شويه
ندى تبص لحسام باستغراب
حسام / اطلعى بره و اقفلى الباب
ندى تطلع بره تجيب الموبايل و تتصل بنور تكنسل عليها تتصل بأية ترد
ندى / ازيك يا أية عامله ايه ؟
أية / الحمد لله كلمتى نور
ندى / مالها نور مش بترد و ما فهمتش حاجه من حسام مش كنتوا رايحين المتابعه سوا باين
أية / اه بس هى طلعت حامل فى تلت توائم و الدكتوره بتقولها لازم تشيل واحد عشان التانين يعيشوا
ندى / و هو احنا كنا لاقين واحد ما تسمع كلام الدكتوره هو احنا هنفهم اكتر منها
أية / و الله انا كمان شايفه كدا بس هى طبعا اتاثرت جامد بالكلام ده و هى و على قافلين تليفوناتهم و مش بيردوا على حد طنط منال كلمت طنط امانى قالتلها عاوزين يقعدوا لوحدهم حتى على قال ما تطلعلهمش اكل هينزلوا لما تهدى و ما نزلوش لحد دلوقت دا حتى يس و نغم معايا هنا بنلبس هنروح النادى
ندى / انا مقدره خوفها بس برده مش هنفهم اكتر من الدكاتره
أية / انتى اخبارك ايه
ندى / كويسه الحمد لله
أية / لسه حسام زعلان من حكايه الحجاب
ندى/ مش زعلان يعنى انتى عارفه حسام مش بيجبرنى على حاجه بس هو مضغوط الفتره دى عنده مشاكل جامده فى الشغل
أية / مش بيجبرك على حاجه !!!
ندى / حسام بيعاملنى حلو اوى يا أية … انا عارفه انك عمرك ما هتسامحيه و لا انا بس هو برده جوزى و ابو بنتى و دى حياتى مش هقدر اغيرها
أية / متاكده ؟
ندى / حاولت كتير حاولت لدرجه انى اتلخمت فى المحامله عن بنتى و كنت هضيعها بس فوقت عرفت انى ما ليش غيره ابن عمى و بيحبنى و بيتقى ربنا فينا هعوز اكتر من كدا ايه
أية / الحب الامان الاحترام
ندى / بيحبنى و يحميني و يحترمنى و يحترم رغباتى بالعكس بقي انا فى اوقات كتير ببقي انا اللى مقصره فى حقه
أية / انتى مقتنعه بالكلام ده
ندى / لازم اقتنع لازم حياتى تستمر لازم اعيش و اركز على بنتى بنتى و بس
أية / ربنا يهديهولك
ندى / انتى عامله ايه و الدكتوره قالتلك ايه
أية / انا الحمد لله تمام بس لسه برده ما عرفتش النوع
ندى / كلو خير
أية / ايوه طبعا بس فضول مش اكتر
حسام يفتح باب الاوضه
ندى / هكلمك بعدين
ندى تقفل
ندى / كنت بكلم أية نور ما بتردش انت صحيت ليه صوتى ضايقك
حسام / لا بس مش عارف انام من التفكير
ندى / عشان الشغل ؟؟ ان شاء الله خير ما تقلقش و لا عشان نور
حسام / انا هدخل اسخن
ندى / انا هسخنلك ما تتعبش نفسك
ندى تسبق حسام على المطبخ
…………………
فى شقه نور
على يدخل شايل صينيه عليها عصير كوكتيل بشكل جميل
على / شغل فنادق ده و لا مش شغل فنادق
نور تبتسم و باين عليها الحزن و العياط
على / كان شغال معانا واحد كان شغال فى فندق هنا و حد واطى من زمايله اسفنه فاترفد و فضل شهر كامل يدور على شغل لحد ما جه عندنا كمرحله يعني لحد ما يلاقي شغلانه احسن و كان قاعد معانا فى الشقه هو بقي اللى علمنى اعمل الكوكتيل الفخيم ده الف هنا
على يناول نور كاسه
على / بس ما طولش معانا شهرين تلاته و ربنا كرمه بشغلانه فى فندق جامد اوى فى الامارات و من ساعتها ما نزلش مصر او يمكن نزل بس استوطى و ما عبرناش
نور / شكله حلو تسلم ايدك
نور تيجي تحطه على الكومدينو على يلحقها و يمنعها
على / طب و طعمه و طعمه دا متعوب فيه ده
نور تبتسم و تدوق
على / جامد صح
نور / حلو اوى تسلم ايدك
على / دلوقت ممكن بقي تهدى و تبطلى عياط عشان نفكر هنعمل ايه على فكره بقي العياط و النكد ده خطر على اللى فى بطنك اكتر من اى حاجه تانيه
نور / انا عوزاهم يا على
على / و انا كمان اقسم بالله عاوزهم بس عيل واحد سليم و انتى معايا احسن من تلاته ربنا وحده العالم بيهم انا عارف انه قرار صعب خصوصا فى ظروفنا
نور / ظروفى انا
على / و انا و انتى ايه ؟؟
نور / على انا
على / احنا قدامنا وقت نشوف كذا راي و نصلى استخاره بس الحزن و انك تقفلى على نفسك و تعيطي و تكتئبي و تبعدى اللى بيحبوكى عنك ده لا هيقدم و لا ياخر عشان خاطرى عشان خاطر نفسك و كل اللى بيحبوكى
نور / انت فاكرها سهله
على / صعبه فاهم بس انتى اقوى من كدا و مش لوحدك
نور تبص لعلى
على / ادى لنفسك وقت و خدى القرار على مهلك و اى كان قرارك مش هضغط عليكي بس فكرى فيها من النحيادى لو انتى خايفه و انتى بتسحبى واحد تاثرى على التانين فتندمى فممكن الدكتوره كلامها يكون صح و تخسرى التلاته و ساعتها هتندمى اكتر لان المرادى هتبقي مسؤليتك لوحدك
نور تقوم على يقعدها تانى
على / انا بكلمك مش هنجرى ورا بعض اقعدى هنا
نور / مش قادره اتكلم
على / القرار قرارك انا اصلا قولت اللى عندى
على يقوم و يطلع بره نور تبص لكبايه العصير و تفرد ضهرها على السرير
………………….
فى شقه ندى بعد فتره
انجى / كنت بعرف ان حسام ما له دخل بهيك قصه بس كنت بدعى تكون هدايه
ندى / بس حسام بيقول ان هو اللى متوسطله يشتغل فاكيد دا فى وشه يعني
انجى / لا تعتلى هم هيك قصص ما راح تاثر بيناتنا
ندى / اتمنى بس دا سرق حاجات كتير اوى امتى و ازاى دا لسه واصل من مفيش
انجى / انا ما بفهم بهيك قصص بس اكيد المافيا قدرت تتواصل معه
ندى / مافيا !!!
انجى / شو ؟؟ اول بمره بتسمعى فيها هيك عصابات موجوده بكل العالم و بكل الشغلات سوق سودا و هيك قصص
ندى / فاهمه بس دا محاسب شغال بقاله عشر سنين فى السعوديه يشتغل فى لبنان فجاه كدا يتواصل مع المافيا و يسرق كل الكميه دى
انجى / توقيعه بكل الاوراق و متصور بكاميرات المراقبه و هو بيفتح الباب الخلفى للرجال اللى حملوا الصناديق
ندى / ايوه حسام قالى بس برده مش قادره استوعب
انجى / اتركينا من هيك قصص و خبريني شو راح يساوى حسام ليخلصنا من هيك حيه
ندى / ما رسانيش بيقول انه ما يقدرش يعمل حاجه من هنا و انا رجعوعه لبيروت مش مريحنى بصراحه مش هخبى عليكي حسام نفسه كان فى علاقه من فتره مع الحيوانه دى و سبب وجودنا هنا اننا نبعد عنها على قد ما نقدر
صمت
ندى / اللى زى دى عندها من البجاحه انها تصور نفسها و تبعتلى الصور دى اتصلت بيا بنفسها توصفلى
انجى / انا كتير اسفه
ندى / انا نفسي اخلص منها اكتر منك بس انا كندى مفيش فى ايدى حاجه و حسام نفسه علاقتى بيه … متوتره الفتره دى
انجى / شو !! حسام بيحكى طول الوقت لكل الناس عنك و عن حبك و قد ايش بيحبك عم يعشقك عشق
ندى / خلينا نغير الموضوع
انجى / فيكى تتكلمى معه منشان حبيبه على الأقل
ندى / ما كلو من الاول عشان حبيبه امال عشان مين
انجى / اسمعى انا بحياتى ما سمعت احلى من الكلمات الحلوه اللى خبرنى بيها حسام عنك قديش انتى حلوه و قديش فيه يعمل اى شي منشان نظره رضا من عيونك كلمه حلوه منك حسام بيحبك و انا ما بغلط بهيك اشياء انتى بس فيكي
ندى / انا
انجى / انتى مو مضطره تخبريني اى شى فكرى و انتى ادرى منى بشو فيكي تعملى و شو بتريدي
ندى / شكرا
انجى / على شو
ندى / انك فهمانى على الاقل
انجى / يمكن لانى بعرف قديش البابا بيعشقها للماما قديش بيعمل اى شى ليرضيها و بيشتريلها الكون سكريبنه تحت رجليها بس هيدا ما بيمنعه من اشيا تانيه كتير ما بتعجبها و ما فيه يبطلها
ندى / مرض
انجى / هيك اشيا بكل الدنيا مو بس الرجال العرب ليا رفقات فى امريكا و باريس نفس الوضع والله بستعجب شو مبررهم
ندى / نقول ايه بس
انجى / و لا شى روحى روقى على حالك اللبسي شي حلو سويلك شي اكله تاخد العقل متلك و انطريه ليرجع لجوزك و انبسطى شو يعني فيكي تعملى غير هيك
ندى / والله فيا حاجات كتير اوى بس هى النفس
انجى/ ههههههههههههههه بيوم راح اتزوج شي زلمه يكون مرتب و راح تشوفى كيف راح اخليه اسعد رجال بالعالم كله
ندى / طبعا ما هو خد احلى بنت
انجى / يكرملى زوقك
ندى / لا بجد يا انجى انتى انسانه جميله اوى
انجى / ايى بعرف بعرف
ندى / هههههههههههه
انجى / يلا روحى سوى كيف ما بدك يلا باى
ندى / سلام
ندى تقفل و تدخل الاوضه حبيبه بتلعب
ندى / هو انا عاوزه ايه بالظبط يا حبيبه
حبيبه تروح لمامتها تشيلها و تقعد تلاعبها
………………..
فى المستشفي
على و عمر و امانى و محمد واقفين قدام اوضه عمليات و الكل واقف متوتر الدكتوره تطلع من اوضه العمليات
على / خير يا دكتوره
الدكتوره / الحمد لله كل حاجه تمام هتفضل هنا بس لحد ما تفوق و نطمن عليها و بكره باذن الله نكتبلها خروج والعلاج الجديد اللى هتمشي عليه و ان شاء الله لينا قاعده قبل ما تخرج هديك فيها كل التعليمات الجديده
على / بالحرف ان شاء الله
الدكتوره / عن اذنكوا
الدكتوره تمشي
امانى / طب هى نور فين
على / اكيد هتخرج دلوقت مش عارف
عمر / ان شاء الله خير انا هتصل بأية اطمنها
امانى / مستعجل على ايه مش لما نطمن على البت الاول
عمر يبصلها و يبص لعلى على يمسك ايده
عمر / معاكى حق هستنى شويه اصلها كانت قلقانه عليها اوى
امانى / طبعا امال ايه
على / أية كانت عاوزه تيجي بس حضرتك عارفه الحمل متعب و كمان العيال مع طنط منال يعني فهى مش هتسيبها لوحدها
امانى / و انا قولت حاجه ربنا ينتعها بالسلامه هى رخره
نور تطلع على ترولى و تروح ناحيه الاسانسير و الكل وراها
امانى / بنتى … حبيبتي يا بنتى … بنتى
…………………..
فى شقه حسام
حسام يدخل يلاقي البيت ساكت
حسام / انا جيت
ندى / فى المطبخ
حسام يروحلها يلاقيها قاعده فى الارض بترص بسكوت فى حافظه و الفرن شغال جنبها يستغرب
ندى / عملت بسكوت تحفه
حسام / بسكوت !! انتى !!!
ندى / دول كدا جربت الطريقه فى كميه صغيره طلع وهم عملت كل الكميه دى
حسام / ما شاء الله مبهر جدا طبعا
ندى / انا ما لقيتش قطاعات كنت عملت اشكال و حركات بس
حسام / دا كدا رضا اوى نفتحلك محل بقي
ندى / بتالس عليا يكرم اصلك
حسام / طب والله ما بالس فعلا برافو عليكي
ندى / قولت اتسلى و حبيبه نايمه دا ما بياخدش وقت خالص
حسام / انجى كلمتنى
ندى / كلمتنى انا كمان و قولتلها انى مش هقدر اساعدها
حسام / و انا كمان قولتلها كدا قولتلها ان موقفى دلوقت مش قوى زيها و انى لو حاولت انا اللى هطير
ندى / و هو عدنان برده مش ملاك اهو اللى هو اللهم اضرب الظالمين بالظالمين بقي بس انا طبعا ما قولتلهاش كدا
ندى تفتح الفرن تطلع صينيتين و تطفى الفرن
حسام / مين هياكل كل ده
ندى / حبيبه و انت و بابا و انا كلنا يعني هناكل منه مع كبايه شاى و لا شويه نسكافيه ابقي خد شويه فى الشركه
ندى تفضي الصوانى فى العلب و حسام متابع ندى تقوم تغسل المواعين
حسام / طب بالنسبه للغدى
ندى / اه على البوتجاز اهو اغرف و كل
حسام يبصلها باستغراب
حسام / مش هتسخنيلى
ندى / سخن ما لحقش يبرد زى ما انت شايف الفرن مسخن المطبخ اصلا فعادى بقي
حسام / انتى بتعملى ايه
ندى / بعمل المواعين على ما الغساله تخلص انشر و اخش انام بقي لانى تعبت جدا
حسام / و هى حبيبه هتفضل نايمه
ندى / ما البركه فيك بقي
حسام / لا .. مش هينفع اصل انا خارج
ندى / كويس ممكن تجبلى بقي معاك شويه حاجات و انت جاى
حسام / مش هتسالي رايح فين مع مين هاجى امتى
ندى / المفروض اسال ؟
حسام / مالك يا ندى
ندى / مالى
حسام / حاسك مش مظبوطه فيكي حاجه غلط
ندى / ابدا عادى
حسام / تمام هدخل اغير هدومى
ندى / بشويش بقي لحسن حبيبه تصحي
حسام يبتسم بسخافه و يمشي ندى تبص بطرف عينها و تكمل غسيل مواعين
………………….
فى شقه نور
على واقف جنب الترابيزه بيساعد نغم فى الواجب يس يقفل الكتاب
يس / خلصت الواجب اخيرا
على / كلو و لا
يس يديله الكتاب
يس / بص بنفسك
على / انا وثق فيك خد موبايلي اللعب عليه شويه
نغم / اشمعن هو واجبه قليل و انا واجبى كتير
على / دا انتى فاضلك مسالتين و تخلصي يلا حلى دى بقي وريني الشطاره
صوت نور بتصرخ على يجرى يلاقي نور واقفه و هدومها كلها ميه
على / فى ايه
نور / ما اعرفش ايه المايه دى انا خايفه اوى
على / يس هات الموبايل … غيرى بالراحه هاخدك المستشفي
جرس الباب يضرب نغم تفتح امانى تدخل و يس يدى لعلى الموبايل يتصل بحد
امانى / فى ايه يا نور … يا لهوى ايه ده
على / ايوه يا دكتوره نور نزل عليها ميه كتير … فى الطريق اهو تمام سلام
امانى / خليني اساعدك
على / هو عمى تحت
امانى / على القهوه تحت
على / يس .. اللبس و ساعد نغم تلبس
نغم / اللبس ايه
امانى / اى حاجه يا اختى دا وقته … ساعدها يا على هنزل اطفى على الاكل و اجيلك
على / تمام
امانى تمشي
نور / انا خايفه اوى يا على
على / خير ان شاء الله خير
………………
فى شقه منال
عمر يطلع من الاوضه و هو بيجرى
عمر / لا انا هاجى اخدهم منك فى المستشفي ما تعطلش نفسك
منال / فى ايه يا عمر
عمر / نور فى المستشفي هجيب العيال و اطمنكوا
منال / جيب العواقب سليمه يا رب
عمر ينزل أية تطلع من المطبخ
أية / مالها نور
منال / ما اعرفش هو تليفونى فين اكلم الحجه امانى يمكن افهم منها حاجه
أية / فى الشاحن فى اوضتك ثوانى هجيبهولك
منال / لا اهدى انتى و ارتاحى مش ناقصين
……………….
فى المستشفي
على / يعني ايه الكيس مخروم يعني ايه هتفضل المايه تنزل منها كدا
الدكتوره / يعني ترتاح و ما تبذلش اى مجهود
على / اقسم بالله ما بخليها تشيل كبايه من مكانها حتى
الدكتوره / كل ده وارد بس انا لازم انبهكوا ان الموضوع دلوقت فيه خطوره كبيره جدا
على / ينزلوا هم كمان
الدكتوره / ابدا ليه بس كدا انا بس برجوك على الحرص حتى لو هتستحمى تلف نفسها ببلاستيك عشان الرحم مفتوح و اى شعره او اى ملوث هيدخل للبيبي هياثر عليهم التلاته و اهمهم مدام نور
على / تمام
الدكتوره / فى جوانتى استحمام بيتباع فى الصيدليات و هكتبلها على غسول نسائي تستخدمه باستمرار و طبعا العلاج ده لازم تمشي عليه بانتظام و الغذى الكويس
على / تمام حاضر … انا اسف بس حضرتك صريحه معايا صح
الدكتوره / يعني ايه
على / يعني لو فى احتمال واحد فى المليون ان الحمل ده يكون فيه خطوره على نور
الدكتوره/ الاعراض دى كلها وارد تحصل لاى واحده حامل و بالعكس الرحم بتاعها كدا بينشط و حتى لو حصلت اى مضاعفات دلوقت نقدر بعدين
على / ما يهمنيش بعدين انا
الدكتوره / حضرتك احنا ما علينا الا السعى و حاله مدام نور مش بتحصل كل يوم بس مقارنه بظروفها السابقه اننا نوصل للمرحله دى فحد ذاتها معجزه و نجاح كبير
على / كل الدكاتره قالولها مفيش امل و كانت بتزعل شويه و فى الاخر تقبلت الموضوع حضرتك الوحيده اللى عشمتيها
الدكتوره / و ادينا اهو
على / ادينا على خط النار مش عارف هنوصل لبر الامان و لا لا
الدكتوره تبتسم
الدكتوره / انا مقدره جدا اللى بتمروا بيه بس انا متاكده ان حضرتك ايمانك اقوى من كدا عن اذنك عشان عندى حالات تانيه لازم امر عليها
…………………..
فى اوضه نور
نور/ انا مش فاهمه هو بيرغى معاها فى ايه كل ده
عمر يدخل
عمر / السلام عليكم
نور / و عليكم السلام ازيك اتفضل
عمر / على كلمنى فجيت اخد يس و نغم
نغم / انا ما خلصتش الواجب
عمر / بلا واجب بلا هم احنا هنروح نلعب و نشترى حلويات و ننبسط
نغم / ياااااى
على يدخل
نور / ايه يا على قلقتنى
على / بتقول طبيعى بس هنحتاج اهتمام زياده و انا جبتلك كل الحاجات اللى قالت عليها
نور / و انا هفضل زى العيال كدا
على / معلش نستحمل بتقولى فى حالات حمل كتير بيحصلهم كدا و لازم نتاقلم على الوضع
امانى / شكلها حماره و هتوكسنا
عمر / احنا من يوم ما عرفناها بنقول كدا و بتلفوا على كل الدكاتره و بترجعولها
على / لان كلهم بياكدوا صحه كلامها و لانها الوحيده اللى ساعدتنا نوصل للى احنا فيه
عمر / الحمد لله احنا هنتبتر كنا فين
امانى / انا عوزاك مبسوط الدكتوره تقول راحه و انت
نور / والله كنت فى السرير فجاه حسيت ان فى حنفيه ميه فتحت جيت اجرى على الحمام ما لقحتش
على / و بعدين هو انا مخليها تحط ايدها فى حاجه ما تقولى حاجه يا بنتى
عمر / حصل خير يا ابنى الحمد لله انها جت على قد كدا المهم ناخد بالنا بقي فى اللى جاى
امانى / اللى جاى ان البنت تعبانه و مش هتقدر تاخد بالها من العيال دول
على يبص لامانى
عمر / ايوه انا هاخدهم النهرده و لما
امانى / لا النهرده و لا بكره و لا بعده اديكوا شايفين
على / ياسو نونه روحوا اتفسحوا النهرده مع عموا عمر و لما ماما نور تطلع من المستشفي هاجى اخدكم
نغم / انا والله مش بتعبها
على / عارف يا حبيبتي هو انتى فى زيك و ما تقلقيش لو الميس كلمتك انا هكلمها بنفسي
نغم تحضن على يس يروح يحضن نور
امانى / ما بالراحه يا ابنى
نور / انا كويسه يا ياسو خد بس انت بالك من نونه و كلمنى فى اى وقت تمام
يس يهز راسه و يمشي هو و نغم مع عمر على يقفل الباب
على / ليه عملتى كدا ارتاحتى لما قهرتيهم كدا
امانى / بنتى و من حقى اخاف عليها
على / و دول اطفال و ما لهمش ذنب فى كل اللى حصل
امانى / انت اللى باليتنا بيهم
نور / لو سمحتى يا ماما انا اللى عوزاهم و انا اللى اتمسكت بيهم
امانى / عشان عقد الاستاذ
على / عقدى !!!
على يبص لنور
على / انا فى الكافتريا فوق لو عوزتينى رنى عليا .. الدوا اهو
نور / على
على يمشي و يقفل الباب وراه
نور / ليه كدا حرام عليكي
امانى / فوقى لروحك بقي و لا انتى عاجبك اللى انتى فيه دا حتى امه اللى ولدته مش عاجبها تصرفاته دا ايه الهم دا يا ربى
نور تعيط
امانى / بتعيطي ليه
نور / عشان تعبانه ايه ما عيطش كمان انتى ايه
محمد يدخل
محمد / ايه ده فى ايه
امانى / ايه على ما افتكرت
محمد / بقولك ايه انا جايت على ملا وشي ما خدتش نفسي ما تشتغليليش
امانى / انت اب انت
محمد / لا مش اب عاجبك و لا مش عاجبك
امانى / و ان قولت مش عاجبنى
نور / بس بقي بس بس انتوا ايه بس
نور تحاول تقوم امانى تمنعها
امانى / خلاص يا بنتى خلاص ارتاحى
نور / انا عاوزه ابقي لوحدى لو مش هتقدروا تعبى و رقدتى يبقي وجودكوا لزمته ايه
محمد / انا لسه داخل و استلمتنى
امانى / مكلماه من ساعه و لسه البيه مشرف
نور / يارب خدنى بقي يا رب
محمد / حقك … حقك اكتر من كدا كمان انا بره لو عوزتى حاجه نادينى
امانى تروح تقعد
نور / روح ماما ترتاح و حضرتك كمان محتاج ترتاح انا كويسه الحمد لله
امانى / يا نور
نور / انا فيا اللى مكفيني لا قادره اعاتبك على اللى عملتيه و لا عارفه هصلحه ازاى انتى النهرده فى خمس دقايق دمرتى حياتى
امانى / انا يا نور انا مش عاوزه غير مصلحتك
نور / اهدى كدا و فكرى مصلحتى فين و بعدين شوفى هتوصليلها ازاى انما كل اللى بتعمليه ده مش وقته اقسم بالله انا لو سليمه مش هتعملى فيا كدا
محمد / حقك علينا يا بنتى معاكى حق من قبل ما اعرف عملت ايه معاكى حق ارتاحى و اهدى و انا هروح انا و هى … على فين
نور / اسالها اسالها قالتله ايه
امانى / قولتله ايه يعني مش دى الحقيقه
نور / امشي يا ماما ابوس ايدك امشي ارجوكى
محمد / يلا يا امانى يلا سبيها ترتاح
امانى / انا عملت ايه لكل ده كل ده عشان بقول العيال تعبينها كل ده عشان خايفه عليها
محمد / و انتى مالك انتى مالك و طبعا قولتيلك كلمتين تجريح من بتوعك
امانى / كلمتين من بتوعى من بتوعى انا طبعا و انت عمرك هتقول فى حقى كلمتين حلوين
نور / اموت نفسي عشان ترتاحوا ارمى نفسي من الشباك يمكن تسكتوا و الله ما هتسكتوا هتقفوا تتخانقوا على قبرى برده
محمد / خلاص خلاص انا خارج
محمد يبص لنور بتعيط يطلع بره امانى تبص لنور نور تفرد ضهرها و ما تبصلهاش امانى تطلع بره نور تشد الغطا و تغطى وشها
……………………..
فى الاستقبال
ليلى داخله تجرى تقابل امانى
ليلى / مالها نور سلامتها خير
امانى / اسالي ابنك
محمد / بخير الحمد لله كويسه فوق فى اوضتها
امانى / كويسه ايه البت حياتها هى و اللى فى بطنها فى خطر
ليلى / يا لهوى ليه كدا
امانى / ما هى ما بترتاحش من الجرى ورا العيال
ليلى / ازاى الكلام ده انا بكلمها مرتين فى اليوم بتقولى انها نايمه فى السرير و على بيعمل كل حاجه دا على بياخد العيال يوديهم عند الحجه منال كل يوم و هو نازل و يرجع ياخدهم و هو راجع
امانى / و النهرده اخده اجازه و زى ما انتى شايفه من كتر الراحه اللى مريحهالها نزلت عليها ميه
ليلى / يا لهوى
امانى / لا و محموق اوى على العيال دول و بيقولى انا ان ما عنديش قلب
ليلى / ما لوش حق انا ليا كلام تانى معاه
محمد / ما حصلش حاجه لكل ده دا كلام زى اى كلام اكيد مش مقصود
امانى / لا قاصده و رفع حسه عليا كمان
محمد / يا امانى
امانى / اسمعى يا ست ليلى انا سبت اللى ورايا و اللى قدامى و جيت اجرى وراهم بس المكان اللى هيتقل منى فيه
ليلى / ما عاش و لا كان اللى يقل منك اكيد ده سوء تفاهم و انتى عارفه على و اخلاقه
امانى / على نسمه انما ولاد الشوارع عنده اغلى من الدنيا باللى فيها اغلى من ضناه و مراته شخصيا
ليلى / والله غلبت معاه اعمل ايه بس
امانى / انتى و ابنك بقي تسطفوا انا ماشيه
ليلى / ماشيه فين بس
امانى / هروح بيتي و اديني اطمنت لما جيتي ما انتى فى مقام امها برده
ليلى / طبعا يا اختى امال ايه ربنا يعلم
امانى / من يومك بنت اصول
ليلى / و انا اجى جنبك حاجه
محمد بيبص على الاتنين يتنهد و يبلع ريقه
……………………….
فى اوضه نور
على يدخل
على / باباكى كلمنى و قالى انه ماشي نزلت
نور تشيل الغطا من راسها
على / عامله ايه دلوقت
نور / كلمت يس اطمنت عليه
على / عمر خدهم السوبرماركت و خلاهم يجيبوا كل اللى نفسهم فيه و طلعوا على محل لعب اطفال يجيبوا لعب جديده يعملوا بيها نايت بارتى و لا سليب اوفر اللى بيقولوا عليها دى
نور / لغوش على اللى حصل يعني
على / انتى ايه رايك يا نور انا فعلا جاى عليكي بالعيال دول
نور / انا اللى شباطت فيهم و انا اللى اتحايلت على عمتهم و انا حباهم دول عوضى من ربنا عن السنين اللى اتحرمت فيها من الخلفه على فكره انا مش موافقه ماما فى حرف من اللى قالته
على / انا عارف مامتك ما باخدش على كلامها انا تهمنى سلامتك قبل اى حاجه تانيه
نور / و انا ما عنديش اهم من رضاك يا على
ليلى تفتح الباب و تدخل على يقف
…………………….
فى شقه ندى
حسام يفتح الباب يلاقي الكل نايم
حسام / هى حطت منوم فى البسكوت و لا ايه معقول نيمين لدلوقت
حسام يدخل اوضه ندى و يغير هدومه و ينام جنب ندى و يحضنها و يلعب فى شعرها
ندى / عاوزه انام
حسام / انا لقيت طريقه اطفش بيها هدايه
ندى / كويس روح قولها لانجى
حسام / انجى مين هو فى ايه يا ندى
ندى تقوم تقعد
ندى / فى ايه يا حسام كنت نايمه
حسام / هو انا هعيش فى الجنان ده لحد امتى
ندى / جنان ايه انا كلمتك
حسام / ما هو يوم عايشه فى دور البت المتمرده و يوم فى دور البت المستكينه الضعيفه و حاضر يا سي السيد و يوم حلقالى خالص
ندى / ههههههههههههههههههه مين دى انا ؟؟
حسام / لا امى
ندى / طب دى حاجات بينك و بين مامتك بتصحيني انا ليه هههههههههههه
حسام / انتى شاربه حاجه يا ندى
ندى / انت عاوز ايه يا حسام قولى بجد اؤمر عشان انا فعلا تعبانه من الوقفه طول اليوم فى المطبخ
حسام / و انا هعوز منك ايه يعني
ندى / طب الحمد لله ممكن بقي ما دام مش عاوز منى حاجه انام بقي
حسام / اتخمدى
ندى / شكرا
ندى تنام و تديله ضهرها بطريقه مغريه حسام يبصلها
حسام / ندى
ندى / مش باينلها نوم الليله دى
حسام / هو انتى زعلانه منى ؟
ندى تقوم تقعد و تبصله
حسام / حاسك بتتجاهليني
ندى / عمرى دا انا عملت البسكوت عشانك عشان نقعد انا و انت سوا فى البلكونه ناكله مع كبايتين شاى و نرغى و نحكى سوا
حسام / طب ما تقومى نرغى و نحكى
ندى / خليها بكره انا صاحيه من بدرى و فضلت قاعده مستنياك لحد ما النوم غلبنى
حسام / طب قومى اما اصالحك
ندى / تصالحنى على ايه انا مش زعلانه منك
حسام / انى اتعصبت على الفاضي و سبتك و نزلت
ندى / بس دا حقك
حسام / معلش اصل انا مش فى المود اليومين دول انتى عارفه الظروف
ندى تعدى صابعها على خد حسام
ندى / و انا اقدر اغير المود ده ازاى
حسام عنيه توسع و ندى بصاله و مبتسمه يقوم يجرى يقفل باب الاوضه بالمفتاح تليفون ندى يرن ندى تجيبه و ترد
حسام / ده وقته
ندى تشاورله ثوانى
ندى / ايوه يا أية اطمنتى … أية مستشفي ايه امتى
حسام / فى ايه ؟
ندى / نور نزل عليها ميه و نقلوها المستشفي
حسام / انتى بتقولى ايه !!!
…………………
فى شقه أية
منال / انا مش معاكى فى اللى بتعمليه
أية / صحبتى و طلبت مساعدتى اقولها لا
منال / بس حسام مجنون و لو الجنونه حضرتك مش هيلاقى غير صحبتك يطلعها عليها
أية / ندى عارفه هى بتعمل ايه و هو بصراحه محتاج يتربى
منال / و هى ندى هتقدر عليه
أية / و دا يقدر عليه الا ربنا اهو على الاقل تهده شويه ترجع غلاوتها عنده و بعدين انا مالى مش هى اللى قالتلى لما ارنلك اتصلى بيا بعدها بخمس دقايق
منال / ربنا يهديكوا
أية / ربنا يهدى الجميع و ياخده هو و امه
منال / مفيش فايده فيكي ابدا
الباب يتفتح و يس وعمر و نغم يدخلوا شايلين حاجات كتير اوى
أية / اهلا اهلا بحبايبي الحلوين
أية تفتح ايديها يس و نغم يبصوا لبعض و ما يحضنوهاش
أية / انتوا زعلانين منى و لا ايه
نغم / يس قالى ما اللمسكيش لحسن اتعبك و تروحى المستشفي زى ماما نور
أية / لا طبعا ايه الكلام ده
أية تحضن نغم و تقعد فى الارض و تاخدهم فى حضنها
أية / انتوا مالكوش دعوه باللى حصل لماما نور
عمر / و بعدين ماما نور كويسه و بكره ان شاء الله هتروح و انتوا هتاخدوا بالكوا منها زى ما اتفقنا
نغم / بس تيته امانى
أية / بقولك ايه يا بت انتى انا جعانه و الكيس الكبير ده شكله فى حلويات كتير
نغم / جبت ليكي و للنونو
أية / جبتى للنونو اللى فى بطنى
نغم / عمو عمر قالى ان النونو بيحب الشيكولاته زيي
أية / النونو بيحبك انتى يا قمره يا سكره بقولك ايه قومى نغير هدومنا على ما عمو عمر يشوفلنا فيلم حلو كد نسهر عليه و انتى يا تيته مش هوصيكى ظبطيلنا بقي القاعده
منال/ عنيا بس كدا ثوانى و احلى فشار يكون معمول
عمر / ايه يا وحش هتغير لوحدك و لا اجى اغيرلك
يس / تغيرلى ايه انا كبير
عمر / ايوه بقي يلا روح خد بجامتك من الدولاب انت عارف سبتها فين و غير و تعال نقى معايا الفيلم يلا
يس يبتسم و يدخل جوه
…………………..
فى المستشفى
على / هى قالتلك كدا
ليلى/ بص انا عارفه انتوا متعلقين بيهم قد ايه
على / لو احنا مخلفين و دول عيالنا و نور حملت تانى و تعبت هنرمى ولادنا الاولانيين فى الشارع يعني
ليلى / اعملوا اللى تشوفوه
على / ايوه شكرا اوى على كدا
ليلى / شفاكى الله و عافاكى يا بنتى
نور / ربنا ما يحرمنى منك ابدا يا ماما
ليلى / انتوا مش ناقصكوا حاجه اجبهالكوا
على / لا يا ماما كتر خيرك الحمد لله جبت كل حاجه
نور / هم بس هيخلونى للصبح عشان على صمم انما غير كدا كان زمانى روحت
على / لو عاوزه تروحى انتى ترتاحى يكون افضل انتى من الصبح فى المحل و نزلناكى على ملا وشك معلش
ليلى / و انا عندى اغلى منها انزلها
نور / يخليكى ليا يا قمر انتى يا عسل
ليلى تطبطب على كتف نور و تقوم
على / كان نفسي اوصلك بس مش هقدر اسيبها لوحدها
ليلى / ما تشغلش بالك هطلب اوبر و هكلمك لما اوصل اطمنك
على / تمام
ليلى / سلام يا قلبي
نور / سلام يا ماما
ليلى تمشي و على يقفل الباب وراها
نور / انا مش عارفه اقولك ايه محرجه منك اوى
على / كبرى مخك و ارتاحى موقف زى اى موقف و لسه ياما هنشوف
نور / يا ترى العيال عملين ايه
على / كلميهم اطمنى عليهم و هزرى معاهم العيال متعلقين بينا زى ما احنا متعلقين بيهم
نور / معاك حق ناولنى الموبايل
على يجيب الموبايل لنور و يتصل
…………………..
فى شقه حسام
حسام يقفل التليفون و يروح يقعد جنب ندى بتقرا قران تقفل المصحف
ندى / كلمتها
حسام / لسه قافل مع ماما
ندى / و ما كلمتش نور ليه
حسام/ كلمتها كنسلت و بعتت رساله انها مع حماتها مش هتقدر تتكلم و اتصلت بماما افهم منها كنت فاكرها هناك طلعت روحت
حسام / بتقول اتخانقت مع على العيال تعبوا نور و كانوا هيسقطوها و البيه بيبجح بس بابا كان عمال يلغوش على المكالمه مخلانيش افهم نص الكلام
ندى / انا مش داخل دماغى الكلام ده كلم نور و افهم منها
حسام / و هى نور هتغلط على عمرها
ندى / و هى عمتى ملاك يعني ما انت عارفها الله يرحم ايام ابيه مروان كانت تديله الكلمه من هنا تنطته يلا راح و راحت ايامه
حسام يبصلها
ندى / و نروح بعيد ليه ما انا اهو
حسام / و هى ماما هتعوز ايه غير مصلحتنا و بكره تكبرى و تعملى مع حبيبه اكتر من اللى ماما بتعمله معانا
ندى / ما افتكرش
حسام / يا خبر بفلوس بكره يبقي بلاش
ندى / طب يعني هنفضل قاعدين كدا مش هنطمن على البنت الله يخربيت الغربه اللى باعده الواحد عن حبايبه دى
حسام / لا ما ماما طمنتنى
حسام ياخد من ندى المصحف يحطه جنبه و يقعد جنبها
ندى / يعني مش هتكلمها
…………..
- يتبع الفصل التالي اضغط على ( رواية سلف و دين ) اسم الرواية