رواية سلف و دين كاملة بقلم لولو محمد عبر مدونة دليل الروايات
رواية سلف و دين الفصل السادس و الستون 66
الحلقه الثامنه و العشرون
حسام يطلع من الاوضه يلاقي ندى بتحط فطار على السفره
ندى / الفطار جاهز ثوانى اجبلك الشاى بلبن بتاعك
حسام / ما تتعبيش نفسك انا هخطف لقمه و انزل علاطول
ندى / اللبن مغلى والميه فى الكاتل هصب بس و اجبلك ثوانى
ندى تدخل جوه تليفون حسام يرن
حسام/ الو
انجى / ضهرت و لا لسه
حسام / نازل اهو
انجى / فيني فوت عليك اذا بتريد
حسام / لا لا نتفابل فى الشركه احسن
ندى تدخل تحط الكبايه
حسام / لما اوصل هكلمك يلا سلام
حسام يقفل و ياكل على الواقف
ندى / مين
حسام / انجى عندها حوار كدا و عوزانى معاها اخلصهولها
ندى / طب و عدنان فين
حسام / ما هو اللى مكلفنى بالموضوع
ندى / اه .. طب هى ما حكتليش ليه على الموضوع ده … و لا انت حكيت … يمكن الموضوع حصل فجاه
ندى تبص الناحيه التانيه حسام يشرب شويه شاب بلبن
حسام / تسلم ايدك يا حياتي … انا لازم انزل بقي لحسن اتأخرت اوى سلام
حسام ياخد شنطته و يجرى
ندى / هى موته و لا اكتر اشبعوا ببعض
ندى تقوم تشيل الاكل و تدخل المطبخ
………………….
فى الشركه
حسام / على فكره ندى بدات تشك فينا و انتى عارفه انها شكاكه و مش بتعد اى حاجه
انجى / كيف يعني
حسام/ رمت كلمتين كدا و انا نازل اننا هنتقابل و اشمعن انا اللى اخلصلك شغلك و ليه لا انا و لا انتى اتكلمنا معاها فى الحوار اللى بينا انتى فاهمه يعني
انجى / فهمت عليك بس اللى ما عم افهمه طريقتك و انت بتقول رمت كلمتين و بنفس الوقت بتقول بتشك و بنفس الوقت بتعاملنى بطريقه كتير طبيعيه
حسام / هههههههههههه انتى لسه هتعرفى ندى دلوقت عاوز تخون ما تغور
انجى / ما فيني اتحمل هيك برود
حسام / لازم لو عاوزين خطتنا تنجح
انجى / بس هيك ما بيصير يا حسام لازمن تعمل شي لتحل الفوتور اللى عايش فيه انت ما فيها تبعد عنك لهيك درجه انا بعرف اللى بيناتنا بس هى ما بتعرفه اذا شاكه فينا كان فيها تعصب تكسر تصرخ تعمل شو ما بدا بس هيك رد فعل بارده ما فيني افهمها ابدا
حسام / فى ستات كتير جدا
انجى / فى رجال ما بينغار عليهن بس فى رجال تانين ما فينا نتحمل شي شغله تقرب منن
حسام / يمكن هى مش شيفانى واحد منهم
انجى / ليش عميت و لا بعقلا شي انت ما بينغار عليك !! كيفا يعني يمكن ندى من النوع اللى بيعرف يدبر حاله فهمان علي هادول اللى ما فيك تعرف شو بيحسوا و لا عم شو بيفكروا هيك غامضين و هاديين انت بتعرفها اكتر منى كتير بحس ندى هيك هاديه و مرتبه مو هيك
حسام / سيبك من الكلام ده دلوقت و قوليلى ناويه على ايه
انجى / انا رتبت كل شي من الالف للياء لا تعتم هم
حسام / المكان كويس يعني
انجى / راح خليك بشي عالم تانى راح تعيش ليله و لا الف ليله و ليله بزمناتن
حسام / يا واد يا لعيب
انجى / راح تنبهر و تدعيلى
حسام / لا ما انا واثق انى ما دام ماشي وراكى اكيد هنبسط
…………………
فى شقه ندى
ندى بتكلم نور فيديو كول
ندى / و من امتى فى حد بيسيب حد فى حاله سبيها على الله ما انتى كدا كدا هتتحسدى حصنى نفسك و خلاص
نور / انا تعبانه اوى يا ندى نفسيا و جسديا انا ما حدش تعب فى حمله قدى كميه الادويه دا غير القلق كل ما الميه تنزل انا بقيت زى العيل الصغير دا غير النضافه بستحمى بجوانتى من الصيدليات و عايشه حياه ارزل العمر خالص
ندى / هانت استحملى مش عاوزه افتكر حملى فى حبيبه يلا الحمد لله
نور / يجوا بالسلامه و كل حاجه تهون يجوا بس يا ندى مش بعد كل التعب ده
ندى / الحاجات دى ارزاق يا بنتى حتى الوجع ارزاق
نور / مالك النهرده شكلك مضايقه
ندى / مش مضايقه عادى
نور / لا فى حاجه احكى
ندى / فى حاجه بين حسام و انجى
نور / مستحيل
ندى / الفتره اللى فاتت كلامهم مع بعض كتر و بتروح الشركه كتير و يتكلموا و انا مش بعرف اى حاجه عن الكلام اللى بيدور بينهم يعني مثلا انا لسه مكلماها امبارح برتب خروجه اعتزرت و النهرده الاقى حسام بيكلمها عندها حوار و هتقابله فى الشركه
نور / ما يمكن عندها مشكله فعلا فى الشركه
ندى / طب مش بيحكولى ليه مش انا صحبتها و مراته و لا انا ببقي صحبتها بس لما بتحب تعزمنى على مكان ابوها الواطى فيه
نور / كلمتى حسام فى الموضوع
ندى / لا ما انا كلمته فى هدايه و كدب و فى الاخر عرفت كل حاجه هستنى و يا خبر بفلوس بكره يبقي ببلاش
نور / بصي هو مستحيل يكون فى حاجه بينهم لان لو كان فى و ابوها عرف اكيد حسام هيترفد اكيد الراجل مش مركب ارايل طويله اوى كدا
ندى / كدا كدا انا اتخنقت منها و كنت ناويه اقطع معاها بس مش عارفه هى مش مديانى فرصه او ما كانتش مديانى
نور / ليه
ندى / كل شويه تكلمنى و تجيلى و بتحب حبيبه وعلاطول هدايا و لبس هقطع معاها ازاى
نور / لا اقصد تقطعى معاها ليه
ندى / عشان فاتحه باب لابوها فى حياتى و ساعات كتير بقي تقعد تقول حسام حسام حسام حسام
نور / الله ما احنا بنغير اهو
ندى / ما هو مش رضينا بالهم و الهم مش راضي بينا
نور / هتعيشي و تموتى بترانه
ندى / و انتى حاسه بحاجه لا جوزك بيخونك و لا عمره عاملك وحش
نور / و هو حسام بيعاملك وحش
ندى / بتنسي بسرعه اوى يا نور
نور / ما نستش بس مش لبانه بقي كل شويه نقعد نتكلم فى اللى عدى خلاص بقي الحياه بتستمر وانتوا كويسين مع بعض اهو و مدلعك
ندى / طب و ست انجى
نور / لو مش عوزاه سيبيهولها بس بقي لو .. انتى عارفه لازم تعملى ايه
ندى تبص لنور و نور مبتسمه
…………….
فى المحل عند على
على قاعد بيراجع ورق احمد يدخل شايل فنجان قهوه
احمد / قهوه زعامه الزعامه
على / جت فى وقتها لحسن كنت هطق
احمد / ليه بس يا رياسه فى حاجه و لا ايه
على / الدنيا بايظه خالص يا احمد و الشغل مريح هى الناس بطلت تاكل فول و لا ايه
احمد/ ازاى بس يا زعامه ما الحمد لله المحل على اخره بره
على / المصاريف يا احمد المصاريف مش مكفيه اى حاجه
احمد يقعد
احمد / يا رياسه ما قولتلك المحلات كلها زودت الاسعار لما الحكومه غلت كل حاجه انت اللى عمال تقول الغلابه و البتاع دا حتى كل المحلات بتجيب لحمه مستورد و انت اللى مصمم الشغل كله بلدى و انضف حاجه
على / محل الحج انور لازم يفضل طول عمره نمره واحد فى الجوده و النضافه و السعر
احمد / يا سيدي ما تزودش الفول و الطعميه بتوع الغلابه زود الكريب و البيتزا بتوع ولاد الزوات
على يبصله
احمد / ما هو طلبه مش طلبه كل واحد ياكل على قده بدل ما يفطروا كريب يفطروا فول زى باقي الخلق هو انت هتصرف عليهم من جيبك ما كل حاجه بتغلى الكهربا والغاز و الخضار و اللحمه جت علينا يعني طب دا انا حتى كنت مكسوف اقولك زود اليوميات لتزعل
على / تصدق معاك حق انا فعلا بقالى ياما مزودتكوش مع ان كل حاجه حوالينا زادت
احمد / انا عارف والله انك حاسس بالغلابه و انا كمان حاسس بيهم ما احنا منهم و مش هننسي اصلنا بس برده انت معزور
عمر يدخل
عمر / السلام عليكم
على / حبيبي تعال اقعد
احمد / قهوه و لا نجيب اكل علاطول
عمر / و هى الحجه هتنزلنى من غير ما اكون ماسح الاخضر و اليابس شوفلى حاجه تهضم
احمد / عنيا
احمد يمشي و عمر يقعد
عمر / جدع اوى احمد و بيحبك
على / و بيسرقنى
عمر / ايه الكلام ده يا عم
على / مين معاه المفتاح و بيدخل المكتب و بيستلم و يسلم اى فواتير غير احمد
عمر / بيتهيالي مفيش
على / كل شهر بيبقي فى عجز لما براجع بس بتبقي حاجات بسيطه بقول فكه و بتجمع بس كل شهر العجز بيزيد عن اللى قبله
عمر / طب و ناوى على ايه
على / مش هعمل اى حاجه الا اما اتاكد
عمر / اكيد دا صاحبنا من سنين و عشره عمر
على / ما دا اللى حازز فى نفسي اوى
احمد يدخل و معاه ازازه فيروز
احمد / المهضم
عمر / تسلم ايدك
احمد / هسيبكوا بقي عشان الدنيا زحمه بره
على / ربنا معاكوا
احمد يطلع و على و عمر يبصوا لبعض
……………….
فى شقه ندى
ندى قاعده بتزاكر حسام يدخل ندى تبصله و تكمل مزاكره
حسام / مساء الخير اسف على التاخير بس كان فى ضغط شغل جامد اوى
ندى / ربنا يقويك تحب اسخنلك
حسام / لا مش جعان اكلت لقمه فى الشركه اكيد مش هقعد كل ده من غير اكل يعني
ندى تدى حسام ورقه
ندى / دى قايمه الحاجات و عناوين و ارقام تليفونات كل عميله و المبلغ
حسام / عنيا حاضر … ما شاء الله اللسته بتكبر كل مره
ندى / الحمد لله البركه فيك و فى الاوفرز اللى بتجبهالى
حسام / و تعبك برده اخبار المزاكره ايه
ندى / الحمد لله اخبار انجى ايه
حسام / الحمد لله انا مش فاهم اصلا احنا ازاى اتحشرنا فى مشاكل العيله دى بالسرعه دى
ندى / كنت لسه بسال نفسي نفس السؤال … حتى كنت بتكلم مع نور
حسام / عامله ايه صحيح
ندى / الحمد لله كويسه
حسام / ربنا يقومها بالسلامه
ندى / كنت بقول لنور ان انجى دخلت فى حياتي اوى و بدات اضايق
حسام / احنا ما شوفناش منها حاجه وحشه
ندى / انا يا بزاكر يا بشتغل يا بشوف البيت و طلباته مش فاضيه للقعاد و الحكى و الكلام ده و بعدين انا ما قولتش خرجها من حياتك انا بقول انى مش فضيالها انت بقي براحتك
حسام / انا راجع تعبان و داخل انام … انتى حره تصاحبى اللى تصاحبيه و تنفضي للى يتقل عليكي … هتعوزى حاجه
ندى / لا شكرا
حسام يقوم و يدخل اوضته و ندى تكمل مزاكره
……………………
فى شقه نور
على فاتح اللاب و عمال يتفرج على فيديوهات كاميرات المراقبه و قدامه ملف نور تدخل تقعد جنبه
نور / جايلك ايه من دا كله
على / العشره ما تهونش ما ينفعش ارفده الا و انا معايا ادله كفايا
نور / و اللى بتعمله ده
على / بصي دى الفواتير بتاعه الشغل اللى داخل المحل بصي هنا تاريخ وصول العربيه و الشغل اللى نزل منها و قيمه الفاتوره
نور / طب ما يمكن الشركه هى اللى بتسرقك
على / ممكن بس دى برده مسؤليه احمد لانه مش بياكد على الشغل قبل ما يستلم و يدفع
على يشغل فيديو تانى
على / طب بصي هنا بقي
نور تبص
على / دا بقي يا ستى زبون متكرر تقريبا يوميا بيجي يستلم كل مره اوردر كبير جدا بصي للوقت بتاعه اللى موجود فيه فى المحل و بصي على الريسيتس اللى طلعت فى الوقت ده
نور تبص فى الورق
على / الراجل ده ديما بيجي فى الوقت اللى بروح اكل فيه معاكى شايفه التوقيتات
نور / يعني مش بس بيخنصر فى فلوس الخامات دا بيطلع اوردرات من غير فواتير
على / او على الاقل فواتير اقل من قيمتها
نور / و انت ليه ما اخدتش بالك من حاجه زى دى قبل كدا
على / يمكن عشان التاجر لما بيفلس بيدور فى دفاتره القديمه فلما دورت اتصدمت و اكيد لانى بثق فيه جدا احمد ده بالنسبالى اكتر من اخ دا احنا شاربين الشغلانه سوا دا زى عمر بالظبط
نور / بيتهيالي الحاجات اللى وقعت تحت ايدك كفايا قوم ارتاح دلوقت و بكره كلمه و افهم منه عمل كدا ليه
على / لو قالى محتاج فلوس عمرى ما كنت هتاخر
نور / كلمه يا على و ارتاح
على / اكيد هكلمه طبعا بس فى حاجه فى دماغى كدا الاول
نور / قوم دلوقت ارتاح واهدى و ما تفكرش فى اى حاجه
على / تمام يا قليي اسبقيني و انا هلم الليله و احصلك
نور تبتسم و تقوم و على بيلم الورق
……………………..
فى الشركه عند حسام
ندى تدخل تروح على مكتب حسام
ندى / اتاخرت ؟؟
حسام / بالعكس تعالي اقعدى دقيقه بس هخلص حاجه و نمشي
ندى / طب مش تفهمنى طيب نزلتنى على ملا وشي و جيت جرى فى ايه
حسام / دقيقه بس و جايلك
حسام يمشي و ندى تقعد على كرسي انجى تدخل
انجى / كيفك
ندى / الحمد لله ازيك … بتعملى ايه هنا
انجى / شو بدى ساوى هون يعني غير شغل
ندى / بقيتي بتشتغلى هنا يعني
انجى / لهلا فيكي تعتبريني متدربه البابا ما بيعرف حدا فى الشغل بيزنس ايز بيزنيس حتى فيكي تتخيلى انه ما كان راضي ابدا انى اشتغل معه هون
ندى / الحمد لله انه غير رايه و وافق
حسام يدخل
حسام / مساء الخير
انجى تبتسم
حسام / يلا و لا ايه
ندى / كان نفسي نكمل كلامنا بس حسام مستعجل
انجى / بخابرك وقت تانى
ندى تبتسم و تمشي مع حسام
ندى / الحمد لله انجى بقت بتشتغل معاك
حسام / اول يوم ليها
ندى / طب والله كويس بقيتوا مع بعض طول الوقت اهو
حسام يبصلها ندى تبص فى الموبايل
حسام / تعالى اركبى
حسام يفتح لندى باب العربيه تركب يقفل الباب و يروح يركب
حسام / البنت جت … البيبي سيتر اقصد
ندى / اكيد و الا ما كنتش نزلت
حسام / تمام توكلنا على الله
ندى / طب ممكن بقي افهم رايحين فين
حسام / الستات بيبقي عندهم حاسه سادسه قوه ملاحظه لادق التفاصيل تربيط الاحداث مش سهل ابدا تضحك عليهم
ندى / ثم !!
حسام / و لا نعملهم مفاجات
ندى / عاملى مفاجأه يعني
حسام / هو النهرده كام فى الشهر
ندى تفكر و تبصله
حسام / كل سنه و انتى طيبة
ندى تبتسم
حسام / انا مفيش بيني و بين انجى اى حاجه هى بس كانت بتساعدنى نظبطلك يوم حلو مقابل انى اقنع ابوها انها تشتغل فى الشركه
ندى / اى اب فى الدنيا بيبقي عاوز عياله يمسكوا بعده هو بقي كان معترض ليه
حسام / الراجل بقاله فتره بيحاول يرجع هدايه بيروت و انجى وقفاله لو اشتغلت فى الشركه انسي هدايه ترجع
ندى تبص من الشباك
حسام / والله انا لو منها عمرى ما ارضي ارجع بتاخد ضعف المرتب و مقعدها فى بيت فخم ما تحلمش بيه
ندى / فيها ايه دى عشان تتعلقوا بيها كدا
حسام / بتجمعى !! يعني انا متشقلب كل ده عشان اظبطلك يوم محترم و فى الاخر هتقلب بنكد برده
ندى / كان ممكن تورته و نتلم كلنا فى البيت و خلاص
حسام يركن العربيه ندى تبص تلاقي فندق كبير حسام يفتحلها الباب
حسام / اتفضلى
ندى تنزل و تبص لحسام
حسام / فيو على البحر فول بورد حاجه عنب انا و انتى و بس
ندى تبص فى الارض و تبصله و تبتسم
ندى / دى هتبقي احلى هديه جاتلى فى عيد ميلادى
حسام يبتسم و يتحركوا ناحيه الفندق
………………….
فى المحل عند على
احمد بيسلم اوردر لراجل على يركن العربيه و يركن
احمد / نورت يا باشا
على / اتاخرت و لا ايه
الراجل يجي يمشي على يوقفه احمد يستغرب
على / لا مؤاحذه يا باشا اشوف الريسيت
الراجل / نعم !! ليه يعني
على / هو ما قالكش مش حضرتك العميل رقم مليون و ليك مننا هديه الريسيت لو سمحت
الراجل / طب يا سيدي شكرا مره تانيه عشان مستعجل
الراجل يجي يمشي على يمسكه تانى
على / معقول تطلب كل الاكل ده بشكل يومى
احمد / هو فى ايه يا على
على / سيد … فتحى
احمد / على انت بتعمل ايه
اتنين شغالين يدخلوا
على / انت مش عاوز توريني الريسيت ليه … فين ريسيت الباشا يا احمد مش انت اللى مسلمه الاوردر
على يشد الاكل من ايد الراجل و يبص فيه
الراجل / انا اتبهدلت اوى اخر مره اجيب من عندكوا
احمد / لا مؤاخذه يا باشا حقك عليا انا احمد يمسك الكيس من على و على بتبت فيه و يبصوا لبعض
احمد / انت بتعمل كدا ليه
على / مش لاقي ريسيت فى الكيس على العموم مش مشكله
على يدى للراجل الاكياس
على / احنا اسفين يا باشا
الراجل ياخد الاكياس و الكل واقف مستغرب
الراجل / انا هكتب عنكوا اسوء ريفيو فى التاريخ مش هخلى اى حد يعبركوا تانى
على / نورت
الراجل ياخد الاكياس و يمشي و على يدخل جوه سيد و فتحى يدخلوا وراه
سيد / فى ايه يا رياسه هو ايه اللى حصل دلوقت ده
على / احمد فين
سيد يبص بره احمد واقف بعيد
سيد / بره انت عاوزه فى حاجه
على يبتسم و يطلع يشاور لاحمد يروحله
احمد / عاوزنى فى حاجه
على / هستاذنكوا خمسه مع حماده يا رجاله
سيد و حنفى يبصوا لبعض و يطلعوا بره على يقفل الباب
على / اقعد يا احمد اقعد
احمد يقعد و هو رافع راسه على يروح يقعد قدامه
على / تحب تتكلم انت و لا اتكلم انا
احمد / انت اللى مناديني يبقي انت اللى تتكلم
على / انا راجعت كل الفواتير و كاميرات المراقبه الراجل ده بيجى كل يوم فى وقت البريك بتاعى و بياخد اكياس كتير و يمشي و انت كل يوم اللى بتسلمه الاوردر بايدك و سبحان الله الاوردات دى عمرها ما دخلت فى الفواتير يا ترى عندك تفسير
احمد / سبته يمشي بالاكل ليه لو شاكك فيه
على / ليه يا احمد
احمد / هو ايه اللى ليه انا مش فاهم انت بتتكلم عن ايه اصلا
على / بجد !! طب فسرلى انك بتستلم اكل كل شهر اكتر بكتير من الطلبات اللى طالعه
احمد / هو انا بشتغل هنا لوحدى ما يمكن حد فى المطبخ بيخنصر من اللحمه انا مالى
على / فى برده فديوهات لعربيات شركات التوريدات و الكميات اللى بتجيبها اقل بكتير من اللى فى الفواتير
احمد / انت بتحاول تقول ايه
على / مين اللى بيستلم الشغل ده مش انت مين المسؤل عن كل الشغل ده مش انت
احمد / اه انا و الحمد لله انك عارف ان انا اللى شايل الشغل ده كله و انت عمال تتنطت من المالديف للبنان و قاعدلى فى البيت جنب المدام و انا اللى شايل كل حاجه على كتافى
على / ببلاش يعني مش بديك مرتب زيك زيي و يمكن اكتر
احمد / زيي زيك !! دا باماره ايه هو فعلا المفروض ابقي زيي زيك بس انت بقي اخدت كل حاجه و بتمن عليا بالفكه لا و جاى تحاسبني
على / بحاسبك عشان انا اعتبرتك اخويا و امنتك على فلوسي و فى الاخر سرقتنى
احمد / فلوسك دى تطلع ايه و لا مؤاخذه انا و انت اشتغلنا هنا مع بعض و نمنا فى الشقه اللى فوق مع بعض اترقيت قبل منك و فى كل حاجه كنت اشطر منك و الحج ما كانش بيامن حد على الخزنه غيرى و فجاه و فى يوم و ليله سحبت السجاده من تحت رجلى و خليته يكتبلك كل حاجه و فى يوم و ليله بقيت انت المدير و انا اللى شغال عندك طب ازاى
على قاعد بيتفرج على احمد و ساكت
احمد / عملتها ازاى انت و اخوك قولى … عملتوها ازاى يا ولاد اللعيبه
على / انت بتتكلم جد و لا بتهزر
احمد / انا مش ناوى اتكلم خالص انا اى كان اللى اخدته منك اديتك قصاده كتير اوى و اى كان اللى خدته ما كانش بتاعك من الاول فمتزعلش عليه
على / انا !! ازعل على فلوس … لا ما انت معاك حق الفلوس دى جتلى كدا من غير تعب عشان ازعل عليها انا لو هزعل يا احمد هزعل على الرجاله
احمد / يا اخى واحد غيرك كان على الاقل كتب لكل واحد من اللى شغالين عنده نسبه من اللى خدته
على / هوزع ورث الراجل على ناس هو لو كان عاوز يورثهم فيه كان كتبلهم بنفسه
احمد / معاك حق ما يصحش لكن اللى يصح انك تاكل التورته لوحدك
على / هتوحشني يا احمد … مبروك عليك اللى اخدته و اكيد ربنا هيكرمك فى محل تانى
احمد / هتطردنى من الجنه يا خى … وريني بقي هتشغلها ازاى من بعدى
على يقوم يفتح الباب لاحمد احمد يقوم يعدل هدومه و يمشي على يشاور لسيد
على / احمد ما عادش بيشتغل معانا شوفلى حد يغير كوالين المحلات و الشقه اللى فوق
سيد / هو فى ايه يا رياسه انا مش فاهم حاجه
على / حصل خير يا سيد روح شوفلى بس اللى قولتلك عليه
……………………..
فى الفندق
حسام نايم فى السرير ندى تطلع من الحمام لابسه برنص تروح تقعد قدام المرايه و تسرح شعرها حسام يقوم يفتح الدولاب و يطلع فستان احمر مكس بكم
حسام / شكلك بيبقي حلو اوى فى الاحمر
ندى تبصله فى المرايه و تبتسم
حسام/ حاجزلنا ترابيزة فوق فى المطعم اللى فى الروف هتشوفى لبنان كلها من فوق
ندى / كلفت نفسك اوى ما هنا كفايا
حسام يروح يفتح الخزنه و يطلع علبه فيها كوليه رقيق اوى اللماظ و يحطه قدام ندى
حسام / كل سنه و انتى طيبه
ندى تبص للكوليه و تبص لحسام باستغراب
حسام / مش عاجبك و لا ايه
ندى / انت بتقبض كام يا حسام
حسام / الفندق كان هديه من انجى و الكوليه قسط
ندى / و دا على كام قسط بقي ان شاء الله
حسام يقعد على السرير و ندى بتبصله
حسام / هو انا مش قايلك انى داخل فى جمعيات انا بحوش من يوم ما جيت هنا عشان اليوم ده انا عاوز اعيشك حاجات عمرك ما هتعيشيها مع غيرى
ندى / يعني انت مش مافيا يعني فلوسك دى حلال
حسام / مافيا ايه يا نكد هو ده منظر واحد مافيا برده دا انا لولا انجى اتبرعت بحجز الفندق كان زمانا بنحتفل فى بيتنا و ابوكى صاحيلى و حبيبه كاتمه على نفسنا
ندى / هم تقال عليك اوى كدا
حسام / انتى بجد مش طبيعيه بقي انا اعمل كل ده عشان ابسطك و انتى برده بتدورى على النكد اعملك ايه عشان ارضيكى بس مش فاهم انا
ندى تروح تقعد تحت رجلين حسام
ندى / انا هرضي معاك بأقل حاجه بس تكون حلال
حسام / دا كلام زياد ده صح
ندى / ما تدخلش المواضيع فى بعضها
حسام / اسمعى يا ندى لو لسه ليكي اى علاقه بالواد ده
ندى / ما ليش اقسم بالله ما يفرق معايا و لا عاوزه اشوفه تانى انا بتكلم عليك انت انا عوزاك انت
حسام يبصلها تحط ايديها على كتفه و تقرب منه اوى
ندى / انا و انت هنا لوحدينا لا دورت على اللماظ و لا فساتين و لا حفلات و حتى لو من غير فندق كنت راضيه معاك بتورته … بحته جاتوه فى اوضتنا فى البيت و بابا و حبيبه دول هم اهلى يا حسام هم الشعره اللى ربطانى بالدنيا دى ت بحاول اضيفك ليهم
حسام / امال انا بعمل كل ده لمين بس بعمل كل ده ليه بشتغل ليل نهار ليه مش عشان اسعدك مش عشان اخليكي تعيشي عيشه كل بنات الدنيا يحسدوكى عليها
ندى / ربنا يخليك ليا … اعتبرني نكديه و طمنى الفلوس دى كلها حلال صح
حسام / انتى تعرفى عنى كدا يا ندى اقسم بالله انا تعبت فى الفلوس دى جدا اقسم بالله الكوليه ده قسط اقسم بالله هقعد اسدد فى تمنه شهور قدام و حطيت المقدم من الجمعيه اللى كنت قابضها من تلت ايام و لو مش مصدقانى اطلبلك معاذ اللى معايا فى الشركه يقولك رقم الجواهرجى على العلبه كلميهم و اساليهم
ندى تمسك وش حسام بين أيديها و تخليه يبصلها
ندى / اسمعها منك كفايا انا بثق فيك يا سمسم انت جوزى و ابو بنتى قولهالى كفايا
حسام / حلال كل قرش بصرفه عليكي و على بنتى حلال … انا لا مافيا و لا اعرفلهم سكه اساسا ممكن بقي تلحقى تلبسي عشان انا هموت و ارقص معاكى فوق وسط السحاب
ندى / قدام الناس
حسام / ما كل الناس بترقص ما حدش فاضي يبص على حد يعني
ندى / خلينا نقضي وقت لطيف و لما ننزل هرقص معاك هنا لوحدينا تمام يا حبيبي
حسام يبتسم
ندى / وسع بقي عشان اللحق اجهز
حسام يروح يرمى نفسه على السرير و هو مستمتع
……………………..
فى شقه منال
منال / البجح الواطى
على / انا عمرى ما قصرت معاه فى حاجه
أية / الحمد لله انها جت على قد كدا جدع انك ما زعقتش و كبرت الموضوع
عمر / بالعكس ما كانش ينفع يمشي كدا كتيمي كان المفروض تطلبله البوليس و تادبه عشان يبقي عبره
على / عملت اعتبار للعشره
عمر/ و هو كان عملها اعتبار العشره دى بكره كل يوم هتلاقي واحد يعمل زيه من امن العقاب اساء الادب
على / عدت خلاص … انا هقوم اروح بقي
أية / الكيكه فى الفرن استنى شويه تاخد على الاقل حتتين للعيال نغم بتحبها
على / تسلم ايدك بس بجد مخنوق و
عمر / طب ما تقوم تشم شويه هوا فى البلكونه و انا هاجى اقف معاك
منال / قوموا يا ولاد فكوا عن رحكوا و احنا هندخل المطبخ نشوف اللى ورانا
أية و منال يقوموا يدخلوا المطبخ و عمر و على يبصوا لبعض
عمر / مالك يا عم اول مره تتخزوق و لا ايه دا احنا ياما اتهرينا
على يبتسم و يبص الناحيه التانيه
عمر / تلعب دورين فيفا
على / شغل شغل خلينى اللهى دماغى شغل
عمر يحط اللاب و يوصله
……………………
فى الشركه
حسام / و جبت تمن العقد منين و مش كنا اولى بفلوس الفندق مش كنا جبنا تورتايه و احتفلنا مع بابا
انجى / ما عم صدق كل هيدا التعب
حسام/ هموت يا انجى اقسم بالله هتجلط و اطق
انجى / بعيد الشر لا تحكى هيك
حسام / اعملها ايه اكتر من كدا طيب قوليلى
انجى / ما بعرف انا شخصيا بعمرى ما راح اتصرف بهيك طريقه اذا حدا سوالى هيك مفاجاه
حسام / انا عارف بختى يا بنتى
انجى / فيني اسالك سؤال
حسام / اكيد اتفضلى
انجى / ليش اتزوجتها لندى يعني شو عاجبك فيها
حسام / ندى بنت عمى و اول حب حاجه كدا من ايام المراهقه و كدا يعني
انجى / بس انت هلا مانك مراهق يا حسام
حسام / بس العشره و الزكريات اللى بينا بتهون اى حاجه ما هو ما حدش كامل هو انا يعنى اللى كامل ما انا كلى عبر و مع كدا مستحملانى
انجى / بلا حكى فاضي و انت شو مشكلتك يعني ما شا الله شاب ذكى و مرتب و رومانسي شو فيها تتمنى اكتر
حسام / بس عملت حاجات غلط برده يا انجى الواحد عاش عمره كله فى الشغل متغرب و وحدانى خبرته فى الحياه كانت معدومه و لما اتجوزت ما عرفتش اتصرف صح بوظت الدنيا
انجى / و مين بهالدنى ما عم يغلط ندى ذاتا غلطت لما وثقت بالكلب زياد و هربت معه و انت سامحتا لانك بتحبا و بتوثق فيها ليش هى ما فيها تعمل هالشي معك ليش ما فيها تنسي الماضي و تقدر الاشيا اللى عم تساويها لترضيها
حسام / بتدلع عليا يعني ما فيهاش حاجه و بعدين لو ما كنتش انا اتحمل ضعفها مين هيتحملها
انجى / هيدا ماهو ضعف يا حسام هيدا ظلم الك
حسام / ندى خسرت مامتها اللى كانت اقرب لها من الدنيا و مرض باباها و الرحم اللى اتشال و الاحداث اللى حصلت ورا بعض … الدنيا جت على ندى جامد اقوم انا كمان اجى عليها
انجى / بس هى لازم تفهم ان سكوتك ماهو ضعف و انك نعمه لازم تحافظ عليها
حسام / اكسرها يعني !! اكسر ام بنتى .. اكسر بنت عمى و حب عمرى ما استحملهاش فى ضعفها اكمل عليها و اكسرها يعني
انجى / مو لاقيه حكى يعبر عن اللى جواتى عن جد الله يباركلك على هيك قلب قديشها محظوظه ندى
حسام يبتسم و فجاه يتعدل
حسام / هو عشان بنت البوس هتقضيها رغى و لا ايه ان كان معاكى واسطه يا ست هانم احنا غلابه يفنشنونى
انجى / هههههههههههه
حسام / يلا على شغلك يا هانم البريك خلص من بدرى
انجى / خلاص رايحه رايحه هههههههههههههه
انجى تمشي و حسام متابعها و مبتسم
………………….
فى المستشفي بعد فتره
عمر يدخل يجرى يلاقي أية و منال خارجين من اوضه كشف
عمر / فى ايه مالك يا أية
منال / اهدى يا عمر اهدى الحمد لله ما فيش حاجه
عمر / امال كانت بتعيط فى التليفون ليه ايه اللى حصل
على يدخل بيجرى
على/ الحمد لله لحقتكوا خير مالك يا أية
أية / بيقولوا البيبي ضاغطه على الحوض بس لسه بدرى على الولاده
على / مش فاهم يعني ايه
منال / يعني هنروح و هترتاح و لما ربنا ياذن هنبقي نيجي نولد
عمر / طب ما تخليكي ليكون ده بدايه طلق و لا حاجه
منال / هو انت هتفهم اكتر من الدكتوره الدكتوره كشف عليها و قالت لسه بدرى الميه كويسه و البيبي كويسه و كل حاجه هى بس ضاغطه شويه على الحوض عشان كدا هى حاسه بالوجع و الحاجات دى
على / طب الحمد لله دا انا كنت سايق زى المجنون
عمر / انت عرفت منين اصلا
منال / انا كلمته يلا يلا نروح الوقفه مش حلوه على البت
أية / انا تعبانه اوى حاسه ان البت هتقع مني هاين عليا اقرفص فى الارض مش قادره
على يشاور على كراسي فى جنب
على / اقعدى طيب ارتاحى شويه
عمر / بصي ارتاحى و انا هتكلم مع الدكتوره انا مش مرتاح اننا نروحك
منال تسند أية و يقعدوا و عمر يمشي
على / اجبلك حاجه تشربيها ؟
أية تهز راسها لا
……………………
فى شقه نور
امانى / يعني هتولد و لا لا
نور / ما اعرفش حجزولها اوضه و ادوها حقنه رئه احتياطى و هيستنوا جنبها للصبح
امانى / و جوزك هيستنى جنبها ليه ان شاء الله
نور / مستنى مع اخوه يمكن يحتاجوا لحاجه
امانى / انا مش فاهمه يعني البت الدكتوره تقولها روحى و جوزها ما يرضاش يقوموا يحجزوها فى المستشفي
نور / اللى فهمته انهم ممكن يدوها حقنه طلق و تولد عادى بس الدكتوره مش مستعجله عليها بس أية شكلها تعبانه و مش مستحمله الوجع
امانى / يا اختى مش مستحمله الدلع
نور / ربنا يتملها على خير
امانى / و لسه بكره كل يوم تلاقى جوزك بيجرى عليهم اللحق بنت اخوك تعبانه اللحق مرات اخوك اللحق اخوك
نور / ربنا يخليه لينا و ليهم
امانى / تفتكرى لما تيجي تولدى هيقفوا جنبك كدا برده
نور / يا ستى اولد بس و مش عاوزه حد جنبى خالص كفايا عليا انت يا قمر مش انتى هتبقي جنبى برده و لا فى الخلعون
امانى / يا اختى على ظرافتك بقولك ايه انا هنزل و انتى نامى و هو معاه المفتاح ما تقعديش تستنيه انتى حامل زيها و كان اولى يفضل جنبك
نور / تصبحى على خير يا منمن
امانى/ مش هاين عليا انزل و اسيبك بس بسقط وانا قاعده
نور / لا انزلى و ارتاحى و انا كمان هنام شويه
على يدخل
امانى / ما بدرى ما كنت تبات هناك
على / معلش والله الواحد كان قاعد على أعصابه طول الوقت ده هتولد مش هتولد هتولد مش هتولد و عملوا تحاليل و سونار و حاجات كتير كدا عقبالنا يارب
امانى / طب الحمد لله انك جيت انزل انا كدا و انا مطمنه
نور / تصبحى على خير
امانى / و انتوا من اهله
على يوصل امانى تنزل يقفل الباب وراها على يدخل الاوضه عند نور
على / هيولدوها بكره تكون الحقن خلصت
نور / لسه بدرى بيتهيالى
على / بيقولوا راس البت فى الحوض فهيدوها حقنه طلق تفتح الحوض و يولدوها و كدا كدا هى مكتمله يعني ممكن تولد فى اى وقت
نور / امال الدكتوره مش كانت هتروحها
على / اه بس لما عمر اتكلم معاها قالتله انها ممكن تولد عادى بس اللى فيها مش طلق و حتى لو طلق الرحم مافتحش و مش محتاجه تولد قيصرى مش مستعجله فتروح ترفص فى بيتها بقي لحد ما ربنا يسهل
نور / ترفص
على / تتكن يعني فيما معنى الكلام اقصد
نور / ما علينا قالها عمر بقي تولدها
على / لا هو الفكره انهم يبقوا مطمنين مش اكتر اكيد المستشفي احسن من البيت و الدكتوره هتشوف بكره بقي هتولدها و لا تروحها
نور / على خير باذن الله
………………..
فى المستشفي
عمر / يعني ايه قلبت
الدكتوره / هههههههههههههه يعني راسها ما عادتش فى الحوض و صعب جدا نولدها طبيعى على الوضع ده لو مستعجله على الولاده يبقي قيصرى
منال / و هى مستعجله يعني
الدكتوره / انا شخصيا مش شايفه اى سبب للاستعجال خليها شويه جوه
أية / بس انا تعبانه اوى
الدكتوره / طبيعي طبعا انتى حامل هو دور برد
أية تضحك
الدكتوره/ حاولى ترتاحى الفتره دى و لو فاكره انك لما هتولدى هترتاحى يبقي خدعوكى فقالوا
أية / ربنا يطمنك
الدكتوره / هتجيلى للاسبوع الجاى للمتابعه و لو الموضوع ده اتكرر كلميني فى التليفون علاطول
عمر / نيجي المستشفي و لا
الدكتوره / لا كلمنى فى التليفون الاول الحاله الوحيده اللى تيجي المستشفي جرى حتى لو مسافره هى ان ينزل عليها ميه
أية / طب هو لو البنت ما قلبتش هولد قيصرى
الدكتوره / لو الميه قلت اكيد مش هنستنى لما تاثر على البيبي هو كدا كدا البيبي ممكن تشرف فى اى وقت احنا بس بنكسبلها وقت اليوم بتقضيه جوه مفيد جدا بالنسبالها و بتزيد فيه فى الوزن و النمو كل الحاجات دى بتفرق طبعا
منال / لا يبقي ننشف بقي و نستحمل و لا أية يا يويو
أية / اكيد
عمر / تعبناكى يا دكتوره
الدكتوره / ابدا دا شغلى
أية تقوم و عمر يسندها و يطلعوا بره على واقف
على / خير طمنونى
عمر / هنروح مفيش ولاده
على / ليه
عمر / هنستنى مزاج بنت الكلب اللى شغالالنا شقلاباظات جوه دى
أية / ما تقولش على بنتى بتت الكلب
عمر / انا الكلب اشتم تفسي زى ما انا عاوز يلا يلا هموت و انام
الكل يتحرك و التعب باين عليهم
………………….
فى المحل عند على تانى يوم
فتحى / لا يا جدع ما تقولش كدا
احمد/ ياعم بكره نقعد جنب الحيطه و نسمع الظيطه على العموم الفرصه قدامك عاوز اهلا و سهلا مش عاوز بكيفك و لعلمك المصلحه مش واقفه عليك هو بس انت عارفنى اخويا اولى باللقمه من الغريب
فتحى / بس المحل ده اكيد هيحتاج توضيات و فلوس و انت عارف الحال
احمد / جرا ايه يا توحه انت هتعملهم عليا و لا ايه و على العموم يا سيدي ما تشيلش هم انا كدا كدا معايا قرشين ناوى ابدء بيهم و نمر الموردين كلها معايا و ان كان على الصنايعيه فاحنا مش قليلين و معارفنا كتير و نقدر نلاقى بدل الواحد عشره ندربهم و نشيل بيهم الشغل المهم تبقي معايا
فتحى / هو بصراحه حلم عمرى بس
احمد / بس ايه بكره يدرب عيال جديده و يمريسهم علينا خليك صاحب ملك مش هتفضل طول عمرك اجرى باليوميه يعني و ان كان على بيه بيديك جنيه انا هديك اخوه دا غير نصيبك من الارباح بما انك شريكي يعني المرتب دوبل الدوبل جرا ايه يا عم ما نفسك تتجوز بقي و لا هتفضل مخلل البت جنبك كدا
فتحى / اعمل ايه بس يا احمد اديك شايف الدنيا
احمد / على العموم انا هروح بالليل ابص على المحل و امضى العقد حابب تيجي تتفرج اهلا و سهلا مش حابب بشوقك بس زى ما قولت اى وقت على بيه يسوحك زى ما سوحنى كدا باب اخوك مفتوحلك
فتحى / هدورها فى دماغى و اكلمك
احمد يخبط على كتف فتحى و يسيبه و يمشي سيد يدخل
سيد / ايه يا توحه الحوار على ايه
فتحى / مش عارف
سيد / هو ايه اللى مش عارف ما انا برده قولت اكيد حماده مش هيعدى اللى حصل بالساهل
فتحى / لا يا عم احمد جدع و ابن اصول و باقي على العشره هو بس هيفتح محل لوحده
سيد / ااااه و انت ناوى تروح تشتغل عنده بقي ان شاء الله
فتحى / عند على اجير و عند احمد اجير بس احمد بيعرض عليا ابقي شريك معاه انت لو مكانى هتعمل ايه
سيد / انا ما بشتريش سمك فى ميه لما يبقي يفتح المحل و يوضبه ابقي افكر انما طول ما هو كلام على ورق انا ورا لقمه عيشي مش هيبقي ابنى على كتفى و ادور عليه
فتحى / معاك بس برده ما يضرش ان حبال الود تفضل موصوله و اهو احمد برده عشره عمر و لازم نقف جنبه و لا ايه
سيد / منين يا خويا ما انت عارف ان فى رقبتى كوم لحم
فتحى / يا جدع قول كلام غير ده دا شبكه مراتك لوحدها
سيد / ما لكش دعوه بشبكه مراتى دول حياله دبله و غويشيتين يتم
فتحى / و هو جرام الدهب دلوقت زى ما اشتريتهم ما انت هتكسب فيهم
سيد / ما انا مش هعرف اعوضهم و بكره و لا بعده الدهب ينط و اعرف انى خدت على قفايا
فتحى / خساره قريبه و لا مكسب بعيد و بعدين انت مش هتبيعهم و تاكل و تشرب بيهم انت هتفتحلك مشروع تاكل منه و من ارباحك تشترى بدل الغويشه سلسله و بدل الدبله محبس
سيد / ما تلعبش فى دماغى يا سيد انا راضي بعيشتى مع على
فتحى / بشوقك انا كدا كدا رايح اشوف المحل مع احمد بالليل عن اذنك اشوف اللى ورايا
فتحى يدخل و سيد يقف يفكر
………………..
فى شقه منال
أية تخرج من الحمام منال تروح تسندها
منال / احسن دلوقت
أية / مش قادره خالص والله حاسه ان البت هتقع منى فى الحمام مش قادره خليها تولدنى قيصرى و تريحينى
منال / قيصري ايه بس ما تقوليش كدا هو يعني القيصري ده سهل ما هو فتح بطن و غرز و هم ما يتلم
منال تنيم أية فى السرير أية تعيط
أية / حاسه انى هموت و مش هلحق اشوفها
منال / ايه الكلام الوحش ده بس اهدى كدا
عمر يدخل
عمر / السلام عليكم اما جبتلكوا حته … ايه ده فى ايه مالك يا ايه
عمر يروح يقعد جنب ايه الناحيه التانيه و يمسك ايدها
أية / تعبانه اوى يا عمر تعبانه اوى بجد
عمر / يعني نروح المستشفي تانى هنقضي الشهر ده فى المستشفي يعني
أية / انا مش عارفه اقف و لا اقعد و لا انام و لا اعمل حمام حتى برتاح بس و انا مقرفصه و لما بقرفص بحس انى هولد انا بخاف احزق فى الحمام البت تقع منى
عمر / هههههههههه مش هتقع الدكتوره اكدتلى انها مش هتقع اهدى بقي
أية تعيط اكتر
منال / يا حبيبتي العياط ده غلط على البيبي
عمر / سبيها تعيط و تنوح و تسيب السمك و الجمبرى اللى بره يبردوا
أية / جبتلى السبيط
عمر / جبت سبيط
أية تحاول تقوم
عمر / الصحه جت دلوقت
أية تزغده عمر يضحك و منال تسند أية
منال / تاكل براحتها هى بتاكل لنفسها دا بنتك اللى بتاكل
عمر / بنتى دى هتاكلنا بعد كدا
أية / اولد و افوقلك بس
عمر يقوم يسند أية تسحب ايدها
أية / اوعى مخصماك
عمر / لا معلش بقي ما انا ما اكعش الفلوس دى كلها و فى الاخر تخاصميني انا اخد سمكى و امشي
منال / ما تبس بقي يا عمر البت مش قادرالك
عمر / عشان خاطرك انتى بس يا قمر
أية / و انا اتفلق عادى يعني
منال / انا هاكل السمك وانتوا كلوا بعض تعبتونى
عمر / لا انا هاكل السمك عادى
الكل يقعد و أية باين عليها التعب تمسك بطنها و تتالم
عمر / نروح المستشفي يا أية
أية / هتروح هتروح اقعد كل هتروح
عمر / طب كلى و اهدى فتره و هتعدى معلش و كلو يهون عشان النونو و لا ايه
أية تهز راسها عمر يفتح الاكل و يحطلها فى طبقها و منال متبعاها بقلق
…………………….
فى محل تحت التوضيب
احمد واقف مع فتحى
فتحى / بس دا محتاج شغل كتير اوى يا حماده
احمد / ما هو لما يخلص هيبقي حاجه ما حصلتش مش محل فول و طعميه
فتحى / ايوه بس دا هيحتاج خميره جامده
احمد / و الله انا هحط اللى معايا و فى كام واحد معرفه هيدخلوا شركه و ربنا هيرزق و بعدين قال على راى المثل ابتدى كبير تفضل كبير
سيد يدخل
سيد / اول مره اسمعه المثل ده
احمد / ما انا لسه مالفه دلوقت منور يا ابو السيد ايه رايك
فتحى/ جيت يعني
سيد / اهو بشجع الشباب و لا انت ايه رايك
احمد / المكان ده بعد ما يخلص هيبقي هيبقي مطعم خمس نجوم هعمل يافطه كلادينج و ازاز سوكريت و هنا هعمل وايتنج كورنر اللى هى انتظار يعني و هنا هعمل بار
فتحى / خمره !!!
احمد / خمره ايه يا جدع ركز معايا هنا هيقعد الناس اللى مش جايين يكلوا مشروبات بقي و عصاير و اسموزى و حركات
سيد / دا انت طلعت مدكن بقي
احمد / ما انا برده مش لوحدى
فتحى/ ايوه مش لوحدك انت لسه قايل معاك شركه و انا يا صاحبى لو هدخل لازم اعرف راسي من رجلى دى تحويشه العمر
احمد / ما تخافش يا جدع شريكي مجدى ابو الخير
سيد / مش دا بتاع التوريدات
احمد / هو يعنى المكان مش هيبقي ناقصه اشايه
سيد / و النصيب بكام بقي يا ابو حميد
احمد / المحل ده بالميت هيتكلف نص
فتحى / نص ايه
احمد/ نص مليون يا جدع فى ايه مالك
سيد / طب ما كنتوا قولتوا كنتوا وفرتوا المشوار
فتحى / نص مليون ايه يا احمد و انت تحتكم على نص مليون
احمد / منين يعني و بعدين انا لو معايا نص مليون كنت هشاركوا ليه من اساسه لا مؤاخذه يعني
سيد / مؤاخذتك معاك معاك حق
احمد / انا كل اللى احتكم عليه اول عن اخر تحويشه العمر ما يكملوش متين الف و مجدى هيحط قدهم يبقي اللى فاضل ميه الف جنيه
سيد / انا اللى معايا ما يكملوش تلاتين الف يعني يادوب تحطلى ترابيزتين فى جنب هناك كدا
احمد / يا عم ان شالله جنيه كلو بالنسبه هتحط جنيه هتحط عشره على قد ما تحط على قد ما تاخد
فتحى / ماشي يا اسطى سبنى ادورها فى دماغى النهرده و ارد عليك
احمد / بس ما تتاخرش قدامك يومين معايا تقابلنى عند المحامى بالفلوس تمضى العقد
سيد / و مين اللى هيمشي الليله
احمد / احنا شركه اه بس المركب اللى ليها ريسين تغرق نشور بعض ماشي انما القرار النهائي للعبد لله
فتحى / و اشمعن بقي
احمد / احنا مش قولنا نسب و اللى ليه اكبر نسبه من حقه يدير و دا قانون مش من جيبي الكلام ده
فتحى / ماشي هندورها و بكره نرد عليك
احمد / نورتوا يا رجاله كان نفسي اضايفكوا اى حاجه بس المره الجايه بقي تتعوض .. عند المحامى ان شاء الله
………………..
فى المحل عندى على
على قاعد فى المكتب بيبص على ورق سيد يخبط على الباب
على / تعال يا سيكا اقعد خمسه و افضالك و لا حاجه مستعجله
سيد / لا دا حوار محتاج رواقه خلص اللى فى ايدك
على يضرب ارقام على الاله الحاسبه و يكتب فى ملف و يقفل ورق و يحطه فى الدرج و يروح يقعد قدام سيد
على / خير قلقتنى
سيد / انا كنت محتاج مبلغ كدا سلف و ان شاء الله ارده
على / عنيا بس خير
سيد / حوار كدا ما تشغلش انت بالك
على / تمام محتاج كام
سيد / خمسين الف
على / خمسين الف!!
سيد/ هسدهم والله مش هاكلهم عليك
على / يا سيد مش كدا والله بس انت اصلك مش عارف انا فعلا كل اللى احتكم عليه دلوقت ما يكملش المبلغ ده اقول ايه بس منه لله اللى كان السبب
سيد باصص لعلى
على/ ما يمشوش عشره دلوقت لحد ما ربنا يكرم و اتصرفلك فى الباقي
سيد / هو اصل انا كان قدامى فرصه كدا … بس شكلها مفيش نصيب بقي عن اذنك
سيد يجى يقوم على يمسكه يقعده
على / الفرصه دى ما تستناش شويه والله لو كان معايا ما اعزهم عنك بس انا بطلت اتعامل مع مجدى و كل الموردين رافعين الاسعار و اليومين دول اقسم بالله الدنيا ملخبطه خالص حتى شوف الحسابات المحل الفتره اللى فاتت ما كانش جايب مصاريفه
سيد / الله يعينك خلاص مش مشكله ما تشغلش بالك انت
على / طب بص خد العشر بواكى و هحاول اكلم عمر استلفلك منه اى حاجه
سيد / لا لا لا مش للدرجادى مش هتشحت عليا على اخر الزمن
على / اشحت عليك ايه يا جدع عيب الكلام ده دا احنا اخوات و لا انت ايه حكايتك … طب بص انا هظبطلك جمعيه كبيره و اقبضهالك الاول بس اديني يومين ارتب الدنيا
سيد / يا عم ما تشغلش بالك خلاص انا هتصرف
على / تمام على العموم خد الفلوس و ربنا يكرمك تكمل عليهم
على يقوم يفتح الدرج و يطلع فلوس و يديها لسيد ما يمدش ايده ياخدها
سيد / انت مش عاوز تعرف انا هعمل ايه بالفلوس دى
على / انت بتقول فرصه
سيد / طب مش تسال ايه الفرصه دى
على / يمكن هتغير المكنه بعربيه او تنقل شقه اكبر اكيد لو عاوز تقولى كنت قولت
سيد / على فكره مصلحه انك غيرت مجدى كان عيل ابن حرام بيبيع بالرخيص اه لكن كان بيقص فى الميزان
على / و انت كنت عارف يا سيد
سيد / كلمت احمد كذا مره قالى لما تيجي هيكلمك و مره قالى انك ما اهتمتش تسمع
على يبتسم و يروح يقعد قدام سيد
سيد / انا مش هشارك حرامى انا معايا تلاتين الف خدهم و شاركنى معاك
على / انت كنت عاوز الفلوس عشان تشارك مجدى
سيد / احمد بيعمل مطعم مع مجدى و كانوا عاوزيني ادخل معاهم
على يبتسم و يبص الناحيه التانيه
سيد / بصراحه العشره ما هانتش عليا قولت اجس نبضك و اشوف هتعمل ايه قولت هتطردنى او هتتكبر عليا و ساعتها هروح ادى القرشين اللى معايا لاحمد و ضميرى مرتاح ما انت ان كنت اخويا فهو اخويا برده و انتوا الاتنين عشره عمرى
على / و عرفت بقي الفلوس اللى مع احمد جابها منين قالك مشي ليه
سيد / لا ما انا مش غبى انتوا طول عمركوا صحاب و اللى داخل بينكوا خارج و انا فى حالى و انت عارف فى رقبتى كوم لحم
على / الفلوس قدامك و لو عاوز الباقي هتصرف و اجبهولك
سيد / انا عاوز اكمل معاك انت يا على انا مش مرتاح ابقي معاهم بس مش هينفع افضل شايف كل اللى حواليا و بدئوا معايا بيكبروا و انا لسه محلك سر و اديك شايف الدنيا عماله تغلا و
على / ماشي يا سيد هشاركك و همسك الاداره الفرع هنا مكان احمد
سيد عنيه تنور
على / فى اى حاجه تانيه يا سيد
سيد / هعوز اكتر من كدا ايه بس
على / خلاص بكره تجيب الفلوس و انا هكلم المحامى يظبط العقد
سيد / تمام يا مريسه
سيد يجي يقوم يفتكر حاجه و يقعد
سيد / هو الحوار ده فى السكرته و لا نذيع
على / ههههههههههههه بخيالك
سيد يفرح و يطلع يجرى
…………………
فى شقه منال
عمر / كنت عارف انه مش هيسكت على كدا يعني سرقك و كمان بيقلب عليك اللى شغالين عندك دا ايه البجاحه دى يا اخى
على / سيد جالى بس اكيد فى غيره هيمشوا
عمر / بس حتى ده مجاش حبى يمكن لو كنت اديته الفلوس كان زمانه خلع بيهم و راح شارك احمد
على / اكيد كنت همضيه على حاجه يعني مش هيمشي كدا
عمر / بص هو شيطان بس ممكن برده يكون ملعوب لازم تاخد بالك
على / انا محتاج لفلوسه الفتره دى انا واقع بجد و احمد معاه حق انا الفتره اللى فاتت اهملت الشغل و سبته كله على احمد ما راجعتش وراه الا بعد فوات الاوان
عمر / انت رجعت الفلوس لحسام
على / مع نور مش راضيه ترجعهم الا اما تولد قولتلها بينك و بين اخوكى بقي انا كدا ماليش فيه
عمر / طب ما
على / لا هو ايه انا طلعت عيني و بعدين انا محتاج سيد برده انا كدا هتبهدل
عمر / يا ترى مين تانى احمد لعب فى دماغه
على / كتير و الفتره الجايه هتبقي فتره صعبه بس اهى غربال يسقط اى حد قلبه مش عليا
عمر / وجهه نظر على العموم لو محتاج فلوس
على / خليك فى اللى انت فيه الله يعينك
عمر / تعبانه اوى يا على تعبانه و تعبانا كلنا معاها
على / يارب بس بفايده و يتملكوا على خير انا كل يوم بيعدي بقلق اكتر و الشيطان ابن الجزمه مش سايبني
عمر / سبها على الله ما حدش بياخد اكتر من نصيبه
على / و نعم بالله ما لناش غيره
…………………
فى الشركه عند حسام
انجى / ليش لا
حسام / مش هقدر اطلع مؤتمرات و اسافر و اغيب كل الفتره دى
انجى / هادول ٣ ايام مو اكتر فيها تبدر حالا يعني
حسام / مش عارف مش مرتاح
انجى/ هايدى فرصه ما فيك تعوضها يا حسام هيدا المؤتمر راح يكون مجمع لكل شركات الادويه العالميه و راح تكسب كتير خبرات و علاقات
حسام / انتى بتدوريلى على شغل بعيد عن ابوكى و لا ايه
…………………
- يتبع الفصل التالي اضغط على ( رواية سلف و دين ) اسم الرواية