رواية انت عشقي وقسوتي الفصل السابع 7 - بقلم دينا قدري

 رواية انت عشقي وقسوتي (كاملة جميع الفصول) حصريا عبر دليل الروايات بقلم دينا قدري

رواية انت عشقي وقسوتي الفصل السابع 7

 - بارت ٧

ملك .. يعنى مش هتيجى معانا يا لولو 

عاليا .. معلش يا ملك بلاش انا المرة دى 

ملك بحزن .. ليه بس يا عاليا انا نفسي نخرج مع بعض 

عاليا .. معلش خليكم براحتكم .. دى اول مرة تخرجى معاها و اكيد هتبقى عايزة تكلمك عن ادم وتتكلم معاكى فى حاجات شخصية .. بلاش تكرهنى زى ما ادم كارهنى بسببك 

ملك .. بالعكس والله دى هيا اللى قالتلى لازم عاليا تيجى ولو مش فاضية نظبط يوم تانى 

عاليا .. معلش سيبينى على راحتى .. خليكم لوحدكم واتكلمو براحتكم وبعد كدة هفضل على قلبكم وازهقكم منى 

ملك .. ممم هو انا مش مقتنعة .. بس خلاص براحتك  

عاليا .. ماشى يا حبى اتبسطو سلام 

...

سيرين .. يعنى مصممة متجيش برضو 

ملك .. اه حاولت معاها كتير ومفيش فايدة 

سيرين .. طيب هنروح فين 

ملك .. هوديكى مولات جامدة تجيبى اللى نفسك فيه ونتغدى برة 

سيرين .. خلاص قشطة اشوفك بكرة 

....

وجدها تجلس وحيدة تتناول فطورها فقرر ان يتجاذب معها اطراف الحديث 

عمر .. صباح الخير على الناس اللى مبتحضرش 

عاليا متفاجأة وقد شعرت بقطعة من الطعام وقفت فى حلقها فأخذت تسعل لتقول .. احم .. عمر 

عمر .. مش المفروض تعرفينى انك هتغيبى برضو .. مش دى الاصول 

عاليا ضاحكة رغما عنها .. يابنى هو انا هعد اعمل تقارير بكل حاجة اعملها .. اجيب مذكرات اعمل تقرير اغيب اعمل تقرير . 

عمر برخامة .. اه وتكتبى كمان اسباب منطقية لاى حاجة بتعمليها 

عاليا بضحك ... ههههه رخم اوى بجد 

عمر .. ممم من بعض ما عندكم .. بس مش بدل ما تقولى عليا رخم زى كل مرة تسألينى ليه !!

عاليا باستفهام .. مممم ليه باة 

عمر .. عشان انتى لما تغيبى هتضطر اشرحلك اللى فاتك .. فلازم اكون عامل حسابى عشان اركز فى المحاضرة واعرف اشرحهالك 

عاليا .. ليه ان شاء الله كنت خلفتنى ونسيتنى وانا مش واخدة بالى!!

عمر .. هو انا اطول اخلف بنوتة زيك كدة .. ده انا تبقى امى داعيالى 

عاليا بخجل .. ميرسى عالمجاملة دى .. بس شكرا انا مش محتاجة حد يشرحلى حاجة 

عمر .. لا ماهو مش بمزاجك على فكرة 

عاليا .. نعم !! ايه بالعافية يعنى 

عمر .. اسألينى ليه برضو 

عاليا بزهق ... اوووف ليه يا نابغة عصرك

عمر .. اتريقى اتريقى .. بس انا مش عايز اشرحها عشانك يعنى .. لا ده عشانى انا لان المحاضرة كان ليها علاقة بمشروعنا ومن مصلحتى تفهميها وتشيلى عنى شوية

عاليا .. مممم مصلحة يعنى 

عمر .. بالظبط شوفتى باة ان كنتى المفروض تبلغينى 

عاليا .. ههههه يالهوووى كل اللفة دى عشان مقلتلكش انى مش هحضر .. والله انا نسيت الموضوع اصلا 

عمر باعجاب شديد بضحكتها ... وبشرود غير منتبه لنفسه .. ضحكتك حلوة اوى يا عاليا .. بحب اشوفك بتضحكى علطول

خجلت عاليا كثيرا لتعتلى وجهها ابتسامة رائعة .. فقد كانت سعيدة بكلام عمر ومدحه بها

ولكن فجأة تذكرت الوعد الذى قطعته على نفسها بالابتعاد عنه وعدم اعطاؤه فرصة للتقرب منها 

عاليا .. طيب هروح باة عشان الحق المحاضرة زمانها بدأت 

اراد ان يذهب معها ولكنها اختفت عن انظاره بسرعة شديدة 

وانصرفت دون ان تنتظر رده 

عمر فى نفسه .. هتفضلى تتقلى كتير .. اتقلى براحتك مسيرك تضعفى وتلينى فى الاخر يا عاليتى 

.....

اخذت ملك تكتب بعض الملخصات فى مدرج الكلية بانتظار عاليا  . وفجأة جلس ادم بجانبها يتابع ما تفعله 

ودون مقدمات امسك يدها ساحبا القلم منها 

وكأنها حجة كى يلمس يديها 

ادم .. عاليا لسة مجتش ولا ايه 

تفاجأت ملك بوجوده وصدمت مما فعل على غير توقع 

لتشعر بقلبها يدق بسرعة شديدة لم تستطع السيطرة عليها لقربه منها هكذا .. شعرت وكأنه يحتويها بوجوده بقربها

ملك .. ادم !! .. خضيتنى .. انت هنا من بدرى 

ادم ... اه وبصراحة وحشتنى لمسة ايديكى اوى 

ملك بخجل .. ادم انا قلتلك قبل كدة بلاش موضوع مسك الايد ده . 

ادم بخبث .. بس انا ممسكتش ايدك .. انا كنت باخد القلم ولمستها غصب عنى .

ملك .. بجد والله !! طب وانت بتاخد القلم ليه اصلا 

اخرج قلما اخر من حقيبته وكاد ان يضعه بيديها ولكنها سحبت يدها سريعا 

ملك بتحذير .. قلنا ايه ؟!!

وضع ادم القلم امامها .. ثم امسك بقلمها يتلمسه ويشتم عبيرها به مغمضا عينيه وكأنه يتذوق رائحتها ويتخيل لمساتها له 

ثم فتح عينه قائلا بعشق .. قلمك هيفضل معايا .. عشان احس دايما انك جنبى وريحتك حواليا .

اذابها كلامه عشقا فوق عشقها .. الهذه الدرجة تحبنى .. أيمكن ان اكون ذات حظ كبير لاجد من يعشقنى كل هذا العشق 

امسكت ملك بقلمه .. ولكنها خجلت ان تفعل مثلما فعل امامها 

فقالت وهى تضم القلم بيديها بسعادة.. وقلمك كمان هيفضل معايا ومش هكتب تانى الا بيه 

اخذ ينظر اليها بعشق مجنون يتمنى ان يحتضنها بكل قوته 

ويفرغ كل عشقه وشوقه اليها بضمه لها حتى تختفى بأحضانه 

يتمنى لو يرتشف من تلك الشفتين المبتسمتين ويشبع جوعه وشوقه لها 

ولكنها جوهرة ثمينة يخاف عليها حتى من نفسه 

فابتعد عنها سريعا مزيحا عينيه عنها مسيطرا على مشاعره وافعاله 

رأتهم عاليا على هذه الحالة وكادت ان تجلس بمكان اخر بعيدا عنهم كى لا تفسد تلك اللحظة عليهم حينما رآها ادم وكأنها القشة التى تعلق بها لتنقذه من انفعالاته وتهوره 

ادم .. عاليا .. ازيك عاملة ايه 

تراجعت عاليا لمكان جلوسهم .. الحمدلله .. ازيك انت يا ادم 

ملك .. اتأخرتى كدة ليه 

وقف ادم تاركا المقعد لها قائلا .. طيب هروح انا اشوف عمر فين .. وانصرف سريعا

.....

خرجا كل من ملك وسيرين بعد انتهاء المحاضرات 

فأخذتها ملك لاحد المولات الشهيرة بالملابس الرائعة والمحتشمة بذات الوقت 

تجولا كثيرا بداخل المول فى ظل احاديثهم وضحكاتهم 

فاكتشفت ملك ان هناك تقارب كبير بين شخصيتها وشخصية سيرين خفيفة الظل والذكية ذات الروح المرحة 

والقلب الطيب وسرعان ما احبتها وفتحت لها قلبها 

اما سيرين .. فكانت فى غاية السعادة مع ملك .. فهى تفتقد تلك المشاعر منذ زمن .. تفتقد للصداقة والالفة والعلاقة الطيبة التى تخلو من اى مصالح 

كما انها ارتاحت لملك كثيرا واعجبت بها وبشخصيتها وروحها الجميلة 

ملك .. يعنى شوفتيه امبارح اخيرا 

سيرين بخجل .. اه .. بس كالعادة ادم كان اعد مبوز ومش طايقه .. وهو حس واستأذن ومشى علطول 

ملك .. لا يمكن بس كان وراه مشوار ولا حاجة 

سيرين .. انا بس نفسي اعرف ادم شايف فيه ايه احنا مش شايفينه

ملك .. هو انتو مخطوبين من امتى 

سيرين .. بقالنا سنة اهو .. اول ما اتخرجت اتخطبنا 

ملك .. وكنتو بتحبو بعض 

صمتت سيرين قليلا تفكر ثم ردت .. هو شخص كويس ومناسب وبيحبنى وماما وبابا فرحانين بيه 

ملك .. وانتى يا سيرين .. بتحبيه ولا لأ 

ظلت صامتة ثم قالت .. انا عمرى ما حبيت يا ملك .. للاسف حياتى كلها كانت برة بلدى دايما كنت حاسة بالغربة 

احنا سافرنا وانا يادوب لسة مخلصة اعدادية .. فجأة لقيت نفسي فى بلد غريبة مع ناس اغرب .. كلهم عرب ولهجاتهم غريبة اعدت كتير على ما فهمتها 

وكنت فى ثانوى اللى هى اكتر مرحلة حرجة .. مرحلة المراهقة 

للاسف مكنتش بلاقى ناس ينفع اصاحبهم .. كلهم مختلفين عنى وعن عاداتنا وطبيعتنا .. كلهم بتوع مصالح وبس 

حتى لما دخلت الجامعة .. كل اللى كانو حواليا عرب .. محبتهمش يا ملك مش زينا تحسيهم باردين كدة معندهمش مشاعر كدة وروحهم حلوة زى المصريين 

غير ان معظمهم متكبرين اوى وشايفين نفسهم .. وشايفين اننا اقل منهم كمصريين 

رغم ان بابا هناك له وضعه ومكانته وقدر يعمل ثروة واملاك وكمان مجموعة شركات .. بس النظرة الدونية من اهل البلد للمصريين بجد صعبة اوى 

ملك باشفاق .. معقول ملكيش صحاب هناك خالص 

سيرين .. لا اكيد فيه بس يعنى معارف زمايل كدة .. انما ناس متثقيش فيهم ولا ترتاحى تتكلمى معاهم فى خصوصياتك فهمانى 

ملك .. اه فاهمة 

سيرين .. وسط كل ده باة طلعلى سليم فجأة .. عارفة لما تكونى وحيدة وحاسة بالغربة والوحشة وفجأة تلاقى حد زيك بيقولك انتى مش لوحدك 

هو ده اللى حصل .. فجأة عمى وابنه سافرولنا 

عمى اشتغل مع بابا .. وطبعا بحكم شغلهم وكمان مسكنهم القريب مننا بدأ سليم يتردد على بيتنا كتير .. بقيت اشوفه وانا رايحة الكلية كتير .. وهو يجيلنا كتير 

طبعا كان هو بالنسبة لى مختلف عن اى حد هناك .. من نفس بلدى وفاهمنى ولقيت فيه اللى مفتقداه بجد .. وبدأ يلمحلى انه معجب بيا .. وده بان فى اهتمامه ومعاملته ليا 

بس انا قلتله انى مبفكرش فى المواضيع دى وان دراستى اهم حاجة .. سافر واشتغل فى مصر 

و استنى اول ما خلصت واتقدم لبابا .. وبابا كان فرحان اوى وماما كمان .. وانا كمان كنت فرحانة ان حد بيحبنى للدرجة دى واستنانى كل ده .. حسيت انه بيرضى انوثتى وبيملأ فراغ كبير كان

عندى. الحاجة الوحيدة اللى كانت معكرة فرحتى هو ادم 

ملك باستغراب .. ادم !! ليه ؟

سيرين .. من ساعة ما وصلو الامارات وهو مش طايقهم .. لا عمى ولا ابنه 

وكان دايما يعامل سليم باسلوب حاد ورخم لما يحاول يكلمه ولا يتقرب منه 

ملك بضحك .. هههه انتى هتقوليلى على ادم وسخافته لما يكره حد 

سيرين .. بالظبط .. ويوم ما سليم اتقدملى كان رافض .. وحاول كتير مع ماما وبابا عشان يفركشو الحكاية .. بس بابا كان مقتنع جدا بيه وكان يقول كفاية انه من دمك وهيخاف عليكى ويحميكى وانا هبقى مطمن عليكى معاه 

ملك .. وادم قبل بعد كدة ؟

سيرين .. ابدا .. وفضل زعلان منى فترة .. ويوم الخطوبة كان عامل فعلا زى اللى مغصوب يحضر .. ودايما يرخم على سليم لما يجيلنا وميديهوش فرصة يعد معايا ولا نتكلم فى حاجة 

والله يا ملك انا قلتله قبل الخطوبة قوللى مش عاجبك فى ايه ولو طلع عندك حق هرفض .. قاللى معنديش اسباب مجرد احساس جوايا مبرتاحلوش لله فى لله 

طب ده سبب ارفض عشانه !!

ملك .. لأ طبعا .. بس برضو هو اكيد له نظرة 

سيرين .. ما عشان كدة موافقتش علطول واعدت فترة مترددة .. بين ارفض وارضى ادم بس هزعل ماما وبابا وهصغر بابا كمان لانه كان ادى كلمة لعمى .. وبين اقبل وازعل منى ادم بس هفرح باقى العيلة وانا كمان زى اى بنت كان نفسي احب واتحب واتخطب .. وكنت حاسة انى هحب سليم لو اديت نفسي فرصة 

وفى الاخر قبلت وادم خد منى جنب فترة وبعدين اتقبل الوضع 

ملك .. وحبيتيه بعد الخطوبة ؟

سيرين .. مش هقدر اقول حب .. ممكن ارتياح اعجاب .. بس هو سافر علطول عشان شغله هنا ومدانيش فرصة اتقرب منه واعرفه اكتر .. كل كلامنا عالنت وتليفونات بس قليل جدا لما بيجيلنا 

فمخدتش فرصتى لسة عشان احبه 

ملك .. بس الحب بييجى فجأة يا سيرين .. يعنى لما  يخطفك من اول مرة تشوفيه كدة او حتى بعد الفترة اللى اتعرفتو فيها على بعض .. ساعتها كنا نقول فيه امل 

بس واضح انه عادى بالنسبة لك .. لدرجة انك كنتى ممكن ترفضيه عادى ومكنتيش هتتأثرى .. كان كل همك زعل اهلك .. لو بتحبيه كنتى اتمسكتى بيه عشانك مش عشان اهلك 

ويمكن ادم حاسس بكدة عشان كدة كان رافض 

سيرين بخبث وغمزة .. وانتى باة اتخطفتى كدة اول لما شوفتى ادم ؟!

احمرت وجنتاها خجلا لتطرق برأسها للاسفل و تومئ علامة الايجاب 

ثم تذكرت شيئا فرفعت وجهها فجأة متحدثة بحدة وشراسة  .. 

ملك بانفعال .. لا اول ما شوفته ايه .. ده انا اول ما عرفته كنت عايزة اديله بحاجة فى دماغه .. كان بنى ادم سخيف وسمج ومفيش ارخم منه .. مكنتش بطيقه بجد 

رفعت سيرين حاجبيها بدهشة لتتذكر ملك انها تتحدث عن اخيها فتراجعت لتقول 

ملك بحرج .. احم .. بس ده كان فى الاول بس .. كنا دايما بيننا تحدى ومشاحنات وكأننا فى معركة .. بعد كدة اتصافينا وبدأت اشوفه بعين تانية خالص 

ثم نظرت لاسفل واردفت بخجل .. فجأة بقى مميز ومختلف بالنسبة لى .. وحسيت معاه احساس اول مرة فى حياتى احسه 

سيرين .. يا سيدى عالحب .. يابختك ياعم ادم 

ملك ... هههههه .. والله يا سيرى ما بقول كدة عشان اخته .. انا اصلا نفسي نبقى صحاب بعيدا عن ادم وعلاقتك بيه .. يعنى علاقتنا تبقى بعيدة عنه انا بجد حبيتك اوى 

سيرين .. وانا كمان حبيتك وارتاحتلك جدا .. ده انتى خلتينى فتحتلك قلبى واتكلمت معاكى فى حاجات عمرى ما اتكلمت فيها مع حد .. ولا حتى ادم نفسه 

ملك .. برغم انك اكبر منى ب ٣ سنين .. بس انا مش حاسة بالفرق ده خالص بالعكس حساكى قدى او اصغر كمان 

سيرين .. هههههه مش اوى كدة 

ملك .. طب يلا نروح نتغدى باة احسن انا ميتة من الجوع 

سيرين بمزح  .. هههه انتى علطول عايزة تظغطينى مش فاهمة ليه ! 

ملك .. اه شايفاكى صغننة ورفيعة خالص عايزة اتخنك شوية وتبقى بطاية حلوة كدة 

سيرين .. هههه طب يلا بينا 

....

فى احدى الفيلات الفاخرة مساءا كان يقام حفل عيد ميلاد احدهم بحديقة الفيلا 

حيث كانت مزينة بالورود الرائعة متعددة الالوان والانوار الجذابة الخاطفة للانظار

وتمتلئ بالطاولات الفخمة التى يلتف حولها العديد من كبار رجال الاعمال واساتذة الجامعة يقفون بكامل اناقتهم ومعهم زوجاتهم اللاتى تردتين افخم الملابس واغلى المجوهرات 

باحدى غرف الفيلا دق باب الغرفة 

-ادخل

شادى .. كل سنة وانتى طيبة يا يويو .. احلى بنوتة دى ولا ايه 

اية مندفعة نحو شادى تحتضنه بشدة وحب شديد .. وحشتنى اوى اوى يا ديدو .. كدة تغيب عننا كل ده 

شادى .. انا مقدرش اتأخر عنك يا حبيبتى .. بس انتى عارفة الشغل والماجستير واخدين كل وقتى 

اية بحزن .. وانا فين باة من كل ده 

شادى .. انتى فى قلبى يا يويو .. عشان كدة مقدرتش اسيبك انهاردة رغم عندى مناقشة مهمة بكرة .. بس قلت انتى اهم 

اية بسعادة مقبلة وجنتيه .. ربنا يخليك ليا يا ديدو 

شادى متفحصا ملابسها مقيما اياها .. بس ايه القمر ده والفستان التحفة ده 

اية مبتسمة لنفسها بالمرآه بسعادة .. بجد حلو عجبك؟ 

شادى .. اه جدا بس لازمله سلسلة رقيقة زى صاحبته

امسكت اية بعلبة مجوهرات بجانبها لتقول 

اية .. منا لسة كنت بختار اهو .. اختار معايا باة انا بحب ذوقك 

شادى .. مممم طب غمضى عنيكى 

اية .. ليه !! 

شادى .. غمضى بس وسيبينى اختار براحتى 

اغمضت اية عيناها واذا بشادى يخرج علبة قطيفة حمراء من جيبه ويفتحها ثم يضعها امام عينيها 

شادى .. خلاص فتحى بأة 

تفاجأت اية بما رأته .. حيث وجدت سلسلة ذهبية رقيقة نقش عليها اسمها بين وردتين صغيرتين ومعها حلق وخاتم من نفس التصميم .. حقا كان طقما رائعا ورقيقا للغاية 

اية بسعادة وفرحة .. الله ايه الطقم الجميل ده .. ده عشانى 

شادى .. اه طبعا مش شايفة اسمك عليه .. ده انا وصيت عليه يتعملك مخصوص 

اية باعجاب .. يجنن .. روعة بجد 

شادى .. خلاص البسيه ويلا عشان الضيوف مستنيينك تحت 

فتح باب الغرفة ودخلت هالة 

اية .. مامى شوفتى ديدو جابلى ايه 

هالة بعتاب .. يعنى منعرفش نشوفك يا شادى الا اما يكون فيه مناسبة .. غير كدة متجيش تسأل علينا 

شادى .. والله يا ماما الشغل مع الماجستير واخدين كل وقتى .. ثم قبل يديها .. حقك عليا يا ست الحبايب 

هالة .. طب اعمل حسابك هتقضى معانا اليومين دول مش هسيبك تروح 

شادى .. والله لسة قايل لاية ان عندى مناقشة بكرة .. بس مقدرتش اتأخر عليها 

عموما اخلص المناقشة على خير واجى اقضى معاكم اسبوع 

هالة بفرحة .. بجد يا شادى 

شادى .. اه ان شاء الله .. هروح باة اشوف الضيوف وانتو خلصو وتعالو 

....

وقف شادى على احدى الطاولات ينظر لاحدهم قائلا 

شادى .. يعنى اعدتى تقوليلى هفرقهم هفرقهم .. استحالة يكون غير ليا .. لحد ما اتخطبو 

وحتى مكلفتيش خاطرك تقوليلى عشان متبانيش فاشلة ادامى 

مروة .. اتخطبو !! ازاى يعنى لا طبعا محصلش .. مين قالك كدة 

شادى .. ادم بنفسه اللى قاللى يا هانم 

مروة .. لا لا مفيش الكلام ده .. لو كان فيه حاجة رسمى كنا عرفنا .. عالاقل الدفعة كانت عرفت 

هو اكيد يقصد ارتباط بس لسة مش رسمى انا متأكدة 

شادى بيأس.. مفرقتش كتير .. خطوبة .. ارتباط .. المهم انها راحت منى خلاص 

مروة .. لا لسة مراحتش .. ادامك فرصة ولازم تستغلها كويس قبل ما يتخطبو بجد 

شادى وقد عاد اليه الامل من جديد .. بجد يا مروة .. يعنى لسة فيه امل 

مروة .. ايوة طبعا .. انت تروح وتقولها كل اللى جواك .. اعترفلها بمشاعرك واطلبها للجواز قبله .. هيا اكيد مش هتسيب معيد له اسمه ومكانته وباباه دكتور فى الجامعة وتفضل عليه طالب لسة بيدرس 

شادى .. ايه !! ازاى !! لالا مقدرش اعمل كدة وافرض رفضت 

مروة بخبث.. انت كدة كدة مش خسران حاجة لو رفضت .. بس انت لو متكلمتش هيا هتعرف منين انك بتحبها !! هتستنى لما يتجوزو وتلوم نفسك انك مقلتش 

لازم تقولها

شادى .. طب هكلمها لوحدها ازاى وصاحبتها دى لازقلها علطول .. ده انا مبعرفش اتكلم معاها كلمتين على بعض بسبب عاليا دى 

مروة .. سيب صاحبتها دى عليا انا هشغلها واخليلك الجو 

انت بكرة فى المحاضرة الاخيرة تطلبها عندك فى المكتب 

شادى .. فى وقت المحاضرة ازاى !! 

مروة .. ايوة عشان نتأكد ان ادم فى المدرج وميبقاش معاها 

اما عاليا فانا قبل معاد المحاضرة هشغلها بطريقتى ملكش دعوة 

شادى .. ماشي .. متشكر اوى يا مروة 

مروة بخبث ..لا منا مش هساعدك لله وللوطن .. اه زى ما انت بتعمل لمصلحتك انا كمان تهمنى مصلحتى 

شادى .. مش فاهم 

مروة .. انا عايزاك تسجل كل الكلام اللى بينكم من ساعة ما تدخل مكتبك 

شادى باستغراب .. ليه !!

مروة .. عشان اخلى ادم يسمع كلامها ده واطلع انا اللى خايفة عليه وعايزة مصلحته .. ساعتها هيتجرح منها وابقى انا الحضن الوحيد ليه عشان ينساها .. وساعتها هعرف انسيهاله 

شادى .. خلاص اتفقنا 

.....

فى منزل صلاح الشناوى 

اخذ يجول بحجرته ذهابا وايابا ناظرا للساعة امامه 

ادم بقلق .. الساعة بقت ١٠ وكل ده لسة الهوانم مرجعوش .. طيب يا ملك 

وفجأة سمع صوت باب الشقة يفتح ليخرج مسرعا مندفعا نحو اخته 

حيث وجدها تدخل المنزل ممسكة بالعديد من الشنط وعلى وجهها ابتسامة سعيدة 

ادم بعصبية .. يعنى ده ينفع يعنى بنتين محترمين يرجعو البيت متأخر كدة 

سيرين .. معلش يا ادم الوقت سرقنا فى الرغى والقياس ومحسيناش بالوقت 

ادم وقد هدأ قليلا .. مينفعش يا سيرين التأخير ده .. الولاد فى الشارع لما بيشوفو بنات متأخرة كدة بيفهموهم غلط 

سيرين .. الله يخليك يا شيخ ما تنكد عليا .. انا فرحانة جدا ما صدقت خرجت وغيرت جو واتعرفت على واحدة زى ملك 

ادم بابتسامة .. حبتيها صح .. شكلى هبدأ اغير عليها منك 

سيرين .. ليك حق ههههه هيا فعلا تتحب 

ادم بعصبية .. بس برضو متتأخروش كدة تانى .. اخركم ٧ فى البيت .. مش هفرح بيكم لما تتعاكسو فى الشارع 

سيرين متذكرة بضحك ... ههههه .. انت قلقان ليه بس .. ده انت معاك واحدة بميت راجل ههههه 

ادم .. بتضحكى على ايه ؟!

سيرين .. هحكيلك 

...

فلاش باك ..

سيرين .. ده اخر فستان ونروح باة احسن ادم على اخره كل ٥ دقايق يتصل هيولع فينا 

ملك .. بجد فيه حاجات حلوة اوى الواحد مش هاين عليه يمشى 

سيرين .. خلاص نبقى نيجى تانى بس لازم نمشى دلوقتى

قاما بدفع الحساب وخرجا للشارع متجهين لاقرب محطة مترو حين سمعا من يقول من خلفهم

- هو فيه جمال كدة والنبى 

لتقول سيرين بتوتر .. مدى يا ملك خلينا نمشى بسرعة 

- طب ما تيجو احنا نوصلكم والله هتتبسطو اوى 

ملك بهمس .. يا ولاد الجزمة انا هربيكم 

سيرين .. هتعملى ايه .. مدى بس وسيبك منهم 

ليقوم احدهم بمسك حقيبتها بحقارة والاقتراب منها 

- تعالى بس يا .. ااااااه يابنت ال ..   

- اخرجت ملك زجاجة رشاش بالشطة من حقيبتها ووضعته بيدها وما ان اقترب ذلك الحقير منها حتى قامت برشه على عيونه وعيون البقية وهى تجرى ممسكة بيد سيرين بقوة 

حاولو ان يلحقو بهم ولكن الشطة قد اعمت عيونهم فلم يستطيعو اللحاق بهم حيث ظلوا يسبو ويلعنو 

ركضت كلا من ملك وسيرين باقصى سرعة لديهم فى ظل خوفهم الشديد وايضا ضحكاتهم التى لم يستطيعا السيطرة عليها 

ملك .. يانهار اسود دول جايين ورانا اجرى اجرى 

سيرين وهى تضحك وتلهث من الركض .. ههههه انتى مجنونة  ... ايه ..  اللى عملتيه ..  ده 

ملك .. هههه احسن .. يستاهلو ...  عالم زبالة 

ركضا حتى دخلا محطة المترو وشعرا بالامان 

انتابتهم هستيريا ضحك شديدة وظلا يضحكا بشدة متذكرين ما فعلوه بهم 

سيرين .. انتى مشكلة هههههه 

ملك .. الحمدلله موصلولناش ههههه يلا نركب احسن نلاقيهم فى وشنا 

باك ....

ادم .. ههههههه والله انتو مجانين .. شوفتى باة اخرة التأخير .. لو كانو عملولكم حاجة باة 

سيرين .. ههههه ملك انقذتنا ههههه 

ادم .. ولو كانو لحقوكم يا فالحة وانتو بتجرو زى الهبل كدة 

سيرين .. خلاص باة سماح المرة دى .. ادينا اتعظنا 

ادم باستغراب .. وانتى اصلا ازاى خطيبك سامحلك تعدى لبليل كدة فى الشارع 

ده انا اهو لسة ملك مش خطيبتى وهتجنن عليها 

سيرين كاذبة .. لا مين قالك .. ده كلمنى كذا مرة وزعقلى عشان اروح 

ادم بشك .. ممممم طب كويس اهو عمل حاجة عدلة فى حياته 

دخلت سيرين حجرتها تفكر بكلام ادم محدثة نفسها 

سيرين .. ازاى صح يكون عارف انى خارجة .. وميتصلش بيا حتى مكالمة واحدة يسأل انا فين ولا روحت ولا مروحتش ولا فارق معاه اصلا 

ازاى مش خايف عليا زى ما ادم خايف على ملك 

ثم بررت له انه لم يعتاد على وجودها بمصر وانها فى غربتها لا يعرف عنها شئ 

اكيد اكيد لسة مش متعود على وجودى جنبه .. وانا هناك مبيعرفش عنى حاجة يبقى ازاى اول ما هاجى كدة هيهتم .. عادى باة 

.....

ادم .. دى اخر مرة يا ملك تتأخرى برة البيت .. اخرك ٧ لما تخرجى ويستحسن متخرجيش اصلا 

ملك بضحك .. هههههههه حاضر هحبس نفسى فى صندوق هههههه

ادم .. صحيح ايه اللى عملتيه ده يا مجنونة ههههههه

ملك ... سيرين حكيتلك ههههه انا والله من ساعتها مش قادرة ابطل ضحك ههههه

ادم .. ما الهبلة اللى جوة برضو اعدة تضحك 

ملك .. يستاهلو عيال مش متربية 

ادم بجدية .. او فهموكم غلط لما لقوكم فى الشارع متأخر كدة ياملك ولوحدكم 

ملك .. اولا احنا متأخرناش اوى ولا حاجة 

ثانيا لو هما متربيين مش هيبصولنا اصلا .. وبالعكس هيدافعو عننا لو حد قربلنا .. بس دى ناس حقيرة ويستاهلو اللى عملتو فيهم 

ادم .. يا سلام واحنا باة نتأخر براحتنا على امل ان اللى فى الشارع يكونو محترمين 

اصلا اللى بتقولى عليهم دول خلصو من زمان 

وزى ما قلتلك يا ملك اخرك ٧ ده اذا خرجتى اصلا 

ملك .. طيب هروح انام باة احسن انا هموت من التعب لفينا كتير جدا 

ادم .. ماشى تصبحى على خير يا قلب ادم 

ملك بخجل .. وانت من اهله 

ادم .. يا ايه ؟

ملك .. ايه ؟؟

ادم .. ايوة وانت من اهله يا ايه .. بقالى كتير مسمعتهاش وحشتنى 

ملك .. لما نتخطب هقولهالك كتير وهزهقك منها 

ادم ..مفيش تصبيرة دلوقتى بس .. وحشتينى 

ملك بشقاوة .. وانت من اهله يا دومى 

ادم باندهاش .. ايه ده انتى عرفتى دومى كمان 

ملك .. ههههه ده انا عرفت بلاوى 

ادم .. انا عارف ان اختى فضيحة ومبتسترش ابدا 

ملك .. بس زى العسل سكر بجد حبيتها اوى 

ادم .. والله انتى اللى قمر وانا بموت فيكى 

ملك بخجل .. احم .. تصبح على خير يا 

ادم .. يا ايه ؟؟

ملك .. يا دومى ههههه

ادم .. ماشى همشيها دومى بمزاجى المرة دى .. بس بقولك ايه خلى دومى دى بيننا بس اوعى تقوليها فى الكلية ولا ادام الناس .. هتضيعى هيبتى خالص كدة والبرستيج هيروح

ملك .. ههههه حاضر متخافش .. سلام يا دومى 

ادم .. سلام يا قلب دومك 

....

فى فيلا سالم الدمنهورى

شادى .. هيا ماما فين يا اية 

حتى وجد من يأتى من خلفه يضربه ضربة خفيفة برأسه 

سالم .. علطول كدة بتسأل على امك وانا ايه هوا مفيش مرة تقول فين بابا 

شادى محتضنا ابيه .. وانا اقدر برضو يا حبيبى ده انت الخير والبركة 

سالم .. كل بعقلى حلاوة كل 

شادى .. يا حبيبى انا عارف انك واقف مع صحابك ومش عايز اعطلك بس

سالم .. هعديهالك بمزاجى .. اخبارك ايه  

شادى .. اهو عندى مناقشة بكرة ادعيلى 

سالم .. انا قلتلك قبل كدة لو عايزنى اعديك من غير مناقشات خالص سهلة 

شادى .. لا يا بابا انا عايز اخد الماجستير بمجهودى مش عايز وسايط 

سالم .. برحتك .. مش ناوى تيجى باة تعد معانا .. ده امك قلبها متقطع عليك وكل ليلة لازم نفس المناحة .. انا عايزة ابنى فى حضنى مش عايزاه يبعد عنى 

شادى .. يا بابا منا مسيرى يوم هتجوز واروح بيتى .. فرقت ايه باة اتعودو من دلوقتى 

هالة من الخلف .. لما تتجوز هبقى مطمنة عليك .. هيبقى معاك واحدة تاخد بالها منك ومن اكلك وصحتك وكمان تسعدك وتكون مبسوط معاها وده اللى هيصبرنى 

لكن دلوقتى انت اعد لوحدك ياحبيبى مفيش حد بيهتم بيك ولا بأكلك .. دى حتى دادة كريمة بتقولى بقالك يومين مبتاكلش 

شادى بمزح .. ده انتى مراقبانى باة يا ست الكل 

هالة بحزن .. وانا ليا غيرك اخاف عليه انت واختك .. بس اختك فى حضنى وتحت عينى .. انت اللى مصمم تفضل بعيد عنى 

شادى .. متقلقيش عليا يا ست الكل .. انا مرتاح كدة .. وبعدين شقتى قريبة من الكلية وده مساعدنى جدا فى شغلى ورسالة الماجستير بتاعتى 

سالم .. صحيح بمناسبة الشغل .. تعالى المكتب عايزك فى موضوع مهم 

هالة متلفتة حولها .. مش وقته يا سالم .. هتسيبو الحفلة ازاى بس 

سالم .. مش هنتأخر .. وبعدين هو انا بعرف اتلم عليه فرصة وهو هنا 

.....

دخلا المكتب سويا ليتساءل 

شادى .. خير يا بابا ؟

سالم مناولا اياه صورة بيده .. ماهيتاب كامل الاسناوى .. بنت كامل الاسناوى صاحب مجموعة شركات الاسناوى .. اكيد طبعا عارفها 

شادى متجاهلا النظر للصورة .. اه اكيد .. خير مالها 

سالم .. كنت فى حفلة من شهرين فى الفيلا بتاعتهم وشوفت البنت .. ما شاء الله عليها زى القمر يا شادى .. جمال واخلاق ورقة قلت هيا دى اللى ينفع تكون مرات شادى الدمنهورى 

بنت ناس ومن عيلة كبيرة وطبعا مش محتاجين نسأل عليها .. يعنى هى دى اللى تليق بيك 

شادى .. انا اسف يا بابا .. انا بحب واحدة تانية وهيا دى اللى تنفع تكون شريكة حياتى 

سالم بغضب .. وتطلع مين دى باة .. من عيلة مين .. اصلها وفصلها ايه ؟

شادى .. معرفش يا بابا عيلة مين ولا عندها ايه .. كل اللى اعرفه انى بحبها ومتمناش فى حياتى غيرها 

ومهتمتش اعرف اصلها وفصلها 

سالم .. يعنى ايه .. هتتجوز واحدة من غير ما تعرف عنها حاجة .. من غير ما تعرف اهلها ومكانتهم  

شادى .. انا المهم عندى اخلاقها واحترامها وكفاية انى بحبها وشايفها اجمل انسانة فى الدنيا 

سالم .. الحب مش كل حاجة يا شادى .. انت مش قليل .. انت من عيلة كبيرة ليها مكانتها وسمعتها .. مش اى واحدة تنفعك .. لازم اللى تتجوزك تكون من عيلة كبيرة وتكون بمستوى يليق بينا 

شادى .. بس انا من حقى احب واختار اللى هتقدر تسعدنى وهبقى مبسوط معاها 

سالم .. وانا كمان من حقى اتطمن على مستوى البنت اللى هتدخل عيلتنا وتشيل اسمنا .. لازم تكون زينا 

عالاقل قوللى اسمها .. اسأل عليها وعلى عيلتها وبعدين نتكلم .. مع ان ماهيتاب متتعوضش 

وضع شادى الصورة على المكتب دون ان ينظر اليها 

شادى .. ماشي يا بابا .. بس هيا لسة اصلا متعرفش حاجة .. افاتحها الاول واتأكد بس منها وبعدين اقولك اسمها 

سالم .. ولو متليقش بيك تنساها .. ونشوف اللى تليقلك 

صدقنى يا شادى انا كل تفكيرى فى سعادتك ومصلحتك

انت عارف كامل ده ممكن يعمل معاك ايه 

ده هينقلك نقلة تانية .. ده انت لو مسكت شركة واحدة من شركاته هتبقى فى مكان تانى خالص .. وهو طبعا مش هيلاقى حد يامنه على شركاته غيرك

جوز بنته ومعاه ماجستير فى البرمجة يعنى انسب حد 

شادى .. انا عمرى ما فكرت بالطريقة دى .. ويوم ما امسك شركة هتبقى بمجهودى وبتاعتى مش بتاعة حد 

انا مش وصولى يا بابا ولا انتهازى هتجوز واحدة عشان منصب ابوها 

عن اذنك يا بابا 

وانهى الحديث مغادرا مكتب والده يكتسى وجهه الحزن والغضب الشديد من معاملة ابيه له وتحكمه به وبكل ما يخصه 

....

خرج سالم من مكتبه غاضبا لتقابله هالة 

هالة .. مالك يا سالم 

سالم .. البيه ابنك .. اقوله كامل الاسناوى وشركاته ومكانته .. وبنته اللى زى القمر ... يقولى بحب واحدة تانية وعايز اتجوزها 

هالة .. طب ما من حقه يا سالم يختار شريكة حياته 

سالم .. يا سلام !! يجيبلى واحدة من الشارع يتجوزها .. ده حتى ميعرفش اصلها ولا فصلها ولا من عيلة مين .. ده ميعرفش عنها حاجة خالص 

هالة .. بيحبها يا سالم .. مش هيفكر فى الحاجات دى 

سالم بعصبية .. لأ لازم يفكر يا هالة .. شادى مش ابن اى حد ولازم ياخد اللى تليق بيه وبمكانته 

مش يقف فى وشى ويقولى بحبها .. ادى اخرة دلعك فيه 

هالة بانفعال .. انا ابنى مش متدلع وعمره ما كان عيل .. انا ابنى راجل طول عمره وبشمهندس اد الدنيا ومعيد فى كلية الهندسة 

يعنى فخر لينا ويرفع الرأس 

مش معنى انه عايز يختار شريكة حياته انه بيتدلع 

مش هنجوزه بالعافية يا سالم واحدة مبيحبهاش .. ده جواز يعنى هتشاركه باقى حياته .. ازاى هيعيش معاها وهو مش طايقها 

سالم .. يبقى تعقليه وتعرفيه ان مصلحته معاها عشان يقبلها 

هالة بيأس وحزن .. مفيش فايدة .. عن اذنك 

خرجت هالة تبحث عن شادى فلم تجده 

قامت بالاتصال به فرد عليها

شادى بغضب .. ايوة يا ماما 

هالة .. ايه يا حبيبى فينك 

شادى .. سلمت على اية وهمشى 

هالة .. تمشى علطول كدة !! انت فين 

شادى .. فى اوضتى .. طلعت اجيب ورق مهم ونازل 

هالة .. طب انا جيالك 

دخلت هالة عليه وجدته بغرفته وكأنه يبحث عن شئ باهتمام وعلى وجهه علامات الغضب 

هالة .. ماشي ليه يا شادى دى الحفلة لسة فى اولها وملحقتش اعد معاك 

شادى .. معلش يا ماما مش هقدر اعد اكتر من كدة .. انا سلمت على اية واعدت معاها شوية وخلاص 

هالة .. انت زعلان من باباك !! 

شادى بسخرية وحزن.. وايه الجديد .. ماهو علطول مزعلنى .. علطول مبيفكرش غير فى مصلحته ومكانته وبس .. عمره ما فكر فى سعادتى ورغباتى 

كل اللى يهمه الشغل والفلوس والسلطة 

نفسي يبطل يتعامل معايا على انى شئ من ممتلكاته بيتحكم فيه 

هالة .. والله يا ابنى ابوكم مبيفكرش الا فى مصلحتكم انت واختك .. هو بيعمل كل ده عشان مين مش عشانكم .. عشان يأمنلكم مستقبلكم .. عشان متحتاجوش لحد فى يوم من الايام 

شادى .. احنا مستوانا حلو يا ماما .. وعايشين عيشة كويسة .. مش مستاهلة يبعد عن عياله ومراته عشان شوية فلوس زيادة او سلطة 

هيعد يبعد عننا لحد ما يخسرنا .

هالة .. الطموح مش عيب يا شادى .. وهو دايما عايزنا احسن 

شادى .. مش على حساب عياله يا ماما .. لو ده هييجى على سعادة اولاده وراحتهم يبقى تغور الفلوس عالسلطة 

انا مبقتش قادر اتحمل .. بحاول اتجنبه وروحت اعدت فى بيت لوحدى عشان ابعد عنه.. انا مش صفقة من صفقاته انا ابنه وعندى مشاعر ورغبات لازم يعمل حسابهم. وبرضو مصر اول ما يشوفنى ينكد عليا بأفكاره واراؤه 

هالة مغيرة الحديث .. طب قوللى .. مين دى اللى خطفت قلبك وخلتك عايز تتجوزها .. كدة تخبى على ماما 

شادى بابتسامة حزن .. لسة مفيش حاجة يا ماما صدقينى .. كلها مشاعر جوايا ولسة مفاتحتهاش 

وقررت خلاص هصارحها بمشاعرى .. ادعيلى بس توافق 

هالة .. اكيد هتوافق .. هيا هتلاقى زيك فين مهندس ومعيد ومحترم وابن ناس ومن عيلة كبيرة ومستواها عالى 

شادى .. لا يا ماما انا عايزها تختارنى لشخصى مش لمكانتى وعيلتى .. عايزها تختار المهندس شادى مش شادى الدمنهورى 

عايزها تقبل بيا زى منا .. وبمستوايا انا مش مستواكم 

انا مش عايز استغل بابا ومنصبه فى اى حاجة فى حياتى .. وهبنى نفسى ومستقبلى لوحدى من غير مساعدة حد 

هالة .. ربنا يوفقك يا حبيبى .. بس انت كدة خلاص هتنسانا وتفضل بعيد عننا بسبب ابوك 

شادى .. انتى بتقولى ايه يا ماما .. انا هفضل ضهرك وسندك وحمايتك انتى واية لاخر نفس فيا 

مش معنى انى مش عايش معاكم انى ناسيكم .. انتو فى قلبى يا حبيبتى ولو طلبتونى فى اى وقت هتلاقونى ادامكم 

هالة .. ربنا يخليك لينا يا حبيبى وميحرمناش منك ابدا 

شادى مقبلا يدها .. عن اذنك باة يا حبيبتى لازم امشى 

هالة .. علطول كدة .. طب بس اعد شوية اية هتزعل لو مشيت 

شادى .. انا لو اعدت هنكد عليكم وهيبان عليا انى مخنوقواية هتزعل فعلا 

فالافضل ليها انى امشى وانا فهمتها انى لازم اصحى بدرى وراضيتها عشان متزعلش 

هالة .. خلاص يا حبيبى اللى يريحك 

غادر شادى حاقدا غاضبا ناقما على ابيه ومعاملته له .. كيف يعطى نفسه الحق ان يتحكم به بهذه الطريقة 

قرر بتصميم شديد مصارحة ملك غدا بمشاعره عندا فى ابيه ومعارضة لرغباته وطمعه .. فلن يقبل ان يكون الا مع من يختارها قلبه

.....

ذهبت ملك لتحضر بعض المذكرات قبل المحاضرة الاخيرة بينما دخلت عاليا المرحاض وخرجت متوجهة للمدرج

تفاجأت عاليا بمروة تناديها من الخلف .. عاليا لو سمحتى عايزاكى ثوانى 

عاليا بدهشة .. فهى لم تتحدث قط مع مروة ولا تعرفها من الاساس .. فلماذا تناديها !!

عاليا بتعجب مشيرة لنفسها .. انا !! 

مروة .. ايوة معلش محتاجاكى ضرورى 

عاليا .. خير فى ايه 

مروة .. تعالى معايا 

ذهبت بها مروة للكافيتيريا فاتحة اللاب توب الخاص بها امامها 

مروة .. على ما اللاب يفتح هروح اجيب عصير واجى 

عاليا .. لاب ايه انا مش فاهمة حاجة 

مروة .. لما يفتح هفهمك .. هروح واجى علطول 

وتركتها وذهبت 

عاليا فى نفسها ..  الله يخرب بيتك انتى طلعتيلى منين هتضيعى عليا المحاضرة 

...

بعد شراء مذكراتها توجهت للمدرج 

اتصلت بعاليا فردت عليها

ملك .. ايه يابنتى كل ده فى الحمام 

عاليا .. حمام ايه بس .. دى البت اللى اسمها مروة جت لزقتلى وقالتلى عايزاكى واعدتنى فى الكافيتيريا وسابتنى ومشيت 

ملك باستغراب .. مروة !! عايزة منك ايه دى 

عاليا .. ولا اعرف .. ادينى مستنية اما تيجى 

ملك  .. ياستى سيبك منها وتعالى المدرج يلا المحاضرة هتبدأ 

عاليا .. كنت هعمل كدة بس هيا فاتحة اللاب بتاعها ادامى مش فاهمة ليه وطبعا مش عارفة اقوم واسيبه 

ملك .. لاب ليه

عاليا .. معرفش 

استمعت لصوت مهندس شادى ينادى ملك   

شادى .. مهندسة ملك .. ممكن لحظة 

ملك .. ازى حضرتك يا بشمهندس .. خير فى ايه ؟؟

شادى .. فيه موضوع مهم عايزك فيه عندى فى مكتبى اتفضلى 

ملك .. دلوقتى ؟؟ انا عندى محاضرة 

شادى .. معلش عشان ورايا مناقشة ومش هكون موجود بعد المحاضرة .. اتفضلى معايا 

ملك .. لأ خلاص خليها يوم تانى .. عن اذنك 

امسك شادى بذراعها سريعا .. فنظرت له نظرة تحذيرية ليبعد يده عنها بسرعة قائلا 

شادى .. معلش يا ملك انا محتاج اتكلم معاكى دلوقتى .. ومش هعطلك

ذهبت خلفه ولم يزل الخط مفتوحا مع  عاليا ولكنها كانت تتحدث معها عبر سماعة البلوتوث اسفل حجابها لذا لم ينتبه شادى لوجود احد معها على الهاتف 

عاليا .. عايز ايه ده كمان ؟

ملك وقد وصلت حجرته .. مش عارفة هروح اشوفه واطلع عالمحاضرة .. سلام

عاليا .. سلام 

...

شادى .. اتفضلى اقعدى .. تشربى ايه 

جلست ملك .. شكرا مش عايزة حاجة .. ممكن ندخل فى الموضوع علطول 

شادى .. حاضر .. ا ا اانا .. ملك انا 

انا معجب بيكى ..  ومن زمان .. من اول يوم شوفتك فيه فى الكلية سرقتى قلبى .. واتمنيت تكونى ليا 

حاولت كتير المحلك بس مكنتيش بتدينى فرصة 

وانا كنت متفهم انك ملتزمة وعندك اخلاق فمكنتش بضغط عليكى 

بس دى اخر سنة واخر فرصة ليا ومش هشوفك تانى 

فكان لازم اصارحك باللى جوايا .. واللى عيشت سنين اخبيه

ملك انا بحبك .. وعايز اتجوزك 

صدمت ملك من كلامه .. فهى لم تتخيل ابدا انه سوف يكون بتلك الجرأة ويعترف بمشاعره بصراحة هكذا 

ولكنه فعلها .. وقد جاءت اللحظة التى طالما خافت منها 

ماذا تفعل !! لا تريد جرح مشاعره .. فليس ذنبه انه يحبها .. وليس ذنبها ايضا انها لا تحبه .. كما ان هذه تعد خيانة لآدمها .. فماذا تفعل كى ترضى جميع الاطراف !!

ملك .. بشمهندس انا 

شادى .. انا مش عايز رد سريع دلوقتى يا ملك .. فكرى كويس وخدى وقتك .. وانا هستنى قرارك 

ملك .. بشمهندس شادى .. صدقنى انا بعز حضرتك وبحترمك جدا .. وليك منزلة كبيرة عندى لأنى دايما كنت بعتبرك اخ كبير بيشجعنى دايما ويدعمنى .. واعمل بنصايحه 

شادى .. اخ !! 

ملك .. ايوة يا بشمهندس .. انا عمرى ماحسيت ناحية حضرتك بأكتر من كدة .. بجد انا يعز عليا اجرحك بس دى الحقيقة .. مش عايزة حضرتك توهم نفسك اكتر من كدة 

كل هذا كان يحدث على مسمع عاليا .. فقد نسيت ملك غلق الهاتف معها بسبب فضولها لمعرفة ما يريده شادى منها 

اما عاليا فما ان سمعته يقول انه معجب بها .. حتى صدمت وتجمدت بمكانها ولم تستطع غلق الخط .. فظلت تستمع لحديثهم مشفقة على صديقتها

وفجأة وجدت ادم امامها ويبدو على وجهه القلق الشديد 

ادم بقلق وانفعال .. عاليا ملك فين .. كنا هنتقابل بعد المحاضرة بس محضرتش اصلا .. وبكلمها مشغولة بقالها ساعة .. هيا فين 

ارتبكت عاليا ونظرت لهاتفها ولم تعرف بما ترد عليه 

ادم بلهفة مشاورا على هاتفها .. هيا معاكى عالتليفون 

عاليا بتوتر وارتباك .. لا .. امممم .. اه ... اصل 

انتزع ادم الهاتف منها 

ادم بعصبية .. هو فيه ايه هاتى البتاع ده 

برقت عيناه واشتعلت النيران بداخله حين  سمع صوت شادى يتحدث مع ملك 

شادى .. طب وليه متبدأيش تبصيلى بعين تانية .. خصوصا انى اعترفتلك بمشاعرى وعرفتى انى بحبك 

ادينى فرصة وانا هثبتلك حبى ليكى 

ملك بخجل ناظرة لاسفل.. للاسف انا بحب حد تانى .. ومرتبطة بيه 

شادى وقد تملكت منه غيرته وغضبه .. مرتبطة بمين يا ملك !! ادم ؟!

ملك .. طب ما حضرتك عارف اهو 

شادى .. لا انا معرفش حاجة .. انا شايفها مراهقة شقاوة شباب مش علاقة جدية ابدا 

ملك .. لا يا بشمهندس هيا ولا مراهقة ولا شقاوة .. لانى قايلة لاهلى كل حاجة وهو كمان 

يعنى احنا نعتبر مخطوبين اصلا .. بأى حق حضرتك حكمت علي علاقتنا انها مراهقة!! 

شادى .. عشان ادم ده عيل لسة طالب بدرسله .. لسة بدرى اوى علي ما يقدر يفتح بيت ويتحمل مسئولية .. انتى لو كملتى معاه هتستنى كتير اوى وهيضيع من عمرك كتير 

لكن انا مش هخليكى تستنى ثانية واحدة 

انا مستعد اجى اتقدملك من بكرة لو تحبى 

ادم قابضا بيده على التليفون بقوة يكاد يمزقه .. يابن ال ... انا هوريك مين العيل 

اردف شادى .. ملك انا عندى شقتين اختارى اللى يعجبك فيهم .. ووضبيها على ذوقك .. وكل طلباتك هنفذها من غير نقاش .. صدقينى مصلحتك معايا انا مش مع ادم .. انا انسب ليكى منه .. هتستنى معاه كتير 

صمتت ملك قليلا لا تعرف بما تجيبه كى يفقد الامل منها ويتركها تذهب 

....

عند عاليا 

عمر .. ازيكم يا حلوين .. يلا عشان نشت...

لاحظ عمر توتر عاليا وارتباكها ناظرة لادم بخوف شديد 

وادم الممسك بالهاتف يكاد يمزقه من شدة غضبه 

لم يفهم شئ 

عمر .. هو فى ايه 

ادم كاتما الهاتف ... شششش ثوانى محدش ينطق

ثم عاد للاستماع لهم 

ملك .. ومين قال لحضرتك انى مستعجلة وعايزة اتجوز علطول .. انا كمان هبنى مستقبلى معاه .. هنبنيه سوا وهننجح ونكبر سوا .. وبعدين انا مسمحلكش تقول عليه عيل .. ادم راجل ويمكن مبشوفش راجل ادامى غيره 

مش معنى انه طالب انه عيل .. ليه هو حضرتك مكنتش طالب قبل ما تبقى معيد !!

شادى .. انا مش عايزك تتسرعى فى قرارك .. خدى وقتك وانا هستناكى .. انا استنيتك سنين يا ملك .. وعندى استعداد استناكى تفكرى براحتك 

عندها لم يحتمل ادم اكثر من ذلك وقد طفح الكيل به 

ادم بانفعال .. انا هوريك يا كلب يا حقير .. باة بتلف عليها من ورايا .. انا هربيك 

عاليا .. اهدى بس يا ادم واستنى لما 

لم يتركها تكمل كلامها واندفع  مسرعا باتجاه مكتب شادى وهو فى قمة عصبيته وغضبه ولو ان نيران القلب تحرق لاحرقت المكان بما عليه 

ركضت عاليا خلفه وعلى وجهها الخوف الشديد تشعر بأن هناك كارثة سوف تحدث يتبعها عمر الذى لم يستطع فهم ما يحدث 

عمر لعاليا .. هو فيه ايه ماله ادم ؟!

عاليا راكضة .. اجرى بس نلحقه وهحكيلك 

....

دخل مكتب شادى مندفعا ضاربا الباب بقدمه بعنف .. ليلكمه لكمة قوية بوجهه اسقطته ارضا واسالت الدماء من انفه وفمه

ملك بصدمة .. ادم !!

ادم بغضب شديد .. انا عيل ولا انت اللى مش راجل ومعندكش كرامة 

شادى متفاجئ وبغضب شديد .. انت اتجننت ايه اللى بتعمله ده ؟!

كاد ان يلكمه مرة اخرى ولكن ابعده عمر عنه محتجزا اياه قائلا 

عمر .. اهدى يا ادم مينفعش كدة 

ملك وعاليا .. ابعد عنه يا ادم 

ادم بغضب وتوعد .. انا مش قلتلك قبل كدة ملك تخصنى .. قلتلك ملك خط احمر تبعد عنها 

شادى وهو يمسح دماء انفه .. ده لما كنت فاكركم مخطوبين زى ما قلتلى .. لكن طلع ارتباط بس يعنى انت ملكش حق فيها وحقها تختار تكمل مع مين

ادم بانفعال شديد وعمر يحجزه عن شادى بصعوبه .. حتى بعد ما اختارتنى .. اعدت تزغلل عنيها بفلوس وكلام فارغ .. عارف انا عندى اضعاف اللى عندك وعمرى ما عرضته عليها لان عايزها تحبنى لشخصى مش لفلوسى .. لانى عندى كرامة.

اندهش شادى من كلام ادم .. كيف يعلم كل ما دار بيننا .. كيف يعلم بتفاصيل حوارنا وكأنه كان معنا !!

شادى محاولا الوقوف .. اطلع برة يا ادم بدل ما اجيب الامن ييجو يرموك برة واعملك مجلس تأديب 

ادم بعصبية .. ياريت تجيبهم عشان افضحك ادامهم وادام الكلية كلهم .. خليهم ييجو يشوفو وساختك بتستغل شغلك ومكتبك فى الكلية لغرامياتك 

انتاب شادى الخوف الشديد ليشعر انه على وشك فقدان عمله وضياع مستقبله 

شادى بصدمة مشاورا على نفسه : غرامياتى !! انا !! 

واكمل بعصبية وتوتر .. انا متعرضتلهاش ولا مسيتها باذى .. انا عرضت عليها الجواز بس 

لم يستطع ادم تحمل كلمته تلك .. ماذا تقول انت ايها المعتوه .. اى زواج هذا الذى تتحدث عنه .. ملك لى ولى فقط .

امسكه من ياقة قميصه وقد انفلتت اعصابه واستطاع الافلات من عمر ..

ادم ناظرا بعيونه بتوعد وغضب .. بقولهالك لاخر مرة يا شادى .. ابعد عن ملك .. ملك مش ليك .. والا هتندم .. اقسم بربى لو قربتلها تانى لا هعمل حساب كلية ولا دراسة 

ثم ابتعد عنه وامسك ملك من ذراعها بقوة قائلا بحدة .. اتفضلى قدامى 

خرج الجميع من غرفة مكتبه ليغلق شادى الباب من خلفهم محاولا تدارك نفسه 

اخذ يهندم ملابسه وياقة قميصه مع شعوره بالحزن الشديد لخسارتها.

مرر يده على شعره بعصبية يحاول استيعاب ما حدث  ليضع وجهه بين يديه مستندا على مكتبه بحسره والم 

خلاص يا شادى .. اخر فرصة ضاعت .. فعلا ملك مش ليك .. هيا قالتلهالك بتحبه وشايفاك اخوها .. لازم تفوق لنفسك باة ومستقبلك اللى كان هيضيع فى لحظة . انساها وابعد عنها 

.....

بعد خروجهم من مكتبه وما زال ادم ممسكا بذراع ملك 

توقفت ملك قائلة .. ادم خلاص سيب دراعى لو سمحت 

ادم بعصبية ضاغطا على ذراعها بعنف وقد تمكن الغضب منه .. خلاص ايه وزفت ايه دلوقتى .. انتى بتروحيله مكتبه ليه اصلا 

ملك بعصبية .. ايه اللى بتقوله ده .. ده المعيد بتاعى وطلبنى فى مكتبه افتكرت حاجة بخصوص الدراسة او الدفعة .

ادم بعصبية .. والله ومقلتليش ليه ولا انا كيس جوافة !! 

عايزة تفاعل ومنتظرة اراءكم وتوقعاتكم الجميلة 😍

دمتم بالف خير ❤️

   •تابع الفصل التالي "رواية انت عشقي وقسوتي" اضغط على اسم الرواية