رواية كيان زياد (كاملة جميع الفصول) حصريا عبر دليل الروايات بقلم شهد فراج
رواية كيان زياد الفصل العاشر 10
ـ يا مساء الاناناس علي احلي مرأة في حياتي.
ـ اخلص يا زياد عاوز اي..؟!
ـ الله الوكيل بومة... بس سيبك كل سنة وانتِ طيبة ياحبيبتي.
بصيت له بعدم فهم:
ـ وانت طيب.. بس انا مش عيد ميلادي النهارده ولا عيد جوازنا..
فكرت شوية بعدين اتكلمت بصدمة:
ـ ولا يا زياد اوعي تكون متجوز عليا وناسي عيد ميلاد مين فينا الـِ النهاردة..؟ زياد انتَ بتخوني صح...!!
ضربني بخفة علي دماغي:
ـ هو انتِ مافيش في دماغك غير الخيانة!! هو انا ندل اوي كدة؟!
وكل ده عشان بقولك كل سنة وانتِ طيبة.. انتِ هبلة يابة صح..؟؟!
ـ اخلص يا زياد انا مش فايقة في اي..؟ لسه المواعين عاوزة تتغسل والغسيل عاوز يتلم ويتطبق ومريم عاوزة تذاكر وو....
ـ بس بس بس مواعين اي وغسيل اي ومريم مين..!! المهم النهاردة يا روحي عيد المرأة وو..
ـ قول يا زياد عيد اي اخلص..!
بص لي لثانيتين بعدين اتكلم بتشنج:
ـ عيد المرأة يا كيان.. في اي انتِ ليه مش مهتمة بالموضوع زي باقي الستات..؟؟
ـ والله يابني انا نمت في امان الله صحيت لقيتهم عاملين عيد للمرأة والمرأة اصلا ماتعرفش.
ـ اصلا!!
ـ المهم بما انك جبت السيرة فين الهدية.؟
ـ هدية.!؟
ـ اي يابني مش بتقولي كل سنة وانتِ طيبة يبقي اكيد في هدية.
ضِحك:
ـ لا انا فكرتك هتنكدي عليا كالعادة لو نسيت عيد من اعيادك الكتير لكن هدية اي انتِ عبيـ..ـطة انا مستلف مصاريف باقي الشهر اصلاً...!!
ـ اصلا.!!
اتكلم وهو بيزقني:
ـ يلا ياعسل اعمليلي شاي بقي عشان مصدع.
اتكلمت بعناد:
ـ صباح الفل انا مش هتحرك النهاردة من مكاني بما انه عيد بـ عيد بقي خلينا نستنفع بـ أم اليوم ده.
ـ والله.!!
ـ اها والله ويلا اخفي بقي عشان اخر حلقة النهاردة من المسلسل وعاوزة اسمعه بمزاج.
بص علي الشاشة بعدين بصلي تاني:
ـ مش ده المسلسل الي سمعتيه للتلات الاف مرة قبل كد...وبعدين مزاج اي تحبي اشبرلك واحد بيرة..؟؟
ضِحكت بسماجة:
ـ اها ياريت واها دي المرة التلات الف وواحد ليك شوق في حاجه..؟!
ـ انتِ بتتكلمي كد ليه النهاردة..ولا يكونش عيد الهبل ده مقوي قلبك لا يماما فوقي انا زياد اهاا بس راجل اوي ؟!
ـ في اي يا زياد بحاول استعمل كيدي العظيم الي بيقولو عليه في كل مكان.
ـ كيان ياحبيبي فوقي وارجعي كيان الكتكوتة احنا مالناش دعوة بالناس الـِ برة.
ابتسمت بحالمية:
ـ تعرف يا زياد.
ـ تؤتؤ عرفيني
اتنهدت وانا بتخيل:
ـ انا مش عايزه يوم مرأه عالمي انا عايزه يوم توزعو فيه فلوس ع المرأه. ويكون الدخول للملاهي مجانا
ويكون كل البراندات عاملين قسايم شراء كده للمرأه... والرجاله تسيبلنا البلد وتمشي اليوم ده خالص علشان نلبس بناطيل وفساتين ليدي كده ونفرد شعرنا ونمشي ف الشارع براحتنا ياه بجد.
ـ انتِ مش عاوزة يوم مرأة ياكيان انتِ عاوزة تنحرفي يابنت الجبالي.
تجاهلت كلامه وكملت:
ـ تفتكر ممكن يحصل كلامي..؟!
ـ شور يابيبي.
ابتسمت بحماس:
ـ بجد..!! فين؟؟
ـ في المشمش ياعسل.. ويلا بقي الساعة 12 يعني يومكم خلص ويامرحب 364 يوم للرجالة...قال عيد مرأة قال هو انتوا حد قادر عليكم غير ربنا.
•تابع الفصل التالي "رواية كيان زياد" اضغط على اسم الرواية