رواية قضية خلع كاملة بقلم عمرو راشد عبر مدونة دليل الروايات
رواية قضية خلع الجزء (2) الفصل التاسع 9
فؤاد مصورني و احنا مع بعض ليلة دخلتنا ، انا مش مصدقة ازاي يعمل كدا ، كان ناوي يعمل ايه بالفيديو دا ، كان عايز يفضحني بيه صح
= اقسم بالله ما هسيبه يا نادية ، و اللي عمله دا هيدفع تمنه غالي أوي
انا عايزة اعرف هو انا عملتله ايه ، بيصورني وانا… ، بيصور مراته ، ماهو لو عايز يفضحني يبقا هيفضح نفسه برضو
= وهو لو هينشر الفيديو تفتكري هيظهر نفسه فيه
” هو انا عملت ايه لكل اللي بيحصلي دا ، أنا تخدعت في فؤاد و وائل وكل الناس اللي كانو في حياتي ، للدرجادي انا هبلة وبيعرفو يضحكو عليا ، يا ترى مين تاني بيضحك عليا ، مش ناقص غير حسام ، يا ترى هو كمان بيضحك عليا ، لا لا معتقدش بس هو ايه اللي يمنع ، مفيش حاجة تمنعه ، بجد انا مبقتش قادرة اعيش ، مش قادرة اكمل حياتي..
فلاش باك
نادية انتي.. ، انتي طالق
” من يومها وانا دخلت في دوامة مبتخلصش ، من يوم طلاقي من وائل ، يعني فؤاد كان الجنة وانا اللي روحت للنار ب رجلي ، بس الحقيقة اني لسة مروحتش الجنة اصلا ، انا بطلع من نار بروح ل نار تانية وباين اني عمري ما هيتكتب عليا الراحة ، كنا خلاص مشينا من الشقة و راجعين ، وصلنا قدام البيت
متزعليش يا نادية ، انا هجبلك حقك منه
= من مين يا حسام ، اعتقد كفاية اوي لحد كدا ، انا مستاهلش اللي انت بتعمله عشاني ، انا مستاهلش اي حاجة حلوة منك ، صدقني يا حسام انت تستاهل حد احسن مني بكتير ، انا مش حلوة بالشكل اللي انت شايفني بيه ، انت تعبت معايا أوي و خلاص انا مش محتاجة أي مساعدة منك ، ريح نفسك و سيبني ، وبالنسبة للشقة من بكرا تقدر ترجع تاني لإني همشي و اشوف مكان تاني
” نزلت أو تحديدا هربت منه ، انا ظلماه معايا وبيعمل كل حاجة عشاني بدون فايدة يبقا ليه يفضل معايا انا مش هقبل اني اجرحه تاني ، كفاية اللي انا عملته فيه… ، جهزت كل حاجتي عشان امشي الصبح و بعدها نمت ، صحيت تاني يوم ، قومت خدت دش و لبست ، كنت ببص على الشقة كأني بودعها لأنها فعلا هتوحشني ، خلاص كل حاجة بقت جاهزة تقريبا بس ناقص…. ، ايه الصوت دا ، انا سامعة صوت جاي.. ، مش عارفة احدد منين بالظبط ، بنسبة كبيرة جاي من المطبخ……
” روحت البيت ، دي تقريبا تاني أسوء ليلة في حياتي ، المرادي نادية قالت إنها خلاص مش مبقتش محتاجاني ، أما اسوء ليلة كانت يوم فرحها ، نادية في الحالتين هي السبب ، انا مبقتش عارف اكمل اللي انا بعمله ولا لا ، بس هي فعلا عندها حق انا بعمل كل دا ليه وعشان مين ، هي اختارت خلاص وحتى لو كانت مبتحبوش ، و دلوقتي عايزة تمشي ، بس لا انا مش هسيبها تمشي ، كلمتها بس هي مردتش ، ممكن تكون نامت بس الغريبة اني لما كلمتها الصبح برضو مردتش ، مرة واتنين وتلاتة و اربعة ، اتصلت كتير أوي وبرضو مفيش فايدة ، قلقت عليها ، نزلت بسرعة روحت الشقة اللي قاعدة فيها ، طلعت السلم ، باب الشقة كان مفتوح ، دخلت بحذر
نادية
” باصص حواليا في كل مكان ، مفيش حد في البيت ، الشقة فاضية ، لقيت شنطة هدومها موجودة وتليفونها واقع على الارض ، يبقا فؤاد عرف مكانها وجه ياخدها ، الدم غلي في عروقي ، هو مفيش غيره ، نزلت بسرعة و ركبت العربية وسوقت بأقصى سرعة ، رايح بيته ، وصلت ، رنيت الجرس اكتر من مرة ، مفيش حد فتح ، اضطريت اكسره ، ضربت الباب ب كتفي مرة واتنين لحد ما فتح ، لقيته قاعد قدامي بيشرب القهوة بتاعته ، دخلت ومسكته
فين نادية يا فؤاد
= أنا اللي المفروض اسألك على فكرة
انت هتستعبط ، نادية فين ، اقسم بالله لو كنت عملت فيها حاجة ما هيكفيني فيك عمرك كله
= بقولك ايه يا حسام ، شغل البلطجة بتاعك دا مش هيدخل عليا ، انت خدت مراتي وخبيتها عندك وانا عارف ف متقعدش تلف وتدور عليا بس العيب مش عليك ، العيب على اللي انا متجوزها اللي رايحة تقعد في بيت واحد غريب
انت اللي غريب و دخلت بينا وخدتها مني رغم انك انت عارف اني بحبها
= سألتك وقولت لا
وانا بقولك دا مش موضوعنا ، وديت نادية فين يا فؤاد
= يا حبيبي انا مشوفتش نادية أصلا
” ضر*بته بالبوكس
انا مش عايز أاذيك ولسة عامل حساب للعيش والملح اللي كانو بينا
” بس هو مسكتش و ضر*بني هو كمان
العيش والملح دول انا نسيتهم خلاص يوم ما بعت ليا ناس يخط*فوني
= صدقني هأذيك يا فؤاد ، وانت عارفني انا مبرجعش في كلامي وبالذات بعد ما شوفت اللي انت مصوره على التليفون ، في حد يصور مراته يا و*سخ
اه دا انت دخلت هنا قبل كدا وكمان فتشت الشقة وشوفت الفيديو امممم ، وشوفت ايه كمان يا حسام
= أنت ازاي بالو*ساخة دي ، هي كانت عملتلك ايه عشان تعمل فيها كدا
مزاجي يا اخي ، دا كيف عندي
= هتدفع تمن الفيديو دا غالي أوي يا فؤاد
متقدرش تعمل حاجة ، ب تليفون صغير اقدم فيك مليون بلاغ ، أولهم انك اتهجمت عليا في بيتي ، ثانيا خط*فت مراتي ، ثالثا بتهد*دني بالق*تل
= بلاش موضوع اني اته*جمت عليك دا ولا نسيت انك كنت عايز تق*تل نادية
انت مجنون يا ابني انت ، هق*تلها ليه
= عشان خوفت انها تقولي انك بعت ورايا رجالة حمدي رشاد عشان يخلصو عليا
” ضحك بسخرية
بس انا مخوفتش والدليل انك عرفت اهو ، عملت ايه بقا ، ولا حاجة
= دورك لسة مجاش يا فؤاد
مستني على نار
= لاخر مرة هسألك نادية فين
هي مش كانت عندك يبقا المفروض انا اللي اسألك هي راحت فين
= هو انت مش جيت خدتها من البيت
لا مخدتهاش ، انا متحركتش من هنا النهاردة
= هصدق انا صح
والله ما روحت عندك البيت…فين نادية يا حسام
= بلاش الحركات دي يا فؤاد ، مش هتعرف تمثل عليا
قولتلك انا مقربتش من بيتك ، انت مبتفهمش
= ماهو لو مش انت اللي روحت البيت يبقا مين..
” تليفون فؤاد رن ، بص فيه و رجع يبصلي تاني
في ايه ما ترد ، خايف ليه
” خدت منه التليفون و رديت وفتحت الاسبيكر ، شاورتله يتكلم
ايوا يا حمدي ، عايز ايه
= ايه يا باشا مفيش ازيك عامل ايه
اخلص يا حمدي انت مش هتصاحبني
= و ليه بس الطريقة دي يا فؤاد بيه ، دا انا كنت مكلمك عشان اقولك ان مراتك الست نادية عندنا ، قاعدة معززة مكرمة لحد ما تيجي وتجيب معاك 10 مليون جنيه
انت بتخرف تقول ايه يا راجل انت
= انا قولت انت مش هتصدقني ، خد اسمع بنفسك
” ثواني وسمعت صوت نادية
الحقني يا فؤاد!!
- يتبع الفصل التالي اضغط على ( رواية قضية خلع ) اسم الرواية