رواية انت عشقي وقسوتي (كاملة جميع الفصول) حصريا عبر دليل الروايات بقلم دينا قدري
رواية انت عشقي وقسوتي الفصل الحادي والثلاثون 31
- بارت ٣١
بعد يومين .. تقابلا بالكلية بعد ان تخلصا من الحيرة والغموض بينهم ليعودا تلك المرة عاشقين حتى النخاع
عمر .. ده ايه الصباح المسكر ده بس .
عاليا .. بس باة انا بتكسف من الكلام ده
عمر .. لا تتكسفى ايه ده انا مصدقت الله يباركلك خليكى معايا عالخط كدة
عاليا .. طب ابعد شوية الناس هتاخد بالها
عمر .. ما ياخدو بالهم تحبى اقوم اقول بعلو صوتى دلوقتى انك خطيبتى
عاليا .. اهدى شوية يا عمر والنبى بلاش فضايح
عمر ناظرا بعيونها .. حاضر يا روح عمر .. يا قلب عمر من جوة انتى
عاليا بحرج .. احم .. لا بجد عايزين نركز شوية فى دراستنا والمشروع كمان انا اثرت فيه كتير
عمر .. يا باشا انت تؤمر .. نعد انهاردة بعد الكلية وانا اشرحلك كل حاجة واظبطك متقلقيش
عاليا بلوم .. يا سلام دلوقتى هشرحلك واظبطك بعد ما كنت مبترضاش حتى تستلم منى التاسكات وسيبتنى محتاسة الفترة اللى فاتت
عمر .. ميبقاش قلبك اسود باة يا لولليتى والله كان على عينى اسيبك بس غصب عنى .. مكنتش قادر اتعامل كدة .. بس اوعدك هعوضك
هبت واقفة من مكانها فجأة حين تعجب عمر قائلا
عمر .. ايه قومتى فجأة كدة ليه؟
عاليا .. ملك جت .. هروح اشوفها سلام
وانصرفت سريعا دون انتظار رده
عمر فى نفسه .. من اولها كدة ملك ! .. شكلها هتبقى ايام زى الفل
اسرعت باتجاهها قائلة بقلق
عاليا .. ايه يا ملك انتى فين مختفية ليه كدة ؟
ملك .. منا موجودة اهو يابنتى
عاليا .. موجودة ايه بس ده انا بتصل بيكى بقالى يومين من بعد ما شوفت مكالمتك ويا جرس يا مغلق مش عارفة اوصلك خالص
ملك بحزن .. معلش اصلى كنت سايبة الموبايل صامت ومببصش عليه اصلا
عاليا بقلق .. مالك يا ملك فى ايه حصل ؟
ملك .. متقلقيش مفيش حاجة انا كنت حابة اريح دماغى بس واعد مع نفسى شوية .. المهم انتى قوليلى كنتى فين لما كلمتك ده انا حاولت اتصل كتير اوى
التمعت عيونها بالسعادة قائلة .. مش هتصدقى اللى حصل .. انا اصلا لسة مش مستوعبة
ملك .. ليه حصل ايه ؟؟
عاليا .. مش انا قلتلك هنسافر لخالتو يومين عشان طلبت نروحلها .. اتاريها عاملالى مفاجأة عمرى فى حياتى ماكنت اتوقعها
ملك .. مفاجأة ايه دى ؟؟ ما تقولى علطول باة شوقتينى
عاليا .. عمر .. تخيلى عمر راح طلب ايدى منها .. وطلبتنا عشان ييجى هو واهله يطلبونى رسمى
ملك بفرحة وعيون مذبهلة .. لا بتهزرى .. بجد !! .. والله جدع يا عمر قطعت عرق وسيحت دم بدل الغموض اللى مكنش مفهوم بينكم ده .. كدة طمنك شوية بعد ما كنتى قلقانة
عاليا بسعادة .. ما هو عمل كدة مخصوص عشان يطمننى .. وقرينا الفاتحة كمان
ملك .. بجد !! الف الف مبروك يا لولو ربنا يتمملك على خير يارب .. شوفتى باة مش قلتلك ربنا اكيد شايلك الاحسن .. اهو ربنا كرمك بواحد احسن من احمد مليون مرة .. وكفاية انه بيحبك ومستعد يعمل اى حاجة عشانك .. وانتى كمان بتحبيه
عاليا .. عندك حق .. الحمدلله على كل شئ .. بس لسة فيه مفاجأة كمان
ملك .. خير كمان ؟
عاليا .. الخطوبة ان شاء الله اخر الاسبوع
ملك بسعادة .. ايه ده فعلا .. مبروك يا قلبى ربنا يتمملك بالخير والسعادة يارب
عاليا .. تسلميلى يا ملوكة .
ملك .. كدة باة احنا عندنا شغل كتير اوى .. وهنقضى الاسبوع كله شوبينج
عاليا .. مش عارفة لسة هعمل ايه ولا هجيب ايه .. الموضوع جه بسرعة اوى ومكنتش عاملة حسابه
ملك .. هيا الخطوبة فى البيت ولا قاعة ؟
عاليا .. لا فى البيت .. احنا هنعمل حفلة بسيطة كدة عشان تبقى علاقتنا رسمية بس .. اصلا عمر مصمم نكتب الكتاب بعد التخرج علطول
شردت لوهلة حيث تذكرت ادم واصراره الدائم على زواجهم باقرب وقت .. لاحظت عاليا شرودها لتكمل قائلة .. بس انا قلقانة من الموضوع ده .. فى الاول جاريته قلت اكيد اهلى او اهله مش هيوافقو .. بس الغريبة لقيتهم موافقين ومرحبين جدا كمان فمبقاش عندى حجة
ملك .. ربنا يكتبلك اللى فيه الخير ليكى .. واديكو هتتخطبو فترة اهو عشان تطمنى .. المهم دلوقتى ورقة وقلم ونكتب كل اللى هتحتاجيه
عاليا .. الاول قوليلى هتحضرى انهاردة ولا هتهربى وتستخبى فى المكتبة كالعادة .. وتدبسينى انا
ملك بثقة .. لا من انهاردة مفيش هروب .. وهتعمد اظهر ادام ادم بكل مكان وفى اى وقت .. خلاص مش هستخبى ولا هخاف من مواجهته تانى
عاليا .. ده بجد .. وايه سبب التغيير المفاجئ ده ؟
ملك .. مفيش بس فكرت لقيت ان هو اللى المفروض يهرب منى مش انا .. هو اللى ملوش عين يبص فى عينيا
انا ليه اضيع على نفسى محاضرات واجتماعات مهمة عشانه !! ميستاهلش اصلا اعمله حساب .. انا مش هخاف تانى يا عاليا خليه هو اللى يخاف منى
عاليا .. صح كدة .. والله فرحتينى ايوة كدة هى دى ملك اللى اعرفها .
ملك .. صبرك عليا يا ادم .. انا هوريك مين هيا ملك
......
وجدها تجلس وحيدة ليقترب منها قائلا
ادم .. فينك يا مروة من اخر مرة اتقابلنا مسمعتش صوتك تانى
مروة ببرود .. معلش مشغولة
ادم .. مشغولة ازاى يعنى .. ده انا اتصلت بيكى ولا ميت مرة مردتيش عليا ولا حتى بعتى رسالة فى ايه ؟!
مروة بحدة .. ما قلتلك مشغولة يا ادم .. الامتحانات قربت ومبقاش فيه وقت نضيعه
ادم .. مممم عندك حق .. طب مقلتليش كلمتى اهلك ؟
مروة بارتباك .. اكلمهم .. فى ايه ؟؟
ادم .. تكلميهم فى موضوعنا .. انا مش قلتلك عايز اجى اتقدملك وطلبت منك تاخديلى معاد مع اهلك !!
مروة .. اه .. بس .. للاسف مش هينفع يا ادم .. انا اسفة .
ادم .. نعم !! هو ايه اللى مش هينفع .. امال ايه باة بحبك وعايزاك وكل الكلام اللطيف ده !
مروة .. غصب عنى .. لما قلت لماما لقيتها رافضة خالص .. وقالتلى ان ابن صاحب بابا اصلا متقدملى وبابا مديله كلمة
ادم بسخرية .. ابن صاحب بابا !! مممم واكيد طبعا غنى وعنده فلوس والحاجات اللى بتحبيها دى صح ؟!
مروة .. نعم !! قصدك ايه .. اناااا .. انا معرفش هو عنده ايه بس .. طالما بابا موافق يبقى اكيد مستواه حلو
ادم .. وانا باة مستوايا وحش ولما قلتى كدة لمامتك رفضت صح
مروة .. مش بالظبط .. بص انا شرحتلها ظروفك واللى قلتهولى وكدة .. قالتلى مينفعش ده مش مناسب ليكى .. وانا بصراحة بثق فى رأى اهلى
ادم .. وانتى باة موافقة تتجوزى واحد من غير ما تشوفيه لمجرد ان باباكى اداه كلمة ؟!
مروة .. اووووف هو تحقيق ولا ايه .. خلاص يا ادم قلتلك مش هينفع نكمل .. مش عايزة احرجك اكتر من كدة
ادم بحدة .. تحرجينى انا !! لا ده انتى الظاهر نسيتى نفسك وعايزة اللى يفوقك .. نسيتى لما كنتى هتموتى عليا من زمان وكنتى بتتمنى بس كلمة او نظرة منى .. دلوقتى بتقوليلى مش هينفع وبتتهربى منى .. تمام يا مروة .. انا هبعد عنك وهسيبك تتهنى بعريس الغفلة بتاعك .. سلام.
تركها وذهب بينما اخذت هى نفسا عميقا لنجاحها فى التخلص منه وكأنه حمل كبير ازيل عن عاتقها
....
لاحظ ادم التغير المفاجئ بملك .. فبعد اختفاءها المستمر بمعظم المحاضرات وبينها ايضا .. حتى بعد المحاضرات كان يجد صعوبة برؤيتها .. اصبحت الان متواجدة بكل المحاضرات فدائما ما يجدها امامه .. ولتعجبه الشديد كلما تقع عيونه عليها يراها تبتسم وتضحك مع من حولها متجاهلة اياه تماما وكأنه لا يهمها بشئ .. ولا تفكر به ابدا
استفزته تلك الحركات ليتوجه لها رغما عنه محاولا جذب الحديث معها
ادم .. شايفك بتحضرى يعنى !
ملك ببرود .. افندم !
ادم .. بقول مش عوايدك يعنى تحضرى كل المحاضرات كنتى علطول مختفية
ملك .. اعتقد ده شئ ميخصكش .. احضر محضرش دى حاجة ترجعلى
ادم متجاهلا كلامها .. ملك .. ليه قفلتى وانا بكلمك ؟
ملك ببرود متظاهرة بعدم الفهم .. امتى ده ! اعتقد انى عاملالك بلوك عشان متعمليش ازعاج
ادم وقد بدأت اعصابه تنفلت .. لما كلمتك يا ملك من يومين وقلتلك عايز افهمك حاجة .. قفلتى ومدتنيش فرصة اتكلم
ملك .. اه قصدك لما اتصلت من رقم غريب عشان ارد عليك .. اصل لو كنت اعرف ان انت مكنتش اديتك فرصة اصلا تكلمنى
ادم رافعا حاجبيه بعصبية .. ملك !
ملك بحدة وبنفس البرود .. اصلا انت تحمد ربنا انى مقفلتش فى وشك اول ما سمعت صوتك
ادم .. مقفلتيش عشان كنت واحشك صح .. صوتى كان واحشك زى ما صوتك كان واحشنى اوى
ملك .. متاخدش مقلب فى نفسك اوى كدة .. انا مقفلتش عشان بصراحة صعبت عليا .. يعنى كلفت نفسك ونزلت جبت خط مخصوص محبتش اضيع مجهودك عالارض .. وكمان كنت عايزة اثبتلك ان مكالمتك ملهاش لازمة
ادم .. برضو مقلتليش قفلتى ليه .. بتهربى منى ليه ؟
ملك ببرود .. انا مبهربش .. بس معجبنيش الكلام .. ومكنش ليا مزاج اسمع حاجة تضايقنى
ادم .. هتفضلى لحد امتى تعاملينى باللا مبالاه دى !
ملك .. دى المعاملة اللى تستاهلها بس للاسف عرفت ده متأخر فاتعود باة .. ولا اقولك الافضل منتعاملش اصلا
سلام
تركته حائرا حزينا يخشى ضياعها من بين يديه .. حتى انه قرر ان يصارحها بكل شئ قبل ان يخسرها للابد ولكنها وللاسف الشديد لم تعطيه اى فرصة ولم تترك له مجال للتحدث
....
بعد يومين
وجدها تقف مصدومة امام الكشوفات التى تحمل درجات الميدترم الخاصة بدفعتهم
ليدرك سبب صدمتها ويتفقد نتيجة ملك لا اراديا للاطمئنان عليها .. ثم توجه لتلك الواقفة بذهول متظاهرا بعدم ادراكه لسبب ذهولها ذلك قائلا
ادم .. ايه يا مروة مالك فى ايه ؟
مروة باندهاش ممتزج بالاستنكار .. انت شوفت .. شوفت درجاتى فى الميد ترم .. شوفتها .. انا عمرى ما نزلت بالشكل ده .. ازاى .. ازاى انا هتجنن
ادم .. ليه بس عملتى ايه ؟
مروة .. انا متأكدة .. متأكدة انى حليت كويس اوى .. وراجعت كمان بعد الامتحان من الملخصات بتاعتك كله صح .. يبقى ازاى .. ازاى كدة !
ادم .. طب بس اهدى
مروة بانفعال .. انا لازم اعمل تظلم .. لازم يراجعو ورقى انا متأكدة ان اجاباتى صح .. وبعدين ازاى كدة .. كل المواد كدة .. هتجنن بجد برج من دماغى هيطير
ادم .. تعالى معايا طيب
اصطحبها لخارج الكلية ليجلسها بسيارته مستغلا عدم تركيزها وتفكيرها فقط بتقديرها الذى سينهار بذلك الوضع
لتتساءل فجأة
مروة .. انت جبتنى هنا ليه ؟
ادم .. عشان تهدى .. جو الكلية كله موترك قلت اخدك مكان يهدى اعصابك
مروة .. قلتلك يا ادم مش هينفع نكمل انت ليه بتعمل كدة معايا ؟
ادم .. خلاص يا مروة عرفت وانا مش بضغط عليكى ولا طالب منك حاجة .. ياستى اعتبرينى زميل وخايف عليكى وبيحاول يساعدك مش اكتر
مروة .. بس مش لدرجة نخرج سوا .
ادم .. انهاردة بس يا مروة واوعدك هتبقى اخر مرة اقرب فيها منك
مروة .. طب هنروح فين
ادم .. مفاجأة
قام بتشغيل السيارة وانطلق مسرعا بمكان يبدو بعيدا بعض الشئ حتى ساورها القلق لتتساءل بخوف
مروة .. انت .. انت مودينى فين ؟
ادم .. ما قلتلك مفاجأة
مروة .. بس المفاجأة بتاعتك دى بعيدة اوى .. انا عايزة اعرف رايحين فين وقف العربية
ادم .. خلاص وصلنا
تلفتت حولها لتجد مكانا واسعا جدا ليس به كافيهات او مطاعم او ايا من الاماكن التى توقعت ان يذهبا اليها
لتقول بتعجب
مروة .. ايه المكان ده .. ده مكان فاضى مفيهوش حاجة
ادم .. بيتهيألك .. بصى جنبك كدة
القت ببصرها جانبا لتجد مبنى ضخم وبجانبه ملحق صغير يبدو انه تحت الانشاء
مروة .. مفيش جنبى حاجة غير مبنى كبير بس
ادم .. مخدتيش بالك من اسم المبنى ده !!
القت ببصرها مرة اخرى فلم تفهم شيئا
مروة .. سيرادم .. ايه ده باة !!
ادم وهو يخلع نظارته الشمسية .. انا اقولك ..
سير. اختصار لاسم سيرين .. اختى طبعا عارفاها
وادم .. ثم اشار لنفسه قائلا .. اكيد فهمتى
مروة بذهول لا تصدق ما تراه عيونها .. يعنى ...
ادم .. يعنى دى الشركة اللى هستلم ادارتها بعد التخرج .. سليم مكدبش عليكى ولا كان فاهم غلط لما قالك ان عندى شركة
مروة بارتباك .. س سليم !!
ادم باستنكار .. ايه مش عارفاه !! .. سليم خطيب اختى اللى لفيتى عليه و حاولتى تدسى سمك فى عقله عشان تخليه يسيبها ويكسر قلبها .. وكل ده ليه عشان بس تقدرى توصليلى .. عشان تعرفى عنى كل حاجة وفى الاخر تبلغينى بخيانته لاختى و تطلعى انتى البريئة اللى عملت كدة عشانى
اتسعت عيونها بذهول لا تستطيع استيعاب ما يقول فأكمل قائلا بحدة .. طبعا انتى مش متخيلة انى فاهمك من الاول .. بس حظك الاسود انى عارف كل بلاويكى .. عارف مثلا محاولة قتلك لملك .. ملك الانسانة اللى معملتلكيش اى حاجة ولا اذتك فى يوم كل ذنبها انى حبيتها هيا وفضلتها عنك .. روحتى بكل دم بارد تحاولى تقتليها فى الاسانسير عشان تحرمينى منها .. وتفكيرك المريض صورلك انها لما تموت هتقدرى تاخدى مكانها .
ليردف موبخا اياها .. ازاى قدرتى تعملى كل ده .. ايه سواد القلب والحقد اللى جواكى ده .. وكل ده ليه عشانى !! كنتى بتبررى كل مصايبك دى بانك بتحبينى ومستعدة تعملى كل حاجة عشانى صح ! .. عشان كدة كان لازم اثبتلك انك عمرك ما حبيتينى .. انتى ما حبتيش حد غير نفسك وبس يا مروة .. لما عرفتى مستوايا انا واهلى طمعتى فى الفلوس والنفوذ وتخيلتى انك بتحبينى .. او حاولتى تقنعى نفسك بكدة عشان توصلى للى انتى عايزاه .. ومجرد ما قلتلك عكس كدة بعدتى عنى ومبقتيش طايقة حتى كلمة منى .. وانا كنت متأكد انك هتعملى كدة
تعرفى ليه .. عشان انتى متعرفيش اصلا يعنى ايه حب
اصل لا يمكن انسانة تحب من قلبها حب نقى وصادق تقدر تأذى وتخطط وتقتل بالطريقة دى .. الحاجات دى متطلعش الا من واحدة حاقدة ومعندهاش قلب اصلا عشان تعرف تحب .. واحدة معندهاش ضمير ولا بتفكر الا فى نفسها
مروة بتوتر .. وانت عرفت منين .. كل ده
وبعدين انا مالى بملك .. انا .. انا معملتلهاش حاجة هيا اللى اتخنقت فى الاسانسير
ادم .. وهو مين اللى حبسها مش انتى .. انتى اللى وقفتى الاسانسير وهيا جوة عشان تقتليها يا مجرمة
مروة ببجاحة .. يا سلام .. وهو اى حد يقف بيه الاسانسير يموت .. عادى يعنى شوية وكانت هتخرج انا كنت متغاظة منها بس وبحاول اشفى غليلى منها .. بس برضو انت عرفت منين ؟
ادم .. هو ده كل اللى هامك .. مش مكسوفة من نفسك .. انا حقيقى عمرى ما كرهت حد قدك .. وقررت اديكى درس عمرك ماتنسيه فى حياتك
طبعا كدة واضح ان درجات الميدترم بتاعتك مش غلط ولا حاجة .. انا اللى قصدتها .. اديتك مذكرات وملخصات فيها حلول غلط عشان اسقطك .. وحقيقى كان نفسى اعمل كدة فى امتحانات اخر السنة بس حظك انى عندى ضمير مش زيك .. ومرضتش اضيع عليكى السنة واخليكى تعيديها .. واكتفيت بس بالميدترم
مروة بذهول .. انت يا ادم !! انت اللى عملت فيا كدة
ادم بقسوة وغل .. ومش بس كدة .. مشروع التخرج بتاعك كمان بوظتهولك واديتك فكرة مسروقة من مشروع تانى .. الفكرة اللى هيكتشفو انك سرقاها و هتتسبب ان تقديرك يتدمر .. بس تخيلى كل ده مشفاش غليلى ..
ما انتى اللى عملتيه مش شوية وانا شايل منك كتير .. ومستنى من زمان اللحظة اللى انتقم منك فيها واقف اتشفى فيكى بشماتة
شعرت بانفاسها تكاد تختنق حيث وجدت صعوبة شديدة بالتنفس لا تصدق انها قد خسرت كل شئ .. فلم تخسره هو فقط بل وخسرت ايضا دراستها ومستقبلها
مروة بضيق تحاول التقاط انفاسها .. انت .. انت عملت ايه .. انت ضيعتنى .. ازاى استغليت ثقتى .. استغليت ثقتى فيك وعملت فيا كدة
ثم بدأت بالبكاء قائلة .. انا كنت واثقة فيك لدرجة مراجعتش اى حاجة اديتهالى .. انا .. انا حتى مرضتش اقول فكرتك للتيم بتاعى من كتر ما كنت واثقة فيك
ادم .. ثقة ايه اللى بتتكلمى عنها ! .. انتى مقلتيش ليهم عشان طمعتى فى التقدير لوحدك .. زى كدة ما مرضتيش تدى الملخصات حتى لصاحبتك الوحيدة برضو عشان طمعتى فى التقدير لوحدك .. مش كدة مش ده كان كلامك
انا عمرى ما شوفت حد ماليه الحقد والانانية بالشكل ده .. وبتقوليلى انا اللى ضيعتك عشان تقديرك هيقل شوية .. امال انا اعمل ايه انتى دمرتينى وكسرتى كل حاجة حلوة جوايا
حرمتينى من حب عمرى الانسانة الوحيدة اللى قدرت تهز قلبى .. الوحيدة اللى ملكتنى من اول مرة شوفتها
ضيعتها من ايدى بسببك .. بسبب شرك واذاكى خوفت عليها منك واضطريت ابعد عنها لحد ما اكشفلك حقيقتك القذ.رة ادام نفسك واوريكى انك عمرك ما حبتينى
مروة ببكاء .. انت سيبت ملك عشان خانتك مع ابن خالتها .. انت قلتلى كدة
ادم باندهاش .. وانتى عرفتى منين انه كان ابن خالتها ؟! .. انا فاكر كويس انى قلتلك عالخيانة بس ومقلتش مين
شعرت بالارتباك لذلة لسانها تلك لتتسع عيونه بارقا اياها بذهول قائلا وسبابته تشاور عليها
ادم .. يبقى انتى .. انتى اللى دبرتى لكدة .. انتى اللى حاولتى توقعى بيننا صح .. دبرتى مقلب فيها وشربته انا زى المغفل .
ثم اكمل بانفعال مقتربا منها يهز اياها بعنف .. يعنى ملك بريئة ؟ ردى عليا ملك بريئة صح .. وانتى اللى عملتى كل ده
انعقد لسانها لا تقوى الحديث حين امسكها من ذراعها بقوة يهزها بعنف اكبر .. انطقى .. اتكلمى يا مجرمة انتى اللى عملتى كدة صح ؟!
مروة ببكاء .. انا .. معملتش حاجة .. هى اللى كانت على علاقة بيه .. انا بس عرفته بعلاقتكم .. لكن هيا .. هيا اصلا كانت على علاقة بيه قبلك
ادم بغل .. بطلى دموع التماسيح دى باة انتى اصلا معندكيش قلب .. عارفة .. انا لو اطول اخنقك دلوقتى باديا الاتنين وافش غلى فيكى عشان اخلص البشر منك كنت عملتها وارتحت .. بس متستاهليش اوسخ ايدى فيكى .. ولا تستاهلى اضيع نفسى بسببك
بس قسما عظما يا مروة .. لو قربتى منى ولا من اى حد يخصنى تانى ايا كان هو مين .. وربى ما هرحمك .. اللى عملته فيكى دلوقتى وزعلك على تقديرك ده قرصة ودن بس .. عشان تحرمى تفكرى بو.ساخة تانى .. لكن لو اتكررت او حاولتى بس تأذى اى حد يخصنى تانى .. ساعتها هتندمى .. انتقامى ساعتها مش هييجى حاجة جنب اللى عملته وهتبكى بدل الدموع دم
احسنلك تبعدى عنى وعن حياتى .. وادينى اثبتلك انك عمرك ما حبيتينى ولا حبيتى حد اصلا غير نفسك
مروة بانهيار وبكاء هستيرى .. بس يا ادم .. انا .. انت .. مدتنيش فرصة ادافع عن نفسى .. انا معملتش كدة عشان الفلوس صدقنى .. سليم ده جه ادامى كدة صدفة .. لكن انت اللى كنت مهم عندى
ادم بحدة .. مش عايز اسمع ولا كلمة .. انتى متهمنيش اصلا عشان تبرريلى افهمى باة انا بعشق ملك بحبها بجنون وانتى عمرك حتى ما جيتى فى بالى .. حتى لو كنت زى ما بتقولى انا مهم عندك تبقى اختارتى الشخص الغلط انا عمرى ما هبصلك .. مش بس عشان حبى لملك لكن عشان روحك مش صافية مش نضيفة وانا النوع ده ميعجبنيش
.. انا اللى احبها لازم تكون رقيقة وبريئة ومبتتمناش الاذى لحد وتحب الخير لكل الناس .. واعتقد مفيش ولا صفة من دول فيكى اصلا
ظلت تبكى بهستيريا لا تصدق ما حدث لتندب حظها بعد خسارتها لكل شئ
ادم .. انا هوصلك مكان ما جبتك عشان انتى بنت وميصحش اسيبك فى مكان مقطوع زى ده لوحدك .. بس لحد ما نوصل مسمعش نفسك .. انا لا طايقك ولا طايق اسمع صوتك
اكملت بكاءها وهى تنظر له بعدم وعى تحاول استيعاب ما فعله بها ولكن عقلها ما زال لا يدرك حجم الكارثة التى وضعت بها
بعد وقت طويل وصلا امام الكلية لتهم بالنزول من سيارته حينما امسك باب السيارة بجانبها ليتوعدها قائلا
ادم .. لو قربتى لملك تانى او حاولتى تأذيها بأى شكل صدقينى حسابك هيكون عسير .. اه وعشان تعرفى كلامنا كله اتسجل واعترافاتك كلها بصوتك .. عشان لو فكرتى بس تغدرى ساعتها صدقينى الفضيحة من كبرها مش هتعرفى تلميها
ليتعالى صوته قائلا بنبرة قاسية .. انتى سامعة ؟
شعرت بالخوف الشديد يتسلل لقلبها لترد برعب
مروة .. س سامعة .. سامعة يا ادم
ادم .. وياريت كمان اسمى ميجيش على لسانك الو.سخ ده مرة تانية .. يلا اتفضلى
خرجت من السيارة بسرعة وقلبها يدق بعنف خوفا ورعبا منه ومن نظراته التى تملأها الغضب والقسوة الحارقة
لم تستوعب بعد كم المصائب التى ستواجهها بسبب قلبها الاسود ذلك
فعوضا عن تقديرها الدراسى فى الميدترم الذى انهار .. هى متهمة بسرقة فكرة مشروعها ليزداد الامر سوءا ويقل تقديرها بالمشروع ايضا
هذا الى جانب اعترافاتها المسجلة بمحاولة قتل ملك وايضا علاقتها مع سليم
الامر الذى يمكن ان يسبب لها الكثير من المشاكل والسمعة السيئة
فماذا لو قدم ادم تلك التسجيلات للشرطة .. او كان رؤوفا وقدمها لأهلها .. بالحالتين هى هالكة لا محالة
.....
بنهاية الاسبوع جاء اليوم الموعود يوم خطوبة عاليا وعمر والذى طالما انتظراه وقاما بالتحضير له جيدا من شراء الفستان والبدلة والشبكة وكل احتياجاتهم كى يخرج ذلك اليوم بأروع صورة ممكنة
وعلى الرغم انه كان حفلا عائليا بسيطا يضم فقط العائلتان والقليل من اصدقاء العريس والعروس .. الا ان حرصت عاليا على عمل ديكور مميز للمنزل وخصوصا الشرفة التى ملأتها بالكثير من الورود والازهار الملونة مع وضع الزينة والبلالين التى اضفت روحا مرحة مبهجة للمكان
وكالعادة كانت ملك مصدر العون لها حيث ساعدتها كثيرا باعداد ذلك الديكور وشراء الاكسسوارات والاشياء اللازمة له مع رسم اسمائهم على الجدران بالزينة واعداد كوشة رائعة لهم حيث زينت مقاعدهم بالستان والورود الحمراء المصنوعة ايضا من الستان مع عمل خلفية بالتل الرقيق اللامع على الحائط من خلفهم وبالونات الهيليوم تتطاير بجانبهم على شكل قلوب حمراء مبهجة
ظلت ملك مع عاليا بالغرفة تساعدها باعداد نفسها وارتداء الاكسسوارات
حيث ارتدت فستانا ورديا رقيقا جدا به تطريزات بسيطة مفصل عليها تفصيلا وكأنه صنع من اجلها مع وضع القليل من المكياج فقط لابراز جمالها ورقتها
دخلت سميحة قائلة
سميحة .. بسم الله الله اكبر .. بدر منور ما شاء الله عليكى
ملك .. فاضل الطرحة بس بصراحة مش عارفة اظبطهالها
سميحة .. اعملهالك انا يا روحى تعالى
وبعد لحظات دق جرس الباب لترتبك سميحة قائلة
سميحة .. معقول هما دول .. دى منى لسة مجتش
ملك .. خليكى حضرتك اعمليلها الطرحة وانا هروح افتحلهم
خرجت ملك لتفتح باب المنزل حين تفاجأت بأدم امامها
ظل يتفتن بها مأخوذا بجمالها الفتاك والذى اظهره ذلك الفستان السواريه الازرق ذو القصة المميزة والذى يظهر مفاتنها وقوامها الممشوق فقد كانت حقا مبهرة خاطفة للانفاس .. ارتكز بعيونه عليها ابيا ان يزيحهما عنها حين قالت بذهول
ملك .. ادم !! .. امال فين عمر؟!
افاقته كلماتها من شروده ليرد قائلا
ادم .. مش عارف انا جاى لوحدى .. هو لسة مجاش ولا ايه ؟
ملك .. لا لسة
ادم .. طيب مش هتدخلينى هتسبينى واقف كدة
ملك بارتباك .. احم معلش مخدتش بالى .. اتفضل
دخل قائلا باعجاب شديد
ادم بابتسامة .. اول مرة اشوفك بفستان سواريه .. شكله جميل اوى عليكى
ملك بارتباك .. احم .. عن اذنك
تركته ودخلت غرفة عاليا مسرعة بينما قالت سميحة .. هما اللى جم ؟
ملك .. لا ده صاحب عمر
سميحة .. يا نهار ابيض يعنى صاحبه جه قبله ! طب قدمتيله حاجة ؟
ملك باحراج .. لأ .. بس زمان عمر جاى وهنوزع عليهم كلهم
سميحة .. لأ ميصحش نسيبه كدة .. روحى حطيله عصير على ما اخلص واجيله
ملك على مضض .. حاضر
ذهبت ملك كى تحضر له العصير ثم خرجت اليه بالصينية
كى تقدمها له قائلة
ملك .. اتفضل
ادم مبتسما .. معقولة القمر ده جايبلى العصير بنفسه .. تسلم ايدك
ملك بضيق وملامح مستاءة .. مش انا اللى عاملاه على فكرة
ادم .. كفاية انه من ايدك
تجاهلته وتركته مرة اخرى لتدخل لعاليا
ملك .. ها خلصتو ؟
سميحة .. اه خلاص .. هروح باة اشوف الجدع اللى برة ده عيب نسيبه كدة
تركتهم وذهبت حين قالت عاليا
عاليا .. انا اسفة يا ملك والله قلت لعمر ميجيبوش قاللى ده اهم منى انا شخصيا
ملك .. عادى يابنتى ما كان لازم ييجى طبعا ده اقرب صاحب ليه .. انا مش متضايقة وكنت عاملة حسابى اصلا انه جاى
عاليا .. بجد امال مالك مرتبكة ليه كدة ومش على بعضك
ملك .. اصلى اتفاجأت بيه بس متوقعتش ييجى قبل عمر وانا اللى افتحله
عاليا .. هو ضايقك ولا حاجة ؟
ملك .. لا خالص .. اعد بس يعاكس كنت عايزة اديله بالصينية فى وشه والله مسكت نفسى بالعافية عشانك
عاليا ... ههههههه ما ليه حق ميقدرش يقاوم الجمال ده .. يخربيتك الفستان هياكل منك حتة زمانك جننتيه
ملك .. هو ناقص جنان ماهو مجنون خلقة .. وبعدين اجى انا جنبك ايه يا عروسة ده انتى اللى طالعة مزة مزة يعنى .. الواد هيتهبل عليكى
....
اتصل ادم هاتفيا بعمر متوعدا له
ادم .. انت فين يابنى انت ينفع كدة الحركات دى تقولى الساعة ٧ وتخلينى اجى قبلك
عمر .. والله يابنى العربية عملتها معايا وعطلت بينا فى السكة اضطرينا نركنها ونستنى عربية تانية تجيبنا
ادم .. يانهار ابيض انت يابنى طول عمرك منحوس كدة حتى يوم خطوبتك
عمر .. هعمل ايه باة نصيبى .. المهم احنا خلاص قربنا حاول تلهى عاليا على ما اجى احسن انا عارف مش هتعديهالى
ادم .. عاليا مين يابنى دى هى وملك اعدين جوة وانا اعد زى قرد قطع لوحدى برة .. هنزل استناك تحت احسن
عمر .. مش مستاهلة انا خلاص قربت
سميحة .. اهلا وسهلا يا حبيبى
ادم .. اهلا بحضرتك .. الف مبروك لعاليا ربنا يتمملهم بخير يارب
سميحة .. الله يبارك فيك يا حبيبى عقبالك
ادم .. عن اذنك هنزل استنى عمر تحت .. انا معرفش والله انه لسة مجاش
سميحة .. عادى يا حبيبى انت منورنا
دق جرس الباب لتقوم سميحة بفتحه وتجد منى وفادى وزوج منى ايضا ومن بعدهم عمر وعائلته
دخل الجميع وخرجت عاليا لهم لتتناول بوكيه الورد البنفسجى الرقيق من عمر قائلة بضيق
عاليا بغيظ .. اخنقك بالبوكيه ده دلوقتى ؟
عمر .. ليه بس يا حبيبتى احنا لحقنا ؟!
عاليا .. كل ده تأخير يا بيه ويوم خطوبتنا !
عمر .. والله ما رضيت اقولك عشان مقلقكيش بس
العربية عطلت مننا فى السكة ده اللى اخرنى
عاليا .. مممم طيب خلاص سماح المرة دى
عمر .. ايوة كدة فكيها واضحكى خلى الشمس تطلع
عاليا .. شمس ايه الساعة ٨ !
عمر .. يا ستى انا شمسى منورة على طول طول ما شايف ضحكتك دى .. دى اللى بتنورلى حياتى كلها
منى .. ايه يا عرايس هتعدو ترغو كدة وتسيبونا
عمر بارتباك .. احم .. لا جايين اهو يا طنط كنت بديها البوكيه بس .. ثم همس لعاليا .. ايه الاحراج ده 😂
عاليا .. ههههه عندهم حق سايبين الكوشة فاضية واعدين هنا نتسامر .. تعالى يلا قبل ما نتضرب 😂
جلست ملك بالقرب من عاليا بينما ظل ادم واقفا بجانب عمر ونظراته مسلطة على ملك
عمر .. هو انت البودى جارد بتاعى انهاردة وانا مش عارف ؟!
ادم .. بس يلا
عمر .. يلا ! .. يا عم انا خطوبتى انهاردة احترمنى شوية .. وبعدين مالك واقفلى زى العمل الرضى كدة ليه ما تنتشر فى المكان وتحل عنى
ادم .. تصدق انك عيل جزمة ومتستاهلش .. يعنى انا واقف عشان لو محتاج حاجة تلاقينى جنبك وانت تقول كدة
عمر بغمزة .. عشانى برضو ولا عشان تبقى قريب من حبيبة القلب ؟
ادم ضاربا راسه بخفة .. طب ما انت فاهم اهو امال عامل عبيط ليه ؟
عمر .. ياعم شوفلك حتة تانية اقف فيها مش عارف اقول لخطيبتى كلمتين على بعض .. اقولك استنى
ماما مش كنتى بتقولى ادم واحشك مش شايفك اعدة معاه يعنى
سعاد .. طبعا ده انت غالى اوى عندنا يا ادم .. بس
اعذرنى بأة ملبوخة معاهم فى التحضيرات عقبال خطوبتك انت كمان اما نفرح بيك
ادم .. ربنا يخليكى يا طنط وانتو كمان والله غاليين عندى
ملك .. طنط سعاد انا حضرت صينية الشبكة حضرتك اللى هتقدميها ؟
سعاد .. لا يا حبيبتى خلى حد من خالاتها يقدموها
استمعت سميحة لهم فقالت
سميحة .. قدميها انتى يا حبيبتى انتى اختها وعشان كمان نفرح بيكى قريب
ادم وهو ينظر لملك باعجاب .. من بقك لباب السما يا طنط .. تفرحو بينا قريب
سميحة مازحة .. انتو الجيل الجديد ده علطول كدة مستعجلين .. بس ربنا يكتبلكم كل الخير
خدى يا ملك الصينية وقدميها على ما اشغل اغنية دبلة الخطوبة
اخذت الصينية منها وقامت بتقديم الشبكة بأجواء مليئة بالبهجة والسعادة مع ارتفاع الزغاريد واصوات المباركات والتهانى لعاليا وعمر والذين كانو بقمة سعادتهم بتلك اللحظة وقد وجد كلا منهم نصفه الاخر ليصبحا روح واحدة بجسدين ❤️
امتلأ المكان بالاغانى المرتفعة والاصوات الصاخبة مع تراقص العائلتان بسعادة وألفة وسط نظرات عاليا وعمر المتوهجة بالعشق والغرام
وفى ظل تلك الاجواء لم يزيح عينه عنها حيث ظل يسترق النظرات لملك طوال الوقت بين نظرات مشتاقة مرة واخرى متألمة لبعدها عنه ومرة حزينة واخرى عاشقة مغرمة بها
حاولت التهرب من نظراته تلك فلم تتحمل تمثيله لدور العاشق كى يعيدها لقلبه مرة اخرى ويحيى عشقهم من جديد فقط ليرضى غروره
ظلت تلعن نفسها لتأثرها بوجوده ونظراته تلك رغم يقينها ان كل ذلك ما هو الا خداع لقلبها كى يرضى كبرياء قلبه الذى يأبى ان ترفضه اى فتاة اياً تكن
ولكن لا ليست تلك المرة ادم .. فقد استوعبت الدرس جيدا ولم اسمح بتأثيرك على مرة اخرى لتهب واقفة وتترك المكان متوجهة لشرفة المنزل .. وما هى الا دقائق قليلة حتى ذهب وراءها ليقف خلفها متأملا اياها بين الورود والزروع الخضراء الزاهية مع انعكاس الاضواء الملونة على وجهها لتظهره برَّاقا يشع منه السحر والجمال
اقترب منها قليلا قائلا
ادم .. سبتينا وجيتى هنا ليه ؟
ملك باستياء .. اتخنقت من بصاتك اللى مستلمانى طول الاعدة وطابقة على انفاسى .. حسيت انى قرفانة فخرجت اشم هوا
ادم بعشق .. اعمل ايه طيب منا مش قادر اشيل عينى عنك وانتى زى القمر كدة و الفستان يجنن عليكى ..
عقبالك ده انتى هتبقى احلى عروسة شافتها عنيا
ملك بسخرية .. لا ما خلاص شطبنا .. البركة فيك باة ..
ثم نظرت له لتكمل بمرارة .. ما انت علمتنى مثقش فى حد ابدا ولا ادى اى واحد الامان .. عن اذنك
همت ان تتركه بينما امسكها من ذراعها قائلا
ادم بألم .. ملك انا مبقتش قادر خلاص .. مستعد اعمل اى حاجة عشان ترجعيلى .. ادينى فرصة واحدة بس واسمعينى وبعد كدة اعملى اللى يريحك
ملك منتزعة ذراعها منه بقوة .. انت لو بتموت ادامى يا ادم مش هديك اى فرصة تانى .. فرصك انتهت عندى ووقتك خلص فاحسنلك تخرجنى من دماغك عشان ترتاح وتريحنى
ادم .. بطلى تقولى كلام من ورا قلبك عشان تعذبينى وخلاص .. لو على العذاب فانا بموت من وجعى فى كل دقيقة وانتى بعيدة عنى
ملك بحسرة .. يمكن قبل كدة كان من ورا قلبى .. لكن دلوقتى لأ .. تخيل حتى بعد كل اللى عملته خيانتك وشكك فيا كنت سايبة الباب موارب بيننا .. بس بعد اخر مكالمة بيننا بقيت احس بالاشمئزاز من مجرد التفكير فيك
عرفتك على حقيقتك واتأكدت انك انسان هوائى .. لما لقيت الموضوع داخل فى الجد رميتنى زى الكلبة وروحت تتسلى بواحدة تانية .. ولما سابتك هفَّك الشوق ترجع للعبتك القديمة وتكمل تسلية .. فاكرها لسة هبلة وعلى نياتها وما هتصدق ترجعلها
ادم .. انا يا ملك !! .. ده انا اللى كنت بتحايل عليكى نتجوز وانتى اللى كنتى بتماطلى وتأجلى
ملك .. ده ربنا بيحبنى انى رفضت والا كان زمانى دلوقتى متدبسة فيك .. بجد بحمد ربنا من قلبى انه نجدنى من واحد زيك
شعر بالالم الشديد لرؤيتها له بتلك الصورة البشعة والتى لا تمت له بأى صلة .. فحاول التأثير عليها قائلا
ادم متوسلا .. ملك بصى فى عنيا كدة وقوليلى شايفة ايه .. شايفة لمعة حب وصدق فى مشاعرى ولا خداع وتمثيل
لو بصيتى لعينيا هتعرفى انا اد ايه بتألم من غيرك
ملك بغل .. عينيك دى اكتر حاجة خدعتنى فى حياتى .. كنت فاكرة انى فاهماهم بس طلعت مغفلة .. لو عايز تعرف انا بشوف ايه فى عنيك فانا هقولك .. بشوف ضياع .. بحس انى ضايعة فيهم مش لاقية نفسى زى زمان .. بشوف قسوة وغدر ..عرفت شايفة ايه
ادم .. انتى اصلا بتهربى منهم ومش قادرة تواجهيهم
ملك .. صح مش هنكر .. ايوة بهرب من خداعهم .. مش هسمحلهم يخدعونى تانى .. اصلهم بيتلونو ميت شكل و لون حسب ما انت عايز .. بجد اكتر عيون خداعة وكدابة شوفتها فى حياتى
ادم بيأس.. يعنى مفيش فايدة !! مش عايزة تصدقى انى عمرى ما حبيت ولا هحب غيرك .. مروة دى كانت ....
ملك مقاطعة اياه بقسوة .. مش عايزة اسمع سيرتها ولا اعرف عنك اى حاجة .. مش عايزة افتكر حتى انى كنت اعرفك يا ادم .. انت مسبتليش اى فرصة ادافع عنك حتى ادام نفسى .
تركته وذهبت ليشعر بالالم الشديد حتى دخل خلفها يجر اذيال الخيبة والندم
جلست بمقعدها محاولة الا تنظر صوبه ابدا بينما ظل هو يسترق النظرات لها حتى دق جرس الباب
قامت سميحة بفتح باب المنزل فوجدت امامها شابا يبدو بنفس عمرهم لتدرك انه زميلهم بالكلية
سميحة .. اهلا يا حبيبى اتفضل
عاليا بذهول .. مروان !!
وقف الجميع حين قام ادم بقرص عمر بذراعه قائلا بغيظ .. مقلتليش يعنى ان مروان جاى !
عمر بابتسامة .. وانا مجنون اقولك عشان تقتلنى وملحقش اتهنى بخطوبتى
ادم بغيظ اكبر .. واما انت عارف كدة جبته ليه ؟!
عمر .. والله يابنى ما جبته هو اللى لما عرف ان خطوبتى انهاردة عرض خدماته وقالى لازم اصوركم انت وعاليا .. مش قلتلك الواد ده جدع
ادم بانفعال .. تصدق انا اللى هصورك واعملك بوستر على باب الشقة دلوقتى
عمر محاولا كتم ضحكاته .. بس قلبك ابيض ياعم هياخد واجبه ويمشى متضيقش علينا كدة
مروان .. الف مبروك يا عريس .. مبروك يا عاليا ربنا يتمملكم بخير
عمر .. الله يبارك فيك يا كبير تعبت نفسك ليه بس
مروان .. وانا افديك الساعة لما اصور خطوبتكم
عاليا .. ميرسى اوى يا مروان
مروان .. ادم باشا ازيك يا معلم واحشنى
ادم بابتسامة صفراء .. اهلا ياخويا
مروان ملتفتا لملك .. ايه ده وملك كمان هنا ازيك عاملة ايه؟
ملك .. اكيد طبعا مش هسيب عاليا فى يوم زى ده .. انت عامل ايه؟
مروان .. انا زى الفل الحمدلله
ثم اكمل باعجاب .. بس ايه اللوك الجامد ده دى الكلية مخبية كتير باة واحنا مش عارفين
ملك بابتسامة رقيقة .. ميرسى اوى .. انت كمان شكلك حلو فى البدلة
ادم بغيظ ناغزا عمر بكتفه .. روح لم الواد ده بدل ما اطلع جنانى عليه واوريه الكلية مخبية ايه فيا انا
عمر بقلق .. اهدى يا ادم .. مش معقول هتبوظ خطوبتى يعنى
ادم بانفعال .. انا اقسم بالله كلمة زيادة من الواد ده وهقلب الخطوبة ميتم على دماغكم كلكم
عمر محاولا الا تنفلت ضحكة منه .. طب بس استنى وانا هتصرف
ثم التقط طبقا من الحلويات ليعطيه لمروان قائلا .. ما تهدى يابنى وتعد ترتاح من المشوار بدل وقفتك دى .. خد كل الجاتوه ده حلو اوى
مروان .. لاااا انتو هتقضوها اكل ولا ايه .. معروفة العريس والعروسة وقت البوفيه بيتصورو مبياكلوش
عمر .. لا ياعم انا جعان ومكلتش حاجة من الصبح ناكل وبعدين نتصور
مروان منتزعا الطبق من يده عنوة .. يابنى ابقى كل لما امشى براحتك هو الاكل هيطير
عاليا برقة .. سيبه ياكل يا مروان ده تعبان من الصبح والعربية كمان عطلت بيه
مروان .. ماهى طيبة قلبكم دى انتو البنات هى اللى مودياكم فى داهية .. وترجعو بعد كدة تزعلو وتقولو ملحقناش نتصور
عمر .. انت يابنى جاى عشان تغتت عليا هو حد قالك اننا مأجرين بالساعة ما احنا لسة اعدين مش هنهرب
مروان .. ياعم انا اللى مش فاضيلكم ورايا فرح بعديكم .. يلا ادامى انت وهيا خلصونا ورينى هتتصورو فين
عاليا بحماس .. فى البلكونة طبعا ده انا عاملة ديكور يجنن
مروان .. قشطة طيرو عالبلكونة
عمر فى سره .. انا اللى جبته لنفسى كان يوم اسود يوم ماقلتلك يا بعيد
ذهبا للتصوير تاركين ملك وادم حيث كانت ملك تتناول قطعة من الجاتوه حينما استغل ادم الموقف وانشغال الحضور بالاحاديث والضحكات ليغير الاغنية ويقوم بتشغيل اخرى قاصدا بها ملك فى محاولة منه كى يرق قلبها له ولو قليلا
وقد نجح بمحاولته تلك فما ان بدأت تلك الاغنية حتى اهتز قلبها بألم لتقع عيونها عليه مدركة انه يقصدها بتلك الكلمات التى تقول
((معلش انا عارف انى بتتاقل عليك .. معلش ده من عشمى فيك .. جيتلك ونفسى تفتكرلى حاجة اتسامح عليها
فجأة انا باديا ضيعتك زمان .. ونسيت ونسيتك كمان .. ومشيت انا فى ايام مكنش يصح اسيبك وامشى فيها
كان بعدى عنك غلطة انا بدفع تمنها .. والغلطة دى بندمى الكبير كفرت عنها .. وانا انهاردة بعلن ان انا توهت منها
انا تحت رحمة كلمة واحدة تقولها ليا .. والكلمة ديا لو انت مستخسرها فيا .. دى معناها انى انا اتحكم بالموت عليا
ظلت تنظر له بعيون ممتلئة باللوم والعتاب .. تدرك مقصده وندمه ولكنها لا تجد اى مبرر لما فعله .. ولم تسمح بخداعه لها مرة اخرى .. ليرد عليها بنظراته التى تتوسل قلبها كى تعطيه فقط اخر فرصة كى يثبت حبه لها
حتى اتى الكوبليه الاخر بتلك الكلمات ليقضى كليا عليها ويزلزل كيانها باحساسه
(( انا كنت واحد مش فى وعيه بس فاق .. انا كنت مش حمل الفراق .. سيبتك لكن الدنيا من قلبى ومنى خدت بتارك
انا كنت واحد ماشى بيضل الطريق .. واما الحياة بدأت تضيق .. حسيت بقيمتك جيت بسرعة عشان انا ارد اعتبارك
كان بعدى عنك غلطة انا بدفع تمنها .. والغلطة دى بندمى الكبير كفرت عنها .. وانا انهاردة بعلن ان انا توهت منها ))
تألم قلبها مع التماع عيونها بالدموع التى فشلت فى اخفاءها عنه .. ومع تكرار اخر كوبليه لم تتحمل فقامت سريعا من مجلسها لتتوجه لعاليا وعمر بالشرفة مستأذنة منهم بالانصراف
ملك .. معلش يا عاليا انا لازم امشى اتأخرت .. الف مبروك .. مبروك يا عمر ربنا يسعدكم
عمر .. الله يبارك فيكى يا ملك عقبالك
عاليا بهمس .. انتى معيطة ولا ايه ؟
ملك محاولة مسح دموعها بخفة .. لأ مفيش .. مفيش حاجة .. ثم اعتلى صوتها بمحاولة الا تظهر ضعفها
قائلة بمرح
ملك .. سلام يا مروان .. هستنى الصور باة اما نشوف شغلك هيطلع ازاى
مروان .. لا عيب عليكى ده انتى هتشوفى عظمة .. اوعدك هتنبهرى
عاليا .. تعالى طيب اتصورى معانا صورتين
ملك بحزن .. مش قادرة يا عاليا معلش خليها فى كتب الكتاب
عاليا تحاول مسح دموعها تحت انظار ادم الواقف بباب الشرفة يشاهد ما يدور بالداخل
عاليا .. لا هنتصور .. مفيش دموع باينة اضحكى يلا
ثم قامت بدغدغتها كى تضحكها
ملك .. ههه بس بس هتفضحينا
عاليا .. يلا صورنى مع ملك يا مروان
تسللت الغيرة لقلب ادم حيث لم يحتمل فكرة ان يمتلك مروان صورة لها ليقول بعفوية
ادم .. لا السيشن دى بتاعتكم انتو .. وبعدين طنط كانت بتنادى على ملك وانا كنت جاى اقولها اصلا
شعرت ملك بغضب ادم وتحججه لمحاولة منعها من التصوير لتنظر له بتحدى قائلة
ملك .. لا هنتصور الاول .. ثم وقفت بجانب عاليا تبتسم ابتسامة واسعة وهى تقول .. يلا صورنا يا مروان
التقط لهم عدة صور تحت انظار ادم الغاضبة والمتوعدة حتى لاحظ عمر فقال
عمر .. تعالى انت كمان اتصور معانا يا ادم
تأمل بصورة له مع ملك وكأنه غريق تعلق بقشة ليسرع بالوقوف بجانب عمر حين اعتذرت ملك قائلة
ملك .. انا اتأخرت اوى كملو انتو باة .. سلام
هم ان يتبعها حين امسك عمر بادم قائلا .. اضحك عشان الصورة تطلع حلوة
لم يرد افساد صورته معه والذى يعلم جيدا انها ذات اهمية بالنسبة لعمر فانتظر لالتقاط صورة واحدة ثم اسرع خلف ملك مستأذنا هو الاخر من الجميع للانصراف
لحق بها وهى تستقل المصعد ليدخل خلفها ويغلق الباب قائلا
ادم .. كدة باة معندكيش حل غير انك تسمعينى .. وهتسمعينى يا ملك
.....
يا ترى ملك هتدى فرصة لادم وتسمعه ؟!
ولا قلبها هيكونله رأى تانى
هنعرف البارت القادم
منتظرة اراءكم وتعليقاتكم 😍
دمتم بالف خير ❤️❤️
•تابع الفصل التالي "رواية انت عشقي وقسوتي" اضغط على اسم الرواية