رواية ميراث نور كاملة بقلم لينا بسيوني عبر مدونة دليل الروايات
رواية ميراث نور الفصل الثاني و الخمسون 52
“عين الخفاش ”
حضر مارو بس كان لوحده من غير نورا وسندس , وقرب عليا و هو فى أيده أبره رفيعه وقال :
– جاتلك الفرصة اللى هتثبت فيها ولائك لينا .
قولتله :
– فرصة أيه ؟ وأيه الابرة اللى فى أيدك دى ؟!
مارو قالى :
– هتفهم كل حاجة فى ميعادها , بس الأول هنعملك حبة مكياج حقيقى .
أتفاجئت بيهم بيقربوا عليا كلهم .
فمارو قالهم :
– خلوا أيديكم خفيفة ياجماعة مش عايزينه يموت بجد !!!
حنوش أدانى بوكس ,فقولت :
– أاااه هو فيه أيه!!! بتضربونى ليه ؟
نصير أدانى بوكس تانى وهو بيقول :
– الضرب ده علشان مصلحتك يازيجا لو وصلت هناك سليم هيعرفوا أنك تعاونت معانا .
نور ناولنى بوكس فى وشى هو كمان وهو بيقولى :
– شوفت أحنا خايفين عليك أزاى !!
أبن القاف أداهالى فى مناخيرى فأخنفيت !!
قولتلهم :
– طيب فهمونى طيب !!!
كملوا ضرب فيا لحد ماأتخرشمت خالص .
مارو بص على وشى اللى نفخ من كل ناحية وقال :
– كفاية ياجماعة كده ميه ميه .
دورك فى الخطة كالآتى ….
فهمونى دورى فى خطتهم , ونقلونى بعيد عن معسكر جيش الشياطين بحوالى 5 كيلو وقالولى :
– أجرى يازيجا .
كنت متخرشم خالص وجريت فى الجليد وفضلت أجرى لحد ماوصلت قبل المعسكر بشوية , الشياطين شافونى وأنا رايح جرى كأنى هربان , عملت نفسى مش قادر أجرى ورميت نفسى على الجليد …
الشياطين أنتبهوا ليا وشوية ولاقيتهم بيقربوا عليا وبيجرجرونى للمعسكر وانا بين الحياه والموت .
أيسر وجوهر خرجوا من القبانى بعد الشياطين ما بلغوهم انهم لقونى .
أيسر قرب عليا ولقى وشى متخرشم ومنفخ وبترعش من البرد , كنت بموت فعليا , وبحاول أقولهم كلام مش واضح مكنش واضح منه الا كلمة أيسر !!!
أيسر قرب ودنه من بوقى وانا على الارض وقال :
– بتقول أيه يازيجا ؟
قولتله :
– هيقتلوك !!
قالى :
– هيقتلونى أزاى !!؟
بصيت وراه وأنا مرعوب , لف ضهره وبص وراه ,أتفاجأ بسهم جاى فى أتجاهه بسرعة .
فرميت جسمى عليه علشان أنقذه , وبالفعل أنقذته من السهم اللى أطلقة مارو واللى كان هيرشق فى رأسه !! ورشق فى كتفى أنا بدل منه !!
الهرج والمرج أندلع فى المعسكر كله , خدمة أيسر التفت حواليه علشان تحميه .
الشياطين أطلقوا أسهم كتيرة فى الاتجاه اللى جاى منه السهم .
وجوهر جرى بسرعة فى أتجاه مصدر السهم , بس شوية ورجع لوحده .
كنت لسه نايم فوق أيسر اللى كان مصدوم وفضل نايم على الارض .
أيسر زاحنى من فوقيه فنزلت على الجليد ,كنت بتنفس بصعوبة وبدأت أكح دم .
جرى بسرعة وأحتمى فى قبانى , وآمر الخدمة بتاعته يدخلونى جوه القبانى .
شالونى ودخلونى القبانى وحطونى على الأرض , أيسر شد السهم من كتفى , وبدأ يعالجنى ..
يومين وبدأت أفوق وأستعيد عافيتى , أيسر أول حاجة قالهالى :
– أوعى تفكر الحركة الخايبة اللى عملتها بره دى هتخيل عليا , وفكرة أنك تنقذنى من الموت علشان أثق فيك أتهرست فى مية فيلم قبل كده .
عرفت أن أيسر بيجس نبضى بطريقته , فقولتله وأنا مقموص :
– كده يا أيسر ده ظنك بيا , ده بدل ما تشكرنى !!
جوهر دخل فى الكلام وقال :
– أحكى أيه اللى حصل !!
قولت لجوهر وانا ببص لأيسر وبعاتبه بعينى :
– الكلاب بيحضروا لمفاجأه كبيرة , هيقضوا على جيشكم كله ..
أنتبهوا لكلامى فقولتلهم :
– العصاية اللى مع مارو خطيرة جدا وقوية جدا , أقوى من كل الكتب اللى على الأرض , وهيستدعى بيها جيش عظيم علشان يحاربكم هنا …
أيسر قطع كلامى وقال :
– قولتلهم ايه يازيجا تانى.؟!
رديت عليه وانا لسه ببصله بعتاب وقولت :
– قولتلهم على كل حاجة ياأيسر, علشان يعرفوا أنه صعب حد يخترقوكم .
تف فى الأرض وهو بيقولى :
– عيل خسيس !!
قولتله :
– تعالا أستحمل الضرب اللى أضربته وبعدين أحكم , وشاورت على وشى وقولت :
– انت مش شايف وشى عامل أزاى !! أتحداك يا أيسر تستحمل بوكس واحد من أيد حنوش , ده انا نجيت بأعجوبة , هربت من الدايرة اللى عاملنها وفضلت …
جوهر قطع كلامى وقالى :
– دايرة ؟!!
قولتله :
– ماهر عامل دايرة و أبطل جواها السحر بالعصاية اللى معاه , علشان يقطع عليكم الأشاره ومتعرفوش تتعقبوه , بس أنا أعرف مكانهم !!!
قالولى بصوت واحد :
– فين ؟
قولتلهم على المكان بالضبط , فأيسر بعت الخدمة بتاعته المكان علشان يتأكدوا من كلامى , وبصلى وقال
– جيش أيه اللى هيستدعوه ؟!!
قولتله :
كل الجن اللى حاربوا مع أبن القاف من أول مابدأ حرب الميجوانا ,عددهم يعدى ال300 الف , هيعملوا سحر عن طريق العصاية ودم أبن القاف , بس معرفتش التفاصيل ده كل اللى أعرفه .
جوهر بص لأيسر وقاله :
– هل ده ممكن يتعمل بالعصاية اللى معاه ؟!!
أيسر قاله وهو بيفكر :
– أنا شوفت العصاية اللى معاه عن قرب , ومفحصتهاش , بس أعتقد العصاية قوية جدا , حسيت بقوتها أول مادخلت الكهف عندهم …
أيسر قطع كلامة لما الخدمة اللى بعتها للدايرة رجعت , قالوله أنهم لاقوا فعلا دايرة مبطول فيها السحر بس مالقوش حد فيها .
جوهر بصلى وقال :
– عرفت خطة هجومهم ؟!!
قولتلهم :
– فيه أيه ياجدعان هو انا هحارب لوحدى !!, أكيد يعنى مش هيقولوا خطتهم قدامى , بس اللى حسيته أنهم هيعملوا زيكم ويعسكروا فى القطب الشمالى .
أيسر كان هيقول حاجة بس حس بصداع رهيب وبعدها وشه بدأ يورم ويحمر , فضل يكح وهو مخنوق ووقع على الأرض وهو بيترعش , جريت عليه وقولتله وانا بهزه :
– أيسر !!! أيسر !!
“نور”
خطة نوشة على قد ماكان فيها خيال على قد ماكانت عبقرية ,وكلنا كملنا عليها علشان تبقى خطة اقتحام كاملة .
أول حاجة عملناها نقلنا نوشة وسندس بره القطب الشمالى علشان يبقوا فى مكان امان .
خليت مارو ينقلهم شقتى القديمة (اللى حنوش سلمنى فيها الطرد من كام سنة ) و يروح يجيب أبرة السم المنوم اللى قالنا عليه واللى خلى مفعوله مركز بعد ما أستخلصه من ذبابة تسى تسى الفتاكة .
حضر مارو وفى أيده أبرة السم واداها لزيجا وبعتناه لثكنات الشياطين تانى , بس بعتناه متخرشم ….
زيجا كان بيجرى ناحية الثكنات كأنه بيهرب مننا .
الشياطين شافوه ونقلوه المعسكر ,أيسر وجوهر خرجوا من ثكناتهم فبدأنا تنفيذ الخطة .
مارو أطلق سهم فى اتجاه أيسر , فزيجا نط على أيسر علشان ينقذه من السهم وفى نفس الوقت شكه بالأبرة المسمومة .
رجعنا بسرعة عند دايرة تانية جنب المعسكر أو بمعنى أصح فوق الجبل اللى ورا المعسكر بالضبط بعد ما سيبنا الدايرة اللى كنا فيها .
كنا فوقيهم بالضبط فوق سطح الجبل الجليدى اللى محتمين فيه.
مكان أستحالة حد يفكر اننا فيه ,مكان أستحالة حد يعيش فيه , درجة الحرارة فوق الجبل قادرة تجمدك وتخليك عبارة عن مكعب ثلج , بس بفضل عصاية مارو كنا قاعدين فوق ومخففين هدومنا كمان !!
الواد مارو جرب تعزيمة على العصايا خلاها ,تخرج حرارة من غير نار !! زى الدفاية كانت مدفية كل الدايرة اللى أحنا فيها!! .
فضلنا مراقبين كل حركة بتدور فى المعسكر من فوق كأننا معاهم .
لحد ماشوفناهم بينقلوا أيسر بره المعسكر , فعرفنا أن كده أيسر وخدمته بره اللعبة وهيتلهوا فى أنهم يعالجوا أيسر وهسيبوا الحرب.
الأقتراح كان فى الأول خالص أننا نغتال أيسر , بس كانت هتبقى مشكلة كبيرة بعد كده , خاصة أن خدمة أيسر هتنضم للحرب علشان يتنقموا له , زى ماحصل قبل كده مع الساحر الافريقى اللى قتله نصير يوم الوليمة ….
فقررنا نبعدهم عن الحرب ونلهيهم فى علاج أيسر واللى أكيد هيعرف يعالج نفسه , بس بعد مانكون أحنا خلصنا على جوهر واللى معاه .
أول ما أيسر أتنقل بره المعسكر, أتنقلنا للمرحلة التانية من الخطة وهى الحصار .
فضلنا فترة بنراوغ جوهر علشان يفضل فى القطب الشمالى , كل شوية مارو يظهر فى مكان مختلف فى القطب ويرجع تانى , فجوهر يبعت كتيبة تتعقب مارو , يروحوا ويرجعوا فاضين .
فضلنا على كده لحد ما قدرنا نتواصل مع زيجا واللى
بلغنا بأهم معلومة فى المعسكر , وهى الوقت اللى بينام فيه جوهر ,أو بمعنى اصح الساعتين اللى بينامهم طول اليوم علشان ده الوقت اللى هننفذ فيه .
زيجا أدانا الأشارة …
وبدأنا خطة الحصار اللى قالتلنا عليها نوشة.
مارو حفر دايرة كبيرة حوالين الجبل والبحيرة اللى محاوطين معسكر الشياطين , و دخل جوه الدايرة ورفع عصايته فى السما و أبطل السحر فى المنطقة كلها عدا سحر العصاية, وطفى النار اللى مولعة بالسحر الأسود بتعزيمة بالعصاية فالدنيا بقت ضلمة كحل عليهم …
مارو رجع الجبل تانى بسرعة وحط العصابة على قميصى وهو بيتمتم بتعزيمات عشان يسمح بسحر القميص أنه يشتغل فى المنطقة وقالى :
– جرب كدا .. ومتقلقوش لو مشتغلش انا أقدر اقوم بالليله لوحدى .
نصير قرب منى عشان يحولنى لحيوان بيقدر يشوف فى الضلمة .. الخفاش.. فاتحولت.
بعدها كل حاجة حصلت بسرعة , زى الومضة .
مارو بيعرف يشوف فى الضلمة فجرى على الجانب اليمين اللى فيه مخازن التركيبات والأكل علشان يحرقها , فى نفس الوقت اللى نصير ركب فوقى وأنا خفاش وفى أيده شعلات نار وطيرنا فوق معسكر الشياطين .
الخفاش فى الأساس شبه أعمى وبيشوف عن طريق موجات صوتية بيصدرها وبتخبط ويرجعله تانى صدى صوتها على هيئة صورة , وده بالضبط اللى عملته .
أطلقت موجات صوتية كشفتلى المعسكر كله فى الضلمة كنت شايف المعسكر كله بوضوح كأننا فى عز النهار ,بس الآلوان كانت مختلفة , لون الجليد كنت شايفه بنفسجى , والسما لونها أحمر غامق !!!
كنت شايف المعسكر كله عبارة عن خريطة خيوطها متداخلة فى بعضها بس ملامحها واضحة .
حلقت فوق المخازن اللى على الشمال فنصير رمى شعل النار على المخازن ،ولعنا فى المخازن المتوزعة كلها فى نفس الوقت.
رجعنا بسرعة فوق الجبل انا ونصير ومارو , حضنا بعض كلنا و أحنا بنتفرج على مخازن الأكل والتركيبات وهى بتتحرق .
شوفنا جوهر بيخرج بره القبانى اللى كان نايم فيه وجرى ناحية المخازن علشان يلحقها بس مالحقهاش واتحرقت كلها باللى فيها .
فضلنا قاعدين فوق سطح الجبل وأحنا بنتفرج على جيش جوهر اللى حالته بتسوء يوم عن يوم من غير أكل أو شرب أو حتى نار وأضاءة يشوفوا بيها .
جوهر حاول يستخدم السحر علشان يخرج بره المأزق اللى هو فيه , بس فشل تماما , بسبب الدايرة اللى مارو محاوط بيها المعسكر .
جوهر أتزنق مابقاش عارف يرجع بجيشه ويسيب القطب الشمالى , خوفا من اننا نهاجمه فى السكة بالجيش اللى اوهمه زيجا اننا حضرناه بدم أبن القاف وعصاية مارو .
ده غير أن غروره ماسمحلوش ينسحب ففضل يستنى بالجيش وهو محمى بين التضاريس .
كنا بنراقب الشياطين وبنرصد حركاتهم وخدنا بالنا أن جيش جوهر تملكهم الجوع ووقت الجوع الدنيا بتتقلب.
كانوا بيشعلوا نار عادية عشان يتدفوا بيها
وبدأت تخرج مجموعات عشان تصطاد اكل بس كنا بنبوظ عليهم كل حاجة .
كنا بنصطاد اللى طالعين يصطادوا واحنا فوق الجبل , محدش طلع يصطاد ورجع تانى فخافوا يطلعوا و التضاريس اللى كانت بتحميهم بقت سجنهم.
مارو دايما كان بيطفى النار اللى بيعملوها بسحر العصاية حتى لو عاملين النار جوه القبانات .
كنا بنشوف زيجا بيبص فى السما ناحيتنا من غير ما حد ياخد باله ، كان ييشاور على بوقه علشان يقولنا :
جعان!!
مارو قابله مرة من غير ما حد ياخد باله واداله خزين اكل خباه فى القبانى بتاعه .
الشياطين هاجوا اكتر مع الجوع والبرد ونقص التركيبات الكيميائية واللى عملت عندهم حاله شبه الادمان وبدأو يتخانقوا مع بعض وتقوم بينهم وبين بعض مناوشات لدرجة ان فى منهم اللى قتلوا بعض وبدأو يأكلوا لحوم بعض من الجوع .
كنا بنراقب جوهر ولقيناه برضه هفتان وفقد السيطرة تماما على جيشه .
فقررنا ندخل فى المرحلة الثالثه , مرحلة التصفية ..
الموضوع بالنسبالنا كان بسيط جدا , الهجوم بدأ كالأتى ..
مارو ظهر فى معسكر الشياطين فى الظلام وتمتم بتعزيمات على العصاية فتحولت لقوس طويل مط وتره فظهرت فيه مجموعه اسهم من العدم .
حنوش وابن القاف نزلوا بسيوفهم من على الجبل واتسحبوا ناحية الشياطين اللى مكنوش شايفين حاجة خالص رغم الاضاءه الخافته اللى مصدرها النجوم واللى كان بيتحرك على ضوئها حنوش وابن القاف .
أتحركوا بهدوء وكانوا بيتواصلوا مع بعض بالاشارة .
دخلوا قبانات الشياطين ودبحوهم وهما نايمين ومفرهدين من الجوع
الشياطين خرجوا بره القبانات وحاولوا يتمركزوا استعدادا للحرب , بس كانوا متشتتين و بيخبطوا فى بعض .
فجيه دورى انا ونصير , هبطت من على الجبل وانا تنين ونصير راكب فوقيه .
وبدأت انفث النار على المعسكر كله وشفت زيجا وهو بيجرى بعيد عن ارض المعسكر .
نار التنين عملت اضاءه فى المكان واتصدموا لما لقونا محصرينهم من كل الاتجاهات .
مارو واقف فى ناحيه و بيصوب عليهم الاسهم ، حنوش وابن القاف قصاده من الناحية التانيه بيضرب بسيفه اى حد بيهرب من الاسهم وانا ونصير وراهم وبننفث عليهم النار.
مكنتش قدامهم غير انهم يجروا ناحية البحيرة المتجمدة .
جوهر كان بيحاول يلم جيشه اللى اتشتت ومكنش عارف يهجم على مين ولا مين , التنين اللى بيحرق ولا مارو اللى بيمطرهم بالاسهم ولا بن القاف وحنوش واللى بيصطادوا اى حد يهرب , فقرر انه يروح على مارو .
رفع سيفه وجرى على مارو , كان شكله هفتان وتحت عينه اسود من الجوع , هجم على مارو بسيفه فمارو تفادى ضربته بسهولة .
مارو شاله ورفعه وفضل يمطوحه ورماه على الجبل اتخبط ووقع , قام تانى وجرى ناحية مارو وهو بيتحول لافعى ضخمة .
فتح بوقه عشان يهجم على مارو فمارو تفاداه ,بس الافعى(جوهر) لف من ورا مارو و بدأ يلف بجسم الافعى حوالين جسمه بسرعة عشان يخنقه .
حنوش وبن القاف جريوا بسيوفهم عشان يهجموا على الافعى ويحرروا مارو .
عينى كانت على مارو بس كنت مشغول مع الشياطين اللى كنت بحاوطهم بنار التنين عشان يندفعوا ناحية البحيرة ويغرقوا فيها .
مارو سلت ايده من الافعى ومسك فى رقبتها وفضل يخنق فيها فى نفس الوقت اللى حنوش وبن القاف كانوا بيشرحوا فى جسم الافعى و لسه هيقطعوا رقبة الافعى ( جوهر ) اتفاجئنا بيه اختفى .
بعدها سمعنا صوت ايسر وهو بيهز ارجاء المكان و بيقول :
– انتوا كسبتوا المعركة دى .. بس الحرب لسه مبدأتش يا عيلة ناير .
- يتبع الفصل التالي اضغط على ( رواية ميراث نور ) اسم الرواية