رواية تاج كاملة بقلم ايمان شلبي عبر مدونة دليل الروايات
رواية تاج الفصل الاول 1
-مش ناوي تخطب بقي يابني عايزه البس فستان واعمل لولولولولي فرح
رد بأيموشن بيضحك :
-ما تلبسي هو انا حايشك!
-لا مانا مستنيه خطوبه اخويا حبيبي عشان البس
-يبقي هتستني كتير
-تنح
رفع حاجبه بأيموشن :
-الكلام ده ليا انا ؟
سندت ايدي علي السور وانا بسأله بجديه:
-لا بجد والله انت ليه لحد دلوقتي مفكرتش ترتبط
-عشان مش مستعد للخطوه دلوقتي
-والبنت المناسبه لسه مش موجوده
ابتسمت ابتسامه حزينه وانا برد بفويس و بنبره مخنوقه بالعياط :
-ربنا يرزقك ببنت الحلال
-امين يارب ويرزقك ياصغنن
-اهو اكتر كلمه بتعصبني كلمه صغنن دي
-الله ليه بس مانتي لسه صغننه
-نينينيني
رد بأيموشن بيضحك وانا كمان ضحكت
واخدت نفس عميق وانا ببص للسما وقلبي بيدق بشكل مُريب كالعاده لما بكلمه او اشوفه أو حتي اسمع صوته
-مش يلا ننام بقي عشان عندك بكره درس بدري
-ماشي
-تصبحي علي خير
-وانت من أهل الخير يارب
دخلت من البلكونه واتنهدت بحزن وانا بقفلها وبروح نحيه سريري
سندت راسي علي المخده وبصيت للسقف ودماغي عماله تودي وتجيب
عارفين ايه اصعب احساس ؟!
احساس انك مش عارف تحدد مشاعر الشخص اللي قدامك نحيتك عامله ازاي
ياتري اللي قدامك بيحبك وعايزك في حياته
او انت بالنسباله شخص بيسد بيه فراغ
ياترى هو بيحبك بس مستني الوقت المناسب عشان يعترف بمشاعره
ولا اللي في خيالك ده مجرد سراب !
كنت في حيره ما بين قلبي اللي عمره ما دق غير ليه
وعقلي اللي مش قادر حتي يفسر تصرفاته
كان شخص غامض
اوقات اشوف في عينيه نظره كلها اعجاب وانبهار
اوقات تانيه احس اني مش فارقه من اساسه
اوقات يفضل يحكي معايا بالساعات ويفضفض عن حياته وعن حب عمره اللي سابته بدون مقدمات
وأوقات يكون الصمت هو سيد المكان
اوقات بحس أني فارقه
اوقات تانيه بحس اني ولا حاجه
لكن بالرغم من حيرتي إلا أن في شيئ مقدرش اكذب علي نفسي فيه
وهو اني حبيته !
أمتي وازاي وليه
كانت كلها اسئله ملهاش اجابه بالنسبالي
يمكن عشان هو أول شخص دخل حياتي
من صُغري كنت رافضه فكره ان ولد يكلم بنت
كنت اشوف البنات قدامي تكلم شباب وتخرج وترتبط اشمئز منهم ومن تصرفاتهم
ازاي شويه اطفال عقلهم لسه منضجش يرتبطوا ويعيشوا حياه مش بتاعتهم
كنت عايشه سني الطبيعي
بلعب واتنطط وادرس واجتهد
مكانتش كلمه حب دي ممكن تيجي علي بالي في يوم !
لحد ما شوفته
وقتها كنت في أولي ثانوي تقريباً
كان راجع من السفر بعد ما كمل اربع سنين دراسه في امريكا
وقتها عمي عزمنا عنده بمناسبه رجوعه
بالرغم أنها مش المره الاولي اللي هشوفه فيها لكن كنت متوتره اليوم ده بشكل ميتوصفش
افتكر اني وقفت قدام الدولاب لمده ساعه محتاره اختار لبس ايه للعزومه
لبست احلي طقم عندي
الطقم اللي مش بلبسه غير لو عندي مناسبه
اول ما شوفته تنحت
كان وسيم بشكل يجنن
احلي من زمان بكتييير
اخر مره شوفته فيها كنت في أولي اعدادي تقريباً!
وفي الحقيقه مكنتش بطيقه وانا صغيره
كان شخص غامض وهادي زياده عن اللزوم
مكنتش بتعامل معاه بصراحه
معرفش ليه اول ما شوفته قلبي دق بطريقه مرعبه
معدتي وجعتني كالعاده لما بتوتر
اول ما قرب وسلم عليا حسيت ج*سمي اتكه”رب
اليوم ده كان شخص مختلف تماماً
شخص وسيم ،لطيف ،جنتل ،عاقل ،مثقف
شخص اي بنت تتمناه وخاصه انا
نوح بالنسبالي كان هو فارس احلامي اللي من صغري بحلم بيه واشوفه في الحواديت والروايات أو حتى الافلام
فات يوم ورا التاني ورا الثالث ومن وقتها وهو شاغل تفكيري
كل ما افتكره احس قلبي عايز يجري نحيته ويقوله أنه مشدود ليه بشكل ميتوصفش
كان الاكونت بتاعه بيتعرض عليا كل يوم بالتقريب
كنت ادخل أفتش فيه بالساعات !
اشوف صوره اللي بتخطف قلبي وعقلي
بوستاته اللي تكاد تكون م*عدومه من وقت ما عمل الاكونت
هزاره مع اصحابه
كنت اقف قدام قائمه ” اضافه صديق” محتاره
اعمل ادد أو لا ؟؟
كنت كل مره بخرج من غير ما اعمل لحد ما في يوم قررت اعمل كده
جايز تكون خطوه عشان يحس بقلبي اللي دايب فيه من زمان
اول ما عملت عمل قبول ودخل كلمني فوراً
وقتها ابتسمت بأنتصار وقلبي بيدق برهبه وانا برد علي أول ماسدج بأيد بتترعش
ومن وقتها مبطلناش كلام وكأنه كان مستني
فاتت شهور وانا وهو بنتقرب من بعض لحد ما وصلت لثالثه ثانوي
او بالمعني الأصح انا اللي من غير ما احس كنت بتقرب منه
الحب دخل قلبي من غير استأذان!
لكن مقدرش احدد إن كان هو حاسس بأي مشاعر من نحيتي ولا ده مجرد خيال صوره عقلي اللي مبيفكرش غير فيه
حاولت اقتحم قلبه زي ما اقتحم قلبي من اول يوم رجع من السفر
بس للاسف كل محاولاتي فشلت
اتنهدت تنهيده حزينه وغمضت عيني ونمت …
تاني يوم الصبح صحيت علي صوت المنبه ،لبست ونزلت عشان اروح الدرس
كنت في أواخر ثالثه ثانوي وحرفياً طاقتي صفر ،لكن كنت مضطره اكمل عشان اوصل لحلمي
-صباح الخير
الماسدج المعتاده اللي بيبعتهالي علي الواتس اول ما بيصحي من النوم
-صباح النور
رديت عليه بحزن وقفلت الشات وبدأت اركز في الدرس
خلص الدرس وخرجت وانا جوايا لهفه افتح الواتس عشان اتكلم معاه
-ايه الاخبار
اول ما شوفت الماسدج ابتسمت في الخفاء ورديت وقلبي بيدق
-تمام الحمد لله انت ايه اخبارك ؟
-تمام
بدأنا نفتح في مواضيع ملهاش لازمه زي كل يوم لحد ما وصلت البيت
-يابنتي قومي ذاكري يخربيت النت علي التليفونات علي اللي اخترعها
رفعت راسي من علي الفون وانا ببص لماما بضيق
-في ايه ياماما برتاح شويه لسه جايه من الدرس
زعقتلي بعصبيه :
-بترتاحي بقالك ساعتين ؟
قومي ياختي اتنيلي ذاكري مبقاش في وقت للمرقعه دي خلاص
نفخت بضيق وقفلت الفون ورزعته علي السرير ودخلت عشان اذاكر
فات ساعتين ذاكرت فيهم شويه وطاقتي انعدمت
اتنهدت بتعب وانا بروح نحيه السرير وباخد الفون وبفتحه
اول ما فتحت كان باعت ماسدج
-فينك مختفيه ليه
اول ما شوفتها فرحت
حسيت أني فارقه وأنه بيلاحظ غيابي !
-معلش كنت بذاكر عندي مذاكره كتير جدا
-ولا يهمك ربنا يقويكي يارب
-يارب اللهم امين
وفي يوم كنت بتكلم معاه بهزر كالعاده يمكن يلمح بأي حاجه لكنه كان بجم وحويط ابن اللذينه
-اخبار المعجبين ايه
ضحك ورد بهزار:
-كويسين الحمد لله بيسلموا عليكي
-اوووي بقي ها الخطوبه أمتي
-ان شاء الله يوم التلات بعد صلاه الجمعه
-ههه عسل عسل
-عارف الله يخليكي يارب
ضحكت وكملنا كلام لحد بليل
مشكلته الوحيده غموضه
وفي الحقيقه كنت بضيع وقت كبير جدا وبهمل في مذاكرتي
كنت حاسه ان حياتي بقت واقفه عليه
لو يوم متكلمناش بحس أن في حاجه نقصاني
بدأت اتعلق بيه بشكل مريب
في بدايه تعارفنا كنت خايفه احبه
واللي كنت خايفه منه حصل
حبيته وبقيت بتمناه من ربنا كل يوم وكل دقيقه وكل ثانيه
لحد ما في يوم
كنت مضغوطه جدا وبعيط طول الوقت من ضغط الدروس والمذاكره المتراكمة عليا
كان يوم عيد ميلاده
16/3/2023
قبلها بيوم كلمته وبعتله ماسدج طويله عريضه كان جواها تلميحات كتير مقدرش احدد إن كان حسها او لا !
-مالك ياتاج
-مخنوقه ياماما مخنوقه اوي
قعدت جنبي ومسكت ايدي وهي بتبتسم :
-طب قومي البسي وتعالي نخرج شويه انا وانتي واختك
-بجد ؟
-اه يلا
-اشطا
قومت لبست ونزلنا روحنا قعدنا في كافيه علي البحر وقعدنا نتكلم في مواضيع كتير جدا
وفي وسط كلامنا لقيت ماما بتقولي بهزار
-شكلك وقعتي ولا حدش سمي عليكي
ضحكت بكسوف وانا بحط وشي في الأرض :
-الله بقي متكسفنيش ياستي
-امممم يبقي وقعتي
اتنهدت وبصيتلها هي واختي وانا برد بأحراج :
-بصراحه كده ا انا اتعلقت اوي بنوح
-نوح شاب كويس ياتاج وانا معنديش مشكله الحب مش عيب ولا حرام لكن بحدود
-اكيد طبعا
-بصي ياتاج انا مش عايزه الحب ده يآثر علي دراستك الحب حاجه ودراستك حاجه تانيه
-لا طبعا اكيد مش هيآثر و….
-لا هو مآثر انا مبقتش اشوفك فاتحه كتاب يا تاج انتي ليل مع نهار بقيتي ماسكه الفون وبتتكلمي مع نوح
مش معني اني سمحتلك تتكلمي معاه انك تعملي في دراستك بالشكل ده
دراستك اهم من اي حاجه
بصت اختي ورايا بأستغراب :
-الله هو مش ده نوح؟؟
لفيت بلهفه لقيت واحد قاعد بظهره ومعاه بنت …
بلعت ريقي وانا برد بصوت بيترعش :
-ل لا ت تقريباً حد شبهه و….
ملحقتش اكمل جملتي لقيته قام وقف هو والبنت ولف وشه
وقتها اكتشفت أن هو نوح !
لفيت بسرعه عشان ميشوفنيش وانا ببص قدامي بصدمه و……
- يتبع الفصل التالي اضغط على ( رواية تاج ) اسم الرواية