رواية اسرار قدس الفصل الواحد و العشرون 21 - بقلم زينب ماجد

  رواية اسرار قدس كاملة بقلم زينب ماجد عبر مدونة دليل الروايات

 رواية اسرار قدس الفصل الواحد و العشرون 21

 

تصيح الحاجة ومنجدتنا على ابو راح يكضبون ريسان

بداخلي فرحت .. بلكي الله يكضبوه ويجتلوه مثل ما الامريكان جتلوا اخوي مروان

الهوسة برا

ادحك عليهم .. فد واني واكفة شو جعت ؟

دخلت والهوسة عالكة برا ناس تصيح ناس تلطم ناس تبجي

اني فتحت الجدر خذيت من مركة التبسي بماعون وجريت كرصة خبز وكعدت بالكاع واقمس

فاتت عفاف : يولي صدك تحجين ، ريسان شرد من الشرطة وانت جاية تعلفين

– عجل يابه جعت شسوي

– ابرد ما بكلبج يولي احر ما بكلوبنا ، ضاربة الدنيا بعرض الحايط وكاعدة تغمسين بالتبسي

ما رديت عليها .. استمريت اكل وادحك من الباب تا المحهم واسمع شيصير وياهم ..

دحكت عفاف ع التبسي : هسه لو عدنا ثلاجة ونضمه هذا التبسي ياهو البيه حيل يطبخ باجر

– حنكة صدك لحم الضمته الحجية وينو

– ضمته عد الجيران يم صاحبتها ام رسول نودي يمها ؟

– ياريت خاطر باجر ما نطبخ

.والله تعبنا كبل اميرة وعواطف شايلات من الشغل هسه بس اني وياج منلحك لشي زين اميرة ليمتى تضل حزنانة على ابنها واحنا نخدم ؟

– شمدريني شو اني ما انكسر كلبي عليها من مات ابنها

– يولي شينكسر هي التخاف على ابنها تهده وتروح وشفتيها حطتني كمش ياهو الجاي تكله امنته يم عفاف وصعدت وهي عافته الجلبه انت شردتي واني حايرة بروحي وجهالي والجيلات رشك فوكنا وتريدني احتار ابزرها

– اني احس كلبي صاير اسود

لا جاي انقهر على سراب لا على اميرة لا على ريسان

-كلهم يمثلون يولي ياهو الينقهر على الثاني كلمن يصيح يا روحي بس كدام الناس عو شوفوني واني وياج صايرني سبيل انتهينا من الشغل والله ، اروح افرش الجهالي اخيرلي خلصي الاكل وشوفيلج واحد يضم الاكل عد ام رسول

مشت وخلتني

دخلت اميرة منكبة ولابسة اسود وتمشي محني ظهرها وتحجي مبحوح صوتها : ييمه استرنا ييمه

دحكت بيه جاي اكل حجت بصوت محبوح : جاي تاكلين واحنا هاذ حالنا ما عدج مستحى ما تشعرين شحالج وانت تاكلين والدنيا مكلوبه

– ما تعشيت التهيت بالناس

-كليتي سم وزغنبوت كون ابني جوا التراب وانتن لا بعينجن ولا بحاجبجن متشفيات بيه كل وحدة منجن تصيح حوبتي

– فد اني ما حجيت ولا عيرت احد

– الله يشوفجن الشفته بجاه كلمن عده جاه حتى تعرفن بالجاي امر بيه شنهو ابني جوا التراب وانت تعلفين ياخذجن الله ولا يراويني وجوهجن

دحكت عليها الناس تصيح برا وهي جاية تتكاون وياي كون اكل ، حجيت واني اقمس : ما طول بيج حيل تكاونين عجل يرجع الشقل مالنا على ٣ وانت عليج البيت باجر تنظفي

شو حجيت وهاي فزت علي : انتن ما تحسن بيه الله لا يوفقجن انهد حيلي على ابني وانتن تتشمتن بيه وتريدني اشتغل حيلي راح على ابني ومحد بيجن توكف وياي كلاص ماي ما تطني وتريدني اشتغل فوك مصيبتيييي

هرجتنا هرج

جو من كرابتهم على حسها يصيحون شكو

وهي كامت تولول وتشكي حالها وتشكي علينا وتصيح ضرايري يدكن على صوابي ابني تحت التراب وتكف بعيني تكلي نظفي تعبنا منج

فاتت عفاف تريد ماي لجهالها سمعتها تشكي ، وكفت بعينها : وشني ابنج تحت التراب نكعد نخدمج احنا هم لا بيها ولا عليها تفشخت روسنا واعظامنا تكسرت من طكت المكوار وحيلنا بايد من المصايب التكع فوكنا وهالتشوفينا ليل نهار نفر جنه مصرع .. كافي خلص عزا ابنج كومي ويانا نضل نخدم بيج ونحط الاكل جدامج على يا مال

كامت تتحاجى وياها وحدة من كرابتها وتكللها : حرام عجل حت لو ضرتج كدري حزنها وكسرتها اعلى ابنها الشغل ما يموت احد عيب توكفين وياها على شغل وهي بهالحال كولن يا الله شلون الله يرحمنا واحنا ما نرحم احد

قدس: عجل من ماتت عواطف عليش ما حزنت شو احنا جنه نبجي وهي تقني الجو بديع وتضحك علينا وتكفخ فوك راس سراب ونور تريدهن يكضن شقلها ، من تسوي هي مو حرام واحنا من نشيل عنها ٣ ايام ونريدها تكوم تعاونه نطلع ما عدنا رحم

جاي احجي دحكت خطاب يمد ايده بالبرميل ياخذ ماي موجود

ردت عفاف : الله ما يطك بحجار

ومشت تترس ماي

واميرة تنوح وتكلهن : جذابات وبخت الله عواطف حسبة اخيتي بجيت عليها ليما خويت اني ما ابجي عليها اني بس ضيم كلبي ومصيبتي على ابني

وحطت ربطتها على وجها وكامت تهز اجتافها من البجى

حجت المرة : والله بعد ما ادري شو انتن واحد ماكل الثاني ما ينعرف صدكجن من جذبجن

اجت مرت اخو اميرة خذتها للهول ومشن كلهن كعدن

اني بعدني اقمس ، اجا خطاب كمبص وجر الخبزة مني وحجه : يولي هم صايرة اسطة بسوالف الصراير وشادة حيلج تتكاونين

– عجل شني متنا والله ، راسي مفشوخ رجلي اعرج عليها مورمة جسمي مزورك من ابو وهب ومكيار الهدن علينا .. تعبت واميرة

احجي واشر بيدي وهو يقمس بالماعون يتبسم

دحكت بيه ، دفعته : انت شعدك يمي لا يشوفك احد دكوم

رجع ليورا من الدفعه وكضب بالرف : هاي دفعتيني

– سراب منيشنتك بناظور هسه تشوفك كاعد وتروح تفتن للحاجة

– ليش سراب شعدها وياي

– انت اعرف

كمت منه وهو ضل كاعد ياكل ردت اشيل الگدر اندرتلو : اصبلك بعد ؟

– اي والله ، ما بيها لحم

– هي امك تخلي لحم ضامتو بثلاجة بيت ام رسول

-المن ضامته

– عجل ماتلنا بعد واحد هم نروح نشتري لحم قير كون متحضرين .

اندار يضحك : يولي انت هم صايرة تصنفين

– من ضيم امك كطعت كلوبنا والله كبل جنت يومية اروح للمراح الاكي الدجاج مبيض واذا ما مبيضة اكضبها اعصرها حيلي تذبلي البيضة بحضني واتريك ٤ بيضات وحدي شو جيت هين الشعب العراقي كلو ابيضتين ولو تكرمت امك تطينا الثالثة

ضحك : من تشتهين شي بس كليلي اشوي كلبي واحطه كبالج

تبسمت : خطاب لا تحاجيني هيج

سكت ، تنهدت وشلت الجدر

شكثر جنت مهدودة واكاون على الشقل وشايلة همه زعم تعبت فد بكلمتين احس روحي صرت خفيفة وكلبي علك

طلعت واني شايلة الجدر وامشي ما منتبهه للهوسة

صاحت الحاجة : وين مولية بالگدر يولي

– يا گدر

– ول صكعة التصكعج يولي .. هذا البيدج شنهووو

– گدر

– انومه براسج وافتك منج هرجتنا هرجة وانت حايرة بالگدر

– عفاف كالت خل نضمه ابيت ام رسول باجر نحمي ع القدا

– شو جيبي

جرت الجدر وهي تولول وادحك بالمركة وتميلها منا وتردها منا .. خاف بيها لحماية ، اندارتلي : امشي انا اضمها

عفتها ورديت لكيت سراب واكفة وخطاب جاي يكرم من الاكل ، دنجت شلت الماعون مصته ووشلته ومشيت لقرفتي لكيت سراب ونور فارشات بيها وفد نور متمددة

ما حجيت ، تمددت ارتاح

شوية واجت سراب : عمتي تريدج

– شتريد بعد اريد انام تعبت

– مدري روحي شوفيها

– باجر اشوفها عود

– تريدج اكلج

– ما بيه حيل جسمي يوجعني العده شي يجي يسعلني ما اني الاروح

اندرت لفيت راسي وجاي انام فاتت الحاجة دنجت عليه وشلعتلها وذرة من زندي فزيت بسرعة : اااااااي

– ووجعاي كون وجعاي من اصيحج عليش ما تجين

– شني والله تعبت من الفجر اشتقل كاااافي

– اصفكج على وجهج واعميج

اندارت على نور كالتلها : روحي غاد

كعدت من فراشي تعدلت ونور طلعت

ادحك الها بتوتر ، اندارت : صدك امس سراب كضبتج ويا خطاب خاتلة وياه بكفا الباب

– لا فد راد يسالني ليش ابجي

– وشكتيله

– كتله من المصايب الجاي تكع

– ما حجيتيله على المصيبة البطنج

دنجت : لا

– لو سمعت عده خبر وابخت الله لا اكل اريسان واخليه ينحر ركبتج ، ولو شفتج صافه ويا خطاب هذا الله كاتبه عليج

– ماشي

-احسبي حسابج نكف هالهوسة ونشوف صرفة للي ابطنج يكع ويموت ما يضل هالجاهل ما يجي للدنيا لو على كص اركبتي ما يصير ، لا ابالج تخلي وتعلكي براس ريسان وتشبجين لحية بلحية من ورا الدود مالج من نمتي تحت رجال مو رجالج يالنكسة .

سكتت وهي دفعتني وكامت

كل ما اتعب واحاول ابعد روحي من التفكير باللي ابطني والهي بمصايب قيري تذكرني بمصيبتي المالها حل ..

بعدني صافنة رجعت سراب تتمدد بفراشها

حجيت : قرفة امجن مو فارقة وحت قرفة الحجية عليش مجابلتني ؟

– ونايمة بغرفتة الخلفج غرفة ابوي وحتى جانت غرفتنا

– اكلج انت شبيج وياي شكلب حالج ترا تريدين خطاب ما كاضبتو اني ولا مانعتج .. تروحين تفتنين يم الحجية عليه شتريدين مني

– والله مثل ما كتلتن امي فلا اخليجن ترتاحن

– واني ياهو مالتي بجتلة امج جاي تفريها عليّ ذيج اميرة وروحي ذبي حيلج عليها ترا البية كافيني

– كلجن نسوان ابوي والله فلا اخلي وحدة منجن

– اي خوش عجل اطلعي من قرفتي خل انام

– انام وين ما يعجبني افتهمتي ما عاجبج انت انكلعي

– لا والله ما انكلع الحاجة حاطتجن هين خاطر تراقبني اني عرف

– اي تعرفين روحج مو خوش

ضليت ادحك عليه

ما بيه حيل اتكاون وياها وامها توها ميتة حاكدة علينا كنه

جريت الجرجف وتقطيت انام ، ذبيت روحي مثل الميتة من التعب .

بالليل هم مناطرين شنهو اليصير ريسان وخايفين لا تكضبوا الشرطة ، شو ما يحسون ب١ باليل الا وريسان داش عليهم

تلكته عفاف والحاجة واميرة كاعدة

كاللهم : رحت تعشيت يم زلمة صاحبي وكلت لليل اجي لهين ما عليه.

من متطمنين عليه والكل موجود سعل عني كالوله ( نايمة )

اجا لقرفتي فتح الباب سراب بعدها كاعدة فد اني ونور بسابع حلم ، من لاكي البنات يمي ، ساد الباب ورايح لقرفة عفاف نايم .

ثاني يوم من قبشة كعدت جاي اخبز هو كعد وكض على راسي : شجاي تسوين

– انت اجيت شو ما ادري

– امس بالليل اجيت ولكيتج نايمة انت والبنات ، كومي صبيلي الماي خل اغسل

كام ليف روحه واني اصبله الماي

كمل كال : بسرعة سويلي ريوك خل اطلع كبل لا يطلع الصبح

طكيتله بيضتين ورحت جبتله الخبز الضال من امس كلاه وراد يطلع كال : اني رايح للاردن اسبوعين شهر وارد كلي لحاجة وبلغيها

– خوش

طلع ، اجت اميرة كوة تفتح عيونها مورمة : وين راح ريسان ؟

– يكول للاردن ما اجي اسبوعين شهر

– عجل والزلمة الجتلو امس

– ما ادري عنه

– هم هو يشرد واحنا النكع بيها

– مدري

– اني اروح لاهلي لا الي غرض بيكم ولا بهوستكم عسى ناركم تاكل حطبكم

عافتني ومشت واني ذبيت البتيتة ع النار تنسلك وطلعت اقسل الكراج ، دحكت قرفة خطاب ما هو مدري يمتى طالع لشقله خلصت ورجعت شنكت العجين وطلعت اخبز ..، اجت الحاجة ادحك على خبزي وتكلب بيه : ريسان كعد

– كال طالع للاردن عده شقل يرد بعد شهر يمكن اسبوعين

– عجل وخطارنا الرايح والجاي ياهو اليكف فاتحة ابنه ما وكف بيها لا فاتحة مرته كلها على خطاب شنهي ابتلى خو ما ابتلى

– ما ادري

– بس زين ما طوله ما موجود نخلص شغلتج ونفتك من البطنج خاطر لا يسال ولا يدري بشي

جاي تحجي وياي وما تحس الا صياح سراب بكل حيلها

هدت من ايدها وركضت ، اني صليت اخبز ، كمت حتى مت تصير هوسة وصياح ما افز اكول ياهو مالتي اهم شي ابعد روحي هم كوناتهم ما تفض واحد ياكل باللاخ

خلصت الخبز ودخلته بالهول

لكيت سراب جاتلها وهب داكها دك

رحت للمطبخ سالت عفاف كالت : يولي ذوله ما تخلص مشاكلهم سراب غالطة على اميرة وهي جاي تغسل واميرة راحت ندهتلها وهب كام كتلها خل نكضي شغلنا

صبينا الريوك وسراب تبجي وتشكي للحاجة

والحاجة ساكتة من الاثنين عن اميرة وعن سراب وفد تحجي على وهب تكله : سوالف النسوان لا تحط روحك بيها حاجيني وانا احل امرهن

ووهب يرادد ويصيح بالبيت

بعدنا بهالهوسة اجو ناس كرابتهم يعزون

ما لحكنا حتى نتريك سوينا لفات للجهال ونحن ع الواكف

هوسة وناس بعدها تجي

وعمهم الجبير اجا يستفسر عن ابو وهب لان اهل عواطف مجتول منهم واحد ومتصوبين اثنين ورايدين يهدون والناس موكفتهم من كون طالت وماتوا هواي .. راد فد ابو وهب خاطر يكعدون ويفصلون بس ابو وهب ما هو .. احتاروا شلون يحلون الموضوع

اخيرها عمهم شال ايده وبلغ الحاجة كاللها : انا راح اكتب وثيقة بابو وهب عجل نحن النكع بيها ونفصل وهو ما يدري عن هوى داره لا وكف بعزى ابنه لا بثاره بس احنا نجاتل شنهي ما رايدين ولدنا

كتلهم ثاركم تاخذوا من ابو وهب واحنا عمامه وعشيرته متنازلين بدمه .. بس ما نرضى تهدون على البيت عجل بس حريم وجهال وولده زغار ما يتفاصلون وخطاب زلمة غريب مو من عشيرته يصير ابن اخته وحتى تبرى من خاله وكال اني ما اشيل اثم خالي حكم من ريسان تاخذوا

هدت الثارت وبعد محد جا ودك بابنا

وحت الخطار خف باليوم كام لو واحد يدك الباب لو ما يجي احد ، رجعنا لايامنا العادية

نحن الضراير حياتنا شقل وكوان ونوم

وخطاب ياخذه الفجر ويرده العصر

سراب ونور هن واميرة ضراير اكثر من عدنا اني وعفاف مرات مالن خلك كوان ونتعدى الحجي ويا اميرة فد سراب شايلة علينا كلنا واميرة حاقدة جيف ابنها ميت

الحاجة رادت تفك من اميرة وكوانها ويا سراب

حجت ويا خطاب وكالتله : عدي سالفة وياك

عد ما حجت اني جنت بالمطبخ اسمعها ، كال الها : خير ؟

– سالفة تفيدك

– والله يايمة اشك تجيني فايدة منج

– عدوتك انا يول

– والله لو عدوتي ما تسوين سواياج وياي

– وشنهي سوايتي ؟

– هسه عوفي هاي واحجيلي شنهو الرايدته

– ليمتى تضل هيج

– شلون هيج

– مفرد وكارص بغرفتك

– وشنهو الاسوي عكب سوايتكم وياي

– انا رايدتلك الخير

– وشنهو الرايدته

– رايدة ازوجك

– ما رايد اتزوج

– والغرفة البنيتها فوك

– ما عاد لي نفس بيها

– ليش مالك ، بت خالك حلوة وما ناكصها شي وتحبك

– بت خالي ياهي

– سراب

– سراب تحبني

– اي تحبك

– يمتى حبتني ذاك اليوم تحب اخوي

– هذا حجي مو تمام البت رايدتك وراضية بيك

– دحجي يمه هالجلمة حجيتيها مرت اللخ لا تسمعيها الي

-عجل….. قاطعي

-اسمعي اسمعي … انا ما راح اتزوج غير قدس

من حجه هالكلمة نفض كلبي

سكتت هي شوية وردت حجت : يول انت مجنون لو رايد تجنني

– اعتبريني الاثنين مو انا الاغم الينوخذ حكه ويسكت

– وشنهو الرايدة تاخذ مرت خالك

– ما راح تضل بذمته

– خطاب يمه جوز من حجيك هاذ ولا توجع كلبي

– انا جايز من الحجي بس انت الردتي تحجيني وياي وعرفتي جوابي

-تهد بت خالك الرايدتك لجل وحدة بت شارع

– بت خالي جانت تحب اخوي لا تضنين بيوم احطها على بالي .. السكنت كلب اخوي ما تسكني حت لو هي نست انا ما انسى ..

تصوري يرد ويلكاني ماخذ الجان يحبها ؟

– اخيك ما يرد

– اذا انت ام وايس كلبج منه انا كلبي ما يايس من ردة اخوي ما طوله بيه روح

– لا تحط اخوك حجة لهالفاينة جاي تكولها

– هاي مو فاينة يمة بت عاشكها وجمعت الفلس فوك الفلس خاطر اكون روحي واشتريها لروحي ويجي خالي على غفلة ياخذها مني ويحطها كبالي وما يريدني اكطفها

– تكطفها شنهي المرة مرت خالك

– ولو ضل خالي

– رايد تموت خالك

– اوعدج ما ادمر ايدي بدمه

– شنهو الناويله يخطاب

– السوالف التظل بكلبك تتنفذ فخلي الناويله بگلبي .

الحاجة انجت من سمعت حجيه ونيته

كامت ادك على راسه ، ضنت خطاب جاز مني ، فد عرفت هو ما جايز كامت تلوب

عافها وكام وهي اجتني ترعد : اليوم تنزلين البطنج

-وشلون انزله

– تجتلينه تجتلين روحج البطنج ينزل اليوم ولو ما نزل يول اهد البيت فوكج ادفنج وانت حية احركج حركة عواطف واوج بيج النار يولي ما اخليج ما اخليج

ولي يمصكوعة شلاعبة براسه

شحاجية وخليتي يردلج

– ما حاجيتو بشي

ندستني حيل وكرصتني : يولي لا ما خليتج بندامه اعلى امرج ما اطلع ام خطاب ولا ناكلته ابطني يولي لاعبة بعكل ابني وانت اعلى ذمة اخوي ول ما خفتي ربج ما استحيتي على دمج ما عرفتي التربية ما تعلمتي الحرام

– اني ما حجيتلو شي ولا حاجيته هو الحجه وياي

– حضري روحج باجر نروح للجدة ولو شردتي لو ما رضيتي تروحين الا اكصبج

– فد تسويلي بنج

– تسوي كوا*** يم الزلم

عافتني ومشت

واليوم كله تتحسبلي وتهددني

ساعة اكصبج ، ساعة اجتلج ، ساعة تدعي عليه وعلى امي .

سراب واختها ينامن بقرفتي

عرفت الحجية حاطتهن يراقبني خاف يجيلي خطاب لو اشوفه بالليل يحجلها

سراب على دهلة ما عادت اطيكني ولا تكابلني

ساعة ووكت هي والحجية كاعدات جوا تعبي بروسهن علي ..

ثاني يوم الصبح .. كعدت من قبشة

فد كلبي ناقزني .. خايفة من الحجية حيل

مستعدة تجتلني لو ما رضيت اروح وياها

كضيت الشقل كالت : حضري روحج يلا خاطر نروح

– فدوة فد لا بدون بنج

خزرتني

ضليت واكفة .. صاحت : امشييي

فد صاحت عليه .. خطاب دخل الهول

الحاجة ما حسبالها هو موجود ، حجه : شكو

– انت شني ما عدك شغل شو كاعد اليوم

– جمعة اليوم

– ما راح تطلع

يدحك بعيوني ما جاوبها ، رد سال : شكو

– مالك غرض ، عدها سالفة مال نسوان متوجعة ورايدة اخذها للدكتور

– اي زين انا اوصلكم

– لا شتوصلنا ، احنا نروح منا

– وعليش تفرفرين بالسيارات بهالحر اني اخذكم

— لا جريبة ما يعتاز نفرفر

– عجل اخذكم اوصلكم واتانيكم لما تكملون اردكم ما عدي شي

سكتت …

ندستني : انزعي ما نروح

كلبي يخفك من الخوف

اريد اخلص من اللي ابطني فد اخاف اتوجع

حايرة بامري والحجية تفتر عليه .. تريد بس خطاب يفك خاطر تاخذني

خطاب كعد فد كعدة عد ما شافني بهالمنظر

ونحن بهالحال ما نحس الا ابو وهب مثل طب .. ومستعجل : يلا يلا يلا

صرخت الحجية : شكو

– لمن شعدجن بسرعة وكومن

– عليش ؟

– ما عدي وكت ، كومن بسررررعة

انخبصنا واحد ينطك بالاخر ما نعرف شنهو الموضوع .. الحاجة تصيح : شنحضر ؟

– اخذن علاكة اهدوم الجن واصعدن بالشاحنة

– يا شاحنة

– سليمة ما ضل وكت … بسرعة اكلج

كل وحدة بينا لمت هدوم بعلاكة بسرعة وطلعنا وهو يوصي عفاف ؛ خبز طحين شعدج جيبي

وهو يصيح على وهب وولده يشيلون كواني الطحين والتمن …

صعدوا كلشي بلحظة ومشينا نريد نطلع ومحد بينا مفتهم السالفة شنهو .. ابو وهب كال ما ارد بشهر ما صارله اسبوع ورد

ندحك شاحنة جبيرة

مفتوح باب واحد منها ، صعدنا بيها

الشاحنة صايرة مثل القرفة كلنا بعبينا صعدنا

والحاجة تكلو : شنهو الراح يصير ابني هين

كال الها : ابنج لو رايد روحه خل يجي ويانا

– نزلت تركض لوهاب تتوسل بيه يمشي وذاك معاند يريد يعرف شنهو ورا هرجة خالو هاي

رضت وصعدت ويا وانطلقت السيارتين من بيت ابو وهب طلعت بالظهرية الحمرة .. باب الشاحنة مقفول وتحس كاعد بنص صوبة انصلبنا صلب من الحر

وكفت الشاحنة وفتح الباب كال نزلو

نززلنا من الشاحنة ، ادحك : هذا بيت الجول مالنا !؟

صاح : دخلوا هين بساع

صف سيارتوا خطاب ونزلت الحاجة وخطاب مستقرب ، بعدني جاي ادحك بخطاب واشوف وجهه شلون معبس وهو رايد يفتهم شصاير

طلعت امي من الدار وهي تصيح : كل الهلا تفضلوا الدار دار اهلها

– امي !!؟

عرفت كلبي عليش نقزني

كلبي حس هكو مصيبة راح تصير …..

 

• يتبع الفصل التالي اضغط على ( رواية اسرار قدس ) اسم الرواية