رواية اسرار قدس الفصل السادس و العشرون و الاخير - بقلم زينب ماجد

   رواية اسرار قدس كاملة بقلم زينب ماجد عبر مدونة دليل الروايات

 رواية اسرار قدس الفصل السادس و العشرون و الاخير

ما مرتاح

الحـزن نفس الحـزن.. و الجـاي نفس الراح

لـ كاظم اسماعيل الكاطع

وسام : الجاهل غاد جوا مو بيدي اطلعه

– انت وسام لو ردتي اطلعين الحية من زاغورها يعصى عليج جاهل بكاروكة

-ولو كضبوني وانا اطلعه

– يمج انت تخيري ابنج لو ابن قدس ، ياهو الاعز عدج

حجاه وسد التليفون ظلت تناظر .. قدس نايمة بعدها ما فاكةً زارات عمليتها .. والجاهل بالخدج

اتصلت بابنها يوسف .. ماهو

ردت اتصلت بالاخر كاللها : يمه يوسف اجاكم ليغاد كال اشوف امي واجي .. ما ادري عنه

تسودنت من عرفت ابنها جريب من ابو وهب

ضلت محتارة شلون تطلع الجاهل وتخلص ابنها من ادين ريسان …

وكت ما شافت ماكو مهرب من امر ريسان ..

قررت تنفذ رادته … كامت تراقب قدس وتراقب جية خطاب ..

وتراقب حركة الممرضين شوكت يكعدون شوكت يفترون.

جا خطاب هي جانت تناظر الممر : بشري

– الحال نفسه

– الدكتور كالي الجاهل ما يعيش

-اخيرله يموت شعده يجي لهالدنيا بوجه ما مكبول

– امر الله مو احنا النرضى بخلكته لو نرفضها اذا كاتبه علينا نرضى بالمقسوم بس قدس راح تتأذى جثير حيل تعلكت روحها بهالجاهل

– العمر جدامها وتسوي غيره

– الشالته كل هالشهرر وتعبت بيه هالتعب ما تفكر بغيره تضل ام

تبسمت واندارت ادحك على قدس : اي يا عطا تجي وتشوف بتك الهديتها .. كبرت وصارت ام لجن ام …… جزاك ما عداها وبتك جاي تدفع اثامك وياي

عكد حاجبه خطاب : تدفعه اثامه عليش ؟

– هيج سوالف كديمة

– انا رايد اعرف هالسوالف

– اللعب باوراق الماضي مثل اللعب بجمر هايد تشوفه مطفي لجن عد ما تهيجك يحركك ويعميك بثعوالته

– وشنهو الصار بالماضي خاطر هالكثر وراه اسرار وثعاويل تعمي عيون

– الصار اصعب من احد يصدكه لو انحجت سالفتة الكلعة اعلى بشر يهزله ايدك ويكلك امش الله بنطيك هالسوالف بالافلام الهندية ما تصير لجن الصار بالكلعة هدم كلشي حتى الشعور

– وشنهو الصار

رادت تندار وكفاها : انا رايد اعرف اسرار قدس وكلشي يخصها رايد اعرف شنهو الوصل هالبت الهالمواصيل

– لو جنت رايد تفتح اسرار قدس ملزوم بزيارة الكلعة

– ووين صايرة هالكلعة

– بسهل نينوى .. كلعة كشرة ما خط احد عتبتها لا ما جالها ضيمها … بيها تنكشف كل الاسرار بس لو عرفت هالاسرار راح تاذي روحك حيل وتهدر دمك

– الهالدرجة سرها ما ينحجي

– واكثر

– بس انا رايد اعرف هالاسرار .. رايد عنوان الكلعة تكتبي بحيل الله بس تكوم قدس بسلامة اروحلها .. اكو احد عايش بالكلعة اليوم

– اي اكو فرد من ال خشان عايش غاد .. عده كل اسرار الكلعة لجن حذرتك تدش زاغورتها ولو حطيت رحلك بيها لا تلوم احد عكبه

ضل يدحك بيها وما رد عليها

هدته ومشت وهي تتفكد حال الجاهل وتنطر فرصة تنفذ الراده منها ريسان ..

لثاني يوم كال الها : العصر الجاهل يمي ولو ما اجا …. قاطعته

_ يجي بس عكب العصر اخذ ولدي واهج لديرة لا تشوفني عكبها ولا انا اشوفك

-نفذي الاريده وهجي وين ما تريدين تولين

سدت الخط من عده وحجت ويا الممرضة وكالتلها: لازم نطلع حتى لو على مسؤليتنا صارت مصيبة غاد عدنا وكرايبنا مات ما نكدر

سجلت على الخروج وكملت كل الاجراءات واخذت الجاهل من الخدج على مسؤليتها وطلعت بالجاهل وعافت قدس نايمة بالمستشفى.

قدس : كعدت امي ما هي ، فد نسوان قربة

ردت اكوم واني سمينة وعمليتي صعب اكوم منها عانني اكوم للحمام .. رديت وامي ما هي حتى ما كالت راح اروح

ظليت كاعدة انطرها ما اجتي ..

خطاب كل يومية يجي الصبح وبالليل خلال النهار ما يكدر لين عده شقل .. مرت ساعات وامي ما هي وتليفون ما عدي

اجت السستر تطي الدوا شافتني كالتلي : شعدج هنا مو طلعتو

– لا الدكتور ما كتبنا نطلع بعدنا

– يمعودة امج وقعت على خروج على مسؤليتكم واخذ الطفل وراحت

– يعني هسه الجاهل ما موجود جوا

– لا ماكو امج خذته

– وين خذته ؟

– ادري عنها خابريها واعرفي وينها من زمان طلعت معقولة ليش عافتج واخذت بس الطفل ما كالتلج ؟

– لا

كلبي كام يلعب اشتعلت نار ما ادري ليش خفت

اني ما امن امي بس من جلة حيلتي مالي قيرها يضل وياي

مرت الساعات وامي ما هي وكلبي وجر .. وكلها تكلي اتصلي واني ما عدي تليفون اخابر .. طلبت من السستر تلفون اخابر خطاب

اني حافظة رقمه ع القيب .. اطتني دكيته بتليفونها وخابرت

طلعلي : الو

– خطاب تعال بسرعة

– شنهو يولي شصاير

– امي خذت الجاهل وقابت

– شني خذت الجاهل وين خذته ويييين انت

– اني بالمستشفى تعال الحكلي فدوة بساع كلبي اشتعل نار فد لا تسوي بالجاهل شي

– ما سالتي الدكاترة اكيد ما يخلون الجاهل يطلع هيج

– كالو وقعت على خروج وماخذه الجاهل ورايحة

حجيت وبجيت

حجه هو : لا تخافين مسافة الطريق واني يمج

سديت الخط من وفد ابجي واطكطك بصابيعي وما عرف شنهو اسوي وشتصرف .. احس روحي مقمضة بهالعالم خطوتين ما اعرف اخطي.. نطرت خطاب يجي يتصرف اني فد كاضيتها بجي .

مخابرها لحد ما مال ما رادة جا خطاب وحجه ويا الدكاترة وتبين صدك ماخذته ورايحة كمت ادك والطم واكلو : خطاب ابني راح يسوون بي شي هو مريض ما يتحمل راح يكتلوو

– لا تاذين نفسج ، ينلكي ضلي هين انا اروح لبيت ابو وهب وارجع

– لا ما اضل ما اضل اخذني وياك عليك الله ما اتحمل

– وين ترحين وهاي عمليتج يولي

– ووين تعوفني عليك الله لا تخليني اروح وياك

– يولي عمليتج بس خل الحك اشوف الموضوع واجي

ما رضيت الا اروح وياه عاد خابر امه يستفكد امي هين لو طالعة .. كالتله : ما هي

اندارلي : عدها مكان ثاني غير البيت الكاعدة بيه ؟

– ما عرف هي كاعدة ويا ابوك

– بيت مرت اخوج تندلي عدج رقمها

– امي ونهلة صايرة مكاطف بيناتهن وحرب ما تروح لها

– عجل وين تروح

– اني بروحي ما اعرف امي ولا اعرف اسرارها ولا شي عنها شلون كلي ابني شلون بيه

احتام هو كلش احتقن كام يتكاون ويا المستشفى لين كتبو خروج بدون علم واحد من عدنا .. عافني وراه وراح لبيت ابو وهب لا لاكي امي ولا ابو وهب فد عفاف وامه

مصيح بالبيت مكسر خابصها ورايح لبيت الجول لاكي خالي

خابر على ابو وهب تليفونه مقلق

رد عليه اخذني بنص الليل رجعني للبيت فد البيت بعده ما كامل وفراشات ما بيه والجو كلش بارد .. واني عملية

حطلي فراش وقطاني ببطانيتين فد ما دفيت البيت حيل بارد ..

كمت اطك سن بسن والوجع مال العملية موتني الليل كله الجي من الالم وهو احتار ما خلى شي من الملابس ما اجبو وحفاني بيه حتى ادفى وبعدا الالم ما يروح .. احتار شيطيني ووين يروح الساعة ٣

كام يولوم عليه ( مو كالج ما تطلعين من المستشفى غاد احسنلج مو حجيت هسه شسوي فهميني لا اكدر اطلع ادور الجاهل الشردت بيه امج ولا اكدر اعوفج اطيني شسوي يولي تربطت )

فد كمت ابجي انصكع على راسه ما عرف شيسوي وشيصرف

لحد ما طلع الفجر اني تعبت من الالم وغفيت هو ظال كاعد يم راسي والدنيا فارته فر ما خله احد ما خبره ما خله بيت ما دوره وين يروح .

كعدت الصبح ..

خطاب ما هو العملية مخيطتني تخيط لا احد يمي لا احد يعيني وصدري يدر حليب ما عدي شي انشف الحليب بيه هدومي متنكعة ..

حاولت اكوم اني ثكيلة وكومتي صعبة بالموت يلا كدرت اكوم من الفراش واروح للحمام .. وكلشي صعب كومتي كعدتي الحمام المشية والبرد ع العملية ذبحني ذبح

تانيت احد يجي ماكو

لا خطاب لا احد يمي كلت لو الله ياخذ امانته بهالساعة وافتك من هالدنيا الما شفت منها بس التعب والالم .

جا خطاب وجهه اسود من التعب لا نايم لا مرتاح لا مخلي مكان ما دوره .. جاي وجايبلي ادويتي من المستشفى اطانياها واطاني اكل .. وكال : انام ساعة وكعديني

– والجاهل خطاب كلبي نار عليه راح يموت

– يولي ما خليت مكان ما دورته ما خليت احد ما رحتله .. نامي والعصر اخذج امنج يم بيت عمي واروح

– ما اريد ارد ليقاد رايدة ابني خطاب الكالي ابني

– يولي لكيته وضميته عليج ما تشوفيني ليلي ونهاري مثل الجلب اصول واجول طلعت روحيييي تعببببت منين اتلكااااها من امي من خالي منج كااااافي

سكتت عنه فد دموعي كامن يجرن بالزايد من صيح عليه

اندار بس يريد ينام .. سمع اجر بخشمي من البجي

كام من مكانه واجاني : يولي والله من تعبي صيحت اعذريني والله حيلي انهد ابني من صفحة وانت من صفحة ومالي معين يساعدني ويركض وياي لو يداريج .

– يمكن هاي جزات الحرام

– يا حرام

– الجاهل جا بحرام ما اتهنينا من ساعة الحرام ولا اتهنينا بيه كضينا وكتنا خايفين ونتشرد

– الله كريم الله ارحم الراحمين الجاهل ماله ذنب بينا .. وكل ذنوبنا سببها امج وابو وهب .. لو من البداية خاطبج الي وما دنت نفسه على النويتلها جان كل هذا ما صار

تنهد ودخن جكارة فد الدمعة بعينة من الضيجة الهوى بيها

لا بيدي اهون عليه ولا اكدر اعينه .. حالي اصعب منه جسمي مخيط وصدري يدر ابني ما هو

اندرتله : خطاب راح نعيش ؟

اندار : شجاي تحجين

– ما اضن احنا نعيش ولا نرتاح فد بوم

تقرب مني : لا تحجين هيج فترة وتعدي ووهد مني شاربي مو علي اذا خليتج بعوز بعد لو اعرف اكص من روحي وما اخليج تنضامين بس هالفترة تحملي وياي نعقد ونتزوج وتصير سوالف

– واذا ما صارت

– اذا فد يوم افترقنا راح تكونين انت السبب من ناحيتي انا ما اهدج

ضليت ادحك بعيونه ..

اندار طفى جكارته وخلى راسه على مخدتي وتقطى شوية من قطاي وغمض عيونه … بجيت عبن ما جاي نلكه الراحة تعبنا حيل ومالنا احد بهالدنيا .. بس اصبر الروح بجلمة ( الله موجود وما ينسى احد)

ضليت كاعدة ما اجاني النوم والم العملية خف عدي

باجر موعد افتح خياط العملية بلكي ارتاح من المها ..

صفنت بامي شنهو تريد من ابني وليش خذتو من عدي .. ليش هيج ما بيها محنة عليه كلبي نار على جاهل ما شفت وجهه الا مرة وهي كلبها ولا يمن ولا جنها ام … عافتني بهالحال وخذت ابني وشردت .

ساعة ابجي ساعة اواسي الروح واقويها .. لخاطر خطاب تعب حيل وياي ماكو احد بكثره تعبلي.

للظهر .. دك تليفونه فز بسع ورد .. حجه شوية وكام

يتفكد محفظته ويريد يروح : ها اكو خير عن الجاهل

– لا فد امي واختي راح يجن يمج هين حتى اطلع ادوره

– ووين راح تدوره ؟

– ما ادري المهم ما اضل كاعد هيج لازم اعرف امج وين خذته

راح قسل وجهه ورجع فتح تليفونه وحابر ما ادري المن

ورد كعد يدخن جكارة ، دحك : خذتي دواج

هزيت راسي : خطاب راح تجيبو ما

ضل يدحك بوجهي : بحيل الله

دك تليفونه طلع يدلي امه واخته ع البيت جابهن وفاتن للبيت اول ما شافتني صاحت : البومة وجه الشوم من يوم الشافج ما شاف الراحة هالولد .. هدي ما فكيتي ياخذه منه شوفي وجهه شصاير بالله شمحصل منج ومن النغل الحلفيتي وهجت بيه امج لعبتن بحاله لعب من الله لا يطيجن ولا يوفقجن يا كحا*٪؜

كام يصيح خطاب وهو يحاول يسكتها : يمه يممممممه ، احاجييييج

ردته : وعلة بكلب عدوك يولي اشايف بيها وشحصلت هده يولي شوف روحك شصاير بحالك على يا مال والمن متحمل الضيم هذا كله من وراها وورا امها راح يكتلنك ذن مالهن امان ولك اسمع مني عليش ما ترد فتيت كلبي ولك خطاب

تحجي وهو يصيح واخته تحاول تهدي بينهم .. اخر شي كاللها : اذا جاية تعينيني وتضلين يمها لين ما اشوف الجاهل وين صفى بيه الدهر خير ما تريدين تضلين امشي لا انا الطالبح ولا رايد منج شي الله لا يعوزني البشر

– يا ما يعوزك ولك يمه حيلك منهد ووجه صاير هاطولاته من الضعف المن وياهو اليستاهل تهد حيلك لجله ولك يمه جاتلني تعبك هاذ ولك خطاب يمه

– ومت الاشكيلج احجيلي هالحجي هاذ اذا نا عدج حجاية زينة تطيبين كلوبنا بيها لا تحجين بس البينا كافينا تتحملين تصلين هين لبين ما اروح ضلي ما تتحملين عوفيها وامشي ادبر غيركم يساعدني

كامت تصفك على اديها وتكول ؛ مدري شمسوياتله هالولد هاذ وكاتل روحه بف بالون مدري اشايف بيها ، روح ييمه روح اشوف توالي هالروحه وين تصفى امشي وانا ضالة هين

– ما تجين يم قدس ولا تاذيها البنية مسوية عملية يمه اذا مو الها لله

– وهي تعرف الله خاطر اخاف الله بيها ؟

– يمه خافي روحج بالله لا تخافي بيها لا تزيدين تعبي

– روح يبمه الله يشيل تعبك ويزتو على الزاد حملك وتعباك روح يولو دا اشوف شتجني من بنات الجول

جا عندي وكال : انا راح اروح ادور امج ومجبور اخليج ويا امي واختي ادري ما يحبوج ولا راح يداروح ويمكن يحاولن يهججنج لو شيسوون بيج بس ما بيدي غير امنج يمهن واروح ادور الجاهل ..

قدس انا طالع وجلمتي بهالمكان لا تنسيها وخليها ترجية باذنج شيكللج لا تسوين وشيطلبن منج لا تنفذين وشيحلجن لا تصدكين اذا ردتي تحافظين على روحج لبين ما ارد كل التسوي تسدين اذانج وحلكج وعيونج لا تسويين شي بدون علمي

– ميخالف

– الحجي لا تنسي وديري بالج على نفسج

اطاني الفين دينار وراح ، ظليت كاعدة بمكاني ما تحركت

اندارت عليه امه وكالتلي : تريدين ابنج صدك لو تبكبك مال عيارة

– ليش تدرين عنه وين ؟

– يولي من اسالج جاوبي لا تتفلتين

– والله اريده فد…. قاطعتني

– الجاهل موجود واذا توعديني من هالساعة تروحيله وما تردين لخطاب اكلج مكانه وين

– وين

– اوعدين تروحيله ونا تردين لخطاب ولا تخبري ولا توصلين هين بعد

– فد خطاب ما يرضى

– يولي لا تستكح*** براسي تريدين ابنج لو لا

– اي

– عجل اختاري ابنج لو خطاب ؟ اذا اختاريتي ابنج هسه تمشين ويطوجياه وتروح بعيد وتراحين غاد انا اكلج ، بس لو اختاريتي خطاب راح تضلين هذا حالج معلعلة انت وياه ومشردة من بيت لبيت ما اخليج ترتاحين وياه ولا هو اريحه ما طوله ماشي وراج .

– ليش هيج تكرهيني اني شسويتلكم والله العظيم ما اذيت احد كلكم اذيتوني فد اني ما جست احد بيكم ليش هيج تعاملوني

– مو ذنبج ننب امج

– وامي شسوت ؟

– دوري سر امج بروحج واعرفي ذنوبها شنهي لا تسعلينا بيهن .. وهسه تخيري تروحين تشوفين ابنج لو تظلين هاي ظلتج

بدون تفكير ولا وكفت على عقلي ودانشت امري كتلها : اريد ابني

كامت واجرتلي سيارة من راس الشارع وركبتني بيها واطت للسايق العنوان .. ركبت السيارة ومشت بيه وانا ما عرف وين اروح .. كل الفكرت بيه كلت الكي الجاهل واخابر على خطاب يجيني .. فد اني دوم ما اعرف ادير الامور ولا اعرف شمضممولي ولا عرف ايد روحي وشتصرف.

وصلت قاد نزلتي ابو السيارة بمكان هيمة ما بيه احد فد عمود كهرباء مكطعة وايراته كاتبته الحاجة اله بالعنوان .. عافني ومشى واني بطرك العباية وكاضبة عمليتي والجو بارد يمص كص

بالنص ساعة ماكو احد

حاولت امشي ادير العين ادحك ماكو احد ..

لا بيت جريب لا ناس لا اوادم اخابر خطاب منهم.. عمليتي شلتني شل من الوجع .. كمت ارص عليها حيل وابجي وكفت بمكاني بعد ما بيه اتحرك من مكاني

كعدت اصرخ وابجي بصوت عالي بلكي احد يسمعني ويجي

عرفت ام خطاب ذبتني وبعدتني من ابنها ويمكن ودتني بهالمكان الما بيه احد خاطر اموت لوحدي هين

خطاب وصاني وما مشيت بوصيته كالي لا تسمعين ولا تنفذين شبيه مشيت بحجيها .. وشلون راح اضل هين الهوى عالي والعملية مثل الخنجر نابت بلحمي هيج وجعها ادحك هين وهين وماكو احد

الدموع هماله وتتامل واحد يمر ويخلصها من هالموقف

شديت حيلي وكمت كوة اجر بخطواتي وامشي اريد اوصل لمكان بيه بشر افزعهم .. بس بالساعتين وماكو احد

وصلت مرحلة من الوجع والبرد استيأست وكلت هي جابتني عين خاطر اموت .. رادت تخلص مني .. كعدت واستسلمت لروحي اموت واخلص من هالدنيا المالي ثمرة اعيش بيها .

تجيت روحي وكعدت انوح ومنتطرة يخلص صبري وتنتهي خبزتي بهالدنيا خاطر اموت وارتاح … واني بهالحال طبكت سيارة

فزيت من مكاني وعنت نفسي اريد الحك السيارة الطبكت وااحشمها تفزعلي ، واني كاضبة عمليتي ورايدة الحكها ما احس الا ابو وهب نزل من السيارة وملثم روحه باليشمغ الاحمر ولابس دشداشة سودة وعليها قمصلة جوزية .. طبك الباب وهو يدحك عليه بخزرة

عين اني كلت حانت ساعتي

تصنمت بمكاني خوف وبرد ورهبة واستسلام

جا عدي اول شي سوا كضبني من راسي : تشردين مني يولي ؟

على ذمتي تنامين ويا غيري وتخلفين وتريديني اخليج

تعرفين انا ياهو لو لا ؟

تعرفين ريسااااااان منهوووووو

نص كلمة ما راددته حتى الدمعة غابت من عيني فد فاتحة عيوني حيل صدمة وخوف جسمي كله يرجف منه

جرني للسيارة وذبني ليورا عمليتي احسها كامت تنزف وشخط السيارة حيل كمت اصرخ من عمليتي

وصلني لبيت مهجور ما شايفته كبل ولا عرف وين مكانه

دخلني الهالبيت مهدم ومزرف ما ادري شجاريله كضبني من راسي وجرني لمكان بيه عمود خشب

سحبني اله وربطني بيه

كمت اصرخ واكلو : حط جيلة براسي وافتك مني لا تخليني تعبت من الوجع عليك الله بس عووووفونييييي

عافني مربوطة ومشى

كمت اصرخ ابجي اصيح محد اجاني

واني مربوطة ادية تجرحت والخشب مالت العمود طب بادية من انهد حيلي واريد اكعد وما اكدر .. كلش تعبت وكتلني البرد ما اعرف شلون جسمي لحد هالساع مكاوم وما متت .. هم فكري

من الصياح والبجي والعياط كلش انتهيت

كعدت بمكاني وادية مربطة ليوره .. بالساعة ومحد اكو

رد ابو وهب والجاهل بيده … فتح كماطة جدامي وخلاه مفتوح للهوى كبالي .. الجو بارد حيل والجاهل ما بيه حركة

كمت اصرخ واكلو : اكتلني فد لا تسوي بيه هيج حرام عليك الجاهل شسوالك راح يمووووت قطي راح يمووووت عوفه عليك الله والله حرام باردة راح يموووت

ادحك بالجاهل ازرك صار وهو يفتر داير ما دايري ويكلي : هاذ الاطيتي روحج لخطاب وخنتيني هذا ثمرة خيانتج .. يولي انا الحسبتج دكرة وما تفتهمين شي ثاريج منغلة من وراي ورايدة تخلي بركبتي .. اني تلعبين علي

يحجي ويكضب براسي ويخزر بيه .. واني فد اريده يكتلني واخلص من الجاي يسوي بيه وبالجاهل ..

كاضب راسي يحجي بعصبيه واني اصرخ واجر براسي منه واكله ( راح يموت اكتلني وهو عوفه والله خطيه ما سوا شي وهيج تعذبه قطي فد قطي راااااح يمووووت )

احجي وهو بعده يهدد ويتوعد من حركة دمي كمت وفلت بوجهه وهو يحجي .. فز مني غضبان : اتفلين بوجهييييي

دفرني بخاصرتي احس العملية طكت

كمت اصرخ من الوجع وابجي كام يضرب ويصفك بيه واني اكلو : اكثر زيد مووووتني اريد امووووت

ابتعد مني ويكلي : كل عكلج اريحج وتموتين هيج

طلع من المكان وراح جاب كرك حسبالي راح يضربني لو يضرب الجاهل بيه … فد ما تكرب الما كام يحفر بالتراب المكابيلنا

اني فد ادحك بالجاهل صار اسود من البرد فد ما بيه صوت ابد لا حركة ولا حس .. احجي واكله كله من وراي جبتك لهالدنيا كله من ورااااي اني العذبتك وجبتك لو راضية اسوي العملية بذاك اليوم وميته وميت وياي ولا الجاي يصير بينا

كافي تعبت ارحمونا اكتلني اني وياه وخلصنا كافي تعذب بينا والله كتلني الوجع عوفنا ابوس ايدك والله تعبت

جاي حاجيه تقرب من عدي حسبالي يريد يطكني بحركة سريعة درت وجهي منه فد ما طكني اندرت شفته جاي يشيل الجاهل كمت اصرخ : رجعههههه عوووووووفه لا تكتله لا تكتله اكتلني كبله حرام عليك لا تكتتتتتتتله

ذبه ذب بالحفرة ما جنه روح .. فد جنه ذبني مو ذب ابني كمت اصرخ وافز من كل حيلي عليه واريد بس افك روحي من العمود

كام يهل عليه التراب كدامي

فقدت ما ادري شكمت اصرخ وشكمت احجي ..

دفنه كبال عيني انتهيت احس كلبي صار فارغ انذبح من مكانه

هذا جان اخر شي اتذكره من هالمكان بعدها شصار ما اعرف

بلحظة فقدان وعي اني ما صاحيتلها ولا انذكر شوكت فقدت الوعي .. بس الاتذكره دفن الجاهل كبالي وما اتذكر بعدها شي

فتحت عيوني … اني بالسيارة

كل الم ماكو .. كل وجع ما احس بيه

ما انذكر شصاير وياي اني وين شديصير .. يمكن حتى ما اتذكر اني منو ..

الحسيته حركة جسمي ثكيله اصابيعي رجلية مو بسيطرتي ما اكدر اتحرك .. دحكت اشوف اني مكبعة فد اكو شي مربوط عليه

دحكت للمكان سيارة شنو هاي السيارة وليش اني هيج

اكو ناس تروح وترجع فد ما جاي استوعب شكو ليش الناس تمشي ليش محد جاي يشوفني اني شنو يمكن ميته .. لا مو ميته اني جاي احس بروحي لابسه عباية ومتغطاية

جاهدت روحي حتى اتحرك

الحسيته اكو اجهزة داير ما داير بطني وملبسيني جو العباية مثل اليلگ بيه وايرات هواي .

لحظتها ما جنت استوعب الموقف الاني جنت بيه

بس العرفته في ما بعد اني لابسة حزام نا سـ ـف وموعد العملية الانتحارية الساعة ١١ الصبح والساعة حاليا ب١٠ وثلث ونص هيج شي

امي جانت تدري ابو وهب راح يذبني بعملية انتحارية

ومنطيني حبوب ما اعرف شنو هي بحيث مخليتني ما اعرف اسمي ولا احس على اللي دا اسوي

ما ادري شلون الله هداها وبلغت على مكان العملية ونوع السيارة وانطت عنوان ابو وهب وصورته ومكان بيته وكل الاماكن اللي ممكن يتواجد بيها وانطتهم رقمه وارقام كل اللي يتواصل وياهم وممكن يروح عدهم .

هذه هم جانت عملية انتحارية من امي جازفت بيها بابو وهب لو ينفذ منها ويكتلها لو يروح بيها وتنجي هي ويفتكون اخواني منها ويمكن اني

واني بهالحال كانما بس عيون مفتحة الاستيعاب صفر

انفتحت باب السيارة اصوات مفارز شرطة ورتل امريكي وتطويق واسلحة موجهة عليه وتصيح : بس تتحرك نرميك

اسمعها الكلمة اعرف ارددها بس ما اعرف استوعبها

حالة عجيبه عقلي مو بيدي ما اكدر اتحكم بيه حتى استوعب الكلام اللي ينكال وسامعته واعرف بس مجاي اعرف افسره .

اكو كلام امريكي

واكو حجي عراقي وواحد يصيح ( مرة اللي بالسيارة مرة )

تقربوا من السيارة بحذر وخايفين ، يشوفوني مفتحة عيوني بس ساكته وهذا الي خوفهم

حسبالهم منتظرة يتقربون حتى افجر نفسي

بس ميعرفون اني ما جاي اكدر افتهم شي ولا حتى شلون اتحرك .. عقلي فقدته احس اخذت منوم للعقل بس كل جسمي صاحي حتى وجع مال عملية ماكو

عشر دقايق وهم يحاولون يحجون وياي ويحاولون يخلوني استسلم واني بمكاني ما اتحرك

حسبوا من الواحد لل٣ وانهدو اثنين منا ومنا صعدو لزموا ادية .. وكلبجوهن ليورا وهم يصرخون : اي حركة نكتلك

كلبجوا اديه وجروني من السيارة نزلوني

العجيب اكدر اوكف عادي

وكفوني على صفحة ويخابرون ويتصلون .. والسيارة يتفقدوها .. ويفحصوها اذا مف خخه

اجوا اثنين واكفين يمي يحجون وياي فد داحك بيهم

كاله : مطيها حبوب ما جاي تستوعبنا لازم نفكك المفخخة

الثاني كالو اخذها بمكان بعيد عن السوك لازم

الثالث يكله : ما عدنا وكت احنا راح نشتغل ونحاول نفككها هنا وانتم فرغوا المكان وخلو الناس تبتعد

صاحو بالناس مفخخة الشارع ما بيه ولا بشر بعد

حتى الشرطة نفسهم ابتعدوا كلهم ضلوا كم واحد اختصاص تفكيك متفجـ رات

يشتقلون وهذا اليصيح دخيلك يا الله

وهذا اللي يكول يابو الحسن

وهذا اليقرا قران

والامريكان مطوقين المكان

والثالث بعده يحاول وياي ويسالني منو حطلي هذا الحزام

باخر سبع دقايق كدروا يفكون الحزام من جسمي

فرحوا وكاموا يصيحون ( انفك انفك يا الله يا ااااااااالله) وواحد من عدهم سحبني وانسحب من المكان كله

من جرني حيل وسحبني هين مدري شصابني وكعت وما حسيت شصار بيه عكبها

فكيت عيوني صوت جهاز مال الكلب الاسمعه بالافلام

واجهزة طبية محاوطتني بكل مكان وجسمي حيل ثكيل من الوجع فد هي رجعلي استيعابي واستوعبت الصار بيه وشلون دفـ ـن ابني بالجولة

كمت ابجي واصيح واون

التموا عليه الدكاترة واني ابجي واصيح ( ابني كتلو ابنييييي كتلوووه دفنو مااااات مات كلو مني انكتل بسببي ماااااات )

ابجي واصرخ انطوني ابرة بالمغذي واني بعدني اصرخ

شوي شوي هدى صوت البجي مالي كمت بس انحب واون .. واكللهم : شيلو الاجهزة مني عرفوني اموت لا تنقذوني مالي عيشة بهالدنيا موتوني عفية والله ما اريد اعيش .

ظليت بالساعتين انحب واتوسل بيهم يكتلوني

اجا واحد كال: شسمج

بصوت نحيب جاوبتو : قددس

– شسم ابوج قدس

– ما انذكر فد اريد تكتلوني

– احجيلنا الصار وراح نساعدج

– كتلو لابني دفنو جدام عيني مات كتلوه

كمت ابجي بقوه

– منو اللي كتل ابنج

– ابو وهب دفنو جدامي دفنووووو

– لا تبجين واحجي ويانا حتى نكدر نساعدج ابو وهب نفسو ريسان عبد الجليل

– اي هو

– تعرفين بيه ارهابي ؟

– اي

احجي واشهك من البجي

– جنتو تشتغلين وياه

– لا جنت مرتو

– جنتي .. وطلكج لو شنهو الصار

– طلكني راد ينطيني لواحد ارهابي صاحبو فد اني هربت

– تعرفين صاحبو الارهبي شايفته توصفيلنا شكلو

– شايفته وما اعرف اسمو فد اعرف اسمه ابو مصعب ومو عراقي

– شنو جنسيته

– ما اعرف من وين فد مو عراقي

– وين شفتي

– عاش ويانا يمكن شهر مدري شهرين

– عاش وياكم

– اي فد بالدوانية هو وابو وهب ضل فترة ورادني من ابو وهب وابو وهب طلكني خاطر يطيني الو واني هربت امي هربتني

كام يحجي ويا البصفه ويناقشه باسم الارهابي الذكرته

ويتناقشون اني قمضت عيوني .. رجع يسالني ع البيت وجابوتو ع البيت اللي بالجول سالني ع المنطقة ما عرفتها ..

ضل يسال واجاوب كلش تعبني

اعتذر وكال : عندج احد تخابري يجي يعرف مكانج

اطيت رقم خطاب ..

اقل الساعة وخطاب اجا فد ما خلوه يجي يشوفني

كضبوه تحقيق يخص ابو وهب لان خاله ما خلوه يوصلني لو يكرب الثاني يوم يلا كدر يشوفني

اجا طبلي حيله مهدود ..

ما حجه ولا نطق كلمة حط راسه على راسي وكام يبجي من كل كلبه .. كمت ابجي واكلو : كتلو ابني دفنه كبال عيني امي وابو وهب متفقين باكت ابني وانطتو الو كتلا خطاب كتلا

هز راسه : يتعوض ان شاءالله المهم انت بخير

– انت حذرتني واني ما خذيت كلامك كل الصار من وراي اني ما سمعت حجيك ابني راح

– سهلة لا تأذين روحج المهم انت بخير وهذا كافي كلشي غيره سهل

– والجاهل اكلك مات

– الدكاترة بنفسهم كالو ما يعيش لان مو كامل ومشوه .. عسى الله يجعله طير جنة يشفعلنا غاد يم الله ويغفرلنا لاجله

– امك هم مشتركة وياهم هم كتلته هي الودتني لذاك المكان هي الاطت العنوان للسايق

– كل واحد اشترك باذيتنا ما راح اخلي يتهنى كلهم دمهم عدي ثمن .. وعد ومصابج هاذ لا اجرجرهم كلهم وادفعهم الثمن غالي حيل واغلى من اللي دفعناه انا وياج .. من اليوم اسحك كلبي واشيل ثاري على ظهري وما اتهاون ويا كل واحد ما تهاون باذيتنا … والله لا ادفعهم الثمن كلش غالي واولهم ابو وهب

– وشلون راح تكضبو

– كضبت وهب وراح اخلي هو اليجرجر ابوه

– شلون صبرج وراحتج .. وكل واحد اذاج ينال اذيته .

باس راسي وطلع برا يكملون تحقيق

اطه وهب للشرطة يجرجرون ابو وهب بيه ..

بهالوكت العصب ولما الكل وكف ضد ابو وهب

مخابرته اميرة .. وملفيته عدها بالبيت وهو لان ملاحكي رضى يعفي عن اميرة ويضل عدها لبين ما يشوف صرفة يكدر يطلع بيها من العراق .

وهب درى بابو عد اميرة

وخطاب درى بس ما يندلون مكانها وين

دبروا حيلة لوهب حتى يأمن لابو طريق يطلع بيه من العراق

ووهب خابر على ابوه .. وكاله على هذا الزلمة

ابو وهب ما صدك وهب

ورفض يطلع ويا واحد يجيبه وهب يخاف منه جيف غدره بمرته يخاف يغدره بغيرها …

بس من بعد٥ ايام خابر على وهب وكاله : تجيب هذا الزلمة بس للمكان الانا احدده والساعة الاني احددها

كاله وهب : هسه اخابرو واكلو اذا يرضى

اجا لوهاب كالو ؛ يكول الزلمة اريد دفترين كبل الطلعة ودفترين بعد ما احطه ع الحدود

رجع خابر وهب على ابوه كاله : ما عندي ٤ دفات كل العندي ٣ دفاتر وانت لا تكلو ٣ دفاتر كلو دفتر يرضى لو ما يرضى

حجه ويا خطاب خطاب اتفق ويا الضابط مال التحقيق خلو واحد يحجي وياه بحيث الواحد هذا يحجي معلك كأنما زايد عليه يطلع ابو وهب ما استقتل عليه .. لان يعرفون ابو وهب هو الرايد يطلع واذا شك لمجرد شك الرايد يطلعه يقنعه بالطلعه ويتساهل وياه يشك كاعد يستدرجوه

اتفقوا بمكان وعلى يوم الطلعة

جنا نضن ابو وهب ما يكع بيها واشطر وما راح يجي

بس المفاجأة صدك سواها واجا ع الاتفاق وثق هذا الزلمة راح يطلعه بمجرد ما راد يصعد السيارة اتجافتت الشرطة من كل مكان وكضبوه وكيدوه

خطاب جان رايد كتله بس الشرطة ما خلت خطاب يوصله ولا حتى يحجي وياه كالوله ( مل لازم يموت ولا ينمس عنده معلومات خطيرة عن شبكة ارهابية كلش خطرة بالعراق وهو راس خيط نكدر من خلاله نطيح ببقية الشبكة)

وانمسك ابو وهب ودخل السجن ..

ما برد دم خطاب ولا ثاره من ابو وهب وضل متوعدله يكتله .. بس ما دام وكع بيد الشرطة

انتقل هنا حتى ينتقم من امي ..

بس هي جانت مثل العصفور وانكطع خيطه مالها اثر ..

بلغ عليها وانطى كل المعلومات عنها بس يعرف القانون كلش ضعيف لا احد راح يدور عليها ولا احد راح يلزمها مجرد اسم مطلوب للعدالة هذا كل اليكدرون يسووه

وابو وهب نفروا جهود بالقبض عليه لان ارهابي نافذ واله اكثر من ٧ عمليات ارهابية نافذة ببغداد وبعموم العراق.

اني خلال هالمدة كلها بالمستشفى

نهلة هي الاجتني واتفكدتني وضلت وياي ما اعرف خطاب شلون اندلها ووصلها بس ما عافتني

ظليت بالمستشفى اكثر من ٢٥ يوم

تعافيت ووكفت على حيلي بس الصار وياي طفاني

مو ذيج نفسي اللي كل همه بطنها وضاربه همومه بعرض الحايط منظر الجاهل وهو يندفن انحفر بذاكرتي مثل الحفر بالحجر هالموقف ما جاي يفاركني

جسمي تعافى بس كلبي وعقلي كلش تمرضوا وما جاي اكدر اتعدى الصار كل يوم اصرخ وابجي كانما ديدفنه جدامي

طلعت من المستشفى .. وخذتني نهلة يمها

وجانت قصة نهلة امضى من قصتي امي بايكة بتها عجزت نهلى وين تدور بتها .. بس ماكو

كل وحدة بينا قصة انا نهلة .. وحتى بت نهلة

اساس قصصنا وضيمنا امي .. الي ما افتهمت موضوعها شنهو وشنهو سرها .. حتى اعرف سري .

السمعته من الكرابة ان امي بالموصل

بلغت خطاب وكالتله : وسام بالموصل

خطاب كاللها : لو للسما هم اتبعها واجيبها وما اعيفها وراها وراها

شدوا رحلهم واجروا سيارة وطلعوا من بغداد للموصل

وهنا جانت نقطة تحول بقصتنا …

رجعت لاصلي ورجعت لمكاني ولسري

ما راح اعرف ادير امري لو اعرف اصلي اذا ما ارجع للكلعة واكشف اسراري واسرار امي كلها حتى افهم ليش كل هذا الصار وياي وشنهو سببه

فقررنا انا وخطاب نروح للكلعة خاطر نكشف الاسرار

خذتنا نهلة ومشينا للكلعة

عد ما وصلت السيارة ووكفت جريب من الكلعة نزلنا

ادحك بيها .. كلعة حيل قديمة يرجع اصلها للزمن العثماني

بس لحد هاي الساعة موجودة بالموصل وسرها اعمق منها

انفتحت ابواب الكلعة جدامنا دحكت لخطاب بخوف

اشرلي ادخل .. دخلت جدامه وانا ادحك باركان هاي الكلعة المتهالكعة شضامة تحت هالجدران من اسرار ؟ وليش حياتنا ما جاي تصفى بسببها

استقبلتنا مرة جبيرة ودخلنا على قرفة حيل قديمة جان بيها رجال جبير .. سلم عليه خطاب وسلمت واني ادحك بالمكان

حجه وياه خطاب وكاله : انا جاي لهين واريد اعرف قصة هالكلعة وشنهو الصار بهالكلعة … كالولي سرها وكل اسرارها عدك .. رايد اعرف قدس منو وبت منهو وشنهو اصلها وعليش عاشت بالجول وسام ياهي وعليش سوت كل هذا وشنهو التريده من عدنا

لا هي جنة ولا هي نار

لا هي برد ولا هي صيف

لا هي كاره ولا هي محب

شنهو سرها .. المرة هذه كلفتني هواي ورايده ورايد ارصللها ودورت عنها هواي ما حصلتها وكالولي سرها عدك

– القصة ما تبدي من وسام ولا هي اصلها

– عجل منين

– الصار بهالكلعة ما نحب نذكره ولا نحب اجيالنا تحيطه هذه الكلعة شر الكلاع .. اندفنت بثنياها جثير اوادم راح دمهم هدر كلاع ضر تضر بكل بشر حاط رحله بيها .

كصة هالكلعة جديمة حيل جديمة من وكت كلش بعيد

احجيلكم وانا انا فرد من خشان آل عگاب

احد اولاده ، والشاهد على مصايب الگلعة ( القلعة)

تبدي السالفة من جدنا عكاب

ازلمة ابدوي .. عنده حلال جثير ، ويرعى ما بين الاوطان .. سوريا ومملكة الحجاز والعراق … ووين ما اكو عشب وخضار يحط الاهل وينصب الخيم ويهجد بهالبكان فترة وياخذ الحلال ويروح لغير بكان ، وهاذ حال البدو الرحالة.

مرة واهو جاي ع العراق

خيم جريب من كلعة صاحبها يشتغل بالجيش العثماني اسمه ( زيدان ) وجدي بحلالا يرعى، تعرف على صاحب الكلعة (القلعة ) وصارم صدكان ، بعد فترة جدي خطب بت صاحب هاي الكلعة ، وابوه وافك بخير.

عد ما عرس ، طابتله عيشة الريف

وترك ضيم البدو والرعيان خلف الحلال بين البلدان ..

وويا ما استكر هين اخوان وعمام جدي اجم سكنم جريب من كلعة جدي .. وصارت هاي الديرة جثير ما تضم اهلنا وكرابتنا وعمامنا .

عاشم (عاشوا) بهاي الديرة وسكنم بيها

ومشوا بعاداتم وتقاليدهم

ابن العم ياخذ بت العم بلا مهر

لجن لو راد ياخذ من غير عشيرة لزوم يطي مهر ومهر قالي ، واهل كبل اكثرهم فقرة .. فاعلى السهولة ياخذون من بنات عشيرتهم وعمومتهم .

عكاب ماخذ ثلث نسوان وعده ولد وبنوات جثيرة ، لجن ما خلف من مرته بت الكلعة قير خشان ، فعد ما ماتت جدتي ، خشان ورث الكلعة من امه وصارت له … لجن اخوته وعمامة وكرابته اللي بناله بيت طين والما عده ظل اعلى خيمة الشعر .

كبر خشان

ومات ابوه عكاب ، وصار هو راعي الكلعة

اخذ ثلث نسوان لجن جانت خلفته شحيحة (قليلة)

خلف من الاولى ولد واحد

ومن الثانية اثنين بنوات

والثالثة ما خلفت .. ومرت سنوات ونسوانه ثلاثتهن شحت خلفتهن وما عاد يبزر .

اللي يكله مسحور

واللي يكله عليك عين

واللي يحجيله ما يحجيلة من خرافات اهلنا ..

بس اهو يريدله خلفة، وما يريد يظل بطرك هالولد ، وجاي يشوف الخلل مو بنسوان ، زعم ثلاثتهن يبزرن ووكفت بزريتهن !

ذيج الليل خشان طر الصحر بحصانه ..

نزل الليل وهو بالصحرا .. عرضتله وحدة عمرها يخش ب٩٠ بنص الصحرا مخيمة .. جيم نار وكعد يسامر وياها .. وشكالة شحة خلفته .

كالتله : ترد الديرة وتدورلك بت عينها صفرا وشعرة راسها حمرة وكونن عمرها ما يتعدى العشر … تحطها ابيتك وجدام عينك وتنطرها لحين ما تلحك ، وعد ما تنظف من الحاكها ( دورتها) بنفس الليلة تواكعها ( تتقربلها ) وبهالليلة تنفك جبستك وتذر بزريتك .

رجع خشان للديرة وهو يدورله بت عينها صفرة وشعرة راسها حمرة وعمرها ما يتعدى العشر خاطر ياخذها .. دور اهله وكرابته والداير ما دايرة من الدير لجن ما وجد هالمواصفات ..

مرت السنة

والسنتين … والثلاث وخشان لا لاكي مواصفات هالبت ، ولا وحدة من نسوان بزرت .

وعكب ثلث سنوات

جان مار بسوك المدينة اهو وابنه

طرت جدامة لمة .. زلمة مبسط بثلث بنات من بناته يبيع بيهن ، والناس تحج وياه وتحاول ترده عن بيعتهن ومساجين بعدهن صغار .

اغتاض عد ما شاف ابو يبيع بناته بالسوك

وكف عن الكلام وكلالة : هذه البت ابيش تبيعها ؟

عد ما حجه ، البنية رفعت راسها تدحكله وعيونها مدمعة .. الناس استغربت اشلون ازلمة مثل خشان يشتري بت بدل ما يصحي ابوها ويرده عن فعله .

حجه ابوها وانطاه سعرها

رجع سعله عن سعر البنوات الثانيات .. انطاه سعرهن

دفع سعر الثلث بنوات .. واخذ بس الجاهلة ام عين صفرة وكالة ( اصحى اعلى زمانك ورد بالبنوات لامهن وهالبت من اليوم ملك يميني )

اخذ بيد البنية … وطلع بيها للكلعة

وعد هالخذوة تبدي سالفتنا ومصايب اهلنا بالكصة ( النهاية)

_____

هنا ونتوقف بقدس ويصير لازم علينا ندخل القلعة ونكشف اسرارها وبلاويها ونعرف شنو الصار بالقلعة

على حسب ابطالها قصة القلعة راح تنذكر بوقائع حقيقية ١٠٠٪؜ حتى مكان القلعة ما غيرته لاسباب .. وكل كلمة وحدث راح ينذكر بقصة القلعة هي حقيقية مية بالمية بدون اخفاء او تغيير فقط الاسامي راح تتغير لا غير .

مستعدين ندخل القلعة ؟

• يتبع الفصل التالي اضغط على ( رواية اسرار قدس ) اسم الرواية