رواية بنت الغير شرعية كاملة بقلم ياسمين عبر مدونة دليل الروايات
رواية بنت الغير شرعية الفصل الثامن عشر 18
طلعت لبيتي لقيت الخدامة دخلت عندي قاتلي ندي الحوايج الموسخين قتلها دي غير حوايج يوسف وحوايجي خليهم ذوك نغسلهم قاتلي يا مدام والله راكي تصعبي فيها عليا كون تدري مدام زينب ولا مدام سليمة يحاوزوني قتلها ماعندهم واش دخلهم إذا كاين أومو بزيادة جيبيلي باش نغسل واذا كاش ما قالولك أنا نهدر معاهم راحت جابتلي أومو دخلت الدوش وغسلت حوايجي دخلت عندي عجوزتي الكبيرة نصيرة قاتلي علاه مخليتش الخدامة تغسلك حوايجك قتلها ويديا وينهم وزيد عيب تغسلي وسخي وهي أكبر مني ( حسيت بيها خاطر أنا جوزتها هذي الاهانة ) حتى قاتلي وهذو اليدين يعرفو يطيبو ولا غير يغسلو قتلها شوية شوية قاتلي مالا نتكل عليك طيبينا العشا اليوم قتلها ان شاء الله كملت حوايجي ونشرتهم عيطت
لماما هدرت معاها ممبعد قتلها قالولي نتي طيبي قاتلي ايه وريلهم شطارتك وحمريلي وجهي قتلها ان شاء الله هبطت تغديت يوسف مهوش يجي للغدا ورجعت قيلت وليت دايتها غير راحة ورقاد ماندير والو مع العصر هبطت لعجوزتي قتلها واش ندير للعشا قاتلي لي تعرفيها ولي تحبيها دخلت أنا وياها للكوزينة بقيت نوجد فالدوزان قاتلي إذا كاش ما احتجتي تروح كريمة (الخدامة ) تشريلك خممت واش ندير ودرت ليست مديتها لكريمة راحت شراتلي وانا هذا الوقت تقهويت كي جات فرزت صوالحي واتكلت على الله عاونتيني كريمة وفاطمة (خدامات نتوعهم ) وعجوزتي قاعدة مقابلتني شوية جاو الشيبات الثانيين معجبهمش الحال نطقت سليمة قالتلها زينب اليوم نباتو بلاعشا وقيلا محبيتش كامل نرد عليهم كملت طيابي قلت لكريمة توجد الطابلة وطلعت درت دوش مكياج خفيف لبست سروال سليم مع شوميز غوز درت كوشوفال وهبطت جمعت معاهم فالصالون غير شوية دخل يوسف ومحمد ناضت أميمة عنقت محمد وسلمت عليه عاندتها حتى أنا سلمت على يوسف بقى غير يشوف معايا خاطر ديما يلقاني فشومبرتي قعدنا على الطابلة حتى شيخي قاللهم الريحة راها زاكية باينة نصيرة دارت
العشا قاتلو ذوق ورد خبر درتلهم حريرة الله الله محمر زيتون وسلاطة مشوية ماسيدوان بوراك تعشاو وعجبهم العشا كامل حتى قالتلهم عجوزتي عروستي دارت العشا تخلعو قاتلي أميمة بسمة صح هزيتلها راسي الحق كامل شكروني شحال فرحت كملنا العشا وطلعنا أنا ويوسف غير دخلنا للشومبرة قالي بالزعاف علاه طيبتي علاه درتي العشا دهشت قتلو يماك قاتلي قالي آه صحا معليش كي تقولك يما على حاجة ديريها. تكملة الجزء 18
غير دخلنا للشومبرة قالي بالزعاف علاه طيبتي علاه درتي العشا دهشت قتلو يماك قاتلي قالي آه صحا معليش كي تقولك يما على حاجة ديريها نورمال بصح إذا قالولك الآخرين لالا مكيش خديمة عندهم ردي بالك ديري واش يقولولك قتلو أوكي حتى قالي والحوايج يتغسلو قاع عند الخدامة مالا علاه راني نخلصهم قتلو عيب يغسلولي حوايجي قالي خدمتهم وزيد ضوك تولفيهم غدوة كي تدخلي تقراي شكون يغسلك قتلو فكرتني القراية كيفاه رانا فسبتمبر ضوك تفتح الجاميعة قالي سيبون درتلك تحويل كي تفتح تدخلي تقراي نورمال ياه واش فرحت هم ونزاح شحال من مرة نبغي نجبد معاه السوجي نتاع القراية ونخاف منو ،
الصباح نضت فطرت مع يوسف كيما ديما هو راح وأنا رجعت للشومبرة سمعت رنيم تبكي رحت عندهم بقيت نحكي مع أميمة قتلها بلي راح ندخل نقرى قاتلي منك صح قتلها واه ديجا هذا عامي التالي ان شاء الله ونتخرج قاتلي ياه والله مليح أنا لحقت غير للباك عاودتو مرتين مجبتوش بردت على القراية وزاد واش ندير بيها ربي يفضلي بابا وراجلي مميخليني نحتاج والو قتلها في قلبي عندك الحق نتي ولدتي وفي فمك ملعقة ذهب كيما يقولو كون تميزرتي كيما انا تعرفي واش معناتها القراية حتى قاتلي حنا لولاد صح كامل قراو بصح لبنات مكاش آمال عند الباك وحبست مامبا مفوتاتوش وانا كيما قتلك مروى صح تقرى
فالجامعة بصح باش جيب الوقت برك مزالت غير ف 2 دور كون راها تخرجت وريتاج ختي هذا عامها الاول وراها حابة تروح لايطاليا مع يوسف وخاوتو قتلها شكون خاوتو قاتلي أيوب ومصطفى متعرفيهمش قتلها لالا حكاتلي بلي يوسف بعد ما راح لايطاليا دار الطريق لخاوتو مصطفى كمل قرايتو وتزوج قاورية وعايش ثما وكريم راح غير على جال القراية قاري صيدلاني وحتى هو نورمالمو عامو التالي هذا ويرجع زادت قاتلي حنا لبنات تخلقنا باش نصرفو الدراهم مش باه نجيبوهم بقيت نضحك معاها قاتلي هيا نخرجو نشرو حوايج ليك تقراي بيهم ديجا بدى يبرد الحال وانا مشريتلكش حوايج خشان قتلها منعرف خلي نسقسي يوسف قبل .
- يتبع الفصل التالي اضغط على ( رواية بنت الغير شرعية ) اسم الرواية