رواية غرورها جن جنوني كاملة بقلم ابتسام محمود عبر مدونة دليل الروايات
رواية غرورها جن جنوني الفصل الاول 1
سحب كثيرة تملأ السماء، تعلن عن بدء يوم عصيب؛ شديد البرودة، والأمواج تتلاطم ببعضها بقوة، كأنها في حديث مستمر لا ينتهي. ذلك المنظر العجيب جعل الشمس تتوارى خلف السحب، كالطفل الصغير الذي يحتمي خلف ظهر أمه، مر بضع ثوانٍ كشرت السماء عن أنيابها بحدة، جعلت حبات المطر تنهمر سريعًا، فأخذتها الرمال في عناق حميم، لكنها ابتلعتها بوحشية حتى تروي ظمأها، وتعوض عطش حرمانها من شهور الصيف القاسية؛ فاليوم بداية شهر أكتوبر. من محافظة عروس البحر الأبيض المتوسط أمام إحدى الجامعات الحكومية، تمشي فتاة طويلة وجسدها الرياضي يزيد جمالها، عينيها الواسعة السوداء مثل الجو تطلق شرارًا، تريد حرق كل شيء حولها، وأنفها الرفيعة متوسطة الطول حمراء من كثرة غيظها، شعرها ملفوف أعلى رأسها، تعلو وجهها خيوطًا من الضيق، ترتدي بنطال صاعقة و”تيشيرت” أبيض، تمشي تضرب الأرض بقدميها، لا تطيق أحد أمامها وتحدث نفسها بعصبية وجنون:
– أنا؟ طب إزاي؟ لا مش معقول، دا مستحيل! بس إزاي مستحيل. ثم تمسك الورقة التي داخل قبضة يدها، قائلة وهي توبخ نفسها:
– ما أهو مكتوب، أنا لازم اعرف كل حاجة.
أكملت توبخ في ذاتها، حتى وقفت سيارة بجانبها فجأة، ينزل منها شاب طويل مُلثم، يقبض عليها ثم يدفعها لداخل السيارة، لكن بكل قوتها وبدون أي خوف تقاومه بشراسة، حاول السيطرة عليها قائلًا:
– اهمدى يا بت أحسن أقتلك.
ثم يخرج سلاحًا من وراء ظهره. لا تبالي لتهديده وبلياقة وبسرعة تمسك السلاح وتوجهه على رأسه، ثم تصوب بقلب قوي عليه، لكن يخرج من السلاح مياه بدلًا من الرصاص.
يضحك الشاب بأعلى طبقات صوته وأردف بمزاح:
– حرام عليكي يا مفترية نفسي أعمل فيكي مقلب أكمله للآخر.
تشد “توتا” القناع من على وجهه بنرفزة، وتقول بحدة:
– تصدق إنك أرخم خلق الله.
ثم دفعته بقوة، ونزلت من السيارة.
– يا توتا، أنتي يا مفترية خدي هنا.
رمقته بغضب وهي ترفع سبابتها أمام وجهه:
– بقولك إيه يا مستقبل الجنان بتاعك دا قولتلك ميت مرة مش عليا.
ثم تضرب رأسها بكف يدها، قائلة:
– دي هربانة مني.
ثم تمسك تيشيرته وتكمل حدثها:
– خاف على نفسك.
يضحك وهو يقترب إليها يعانقها باشتياق:
– والله أنتي أحن أخت على المجرة كلها، أما دي تهرب عليه هو، أنا لا.
فكان يؤكد على حروف آخر جملة وهو يشير على رأسها ويغمز لها بمكر، أردفت وهي تضيق عينيها بعدم فهم قائلة:
– هو! دا بقى اللي هو مين؟
يفتح يده باستسلام ليقول ممازحًا:
– بهزر يا شرس، دا أنا أخوكي حبيبك اللي مشهيصك دلع.
تتذكر الذي قرأته منذ قليل، فتردف بحزن:
– أخويا! اتنيل اسكت.
– بت هي هتهرب منك بجد؟
قالها باستغراب، تزفر أنفاسها وهي ترفع الورقة أمام عينيه قائلة بغضب:
– اقرأ الورقة دي.
– أكيد مش هشوف.
قالها وهو يرفع يده اليسرى يأخذ الورقة، فيكمل كلامه بتعجب بعد أن نظر إليها ببلاهة، ولم يعطها أي اهتمام:
– إيه اللي مش عجبك فيها.
تجلس على واجهة السيارة الأمامي؛ تعقد قدماها وهي تتفحص السيارة:
– أنت جيت إمتى؟
– لسه واصل يا دوب سلمت على البوب وماما وجيتلك.
– ومن أين لك هذا؟
أجابها بكل ثقه وغرور:
– يا عسل، أخوكي مش شوية.
ردت عليه بصوت مرتفع:
– اتنيل اقرأ أم الورقة دي، وبعد كده اتكلم.
– عندما قرأ أول سطر لم يكمل، حدق عينه بذهول وفتح فمه بدهشة، فقالت وهي تعوج فاها:
– ها، فهمت إيه بقى؟
الضحكة التي تملأ وجهه دائمًا اختفت وحل مكانها التعجب، متفوهًا بجدية:
– احنا لازم نعرف كل حاجة، أكيد في غلط.
– يعني أنت ما تعرفش؟
يرجع إلى الخلف قائلًا:
– بتزعقي ليه؟ هعرف من فين يعني! هو مين فينا الكبير.
حل الصمت عليهما، ثم يقطعه بقوله:
– استهدي كده بالله وتعالي نروح نفهم كل حاجة.
تزفر أنفاسها وهي تقفز من أعلى العربة متحدثة:
– ماشي لما أشوف أخرتها.
ثم صعدت السيارة بعصبية، وتحرك “مستقبل” على الفور.
★★★★★★★★
داخل الحرم الجامعي يقول العميد بقلق وخوف على منصبه:
– أنت إزاي تدي لـ”توتا مهيمن” ورق زي دا! دا باباها موصي إنها ما تشوفهوش خالص.
أجابه الموظف بتوتر:
– هي كانت عايزة تقدم لبطولة وكانت عايزة صورة، والله أنا نسيت خالص.
– دا هيخرب بيتنا كلنا، يا رب عديها على خير.
قالها وهو يتحرك في المكتب ذهابًا وإيابًا كالأسد المقيد داخل قفص.
★★★★★★★★
– نايا كنت عايز أتكلم معاكي.
قالها “مهيمن” وهو يفشل في إخفاء الضيق، تفوهت بوجه يتخططه علامات الاستفهام:
– خير يا حبيبي، في إيه؟
صمت لثوانٍ، ثم أخبرها بحنق:
– وصلني إن الاختراع بتاعك مستهدف، وناس عايزين يعرفوا مين اللي بيعمله.
فتحت عينيها برعب، ثم أبلغته بصوت مضطرب:
– مهيمن طيب هعمل إيه؟ أنا لازم أكمل الاختراع،؛ لأنه هينقذ ناس كتير من الموت.
يقف في مقابلتها، يضع يده اليسرى على وجنتها اليمنى:
– قلبي مش عايزك تقلقي خالص، أنا مستحيل أخليكي تتخلي أو تبعدي عن شغلك، واختراعك هتنفذيه بس هنا قدام عيني، هعملك معمل في البدروم وهجيبلك كل اللي تحتاجيه.
مالت بجسدها داخل حضنه الحنون قائلة:
– ربنا ما يحرمني منك أبدًا يا روحي.
– ولا يحرمني منك.
وبعد قليل حضرت لزيارتها “دانية” وزوجها وبنتهما، و”فريدة” وزوجها وبنتهما. استقبلتهم استقبالًا حارًّا وجلسوا يتسامرون، قطع حديثهم دخول مستقبل بسيارته بسرعة جنونية، فيضرب فرامل يجعل العربة تلف حول نفسها.
يقف “مهيمن” بعصبية، تمسك “نايا” يده وهي تقول:
– حبيبي معلش عديها علشان خاطري، دا بقاله كتير مسافر ما صدقت لما جيه.
جلس بهدوء قائلًا بتحذير:
– عقلي ابنك يا نايا، وخليه ينسى أم جنانه.
– أحبك وأنت هادي.
ابتسم لها ابتسامة حانية. تنهض “كارما” من جانب والدتها، تركض نحوه بلهفة، قبل أن تصل إليه يميل “مستقبل” على أذن أخته همسًا:
– توتا شكل عندنا بارتي النهاردا، أهدي كده واستني لما الناس تمشي.
أجبته بفظاظة:
– أنت شايف إن الموضوع يستنى؟ وسع كده أنا على أخري مش هقدر.
ثم توجهت إلى أبيها فهرول خلفها، تقابله “كارما” التي تلبس فستانًا واسعًا وعليه حجاب، متحدثة بحب:
– وحشتني.
حنى جزعه العلوي حتى يصل لأذنها بسبب طول قامته، مردفًا:
– بصي يا كارما هنقول كل حاجة؛ بس لما ألحق المجنونة دي.
تقول بزعل طفولي وهي تكلم نفسها:
– ماشي يا مستقبل، ما أنا اللي غلطانة اللي بترمي عليك، ما أنت لسه راجع من بره وديل الكلب عمره ما يتعدل، أكيد لفيت على كام واحدة ما أنت طفس.
عندما اقتربت “توتا” من أبيها أردفت بعصبية:
– عايزاك جوة يا كوتش.
تنهض “فريدة” تقترب إليها:
– احنا هنتغر بعد ما أخدتي الكأس الدهبي وما نسلمش.
أردفت بحب:
– أبدًا يا فوفا، بس عايزة الكوتش.
يجلس “مهيمن” واضعًا قدمًا على الأخرى، قائلًا وهو يرمقها:
– ما تسلمي على الناس.
– إزيكم عاملين إيه؟ أكيد كويسين.
قالتها بتحكم في أعصابها مع ابتسامة مجاملة، ثم توجه نظرها إليه مرة ثانية:
– ممكن تتفضل معايا.
يتدخل “مستقبل” في الحوار ويغييره قائلًا بضحكة صفراء:
– أهلًا يا بوب واحشني والله.
– عملك حاجة الرخم دا.
قالها “مهيمن” وهو يشير عليه، فرد عليه مسرعًا:
– أبدًا دا أنا غلباااان، ولسه جاي من السفر على إيدك، مفيش حمد الله على السلامة؟
– كوتش لو سمحت قوم معايا.
قالتها بإصرار، ابتسمت لها “نايا” وهي تنظر لها بتعجب متسائلة:
– توتا مالك يا قلبي؟ أنتي كنتي نازلة مبسوطة الصبح! حصلك إيه قلبك كده؟
يرد عليها “فادي” بمزاح وهو يضحك:
– هي بنت مين يعني؟
لم ترد عليهما جالسة في هدوء مخادع، برغم كم الصراعات التي تدور برأسها.
ركز “مهيمن” النظر على رقبة ابنه، قام من مجلسه وقال بأمر:
– ورايا يا مستقبل.
لاحظت “نايا” الوشم الذي يستقر على رقبة ابنها المشاغب، تنهض بسرعة تقترب من زوجها الغاضب:
– مهيمن بالله عليك مش والناس قاعدة.
– عاجبك يعني عمايل ابنك.
– علشان خاطري.
أخذ أنفاسه وهو يكز على أسنانه، فجلس مكانه وهو يهز قدمه بضيق.
في هذه اللحظة شعر “مستقبل” وكأنه قد سُكب عليه دلو من الماء المثلج من الخوف من والده، ثم انسحب وهو يغلق قميصه، الذي نسي أن يغلقه وفُضح أمره.
★★★★★★★★
شاب يجلس بجانب صاحبه داخل سيارة.. في أواخر العشرين، ملامحه حادة، طويل القامة، ويده تبرز منها العضلات، والعروق كالأفاعي تمشي تتبختر بحرية داخل يده. يضيق عينيه العسلية التي تشبه رمال الفلاة، ومن نظر بها تاه في أنحائها، يرفع يده يرجع شعره الأسود كغسق الدجى الشديد للخلف، مرددًا:
– ممكن ما تتكلمش في الموضوع دا.
أجابه “وجود” الذي يشبه أخاه التوءم في الملامح والطول، يفرق ما بينهما ذقن أخيه، فيرد بقلة حيلة:
– طيب وبعدهالك.
– ما تخلنيش أندم إني قولتلك، وأنا مقتنع جدًّا بالحياة دي.
أخبره “حازم” بإصرار وقوة، فيرد عليه محذرًا:
– والله خايف عليك.
– وجود أنا قولتلك؛ لأن لازم حد يعرف.. ما تخلنيش أندم.
– تمام ما تزعلش، بس عجبني تغير شخصيتك، بقيت حد تاني خالص، بس اوعى تشوط في أصحابك كمان يا عم احنا مش قدك.
– أنت أخويا وحبيبي.
قالها وهو ينظر له بحب أخوي صادق، فيقول “وجود” وهو يبتسم:
– بتعزف على الوتر الحساس، المهم هتروح معايا؛ لأن الكوتش عامل حفلة مفاجأة لماما وعايز الكل يكون موجود.
انتظر حتى يعطي “حازم” ردًّا، لكن استمر الصمت بينهم، فكان شاردًا بخياله في من تسلب كل إنش فيه، فتفوَّه “وجود”:
– سكت ليه؟
– مش عارف هي ليه بتعمل معايا كده؟
– أنت عارف، هي مغرمة بالكوتش وهو فارس أحلامها ومثلها الأعلى، مستحيل تغير دماغ زي دماغ توتا، بنت عنيدة.
رد عليه بابتسامة تحمل ألمًا وأسى:
– نسيت تقول ومغرووورة جدًّا.
فأجابه بتوضيح:
– أختي مش مغروورة، أختي واثقة في نفسها.
– بالله عليك سيبني أمشي، مش عايز اتنكد من معاملتها وطريقتها معايا في الكلام.
– والله هزعل منك، الكوتش موصيني إنك تحضر.
يأخذ “حازم” نفسًا طويلًا وبقلة حيلة يقول:
– ماشي يا وجود لما نشوف أخرتها.
يدخلا الفيلا، تنظر “توتا” إلى سيارة أخيها وتتفاجأ بوجود “حازم” بجانبه، تقول بتأفف:
– ياااااي هي كانت نقصاه.
تنهض من مجلسها حتى تدخل للداخل، لكن صوت أبيها أوقفها:
– توتا اتفضلي خدي شاور وتعالي، مش هسمح النهاردا بأي خناق مفهوم؟
– مفهووم.
قالتها بغضب مكتوم، ثم تمشي تكلم نفسها:
– أوووف هو ورايا ورايا، إيه الكائن دا.
عندما رأت “زينة” “وجود” نظرت إليه بعينيها الخضراء باشتياق؛ فهي تعشق قربه. أغمضت عينيها وتخيلت كثيرًا؛ فهي فتاة جميلة المظهر، هادئة الطباع، لكن من داخلها وفي أعماقها كانت تغوص بخيالها في بحور عينيه، تخيُّلها أنها قريبة منه يجعلها أسعد فتاة، اقترب منها قائلًا بحزم شديد:
– إزيك يا زينة؟
فتحت عينيها ولم تصدق نفسها أنه بالقرب منها، ونطق باسمها “يا لها من فتاة مراهقة حقًّا!”. حركت رأسها حتى تركز في أفعالها، تطاير شعرها الذي يميل لونه للشمس الساطعة في يوم الربيع، يبعث لمعان ضيائه إلى كل من نظر إليه، نظر لها بتعجب والدهشة تسود وجهه، رفع حاجبه الأيسر وبسط يده، مرددًا بنبرة قوية:
– زينة إزيك.
توردت وجنتاها باللون الأحمر خجلًا وهي تحدقه بهيام، تنحنحت برقة وهي تشيح بنظرها عنه وتقول:
– أنا كويسة.
ثم مدت يدها تصافحه، ما إن تعانقت الأيدي سرحت في لمسة يده، شردت في صوته الرجولي الخشن الذي تعشقه، استنشقت عطره المفضل والمثير لها، ثم كتمت أنفاسها تشبع رئتيها؛ ليس لأنها تحب ذلك العطر، لكن لأنه هو الذي يضعه، شعر برعشة جسدها، بصرها بقوة وإحراج وهو يسحب يده.
أفاقت لنفسها وذهبت بعيدًا تقبل يدها، وتستنشق عطره الذي ترك في يدها رائحته.
صافح الجميع ثم جلس هو و”حازم”، ثم مال عليه قائلًا:
– عاجبك كده أول ما شافتني زي ما يكون شافت عفريت.
– أنت عارف طبعها.. كبر دماغك.
قام “شادي” خلف “زينة” وسند ظهره على جزع شجرة مربعًا يده، رمقها بعتاب فكان ملاحظًا كل ما حدث فيقول بجدية:
– ممكن اعرف بنتي هتعقل إمتى من الوهم دا؟
تخفض رأسها وتنظر على الأرض باستحياء مرددة بخجل:
– بابي أنا فيه حاجة بتحصلي أول ما بشوفه، إحساس غريب بيسيطر عليا، بحاول أقاوم لكن مش بقدر اتحكم في مشاعري، أنا مش طفلة زي ما بتقولوا.. أنا كبرت.
يقترب منها ويأخذها داخل حضنه:
– حبيبتي أنا خايف عليكي، وجود فعلًا شاب طموح مفيش في دماغه أي حاجة غير الشغل، وما ينفعش بنوتي الأمورة اللي عندها ١٨ سنة تفرض نفسها على شاب عنده 26 صح.
أومأت برأسها بإحراج وخفضت بصرها أرضًا.
★★★★★★
بعيدًا عن نظر كل الحاضرين، تجلس “كارما” على أرجوحة، “مستقبل” يقف خلفها يحاول أن يصالحها:
– قلبك الأسود دا دايمًا ظالمني.
ترفع رأسها بغيظ تنظر إليه:
– والله! دا قلبي ها؟
يميل ويقترب من أذنها، مرددًا:
– والله.
تنهض وتقف أمامه واضعة يدها على خصرها وتقول بحدة:
– ممكن تقولي بصيت لكام بنت، ورغيت مع كام واحدة، واتمشيت مع كام زفتة، وحضنت كام معزة؟
يمسح أول أنفه وهو يضحك بمكر، تلوح بيدها حتى ينجز:
– قول قول، اتفضل رد ما تتكسفش؟
– بصراحة كتييير.
– تصدق لو كنت قولت لا كنت هضايق أكتر يا حبيبي، أنا أعرفك أكتر من نفسك.. معشراك ٢٣ سنة.
قالتها بغيظ قبل أن تدفعه وتذهب.
يميل يمسك يدها قائلًا بصدق:
– بس أنتي اللي في القلب وربنا، أي حاجة تشبه الساعة الرملية مش بعرف أمسك نفسي قدامها، بموت في صنفكم اعمل إيه؟
– تبقى قابلني لو عبرتك بعد كده.
أولته ظهرها ومشت، ثم قذفت الأرجوحة الخشبية بغيظ وعنف، نتج عن تأرجحها خبط “مستقبل” بخفة، وقف مكانه بثقة مدعيًا الألم، قائلًا:
– آآآآه.
رجعت تجري عليه بخضة ولهفة:
– حبيبي مالك؟ حصل إيه؟ أنت مش بتتكلم ليه؟! ما ترد عليا؟
رد عليها ببرود:
– مفيش، رجعتي تاني ليه؟ مش قولتي مش هعبرك.
– اعمل إيه لقلبي اللي بيعشق واحد عينه فارغة.
– والله أنتي وبس اللي في قلبي وبتوحشيني.
– أنت اللي بتوحشني أووي أووي، نفسي اعرف أخرت اللي بتسافر كل شوية عشانه دا إيه؟
– يا فنتازيا روحي، جوزك اللي في المستقبل إن شاء الله.. ما تقولي إن شاء الله.
أخذت أنفاسها بفرحة قائلة:
– إن شاء الله يا حبيبي.
– رائد فضاء ولازم أتدرب كتير، علشان أي رحلة للفضاء أكون مستعد لأي غزو حريمي.
وقفت تصرخ وهي تتركه، فيقول وهو يهرول خلفها:
– أقصد غزو فضائي يا مجنونة.. خدي هنا.
توجهت نحو “نايا” وأمها قائلة:
– نون ابنك دا لو ما لمش نفسه والله هدبحه.
– ابني حبيبي اللي جايبلي الكلام دايمًا.
ثم تقترب إليه باسطة يديها حتى تأخذه بأحضانها مرددة:
– وحشتني يا ندل كل دي غيبة.
يقبل يدها بحنان، ثم يقول:
– والله يا نون أنا ما أقدرش أبعد عنك، بس أنا والكوتش مستحيل نقعد مع بعض ثانية، الدنيا بتولع.
– اسمع كلامه وبطل شغل جنانك واعقل علشان أجوزك البت.
قالها “فادي” الذي سمع الحوار وهو يقترب منهم.
– ما تشغلش بالك، البت كده كده هتجوزها.
ردت “دانية” بهزار:
– هي عافية، انسى يا حبيبي إنك تطول ضفرها حتى.
– أنسى مين؟ دي هي كرزمة (Charisma) حياتي اللي بتخلي عندي أمل في بكرة، وحنين إني أرجع بلدي، ووفاء ليها بيحصني من أي غلط.
تضربه كارما بغيظ، فتقول وهي تعد على أناملها:
– والله! أمل، حنان، وفاء، مفيش انشراح يا آخر صبري، أي أسماء حريم ترشق فيها وخلاص، علشان كده عينك زايغة.
أجابها “فادي” بمشاكسة:
– ما بيقولك أنتي اللي بتديله أمل، وحنان، ووفاء.
فرد “مستقبل” بمزاح:
– وأهو كمان بتعرضي عليا انشراح قدامهم.
فتردف “نايا” بجدية:
– والله يا مينو لو ما احترمتش نفسك لأجوزها لواحد عاقل وملتزم كده.
فتقول “كارما” بعفوية:
– لا يا نون، يا مينو يا بلاش.
رد وهو يفتح يداه إليها:
– قلبي بقى.
يضع “فادي” يده على صدره قائلًا:
– اهدى على نفسك.
يمسح طرف أنفه قائلًا:
– مش تقولي أبوكي هنا.
يقترب إليهم “مهيمن” بنفس هيبته وثقته بنفسه، فيقول مستقبل بصوت منخفض، مسرعًا:
– حد يخبيني إلا هتلاقوا المطبخ كله أنبوبة وانفجرت.
“كارما” ضحكت بأعلى صوتها.
احترم “مهيمن” ابنه، أمام الجميع ولم يعاقبه على ما تفوَّه به.
★★★★★
كانت تسير “زينة” بالحديقة، لمحته يقف بجوار المِشْواة يشوي اللحم ويهوِّي عليه، هرولت تجاهه ووقفت بجانبه صامتة، لكن تحدث نفسها هل يا تُرى يشعر بي؟ أم أعيش في خيال ووهم حبه؟
فاقت على صوته الذي يجعل قلبها يذوب، وهو يقول:
– شكلك جعانة؟
تطلعت إليه بعينيها الخضراء، قائلة برقتها المعهودة:
– مش أوووي.
كانت تتمنى أن تخبره:
– ها هو حقًّا سوف يطعمني وبيده.
يا لها من سعادة هدر بها قلبها! اقتربت، فتحت ثغرها الوردي الخالي من مستحضرات التجميل، أخذت قطعة اللحم بين أسنانها التي تشبه اللؤلؤ.
نظر لها بعينيه السوداء اللامعة كالمدينة الخالية من الأنوار، يستقر بها نجم في وسط البؤبؤ، وسحابة بيضاء صافية لا يوجد بها أي ضباب أو غيوم، قائلًا بابتسامة:
– إيه رأيك؟
ردت بصوتها الناعم الرقيق:
– حلوة أوي، أنت إزاي عملتها؟
نظر إليها، ووضع يده اليمنى على كتفها وبيده اليسرى رفع السبابة والوسطى ومشى بهما في الهواء يقول:
– كل شيء بيبدأ بخطوات.
ثم يمشي بيده في الهواء خطوة تلو خطوة.
تاهت هي من لمسة يده، ولم تسمع أي شيء؛ فكانت شاردة داخل خيالها، حتى وضعت رأسها على كتفه.
فأتى أخوه وقال بطبعه الفكاهي دائمًا:
– أنا بطني بقيت بتهوهو.. فين اللي استوى؟
فاقت على كلمات “مستقبل” وبعدت بعيدًا، هل تلوم نفسها؟ أما تحضن نفسها؟ فهي المتيمة بحبه، وهو لا يشعر بما يكنُّه قلبها له.
- يتبع الفصل التالي اضغط على ( رواية غرورها جن جنوني ) اسم الرواية