رواية حبيبي المجهول (كاملة جميع الفصول) حصريا عبر دليل الروايات بقلم الشيماء محمد
رواية حبيبي المجهول الفصل السادس والعشرون 26
رواية حبيبي المجهول الحلقة السادس والعشرون 26
بقلم الشيماء محمد ♥
سمعها وجري علي الاوضه اللي هيا فيها
فتح الباب اللي كان مقفول بالمفتاح من بره ودخلها واول ما شافته قامت وقفت بس الحبل بيشدها وعماله تشد فيه وتصرخ في وشه
ليلي: انت اخدت ابني مني انا بكرهك بكرهك يا ادهم _ بكره اليوم اللي شوفتك فيه _ ياريتني كنت سيبتك انا ايه اللي خرجني من شغلي وكلمتك ليه؟ انا بكرهك
ادهم للحظات واقف مذهول متخيلش ابدا ان جده توصل بيه انه يربطها كده
فاق واتحرك ناحيتها وهيا بتحاول تضربه وهو بيحاول يفكها
فك الحبل اللي هيا مربوطه بيه فاضل الكلبشات
بيبص حواليه بيدور علي المفتاح وليلي بتصرخ وتقوله: عايزه ابني! ابني فين؟ ابني فين؟
ادهم زعق: اهدي بقي خليني اعرف افكك انا ماليش علاقه بكل اللي حصل فاهمه؟
ليلي: كداب انت كداب!! خنتني وتقولي مش عارف ازاي ودولقتي تقولي ماليش علاقه انت كداب
ادهم: اسكتي يا ليلي انتي مش فاهمه حاجه
زعق ونادي علي سليم
ادهم: سليم ___ سليم تعال هنا
سليم طلع وواقف
ادهم: مفتاح الكلبشات دي فين؟
سليم: علي فكره انت غبي!! ابنك في بيتك ومراتك اهي عايز ايه تاني؟
ادهم: المفتاح فين؟
سليم: سيبها مربوطه وخليها تختار بينكم او انها تمشي لوحدهاوهيا هتجيلك راكعه
ادهم: انت ما بتفهمش؟؟ انت ما بتحسش؟؟ انا مش عايزها راكعه افهم
انا عايزها تعيش معايا علشان هيا عايزه تعيش معايا مش بالشكل ده
المفتاح فين؟
سليم: انت غبي ومحتاج حد يفوقك سيبها
ادهم هنا كان وصل لقمه نرفزته فراح ناحيته ومسكه من رقبته ولزقه قي الحيطه ورافعه
ادهم: اقسم بالله ان ما سكت لاقت،لك هنا
ليلي: انت بتعمل ايه يا مجنون هتق،تله ادهم ادهم سيبه
سليم بيطلع في الروح
ادهم: المفتاح مش هقول تاني
سليم حط ايده في جيبه وطلعه وادهم اخده وراح فك مراته ومسكها من ايدها وواخدها وماشي وقبل ما يمشي
ادهم: قسما بالله لولا اني عامل خاطر لابويا يزعل كنت قتل،تك بس من هنا ورايح لو ادخلت في اي شيئ يخصني من قريب او من بعيد هعملها انت فاهم؟
سليم: انا عملت كده علشان اجيبلك ابنك
ادهم: ترفع قضيه علي مراتي وتقولي علشاني من هنا ورايح ملكش علاقه بينا انت فاهم؟
مشيوا وهما في العربيه
ادهم: طبعا اكيد فهمتي اني ماليش علاقه باللي حصل؟
ليلي: خالد؟
ادهم: خرجته ما تقلقيش
ليلي: كريم فين؟
ادهم: في البيت عند امي انا هاخدك علي هناك
اخدها واول ما دخلت جريت علي ابنها اللي بيعيط وفضلت تبوس فيه كأنه غايب من سنه
وادهم واقف بيتفرج عليهم
ادهم: انا اسف انك اتحطيتي في موقف زي كده؟
ليلي: انا عايزه امشي ممكن تروحني؟
ادهم: ما تخليكي يا ليلي؟ كفايه بقي؟
ليلي: اخليني؟؟؟ لا يا ادهم اللي بينا انتهي خالص ولو كان في امل 1% نرجع دلوقتي مفيش
ادهم: ليلي سليم اللي رفع القضيه مش انا
ليلي: انت عارف انت كنت صح
لما مشيت وكنت هتسافر وانا هصلتك في المطار انت كنت صح
انا اتزهقت وانت مش بايدك حاجه
انا اتهنت وانت مش بايدك حاجه
انا اتهمت بالسرقه واتقبض عليا وانت برضه مش بايدك حاجه
وكتير قوي يبقي في الاخر لازم نبعد
انت مش قادر تحمينا من عيلتك
مره امك ومره جدك وانا مش عايزاك تقف قصادهم
فمفيش قدامنا غير طريق واحد
ادهم: وايه هو الطريق ده؟
ليلي: تطلقني
الكلمه نزلت زي الصاعقه
ادهم: افندم؟ انتي عارفه انتي بتقولي ايه؟
ليلي: طلقني يا ادهم انا مش هقدر اعيش معاك تاني فلو سمحت طلقني
ادهم: لا يا ليلي مش هطلقك
ليلي: لو بتحبني وبتخاف عليا هتطلقني
لو جدك خطف كريم ولا عمل فيا انا حاجه هتعمل ايه؟ هتق،تله؟ لو قرر فجاه انه ياخد كريم يربيه هو هتعمل ايه؟ ولا حاجه
طلقني يا ادهم واتنازلي عن حضانه ابني ارجوك انا عمري ما طلبت منك حاجه بطلب ده
ارجوك يا ادهم احميني انا وابنك وابعد عننا
انت بتأذينا بقربك بتأذيني بخيانتك
ومش هقدر ارجع اعيش معاك تاني فملوش لازمه بقي
ادهم: حاضر يا ليلي هطلقك
وفعلا تمت اجراءات الطلاق بينهم وانتهت قصه الحب وبقت ماضي
ادهم بيروح مرتين او تلاته في الاسبوع يشوف ابنه ويلعب معاه ليلي بتقعد تتفرج عليهم من بعيد وتتمني في صمت
ادهم شرط علي ليلي انها تعيش في شقتهم علشان قريبه من شغله
مره اتصلت بيه اخر الليل علشان كريم تعبان راحلها بسرعه واخدها المستشفي واتحجز الولد وهما جنبه قاعده وهو جنبها ومن تعبها نامت علي كتفه
صحيت كان هو صاحي بيلعب في شعرها اتعدلت وبصتله
الشوق كان باين في عنيه وعنيها
شوق مالوش اول من اخر
قامت بعيد ووقفت جنب الشباك واتفاجئت بيه وراها وبصتله وحطت ايديها علي صدره علشان تبعده عنها
مسك ايديها وحطها وري ضهرها وشدها ليه
ادهم: قوليلي ان انا مش واحشك
قوليها يا ليلي
ليلي ما نطقتش وادهم انتقم من شفايفها
كانت ملحميه طويله عنيفه
ايديها حوالين رقبته بتشده ليها وهو رافعها من الارض
قد ايه اشتاقلها
ابنه بقي عنده 6 شهور وهيا سيباه قبل ما تولد بشهرين
8 شهور بحالهم وهيا بعيده عنه
ادهم شالها ورايح ناحيه الكنبه وناموا عليها
فكت زراير قميصه بس للاسف الباب خبط وعلي دخل واول ما شافهم ليلي اتنفضت وبعدت وعلي اعتذر وخرج
ادهم: ليلي ما تبعديش
ليلي: انا اسفه اللي حصل ده غلط
ادهم: اللي حصل ده صح انا بحبك وما بطلتش احبك
ليلي: احنا اتطلقنا والموضوع خلص
ادهم: هردك تاني
ليلي: لا يا ادهم اسفه ارجوك مش هفتح الموضوع ده تاني
خرج ادهم وسابها كان علي بره
ادهم ماشي: ابقي وصلها البيت ممكن؟
علي: ممكن بس انت رايح فين؟
ادهم: في اي داهيه بعيد عن هنا
سابهم ومشي وعلي روحهم البيت واي محاوله انه يتكلم معاها وقفتها
ادهم وليلي بيتقابلوا بس بيتجنبوا بعض
ليلي خايفه تضعف فبتحاول تحط مسافه بينهم وفي نفس الوقت بتفكر تقرب
ليلي غيرت شكلها تماما وعملت نيو لوك جديد قصت شعرها وخلته كاريه فرنساوي قصير جدا وعملت خصلات فيه
جددت مكياجها وكل حاجه فيها
ادهم زارها واول ما فتحتله تنح قدامها
ليلي: ايه شكلي وحش قوي كده
ادهم: لا مش وحش بالعكس بس انتي قصيتي شعرك؟
ليلي: فيها ايه؟ تغير
ادهم: انا كنت بحب شعرك
ليلي: عارفه
ادهم: عارفه وقصيتيه؟؟
ليلي: يمكن اكون قصيته علشان كده؟
ادهم : ماشي يا ليلي براحتك
راحت مره زارت شغلها القديم وزارت اصحابها
وهيا ماشيه فكرت تعدي علي ادهم
عند ادهم قاعد علي مكتبه والباب خبط
# محمود: في واحده بره عيزاك
ادهم: مش رايق لحد
محمود: بتقول الموضوع مهم
ويدوب ادهم هيتكلم دخلت وقعدت وحطت رجل علي رجل
ادهم: خلاص يا محمود متشكر اتفضل انت
خرج محمود
ادهم: عايزه ايه يا دولي وجايه هنا ليه؟
دولي: وحشتني قولت اجي اشوفك
ادهم: انجزي وبطلي استعباط عايزه ايه مش فاضيلك
دولي قامت وراحت ناحيته وهو لف بالكرسي وخلاه ناحيتها
وطت عليه قوي وسندت علي دراعات الكرسي ووشها في وشه
دولي: من هنا ورايح يا حبيبي لازم تفضالي لان انا شريكتك في المشروع الجديد انا اصلا المشروع الجديد فهمت بقي يا قلبي
هنا الباب اتفتح والاتنين بصوا ناحيه الباب وكانت ليلي شافتهم قريبين قوي من بعض
دولي ابتسمت ورجعت لورا
دولي: اوبس كلاكيت تاني مره
اسيبكم مع بعض واجيلك بعدين باي يا قلبي
ليلي: استني انا مش ناويه اقعد
دولي: لا هجيله في وقت تاني
مشيت وبعد ما مشيت ادهم واقف قدام ليلي عايز يبررلها اللي حصل ويدوب هينطق
ليلي: انت حر في اللي تعمله انا كنت بزور اصحابي وقولت اعدي عليك مش اكتر ولا اقل
ودلوقتي بعد اذنك
ادهم: استني انا مفيش حاجه بيني وبين دولي
ليلي: ولا في ما يفرقش معايا
ادهم: هيا كانت جايه علشان تبلغني انها شريكتي في مشروع جديد داخلينه مش اكتر
ليلي: علشان كده كانت واقفه فوقك
ادهم: مكانتش فوقي كانت سانده علي الكرسي بس
ليلي: انت مش مضطر توضح حاجه بعد اذنك
ليلي مشت ودموعها سابقاها
دولي تاني في حضنه تاني
ادهم راحلها البيت اخر النهار وحس فعلا ان مقابلتها ليه اختلفت
كانت بتضحك.وتهزر لكن حاليا بتتجنبه
كانت في المطبخ وهو جه وراها
ادهم: انا لسه بحبك وزي ما قلتلك قبل كده ولا قبلك ولا بعدك
ليلي من غير ما تبصله: وعلشان كده كل شويه بلاقيك في حضنها
ادهم لفها ليه ومسكها وخلاها تبصله
ادهم: انتي ما شفتينش في حضنها ومتقنعيش نفسك بحاجة محصلتش
وياريت تصدقيني لما اقولك مافيش حاجه بيني وبينها
النهارده جت علشان تبلغني او تضايقني انها شريكتي وبتتعمد تعمل حركات زي دي
ليلي: وانت ليه بتستحملها؟ لما بعدتهاش عنك؟ لما ديما مخليها جنبك؟
ادهم: انا مش مخليها جنبي
ليلي: امال ايه؟ فاكر لما كنا علي البحر وكانت بتتعمد تقرب منك او تنام فوقك او تمسك ايدك وانت كنت بتسمحلها
ادهم: ليلي ما تخلطيش الامور ببعض الوضع ساعتها كان مختلف
ليلي: بجد كان مختلف؟ اه كنت عايز تضايقني! يعني انت عارف انها بتضايقيني ومازلت برضه مصر تخليها قريبه؟؟؟
ادهم: واخر الحوار ده ايه؟ انتي عايزه توصلي لايه؟ انا تعبت
ليلي: انت مش واخد بالك ان احنا خلاص وصلنا
ادهم: قصدك ايه؟
ليلي: قصدي ان احنا مطلقين يا ادهم وانت حر في حياتك ودلوقتي اطلع اقعد مع ابنك قبل ما تمشي
ادهم سابهم وخرج ورزع الباب وراه
هو فعلا ليه بيبررلها؟ هيا خلاص بقت طليقته مش مراته؟ ليه مش متقبل ده؟
خلاص لازم يقفل صفحه ليلي من حياته ويبدأ حياه جديده! هوعمره ما كان شخصيه رومانسية او من النوعيه دي لازم يرجع يعيش وكفايه انتظار لحاجه مش هتحصل
ادهم بدا يركز في شغله اكتر ومديله كل وقته
محمود السكرتير بتاعه قدم استقالته لانه راجع بلدهم وادهم احتاس من غيره
كل حاجه متلخبطه وطلب سكرتير تاني وفعلا جابولو واحد تاني اسمه سيد
ادهم بيضغط على الانتركم عنده علشان يكلمه
ادهم: سيد! انت يا سيد!! يا بني ادم ياللي بره
سيد: الو مين؟
ادهم: الووو؟؟ هو انت بترد علي تليفون؟
سيد: ماهو انا مش عارف ايه الجهاز ده
ادهم: انت لسه هترغي تعال هنا
سيد: اجي فين؟ علي فكره انت مقولتش مين معايا اصلا
ادهم: يا نهار مش فايت انا ادهم يا بني ادم قوم تعال مكتبي اتحرك
ادهم اتعصب جدا وسيد جاله
سيد: طيب ما تنادي هسمعك بدال البتاع ده؟
ادهم: يا صبر ايوب المهم فين ملف مشروع القريه بتاعت شرم
سيد: والله ما خدته
ادهم: يابني ادم دور عليه
سيد: اه حاضر فريره ___ اللي هو مكتوب عليه ايه ولا لونه ايه؟ في ملفات حمرا وزرقا وخضرا
ادهم: افندم حمرا وخضرا؟؟ انت مين بعتلك ليا هنا؟؟
سيد: ابوك
ادهم: ابو؟؟؟ ابويا؟؟؟؟
ادهم قام يدور هو علي الملف لحد ما لقاه
سيد: ايه ده مكتوب بالانجليزي ده ولا ايه؟
ادهم بصله: لا ده هيلوغريفي
سيد: لا يا باشا ما اعرفش انا هيلوغريفي
ادهم: انت حد مصلطك عليا يله بقولك اطلع بره وروح مكتب ابويا عارفه؟ روح قوله ادهم بيقولك شكرا اتفضل
سيد: اقوله كده بس؟ ابنك بيقولك شكرا
ادهم: لا قوله الواد ابنك بيقولك متشكر ياسطه روح يالا
شويه وجاله ابوه ميت من الضحك
ادهم: بتضحك سيادتك
على: يعني ده بني ادم جميل يا ادهم مش عاجبك في ايه؟ وبعدين بيقولي يا اسطه
محدش قالهالي قبل كده
ادهم ضحك هو كمان: بيقولي ابوك وبيرد علي الانتركم يقولي الووو ومين معايا؟
هما الاتنين ميتين من الضحك وصوت ضحكهم عالي
ادهم: بيسالني الملف احمر ولا اخضر؟؟
علي: انا نزلتلك اعلان وبكره تلاقي كتير جايلك واختار منهم
ادهم: انا ماليش بال علي الموضوع ده خلي حد يختار بس شرط يكون بيفهم انجليزي وكمبيوتر وبيتقنهم كمان الباقي سهل يتعمله
على: لازم راجل؟؟؟
ادهم: لا مش فارق اي حد
تاني يوم ادهم غرقان وسط شغله -- ملفاته متبهدله كل حاجه متلخبطه وهو علي اخره
الباب هبط
ادهم: ادخل
دخل اللي بيخبط وادهم باصص في اللي قدامه ومستني اللي دخل يتكلم
# سلام عليكم
ادهم رفع دماغه بصلها: وعليكم السلام افندم؟
# انا جايه بخصوص الاعلان اللي حضراتكم منزلينه بخصوص السكرتيره
ادهم بصلها من فوق لتحت يقيمها والبنت اعصابها مشدوده
كانت جميله بشعر قصير عندها غمازات لبسها محترم كلها علي بعضها تركيبة جميله
ادهم: انتي خريجه ايه؟
البنت: تجاره انجليش
ادهم: بتعرفي انجليزي كويس وبتعرفي تشتغلي علي كمبيوتر؟
البنت: بعرف انجليزي وفرنساوي كويس جدا والماني شويه وبتقن الكمبيوتر بعرف اوتوكاد وجرافيك واوفس وبرامج كتير تانيه ومعايا شهادات بالحاجات دي
ادهم: سيبك من الشهادات!! بتفهمي كويس؟
البنت: افندم؟
ادهم: اللي قبلك كان بيكلمني في الانتركم ويقولي الو مين معايا؟؟
البنت ابتسمت: لا الحمد لله بفهم
ادهم وقف وبيلم في اوراق
البنت: ايه امشي معجبتكش ولا ايه؟
ادهم: معجبتينيش؟؟؟
البنت: مش قصدي المعني انا بس
قاطعها: صنفي الملفات دي ورتبيها بطريقتك بحيث لما اطلب ملف تجيبهولي بسرعه وادخلي علي الكمبيوتر وظبطي البرامج دي
وظبطي مواعيدي هتلاقيها في الدفتر هنا رتبيها ( ادهم اتكلم كتير جدا والبنت واقفه مذهوله مش فاهمه حاجه ولا مستوعبه تلات اربع الكلام اللي بيقوله فاقت علي صوته)
ادهم: فهمتي هتعملي ايه؟
البنت: اه فهمت هو حضرتك مروح؟؟
ادهم: لا عندي اجتماع مهم ارجع الاقيكي روقتي مكتبي من الملفات دي
سابها ومشي وهيا قعدت علي اقرب كرسي بتفكر هيا ورطت نفسها في ايه؟ وفجأه عيطت وفكرت تهرب
ادهم نزل لعربيته واكتشف ان نسي المفتاح في مكتبه وموبيله فاضطر يطلع تاني
دخل مكتبه اتفاجئ بيها بتعيط
ادهم: انتي بتعيطي ليه؟
البنت اتفاجئت بيه وقامت وقفت
البنت: اسفه بس انت قلت كلام كتير قوي (كلامها مش مفهوم قوي وهيا بتعيط) وانا مش عارفه اعمل ايه؟ وحاسه انك صعب وممكن تضربني لو غلطت انا اسفه انا هروح اسفه
ادهم ضحك: لا انا اللي اسف طلبت منك حاجات كتير وده اول يوم ليكي
البنت: اسفه
ادهم: لا ما تتاسفيش وما تخافيش انا ولا بضرب ولا بعض
ادهم قرب منها واتفاجئ بنفسه بيمسح دموعها بايديه وهيا كمان استغربت
رجع لورا وناولها منديل
ادهم: سوري
البنت: لا عادي ولو حضرتك شايف اني مش مناسبه همشي
ادهم: لا لا كل الحكايه اني كنت متعود اطلب كده من محمود وكان بيفهمني وينفذ اللي عايزه وما تخافيش
البنت: ماهو علشان كده طفش
ادهم: افندم؟ علي فكره لا مطفش هو سافر بلدهم
البنت: طيب لو سمحت انا محتاجه بس اتعود علي المكان ونظام الشغل وبعدها هنفذ كل حاجه
ادهم: خدي وقتك انا رايح مشواري وهبعتلك حد دلوقتي يفهمك ايه النظام وايه المطلوب منك اوك
البنت: حضرتك رجعت ليه؟
ادهم: نسيت مفاتيح عربيتي وموبيلي
خرج ادهم بره ورجع تاني علي طول
البنت: نسيت ايه تاني؟
ادهم: اكتشفت اني معرفش اسمك
البنت: نسمه
ادهم: نسمه؟ اشوفك بكره يا نسمه
سابها ومشي بس كل شويه يفتكرها وهيا بتعيط ويبتسم
راح لمراته او طليقته وكانت هتاكل فقعد اكل معاها ولقي نفسه بتلقائيه بيحكيلها يومه
وحكالها كل حاجه عن نسمه واكتشف حاجه مهمه
ان اي حاجه بتحصل معاه بتبقي ليلي اول حد عايز يحكيلها اللي حصل!!!!
نسمه روحت بيتها بتغني فرحانه مبسوطه دخلت بيتها
نسمه: ماما يا ماما انتي يا ماما
مامتها: ايه يا حبيبتي مالك؟
مسكتها وفضلت تلف بيها
نسمه: باركيلي اتعينت في اكبر شركه في مصر كلها وبراتب خيالي
امها: مبروك يا قلبي ربنا يسعدك يا حبيبه قلبي
نسمه بتحكي لامها كل اللي حصل بالتفصيل
نسمه سرحت للحظات
الام: ايه وصلتي لفين؟
نسمه: احساس غريب حسيته اول ما قرب ومسحلي دموعي __ قلبي دق بطريقه غريبه
الام: حبيبتي ابعدي قلبك خالص احنا مش زي الناس دي ولا قدها اشتغلي وبس فاهمه؟
نسمه: فاهمه يا قلبي
ادهم في شغله ومعاه نسمه بيكملو بعض
اتعلمت كل حاجه بسرعه ونظمت كل حاجه وخلال يومين كانت مسيطره علي الوضع تماما
كانت ذكيه دمها خفيف ارائها ذكيه وتحس انها عندها فطره رهيبه للشغل
كانت جنب ادهم بتعرض عليه حاجه ومندمجين الاتنين والباب اتفتح الاتنين بصوا للباب مره واحده
ادهم: ادخل واقف ليه؟
علي: مشغول؟؟
ادهم: لا عادي اتفضل ___ نسمه نكمل بعدين
نسمة: اوكي مفيش مشكله هخلص حاليا اللي اتفقنا عليه
وهيا خارجه علي بيبصلها
ادهم: نسمه دي علي خطاب صاحب الشركه دي!! ده كبير القعده يعني لو هتخافي من حد يبقي ده؟
نسمه: اهلا بحضرتك
على: علي فكره الواد ده بيهزر،، ده انا اجمل شخصية ممكن تشوفيها في حياتك كلها
ادهم: اه نسيت اقولك الراجل ده فاكر نفسه لسه شباب مع انه عجوز طحن وجد كمان
نسمه: هو فعلا لسه شباب ومايبانش عليه نهائي انه جد يعني كأنه اخوك الكبير مثلا
علي: اهههاهاي اسكت بقي وشهد شاهد من اهلها ربنا يرفع معنوياتك يا قمر
علي فكره انا ابوه مش اخوه علشان بس نبقي واضحين
نسمه: واخده بالي يا افندم
على: بلاش افندم دي علي كفايه ده ادهم وانا علي احنا ما بنهتمش بالالقاب
نسمه ابتسمت لعلي ابتسامه حسسته باحساس غريب جواه
خرجت وسابتهم
ادهم: بقولك ايه؟ صغيره عليك هاه؟
علي: صغيره عليا؟؟ اه قولتلي؟؟ ومناسبه ليك انت ولا ايه؟
ادهم: انا مابفكرش فيها من الناحية دي
علي: يعني افكر انا؟؟؟
ادهم: صغيره عليك!!!!
علي: خلاص متزقش صغيره صغيره المهم نتكلم في الشغل
نسمه روحت وطول ماهي قاعده مع مامتها سرحانه
الام: بنت انتي مالك النهارده؟ في ايه؟
نسمه: شوفت باباه النهارده
الام: بابا مين؟
نسمه: ابو ادهم
الام : ادهم مين؟
نسمه: يووه يا ماما ادهم صاحب الشغل
الام: وماله ابوه كمان ان شاءالله؟
نسمه: راجل جانتل رقيق دمه خفيف قريب قوي من القلب
الام: الولد وابوه؟؟؟ ما تلعبيش بالنار يوم تقولي ادهم معرفش ماله والنهارده تقوليلي ابوه معرفش ماله
يا تفوقي كده يا مش هتروحي الشغل ده تاني فاهمه؟
نسمه: انتي بتقولي ايه؟ انا مش بفكر كده؟ وبعدين انا عمري ما هسيب الشغل ده ابدا
الشغل ده بقي حياتي كلها فاهماني؟؟
يتبع....