رواية خدمة من الجن العلوي كاملة بقلم محمد مهني عبر مدونة دليل الروايات
رواية خدمة من الجن العلوي الفصل الثالث 3
ومن اكتر المواقف اللي بجد خلتني أخاف وكنت هتشل من الخوف.. الموقف ده؟!
يومها كنت لوحدي في الشقة.. وكنت لسه داخل انام.. وانا اصلا متعود انام متأخر يعني سته او سبعه ع ما بنام.. نمت كالعادة حاجة صحتني.. وعرفت طالما حاجة صحتني يبقى انا هتكتف.. وفعلا اتكتفت جامده أوي! وفضلت أحاول اقرا قران.. لحد ما خرجت من بوقي آية.. فهنا اتفكيت.. ولما اتفكيت قومت وقعدت نص قعده ع السرير! وبعدها شوفت اللي محدش يستحمله؟!
كنت شايف في رجلين ماشيه على البطانية.. رجلين مدورة مش زي رجلينا.. بتمشي من أول طرف في البطانية... تمشي يمين وشمال يمين وسمال.. ولحد ما بقت عند بطني! فهنا اترميت على ضهري.. وحاجة مسكت ايدي الاتنين وكتفتني بالعكس!...
عارفين لما تمسكوا حد من أيده الاتنين وتلفوها جامد ورا عند ضهره وتضغطه!..
ده اللي حصل معايا اتكتفت من ايدي بالعكس!.. حرفيا مكنتش قادر اتحرك من تكتيفت ايدي.. وحاسس بشيء تقيل جدا جاثم على ضهري.. وحاسس بهوا سخن بيتنفخ على ايدي! مكنتش كمان قادر اخد نفسي.. ولا كنت أتكلم.. لكني كنت بحاول أحرك راسي عشان اشوف مين اللي ماسكني.. حاولت بعزم ما فيا وحركت راسي اللي كانت لازقه ع السرير.. وفين وفين لما قدرت احركها ناحية اليمين.. حركتها اخيرا.. وفي اللحظة دي حسيت بهوا سخن بيتنفخ على وشي من الناحية الشمال! فهنا حاولت تاني احرك راسي للناحية الشمال.. ولما عملت كده لقيت الهوا بيتنفخ جامد على وشي.. وسامع صوت بيزووم! صوت يخوف أوي! وبعد الصوت ده شوفت خيال اتشكل قدامي وانا باصص... مش باين من الخيال ده غير فتحة عينه الاتنين وبوقه.. واللي كان لونهم اصفر زي اللمون! لون العنين والبق أصفر.. وشايفهم بيتحركوا في الهوا!.. وصوت الحاجة اللي بتزوم لسه سامها حوالين مني! وده غير اني لسه متكتف ومش قادر اتحرك.. لكن فين وفين لما لساني اتفك ونطقت بايه من القرآن والحمد الله اخيرا اتفكيت!...
وبمجرد ما جسمي فك جريت ع الصالة بفزع وفتحت التلفزيون على محطة القرآن الكريم.. ورحت وقعت على الأرض! ولما فوقت فضلت استعيذ من الشيطان واقرأ قران لحد ما هديت..
كان اكتر كابوس في حياتي.. بجد اترعب جامد وكانت أول مره اخاف بالشكل ده!..
انا بقيت شبه يوميا بتمسك المسكه دي.. تكتيفه مرعبه.. لحد ما جه يوم وحلمت حلم غريب اوي! لكن قبل الحلم ده واحد قالي هتجيب ماء ورد شوية حاجات تانية من عند العطار.. فقلت لنفسي بكرة هشتيرهم.. وفي نفس اليوم ده حلمت بالحلم الغريب.. انا أصلا من وقت ما الدجال ده جالي وقال هشيلهم منه مبقتش أفتكر احلامي خالص.. لكن الحلم ده هو الوحيد اللي افتكرته..
شوفت في الحلم عقرب أسود اوي عمال يلف حوالين نفسه.. وفي الجزء التاني من الحلم شوفت منظر غريب في السما؟ شوفت قمر وفوق منه هلال.. وفوق الهلال نصف قمر! و انا وقتها كنت حاسس براحه ومبسوط من المنظر وحتى كنت بقول الله على المنظر الجميل ده..
لكن تاني يوم من الحلم ده عملت حادثه جامده.. حادثه كنت هموت فيها! عملت عمليات في وشي ورجلي.. حوالي 26 عملية ف وشي.. وغير باقي جسمي اللي كان متكسر.. وكنت فاقد الذاكرة لفتره طويله.. وقعدت ع السرير فتره كبيرة مش بتحرك!...
وفضلت سنة واكتر نايم ع السرير مش بتحرك.. وخلال الفترة دي مكنتش بتمسك او اتكتف.. ولحد ما الحمد الله صحتي اتحسنت.. وكانت التكتيفه دي بتجيلي كل فين وفين.. لكن كان في أحلام بتتكرر معايا؟ وهي اني كنت بشوف بنات جميله اوي.. جميله بشكل حرفيا يرعب! ايوة في جمال يخوف لما يكون مبالغ فيه! البنات دي كانت بتجيلي وبيحصل بينا علاقة جن--سية!...
علاقة كامله كنت حاسس بكل تفاصيلها!...
وفضلت على كده كتير.. البنات دي أشوفهم.. ومبقتش اتكتف غير ممكن مره او اتنين ف الشهر مثلا... ولما تواصلت مع ناس بيقولو بتفهم ف الحاجات دي قالولي ان حلم البنات دي مس عاشق!..
امأ اللي كان بيحصلي وانا صغير من رؤية اشخاص بيضه.. فدي خدمه خير ليا.. أقدر اساعد بيها نفسي وكمان غيري.. والشيخ اللي جالي ده دجال وشاف ان عليا خدمه.. ف اللي عمله انه حجبهم عني! لانه مش هيقدر ياخدهم لكن هو عمل حجب بعنى.. انت لما تكون دايما بتقعد مع ناس كويسه.. وفجأة دخل بينكم شخص مش كويس.. فالناس الكويسه هيمشو لانهم الشخص اللي مش كويس ده مش حابين وجوده! فالدجال عمل كده بعت لي جن كافر يحجب عني رؤية او التعامل معهم.. لاني هحاربه.. بمعنى ان هو مثلا هيأذي الناس فانا هشفي.. وعشان كده ماحبش ان يكون معايا الخدمة دي عشان هحاربه بيهم.. وهو حد مش كويس وبيأذي الناس!...
انا والله ماكنت عايز كل ده..
ومعرفش ايه اللي بيحصل معايا! ونفسي اعيش حياتي زي اي حد.. انا اصلا حياتي اتدمرت! وهحكيلكم ليه اتدمرت؟
انا في الفترة اللي كنت بتكتف فيها.. تواصلت مع ناس كتير عشان الاقي حل للي بيحصل معايا.. ومن الناس اللي تواصلت معاها كان على جروب خاص بالروحانيات.. دخلت وحكيت مشكلتي..
ف حد كلمني وقالي هيحصل معايا مشاكل كبيرة في الفترة الجاية.. زي اني هبعد عن الناس.. وهحب الوحده.. وكمان هحاول انتحر!.. وفعلا ده حصل معايا.. بعدت عن الناس.. وحاولت انتحر في الفترة اللي كنت عامل فيها حادثه.. وكمان ابويا وامي اطلقوا وكل واحد اتجوز وبعدوا.. واخويا التوأم اتجوز واستقر بحياته لوحده ومبقش أشوفه.. واحنا حاليا قاعد لوحدي.. وخطبت وفسخت.. وبقيت مقفول من الجواز أصلا.. حتى الشغل بقيت اكرهه.. قاعد لوحدي ومحدش بيسأل عني!..
وشيخ تاني كنت رايح له عشان يساعد حد تاني وكان الحد ده ابويا... الشيخ ده قال لي ان أبويا شارب سحر أسود! وكمان قالي أن أبويا متجوز وكمان اتجوز تلات مرات ف فتره صغيره.. يتجوز ويطلق وده حصل خلال تلات شهور.. وفعلا اتأكدت وطلع انه اتجوز تلات جوازات!.. وطبعا كلنا عارفين هو عرف ازاي.. من القرين.. استجوابه!..
وفي نفس اليوم اللي قابلت الراجل ده.. كان بيعمل حاجة غريبه اوي؟ وهي انه طول الجلسة عمال يبصلي جامد.. وانا الفضول اخدني فقلت له ( معلش الفضول واخدني هو انت ليه بتبصلي كده) ؟! فقالي ( انت معاك حاجة وليا معاك قاعده طويلة) ومن بعدها مبقاش يرد على مكالماتي نهائي ومعرفش ليه؟!..
وكان نفس الشخص ده عمل حاجة غريبه؟ وهس ان كان في حد تبعنا ضايع منه خاتم.. فراح للشيخ ده فقال له ان اللي سارقه فلا واشترى عفش بيت بفلوس الخاتم.. ولما واجهنا الشخص اللي قال عليه الشيخ طلع كلامه صح!..
ومن الحكايات الغريبة برضه اللي قريبه ليا.. ان كان في بنت من المنطقه بتاعتنا.. بنت صغيره.. وكان ف شيخ الناس بتروح له عشان لو حد عنده مشكلة روحانيه.. زي مس مثلا او حاجات ضايعه.. المهم ان الشيخ ده كان كبير في السن.. وفي يوم طلب البنت دس بالاسم.. وراحت له وقعدت معاه لمدة يوم ف بيته.. وخرجت واحده تانيه؟ هي البنت دي كانت عامله زيي كده.. بتشوف حاجات.. وعشان كده الشيخ طلبها بالاسم.. ولما راحت له وخرجت من عنده بقت تتنبأ بحاجات وتحصل.. وتعرف اماكن الحاجات المسروقه.. او الكنوز المدفونه!..
ومن اغرب الحكايات عن البنت دي..
كان في طفل غرق في ترعه عندنا.. واهله فضلوا يدوروا عليه كتير ومطلعش من الماية.... فراحوا للبنت دي و قالت ع يوم معين الطفل هيطلع فيه من المايه.. وبالفعل أهله لقيوا الطفل حي في نفس المعاد والمكان!...
ودي كانت حكايتي ومعاها كام حكاية انا عشتها.. ونفسي الاقي حل وتفسير للي بيحصل معايا.. واخلص منه! وأعيش حياتي بشكل طبيعي زي اي شاب!...
وبكده نكون خلصنا الحكاية اللي كل أحداثها حقيقية على لسان صاحبها الاستاذ Hassan Abo Alazm وزي ما بيتقال العهده على الراوي...
وحقك تصدق او تكذب لكن مش من حقك تسخف باي شيء حصل مع غيرك لأنك ماتعلمش قد ايه هو عايش في معاناه.. وعلى فكرة عالم الجن كبير أوي.. ومليان أسرار كتيره جدا... وياما حصل حكايات زي دي وافظع من دي كمان...
وكده مش ناقص غير ان أقولك تفسير للي اتحكى؟
رسايل كتير اوي اتبعتت لي وفيها تفسيرات كتيره للحكايه ومنها اللي هقوله دلوقتي...
من الحاجات اللي اتقالت ان أستاذ حسن من الزوهريين.. ودول أطفال أصحاب طاقة روحانيه جبارة.. بيخاف منهم الجن وبيهابوا.. وبيكونوا مفتاح الكنوز.. وأصحاب الهبة الربانية... والسحرة لو لقيوا حد منهم مش بيسبوهم في حالهم.. وياما قصص اتحكت عن أطفال اتخطفت واتقتلت عشان فتح الكنوز.. واستاذ حسن منهم..
أما عن الشيخ ففي حد قال ان الشيخ حد كويس ومأذاش صاحب الحكايه.. هو عمل حجب فقط وده عشان يحميه.. يحمي من دجالين لو شافوا اللي عليه مش هيسبوه!..
وأما عن الكاهن اللي شافه.. فده رصد مقبرة مليانه بالكنوز.. واللي بيحصل معاه من تكتيف وأحلام غريبه.. وعكوسات في حياته مش هينتهي غير بطريقه واحده.. وهو انه يروح يفتح المقبره دي.. كل اللي بيحصل مع بطل الحكايه من الكاهن.. عشان يخليه يفتح المقبرة.. لأنها ليه.. وهو بس اللي هيفتها...
ومن التفسيرات اللي جت لي واللي انا معاها جدا هو التفسير ده.. وهكتبه من غير ما اغير فيه حرف زي ما اتبعت لي..
ربنا بيدي مواهب مختلفه . . الولد ده عنده موهبه ان عينه مفتوحه (عينه الروحيه) بمعني انه يقدر يشوف كائنات العالم الروحاني اللي مش بيتشافو بالعين المجرده وعشان كده كان قادر يشوفهم ويسمعهم. المواهب عموما للعلم بس مش شرط اللي بيشوف يسمع والعكس ولكن هوا موهبته جميله بيشوفهم ويسمعهم كمان...
المنطقه اللي كان فيها ، كان في تحتيها حاجات زي ما قال والحاجات دي بيبقا ليها حراس (شياطين بيحرسو الحاجات المدفونه تحت الارض بيبقا اللي دافنها معزم عليها عشان يحميها من اي حد انه يكتشفها ويسرقها) والولد شكله متربي ع انه يقرب من ربنا ويتكلم معاه (يصلي بجد مش بيردد كلام وخلاص). وبالتالي ربنا كان باعتله اللي يحميه (الاطياف اللي كان بيشوفها) . انا جاله الشيخ وصرفهم ده ادا فرصه للشياطين انهم يظهروله ويشوفهم لانه كده كده بيشوف العالم الروحي فلو الكويسين انصرفو هيشوف غيرهم اللي هما الشياطين.
لان ببساطه قانون الارض ان مفيش حاحه اسمها مكان فاضي، يا في اشرار يا في خدام من عند ربنا (روحانيين) دول اللي بالعربي بيحمونا ويساعدونا لو احنا بانيين علاقه كويسه مع ربنا (زي ما نرجع من بره ونقول ده ربنا سترها انهارده كنت هعمل حادسه ومعرفش ازاي فجاه انتبهت وجريت مع اني كنت سرحان!) دول بيبقو خدام ربنا الكويسين هنا اللي بيساعدو..
وعلي الصعيد التاني اللي بعيد عن ربنا ، بيتاذي لان مبيبقاش في خدام كويسين وبالتالي الشياطين واخده راحتها ف الاذي)..
الحل: ولا يروح لحد ولا يعمل اي حاجه، يصلي ويقرب من ربنا ويطلب منه يكون معاه، صدقني كله هيتحا وهيبطل يشوفهم...
ده اكتر تفسير انا معاه..
الحل في ايده..
يبعد عن اي حد يقوله هساعدك.. ويقرب من ربنا.. يقرب اوي.. وربنا هيحلهاله من عنده ومش هيشوف اي حاجة وحشه.. وحياته هتستقر...
- تمت بحمد الله