رواية ملائكة بالف وجه كاملة بقلم اروي طاهر عبر مدونة دليل الروايات
رواية ملائكة بالف وجه الفصل التاسع عشر 19
يقولو متحسوش بي قيمة الشي لين تفقدوه الجملة هادي نقولو فيها لان سامعينها من اكتر من حد
لكن صعب اي حد يحس بيها والانسان يلي يحس بيها رح يعيش طول حياته يتحسر ونادم
هادا لو مقتلاتاش الحسرة !
نجم الدين:على شنو تحكي ؟!
شن تدوي انتي
شيخه:عندي ورم والباين انه جي في وقته
انا مش رح ندير اي علاج ولا عمليه لانها خطيره هلبا مفيش داعي نموت وانا راسي مفتوح
وبين الاطباء و……….تنهدت بملل وحزن
تحملني ها اليومين بس
نجم الدين:حط يده على راسه بتعب وهوا مش مستوعب الكلام يلي سمعه
شيخه:كلمتني بكري مودة عرفتني بي نفسها وحكتلي كل شي انا مش …….
نجم الدين:قاطعها بي هستيريا مخه رافض انه يستوعب …….ورم شنو!؟
طاح على ركابه ع الارض وهوا يرجف مع بعضه وصوته متقطع …..انتي
انتي تعاقبي فيا بي ها الكلام ولا !
انتي تكذبي صح !
انا راهو منبيهاش شيخه حبي ليك خلاني نتعالج في مصحات نفسيه ع خاطرك
نبي نكون واحد كويس ويعرف يحافض عليك
طاحو دموعه زي المطر دفعه وحده……..طحت في دكتوره بنت حرام اكتر ما زادت بعدتني عليك
شيخه:طبعا مصدقتش كلامه ولا اهتمت بي القصه يلي حكاها بسبب الماساة يلي كان معيشهولها 💔…..جاوباته بهدوء
مفيش داعي لكل الدراما يلي ادير فيها عشان تبان قدامي انك متاثر قدامي متخافش انا والله ما زعلانه
اساس معنديش اي شي نعيشله
اهل معنديش ينشد بيهم الضهر وراجلي عنده قصة حب يعيشها حتى ولدي ممكن احسن ليه تربي بين اثنين يحبو بعض اسرة صحية بدون مشاكل وضرب وعياط سيباته وخشت لي غرفة النوم وسكرت الباب
نجم الدين :كر نفسه وهوا ع الارض مسك ورقة التحليل وسند نفسه على الحيط
ركز في التحليل ثواني وسكر عيونه وهوا يقول
عطيني اخر فرصه ياربي
اخر فرصه نوعدك منضيعهاش يارب عاوني قويني فرصه منك يا الله بس ها المره
وقعد لحضات ع الارض وبعدها ناض بسرعه طلع من الحوش
___________________________________
نجمة:فتحت عيونها على ريحة حلوه وكانت ريحة بخور
شدت حيلها شوية وتفحصت الغرفه بعيونها كانت خرفة عاديه جدا جلسة وبساط على اللون الابيض والذهبي
مسكت راسها بيديها شويه محاولة انها تصحصح اكتر من الغيبوبة يلي كانت فيها
وقفت على رجليها وشافت يمين يسار ورجعتلها الذاكرة
بصوت هادي قالت …..هادا حوش عمي !
بعد ها الكلمه حطت يدها على فمها بصدمه والخوف عبا قلبها !
يعني معقوله بعد كل ها الوقت منسوهاش وكانو حاطينها في راسهم !
اتجهت بسررعه لي روشن الدار بس الروشن كان مسكر بي الحديد ومفيش اي أمل تهرب منه 💔
اتجهت بعدها بسرعه للباب وطبعا زي ما توقعت كان الباب مسكر بي المفتاح
رجعت نجمة لي زاوية الغرفة قعمزت وقلبها بيطلع من الخوف
كل تفكيرها كان ……هاذي نهايتي !
خلاص بيقتلوني!
خذت نفس عميق وقالت في خاطرها …….لا وربي مستحيل يقتلوني
كيف عمامي وبابا مستحيل من دمي ولحمي لالا لا مش رح يصير شي
ناضت نجمه عند الباب ودقت مره واثنين و3 ومفيش رد
رجعت مكانها
بعد قريب 10 دقايق انفتح الباب وخشت مرت عمها !
منى:يا اهلا وينك العفو عاش من شافك معقوله هكي تبيعينا كلنا في يوم وليله!؟
نجمه:بلعت ريقها …..من جابني هنايا؟
منى:قامت حاجبها …..مش مهم من جابك ياحنا
حطت يدها في نصها وبدت هزايب…….معقوله يا فصعونه يابنت العايبه تختفي على اهلك هكي !
ولا لهطي الفلوس وتسحابي روحك خلاص بتاخديهم بروحك وبتعيشي بيهم يلي مفيكش درت حشمه
نجمة:نصدمت من الكلام !……..انتي شن تحكي !!
شن دخلك فيهم الفلوس اصلا وهما حلال ماما
وديري بالك ع لسانك ماما عمرها ما كانت عايبه
منى:ضحكت,…….هه وطلعلك لسان تردي زياده
به ياحنا اهو بوك جاي توا وتي نفسك باش تواجهيه هوا وعمامك
ياريت يقتلوك لان بجد جلتب العار للعيله من يوم ما امك انحبست وانتي هاربه الله اعلم في حوش منو كنتي ومع منو كنتي تباتي
الله لمنو بتطلعي يعني غير امك ها !
نجمه:عيطت عليها بصوت عالي …….سكككككككري فمك انا وماما اشرف منك ومن عيلتك كلها ياواطيه
منى:اي اي اطلعي على حقيقتك بزبط فعلا مفيش حد ضالمك
خشيت بنقولك معش اطقي ع الباب حفيدي راقد استني ها الكم ساعه لين يجو بوك وعمامك يلاقولك حل ويدبرو وين يحطوك
مش ناقصني انا …….وطلعت وسكرت الباب
ومن خلال خشت مرت عمها هادي واضح جدا ان الامور متبشرش بي خير !!!!!
______________________________________
درست السياره وقلوبهم الاثنين كانت مكسوره
الاثنين كانو يرجفو من الداخل وكل واحد كان قلبه موجوع بطريقه جدا صعبه 💔
كسر حاجز الصمت يلي بينهم صوت ندى وهيا تقول !
ندى:بدل ما جايبني الحوش اهلي خلينا نمشو مكان بعيد شوي نحكو فيه
نذير:معنديش كلام معاك
انزلي ووجهك منبيش نشوفه مره تانيه
ندى:نذير …..الشخص يلي بعت هوا واحد م…….
نذير:انززززززلي صوتك كرهتااااا
انزلي من قدامي معش تخليني نتقزز منك اكتر من هكي قرفت منك كنت نسحابك بتتعدلي وعطيت عذر قلت ممكن الاول كان حب حياتها
وثقت فيك الزح عطيتك كامل الثقه بدون ما نفكر
ندى:مسحت دموعها …….هديل كانت ………
نذير:قاطعها للمره التانيه ……..انزلي
معش تجيبي سيرة اهلي ولا سيرتي على لسانك واياني وياك تحاولي تبعتيلي من اي رقم
ندى:بعد مقاطعات نذير ليها والكلام يلي كان زي السم في حقها وصعوبة الموقف خلاها تسكت
نذير:سكت وهوا داهش من كثر الاعصاب والعياط
قال بصوت متقطع ……..اءء انتي انتي انتي طالق
ندى:سمعت ها الكلمتين وملامح وجها تجمدت من الصدمه 💔
كل يلي تحرك فيها دموعها بس يلي نزلت
ويدها يلي فتحت الباب
لحضات خدتهم عشان تقدر توقف على رجليها ……ونزلت بعدها من السياره بدون ما تتلفت وراها
رغم كل يلي صار كان قلب ندى مرتاح
لانها فعلا مش مدايره شي غلط لا في حق جوزها ولا حتى حقها💔
رغم ان التصرف يلي دراته ممكن يكون غلط لكن مفيش غيره مستحيل تصارح راجلها بي شي زي هكي احتمال يقتل اخته بدات لو شاف الصور 💔
وتعرف كويس ان الحق في يوم من الايام رح ينكشف
خشت لي حوش اهلها وهيا مواعده نفسها تكتم سر هديل يلي ربي سترها وقررت تستره حتى هيا
رغم مشاعرها يلي كانت محروقه حرق ورغم الطلاق يلي نزل عليها زي السم💔
بس المره هادي كانت قويه …..ابتسمت وخدت نفس عميق وخشت
فتحي:مش عارف انا ها المصايب من وين تتحدف علينا يارب الصبر بسس
انور:هدي روحك شويه يابوي راهو سكرك يرقى كله ينحل ان شاء الله
فتحي :شاف لي طه……فوق من درتله حوش وعطيته مبلغ محترم الكلب هادا حشمني مع اهل مرته
عطوه مرا مصنعه امنعه صغيره وحلوه وبنت حسب والنسب شنو دار فيها ؟
عيشها في رعب مسكينه وقريب قتلها ها الحقير يلي ما يتحشم
تفوووو عليك وعلى رباتك يلي ربيتهالك
طه:منزل راسه في الارض
فتحي:اخرتها تجيني وحده من الشارع واهلها خريجين حبوس وفي يدها حفيدي
خلاص معش لقيت من تاخد حسبي الله فيك
طه:مش ولدددددي وغضوا الفحص يبين انه مش ولدي
فتحي:سكر فمك صوتك منبيش نسمعه واقسم بالله تهرب ولا تطلع لي مكان انا منعلمش بيه تشوف شي ما يعجبك
طه:رجع سكت وكانت ملامح الغضب واضحه عليه
ندى:السلام عليكم
انور:وعليكم السلام
فتحي:ابتسم…..يا اهلا يا اهلا❤️
شن ها الزيارات الحلوه هادي فجأه وين راجلك
ندى:بعد ما سلمت ع خوتها الزوز واتجهت لي بوها
نذير حطني ومشي قتله خلاص بعد العرس نبي نريح شويه في حوش بوي
حطني ومشي عنده شوط كوره
فتحي :تنوري حوشك ياغاليه ❤️
ندى:شافتلهم بي استغراب …..شن في ان شاء الله خير ؟
ليش هكي حالتكم !
انور وطه يشوفو لي بعض وساكتين
___________________________________
ريحانه:كانت حايسه في غرفتها كأنها ادور في شي ومش لاقياته !
قعمزت على سريرها واذكرت وين حاطته وخبطت راسها بحسرة
مسكت تالفونها وكان قلبها يدق بقوة
هل تكلمه وتسأل ؟!
ولا تتراجع !
بدو يديها يرجفو وهيا مستغربه في نفسها !
من امتى كانت يدها ترجف عشانه !ولا معبراته اصلا ؟
اخر شي اتصلت عشان تثبت لي نفسها ان يلي صايرلها من الضغط والتوتر بس مفيش ولا اي شي تاني
نصر:كان راقد على الصالون يتفرج على المباره وياكل في الحلويات يلي فاضلين من العرس ومنضر الشقه كان مزررررررري جدا
حوستها مش طبيعيه وهوا ولا وعلى بالها
سمع تالفونه شرين فاته المره الاولى وكمل اكل
المره التانيه مسك تالفونه بعدم اهتمام بس لما قري الاسم انخنق بي المقروضه😂
وناض بسرعه قعمز وهوا يكح وروحه قريب تطلع 😂
مكانش مصدق الاسم يلي يتصل بيه
رد بسرعه وهوا قاعد يكح قريب يموت بس يحاول يبين انه عادي 😂😂
نصر:حححححم اهلين
ريحانه:عقدت حواجبها بي استغراب ……..مريض ؟؟ فيك شي؟!
نصر:اه لالا مفي شي كنت نشرب في اميه بس شرقت
وشاف لي مترد الحلويات يلي كان معبي الطاوله كلها 😂
ريحانه:الف سلامه عليك
نصر:بتوتر….اءء يوريك باس
ققصدي
يعني الله يسلمك
ريحانه:ابتسمت بسبب غبائه ……..قتلك عندي خاتم ذهب هديه من بابا توا قلبت عليه
وكيف اذكرتله
في يوم كنت نغسل في شيشة حمودي الله يرحمه و……..
بلعت ريقها
خفت عليه يتلبز وتقعد ريحته حليب نحيته وحطيته فوق التلاجه لو ممكن تشوفه قاعد او لا ممكن !
نصر:اءءء اي اي اكيد دقيقه خليك معاي
ريحانه :تمام
نصر :ناض من مكانه وهوا يتخطا في كومات الحوايج والمخاد يلي كانت ع الارض وطاح قبل ما يوصل للمطبخ 😂
ورجع ناض ويحاول ميخليهاش تسمع 😂
لين وصل للمطبخ مد يده وجاب الخاتم
نصر:وهوا مبتسم……الله يبارك رزق الحلال ميضيعش قاعد في مكانه
ريحانه:ابتسمت …….الحمد الله خلاص بكرا بابا يمر عليك ياخده
نصر:شاف لي حالة الشقه ……….لااااااااااااا
نقصد لا علاش اتعبي فيه انا اصلا طالع بكرا تو نخطمه عليكم
ريحانه:تمام كيف ما تحب
نصر :العرق بدي ينزل منه ويبلع في ريقه من التوتر ……اءءء انتي
انتي كويسه ؟
يعني ان شفت صراحه رجلك مكسورة هداك اليوم
ريحانه:بلعت ريقها ……اي كسر بسيط الحمد الله مشت اموري تمام
يالله الباين طولت عليك توا ❤️
تصبح ع خير وصحيت هلبا نصر ربي يخليك
نصر:رد بي هدوء واستغراب ……..سلمك ولو
تلاقي الخير
وكملت المكالمة !!!!!
شعور هلبا صعب تصير محادثه او مكالمه بين اثنين منفصلين
فما بالك تصير بين نصر وريحانه يلي مرو بي ضروف مفيش من اصعب منها
سكرو الاثنين وكل واحد فيهم ملخبط اكتر من التاني بس الشي يلي كانو متفقين عليه ويطبقو فيه هوا الثقل👌🏻
نصر:نزل بسرعه بعد ما سمع اكتر من شخص ينادي عليه وقال مستغرب …..تي هااا شن فيه!
نبيله:بنت خالتك نجمه فوق ؟
نصر:لالا خليها بتخش لوطه
كريمه:بي فزع وخوف …….حتى انااا خليتها وراي البنت وين اختفت !
نصر:كيف هكي غير زيدو دورو
نبيله :تي قلبنا عليها الدنيا مهناش نحسابوها ركبتلك !
نصر:تي كيف هكي
نذير:السلام عليكم
نبيله:جيت وجابك ربي وليدي …….مريتش نجمه !
نذير:مريتش حد ……..وفات طول لي شقته
نبيله:بسم الله هادا خيره !؟
كريمه:معصب الباين ربي يستر
نصر:دقيقه نشوف الكميرات
كريمه:بخوف……اي الله يربحك
ندى:تشوف لي تقوى بي استغراب وقرف من منضرها وكلامها !…….انتي شن دخلك غرفتي !
انتي كيف تتجرئي وتاخدي غرفتي ؟
تقوى:والله الحوش حوشي ونقعمز وين نبي
ندى:قامت حاجبها بي استغراب …..حوشك !
تبصري انتي ؟
تقوى:بي اسلوب مستفز ……..اي ياحنا حوشي وحوش ولدي حبيبي
ليه في حوش جده زي ما ليكم بزبط
ندى:لا رسمي انتي مش طبيعيه ……..وطلعت
تقوى:اففففف شن جيبها هادي التانيه توا
طق الباب اكتر من مرة
كفاح:اول ما فتحت الباب ارتسمت على فمها البسمه ❤️
يا اهليييييييييييين ياقلبي امتى جيتي
ندى:كيف وصلت 😊
سلمو على بعض الاثنين وخشت ندى لي حوش خوها ورا كفاح
____________________________________
فيه ناس تتمنى الدنيا تحن عليهم شوية بس وترجعلهم بوهم حتى لو 5 دقايق
وفي ناس اول مايشوفو بوهم تنزل عليهم راحه وسكينة وقوة مش طبيعية ✨
بس في ناس اول ما تشوف بوهم ينزل عليهم الخوف كله زي لي صار مع نجمة بزبط!
نجمة:تجمدو رجليها من الخلعه ووجها انخطف لونها وحتى ريقها جف اول ماشافت بوها !
كان مشهد رعب بكل معنى الكلمه
بوها ووراه عمامه الاثنين
نجمه:قالت بصوت متقطع …….. ببب ب بابا!
خليل:بوك صار يا فاجره يلي ……….
وخشت الحكايه بعضها …… خش بوها بيضربها وعمامه ماسكينه بسيف ويحاولو يحزو بينهم
طبعا مش حب في نجمه ولا خوف عليها بس خايفين ان يصير فيها شي ومتلحقش تتنازل على كل ورثها
سالم:(عمها)وحد الله ياراجل خلاص اطلع اطلع من هنايا تو نديرو حل ميمشوش الاعصاب هكي
مبروك(عمها):طبس على سالم وقال ….احسن حاجه تبعتها للاستراحه متع خوي مسعود
تو نجيب معاي محرر العقود واطلع هيا الاوراق نضمنو حقنا ويلي يفضل ياخده بوها وتمشي الامور
غير بعدها على هنايا بس
نجمه:كانت تحاول تفهم شنو يلي يقولو فيه بس مفهمتش ولا اي حرف
كفاح:تفضلي عصير مصقع ياسلام عارفاتك متحبيش القهوة
ندى:يبارك فيك
كفاح:علاش مقلتيش انك جايه ؟
ندى:كانت رح تضعف وتحكي بس مسكت نفسها في اخر لحضه
لان بايته جيت في الليل والله حيلي مهدود من العرس ومخاطريش انوض بكري
كفاح:والله احسن ما درتي القلب
لكن وين الراحه بالله مع الحربايه يلي لوطه
ندى:بجديات نصدمت فيها حتى لما حكيتولي عليها في العرس متوقعتش تكون هكي
انتي مستوعبه انها احتلت داري احتلال تام قاعده فيها هيا وولدها
كفاح:على سيرة ولدها غضوا بتطلع نتايج التحاليل ان شاء الله خير تو
ازمه ومأساة بجد كان طلع ولد طه حي ها حي ع العار يلي بيصير !
ندى:تنهدت بعمق ……وربي ما نبي نتخيل حتى شويه لا
ساد الصمت بينهم شوية وانتهزت الفرصه هادي ندى وبدت تحكي وتألف
ندى:مسكينه توا كلمتني صاحبتي ونكدت عليا
كفاح:ان شاء الله خير شن صاير !
ندى:هادا يا حنا ………… وبدت تحكيلها في قصتها مع هديل ونذير بدون ما تقول ان كل يلي صار صار معاها
كانت الصدمه على وجه نصر واضحه بعد ما شافو فيديو الاختطاف الصريح يلي صار قدام حوشهم
اما وجه نبيله وكريمه بعد يلي صار ملامحهم متتفسرش من الصدمه والخلعه💔
والكل مكانش مستوعب !
كيف شي زي هادا يصير قدام حوشهم عيني عينك هكي وبدون ما يحس عليهم ولا اي حد !
_________________________________
يقولو الليل على المريض طوييييل 🌓
لكن صدقوني الليل على المهموم مزال اطول بي هلبااااا🌑🌑
كانت الشيخه طول الليل واقفه على روشن المربوعه لان الوحيد يلي كان يطل على الجنان !
كانت تراجي 💔
تراجي في نجم الدين يروح يقلها انا معاك لين تموتي على الاقل!
يروح يسمعها اي كلمه اطيب خاطرها
كلمة تكون حقيقية 💔
راجت هلبا والانتضار كمل لما سمعت ادان الفجر
وعرفت كويس ان نجم الدين استغل الموقف ومشي لي حب قلبه
لكن ياترى هل هادا يلي صار !؟
لو ها التفكير مش صح ليش غاب عليها طول الليل رغم انه ها الوقت كانت اكتر وقت محتاجته فيه !
اما ندى كانت غااارقه في تفكيرها
كيف بتجب خبر طلاقها لي اهلها وهما في عز مشاكل خوها !؟
كيف بتزيد هم بوها على همه هكي !
يا ترى هل رح تسمع بي نصيحة كفاح يلي قالتها !
كفاح:يلي دراته صاحبتك غلط هوا في النهايه خوها وميرضاش اخته تنفضح قدام عريسها يعني شي اكيد رح يستر عليها حتى لو ضربها عاقبها دار فيها اي شي في النهايه مستحيل يقول لي راجلها راهو الشي هادا عيله تامه تنفضح منه
مفروض تبعتله اي حد او تكلمه ان شاء الله بي رساله تحكيله كل شي صار صدقيني لازم تقول الحق
فاقت من تفكيرها كله لما سمعت صوت الاذان …..ناضت خلت كلللل شي ع جيها وتوضت وصلت ❤️
اما نجمه قضت ساعتين في طريق لي مكان متعرفاش !
من الساعه 3 في الليل لعند ال4 ونص عشان وصلت
نزلت من السياره وكانت داخل استراحه بابها كبييييير وسحاب
دخلها عمها بقوه لي الحوش الصغيرون يلي كان فيها وسكر عليها بي المفتاح
كانت تايها وخايفه ومش عارفه كيف تتصرف
مفيش مهرب ولا اي شي تقدر توصل بيه لي حد
وفي الموقف هادا بدات اول شخص فكرت فيه ممكن ينقدها هوا يزن ❤️
اجتمع يزن ونصر وحتى خوه ادهم في مركز الشرطه
قدمولهم الفيديو لكن مكانش كل الاعتماد علي الشرطه لا !
قعدو يدورو في معلومات على حوش اعمامها وطارقة السياره واي شي ممكن يوصلهم بيها
واكتر حد كان قلبه يرعش عليها هوا يزن ❤️
الساعه 10 الصبح 🌤❤️
كانت الاجواء تبشر بي الخير الشمس طالعه خفيفه✨
والنسمة الباردة رغم اجواء الصيف كانت موجوده واصوات العصافير كانت في كل مكان !
كفاح:صباح الخيرات
ندى:تتكسل………صباح النور
كفاح:هاك شدي السفره حطيها في المربوعه تو يروحو خوتك وبوك قريب يروحو ياااارب نسمعو الاخبار الطيبه
ندى:يااارب …..وين شيخه؟
كفاح:طقيت عليها شكلها قاعده راقده
شيخه:السلام عليكم صباح الخير
كفاح :وربي تموتي عزوزه هي ههههههههههه
شيخه:سلمت عليهم وهيا تضحك ….كنتو تقرمو فيا !
ندى:ههههههههه بي الخير بي الخير
شيخه:مشاء الله ندوش امتى جيتي ؟
ندى:امس جيت في الليل بتت
انتي خيره عيونك منفخات باين عليك تاعبه …….؟!
شيخه:امس متين مسهرني طول الليل حراره تعبت الحق
ندى:الف سلامه ياربي توا شنو اموره !
شيخه:كلت طرف زيتونه …….لالا الحمد الله بخير احسن
ندى:خلي نرفع السفره ونخش الحمام
طلعت ندى وقعدو كفاح وشيخه
شيخه:قالت وهيا سارحه …..قداش واجعتني ندى💔
حاسه بتأنيب ضمير اتجاها ياريت ما بعتناها هداك اليوم ولا ورطناها في طلعه بدون علم خوتها
كفاح:اياه علينا على كئابتك من الصبح
شيخه:نفكرر نحكيلها ونقلها الحق
كفاح:لاااااااااااااااا طبعا خيرك شيخه ؟
شن بتقوليلها بزبط!
شيخه:الحق يا كفاح نقلها الحق
نقلها يلي كانت بتجيبه من المرا هاداك اليوم مش حبوب منع حمل ليا لان خوها واعر ومنقدرش نشريهم
نقلها يلي كانت بتجيبه زوز حجابات لي راجلي وراجلك بعد مالفت علينا بنت الحرام صاحبتك
كفاح:حرام عليك شيخه البت كانت تبي تساعدك لان بجديات راجلك صعب ومينطاقش
عيب تحكي عليها هكي
شيخه:متساعدنيش بي شي زي هادا
سألت على الموضوع كويس والكل قال ان هادا سحرررررر
ع شوي كنت رح نسحر راجلي انا ونطلع من الاسلام مره وحده
شوفي يلي صار بسببنا للبنت خلاها تسيب حب حياتها وتاخد واحد متعرفاش
كفاح:الباين انك جانه ع الاخر انتي تعالي افطري خيرلك ……..وطلعت من المطبخ
شيخه:غسلت وجها بي اميه مصقعه وكانت اعصابها تعباااانه 💔
_________________________________
نذير:ناض من السرير وكان راسه حرفيا متكسر
عيونه حمر والباين ان الليله فاتت عليه بكي فيها !
خش للحمام غسل وجها
ولما طلع كانت ريحة الغرفه لاصقه فيها ريحة ندى في كل مكان
بردة فعل على الريحه وذكرياته مع ندى طيح كلللللل العطور يلي كانت على الزيانه ع الارض
وزادت الريحه اكتر 🔥🔥🔥
طلع وسكر الباب هارب من الف حاجه في الغرفه
نزل وهوا معنداش علم بي حتى حاجه صايره لوطه
ركب سيارته واول ما حط تالفونه في الشحن شاف رساله واصله
فتحها وكان محتواها :-
من يوم حبيتك مفكرتش اني نخونك حتى في خيالي وربي شاهد💔
يلي صار ان هديل كانت في مشكله يانذير بسبب ولد حرام كلماته قبل وكان يهدد فيها
وخديت كلمته حاولت نخليه يبعد عليها من خوفي عليها يفضحها قدام راجلها
منحكيلكش هكي عشان تردني بعد الطلاق
انا حتى اهلي مخبرتهمش انك طلقتني ……بس انا حكيت هكي لان لازم تعرف الحق مش ديمه انا الغالطه والخاينه
قري نذير الكلمتين هادم وطاااااااااااااااار لي حوش اخته هديل
_______________________________
نجمه:اول ماسمعت صوت الباب انفتح ناضت زي الطلقه تشوف من الروشن
بس استغربت من الشخص يلي خش
كان شاب في بداية عمره واضح من ملامحه انه من عيلة عمامها بسبب الشبه الكبير
بس مكانتش قادره تميزه هادا ولد منو ؟!
رجعت مكانها بتردد لما شفاته قرب من الحوش
وزادت خافت اكتر لما سمعت بي صوت الباب ينفتح
وقفت من مكانها لما قابلاته وجه لي وجه !!!!
هيثم:شافلها بصدمه……انتي شن اديري هنايا ؟
من معاك ؟
نجمه:بروحي……انت يلي منو؟
هيثم:تي منو يلي جابك !
نجمه:تعصبت ……عمااااااااااامي يلي جابوني للمكان الزفت هادا
هيثم:انتي بنت منو
نجمه:قلبها يدق بسرعه وهيا تشوف للباب المفتوح ……بنت خليل
هيثم:اهاااااااااااااا
قال ها الكلمه وكأنه فهم كل القصه
نجمه:انت منو ؟
هيثم:انا ولد عمك مسعود وااستراحه هادي متعي
نجمه:قامت حواجبها بي استغراب ……مش ع اساس متعاركين ليهم سنين ؟
شن يلي خلاهم يجيبوني هنايا ؟
هيثم:ضحك ع جنب
الباين انكم كنتو عتبه انتي وامك تصالحو بعد المشكله يلي صارت
نجمه:سكتت معلقتش على كلامه وقعدت مقعمزه في مكانها
هيثم :فتح الثلاجه وطلع منها جبنه وهريسه وكم طرف زبادي وعصير …..
تعالي افطري اكيد مش واكله شي
نجمه:صحيت منبيش
هيثم :سيورك تجوعي لان الباين القعده هنايا مطوله ره !
نجمه:زادت توترت اكتر ….اسمع
بلعت ريقها …..شن رايك تساعدني !؟
صدقني والله انا……..
هيثم:قاطع كلامها …….لاالالالالالا ملياش علاقه بي ها المواضيع كلها انا جاي بنريح راسي من دوشة الخدمه
بالله ما دخلينيش في مواضيع تانيه
نجمه:سكتت وهيا فاهمه كويس انها في ازمه صعبببب تطلع منها
كفاح:ههههههههههههه تخيلي ندى
ندى:صعب الوضع تعرفي ههههههههههه
كفاح:شيخه وين سارحه ؟
شيخه:شي انا …….
وقاطع هدرزتهم صوت عياط جاي من برا
طه:يحكي من الممر ……اطلعي يابنت الحرام اطللععععععي مليكش قعدة في الحوش انتي والعيل يلي الله اعلم من وين جايبتيه
وقفو كلهم مفزوعين من العياط
تقوى:طلعت ……..انت كلامي مش معاك كلامي مع بوك
فتحي :خش ورا ولده ……يالله يابنتي خودي ولدك وربي يستر عليك
اهو تحليل الابوة يثبت ان مش حفيدي
تقوى:كدااااااااااااااابين يلي متخافوش من ربي
فتحي:اطلعي ربي يستر عليك اطلعي
طلعت تقوى تجري لقت داوود قدامها
تقوى:شن يلي صار ؟
داوود :جيبي ولدك واطلعي راهو بتزيدي تقعدي متحلفين فيك
تقوى:بصدمه……. شنو يلي صار ؟
علاش طلع التحليل غلط مش قتلك تلقى التحليل واتي مفروض في اول مشفى !
داوود:سكرو راسهم يمشو لي عيادة تانيه حسيتهم شكو في الموضوع وخدو العينه لي اكتر من مكان
منبيش نخش في تفاصيل اطلعي خير ميصير فيها الخبط
تقوى:خشت للحوش خدت ولدها وكلللللللل ملابسها وطلعت وهيا الاعصاب عندها الفففففف وكانت بتتفجر
وسط صدمة وذهول ندى ومرت خوتها من يلي صاير
وهنايا نعرفو ان تقوى كانت اول ملائكة بالف وجه
خشت بي دور المضلومه يلي ضحك عليها ولدهم لكن كانت خبيييثه وكل تفكيرها في الفلوس
وللاسف كانت خطتها جدا فاشله !
___________________________________
الساعه 7 المغرب:-
يزن:كان مقعمز ويهز في رجله بتوتر
نصر:نمشولهم ال3 ولا كيف
ادهم:تي هما غير يبعتولك عنوان الحياش قبل مخليت من سألت مفيش معلومات بكل الزح
نصر:كيف يصير !
ادهم:الزفتتتتتتتتت كيف هكي صار بس كيف البنت في امانتنا مش معقوله ياخدوها من قدام الحوش بدون ميعرف حد شن هادا !
نصر:معش تزيدني يا ادهم يرحم ولديك
انت نعرف حوش عمها بس بوها مش زابطين لقبه التاني شنو !
يزن:وقفت رجله عن الهزان وقال …..رباب !
نصر:شن لقبهم رباب ؟
يزن:رباااااب
ادهم:ضرب راسه بهدوء………الزح ايييي رباب اكيد تعرف
نصر:تي من رباب ؟
يزن:اركب تو نقولك
وطلعو بي السياره بسرعه بدون مقدمات
كان الموضوع يلي يبحتو عليه هوا عمامها
بس الشرطه كانت مركزه اكتر على الساياره يلي خدتها وصاحب السياره منو يكون !
نجمه:قالت بتقزز …..شن هادا !؟
هيثم :ضحك….هادا شرب
ولا معمركش شايفه شرب !
نجمه:لا معمريش وين بنشوفه اصلا ؟
هيثم :خدي رشفه ……..بس بجديات متوقعتش منضرك هي بيكون
نحس فيك صغيره ع كل يلي قاعد يصير فيك
نجمه:تنهدت بتأثر من كلامه
الحياة متعرفش صغير ولا كبير
هيثم:قالها وهوا سارح فيها❤️…….وجميله الله يبارك
نجمه:سكتت وهيا تشوف لي السقف
هيثم:شوفي انا عندي اكتر من حوش هنايا وبرا البلاد
تنازليلهم ع الورث يلي يبوه ونرفع تعيشي بعيد عليهم بدون ما حد يمس منك شعره
نجمه:والله ؟
هيثم: نحكي جديات لو في حد قربك بعدها نبدا مش راجل
نجمه:قامت حاجبها …..انت شنو تشتغل ؟
هيثم:انا امر كتيبة …………
نجمه:ضحكة بتوتر……..هه اي هكي فهمت
هيثم:فكري في العرض متعي عندك لعند بكرا قبل ما يطقو ها الباب
نجمه:اي ؟
تحميني منهم وتسكني بعيد شنو المقابل ان شاء الله
هيثم:ابتسملها بي اعجاب ……صدقيني المقابل يعجبك
نجمه:نعم؟؟؟؟؟ظ
هيثم:متخافيشي حد الله بيني وبين الحرام …….وطلع طرف الدخان من جيبه
نجمه:شافت المفتاح طاح ع البساط ومدارش صوت
محبتش تخليه ينتبه وكملت تشوفله في عيونه ……..شن قصدك !
هيثم:انتي غير فكري بعدين ساهل
نجمه:ناضت من مكانها وخدت شيشة اميه
وفي النوضه هادي فصلها هيثم بعيونه تفصيل
هيثم:طفا دخانه …….انا خاش بنرقد شوي
لو مليتي افتحي التلفزيون اول ما انوض نحكو في التفاصيل
نجمه:فرحت…..اي تمام
هيثم:خش لي غرفة النوم ونجمه نزلت خدت المفاتيح وخبتهم عندها
______________________________
شيخه:لبست لي ولدها حوايجه ومسكاته بين يديها ودموعها زي المطر وهيا تحكي في خاطرها
من امس مريتش بوك !
توقعت انه يكون قلبه قاسي عليا لكن مش لي الدرجه هادي !
هرب من مرضي معقوله هكي محسبش لي ولا يوم عشناه مع بعض ؟💔
قامت راسها لي السقف وهيا تقول
يارب الحمد الله على كل شي منك
مشبعتش لا من امي يلي توفت بكر
ولا من بابا يلي خطفاته مرته وغيراته ولا لقيتها من راجلي وحنيته وعشت كل ايام عمري متمرمده وتوا زادني المرض
الحمد الله على كل شي منك يا الله لا اعتراض على حكمك ❤️
كملت ها الكلمتين وحضنت ولدها يلي كانت رفي سابع نومه وحطت راسها على مخدتها
شويه وسمعت الباب تسكر وصوت نجم الدين ينادي فيها بلهفههههه
ناضت وهيا مستغربه
نجم الدين :شيخخخخخخخخخخه شيييييييييييييييخه
شيخه:شافتله بي استغراب وخوف…….شن في !
نجم الدين :قرب منها بسرعه وهوا يفتح في الشنطه يلي جايبها
شيخه:نصدمت من كميه الفلوس يلي في الشنطه ؟!
نجم الدين:يحكي بي هسيريا ……..انا بعت كل شي كل شي
الارض متعي ومحلاتي
وسيارتي مخليت شي وحجزت طياره الساعه 6 موعدها
شيخه:عقدت حواجبها بي استغراب ……..شنو ؟
نجم الدين :بعت كل شي ونبيع روحي معاهم
مسك راسها بيديه ………رح تتعالجي وتبدي كويسه
ورح تعيشي معاي ونفهمك قداش انا نحبك
دموعه ينزلو ورا بعض وهوا يقول ب كلام متقطع وشهقات
لسمعي
شوفي لو
لو مثلا يعني يبوني نتبرعلك بي اي شي نعطيهم نعطيهم اي شي انا صحتي كويسه ره
حتى لو يبو قلب انا مستعد نوقع على ورق ونتبرعلك بي اي شي
رح نلف بيك العالم كله وتنوضي بخير شيخه سامعه
شوفيلي في عيوني رح تتعالجي ونعيشو مع ولدنا نربوح ونجيبوله خوات وخوت
حضنها وهوا يبكي زي البيبي لاول مره
نحبكككككك انا مش متخيل حياتي بروحي بدونك لالالالا مش رح يصير هكي وربي منقدر
حمزة:مشاء الله شنو ها الزياره السريعه هادي يابو نسيب😂😂😂😂
نذير:وهوا ماسك نفسه…….عارف ان جيتكم في وقت غلط وعيب زيارتي هادي
لكن عندي موضوع مستعجل ولازم نفهمه من اختي
هديل:تشوف لي خوها وميته خوف
حمزه:توتر ….اءءء يالله نخليكم براحتكم …….وطلع
نذير:وصلت بيني وبين مرتي لا السماء لان شفت مسج في تالفونها من الشخص اسمه فوزي
روحت بيها لي حوش اهلها وطلقتها واليوم بعتتلي مسج وفهمتني فيه ان الشخص هادا كان على علاقه معاك ويهدد فيك
وهيا كلماته لان تبي تساعدك
ها الكلام هادا صار ولا لا !
هديل:تشوفله بخوف وساكته
نذير:بهدوء………تكلمي الولد هادا تبع منو ؟
انتي ولا ندى
هديل:ساكته
نذير:ادوي احسن ما والله نعلي صوتي ونفضحك
هديل:بلعت ريقها …..فف ف
فوزي يكون
ييي يكون ص صاحب ندى
وهنايا عرفنا ان ثاني شخص هوا هديل كانت ملاك طول قصتنا بس الباين ان عندها الف وجه لما الموضوع يتعلق بي مصلحتها ✨….
- يتبع الفصل التالي اضغط على ( رواية ملائكة بالف وجه ) اسم الرواية