رواية ملائكة بالف وجه كاملة بقلم اروي طاهر عبر مدونة دليل الروايات
رواية ملائكة بالف وجه الفصل الرابع 4
شيخه :طلعت من حمامها وهيا تنشف في شعرها ووجها باين عليه التعب من البكي
نجم الدين : شافلها بي طرف عينه وهوا مقعمز على السرير
شيخه:ترتب في شعرها قدام المرايا ……ندى بتروح بكرا ؟
نجم الدين:لاهي في تالفونه ….اي
قام عيونه وهوا يشوفلها بي شك ….. بتروح وبتحكي كل شي صار معاها من البدايه لي اخر شي
نزل عيونه لتالفون….. وين كانت ومع منو ومنو روح بيها
قام عيونه ويشوفلها بكره……ومنو ساعدها باش تطلع وكله سيوره ينعرف ويبان
شيخه:تفركست والتوتر بان على ملامحها ……كويس الحمد الله
ناضت من على كرسي الزيانه قامت شعرها ورطبت جسمها
فتحت الدولاب وهيا تشوف اي بجامه رح تلبسها !
سمعت صوت نجم الدين وهوا نازل من على السرير وبعدين حست انه وقف وراها !
تمالكت اعصابها وكملت ادور بين ملابسها
نجم الدين:حط يده علىي فردة الدولاب …..شن قصتك انتي اليوم؟
كل مره لاهيا في حاجه ع اساس تعرفي كويس ان عندي نوضه الصبح بكري تتهربي انتي مني ولا شنو ؟
شيخه تلفتت وها تشوف لي السرير ……اليوم كان متعب هلبا و انا م…….
نجم الدين:انتي مش قادره تقومي بي واجباتك ك زوجة ومرا فاتحه حوش ؟فهميني باش نعرف كيف نتصرف !
شيخه:فقدت اعصابها ……بالله عليك خليني في حالي وفوت الليله ع خير راهو يدي اليمين قاعده نحرك فيها بي السيف من ضربك
نجم الدين:شافلها بنضرة طويله …….اهاااا تمام
مدامك مش قادره على حقي الشرعي خلي نبدو اجرائات الطلاق من غضوا الوضع هادا معش يناسبني
شيخه:الدموع لمعت في عيونها والصدمه واضحه عليها …….ليا سنه معاك مقصرتش حتى يوم من كل النواحي
جت على اليوم وتبي اطلق؟
نجم الدين:شافلها بملامح جااامده وقاسيه …..اي جت على اليوم
انا مش واخدك باش تمشيني على كيفك ومتلبيليش طلباتي
شيخه:ردت بتقزز……..طلباتك؟!!
نجم الدين :على صوته شوي ……..ايااااه علينا عاااد بتقعدي تردي في الكلام هكي ولا شنو نضامك انتي ؟
شيخه:سكرت عيونها لي ثواني …….وهيا تتخيل في نفسها تحكي بكل ثقه وتقوله
طز فيك انا مروحه حوش اهلي وورقتي توصلني لعندي ولا تحلم مزال تشوفي انا وولدك
بس لثانيه ادكرت
اي حوش اهل يلي بتروحله ؟!
لي مرت بوها يلي سقتها المرار؟ولا لي بوها يلي ولا كأنه عنده بنت في الدنيا !
فتحت عيونها وهيا تمسح في دموعها ….تمام
نطمن على متين مغطي ولا لا ونجي……..وعطاته بي الضهر طالعه
نجم الدين:تكلم وهوا مبتسم ويتسهوك……بوسيهولي بوسة النوم ولدي الغالي
شيخه:بملامح غضبببب على وجها وصوت واااطي قالت …….حقييير
الباين ان الحب مليشي مكان بين شيخه وراجلها والباين ان نجم الدين ميعرفش ولا شي على حسن معاملة مرته وفي الموقف هادا بدات عرفنا علاش شيخه قعدت معاه سنه كامله وجابت منه حتى ولد
لكن السؤال هنايا شنو يلي مخلي نجم الدين يعاملها هكي
هل الموضوع قلة اخلاق وخوف من ربي ولا ليه اسبابه؟!
________________________________
في الشقه المقابله بزبط كان صوت كفاح مالي الدنيا ضحكك❤️
كفاح:تنهدت بي راحه …..حسيت بوك ناوي على شي اليوم خصوصا ان ندى قاعده ما حكت شي
انور:علمي علمك مش عارف
كفاح:خدت نفس…اووف منك لو خوك اكيد كان فهم كل شي انت عايش في عالم تاني
انور:يشوفلها بعيون يلمعو حب ❤️….نحكيلك على العالم يلي انا فيه وين
كفاح:ضحكت ……انور ياسر من النضرات الشيطانيه هادي فكني منك😂
انور:شن رايك توا تنوضي اديريلي فنجان قهيوة مع مقيريضه وتجيني نهدرز على رواق
كفاح:لا يافالح توا بنوض نرقد صغارك يلي نافخيلي راسي من الصبح وبترقد حتى انت سلم راجلي لان غضوا عندنا يوم طوووويل عريض مع اهلك
انور:ربع يديه بملل……يعني هيا سويعه بنسهروها شن بتزيد ولا بتنقص
كفاح:انور حبيبي والله مش وقته السهور توا
وقتنا كله متوتر وبكرا اختك مروحه والله اعلم شنو بيكون صاير معاها بتحكيه
خلينا نرقدو بكري نلقو باش نقاومو
انور:استسلمت خلاص 😢
كفاح:ضحكت ….ايواه هكي شطور
انور:حط راسه على المخده وهوا مبتسم
اما كفاح بمجرد ما طلعت من الغرفه اختفت ابتسامتها وهيا تفكر بخوف
بكرا ندى شنو بنحكي ؟!
هل رح تجيب سيرتها هيا وشيخه او لا !؟
اصلا شنو يلي صار مع ندى ياترى !
علاقة انور وكفاح كانت اكتر علاقه حلوه في العيله❤️
والكل يشهد بي حبهم وطريقة معاملتهم الحلوه لي بعض ❤️
بعد زواج 4 سنين جابت منه بنتين زي العسل وكانت الحياة ورديه ممكن لان انور هوا السبب الرئيسي
لانه حنون وواعي وباله وساع وميحبش المشاكل حتى في العيله ديما ردة فعله لطيفه ويلطف الجو مهما كانت المشكله كبيره 🌸
لكن السؤال في علاقتهم !
معقوله تكون العلاقه بينهم حلوه هكي بدون ما يكون في ولا جزء صعب!؟
ولا فيه مصايب محدش يعرفها مزال !
_______________________________
في غرفه نوم فخممممة وديكورها ابدا مكانش عادي من كثر ما كان حلو
الاضواء الملونه والخافته كانت عاطيه منضر يجنن
السرير الكبير ويلي تصميمه واضح عليه انه تصميم خاص 🌸
كل فرش الغرفه كان بي اللون الابيض والموف الهااادي
كانت ريحانه مقعمزه وسط ها الغرفه وملامح الحزن على وجها لان كل احلامها في الرجوع لي حياتها القديمه ضاعت مع الريح 🫧
الطلوع والسهور والمصروف الخارفي يلي كانت تاخد فيه من بوها كل شي ضاع مع الريح
قاطع تفكيرها صوت الباب يلي طق مرتين
ريحانه:مسحت دموعها بي انتباه …..ادخلل
جميله:خشت وملامح وجها جمووووود
ريحانه:بي لهفه قابلتها تسأل ……شن صار !
جميله:تنهدت بي الم ….في شنو بزبط !
في بوك يلي معش فهمت نتعامل معاه ولا حفيدي يلي مفروض فرحانه بيه مشيت رميته وروحت
ريحانه:بدون اهتمام لي مشاعر امها ………ماما احكيلي يلي صار بدون مقدمات
جميله :بدت تحكي
يلي صار:-
درست سياره عاليه فخامتها تبان من بعيد انفتح الباب ونزلت جميله وعبايتها وراها
الضلام كان مغطي المكان مفيش غير لامبه صغيرونه قدام حوش بسيط
طقت باب ها الحوش ووقفت تراجي وصوت بكي البيبي مالي المكان
ريحانه:شن صار ؟ فتحت ؟
جميله:فتحت وخدت الولد
ريحانه:قالت بزعل…..يكون احسن
جميله:بلعت ريقها …..لازم تنسي البيبير واب البيبي
رد بالك تحاولي تتواصلي معاه
ريحانه:اففففف ….امي
امي ديريلي حل الله يخليك مع بابا نبي نرجع لي مدرستي خلاص سادني عقاب 9 شهور تعبت
جميله:الغلطه يلي درتيها مش طلعه بدون علمنا
ولا تأخرتي في الرجعه للحوش
انت حملتي بي الحرام ….مستوعبه حجم الكارثه يلي درتيها ؟
ادعي ربي بوك يرجع يشوف لي وجهك ولا حتى يخليك عايشه
ريحانه:قامت حاجبها بوقاحه …..مهما كان انا بنته الوحيه مستحيل يقعد هكي
جميله:هزت راسها بخيبة امل منها
ريحانه: بتوسل ….ماما بالله عليك حاولي تقنعيه ينسى كل شي
خلاص مفيش بيبي ولا شي توا امور تمام بالله عليك خليه يرجعني للمدرسه
جميله:سكتت وهيا في داخلها تقول ……..صغيره شنو رح نتوقع منها !
اي شخص طبيعي رح يسمع ها الحوار رح يضحك !
يقول كيف يحكو على حمل بي الحرام كأنه شي عادي !
وكيف عيلتها يتعاملو معاها ببساطه هكي كأنها مشكله عادي لو عيله تانيه كانو قتلو بنتهم
الشي يلي يختلف في عيلة ريحانه مش فلوسهم يلي ربي ناعم عليهم بيها
ولا حتى ان ريحانه البنت الوحيده لي اهلها لا …..
الاختلاف فيهم كان في الانحلال مع بنتهم
كل شي عادي صغيره صغيره صغيره
لين الصغيره فجرت قنبله وعطتهم صدمة عمرهم
لكن السؤال في قصتهم
هل ياترى بوها رح يربيها حتى لو كان متأخر!؟
ولا فتره وتعدي وينتسى كل شي ؟
________________________________
ثاني يوم :-🌤🌤
ناضت نجمه بفزع على صوت الشريانه لمت شعرها بعد لحضات من نوضتها وسرحانها
وقفت قدام الباب وحطت يدها على مقبض الباب وخدت نفس تجهز في نفسها لي اي شي
فتحت الباب واستغربت بعد ما شافت نفس البنت يلي تسكن قدامها واقفه وشاده في يدها صونيه …..
نجمه:تفضلي؟!
رباب:ضحكت ….صباح الخيراااات واضح من رجليك انك كيف نايضه
نجمه:شافت لي رجليها لق نفسها لابسه الشبشب مقلوب😂…..
ابتسمت نجمه غصب عنها …….تفضلي
رباب:انا رباب نسكن قدامك جايه نعتدر على امس حسيتك حرجتي مني وشكلك متحبيش البصاره مع حد غريب وانا بسلامتي لساني ميسكتش حتى شوفي ها
جايبه معاي حلو نشربو قهوة
نجمه:حكت راسها دقايق بتفكير واخر شي استسلمت …..تفضلي مرحبتين بيك
رباب:ضحكت بفرح …..سلمها ياربي
خشت رباب وهيا تتأمل في الشقه وبكل عفويه قالت …….الله يبارك نضافه ودوووق
نجمه:تجهز في اكواب الكابتشينو في المطبخ …..تسلمي عيونك الحلوات
رباب :قعمزت على الكنبه مقابله المطبخ
طبعا انا من مدينه بعيده شويه من هني وجايه نقرا
مأجره الشقه يلي قدامك
نجمه:تحط في اللون ع الكابتشينو …….من وين مدينتك!؟
رباب :اءءء قولي مدينه بعيده خلاص 😄
نجمه:جابت الاكواب حطتهم على الطاوله وقعمزت ……..وكيف اهلك خلوك تأجري بروحك!؟
غريب
رباب:توترت….لاغريب ولا شي مفيش حد فاضي يجي مهاي بس ولقوني بنت بألف راجل 😌
نجمه:ضحكت ……من ها الناحيه واضح 😂
رباب:طبعا انا مش رح نسألك على قصتك امتى ما تبي احكيلي بروحك
نجمه:والله وشنو يلي بيخليني نحكيلك ان شاء الله ؟!
رباب:لان بنولو صاحبات خلاص انا قررت ونراجي فيك بعدين تالعشاء عندي نطيب في خلقة بشاميل فضييييع بكل
نجمه:ضحكت وهيا مبهوره من شخصية رباب المرحه❤️
تحكي هلبا وجوها قنين والباين انها طيوبه
قاطع حديثهم الباب يطق
نجمه:عن ادنك دقيقه
رباب:فردت جسمها على الكنبه بي ارتياح …….خودي راحتك
نجمه:حطت على راسها البرنوص وفتحت الباب
يزن:اخش خطوات بسيطه وقال بدون نفس…..اهلا
نجمه:خير؟شن جاي تبي اليوم !
يزن:طلع من جيبه فلوس كلهم خمسينات وكانو اكتر من3 ربطات …..تفضلي
هادي كل الفلوس يلي خلتها امك
اعتقد هكي معش عندك ولا شي عندنا
نجمه:خدت الفلوس ….تمام تقدر تطل من حوشي
يزن:حوشك؟
نجمه:اشرت بعيونه على رجليه….
يزن:تغيرت ملامح وجها ……طالع طالع
نجمه:سكتت وتراجي فيه يكمل كلامه
يزن:سرح دقايق وهوا يشوفلها ……
نجمه:سكتت دقايق
يزن:ع العموم لو تبي اي شي ردي بالك تكلمي امي من اليوم مفيش حد في عيلتي دخله بيك
نجمه:شافتله بتحدي….تمام اوك
بس اعطي علم لي امك ان اليوم العشيه بنشرفكم ان شاء الله لان عندي كم سؤال وهدرزه مع امك
يزن:قام حاجبه ……..انتي تسكري في راسك معاي ؟
نجمه:انفعلت …….مني انتي باش نسكر راسي معاك اصلا ع اساس انا الميته عليك انت وامك ولا عيلتك كلها
اسمعني كويس انا منبي منكم شي غير شوية معلومات امك تعرفهم كويس والاحسن انك تخليني في حالي والا وربي وربي ……
يزن:قرب منها خطوات …….والا شنو ها؟!شنو بديري ؟
منو يلي بتناديه؟
رباب:له له له يايزن متعودين عليك هنايا كلمتك وحده
واكتر واحد في الحي كله ادافع ع الناس مش تجي على بنت وحيده 😕
يزن:شاف لي رباب بعدين لي نجمه بنضره طويله وطلع بدون ما يحكي ولا حرف
رباب:حليلي انا على الزين وخلاص🥹
الباين هكي بتتزوجو انتي وياه
نجمه:سكرت الباب وهيا كاتمه ضحكتها …..جواز شنو انتي شن تقولي ؟
رباب :حطت يدها على خدها ……اخخخخ ديمه يقولو مابعد عداوة الا محبه 🤭
نجمه:خشي خشي اشربي النسكافي لان الباين محتاجه حد اهبل في حياتي ولازم تولي صاحبتي😂
_________________________________
وسط مربوعه كبييييره وفرشها بسيط وقنين❤️
كان الصمت قااااتل 💔
مقعمز فتحي ومقابلينه ولاده الزوز
وندى كانت مقعمزه في زاوية الدار وعلى راسها ملفوف شاش ابيض وشوية جروح متفرقه في باقي جسمها💔
ندى:كسرة الصمت وهيا تقول …….وهادا كل يلي صار
فتحي :مسمعتيش اسماء؟!
ندى:لا ابدا
نجم الدين :يلي تحكي فيه مش منطقي ابداااا مش معقوله مفيش حد كلمنا ولا حد طلب فديه شنو الغايه والغرض من يلي صار
خدي نفس …..ززاسمعيني كويس لو هداك التافه خلاك تهربي معاه ووصلك لي هادي المواصيل وهرب احكككي وقولي الحق
لان بعد ساعات بينتشر خبر طلوعك من المشفى وكل عممامك وخوالك واقاربك رح يكونو هنايا متكدبيش و………
فتحي :ولدددددد…عيب عليك ها الكلام
عيييييب تقوله لي اختك يلي متربيه على يدي اختك مستحيل ادير شي زي هادا ويلي دار ها العمله سيوره ينعرف وينفضح
انور :تنهد بتعب…..المشكله انا وانت وهوا نصدقو يلي صار ونصدقو ان اندى قاعده اشرف من الشرف نفسه
لكن الناس شنو بيسكتهم !
يتهيئلي يا بوي توافق على الشاب يلي خطبها خليها تتزوج وتنستر
ندى:قلبها دق بفرح
نجم الدين:غبي انت؟!
الكل عارف ان تقدملها قبل واول ما يعرفو بي ان الجواز تم الكل رح يفكر انها هربت معاه وكل ها الضرب مني ومنك يلي فيها لان كشفناها والعار بيلحقها عمرها كله
انور:والله ها التفكير الفاسد مخطرش عليا طبعا انت بسيلي تجي في بالك ها الافكار
فتحي:موضوع الناس ساهل ودباره عندي
مجرد ما باب المربوعه يفتح تقولو انها كانت مخطوفه ودفعنا فديه قدرها 100 الف ومحد يسألني فيكم ليش ……
واضح؟
____________________________
بنفس التقعميزه يلي صايره بين فتحي وولاده صايره في مربوعه تانيه
ريحانه:كانت مقعمزه مرتبكه هيا وامها
جميله:ان شاء الله خير سمير شنو قررت بي ادير ؟!
سمير :تلفت وهوا يحكي ….كان غلط قرار ان نتخلى على طفل صغير جي على الدنيا نتجة غلطه واستهتار من بنت كنت نحساب نفسي مربيها
انور:لكن يابوي شنو يلي قررت اديره بزبط بخصوص الدوه ؟!
نجم الدين:لازم ما ادير حل يابوي لازم
جميله :شنو بيصير يعني؟
وليش هكي كلامك تغير
سمير:قررت نجوز ريحانه
فتحى:لازم ندى تتزوج والعريس جاهز…
- يتبع الفصل التالي اضغط على ( رواية ملائكة بالف وجه ) اسم الرواية