رواية بلوتي القمر كاملة بقلم لؤلؤة محمد عبر مدونة دليل الروايات
رواية بلوتي القمر الفصل الرابع عشر 14
خلصوا صلاه وكانت هناء بتبص لقصي جامد ومش قادره أنها تشيل عيونها من عليه وبقت تفكر مع نفسها / معقوله مش قادره أصدق يعني بقالي 7 سنين بدعي ربنا يشيل حب أحمد من قلبي ويعملي اللي ليه الخير ويوم ماربنا يشيل حبه من قلبي يحط حبك مكانه كأني مش عارفه امشي بقلبي فاضي من غير حب وتعب وياترى انت بقى هتكون بتحبني والا هفضل طول عمري عايشه بقلبي المهزأ اللي غاوي يهزأني ده
قصي لاحظ أن هناء بصاله جامد وسرحانه فيه بصلها هو كمان وفضل يبص لملامحها الجميله اللي لسه مازالت محتفظه بطفولتها وبراءتها وبدأ يركز في تفاصيلها بشرتها البيضه وعيونها العسلي الفاتح ووشها المدور وطولها لحظه طول ايه ده هما شبر ونص وتقريباً حد مشحتهوملها وعند النقطه دي ابتسم
عند حسام بقى أخد باله قد ايه فعلاً ملك لايقه بيه هو محبهاش بس حاسس انها هتكون زوجه وأم صالحه وكمان حلوه ودمها خفيف مش ناقصها حاجه من الأخر يبقى ليه رافضها
عند أحمد أخد باله أن بتول جميله جدا ورقيقه ومحترمه وقرر قرار كده في نفسه
وكل واحد غرقان في أفكاره وقراراته باب البيت خبط وقام حسام يفتح / عم فتحي اتفضل تعالى يا راجل ياطيب تعالى طبعاً عارف الجماعه مش محتاج اعرفك عليهم ده انت اللي مربينا كلنا
عم فتحي/ أكيد عارفكم ده انتوا ولادي ازيكم يا عيال وسلم على الكل وهما برضه رحبوا بيه جدا
عم فتحي/ بص يا حسام يابني انتوا كلكم ولادي زي ماقولت وكلنا أهل وعيله في بعض عشان كده هقول اللي كنت جاي عشانه على طول من غير لف ولا دوران
حسام / اتفضل يا عم فتحي أكيد كلنا زي ولادك
شعيب / ايوه يا حاج كلنا ولادك وانت اللي مربينا وخيرك مغرقنا
عم فتحي / تسلموا من كل شر ويحميكم لشبابكم يا ولادي أنا جاي يا حسام يابني طالب القرب منك
حسام / هااه 😳😳 بس يا عم فتحي ده هناء من دور عيالك يعني وكمان زي بنتك دي متربيه على ايدك
عم فتحي/ لأ يابني هناء مين هناء دي زي بنتي وبعدين بصراحه أختك هناء ميتفتحش عليها محفظه بومه ووشها يقطع الخميره من البيت ولسانها أطول منها بمترين
هناء بشهقه وردح / جرا ايه يا راجل مهكع انت هناء مين دي اللي ميتفتحش عليها محفظه وانتوا بتضحكوا على ايه
كان الكل هيموت من الضحك عليها
عم فتحي / أهو مش بقولك المهم يابني
حسام/ اؤمر يا عم فتحي بس انا كده معنديش غير هناء ورجع ركز معاه بشهقة وقالوا لاتكون جاي تتجوزني أنا لأ لامؤاخذه انا محجوز
كل اللي قاعدين ضحكوا عليه
عم فتحي / يخربيت شيطانك ياواد يا حسام لأ جاي طالب ايد الحاجه والدتك تكوني نصي التاني وأكمل نص ديني
الكل بصله بصدمه
حسام / 😳طالب ايد أمي أنا تكون نصك ياراجل هو انت قادر تتكلم كلمتين على بعض ياعم فتحي ده انت ماشي بمحاليل ياراجل وبعدين نص دين ده ايه اللي عاوز تكمله انت بقالك 85 سنه مكملتوش
الكل ضحك عليهم وعلى منظر حسام
قصي / أهدى يا حسام لايطقلك عرق😂😂
حسام / أهدى ايه ده بيقول جاي طالب القرب مني في أمي
عم فتحي / جرا ايه يابني مشكلتي يعني اني دخلت البيت من بابه وملفتش ودورت كان ممكن أغوي أمك على فكره ونتشات على النت عادي
الكل ضحك على كلام الراجل اللي عنده 85 سنه وعلى منظر حسام اللي تقريباً جاله شلل وفجأه حسام قام من مكانه مسكوه أحمد وقصي وشعيب وهما بيضحكوا وبيبعدوه عن عم فتحي اللي هو كمان خاف من شكل حسام وراح وقف ورا عبد المجيد
شعيب بضحك/ اهدى يا حسام هو يومين ويفلسع لواحده 😂😂
حسام بجنون / أهدى ايه بيقولك داخل الباب من بيته وكان ممكن يتشات مع امي ياعم أمك ياعم وانا اللي قاعد ياللي مربينا ياللي مكبرنا ياللي ملاعبنا أتاريك جاي تلعب بينا تباً لك وألف تباً
عبد المجيد بضحك / عيب يا حسام ده مهما كان عمك
هناء بضحك / وعلى رأي المثل اللي تجوز أمي أقوله ياعمي 😂😂
حسام / اطلع برا ياراجل يا ناقص اطلع بره
عم فتحي / على فكره انت لو رفضتني هتبقى انت الخسران ده انا نسوان الحته كلها بتترمى تحت رجلي
حسام / عشان أعمى ياعم فتحي عشان انت مبقتش بتشوف وماشي تخبط في خلق الله انت مفكرهم بيخبطوا فيك حب ده انت اللي مش شايف بس انا هموت وأسألك سؤال هو سنك مش جاي معاك سكه
عم فتحي / ممكن سني كبير بس قلبي لسه شباب وبيحب أمك
قصي وهو بيمسك حسام اللي بيحاول يفلت منهم / ياعم فتحي كفايه كده وروح بيتك الواد هيتشل أقولك يومين هاخد رأي العروسه وأبلغك بيه بس امشي من وشه الساعادي ومشي عم فتحي بسرعه من وش حسام
حسام بجنون / عروسة مين يالا انت كمان ابعد عني سيبني أجيبه من مصارينه الضاربه دي
قصي بصوت عالي ونرفزه / ماتتهد بقى ايه محدش قادر عليك اتهد بدل ماوربنا أفرغ المسدس فيك
سكت حسام خالص وخاف من قصي
قصي / الكلام يبقى بالعقل هو عرض وانت تقول لأ وخلصنا مش مستاهله ده كله لو سمحتوا يابنات ادخلوا جوا هنتكلم في حاجه كده
البنات دخلوا وفضل حسام وقصي وشعيب وأحمد وعبدالمجيد
قصي / حسام أنا طالب القرب منك
بصله حسام ببداية شلل وشعيب وأحمد وعبدالمجيد ضحكوا عليهم
حسام / في أمي ؟ 🥺
قصي / ياعم هاخد أمك اعمل بيها ايه أقصد هناء
حسام / طب وأمي ؟🥺
قصي / ياعم وأنا مال أمي
شعيب بضحك / لأ دي اديها لعم فتحي هتنفعه 😂😂
أحمد وهو بيتمالك ضحكه عليهم / وأنا كمان يا قصي طالب ايد بتول أختك
شعيب / ايدها بس وتسيبهالنا من غير أيدها نعمل بيها ايه
أحمد / سكت أخوك ونبي مش ناقصه فقعه
قصي / اخرس يا حيوان
شعيب / خرسنا 🤫
حسام / طب أنا كمان طالب ايد ملك يا عمي
شعيب / ايه ده يعني أنا ابن البطه السوده هي جيت عليا مليش عروسه يعني
أحمد / فيه واحده محترمه جدا بتشتغل معانا في الشركه اسمها مروه أدب وأخلاق واحترام وكويسه جدا ومرحه زيك كده هتنفعك
شعيب / طب توكلنا على الله
عبدالمجيد/ طب وبخصوص وصية أبوك يا حسام يابني
حسام / أبويا تحت التراب ياعم عبده واحنا فوقه وكل واحد بياخد نصيبه والوصيه دي متصحش لأنها بتعارض النصيب وفي الأخر لا يصح الا الصحيح وبرضه هشوف رأي هناء ايه
قصي / تمام ياريت ترد عليا في خلال يومين
أحمد / وأنا كمان
حسام / وانا كمان
شعيب / وانا كمان
حسام / انت كمان ايه
شعيب / معرفش بس وانا كمان
بقلم أمل محمد ( لؤلؤه )
عدى اسبوع فيه هناء وملك وبتول وافقوا على الجواز وكمان شعيب اتقدم لمروه وأعجب بيها جدا وبابا وماما قصي وشعيب رجعوا من عند عمتهم عشان تجهيزات كتب الكتاب والخطوبه
يوم كتب الكتاب المأذون بارك الله لكما وبارك عليكما وجمع بينكما في خير
مبارك أحمد وبتول
بارك الله لكما وبارك عليكما وجمع بينكما في خير
مبارك حسام وملك
بارك الله لكما وبارك عليكما وجمع بينكما في خير
مبارك شعيب ومروه
بارك الله لكما وبارك عليكما وجمع بينكما في خير
مبارك قصي وهناء
بعد وقت عند قصي وهناء
قصي / عاوز أقولك انك أجمل وأرق انسانه في الدنيا ممكن تشوفها عيوني خطفتي قلبي من أول ماشوفتك في المسجد مش عارف ازاي بالسرعه دي بس كل اللي اعرفه اني اتمنيت تكوني مراتي اوعدك اني عمري ماهجرحك ولا هزعلك ولا هاجي عليكي في يوم وانك هتكوني ليا زوجه وأم وأخت وبنتي اللي هدلعها وأجيبلها كل اللي نفسها فيه بحب يا هنايا ومنايا من الدنيا
هناء / وأنا اتشديت ليك من أول ماسمعت صوتك وانت بتصلي امام في المسجد صوتك دخل على قلبي ملكه في ثانيه عاوزاك تكون سندي وتكون أماني وحمايتي مش عاوزاك تزعلني في يوم لأني بحبك وزعلي منك هيوجع قلبي وعاوزاك تكون أب وزوج صالح
قصي / بحبك
عند حسام وملك
حسام / بصي يا ملك مش هقولك بحبك والكلام ده لكن أوعدك اني هكون ليكي خير الزوج ونحاول على قد ما اقدر مزعلكيش
ملك / وانا يكفيني انك تراضي ربنا فيا وتعاملني بما يرضي
عند شعيب ومروه
شعيب / بصي يابنت الناس مقدرش اوعدك اني مش هزعلك ولا هيحصل مشاكل مابينا كل بيت فيه مشاكل وكل بيت وفيه زعل مفيش بيت بيخلى من الحاجات دي مش كله حلو ومش كله حادق يوم كده ويوم كده بس الفكره في اللي يتعامل مع المشاكل دي بهدوء وبعقل مش بهبل وخروج أسرار بيتنا بره حتى لو لمين لأن ده اللي بيزود المشاكل واوعدك اني بإذن الله هتقي ربنا فيكي
مروه / اوعدك اني هكون خير الزوجه ليك واني عمري ماهخرج أسرار بيتي بره لأن دي أكنر حاجه بتخرب البيوت
شعيب / ربنا يباركلي فيكي
عند أحمد وبتول
أحمد / انتي يا بتول وصية الرسول صل الله عليه وسلم أوعدك اني هتعامل معاكي كما كان رسول الله صلّ الله عليه وسلم يتعامل مع زوجاته
بتول / وانا كمان اوعدك اني هتعامل معاك كما كانت السيده عائشه أم المؤمنين رضي الله عنها تتعامل مع النبي
( الجواز مش كله زي بعضه ومش لازم الجواز يكون عن حب عشان يكون ناجح نجاح الجواز أو فشله بتعتمد على اختياراتنا وعلى تعاملنا مع بعض إذا كنا واخدين الرسول صل الله عليه وسلم وأم المؤمنين رضي الله عنها قدوه لنا في تعاملنا مع أزواجنا وزوجاتنا هتقل حالات الطلاق واحتمال تكون معدومه
كان رسول الله صلّ الله عليه وسلم عند السيده عائشه وجاء له بعض أصحابه فقدمت لهم احدى زوجات النبي الطعام فدخلت السيده عائشه رضي الله عنها فضربت الصحفه فانفلقت فتبسم النبي صل الله عليه وسلم وأخذ يجمع الطعام ويقول ( غارت أمكم غارت أمكم ) وده الرسول أعظم وأشرف خلق الله لكن دلوقتي لو واحده قالت لجوزها متكلمش فلانه يقولها انتي بتشكي فيا ليلة أهلك سوده وبتبقى سوده فعلاً ونرجع نقول حالات الطلاق زادت ليه من أفكاركم وطريقتكم ياريت نتعامل مع بعض بحب ولين وكل حاجه هتبقى تمام وهتلاحظوا كمان أن المشاكل قلت )
بقلم أمل محمد ( لؤلؤه )
تمت
يتبع الفصل كاملا اضغط هنا ملحوظة اكتب في جوجل " رواية بلوتي القمر دليل الروايات" لكي يظهر لك الفصل كاملا
- يتبع الفصل التالي اضغط على ( رواية بلوتي القمر ) اسم الرواية