رواية طبيب القرية كاملة بقلم صفاء حسني عبر مدونة دليل الروايات
رواية طبيب القرية الفصل السادس 6
سألها سليم بصدمة :
قتل إيه قتلتي مين يعني …
زبيدة : دي حاجه جديمه وخلصت ياولدي ليه عايز تفتح دفاتر جديمة.
سليم : لأن من يوم ما وعيت على الدنيا وأنا مستغرب إن إسمي بإسم الدكتور عز وكنت فاكر إني إبنه وإنتي أمي
طيب إزاي عايشة معاهم وهو متجوز واحدة تانية وكل السنين دي وأنا بكره عز لأني كنت فاكره ظالمك أو ضحك عليكي لحد ماتعب وطلبوا تحليل للمتبرع وطلعت إني مانفعش اتبرع ليه استغربت ولما شوفت نتائج التحليل اكتشفت إنه مش بيخلف وإني إبنه على الورق وبس
ولما جيت أتكلم قولتلي لما تكبر احكيلك كل حاجه، رغم إني كنت في الثانوية وقتها يعني مش صغير ، ولحد النهارده نفسي أفهم ليه إنتي خايفة ليه هربتي من بلدك ، وفين أهلك ومين أبويا ولوكنت إبن حلال و وووو.. ألف سؤال في بالي يا أمي ..
زبيدة : اكده ياولدي يعني أني في نظرك وحشة جوي كده والله العظيم إنت إبن حلال …
سليم : ماقصدش يا أمي أحب على راسك عاوز أعرف كل حاجة هاتجنن حتى علشان لو حبيت في يوم بنت أكيد هتقدملها أعرف مين أهلي..
زبيدة :حاضر ياولدي هحكيلك بس توعدني بعد ما أجولك أوعى تفكر تدللى هناك واصل ولا تنبش في الماضي ….
سليم : على حسب اللي هتقوليه ياأمي ودا حقي ..
زبيدة : أهم حاجة لازمن تكون خابرها إنك إبن حلال وأمك اتجوزت على سنة الله ورسوله …
سليم :طيب ليه سابك وليه كل دا وهو فين…
زبيدة : جلتلك إيه متتحدتش كتير وأنا بحكي معاك لأن الماضي في الماضي وكل شئ جسمة ونصيب ياولدي ..
سليم :حاضر ياأمي …
زبيدة : يحضرلك الخير ياولدي في الاول أني كنت بت الجنايني حدا أبوك وكان إسمه مالك صقر الجناوي وهو إبن خالتي الصغيرة وديه مكنتش أعرفوا إلا بعد ماانتشر في كفر غريبة إن ولد النايب عاوز يتجوز بت الجنايني في الوجت ديه مكنتش مصدجه واصل لأنه كان معروف عنه إنه العوبان وبتاع نسوان …
سليم :هو كان متعلم ياأمي …
زبيدة : اه ياولدي كان في جامعة في لندن بيتعلم فيها حاجة كده إسمها الرسم والزخرفة …
سليم : إسمها فنون جميلة …
زبيدة : إيوه صوح ياولدي…
سليم :آسف ياأمي على المقاطعه كملي
زبيدة : أني كنت دخلت تمريض عشان أكون ممرضة لان مفيش جامعة حدانا للطب رغم إني وجتها كنت جايبة مجموع الطب بس حدانا البنته متسيبش بلدها وتدلى على مصر للتعليم …
سليم : ليه ما كان في دفعتي بنات كتيرة جم من الصعيد وكانوا في سكن جامعي وقتها …
زبيدة : الناس البسيطه ياولدي ملهمش في الحديت ديه …
وأني خلصت ثانوية عامة ديه كان معجزة لأن وجتها أجرب مدرسة كانت بعدينا ب 3 كفور وكنت بروح على الإمتحانات بالعافية يبجى هيخلوني اتغرب عن الكفر وعن الدوار وأروح البندر ؟!!
سليم : بس جيتي و عشتي و ربيتي ولد وشلتي مسؤوليته …
زبيدة : صوح لكن وجتها الظروف هي اللي ساعدتني ..
سليم :طيب احكيلي كل حاجة ..
*************
وفي نفس الوقت كان الخال يحكي لنهر..
نهر : احكيلي الاول يا خال وبعد كده هنشوف مين اللي جاي ومين لا ..
مالك : لسه مصممة يا بت صفية …
نهر : أيوه ومش هشوف حاجة إلا لما أسمع الحكاية كلها …
مالك : أمري لله معرفش إزاي وجعتيني في الحديت ..
نهر : مش أني بنتك يا خال وإنت اللي ربتي بعد ما بابا مات يبجى لازمن أعرف كل الحكاية ..
مالك : حجيجي أني بعتبرك بنتي وبدموع ولو ولدي لسه عايش هو وزبيدة كان زمانهم معايا هنا وكنت جوزتهولك ..
نهر : بحزن هو إنت كان عندك إبن ومات …
مالك يا دكتورة …
نهر : يعني معنى كده إنك اتجوزت زبيدة …
مالك : صوح يابنتي مخبرش ليه ماكنتش مصدجاني يمكن كانت حاسة إني كنت بلعب عليها
نهر :طيب إمتا صدجتك ..
مالك :لما سمعت صوتي وأني بقرأ قرآن في خطبة الجمعة ..
نهر : بجد إزاي ..
مالك : إزاي إيه يادكتورة علشان كنت مستهتر وجتها …
نهر : ماقصدش ياخالي بس نفسي أعرف إيه اللي حوصول …
فلاش باك*****
مالك : عملت كل اللي إنت قلت لي عليه ومصدقتنيش برضو ومانابني إلا إني خسرت البنات اللي كنت عارفهم…
شاهين : ما إنت طول ماإنت بتفكر كده مش هتصدقك لازم تصدق من جواها إنك اتغيرت علشان الخطه تمشي ..
مالك : يعني أعمل إيه كل الكفر بيتكلم عن إبن النائب اللي وقع في حب بت الجنايني وأبويا رافض …
شاهين : وأمك كمان رافضة …
مالك : هي بتحب زبيدة جداً لأنها بنت أختها وأكيد هتفرح..
شاهين : إعرف منها كل حاجة عن زبيدة بتحب إيه بتكره إيه مين فارس أحلامها النظام دا …
مالك : إنت شايف كده …
شاهين : أكيد يابني أهي محاوله مش هي كسرتك قدام كل اللي في القصر لازم تعرف نقطة ضعفها وقوتها ويوم فرحها سيبها كده دي أكبر كسره ليها …
مالك : لا طبعاً …
شاهين : أوعى تكون وقعت في حبها بجد …
مالك : هههه لا أذوق العسل والزبدة الأول وبعد كدا أرميها وهشوف بقى شكلها قدام كل الكفر لما تطلق من تاني يوم فرحها…
شاهين: إنت طلعت شيطان وبكده يبقى كسرتها ..
مالك : بس في مشكلة إنها بنت خالتي يعني كده هكون كسرت أمي كمان..
شاهين : واضح إنك حنيت ..
مالك : صراحه شوية لا طبعاً …
باك ******
نهر : هو شيطان إزاي إنت سمعت لواحد زي ديه ياخال ..
مالك : الحجيجه وأني كمان كنت شيطان يابنيتي عايزه إيه من شاب طايش ومتدلع كل طلباته مجابة و تتنفذ ومرة واثنين لعب مع البنات ووصلت إني عملت علاقة معاهم وعمر ما أبويا ما جال حرام و لا عيب كنت عايزاني اتصاحب مع مين إلا شيطان …
نهر : طيب زبيدة كان ذنبها إيه؟ وإزاي صدجت إنك اتغيرت ؟
مالك : بعد ما مشيت على الخطه قعدت مع أمي وسألتها ..
فلاش باك *****
مالك : أمي جولي لي رأيك في إرتباطي بزبيدة ….
وردة : خبرني ياولدي إنت بجد بتحبها ولا بتلعب بيها زي غيرها …
مالك : مكنتش جيت وطلبت يدها منكم …
وردة :وعرفت رأيها جبل ماتطلب يدها
مالك : لاه إنتي خابره أكتر مني طبعها مجدرتش أجولها ..
وردة : أكيد دي بت عاجلة وعارفه هي فين وإنت فين …
مالك : ليه يعني مش بت أختك يعني جرايب وفي نفس المستوى …
وردة : وإنت فاكر ديه سهل علي لما أختي تكون خدامة عندي وكمان طوا الوجت جدام عنين أبوك …
مالك : إنتي ندمانه إنك اتجوزتي من أبوي
وردة : لاه طبعاً أني بعشجه لكن هو لسه جلبه متعلج بحب أختي ياما كنت بشوفوا وهو بيبص عليها من بعيد ويوم ما هي خلفت زبيدة كان شايط وهيتجنن.
مالك : أنا أول مرة أحس بالحزن اللي في صوتك ديه ياما …
وردة : إنت ياولدي مكنتش شايف ولا حاسس بأي حاجة وأني عارفه إنك ماتغيرتش لأنك شبه أبوك لما بتكون عايز توصل لحاجه أو تكسر حد بتلعب لعبة علشان توصله
هو لعب عليا علشان يكسر أختي لما جدك رفض جوازهم رغم إن روحه في أختي ..
مالك : إحساس صعب لما تعيشي مع حد وإنتي عارفه إنه مش بيحبك إزاي جدرتي تعيشي اكده ..
وردة : لازمن أصبر علشان الأهم عندي إنت وأختك ذنبكم إيه …
مالك :حبيبتى ياما أني آسف جوي ..
وردة : أوعى يابني تكسر زبيدة أكتر حاجه بتوجعنا لما نحب حد ويكون بيضحك علينا …
مالك : صدجيني أني بحبها ونفسي أتغير علشانها…
باك ****
مالك : مش عارف وجتها إزاي لساني نطج بإني بحبها ممكن صدمة إن أمي مكسورة بسبب لعبة لعبها أبوي كسر بيها جلب أم زبيدة وأمي …
نهر : وممكن تكون فعلاً حبيتها ياخال
مالك : كنت يابنيتي وجتها محتار من الكره اللي في جلبي وكمان الحب ..
نهر : و إمتا هي صدجتك …
مالك : كان في الوجت ديه دخل رمضان والإمام اللي المفروض يجي من البندر مجاش وكان لازمن حد يجوم بالتراويح ولازمن يكون صوته حلو في الأذان …
نهر : وحصل إيه وإزاي إنت بجيت الإمام
مالك : اتدبست كانوا ولاد عمي بيهزورا
فلاش باك ****
محمود : طيب هنصلي التراويح إزاي ياعم الحج …
الحاج : ممكن أي حد حافظ القرآن من اللي كانوا بيصلوا الجمعة هو اللي يصلي بالناس…
مكرم : كلهم ناس كبيره يابا الحاج سليم مش هيقدروا يقعدوا طول الليل …
محمود : إيه رأيك إنت يا مكرم تصلي بينا…
مكرم : مينفعش نفسي جصير وصوتي مش حلو إيه رأيكم في مالك بسم الله ماشاء الله بجى ملتزم ومش بيفوت فرض وكمان صوته حلو إيه رأيك يابا الحاج ..
الحاج سليم : والله ماخبرش هيوافج ولا لاه …
مكرم : أكيد هيوافج لأنه مايجدرش يخلف كلمة النايب ويصغره جدام الكبرات هنا وشوف إزاي الموضوع ديه هيفيدك في الإنتخابات ويخرس كل اللي يجول إن إبن النايب مش مليح …
محمود : صوح والله ونسكت كلام المنافس لينا الجيار اللي مطلع إشاعات على الواد مالك …
الحاج سليم : مدام إنتم مصرين يبجي مالك ينفذ …
مكرم : وممكن يحط المصحف جدامه وهو بيجرا عادي …
الحاج : يا محروس نادي على ولدي بسرعه …
محروس :حاضر يا عم الحاج…
وبعد قليل وصل محروس..
محروس : عم الحاج سليم عاوزك في المقعد يا بيه …
مالك : هو جالك كده ..
محروس : إيوه ومنتظرك هو وكبرات الكفر …
مالك :حاضر أني جاي …
كان لابس جلابية ومعطر نفسه وكوفية على رجبته ودخل على المجعد
الجميع : عليكم السلام ورحمة الله وبركاته ..
سليم : تعالى ياولدي عاملين جلسه ترحيب برمضان وبنودع شعبان وكل شاب يجرا بعض من آيات القرآن..
مالك :كل سنه وإنتم طيبين أكيد أني أكون سعيد يابوي…
محمود : نورت الجلسه يابن عمي..
مالك : منوره بأهلها يابن عمي …
بدأت الجلسة وبدأ الناس الكبيرة تقراء وبعدها الشباب ..
لحد ما وصلوا لمالك…
*************
- يتبع الفصل التالي اضغط على ( رواية طبيب القرية ) اسم الرواية