رواية الحياة بعد الزواج كاملة بقلم اسراء ابراهيم عبر مدونة دليل الروايات
رواية الحياة بعد الزواج الفصل العاشر 10
قالتلي جوزك على ما تعوديه وابنك على ما تربيه
والدتها بهدوء: كلامك غلط يا حبيبتي
زهرة بذهول: ليه يا ماما أنا لما فكرت في كلامها لقيته صح، يعني لو عودته على حاجة وفي يوم مش عملتها أكيد هيتخانق معايا، زي مثلا الفطار في ميعاده الصبح لو في يوم مش عملته هيعمل مشكلة، ولو مش فطرته من البداية أكيد هيتعود على كدا فهكون مرتاحة
والدتها: مش بقولك كلامك غلط
زهرة: طب فهميني غلط في إيه؟
والدتها: مش كل الناس تمشي عليهم المقولة دي يا حبيبتي، يعني في أشخاص بيتعودوا على حاجة ولو مش لقوها في يوم بيتعصبوا وناس تانية تتعود على حاجة ولو مش لقوها في يوم بيعدوها وخلص الموضوع وجوزك من النوع التاني دا مش كدا ولا إيه؟
زهرة: اها فعلا يا ماما عمر شخص متفاهم جدا وبيحاول يحل المشكلة من بدايتها ومش بيدقق على حاجة
والدتها: أهو قولتي بلسانك يعني شخص متفهم وعاقل مش عصبي ولا بيقدر ظروفك أهو، طب ليه عايزه تطبقي المقولة دي وتعملي حاجات هو يستاهلها وخايفة يتعود عليها عشان أوهام فكرتي فيها
احنا مش بنمشي ورا كلام حد وخلاص… لازم نفكر فيه هل دا هينطبق على بيتنا ولا لأ، لأن مش كل البيوت بتعيش بنفس الأسلوب…. كل بيت له طريقة وتصرف في الفعل والتفكير، وكل شخص له معاملة غير التاني فهماني؟
زهرة: اها فهمت
بقلم إسراء إبراهيم عبدالله
والدتها: وطالما جوزك بيحبك وبيحاول يعمل اللي يسعدك، يبقى أنتِ كمان تعامليه كويس وتقدميله كل الحلو واللي بيريحه، طب لو طبق معاكي المقولة دي هتبقي مبسوطة؟
زهرة بدون تفكير: لأ طبعا
وبعدين عمر بيخاف على زعلي وكمان حنين جدا وبيحسسني دايما بالأمان وبيغير عليا ومش بيبخل عليا بحاجة كل اللي عايزاه بيجيبه ليا وكمان بيساعدني في شغل البيت، وكمان بياخدي بإيدي إلى الجنة دايما بيصحيني لصلاة الفجر
والدتها بابتسامة وفرحة: يا مفترية وعايزه تغيري فيه؟ دا الحاجات دي تغطي على عيوبه يا بنتي، ماتعمليش أي حاجة حد بقولك عليها أنتِ عندك عقل عشان تعرفي الصح من الغلط
وبعدين حكاية ابنك على ما تربيه دي مش صحيحة بردوا أوي، دي مسؤولية مشتركة بينكم أنتم الإتنين يا بنتي
زهرة بابتسامة وحضنت مامتها: قالت بحبك أوي يا ماما
دخل عمر وهي بتحضن مامتها وقال: السلام عليكم ورحمة الله وبركاته
منورانا يا ست الكل
والدة زهرة بابتسامة: منور بيك يا بني
بصتله زهرة بكسوف ودخلت الحاجات جوا
وراحت تجهز الغدا، وبعدها مامتها استأذنت ومشيت رغم محايلات عمر عليها إنها تقعد عشان تتغدا معهم
دخل لها المطبخ وقال: مامتك مشيت
زهرة: بردوا نفذت اللي في دماغها… طب روح غسل لغاية ما أحط الأكل
عمر بابتسامة: ماشي
حطت الأكل عالسفرة، واستنت عمر لما يجي
قعدوا ياكلوا وهما بيتكلموا وبيكلمها على اللي حصل معه في يومه
خلصوا أكل ودخل معها الأطباق، وبعدين جابت المسليات وقعدوا في البلكونة فقالت زهرة: هو أنت جوجل؟
عمر باستغراب: ليه؟
زهرة بابتسامة: أصل لقيت فيك على كل اللي محتاجاه
عمر بصدمة: إيه؟
- يتبع الفصل التالي اضغط على ( رواية الحياة بعد الزواج ) اسم الرواية