رواية حي بداخلي (كاملة جميع الفصول) حصريا عبر دليل الروايات بقلم عهد عامر
رواية حي بداخلي الفصل العاشر والاخير 10
الحلقه العاشرة♥🔥
ياسين بصدمة: انتى يا رحمه!
حاول ياسين يمسك اعصابه وخبط على اوضتها، رحمة اول م سمعت الخبطت قفلت بسرعه مع خالد وسابت الفوت ومسكت الكتاب كأنها بتذاكر.
رحمه: ادخل
دخل ياسين وقفل الباب وراه وحاول يتعامل عادى معاها
ياسين: ايه اللى مصحى القمر كل ده
رحمة: عادى، بذاكر يا أبيه
ياسين: ربنا يقويكى يا حبيبتى
رحمة: يا رب، خير يا أبيه محتاج حاجه؟
ياسين: احم، بصى يا رحوم انتى اختى الصغيره وبنوتى الاولى اللى بحبها وبعشقها صح؟
رحمة: طبعا يا أبيه، انا يابختى بوجودك انت وابيه ادهم الله يرحمه ف حياتى
ياسين: ربنا يديمك يا حبيبتى، انا مش عايزك تخبى عليا حاجه، كل حاجه تحصل قوليلى عليها وهتلاقينى دايما ف ضهرك.
رحمة بتوتر: اكيد طبعا يا ابيه
ياسين: رحمة، فينا اللى يكتم السر
رحمة: خير يا ابيه، قلقتنى
ياسين: خير ان شآء الله، اللى هقولهولك ده لو طلع برانا هعرف ان انتى اللى قولتى
رحمة: قول يا ابيه متخفش مش هقول لحد.
ياسين: ادهم اخونا، عايش
رحمة بصدمه: ادهم، ازاى
ياسين: مش عارف التفاصيل اللى عرفته انه عايش وقابلنى مرتين قبل كده بس هو مش عايز يرجع البيت هنا دلوقتى على الاقل
رحمة: ليه؟
ياسين: مش عارف بس تقريبا مشاكل بينه وبين موج قبل ما يسافر
رحمة: يعنى عشان خاطر موج ميخلناش نشوفه يا ابيه ويحرمنا منه، مش كفايه وهو معاها كان بعيد عننا
ياسين: ادهم عمره م كان بعيد عننا دايما قريب من كل واحد فينا حتى انتى.
رحمة: اه مهو باماره انه مخلانيش ادخل المدرسه اللى فيها صحابى عشان موج قالت كده
ياسين: تانى يا رحمة احنا مش قولنا صحابك دول بايظين وموج خايفه عليكى منهم.
رحمه: خلاص يا ابيه، انا عايزه اشوف ابيه ادهم
ياسين: حاضر يا حبيبتى، بس سيبينى بكره ولا حاجه واخليكى تكلميه
رحمة: تمام يا أبيه
ياسين مشى للمكتب بتاعها ومسك علبه اقلامها
ياسين: شكلها حلو العلبه دى، ولايقة ع المكتب
رحمة: اه، صحبتى جبتهالى هديه
ياسين: تمام، انا هدخل انام بقى، تصبحى على خير
رحمة: وانت من اهله يا ابيه.
طلع ياسين ودخل اوضته وهو مخنوق من اللى حصل، رحمة طيب ازاى، رحمه دى بنته قبل ما تبقى اخته، ازاى تعمل كده، وازاى تبقى هى من ضمن اسباب تدمير عيلتها، وبتساعد خالد، يا ربي.
فاق من شروده على ايد سها وهى حطاها على كتفه
سها: ياسين، مالك يا حبيبى
ياسين: مفيش يا روحى، كنت بطمن على رحمة بس
سها: متقلقش عليها انا واخده بالى منها من ساعه م اللى جرا لموج، اطمن
باس ايدها وحضنها: ربنا يديمك فى حياتى.
.......................
الصبح..
موج صحيت الفجر وصلت وقرأت الاذكار وورد القرآن كعادتها وفضلت تحمد ربنا انه ردلها ادهم، بعدها لقيت فونها بيرن وكان ادهم
ادهم: صباح الجمال والسعاده على روح قلبى
موج: صباح النور يا حبيبى
ادهم: عامله ايه، نمتى كويس؟
موج: الحمد لله يا روحى، وانت؟
ادهم: حد تبقى موج مش ف حضنه ويعرف ينام برضو!
موج بخجل: بس بقى يا ادهم، المهم قولى هتعمل ايه انهارده
ادهم: مش عارف لسه مستنى يامن وياسين وحمزه ونشوف وصلوا لايه
موج: خير ان شآء الله يا حبيبى.... ادهم
ادهم: نعم يا حبيبى
موج: هو ينفع يعنى انه....
قاطعها ادهم: للاسف لا يا موج كل حاجه لبساه حتى لو انا عايز اخرجه منها مش هينفع.
موج بدموع: يعنى مفيش فايده
ادهم: ممكن تبطلى عياط، وبعدين انتى المفروض تفرحى
موج: افرح ازاى؟ افرح ان اخويا هيقضى عمره كله فى السجن يا. ادهم
ادهم بعصبيه : افرحى ان حقك وحق ابنك وجوزك هيرجع يا موج، ولا انتى فارقلك اخوكى وبس ومش فارقلك ابنك اللى مات قبل م تشوفيه ولا جوزك اللى اتحرمتى منه 4 شهور كاملين ولا كل اللى حصلك، كل اللى همك انه ميتأذيش، انتى انانيه اوى يا موج
موج: انا كده يا ادهم، تمام شكرا
ادهم: موج.... انا اسف انا مش عارف قولت كده ازاى، بس صدقينى لو ف ايدى حاجه مش هتاخر
موج: تمام يا ادهم، سلام
وقفلت من غير م تستنى رد
عند ادهم
قفل معاها واتخنق من نفسه ازاى يزعلها وهو عارف قلبها، وعارف ان مهما اتعرضت لاذى لا بتشتكى ولا تتكلم وتسكت، ازاى يلومها على حبها لاخوها اللى اتربت معاه 22 سنه وهو جه خدها مكملتش ال3 سنين ف بيته؟
فكر ادهم ف طريقه يصالح بيها موج وكلم ياسين
ادهم: ايه يا ياسين صباح الخير
ياسين: صباح النور يا ادهم
ادهم: صحيتك؟
ياسين: لا يا حبيبى ده معاد صحيانى اصلا وبعدين انا منمتش من امبارح
ادهم: ليه؟
ياسين: بتسأل يا ادهم وانهارده كل الحقيقه هتبان؟
ادهم بتنهيده: متقلقش، خير ان شآء الله
ياسين: يا رب، كنت عايز حاجه؟
ادهم: بصراحه كده، انا زعلت موج دلوقتى وهى اكيد دلوقتى بتعيط، ف...
ياسين: حاضر يا عم هجيبهالك البيت الجديد،
ادهم: احبك وانت فاهمنى
ياسين: امشى يلا
وقفل معاه وطلع خبط على موج وفتحت كانت عينيها وارمه من العياط
ياسين: موج، بعد اذنك البسى وتعالى هنروح مشوار تبع القضيه بتاعتك
موج: حاضر يا استاذ ياسين، بس قول لسها او رحمة ييجوا معايا
ياسين: لا لا احنا هنروح بسرعه ونيجى ملهاش فايده وجودهم يعنى
موج: حاضر شويه واكون جاهزه.
...........
عند رحمه
صحيت الصبح واتصلت على خالد
رحمه: صباح الخير يا لودى
خالد: صباح النور، ايه شكلك عندك اخبار حلوه
رحمه: جداا، ادهم عايش مماتش
خالد اتنفض من مكانه: ايه؟ عايش، ازاى وعرفتى منين
رحمه: ابيه ياسين قالى، انا فرحانه اوى يا خالد
خالد بتوتر: اه اه وانا كمان، بصى اقفلى هعمل حاجه واكلمك تانى.
رحمه: تمام
قفل خالد وقام فضل يدور حوالين نفسه: عايش؟ عايش ازاى، اومال مين اللى البوص قتله، طيب لو مش هو الجنازه اللى اتعملت دى ايه، وكل اللى حصل. ده كان ايه، انا لازم ابلغه
خالد: الو.... ادهم عايش
البوص: نعم؟ عايش ازاى اومال انا موت مين
خالد: مش عارف، مش عارف
البوص: فلت منها مره مش هيفلت التانيه
خالد: تقصد ايه؟
البوص: اقفل انت وانا هتصرف.
............
وصل موج وياسين البيت الجديد اللى ادهم خدوا، وطلعوا فوق وياسين ساب موج قدام الباب ونزل هو
لقيت ادهم فتحلها ودخلت كان البيت متزين بورد على الارض وورد وقع عليها اما دخلت، ولقيت ترابيزه مكتوب عليها اسف بالورد وحواليها شموع باللون الاحمر.
واخر الطرقه ادهم واقف وف ايده بوكيه ورد، جريت موج عليه وحضنته وادهم شالها
ادهم: حقك عليا انتى مش انانيه انتى احلى حاجه فى حياتى
موج: انا مش زعلانه منك يا ادهم، انا بحبك.
ادهم: وانا بعشقك، تعالى بصى جبتلك ايه
دخلت معاه الاوضه لقيت على السرير فستان بيبى بلو وخمار ابيض وفيه ورد بيبى بلو، وشوز ابيض.
موج مسكته: تحفه يا ادهم، تحفه بجد
ادهم: الحمد لله انه عجبك
موج: اى حاجه منك بتعجبنى يا روحى.
وحضنته بكل حب.
................
نسرع فى الاحداث شويه جه الليل وموج جهزت ف الفيلا وكلهم جهزوا ونزلوا للحفله.
دخل والد مريم وف ايده مريم اللى اتفاجأت بالمأذون وان يامن عايز يكتب كتابه عليها انهارده
مريم بصدمه: ايه ده
يامن: مهو انا قولت مش هعرف امسك نفسى وضوابط خطوبه وحاجات خارج سيطرتى، ف اكتب كتابى واتجنن معاكى ايه رأيك
نها كلامه بغمزه وموج وقفت جنب مريم وسها كذلك يشجعوها انها توافق واخيرا مريم وافقت.
بعد فترة
المأذون: بارك الله لكما وبارك عليكما وجمع بينكما فى خير.
الكل بارك لمريم ويامن، ويامن حضن مريم ولف بيها قدام الكل.
.............
فى مكان بعيد شويه
البوص: خالد، انت اللى هتق*تل ادهم
خالد: نعم؟ انا!
البوص: ايه هتخاف ولا ايه، اومال عايز تكسب ثقتى ازاى
خالد: مش خوف، بس انا مش مرتب لحاجه
البوص: كلم اخته دلوقتى، وقولها تجيلك فى اوضتها وبلغها انك ناوى تقتل موج وتسهلك دخول الفيلا.
خالد: تمام، وانت؟
البوص: انا هتصرف روح انت وبلغنى بالجديد
.............
استغل خالد انشغال الكل ف الحفله ودخل الفيلا وطلع اوضه رحمة وكلمها وبلغها تجيله، دخلت رحمة
رحمه: ايه يا خالد فيه ايه؟
خالد: سهليلى انى ادخل الحفله، سواء جارد او جرسون
رحمه: ليه؟!
خالد: هقتل موج
شهقت رحمه بخضه؛: ايه تقت*لها، خالد احنا متفقناش على كده
خالد: اومال اتفقنا على ايه؟
رحمة: احنا كان اخرنا انها تنزل اللى ف بطنها وتخسره زى ما خسرتنا بعض
خالد: وجد امور وهق*تلها هى
رحمة: خالد حبيبى، عشان خاطرى بلاش، احنا مكتفيين ببعض وبنحب بعض واتجوزنا من وراهم، تعالى نهرب ونسيبلهم كل حاجه، ونتجوز رسمى.
خالد: رحمة مش هنيجى للاخر ومنفذش، وبعدين مين هيسمحلنا نتجوز رسمى وانتى لازم يكون معاكي وكيلك؟
خلينى اخلص منها وادهم يتلهى فيها واحنا نشوف طريقنا
رحمة: لا يا خالد قتل لا، انا مش عايزه كده
خالد بخبث: يعنى عاجبك وهى بتفرقنا عن بعض وتقول اتجوز اى واحده الا رحمه؟ ولا ادهم اخوكى اللى هى ملت دماغه عشان ينقلك من وسط صحابك لمدرسه تانى مش عارف تتأقلمى فيها؟
هى السبب اننا نتفرق عن بعض كان زمانى خاطبك بدل م احنا بنشوف بعض زى الهربانين كده، عاجبك حياتنا؟!
رحمة بغل: لا مش عجبانى، شوف عايزنى اعمل ايه وانا معاك.
خالد: كده تعجبينى.
........
كل الحوار اللى حصل ده كان ادهم وحمزه وياسين سامعينه من خلال جهاز التصنت اللى ياسين حطه فى علبه اقلام رحمة ومصدومين.
ادهم بصدمه: رحمه؟!
ياسين: سمعتها امبارح وحطتلها مبرر لاخر لحظه
ادهم: موج حياتها ف خطر، انا لازم ادخل الحفله
ياسين: هتدخلها ازاى وهو عرف انك عايش، حتى التنكر مينفعش
حمزه: وليه متقولوش انه كمين والمقصود انت مش مدام موج
ياسين: قصدك انهم عايزين يخلصوا من ادهم.
حمزه: بالظبط كده، اللى واثق منه دلوقتى ان البوص فى الحفله
ادهم: بلغ القياده، احنا لازم نامن الحفله زياده وانا هظهر وظهورى ليهم هيخليهم يغلطوا عشان هما مش متوقعين ظهورى زى ما رحمه قالت لخالد انى مش عايز اظهر
ياسين: لا احنا مش هنضمن اللى حصل، متخاطرش بحياتك وتقول يمكن
ادهم: لازم اظهر، متقلقش انا مامن نفسى، انت اطلع للحفله وانا هرتب ظهورى.
.....
ياسين رجع الحفله ووقف على ترابيزه موح وسها بقلق وهو عمال يتلفت حواليه
موج: هو فيه حاجه؟
ياسين: ادهم هيظهر
موج بخضه: ايه، انت بتقول ايه، ادهم حياته ف خطر
سها: اكيد عامل احتياطاته اطمنى، ويارب عدى الليه دى على خير.
موج: يا رب يا رب
( سها عرفت من ياسين حكالها بعد م كشف رحمه).
.............
رحمه نزلت بعد م خلت خالد يتنكر ف هيئه جرسون ووقفت معاهم ع الترابيزه، وكلهم مكانوش طايقينها بس بيتعاملوا عادى عشان محدش يشك
ادهم دخل الحفله بكل هيبته وكل الى ف الحفله اتفاجأ بوجوده وانه مازال عايش
سلم عليهم كلهم وعلى باباه ويامن ومريم، ووقف قدام رحمه وحضنها
ادهم: وحشتينى يا رحومى
رحمه: و وانت كمان يا ابيه، حمدلله على سلامتك
ادهم: الله يسلمك
وفضل يتكلم معاها معبرش موج عشان الخطه تمشى وانه فعلا مش طايقها
رحمة كانت فرحانه بده وواقفه جنبه وهى بتبص لموج بشماته
ادهم بعت لموج رساله من غير م رحمه تاخد بالها: عشان خاطرى متزعليش وخليكى مكانك ده من ضمن الخطه وهفهمك بعدين.
موج اطمنت ووقفت جنبه.
.................
الحفله هدت واللى كانو حاضرين مشيوا.
ومش فاضل غير العيله
حمزه وهو بيكلم ادهم بسماعه بلوتوث: خلى بالك الغدر ممكن يكون ف اى لحظه
ادهم: متقلقش.
رحمه واقفه بتتلفت على خالد لحد م لمحته على البوفيه، وهو بيطلع المسدس بهدوء
وف لحظه الادوار اتبدلت وحمزه مسك خالد والشرطه اتنشرت فى المكان.
ادهم: اسعاف بسرعاااا
وقبضوا على خالد والبوص لسه مختفى وقبل م خالد يمشى رحمة صرخت: سيبوه هو معملش حاجه هى السبب
ياسين بغضب: رحمه، مكاااانك
رحمه: لا، هو معملش حاجه، هو برئ، جوزى معملش حاجه
كامل بصدمه: جوزك؟ انتى متجوزه الحيوان ده ازاى وامتى
رحمه: لينا سنه
ياسين بصدمه: سنه ومحدش فينا يعرف حاجه؟، انتى ايه قصرنا معاكى ف ايه عشان تعملى كده
رحمة: موج السبب هى اللى رفضت انه يتقدملى وقالتله لو رحمة اخر بنت فى الكون انا مش هسمحلك تتجوزها، هى السبب
موج بصدمه: انا مقولتش كده، ووالله م اعرف ان خالد كان عايز يتجوزك
رحمة بغل: اخرسى خالص انتى، انتى السبب فى كل اللى وصلناله ده، انتى تستاهلى اللى جرالك مليون مره ولو رجع بيا الزمن هعمل كده واكتر
ادهم: يعنى انتى السبب ان ابنى يموت، وانتى السبب ان موج يحصلها كده؟!
رحمة: ايوه انا السبب، ولو طولت اموتها دلوقتى هموتها
الكل سكت ومصدوم من رحمة واللى عملته وانها ازاى اتحولت بالشكل ده من رحمه البنوته الرقيقه اللى الكل بيحلف بأخلاقها ل واحده بالشكل ده.
وفجأه وسط كل ده حد ضرب نار عليهم ورصاصه جات فى حد والهدوء عم المكان ماعدا صرخه مريم
مريم: يااااااامن.
ادهم: اسعاف بسرعه
.................
نسرع الاحداث شويه
نقلوا يامن على المستشفى وقبضوا على خالد والبوص ورحمة ياسين حبسها فى اوضتها ووقف اتنين جارد عليها لحد م يرجعوا.
الخاتمة♥🔥
راحوا ورا يامن على المستشفى ودخل اوضه العمليات
موج وهى بتحضن مريم: خير ان شآء الله يا حبيبتى، ادعيله
مريم: يا رب يا موج يا رب
مر اكتر من ساعتين وطلع الدكتور
ادهم: طمنا يا دكتور
الدكتور: الحمد لله الاصابه فى دراعه ، وهيفوق خلال ساعتين تلاته كده ان شآء الله
مريم براحه: الحمد لله، اقدر ادخله؟
الدكتور: هو تحت الملاحظه حاليا شويه وهدخل حضرتك
مشى الدكتور وطلب ادهم من ياسين انه يروحهم وهو هيفضل معاه وبعد مجادلات شديده الكل مشى وفضل مريم وابوها وادهم لحد م يامن يفوق ويطمن عليه.
................
رجعوا البيت وكامل دخل اوضته ومرضيش يكلم حد، قعد ياسين وموج وسها مع بعض
سها: طيب ايه، رحمة كده ممكن يتقبض عليها ياياسين، مجرد م خالد يتكلم هتتمسك.
ياسين: مش عارف اعمل ايه يا سها حاسس انى عاجز، اختى ضاعت منى وكل الوقت ده كانت بتضحك علينا، كانت بتمثل قدامنا دور البنت المطيعه البريئه وهى من ورانا بتحط ايدها فى ايد اكبر عدو لعيلتنا لا وكمان متجوزاه، يا الله
موج: انا اسفه يا جماعه، انا السبب فى كل اللى بيحصلكم ده، لولايا كان زمانكم عايشين فى هدوء
سها: ايه اللى انتى بتقوليه ده يا موج، حبيبتى وجودك فى حياتنا اكبر نعمه من ربنا، مش ذنبك ان اخوكى كده ، اهدى بس وتعالى نشوف حل.
موج: انا ممكن اكلم خالد واقنعه انه ميجيبش سيرة رحمة فى التحقيق، وكمان انا عايزه اتكلم مع رحمة فيه كام حاجه قالتها لازم توضحلى
ياسين: اعملى اللى عايزاه انا طالع فوق
طلع ياسين وسها طلعت وراه وموج قعدت تستنى ادهم، كانت عايزه تطلع لرحمة بس منعت نفسها بصعوبه، وفضلت مستنيه ادهم لحد م النوم غلبها على الكنبة مكانها.
................
تانى يوم الصبح
يامن فاق وادهم اطمن عليه وساب مريم ووالدها معاه واستأذن ورجع الفيلا
دخل لقى موج نايمه مكانها شالها وطلعها فوق، حست بيه وصحيت
موج: ادهم، حمدلله على سلامتك يا حبيبى
ادهم: الله يسلمك، تعالى غيرى هدومك ونامى كويس
موج: لا انام ايه كويس انك جيت اصلا، انا عايزه اروح لخالد
ادهم: ليه
موج: عايزه اتكلم معاه واقنعه وانه ميجبش سيره رحمه ف اى تحقيق يحصل معاه
ادهم: لا خليه يتكلم هى تستاهل
مسكت موج ايده وقعدته على السرير وقعدت جنبه: ادهم حبيبى، كلنا عارفين ان رحمة غلطت وغلط كبير اوى، مش هننكر ده، لكن يا حبيبى رحمة لسه صغيره فى سن المراهقه، اى حد يقولها ازيك بطريقه ناعمه هتقع فيه وتحبه وتتعلق بيه، ومتنساش ان خالد كان بيذاكرلها دروسها فى اولى ثانوى قبل م ننقلها مدرستها، حبيبى التمس لأخيك سبعين عذر، ودى اختك وبنتك وحبيبتك، يعنى لازم تقف جنبها وتعديها من كل اللى هى فيه، لازم تلاقى اخوها فى ضهرها مهما يحصل ومهما الدنيا تيجى عليها.
ادهم بحزن: اختى دبح*تنى يا موج بسكينه تلمه، انا مستاهلش منها كل ده، انا اه ممكن اكون انشغلت عنها شويه ف شغلى وياسين كذلك بس كنت بوفرلها وقت واقعد معاها، مش عارف احطلها اعذار يا موج مش عارف
موج: حبيبى، سيدنا يوسف عليه السلام بالرغم منه انه شاف اخواته بعينه وهما بيرموه فى البير الا انه قال( نزغ الشيطان بينى وبين اخوتى) يعنى جابها فى الشيطان والتمس لاخواته عذر، وانت متعرفش الحكايه كامله ايه، انت مجرد م سمعت تسجيل، لكن متعرفش خالد قالها ايه ولا ملى دماغها ازاى، عشان خاطرى التمسلها عذر لاخر نفس، وانا واثقه انها هتطلع مظلومه
ادهم: ماشى يا موج، قومى البسى هاخدك لخالد
...........
فى مركز الشرطه
دخل ادهم بكل هيبته وماسك ف ايده موج ووصل مكتب الظابط اللى متحفظ فيه على خالد ودخلوا
موج: خالد
رفع خالد دماغه لموج: هه ايه جاية تشمتى فيا
موج: اطلاقا انا جايه وليا عندك رجاء واحد بس، اعتبره اخر طلب ليا منك فى حياتى
خالد: ايه هو
موج: سيره رحمة متجيش فى اى تحقيق، سيبها تشوف مستقبلها
خالد: كده كده انا مكنتش هجيب سيرتها فى التحقيق، مش مراتى اللى اخليها تدخل السجن
ادهم: ولاااا انا ماسك اعصابى عنك بالعافيه، مرات مين، جوازكم باطل اصلا لانها قاصر لما كنت متجوزها
خالد: احنا متجوزين عرفى
ادهم وهو بيمسك خالد من قميصه: اه يا واطى، بقى دى جزاتنا اننا امنالك وفتحنالك بيتنا واعتبرناك من عيلتنا، دى جزاتى انى وقفت جنبك؟!
خالد: رد المعروف ليك ان اختك سيرتها متتجابش، غير كده متسألنيش
ادهم: ورق جوازكم فين انطق؟
خالد: مش هقولك، ولو انطبقت السما على الارض مش هقولك
ادهم: وماله، يبقى استحمل اللى هيجرالك يا حلو، انا كل ده موصى عليك انك متنزلش الحبس لكن انا هوريك
ونادى على الامين وطلب منه ياخده وقاله: عايزه يتروق الترويق اللى يحبه قلبك، مش عايز فى وشه حته سليمه
موج: لا يا ادهم عشان خاطرى لا
ادهم: انتى لسه بتدافعى عنه بعد كل اللى عمله
موج وهى بتحضن خالد: اخويا يا ادهم، اخويا اللى فتحت عنيا ع الدنيا لقيته هو بس فيها، اخويا اللى حمانى وكبرنى وربانى وعملنى وورانى الصح من الغلط، اخويا اللى كنت اما اتعب يسهر جنبى ويطبطب على شعرى ويقولى موجتى هتبقى بخير وتلعب بالعروسه تانى، مش هقدر انسى كل ده يا ادهم حتى لو هو نسيه
وانهارت فى البكا بعدها هى وخالد اللى شدد على حضنها وهو بيتأسفلها
خالد: انا اسف والله غصب عنى، انا اسف
موج: ليه تعمل كده يا خالد ليه؟
خالد: شيطانى كان اقوى منى يا موج، دخلنى فى سكة اللى يروح ميرجعش، دخلت فيها وانا عارف اخرها بس اصريت وكملت
ادهم بتنهيده: كويس انك عرفت غلطك يا خالد، ودلوقتى وبكل هدوء هات الورق وطلق اختى
خالد: انا حبيتها يا ادهم مش عايز اطلقها، سيبها تختار ولو اختارت انى ابعد صدقنى هطلقها
ادهم: خالد، اختى لسه صغيره مش عايز اشغل دماغها من دلوقتى بجواز وغيره كفايه اللى هى فيه، ارجوك ومن غير شوشرة طلق اختى وهات الورق
استسلم خالد وقال لادهم على مكان الورقتين وادهم خد موج ومشى
.........
وصلوا البيت وادهم طلع لاوضه رحمه وفتحها بعد م اخد المفتاح من ياسين ودخل هو وموج لقيوا رحمه قاعده بهدومها وعيونها وارمه من العياط وحمرا ومش نايمه
ادهم حاول يهدى نفسه وراح قعد جنبها على السرير وموج قعدت الناحيه التانيه
ادهم: ينفع اللى انتى عملتيه ده
رحمه: مش عايزه اتكلم
ادهم: رحمه، متنسيش انى اخوكى الكبير، كلمينى وقوليلى عملتى ده ليه
رحمه: دلوقتى يا ابيه افتكرت انك اخويا، كنت فين لما سلمت دماغك لمراتك بانك تنقلنى من بين صحابى وتبعدنى عن كل اللى اعرفهم، كنت فين لما خالد جه يتقدم ومراتك شوهت سمعتى قدامه وقالتله رحمة لو اخر واحده فى الدنيا مش هتتجوزها؟، كنت فين وانا محتجالكم، هو الوحيد اللى كان قريب منى، كان بيعمل اى حاجه عشان بس يفرحنى، انا مش ندمانه على اللى عملته
موج بهدوء: حقك انك تلومى ادهم عشان قصر معاكى وحقك انك تلومى ياسين وتلومينا كلنا حتى باباكى، بس اللى مش من حقك فيه انك تعملى كده، انتى سمعتى من ناحيه خالد، ليه مجيتيش واجهتينى بكل اللى قالهولك، مش احنا صحاب؟ احنا كنا صحاب ومبعدتش عنك لحظه لحد م حصل لادهم اللى حصل، ومع ذلك سها هى اللى كانت قريبه منك، كلنا كنا حواليكى يا رحمة بس انتى اللى مش عايزه تصدقى.
رحمة: موج، خالد سمعنى تسجيل بصوتك وانتى بتقولى كده
قالت الكلام ده فى دخله سها وياسين وكامل
ادهم: ازاى يعنى
رحمة: يعنى زى م سمعت، خالد سمعنى تسجيل مسجله لموج بصوتها وهى بتقول رحمة مين اللى تتجوزها دى لو اخر واخده مستحيل اقبل انك تتجوزها.
موج: طيب ومن خلال معرفة رحمة بموج صحبتها واختها ومرات اخوها، موج تقول كده على رحمه وهى شبه مربياها؟
انا عشت معاكى 3 سنين يا رحمه، بعاملك زى اختى الصغيره وبخاف عليكى واوديكى المدرسه بنفسى وارجعك حتى ايام خطوبتى من ادهم، كنت بخليكى تيجيلى البيت واذاكرلك واهتم بيكى، حصل ولا لا؟
حبيبتى، كل اللى خالد سمعهولك فيك
رحمة: فيك ازاى يعنى ده صوتك
ادهم طلع تليفونه ورن على زميله عشان يكلم خالد
موج اخدت الفون من ادهم وشاورت للكل محدش يتكلم
موج: ايوه يا خالد
خالد بتعب: نعم يا موج، فيه ايه تانى؟
موج: انا عايزه اعرف انت قايل لرحمه ايه عنى يخليها كرهانى كده، دى مش رحمه اللى اعرفها ابدا
خالد: فبركت صوتك يا موج وسمعتهولها، وقولتلها انك انتى اللى خليتى ادهم يبعدك عن صحابك عشان تبقى لوحدك وموج تسيطر عليكى زياده، فضلت العب فى عقلها بالكلام وان ادهم بيحبك انتى وماشى بكلامك انتى عشان اكرهها فيكى وتبقى تحت امرى فى كل اللى عايزه، واحده واحده قربت منها وخليتها تحبنى واقنعتها بجوازنا عشان نحطهم قدام الامر الواقع واتجوزنا وطول السنه دى كنا بنتقابل فى شقتنا او اى مكان تانى، بس يشهد ربنا يا موج انى ملمستهاش ولا قربت منها، انا حبيتها يا موج، ايوه اذيتها بس حبيتها، خليها تسامحنى وانتى كمان سامحينى وقولى لادهم وكلهم يسامحونى، انا اسف يا موج.
موج قفلت معاه وهى دموعها على خدها وسها كذلك، ورحمة كانت فى دنيا غير الدنيا وبيتردد فى ودنها صوت خالد وهو بيقول ضحكت عليها
فاقت على ايد موج وهى مسكاها: صدقتى بقى انى مليش ذنب!
رحمة: ليه عمل كده؟ انا حبيته، انا آمنته على نفسه كنت مطمنه معاه، خالد لو قالى ارمى نفسك فى البحر وهتلاقينى هناك كنت هعمل كده، ليه مقدرش كل ده، ليه لعب بيا وبمشاعرى لعبة زى دى انا عملته ايه، انا غلطت فى ايه؟ عشان حبيته؟ ، ملعون ابو الحب اللى يكسر بالطريقه دى، انا غلطت ف ايه فهمونى
قالت جملتها وهى بتعيط بهستيريا واترمت فى حضن موج: انا اسفه يا موج، انا كنت غبية صدقته هو، وحبيته هو انا اسفه سامحونى
اخدها ادهم من حضن موج وحضنها هو وياسين وفضلوا يهدوا فيها، وقالولها انهم مش زعلانين وان هى اختهم وهتفضل اختهم مهما يحصل.
...........
مر اليوم بسلام ويامن فاق وكلهم راحوا زاروه ماعدا رحمة وكامل.
تانى يوم اتحقق مع خالد والبوص وخالد شهد على البوص وقال كل حاجه عملها ومجابش سيرة رحمة فى اى حاجة زى ما وعد موح واترحلوا على المحكمه
يوم النطق بالحكم
اتحكم على خالد بالمؤبد وعلى البوص بالاعد*ام، وانتهى الشر معاهم وعاشوا ابطالنا بسلام وأمان.
....................
ونقول بعد مرور 10 سنين
موج وادهم خلفوا عائشه ومحمد (توام)
وياسين وسها خلفوا يحي وخديجه
ويامن ومريم خلفوا مراد
ورحمة دخلت كليه الهندسه وحاولت تنسى خالد واللى عمله معاها، وعاشت لدراستها وقربها من ربنا وبس.
بليل....
موج كانت فى شقتها واقفه بتعمل بيتزا عشان عايشه نفسها فيها، وادهم قاعد على الركنه وقدامه عائشه ومحمد بيلعبوا
خلصت موج البيتزا وطلعتهم فى طبق وجابت الكاتشب والمايونيز وطلعت عصير فريش لعائش ومحمد وهى وادهم وحطتهم على السفرة ونادت عليهم
اتجمعوا كلهم وقعدوا ياكلوا
محمد: مامى، كملى حكايتك انتى وبابى
موج: وصلنا لفين بقى
محمد: لما قالولك انه مات
موج بصت لادهم وقالت: مصدقتش كلامهم وصدقت قلبى وروحى اللى قالولى ان ادهم حى، وعايش، قولتلهم طول م موج بتتنفس وقلبها بينبض يبقى ادهم عايش.
ادهم مسك ايدها وباسها وقال: ربنا يديمك فى حياتى يا موجة قلبى.
قطع اندماجهم جرس الباب بصت موج من العين السحريه لقيتها رحمة فتحتلها ودخلت
رحمة: الله الله على ريحة البيتزا وجمالها
عائشه: انا اللى طلبتها من مامى يا عمتو
رحمة: قلب عمتك انتى، انا عايزه اكل معاكم
محمد: تعالى كلى من طبقى
عائشه: لا طبقى انا
رحمة: والله م انا مزعلاكوا هاكل معاكو انتو الاتنين
وقعدت وبدأت تاكل
عائشه: كملى يا ماما الحكايه
رحمة: انتو لسه مزهقتوش
ادهم وهو بيبص لموج: ولا هنزهق
موج لقيت نفسها بتردد:-
«وأما أنت يا سكر أيامي، فسأظل أسرد فى قصتنا حتى يفنى عمرى، سأظل أسرد على مسامع الصغار والكبار ما حدث عند التقائنا، سأحدثهم عن كم الوعود التى قطعناها لبعضنا ومازلنا ملتزمين بها حتى الآن، سأوصف مدي العشق القابع بقلبى لك ومدى الاحترام المتبادل بيننا، سأعطى لهم سر خلطه حبنا وعشقنا.
فوالله مارأيت حزنا معك فى أيامى قط، وإن رأيت فاعلم أنه كان يغادر بمجرد تفكيرك فى كيفيه اذهابه.
عزيزى، دعنى أخبرك أن مجرد رؤية أنفاسك تخرج منك وتدخل يجعلنى فى قمة سعادتى واطمئنانى.
والآن.. أتمنى أن تدوم ضحكتنا من القلب وإلى الأبد يا سُكر أيامي.
وصدق من سمعت عنه بأنى لم أجد ونسًا ودفئًا لعمرى أفضل منك.»
تمت
لقراءة ومتابعة روايات جديدة وحصريه انضم الينا هنا:- اضغط هنا
•تابع الفصل التالي "رواية حي بداخلي" اضغط على اسم الرواية