رواية انت سندي كاملة بقلم ايمان سلامة عبر مدونة دليل الروايات
رواية انت سندي الفصل الثاني عشر 12
١٢- يحيي
وصل خالد عند يحيي الجمَّال صديقه الصدوق وصندوق اسراره فتح له باب المكتب وهو يرحب به ايه يا خلووود انا قلت انت روَحت نمت وطنشتني اليوم كان صعب ولا ايه
خالد : جدا يا يحيي اعصابي باظت لحد ماوصلت ولحقت الجلسة ياريتني فعلا كنت سمعت كلامك وبيت في اسكندرية امبارح
يحيي : معلش النصيب
سرح خالد وهو يردد بخفوت : اجمل نصيب
يحيي : طمني القضية خلصت زي ماكنا عايزين
خالد : ايوة الحمد لله
يحيي : وابراهيم عمل ايه بقي ده مش بعيد يكون خرج يوزع شربات
تذكر خالد كيف خرج مباشرة بعد انتهاء القضية ليلحق بشمس قطع افكاره صوت يحيي :تشرب ايه يا خلود ؟
خالد : ولا اي حاجة اعمل لنفسك قهوة وتعال نخرج الصومعة عشان عايزك في موضوع مهم
اطاعه يحيي وهو يردد :خير يارب
دخلا الي فرندة واسعة ملحقة بمكتب يحيي بها نباتات مبهجة وكراسي مريحة وهي مكانهما المفضل عندما يريدا ان يتحدثا
يحيي : خير يا خالد ايه الحكاية؟
خالد بص يا سيدي ……
حكي خالد ليحيي كل ما حدث خلال اليوم ولقاءه بشمس وموضوع قضيتها كان يحيي يسمع بتركيز تام ختم خالد قائلا : بس يا سيدي وهي دلوقتي عند بابا في البيت
وضع يحيي يده علي رأسه علامة التفكير في الموضوع وصمت قليلا وهو يقول سبحان الله يا خالد عمك اللي غلبكم وغلبنا كلنا بقالنا سنين بندور عليه ومش لاقيينه تقوم تلاقي بنته ببساطة كدة ثم استطرد مكملا
بس الحكاية دي مش سهلة يا خالد ده حوار
خالد : واي حوار انا حاسس ان دماغي هتنفجر م التفكير
يحيي : انت عارف الحوار في ايه يا صاحبي مش القضية القضية تخلص في جلستين تلاتة بالكتير البنت هتقول اللي ع العقد مش امضتي وشكرا ..وتخلص ان شاء الله
الحكاية في اللبش اللي فيها .. ناس بتشرب وبتتاجر في المخدرات واكيد شايلة سلاح وبعدين راجل سنين زي ما البنت قالتلك بيصرف علي مزاج ابوها بس عشان يطولها وابوها معشمه يوم ما يطولها مايلاقيهاش طبيعي مش هيسكت وواحد زي ده هيعمل مصايب
القصة مش هتخلص يعني بحكم محكمة
خالد: ماهي دي المشكلة يا يحيي احنا مدخلناش قبل كدة في حاجات من دي ودلوقتي انا مقدرش اتخلي عنها دي مش موكل عادي اقدر ارفض قضيته او اقبلها
يحيي : اكيد طبعا بس يعني انتم مش وش الحاجات دي القصة دي ممكن يبقي فيها شوشرة وانتم اسم عيلتكم معروف كمان والدك تعبان ومش مستحمل افرض بقي عريس الغفلة ده عرف انها عندكم وجاب ناس وجم ياخدوها من بيتكم علي اساس انها مراته طبعا ..هيبقي ايه العمل
خالد بعصبيه: ده علي جثتي انا مش ممكن اسيبها تروح للراجل ده ..وان كان علي بابا لازم يعرف كل حاجة ده عمها وسبب كل البلاوي دي يبقي اخوه شمس هتفضل معايا مهما حصل
يحيي وهو يحك ذقنه ويتأمل خالد : مش عارف ليه ياخالد انا شامم من عندك ريحة اول مرة اشمها
شد خالد التيشرت من علي صدره بتلقائية : ريحة ايه يابني انا واخد دش قبل ما اجيلك
يحيي : لا مانا مش شامم ريحة كدة انا شامم شياط يا معلم ..مش عارف حاسس كدة في لهب طالع من عندك
قالها يحيي ثم داعب حاجبيه بلؤم لخالد الذي فهم قصده ضرب كف علي كف وقال له وهو يحاول الانكار لا حول ولا قوة الا بالله ..في ايه يابني بقولك البت في كارثة
يحيي : وايه الجديد يا خالد كل اللي بيجولنا بيبقوا في كوارث معمريش حسيت منك كدة بهذه المشاعر الفياضة
خالد : فياضة
يحيي : اه يا صاحبي فيه حنان بالغ كدة
خالد وقد سرح بشمس : اصلك مشوفتهاش يا يحيي
يحيي : اشوف ايه يا خالد مش بتقول بنت عمك يعني اكيد شبه ابوك
ضحك خالد : يابني مقصدش الشكل قصدي روحها ..روحها وشخصيتها
يحيي : اه وانت بقي لحقت تدرس الشخصية وتمسك خيوطها في الساعتين دول
خالد :يخرب بيت غلاستك عايز ايه يا جدع انت انا غلطان اني بحكيلك اساسا
يحيي : انت عندك حد تحكيله غيري يا دودو مش انا صاحب عمرك برضه
خالد مصطنع الجدية : طب خلاص طالما صاحبي وصديقي بطل غلاسة بقي يا يويو عشان احبك
يحيي : اشار لفمه كأنه يغلق سوستة واشار بيديه خلاص
ثم استطرد : المهم تحبني يا دودو
انفجر الاثنين في الضحك ثم ودع يحيي صديقه علي وعد بلقاء بعد التفكير في الأمر
- يتبع الفصل التالي اضغط على ( رواية انت سندي ) اسم الرواية