رواية كيد النساء وقهر الرجال الفصل الثالث عشر 13 - بقلم منى محمود

  رواية كيد النساء وقهر الرجال كاملة   بقلم منى محمود عبر مدونة كوكب الروايات 

 رواية كيد النساء وقهر الرجال الفصل الثالث عشر 13

 

اذا كنت محايدا في حالات الظلم

فقد اخترت أن تكون في جانب الظالم

جبران خليل جبران

❈-❈-❈

منار كانت قاعده في البلكونه بتشرب كوبايه قهوه و هي مبتسمه اوي تليفونها رن بصوت رساله مسكتها واتفاجئت من اللي فيها لدرجه اني فنجان القهوه وقع من ايديها

_ ازيك يا منار حضري عشر الالف جنيه في خلال ٢٤ ساعه والا تاريخك الاسود كله هيكون علي كل تليفونات اهلك البعيد منهم قبل القريب من اول حاتم ابن الجيران اللي كان مباح له كل حاجة تحت بير السلم لحد اللي حصل مع جوزك وحازم ومغامراتك بعدهم متحاوليش تعرفي انا مين لانك مش هتوصلي لاي حاجة سلام يا حلوة

منار فضلت تقري في الرساله اكتر من مرة وهي بتحاول تعرف مين اللي بعتها … فجأة كشرت بغضب واتصلت علي رقم وانتظرت الرد واول ما الخط اتفتح اتكلمت بغضب وعصبيه

_ بقا انتي يا بنت امبارح مفكرة انك هتقدري تلعبي بيا انا !! بقا أعلمك وافهمك اصول اللعب تقومي اول ما تفكري تلعبي تعمليهم عليا انا !! دا اوديكي ف ستين داهيه تاخدك سامعه ولا لا

هبه باستغراب :

_ في ايه ؟ مالك داخله فيا شمال كدة ليه ؟ لعب ايه وداهيه ايه يا منار ؟ انا مش فاهمه حاجه اهدي كدة يا حبيبتي علي نفسك وفهميني في ايه

منار بسخريه :

_ استعبطي يختي استعبطي

هبه بنفاذ صبر :

_ بقولك ايه يا تتكلمي عدل وتفهميني في ايه يا هقفل السكة في وشك واريح نفسي

منار :

_ بتكلم علي الرساله الزفت اللي انتي لسه بعتهالي من رقم غريب وفكراني مش هعرفك يا نانوسه

هبه :

_ اللهم طولك يا روح … مالك يا منار … شاربه ايه ع المسا انا لا بعت رسائل ولا عندي اي ارقام غير الرقمين اللي بكلمك ديما منهم ف اهدي كدة وفهميني رساله ايه بالظبط اللي جاتلك

منار بتردد :

_ هبه تعالي معايا دوغري الله يخليكي انا مش هعمل حاجه متخافيش

هبه بضيق :

_ يا صبر ايوب اخلصي يا بت وقولي حصل ايه والله لا بعتلك حاجة ولا معايا اي رقم غريب

منار بخوف :

_ يالهوي اومال مين اللي يعرف عني كل حاجة دا وبعتلي يهددني

هبه :

_ يهددك بايه اخلصي واحكي بقا هسحب منك الكلام بالقطارة ولا ايه الله

حكتلها منار علي الرساله اللي جتلها

هبه :

_ غريبه اوي …. طب انتي معرفه مين كل الحاجات دي يا منار ؟

منار :

_ محدش يعرف كل دا غيرك يا هبه … انتي تلفونك وقع ف ايد اي حد قريب ؟ قولي والله ما هعمل حاجة بس اعرف انا بتعامل مع مين يا هبه انطقي قبل ما اروح في الرجلين

هبه :

_ اقسم بالله ابدا ما حصل تلفوني مبيفارقنيش وانتي اللي معلماني كدة بنفسك يا منار …. ولا اي كلمة بينا اي مخلوق يعرفها وبعدين يا ازكي اخواتك انتي ما زي ما انتي حكيالي كل حاجة عنك انا كمان حكيالك كل حاجة عني ازاي ههددك طب ما انتي قادرة تفضحيني اكيد مش انا يا منار ركزي وفكري تاني مين يعرف كل دا

منار بعصبيه :

_ يوووووه انتي مبتفهميش قلتلك محكتش لحد غيرك كل دا

هبه بتفكير :

_ تفتكري ممكن طليقك يكون راقب تلفونك مثلا وعرف كل دا وبينتقم منك علي اللي حصل معاه ؟

منار :

_ لا لا امير دا اهبل وعمر دماغه ما تجيبه لكدة ابدا … دا تلاقيه لحد دلوقتي حابس نفسه في اوضته في شقه أمه ومبيخرجش منها … لا لا مش امير انا متأكدة

هبه :

_ انا بقا متأكدة أنه أمير … انتي ذكيه ومحدش من اللي كلمتيهم يعرف عنك حاجة وديما واخدة حرصك منهم … دا انتي اللي علمتيني كل دا يا منار … صدقيني هو امير مفيش غيره

منار بحيرة :

_ طب وبعدين اتاكد ازاي ؟ اعمل ايه شوري عليا يا هبه انا دماغي وقفت خلاص

هبه :

_ جرجري صاحب الرساله في الكلام اي كلام واكيد هتعرفي لو امير أو لا شوفي طريقته اسلوب كتابته انا بردو اللي هقولك يا بت دا انتي الخبره كلها … الله نسيتي كلامك ولا ايه عن أنك بتقدري تعرفي نوع الراجل اللي بتكلميه من اول رساله بيبعتها ع الخاص اهدي كدة يا قلبي اهدي وفكري وتكتكي وانتي هتعرفي مين اللي بعت وعايز ايه منك بالظبط

منار هديت شويه بعد كلام هبه واتفقوا أنهم هيتقابلو تاني يوم في شقه هبه عشان يفكرو سوا مين اللي بعت الرساله دي وعايز ايه منها بالظبط

منار بعد ما قفلت معاها بدأت تفكر في كل الاحتمالات كان قدامها تلت احتمالات مفيش غيرهم …

يا اما اللي بيتكلم دا امير فعلا زي ما هبه بتقول وبينتقم منها علي اللي عملته معاه

يا اما دي هبه نفسها وبتصيع عليها وعايزه تقلبها في قرشين

يا اما دا شخص تالت مجهول هي متعرفوش لكن هو يعرفها

منار لنفسها :

_ ماشي ومالو نلعب ونفكر ونشوف مين هيكسب في الاخر احنا ورانا حاجة

❈-❈-❈

عدي اسبوع بالظبط علي الاحداث دي

منار كانت هتتجنن الرقم اللي بعتلها مبيردش علي الرسايل بتاعتها ولا حتي بعت اي كلام تاني كانت محتارة ومش عارفه دا ممكن يكون مين ؟ ولو حد مجهول هتجيب المبلغ اللي طلبه منين ؟ ..

ياسين راح عمل فحوصات عشان يتأكد من اللي عرفه … وللاسف اتاكد أن فرصه أنه يخلف ويكون اب تكاد تكون معدومة … روح فيلتة ورجع شغله تاني لكنة طول الوقت حاسس بالفراغ .. حاسس أنه فاضي من جوة .. اتكسر و استحاله تقومله قومة تاني ..

شريف راح قعد مع نوال وامير في بيت أبوة وقفل الفيلا خالص ومنع نفسه أنه يعرف اي اخبار عن احلام

نوال قلبها كان بيتقطع من الحزن علي حال ولادها الاتنين اللي طول الوقت ساكتين بشكل غير طبيعي وقلقانة علي جودي اللي كان صابح يوم عمليتها بعد طول انتظار

محمود مكنش عارف مفروض يقول ايه ل هند ولا كان مستوعب مفروض يعمل ايه دوره ك اب حس أنه مش عارف يقوم بيه وكالعادة خلي هناء هي اللي تتصرف وتتكلم مع هند وهو اكتفي بالسكوت والبعد وبدء يخرج يشوف الأوفر اللي كان معروض عليه وهو مسافر ودا كان الخبر اللي مخبيه علي هناء لحد ما يتفق مع صاحب الشركة ويمضي العقد عشان لو الموضوع متمش لاي سبب هناء متفضلش تقطم فيه بالكلام

هناء بالفعل اتكلمت مع هند بهدوء واحترمت رغبتها في انها مش قادرة تتكلم في الموضوع دلوقتي وان هناء تصبر عليها وتديها مساحتها لحد ما هي تحس انها عايزة تتكلم وقتها هتخبط بنفسها علي باب هناء وتقولها كل حاجة

❈-❈-❈

صباح يوم جديد الكل نسي مشاكله وهمومه وكانو جمب جلال وجودي في المستشفى

جودي كانت هاديه وبتقرا قرءان كتير وفاصله نفسها عن الكل

عكس جلال تماما اللي كان متوتر جدا والقلق باين عليه

بعد مدة صغيره دخلت جودي غرفه العمليات وقتها قربت نوال من جلال

نوال بإصرار وثقه :

_ مخبي علينا ايه يا جلال مخليك في الحاله دي ؟؟

جلال بتوتر :

_ ا انا مش مخبي حاجة يا نونا انا قلقان عليها بس

نوال :

_ جلال مش هعيد سؤالي تاني … اللي جوة دي بنتي نور عيني لو في اي حاجة صغيره او كبيرة تخصها أنا لازم اعرفها ف قولي مخبي عني ايه

جلال باستسلام:

_ للاسف الدكتور قالي أن دي هتكون اخر محاوله في الحقن المجهري الرحم عند جودي مش هيتحمل عمليات تاني وقتها ممكن يحصلها لا قدر الله نزيف ومضاعفات تانيه خطيرة وبنتك عنيدة وانتي عارفه دماغها عشان كدة قلقان وبقول يارب يكرمنا المرة دي ع خير عشان مندخلش في المتاهه دي

نوال بدموع :

_ يارب رحمتك بينا يارب … انت الحنين يا كريم فرح قلوبهم وريح بالهم وارزقهم الزريه الصالحة يا رب

الكل أمن علي كلامها وفضلو يدعو طول الوقت أن ربنا يوفقهم في العمليه المرة دي …. قربت هناء من جلال اللي كان كاتم دموعه بالعافيه

هناء بحزن :

_ جلال اهدي يا حبيبي وان شاء الله خير

جلال بدموع بتلمع :

_ جودي هتسيبني بجد لو العمليه دي متمتش … لو عرفت أن مفيش عمليات تاني بعدها هتسبني يا هناء … انا مقدرش اعيش من غيرها والله …. مقدرش

هناء دموعها نزلت ومن غير اي كلام شدتة في حضنها وضمته جامد وفضلت تطبطب عليه وتحاول تخفف عنه اللي هو فيه

بعد مرور حوالي ساعتين كانت العمليه تمت علي خير والدكتور اداهم التعليمات اللي لازم يمشو عليها كويس اوي بدون اي تقصير عشان الحمل يتم علي خير وأكد علي ضروره الراحة التامة في السرير … كانو كلهم حوالين جودي في الاوضه بعد ما طلعت وفاقت

جلال بقلق:

_ حبيبي حسه بوجع أو في حاجة تعباكي ؟

جودي ابتسمت بتعب :

_ أنا كويسه والله متقلقش كدة

هناء :

_ هو عندة اعز منك يا قمر انت عشان يقلق عليه

جودي :

_ حبيبتي يا نونا

نوال :

_ بقول ايه انتي هتطلعي ع عندي عشان اعرف اهتم بيكي

جلال جه يعترض نوال كملت

_ وقبل ما تعترض افتكر كويس كلام الدكتور وميرضيش ربنا ان تسيب شغلك تلت شهور بحالهم يا بني انا هقدر اراعيها ٢٤ ساعه وبعدين البيت كله رجاله مش هتتحرج يعني من وجود حد وهيبقالكم اوضه خاصه بيكم بدل تنشيف دماغ بقا انت ومراتك تعبتوني وانا ست صاحبه مرض

امير :

_ اهدي يا حجة طيب هو هيسمع الكلام ومش هيزعلك

نوال كشرت :

_ حجة في عينيك انت كمان

جلال :

_ خلاص حاضر هنطلع ع عندك يا حماتي يا قمر انتي حلو كدة ؟ فكي التكشيرة دي بقا بالله عليكي

جودي :

_ احنا مكناش بس حبين نتعبك يا ماما

نوال :

_ بس يا بت اسكتي كلامك بيعصبني اكتر … قال تتعبني قال … انتي هبله يا بت ولا وقعتي ع دماغك وانتي صغيره ولا ايه

شريف بضحك :

_ فاكر يا امير لما بابا كان ديما يقول اقطع دراعي أن ما كانت البت جودي دي وقعت في المدرسه واحنا مش شايفنها علي دماغها خلت أفكارها متخلفه كدة

امير بضحك :

_ اه فاكر هههههه وماما تقوله ولا وقعت ولا حاجة دي حتي نسخة منك وطالعالاك

جودي كشرت :

_ انت بتضحك يا جلال وهما بيتريقو علي مراتك شكرا جدا

جلال بضحك :

_ الله يعني انتي سبيتهم هما ومسكتي فيا انا وانا منطقتش كلمة واحدة

امير :

_ مش بنقولك يا ابني ف حول في التصرفات الله يكون في عونك بجد

نوال :

_ يكون في عوني انا والله من خلفتكم كلكم

شريف :

_ ليه بس كدة يا ست الكل

محمود :

_ لا واضح أن حضرتك شايله منهم كلهم اوي

نوال :

_ اوي اوي يا بني والله

الوقت عدي بين هزار وضحك الكل كان بيحاول يخفف علي جلال التوتر اللي كان حاسس بيه ويهون علي جودي تعب العمليه وبعد مدة كل واحد روح بيته وجلال وجودي راحو علي شقه نوال

❈-❈-❈

في شقه احلام …

اسماء:

_ وبعدين معاكي يا احلام هتفضلي كدة لا اكل ولا شرب لحد امتي ؟ حرام عليكي نفسك يا حبيبتي

احلام بتعب :

_ مش قادرة اكل اي حاجة والله يا اسماء يمكن برد في معدتي ولا حاجة شويه وهبقي كويسه متشغليش بالك بيا

اسماء :

_ اومال اشغله بمين بس … لو متحسنتيش انهاردة اعملي حسابك هنروح بكرة نكشف نشوف مالك مش هسيبك كدة انا

احلام :

_ نكشف ايه بس احنا معانا فلوس اوي لا انا هبقي كويسه بلاش مصاريف ملهاش لازمة العيال دول أولي بكل قرش

اسماء :

_ ربنا كريم وهو اللي بيرزق والحمد لله أنا من اول ما نزلت ادور ع شغل لاقيت وربنا كرمنا من فلوس الدهب اللي بيعناه متفكريش في الفلوس يا احلام المهم صحتك لازم نطمن عليكي حبيبتي

احلام :

_ ربنا يسهل من هنا ل بكرة نشوف بس الدنيا فيها ايه … انتي قاعدة يعني ل دلوقتي معانا ايه مفيش شغل انهاردة ولا اي

اسماء :

_ لا انهاردة عندي شفيت من العصر مش من الصبح بحضرلكم الغدا وحطيت غسيل ولما يخلص هنشره عشان مسبلكيش شغل في البيت تعمليه كفايه عليكي تعبك والعيال الشقيه دي

احلام :

_ دول احلي حاجة في الدنيا دول هما اللي مهونين علينا اللي احنا فيه والله كفايه ضحكتهم اللي ترد الروح دي

اسماء اتنهدت بتعب :

_ يارب اقدر اكمل معاهم المشوار لوحدي يا احلام يارب مقصرش معاهم مش عايزة احس بالذنب ناحيتهم ابدا

احلام :

_ هنكمل يا اسماء هنكمل وهيبقو كويسين وزي الفل كمان احنا مع بعض مش هنتفارق ابدا بعد كدة خلاص غلطنا وفوقنا وخدنا عقابنا في الدنيا وادينا بندعي ليل نهار ربنا يسامحنا ويغفرلنا علي اللي عملناه هنفضل سوا وانا أن شاء الله هخف وانزل ادور انا كمان ع شغل ونشوف حضانة نسيبهم فيها والدنيا هتمشي يا حبيبتي

اسماء ابتسمت بحب :

_ أن شاء الله يا حبيبتي أن شاء الله كل حاجة هتبقي كويسه اهم حاجة أننا مع بعض وتوبنا انا واثقه أن ربنا هيغفرلنا وهنبدء صح وهيكرمنا كمان وهتشوفي يا احلام

احلام :

_ أن شاء الله يا اسماء أن شاء الله

الوقت عدي واسماء راحت شغلها الجديد كانت بتشتغل ويتر في مطعم وكافيه كبير واليوم دا كان الشيفت بتاعها من العصر لحد ١١ بالليل ومن حسن الحظ أن مكان شغلها جمب البيت ما بينهم حوالي عشر دقائق مشي بس

علي الساعه ١٠ كان الولاد اتعشو ونامو واحلام خلصت المواعين وقاعدة في الصاله قدام التلفزيون بتقلب بملل في القنوات وآخر ما زهقت سابت قناة عليها فيلم قدام واسترخت في قعدتها لحد ما راحت في النوم ..

احلام كانت بتنهج جامد وحسه أن في حاجة واقفه كتمة علي نفسها مخليها مش عارفه تتحرك .. كانت بتتنفس بصعوبه وبتحاول تفتح عينيها بس مش قادرة عايزة تصرخ مش قادرة

كانت مشلوله تماما لكنها حسه أن في شئ ما كاتم علي نفسها

دموعها نزلت بقهر وخوف وفضلت تحاول اكتر من مرة لحد ما زي كل حاجة ما حصلت فجأة خلصت فجأة فتحت عينيها وهي بتشهق برعب وتعب بصت حواليها بعيون خايفه مفيش حاجة كل حاجة حواليها طبيعيه … لكنها وقبل ما تتنهد بارتياح لمحت خيال اسود ناحيه حيطة المطبخ برقت جامد وقامت بسرعه تجري علي الاوضه اللي فيها الولاد قفلتها عليهم بالمفتاح ونامت وسطهم وحضنتهم جامد وهي دموعها نازله بدون اي صوت … كانت بتتحامي فيهم من مجهول … مجهول رافض يسيبها وكل يوم بيقرب منها اكتر من اليوم اللي قبله وهي مش عارفه تتصرف ازاي أو تعمل ايه ..

❈-❈-❈

تاني يوم الصبح كان محمود بيفطر مع هناء والبنات في هدوء

هناء :

_ هتروحي مع هند الكليه يا الاء ولا هتعملي ايه ؟

الاء :

_ اه يا ماما هروح ما عشان كدة صحيت بدري اهو

هند :

_ لو مش عايزة تروحي مترحيش انا تمام يعني هروح زي كل يوم احضر وارجع

الاء ابتسمت :

_ لا يا نودا انا عايزة اروح فعلا بقالي مدة مبنزلش خلينا نكون سوا بدل ما كل واحدة تتحرك لوحدها

محمود بتساؤل :

_ هو مش انتم في كليه واحدة ؟ مبتنزلوش مع بعض ليه مش فاهم ؟

هناء :

_ هند ملهاش اختلاط اوي بحد هناك بتروح تحضر وترجع ع طول الاء مصاحبه نص الدفعه بتنزل تسلم وتقعد مع صحابها شويه وترجع

محمود :

_ ومحاضراتها ؟

الاء وضحت :

_ ما هند بتكون حضرت وسجلت المحاضرة بخدها منها وازاكرها انا عادي يعني يا بابا

محمود كشر :

_ ودا ينفع بردو يا هناء ؟ واحدة تلتزم والتانيه تعيش حياتها ومش شايلة اي مسؤوليه دا كلام دا

الاء بدفاع عن نفسها :

_ مين دي اللي مش شايلة مسؤوليه ؟ انا كل سنة بنجح بتقدير جيد

محمود بلوم :

_ بتنجحي بمجهود اختك في المحاضرات والملخصات مش مجهودك هي كمان من حقها تخرج وتعيش حياتها زيك مش تبقي هي للمذاكرة وشغل البيت وحضرتك مقضياها خروج ونوم وبس وهي تتعب

هناء بحرج:

_ والله اتكلمت معاها كتير يا محمود

هند :

_ انا مش زعلانة يا بابا انا فعلا جو الجامعه دي مش بحبه بخلص واروح علي طول

محمود :

_ ولو بردو المفروض كل واحد يكون مسؤول عن نفسه ويساعد كمان في شغل البيت وبعدين انتي اخر سنة السنه دي وبكرة تتخرجي ابدئي من دلوقتي شوفي حبه تعملي ايه … في مجال معين عايزة تشتغلي فيه ؟ في كروسات محتاجها ؟ ليكي مستقبل تفكري فيه وزي ما قلت من هنا ورايح كل واحد مسؤول عن نفسه وبس اختك عايزة تنجح تنزل زيك وتحضر وتلخص ومش بس كدة هي كمان زيها زيك تساعد هناء في شغل البيت كفايه دلع ماسخ بقا

الاء بصت ل هناء عشان ترد لاقيتها بتهرب من عينيها رجعت بصت ل محمود بزعل وقامت من علي السفرة وطلعت اوضتها وقبل ما تطلع قالت

_ لما تخلصي فطار يا هند رنيلي انزل عشان نتحرك عن ازنكم

محمود اتنهد ب يأس من عناد بنته ورجع كمل فطارة تاني

أما الاء ف اول ما دخلت اوضتها اتصلت علي أميرة بسرعه وحكتلها كل اللي حصل علي الفطار

_ دا كل اللي حصل يا ميرو قوليلي بقا اتصرف معاهم ازاي ؟ ولا اعمل ايه دلوقتي ؟

اميرة بتفكير :

_ المشكلة أن باباكي المرة دي جاي وقاعد خلاص مش مسافر تاني كنا نقول نستحمله يومين تلاته لحد ما يمشي تاني

_ بالظبط كدة .. شوفتي الهنا اللي انا فيه

اميرة :

_ طيب انتي مش نازله انهاردة مع هند الجامعه

الاء :

_ اه يعني بالكتير ربع ساعه ونتحرك

اميرة :

_ خلاص انا هقوم البس واقابلك هناك نتكلم وش ل وش احسن ونفكر سوا هنعمل ايه في قرارات باباكي دي اشطة

الاء ابتسمت :

_ اشطا يا حب يلا باي مؤقت

اميرة :

_ باي يا قطتي

❈-❈-❈

منار كانت قاعدة وسط عيلتها علي الفطار لما تلفونها رن بصوت رساله قامت بسرعه من وسطهم لدرجة أن تيا بنتها كانت هتقع لولا أن مرات مصطفي لحقتها والكل استغرب تصرفها وبصو ل بعض بتعجب

اما منار مهتمش لكل دا وجريت علي الكنبه اللي عليها الفون وفتحت الرساله

_ ازيك يا منار معلش انشغلت عنك الايام اللي فاتت بكام حاجة كدة .. اه علي فكرة انا مش هبه .. هبه كمان دورها جاي زيك بالظبط اصبري بس متستعجليش .. حضرتي الفلوس ولا لا ؟ ياريت الرد يكون مختصر لاني مبحبش الرغي يا اه حضرتهم ف اقولك هنتقابل فين وامتي يا لا محضرتهمش وقتها ابعت كل اللي معايا لأهلك وطليقك ونخلص سلام يا حلوة

 

• يتبع الفصل التالي اضغط على (رواية كيد النساء وقهر الرجال) اسم الرواية