رواية مراهقه اوقعتني في حبها (كاملة جميع الفصول) حصريا عبر دليل الروايات بقلم امل احمد
رواية مراهقه اوقعتني في حبها الفصل العشرون 20
ملحوظه* دا اخر بارت هنزله لحد ما الاقى تفاعل يشجعنى انزل تانى 😥
روايه
مراهقه أوقعتني في حبها
البارت ال 20
بقلمى أمل احمد🖊️
فى الڤيلا
رباب بصدمه :ميييي !!
وبدأت تهز فيها بالراحه و هى خايفه عليها
رباب بخوف : مى مى قومى يا حبيبتى متقلقنيش عليكى مى فوقى يا حبيبتى عشان خاطري ..ومش عارفه تتصرف معاها ازاى بدأت تنده على الحرس عشان يساعدوها : يا حراااااس تعالوا ساعدونييى
جه واحد من الحرس جرى على صوت رباب العالى والمقلق
الحارس بقلق :فى اي و مالها مى هانم واقعه كدا لييه
رباب بخوف :معرفششش اغم عليها أنا خايفه ساااعدنى اعملها ايي
الحارس بحكمه : طيب روحى بسرعه هاتى برفان قوى
رباب بسرعه قااامت و جابت البرفان
رباب :اتفضل اهو
الحارس مسك ازازه البرفان و رش ناحية أنفها كذا مره من غير ما يلمسها لحد ما بدأت تفوق
الحارس بتنهيده :هى هتفوق دلوقتي خليكى معاها وخلى بالك منها كويس وخليها تاكل حاجه عشان ميغماش عليها تانى
رباب :حاضر حاضر
مى وهى بتفتح عينيها بصعوبة وماسكه دماغها بتعب : بااسل باسل
رباب : أهدى يا حبيبتى باسل بخير
مى بتركيز وهى بتتوجع : اااه رباب ! هو أي اللى حصلى وباسل فين
رباب :مفيش حاجه يا حبيبتى انتى كويسه وباسل كمان كويس و زمانه جاى من المهمه بتاعته وبعدين عايزاكى تجمدى كدا و تهدى هو زمانه بخير أن شاء الله متقلقيش
مى باستيعاب ما حدث قبل قليل :أنا عايزه اطمن عليه بالله عليكى
رباب : مش هينفع يا حبيبتى هو دلوقتى فى مهمته ومش هيعرف يرد عليكى تلاقيه سايب فونه فى اى حتى ومش معاه
مى زاد قلقها وخوفها عليه هى بالرغم من أنها مش متأكده أنه بتحبه أو مجرد اعجاب باهتمامه ليها ..وقطع خوفها وسرحانها صوت عم محمود من الخارج
عم محمود : اتفضل اتفضل يا باسل بيه حمدالله على سلامتك
مى اول ما سمعته قامت جري فى وسط ذهول رباب من مى اللى كان مغمى عليها من شويه ..مى جريت بلهفه على باسل الى كان مرسوم ابتسامه على وشه و مفيهوش اي حاجه و كان داخل يدور بعينه على مى
واول ما شافها بتجرى عليها فتحلها أيده وخدها فى حضنه وهو بيقولها
باسل بلهفه وهو بيحضنها :ميوووووووش حبيب قلبيييى
مى وهى بتعيط فى حضنه :حرام عليك يا باسل ينفع كدا تروح مهمه من غير ما تقولى وكمان مش حتى متسلمش عليا قبل ما تمشى
باسل وهو بيطبطب عليها :طب أهدى أهدى بس يا حبيبتى أنا بخير ومعاكى اهوو بطلى عياط ..وهمس فى ودنها : وبعدين مينفعش تعيطى قدام كل اللى فى الفيلا كدا يقولوا عليكى اي عبيطه!
مى بغضب طفولى :أنا عبيطه !!
باسل بضحك :لاء هبله
مى :وربنا انت رخم ..وطلعت فوق بغضب طفولى
رباب اتجهت ناحيه باسل : حمدالله على سلامتك يا ابنى
باسل بابتسامه :الله يسلمك يا رباب
رباب بتوتر : مى كانت خايفه عليك اوى و اااه بصراحه كدا هيااه
باسل بقلق :فى اي يا رباب قلقتينى
رباب : اغم عليها اول ما عرفت انك فى مهمه وخافت لا يحصل معاك زى إلى حصل فى اخر مهمه ف اغم عليها ولسه فايقه قبل ما انت تيجى ب ١٠ دقايق تقريبا
باسل بصدمه : ينهار ابيض طب أنا هروح اشوفها لا يجرالها حاجه
رباب :روح يا ابنى ربنا يطمنا عليكو
وطلع باسل جرى ناحيه غرفه مى وخبط عليها
توق توق توق
باسل :ميووش حبيبى ممكن تفتحى
مى بزعل طفولى :لاء يا باسل وامشى عشان أنا متضايقه منك
باسل بخبث :امممم طيب دا انا كدا لازم اصالحك .. وفتح الباب بسرعه ودخل وقفل الباب
مى بخضه :اييي دااااا انت ازاى تفتح الباب كداا وبعدين أنا قولتلك امشى
باسل اتحرك ناحيتها وقرب منها وباسها بسرعه من خدها
مى بكسوف مصحوب بزعل :اعاااا اى اللى انت عملته داا
باسل بخبث :عملت كدا ..وباسها تانى
مى وشها احمر جامد من كتر الكسوف والإحراج
مى وهى بتضربه ضربه خفيفه :اعااا انت قليل الادب اوى على فكره و اوعا كدا أنا زعلانه منك اصلا
باسل بحزن مصطنع :دا بدل ما تقوليلى حمدالله على سلامتك وتعمليلى اكله حلوه من ايديكى الحلوين دول
مى بزعل وهى بتبصله : يا سلام هو انت كنت قولتلى حتى أن انت عندك مهمه النهارده ولا اى حاجه انت حتى مصحتنيش اسلم عليك يا باسل أنا كنت خايفه لاتتصاب ولا لاقدر الله يحصلك حاجه حرام عليك أنا خوفت عليك بجد
باسل بابتسامه وهو بيقرب منها :بجدد خوفتى عليا
مى :يوووه هو انت سبت كل الكلام دا وركزت فى خوفت عليك
باسل بتنهيده :حقك عليا يا مى بس انا والله ما كنتش عايز اصحيكى ولا اقلقك عليا لأنى عارف انها عمليه بسيطه يعنى مش مستاهله وكمان رجعتلك بدرى اهو
مى : لا بس بردو تعرفنى يا باسل بعد كدا حتى لو كانت عمليه بسيطه بالله عليك
باسل وهو بيقبل جبينها :حاضر يا عيون باسل متزعليش بقا
مى حضنته جامد وعيطت وباسل اتفاجئ لكن ضمها ليه وفضل يطبطب عليها ويملس على شعرها وهو بيحاول يهديها
باسل :طيب ليه العياط دلوقتي أنا جمبك اهو
مى بعياط :خو خوفت لا ل يحصل يحصلك حاجه
باسل بحنان و هو بيضمها ليه اكتر :شششششش أهدى أهدى أنا بخير ومعاكى اهو
باسل فضل يهدى فى مى إلى مشاعرها متلغبطه هى حاسه انها فعلاً حبته وباسل إلى كان مبسوط من قربها منه وأنها بتخاف عليه
باسل وهو بيخرجها من حضنه وبيسمح دموعها بأيده : انتى فطرتى بقا ولا لسه؟
مى :لاء لسه
باسل :طيب هطلب من رباب تحضر لنا فطار ونفطر سوا
مى :بس انا مليش نفس اكل
باسل :لاء يا مى لازم تاكلى أنا عرفت انك اغم عليكى من رباب و لازم تاكلى عشان متغماش عليكى تانى وكمان أنا ممكن ألغى المفاجأة
مى : مفاجأة! مفاجأة اي
باسل :لا مش هقول غير أما تاكلى
مى بقله حيله :حاضر هاكل
باسل :شطوره ياروحى ..و رن على رباب وطلب منها تحضر الأكل وتجيبه على غرفه مى
بعد دقايق رباب خبطت وباسل فتحلها وكان محضره اكل لذيذ وشهى جداً باسل خد منها الأكل ورباب نزلت وباسل قدر يقنع مى أنها تأكل وفعلاً كلت مع باسل إلى مرضيش ياكل من غيرها من الصبح ومبقاش يعرف ياكل غير معاها ..
________________________
عند سامى
كان حرفياً ميت من الجوع هو من امبارح ومكلش اى حاجه على حسب تعليمات باسل وكان شبعان ضرب على الاخرر
سامى بتعب وعجرفه :انتوووو يا إلى هنااا
جه على صوته واحد من الحرس
الحارس :عايز ايي
سامى بعجرفه :عايز اكلل اى حاجه همووت يا عم انت
الحارس : للاسف باسل بيه لسه مأمرناش ندخلك اكل لحد دلوقتي
سامى بزعيق :كلمهههه وقوله إنه عايز ياااكل ياعمم انت أنا هموت منكووو و وحيات امى لاهاخد حقى منكوو كلكوو
الحارس :اهى قله ادبك دى هى إلى هتوديك فى داهيه ..وسابه وخرج و قرر أنه يكلم باسل ويقوله على حال سامى ..
___________________
عند رحمه
كانت بقالها كذا يوم مش بتروح المستشفى لدرجه ان المديره رنت عليها وقالت لها لو مجاتش النهارده تعتبر نفسها مرفوده وبالرغم من أنها كانت خايفه تنزل عشان متشوفش سامى أو تحصل مشكله لكنها قررت تنزل وتتوكل على الله وبلغت باباها ومامتها وبالفعل نزلت المستشفى وبدأت شغلها عادى
______________________
فى الڤيلا
اثناء ما باسل كان بياكل فونه رن وكان واحد من حرسه
مى : مين يا باسل
باسل بخبث : دي واحده صحبتى
مى بغيره : صحبتك ازاى يعنى هو انت بتكلم بنات ؟
باسل بضحكه خبث :مش انا إلى بكلم هما إلى بيكلمونى وانا مبحبش اكسر خاطرهم
مى بضيق وغيره : يا حنيييين ..وقامت وقفت وهى بتخبط بايديها على طرابيزه السفره و باين على ملامحها الغضب : طيب اسيبك بقا تتكلم معاها براحتك ..
باسل بضحك :استنى بس أهدى راحه فين انتى مكملتيش اكل
مى بضيق :مش عاااايزه اكللل نفسى اتسدتتتت ..وكانت هتخرج من الاوضه لكن باسل قام بسرعه ومسكها من ايديها و بيضحك جامد على عصبيتها وهو فرحان اووى من غيرتها عليه
باسل بضحك :طيب استنى بس راحه فين
مى بضيق وعصبيه :اوعى سيبنى انزل عشان تعرف تكلمها و انت بتضحكك على ايييه اي الاستفزاز دااا
باسل :طيب انتى لو استنيتى هتعرفى أن مش صحبتى إلى بترن
مى : اومال مين
باسل :دا كريم واحد من رجالتى أهدى بقا أنا بس حبيت اغيظك مش اكتر
مى ببردو :لا والله وانا المفروض اصدق
باسل :براحتك عايزه تصدقى صدقى مش عايزه خلاص وتعالى يلا كملى اكل
مى بغيز من بروده : مش هاكل ومش عايزه
باسل :طب متعانديش قصادى يا مى عشان هزعلك
مى حابت تعند اكتر معاه وتحرق دمه
مى ببردو : مش واكله والى عندك اعمله
باسل بخبث :اممم يعنى دا اخر كلام
مى بتحدى وهى بتربع ايديها :اه اخر كلام
باسل بخبث : انتى إلى جبتيه لنفسك ..و فجأة شالها بين ذراعه و مى كانت لسه هتصرخ لكنه حط أيده على بوقها وهو بيقولها بخبث
باسل :اقسم بالله لو صوتك طلع لازعلك يا مى
مى كانت مصدومه من رد فعله واتوترت جداً وفعلاً سكتت ومصرختش
باسل شال أيده من على بوقها وخرج وهو شايلها من غرفتها واتجه بيها لغرفته و اتجه ناحيه سريره وحطها عليه تحت صدمه مى وخوفها
باسل بخبث :ما اسمعش صوتك لحد ما اجى
مى هزت راسها بسرعه بالموافقه من كتر الخوف والتوتر
وباسل قام واتجه ناحيه الباب وخرج من الغرفه
مى بارتياح : الحمدلله أنه خرج بس اى إلى خلاه يجبنى اوضته يعنى أنا هقوم والى يحصل يحصل وكانت بالفعل هتقوم لكن قاطعها باسل وبيفتح الباب ودخل وقفل وراه ومى لما شافته داخل خافت و رجعت فى كلامها وباسل اتجه ناحيتها وكان ماسك صينيه الأكل وهو بيقولها
باسل : يلا اقعدى كملى أكلك
مى وقررت العناد من تانى : ولو قولت لاء هتعمل ايه
باسل بضحكه خبث :بجد عايزه تعرفى هعمل اي
مى :امممم
باسل :تمام تعالى معايا ..ومسكها من ايديها واتجه ناحيه الدولاب وفتح درفه من درف الدولاب و مى اول ما شافتها شهقت بصدمه وإحراج (الدرفه كانت مليانه بقمصان نوم جريئه جداً )
مى بصدمه : الحاجات دى بتعمل اي فى دولابك يا صااايع
باسل بضحكه خبث وبيهز حواجبه: دى عشانك يا قطه
مى برقت عينيها بصدمه :عشان مييييين باسل انت بتقول اييي
باسل و هو بيقرب منها وبهمس :لو مكالتيش هختارلك قميص من دول تنامى بيه معايا النهارده
باسل انحرف يا جماعه🙂
مى حطت ايديها على بوقها واتصدمت من جرأته و وشها احمر من كتر الإحراج
مى بخجل شديد :باااسل اى إلى أنت بتقوله داا عيب كدا احترم نفسك
باسل تجاهل كلامها وقرب منها اكتر ومى كانت ضربات قلبها بتزيد اكترر
باسل بخبث :ها اختارتى اي ياميووش
مى بسرعه جريت على صينية الأكل وبدأت تاكل بسرعه جداً وباسل فضل يضحك عليها
وبيراقبها بحب وهى بتاكل و فونه رن تانى من كريم باسل بص للفون وبعدها بص ل مى وقالها :مى هروح ارد على كريم وارجع الاقى الأكل كله خلصان ولو مخلصش اظن انتى عارفه اى إلى هيحصل و غمزلها ودخل البلاكونه إلى فى غرفته
مى لنفسها :وربنا ما اتربى ربع ساعه
باسل من البلاكونه : ولا خمس دقايق حتى يا روحى
مى شهقت بصدمه أنه سامعه وكملت اكل وهى بتضحك عليه وباسل رد على كريم
باسل :الو
كريم : الو يا باسل بيه
باسل :خير يا كريم في أيه عمال ترن ليه
كريم : سامى يا باسل بيه كل شويه يزعق بعلو صوتو
باسل : بيزعق ليه الحيوان دا
كريم : عايز ياكل وحضرتك ما أمرتناش ندخله اكل لحد دلوقتي
باسل :اممم جعااان ..طيب متدخلهوش اى اكل دخله مياه بس وأنا جاى مسافه الطريق سلام
كريم :تمام يا فندم
باسل قفل مع كريم ودخل الغرفه وكانت مى بوقها مليان اكل باسل ضحك على منظرها وهو بيقولها
باسل :شطوره يا ميوش بتسمعى الكلام
مى بغيظ :ادينى كلت اهو فين المفاجأة إلى قولتلى عليها
باسل :هههه طيب قومى البسى
مى بفرحه :الله هنخرج
باسل بفرحه لفرحتها :اه يا حبيبتي هنخرج يلا قومى البسى
مى بحماس :من عنيا حالاً اكون جاهزه
وراحت لغرفتها ولبست دريس رقيق جداً اوف وايت منقوش ب اشكال فراوله وكوتشى ابيض و فى نفس الوقت باسل كان جهز وكان لابس تيشرت اوف وايت وبنطلون اسود وكوتشى ابيض ..خلص لبس واتجه لغرفه مى وخبط عليها
باسل :ميوش خلصتى
مى :ادخل يا باسل
باسل فتح الباب ودخل و مى كانت بتسرح شعرها باسل جه من وراها وحضنها من ظهرها وهو بيقولها
باسل :اى القمر دا والله أنا مش مصدق أن القمر دا بتاعى لوحدى
مى بابتسامه كسوف :تسلم يا سولى
باسل وهو بيضم حواجبه وبيلفها ليه : سولى ! أنا الرائد باسل مكرم يتقالى سولى
مى بدلع : اه أنا بقوله سولى عندك مانع
باسل بحب :انتى تقولى الى انتى عايزاه يا قلب سولى
مى ضحكت من كتر الخجل وهى مبسوطه من طريقته الحنينه معاها و معاملته الطيبه ليها
مى :احم طيب سيبنى اسرح شعرى بقا عشان ننزل
باسل :اممم بس انا بحب ميوش قلبى محدش يشوف شعرها غيرى ونفسى تداري شعرها ويبان ليا أنا بس
مى : عايزنى اتحجب ؟
باسل : امممم بس طبعا يكون على اقتناع و بإرادتك بس مينفعش تفضلى اكتر من كدا مش محجبه يا حبيبي
مى بتفكير : امممم وانا موافقه وكمان هو فرض وانا كنت عايزه والله اتحجب من زمان بس كنت خايفه اخد الخطوه دى
باسل بفرحه :وانا معاكى وهشجعك تلبسيه
مى :بجد ربنا يخليك ليا يا باسل انت فعلاً زوج صالح
باسل وهو بيقبلها من جبهتها : ويخليكي ليا يا اجمل واحلى ميوش
مى :طيب أنا معنديش طرح اعمل ايه
باسل :عيييب و هى دى حاجة تفوتنى ..و مسك فونه ورن على رباب
باسل :رباب طلعى الحاجة..وقفل
مى باستغراب : حاجه اي يا باسل
باسل : هتشوفى دلوقتي
و الباب خبط وكانت رباب ..باسل فتح لها الباب و خد منها كرتونه مغلفه بشكل جميل وشكرها و رباب نزلت
مى : اى الكرتونه دى يا باسل
باسل :افتحيها يا قلب باسل
مى فتحت الكرتونه وكانت مليانه ب طرح اشكال والوان مختلفه
مى بفرحه : ينهار ابيض انت عامل حسابك كمان وجبتلى طرح
باسل :اه منا جبتلك كل دول لأنى كنت عارف ان ميوش قلبى بتسمع كلام ربنا وكلامى وكنت متأكد انك هتوافقى على القرار دا
مى بصلته بفرحه و هى مبسوطه منه وأنه فعلاً بيحبها وعايزها ترضى ربنا وكمان غيرته عليها أنه مش عايز حد يشوفها بشعرها غيره
مى بفرحه : أنا مبسوطه اووى بجد مش عارفه اقولك اي ربنا يخليك ليا بجدد
باسل :متقوليش حاجه يا حبيبى انا اهم حاجه عندى انى اشوفك مبسوطه المهم الطرح عجبوكى
مى :دول تحفههه بجد وكتيير اوى ماشاءالله
باسل : مفيش حاجه تكتر عليكى يا حبيبي..يلا بقا البسى طرحه تليق على الطقم القمر دا عشان ننزل
مى : حاضر
واختارت طرحه بلون الفراوله إلى فى الدريس ولفتها بطريقه حلوه جداً هى كانت متعلمه زمان ازاى تلف طرح وكان شكلها رقيق اوى
مى بحماس :باسل اي رأيك
باسل بذهول : ماشاءالله تبارك الرحمن اى الحلاوه دييي يخربيتك أنا بلبسهولك عشان تدارى جمالك يزيد اكتر
مى بفرحه :ههه حبيبى يا سولى يلا بقا ننزل
باسل : يلا يا قلب سولى
و نزلوا مع بعض وكان شكلهم عسل حرفياً
رباب :بسم الله ماشاءالله مبروك يا حبيبتى شكلك زى القمر الله اكبر
مى بفرحه : تسلميلي يا ربوبه
رباب :ربنا يثبتك ويحفظك يارب
مى :أنا وانتى يارب يا احلى رباب فى الدنيا
باسل بابتسامه : رباب اتفضلى
رباب : اى دا يا باسل بيه
باسل :دى هديه منى ليكى انتى ست طيبه وتستاهلى كل خير
(الهديه هى شيك ب نص مليون جنيه)
رباب :بس دا كتير اوى يا باسل بيه أنا فرحتكو عندى بالدنيا والله وبعدين انت راجل محترم وشايلنى طول السنين اللى فاتت وخيرك مغرقنى
باسل :دا واجب عليا يا حبيبتى وبعدين بلاش باسل بيه دى أنا زى ابنك
رباب :ربنا يخليك لينا ..حاضر يا ابنى
باسل :أنا هروح مشوار أنا ومى ولما اجى هرن عليكى تحضرى الأكل
رباب :تروحو وترجعو بالسلامه يارب ربنا يسعدكو .. وخرجوا من الڤيلا
________________________
عند يوسف
وائل اخو يوسف : يوسفففففف
يوسف :عايز اى يا جحش انت
وائل :ياعم احترم اهلى مره واحده
يوسف :اخلص ياض عايز اي
وائل : انت عارف ان انت أجدع واحسن وافضل ..قاطعه يوسف بملل :ريح نفسك مفيش فلوس
وائل :اى يسطا دا انت دايما فاهمنى صح كدا
يوسف :اه قدرى الاسود بقا عايز فلوس ليه ياض وبعدين أنت مش لسه واخد ٢٠٠جنيه الأسبوع إلى فات
وائل : يااااه دا الاسبوع إلى فاااااات هيفضلو معايا انت بتهزر يا چو وبعدين الحاجة غليت
يوسف :ما تحوش يا اخويا هو انت مش راجل وبعدين حاجه اى إلى غليت ...ومسكه من هدومه بمرح وهو بيقوله : انت بتحشش من ورايا ياض
وائل :هههه احشش اى بس يا چو انت عارف الحته بقت بكام دلوقتي
يوسف :وانت تعرف منين يا حيلتها أن شاء الله
وائل :هااه ابدا دا اناااه بسألك يعنى
يوسف :امممم مش مرتاحلك ياض
وائل :احم طيب سيب التيشيرت يسطا عشان هيبوظ وهتضطر تشتريلى واحد جديد
يوسف :اه دا انت متلكك بقا امشى ياض من هنا عشان هنرش مياه
وائل :كدا يا صاحبى يعنى مش هتروق عليا ب خمسينايه حتى
يوسف :انت هتنجر من هنا ولا اقوملك
وائل :احم وعلى ايه خليك مكانك يا حبيبى ..وهمس بصوت واطي :دا انت غبى فى ضربك
يوسف وهو بيرمى الريموت عليه :طب يلا غور بدل ما اطلع غبائى عليك ع الصبح
وائل جرى وهو بيضحك
وائل :طيب انا نازل عايز حاجه
يوسف :رايح فين
وائل :هخرج شويه مع أصحابى
يوسف :يا ابنى نفسى اشوفك مره بتذاكر
وائل :وربنا لسه مخلص مذاكره ومتفق معاهم انى هخرج دلوقتي
يوسف :ماشى هحاول اصدقك أخرج وخلى بالك من نفسك ومتتأخرش
وائل : متقلقشش
وائل كان بيفتح الباب عشان يخرج
يوسف وهو بيطلع محفظته :وائل تعالى هاتلى كوبايه مياه قبل ما تنزل
وائل :ياعم هو انت مكسح ما تقوم تجيب لنفسك
يوسف : تصدق بالله أنا غلطان انى كنت هديلك حاجه
وائل بسرعه :اى دا انت كنت هتدينى فلووس
يوسف :وانت قطعت برزقك غور بقا اشحت من صحابك
وائل بمرح :احم والله طول عمرى اقول عليك جدع وطيب حقك عليا يسطا
يوسف : لاء و يلا امشى عشان متتأخرش
وائل بصوت بنت :أنا بهزر يا رمضان انت مبتهزرشش
يوسف وهو بيضربه فى كتفه :لا يا اختى بهزرر ..و طلع من المحفظه ١٠٠ج وادهالو
وائل وهو بيمسك الفلوس : اى كل دا يسطا ٥٠ كفايه
يوسف :خليها معاك أنا مرضاش اخويا يبقى أقل من حد وحاول بردو متبذرش
وائل حضن يوسف و يوسف ضمه ليه هو يعتبر أبوه وأخوه بعد موت والده وبيحاول يخليه مش محتاج حاجه وميحسش أنه أقل من حد
يوسف و هو بيطبطب على ظهره: اى حاجه تحتاجها قولى عليها
وائل :ربنا يخليك ليا وميحرمنيش منك ابدا يا اخويا
وخرج وائل ويوسف جهز عشان يروح القسم ..
_________________________
عند باسل ومى
كانو فى العربيه
مى :باسل هو احنا هنروح فين
باسل :هنروح المكان إلى تحبيه بس الاول هنروح مشوار مهم
مى بفضول :مشوار ايه
باسل :هتعرفى أما نوصل وعلى فكره المشوار دا المفاجأة
مى بحماس :بجدد أنا متحمسه اووى
باسل :هههه طب يلا عشان وصلنا ..ونزلوا من العربيه وكانو قدام المخزن إلى فيه سامى
مى باستغراب :باسل احنا فين وايه المكان دا
باسل مسك ايديها
باسل :هتعرفى كل حاجه دلوقتي تعالى ..و دخلوا المخزن إلى كان مليان بالحرس
كريم : اهلا باسل بيه
باسل : اديتولو مياه
كريم :اه زى ما حضرتك أمرت
باسل :تمااام اوى
مى مسكت فى باسل جامد وبدأت تخاف
مى بهمس :باسل هو احنا فين واى كل الحرس دول ومين دا إلى بتسأله اديتوه مياه ولا لاء أنا خايفه هو انت خاطفنى؟!
باسل بابتسامه :خاطفك اي بس دا انتى إلى خطفتى قلبى من ساعه ما شوفتك تعالى بس وهتفهمى كل حاجه ..و دخل بيها للمكان إلى فيه سامى و مى اول ما شافته ...
_________________________
عند فريده
كانت قاعده فى الصالون مع اهلها و كانت بتتفرج على فيلم رعب
أسماء من المطبخ :انتى يا نيله
فريده باندماج مع الفيلم :نعم يا مامااا
أسماء :تعالى ساعديني فى اي حاجه
فريده :يا ماما مالقتيش غير دلوقتي وتقوليلى اساعدك أنا مندمجه مع الفيلم واستنى بقا عشان لوكاس شاف الشبح
أسماء :شبح أما يطلعلك يا بعيده
وفى نفس الوقت جت مسدچ لفون فريده
فريده و هى متأثرة بالفيلم :اوووف ...اعااااا ..يا ابنى اقتله وانجززز ..وفى اللحظه دى جه إعلان
فريده بعصبية : يحرق الاعلانات والى جابوها ..وبصت على المسدچ إلى جاتلها وكان مكتوب فيها
(يوسف بيخونك فاعل خير..)
فريده قرأت المسدچ وكان قلبها بيدق جامد و اتصدمت من الرساله و قررت ترن على الرقم إلى باعتلها الرساله دى لكنه غير متاح حاولت كتير لكنه بردو غير متاح .. استغربت جداً وكانت هتتجنن وتعرف مين الى باعتلها الرساله ويعرفها منين
قررت تقول ل مامتها وبعدها افتكرت أنها ممكن تقول لى باباها وهى مش عايزه باباها يعرف لانه مش بيقبل يوسف وبعد تفكير كتير قررت انها تنسى الرساله ومسحتها ومسحت الرقم بعد ما خدتها اسكرين شوت احتياطي ..وتفكيرها كان شغال على مين الى يفكر يعمل كدا وأنها واثقه فى يوسف ومتأكده أنه بيحبها..
______________________
فى المخزن
مى بصدمه : انت !!
سامى رفع عينه عليهم واستغرب أن باسل جاب مى معاه
باسل قرب من سامى وهو بيقول :هاه اى رأيك يا حبيبتي فى المفاجأة الحلوه دى .. وضربه بالقلم ضربه قويه لدرجه انه نزف
ومى حطت ايديها على بوقها من الصدمه وكانت مستغربه جداً وخايفه من أفعال باسل الغريبه
ومنظر سامى
مى بخوف :ب باسل انت انت جبته هنا ازاى
باسل :مش مهم ازاى أنا جبته هنا عشان تشوفى منظره و هو هيموت وياكل يا حبه عينى ..وبص لسامى بغضب
: اهو منظرك دا بيبقى أشبه بحال البنات إلى بتعمل فيهم أفعالك القذره إلى بتخلى بيها البنت مكسوره ومدبوحه بمعنى الكلمه مجربتش مره تفكر قبل ما تدمر بنت أن ربنا هيردهولك فى مراتك والى ممكن تكون متجوزها بعد ما حبيت بجد او اختك او بنتك ومش بعيد يحصلهم كدا كلهمم ساعتها هيبقى اى موقفك هااا هتبقى استفدت ايييييه ! ..وضربه بقوه
مى بعياط و هى بتحاول تبعده عن سامى :خلاص يا باسل أهدى هيموت فى ايدك
باسل بعصبية :اوعييييى إلى زى الحيواان دا يستاهل الموت ميت مره
سامى كان كلام باسل بينزل عليه زى الخنجر وحاس أد ايه هو كان قذر ويستاهل الى بيحصل فيه و بالرغم من المه لكنه كان حاسس انه محتاج حد يفوقه عن إلى بيعمله
مى بعياط اكتر وخوف :عشان خاطري أهدى خلاص هيموت فى ايدك و هترتكب جريمه على واحد ميستاهلش
باسل لما شاف عياط مى وخوفها هدى وحاول يمسك نفسه عشانها وخدها فى حضنه و هو بيطبطب عليها ومى كانت باصه لسامى ومنظره صعب عليها
سامى بتعب وهو تقريباً مش قادر يتكلم :وحيات امى لاوريك
باسل خرج مى من حضنه واتجه ناحيه سامى
باسل : اممممم طب تعالى بقا نشوف مين الى هيورى التااانى يا حيلتها كرييييييم
كريم دخل بسرعه على صوت باسل
باسل :اربطولى الحيوان دا كويس وابعتوه على القسم وحطه فى الحجز لحد ما يتحقق معاه
كريم :أوامرك يا باسل بيه
وبالفعل تم إلى باسل أمر بيه وباسل كلم يوسف وحكاله على كل حاجه وطلب منه مسك هو قضيه سامى وخرج هو ومى من المخزن وركبو العربية
مى :باسل أنا بجد بشكرك على كل حاجه عملتها معايا
باسل :دا واجبى يا مي كان لازم اعمل كدا عشان اردلك حقك وحق صاحبتك وحق كل بنت وقعت في ايد الحيوان دا
مى بصتله بفرحه وكانت مبسوطه اوى
باسل : ها يا قلبى عايزه تروحى فين
مى : اى حته
باسل : اى رأيك نروح مول
مى :الله أنا بحب المولات جدا
باسل :خلاص اشطا هوديكى مول هيعجبك اووى
وفعلاً رواحو مول و اشتروا حاجات كتير وكانو مبسوطين جداً وعدى اليوم عليهم بسلام
______________________
عند فريده
فريده لنفسها :غريبه يوسف مكلمنيش خالص النهارده يمكن الرساله الى اتبعتتلى دى صح ولا اي ..لا يافريده لا استحاله يوسف يكون بيخونك ..بس هو مكلمنيش خالص النهارده ياربي اعمل ايييه أنا هرن عليه وأشوف
وفريده فعلاً رنت عليه و هو كنسل عليها
فريده بضيق :دا بيكنسل عليا.. يبقا معاااهااا اعاااا يوسف بيخوني والله لا ارن عليك تانى يا يوسف الكلب
وبالفعل رنت عليه تانى و رد لكن كان صوت راجل تانى
الراجل :ايوه يا انسه فريده
فريده :مين حضرتك هو مش دا فون يوسف
الراجل :ايوه تلفون يوسف وانا العسكرى إلى واقف على مكتب يوسف بيه بس هو مشغول دلوقتي
فريده :مشغول ! وحتى لو مشغول مش معاه الفون بتاعه ليه
العسكرى :مش عارف والله هو معاه واحده جوا و طلب منى اخد التلفون ومدخلوش غير أما يطلب منى
فريده بصدمه :واحدههههه!!
•تابع الفصل التالي "رواية مراهقه اوقعتني في حبها" اضغط على اسم الرواية