رواية تمرد قلب (كاملة جميع الفصول) حصريا عبر دليل الروايات بقلم دعاء احمد
رواية تمرد قلب الفصل الرابع 4
شروق كانت واقفة أدام المرأة، كانت سامعه صوت ترحيب ابوها لنجم و عمرو اللي وصلوا البيت من لحظات قليلة جايين علشان يتفقوا….
فاقت من شرودها على صوت ناهد
ناهد بجدية: سرحانة في ايه؟
شروق بابتسامة:هسرح في ايه يعني و لا حاجة… ايه رأيك؟شكلي كدا حلو
ناهد : شكلك قمر بدر في ليلة تمامه…. و بعدين أنتي قمر من غير حاجة ما شاء الله ملامحك حلوة و أحلى حاجة فيكي عيونك و لونهم و أن رموشك طويلة….
شروق: طب ما أنتي كمان زي القمر…
ناهد :مش قلقانه
شروق: لا و مش فارق معايا اوي اني اقلق او اخاف….
ناهد :يارب نص ثقتك دي… المهم دلوقتي ياله علشان تطلعي العصير…
شروق خرجت معها و راحت ناحية المطبخ لقت والدتها واقفه بتبكي و هي سانده راسها على دراعها
شروق بخوف: ماما…. انتي كويسة؟ في ايه بتعيطي ليه
سعاد : بعيط على بختك اللي موقعنا في الجوازة الهباب دي… هاين عليا اطلع اطرد نجم هو و ابنه و اقله معندناش بنات للجواز بس أنتي دماغك ناشفة و تعباني معاكي.
ناهد:خلاص بقا يا خالتي استهدي بالله و بعدين نعدي الليلة دي على خير و بعدها نبقى نتكلم… دول في الأول و الاخر ضيوف المعلم عبد الرحيم
و احنا أهل واجب خلينا نعدي الليلة دي على خير و بعدها نبقى نتكلم…
شروق:ماما متخافيش صدقيني و بعدين أنا مش صغيرة…
سعاد: أنا مش هتعصب عليكي علشان انا عارفة اخرك و محدش هيعرف يعقلك بس خليكي فاكرة اني حذرتك علشان متجيش تعيطي لي بعد كدا فاهمة
شروق بابتسامة و هي بتحضنها:
اومال يعني اعيط لمين و أنا ليا غيرك يا سوسو…. طب و الله بحبك
سعاد حضنتها بخوف و بعدت عنها :طب ياله خدي الصنية دي و خلينا نطلع…
شروق هزت رأسها بالموافقة و هي بتاخد منها الصنية و بتخرج من المطبخ مع أمها و ناهد.
في الصالون
نجم كان بيتكلم بعشم مع عبد الرحيم و كأنهم خلاص بقوا أهل و كأنه نسي فجأة كل اللي عمله قبل كدا
عمرو كان بيتكلم معاهم عن السوق و الشغل، ميعرفش ليه قرر يغير رأيه و يجي مع ابوه رغم أنه قاله انه يكلم المعلم عبد الرحيم و يفهمه أنه كان قاصد بدر لكن لما شافها في السوق غير رأيه.
شروق دخلت بمنتهى الرقي و الثقة و عيونها عليهم
:السلام عليكم ورحمة الله وبركاته
:و عليكم السلام ورحمة الله وبركاته
نجم :اهلا اهلا ب عروسة إبني …
شروق حطت الصنية من غير ما تقدم لكن لقت نجم بيمد ايده يسلم عليها بصت له بكره و نفور
نجم:ازايك يا شروق يا بنتي؟
شروق و هي بتقعد جنب ابوها و اخوها عز
:بخير الحمد لله… معليش مش بسلم
نجم اتحرج و سحب ايده
عمرو :طب مش نتكلم في التفاصيل و لا ايه يا معلم عبد الرحيم.
بدوا يتكلموا و يحددوا كل حاجة و اتفقوا أن معاد الفرح بعد اسبوعين و دا اللي خلي شروق تتخض لانها مكنتش متوقعه انهم يتفقوا على فترة بسيطة هي اه مكنتش عايزاه وقت طويل لأنها مش حابة اصلا تتعرف على عمرو
لكن اتخضت أن نجم عايز الفرح يتم بالسرعة دي، عبد الرحيم كان معترض لان فرح عز بعد شهر و خاطب من سنة تقريباً
ف ازاي بنته تتجوز قبل اخوها بالسرعة دي.
نجم فضل يحاول يقنعه و انهم عايزين يفرحوا لكن المعلم عبد الرحيم أصر أنه ياخد وقت يفكر و هيبلغه بعدها.
بعد ساعة الا ربع تقريبا من الكلام و النقاش
عمرو بجدية
:أظن دلوقتي اتفقنا على كل حاجة… نقرأ الفاتحة و لا اي…
عبد الرحيم بص لشروق و لعز و هز رأسه بالموافقة
:على بركة الله….
عز كان متضايق من القاعدة كلها و اتصدم من انهم عايزين يعملوا الفرح بالسرعة دي، لولا أن شروق كانت موصياه أنه ميعملش مشاكل في القاعدة دي مهما حصل كان ممكن يتهور عليهم….
كلهم قروا الفاتحة و شروق بتبص لعمرو و لنجم
بعد شوية… قامت دخلت هي و ناهد و فضلوا الجماعة قاعدين
عمرو كان مركز معها طول القاعدة و بيحاول يعرف شخصيتها، لأن من جواه لسه مش متقبل الجوازة دي و شايف أن في فرق كبير بينهم، نظراته ليها و كأنه مستني ليها غلطة واحدة يخليه ينسحب و يفشكل الموضوع لكن هي كانت في منتهى الرقي و الثقة في نظراتها و كلامها البسيط …..
في اوضة شروق
ناهد بدهشة:انا مش فاهمة هم مستعجلين على ايه… و بعدين اسبوعين هنلحق نعمل فيهم ايه… و قبل فرحي أنا و عز
تفتكري ليه مستعجلين كدا.
شروق بلامبالة:معرفش و مش فارق معايا أعرف.
ناهد:مالك يا شروق…. من ساعة ما دخلنا و انتى مش على طبيعتك..
شروق :
أصل أنا مكنتش متوقعة ان اليوم دا في حياتي هيكون كدا يا ناهد….
أنتي عارفة سي عمرو اللي قاعد برا دا بيروح يسهر عند البت اللي أسمها زيزي… و من كلامه برا تعرفي أنه شارب من نجم كتير… كنت دايما شايفه أن ميستاهلنيش غير واحد يعرف قيمتي و ابقى بالنسبة له أغلى ما عنده
ناهد:طب ما انتي اللي اختارتي يا شروق و لا هتعيطي دلوقتي.
شروق بلامبالة :اعيط ايه بس… انتي فكرك انا ندمانه على قراري دا لا يا حبيبتي انا لما باخد قرار بكون واثقه اني مش هرجع فيه و لو رجع بيا الوقت هعمل نفس اللي عملته دا… بس ساعات كدا بيصعب عليكي نفسك.
ناهد بابتسامة: بقولك ايه سيبك من الغم دا كله تيجي بكرا ننزل نتغدا برا و نصيع باقي اليوم برأ…
شروق:ماشي…
ناهد:طب دلوقتي انا كنت عامله حسابي ان انتي اللي هتحضري فرحي الاول دلوقتي شكل الموضوع هيختلف خالص…
شروق:بقولك ايه رأيك نطلب أكل من برا… هم شكلهم كدا خارجين و ماما عاملة بط و انا مش بحبه تعالي نطلب حاجة
ناهد:لا يا اختي انا هقوم أمشي انا اصلا ما صدقت اجي انتي عارفة ماما
شروق:مالها أمك هو فيه زيها… و اقولك كمان مش هنطلب حاجة هنقَوم نعمل و اهو تأخير بتأخير بقا…
ناهد:هتعملي ايه؟
شروق:بصي انا نفسي في رز بلبن بصوص الكراميل … و ممكن نعمل بيتزا… ياله انا هقوم اغير
شروق سابتها و قامت غيرت هدومها و خرجت مع هند بعد دقايق…. كانوا كلهم قاعدين يتكلموا و سعاد متضايقه و غضبانه من ردة فعلهم و انهم ازاي يخلوا فرحها بعد اسبوعين…
شروق اتسحبت بهدوء على المطبخ مع ناهد، و بدوا يحضروا الأكل…
في شقة زيزي
كانت بتشيط و خصوصاً لما خبر خطوبة عمرو و شروق سمع في المنطقة كلها و الكل بقا يتكلم
كانت مصدومة و مش مصدقه ان عمرو يخطب شروق لأنه مقالهاش اي حاجة
هو اه عمره ما قال لحد اللي ناوي عليه لكن كانت فاكرة أنه هيقولها اي حاجة….
زيزي بحدة: بقا رايح يتجوز بنت ال*** طب ليه انا مش مصدقه حاسة ان برج من دماغي هيطير من ساعة ما سمعت الخبر و أنا دماغي بتسيح…
عفاف :اهدي يا زيزي…. مش كدا… انا برضو اول ما سمعت الخبر دماغي بدأت تضرب اخماس في اسادس بحاول افهم لكن قلت اجي اشوفك.
عفاف: انتي هتستهبلي فيها يا زيزي… و بعدين هو المعلم عمرو من امتى بيقول سره لحد… و انتي يا حبيبتي واحدة كأن بيجي يقعد عندها شوية و يفضفض من هم الشغل و انا و انتي عارفين انه مش أكتر من كدا… كنتي مستنية ايه بقا.
يعني انتي بالنسبة له زي الدكتور النفسي يجي يحكي له أو يقعد ساكت لحد ما يزهق و يلقى حد يقوله كلمتين ملهمش لازمة و بعدها يقوم يمشي ف اهدي كدا… معليش يعني انتي كنتي مستنيه من عمرو انه يعمل ايه… يتجوزك!
تبقى بتحلمي فوق اوي و دماغك هتسوحك
معليش لو كلامي قاسي بس دي الحقيقة و اللي انتي متأكدة منها ف فوقي كدا و اهدي بدل ما تعملي حاجة تندمي عليها…
و بعدين ما فيه غيره يتمنوكي اشمعني الجزار دا و لا انتي غاوية زهق… و بعدين في الف غيرة يتمنوا لك الرضا… و كلهم معليش مريشين و شغلهم كبير مش واحد جزار.
زيزي:اسكتي يا عفاف…. انتي متعرفيش عمرو… هو اه جزار بس محدش يعرفه ادي بس انا ليا كلام معه تاني … ام بقا الست شروق ف هي حسابها يجمع…
عفاف بسخرية:و النبي اسكتي دي بت بمية راجل… العيال اللي انتي كنتي بعتاهم يضايقها في السوق ضربتهم بجزمتها و لمت عليهم السوق و فرجت عليهم امه لا اله الا الله
يعني مش هتعرف تاخدي منها لا حق و لا باطل لان أهلها مقويين قلبها ….
•تابع الفصل التالي "رواية تمرد قلب" اضغط على اسم الرواية