رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي
رواية هو مين ده الفصل العاشر 10
الفصل ال10
(نسمه كانت مستغربه اوي انها بعد كل السنين دي شايفه قدامها سمير ابن عمها كانت زعلانه منه جدا بس ما بينتش اي رد فعل وسابتهم وطلعت على طول فوق لانها كانت شايفه ان راكان متعصب من وجود سمير وهي طالعه على السلم..
سمير: استني عندك هنا هو انا مش بكلمك المفروض اما ابقى بكلمك تقفي وتردي عليا مش تسيبيني وتمشي.
ام فاروق: يا ابني سيبها دلوقتي هي لسه راجعه وتلاقيها تعبانه خليها تنام شويه ولما تصحى ابقوا اتكلموا.
سمير: امال انا هقعد فين بقى ان شاء الله لحد ما هي تصحى ولا انا هفضل قاعد عندك على طول..
( الكلمه دي كانت كفايه ان نسمه تقف وتلفله وترد عليه.
نسمه: وهو انت بروح امك فاكر ان انت هتقعد معايا في الشقه ده انت تبقى عبيط اوي هو انت هزيت طولك من بلاد بره وجاي علشان تقعد مع بنت في شقه واحده.
سمير: وماله يعني هو انتى مش بنت عمي ولا ايه مين اللي هياخد باله منك اكتر مني.
نسمه: انا بعرف اخد بالي من نفسي ومش محتاجه حد معايا ثم ان هنا مصر مش بلاد الخواجات اللي انت جاي منها يعني ما ينفعش تقعد معايا في شقه واحده شوفلك حته بقى اقعد فيها.
ام فاروق: بصراحه يا ابني هي بتتكلم صح ما ينفعش في اي وضع تقعد معاها في نفس الشقه عيب.
سمير: هو ايه اللي عيب هو انا هاكلها وبعدين احنا هنفضل نتكلم على السلم كده كثير.
ام فاروق: طيب معلش يا نسمه يا بنتي تعالي عندي جوه شويه اتكلموا وبعدين اطلعي شقتك.
نسمه: نتكلم في ايه هو اي هري وخلاص انا اللي عندي قلته هو يروح يشوفله حته يقعد فيها وما يقرفنيش معاه..
(وقتها سمير اتغاظ من رد فعلها وقرر انه يقول اللي عنده حتى لو على السلم.
سمير: بس انا مش جاي علشان اقعد معاكي في شقه واحده وخلاص انا جاي علشان اتجوزك ويا اخدك ونسافر يا نشتري شقه هنا ونقعد فيها يا اما لو انتى عاوزه تقعدي في شقه ابوك وامك انا ما عنديش مانع.
( وقتها نسمه غضبت جدا من الكلام اللي هو قاله نزلت وقفت قدامه ومسكته من هدومه بعنف.
نسمه: لا انت واضح ان ودانك ما جابتش الكلام اللي انا قلته انت لا ليك عليا كلام ولا ليك عندي حاجه وجواز ايه اللي انت بتتكلم فيه ده انت اخر واحد في الدنيا ممكن افكر ابصله لو كان على الرجاله هم على قفا من يشيل بس انا ما بحبش حد ومش هتجوز ريح نفسك وارجع من مطرح ما جيت.
ام فاروق: هو يا ابني الكلام ده ينفع يتقال على السلم.
سمير: هي يعني عايزه تقعد معايا في حته عشان نتكلم ما انتى شايفه طايحه في الكل ومش عاجبها حد وبعدين انا بقول عاوز اتجوزها هو انا غلطت
( فاروق وقتها طلع وسمع الكلام ده وهو كان تحت وسمع كلمه يتجوزها ودخل في الكلام مره واحده.
فاروق: هو في ايه انا مش فاهم.
سمير : انا بقول عاوز اتجوز نسمه واخدها ونسافر يا اما نقعد في مصر زي ما هي عايزه وهي متخنه دماغها ومش عاوزه توافق ولا حتى عاوزه تقعد تكلمني.
فاروق: ما هي حره يا جدع ما يمكن انت مش عاجبها هو الجواز بالعافيه.
( استغربت نسمه من رد فعل فاروق اللي بيدافع عنها لكن ما اهتمتش علشان ترد ام فاروق..
ام فاروق: خليك محضر خير يا ابني ما تدخلش في حاجه ما تخصناش هي حره تعمل اللي هي عاوزاه توافق ما توافقش حاجه راجعالها هي اللي هتتجوز وتعيش
نسمه بغضب: خلاص خلصتوا الكلام اللي عندكم سيبوني عشان انا مش طايقه نفسي وعاوزة اطلع انام..
( طلعت نسمه شقتها وهي مش طايقه نفسها ومش عاوزه تكلم حد واول ما دخلت وقفلت الباب ظهر راكان وهو غضبان..
راكان: ممكن افهم الغبي اللي برا ده كان بيقول ايه.
نسمه: وانا مالي هو كان بيقول ايه المهم انا قولت ايه ولا انت بتسمع اللي على مزاجك بس..
راكان: انتى بتكلميني كده ليه ما تيجي تاخديلك قلمين بالمره.
نسمه: هو انا كلمتك انا بس متعصبه ان هو جه اصلا ومتضايقه وانت جاي تضايقني بزياده وتقولي هو جاي يعمل ايه وانا مالي..
راكان: انا بسأل هو هنا ليه.
نسمه: والله ما بعرفش الغيب عشان اعرف هو جاي ليه روح اسأله..
راكان: ما بلاش انا لو رحت اساله مش هتشوفيه تاني..
( حست نسمه بخوف من راكان وقتها وقعدت على السرير تعيط ساعتها هو حس بالزعل عشان ضغط عليها وقعد جنبها واخدها في حضنه.
راكان: خلاص حقك عليا ما تزعليش وقلتلك ما بحبش اشوفك بتعيطي انا بس بغير عليكى وانتى عارفه.
نسمه: انا مش بعيط علشان انت زعقتلي.
راكان: امال بتعيطي ليه في حاجه بتوجعك ولا جعانه.
نسمه: هو انا لو جعانه هعيط ليه يعني انا بس افتكرت بابا وماما لما شفته وما كنتش عاوزه اشوفه اصلا.
راكان: تحبي ارجعه من مطرح ما جه.
نسمه: انا مليش دعوه يرجع ولا ما يرجعش المهم انه بعيد عني وخلاص..
راكان: بس ده عاوز يتجوزك ولا انتى ما سمعتهوش.
نسمه: وانا مش موافقه يروح يدب دماغه في الحيطه.
( في الوقت ده شعبان كان قاعد على القهوه مع المعلم جابر بيتكلموا.
شعبان: بقى كده يا جابر ترجع الواد شفشق وتفرحه فيا
جابر: معلش بقى يا معلم شعبان دى ارزاق وحرام نقطعها انا بس ما رضيتش ازعلك يومها ومشيته لكن لما قعدت مع نفسي عرفت اني غلطت هو انت جاي تقعد معايا علشان تكلمني في موضوع شفشق.
شعبان: اكيد لا يعني انا كنت عاوز اعرف مين الجدع اللي جه مع فاروق وام فاروق عندي ما تعرفوش ولا ايه.
جابر: ما اعرفوش ازاي ده يبقى سمير ابن فرحات الله يرحمه يعني ابن عم نسمه.
شعبان:امممم ابن عمها وطبعا هيقعد معاها وهيقفلنا زي اللقمه فى الزور.
جابر: ويقفلى زي اللقمه ليه انا مالي بالنسبالك انت بقى مش قولت انك مش عاوز تشوف وشها تاني وهزقتها ايه اللي مزعلك من وجوده.
شعبان: لا ولا حاجه انا قايم امشي
( خرج شعبان من عند جابر وهو ناوي يبات عند نجات ولما راح يفتح الباب المفتاح ما فتحش فخبط.
شعبان: افتحوا يا ولاد الباب ما بيفتحش المفتاح باين عليه باظ ولا الكالون معلق..
( خبط شويه وبعدين ردت نجات من ورا الباب..
نجات: لا يا اخويا المفتاح ما باظش ولا حاجه والباب سليم وزي الفل انا اللي غيرت الكالون.
شعبان: نعم يا اختي غيرتى ايه.
نجات: سلامة ودانك يا حاج غيرت الكالون يا اخويا لما يبقى معاك تصرف على بيتك وتعيشه ابقى تعالى خد المفتاح الجديد.
شعبان: ايه الكلام الغريب ده يا وليه افتحي الباب احسنلك.
نجات: يا اخويا ده مش كلام غريب ولا حاجه ده كلام العقل هو انت هتفضل قايم نايم شارب واكل على قفايا انا وعيالي انت فاكرني فاتحاها تكيه... اما تبقى قادر تصرف على البيت ابقى تعالى خبط وانا هفتحلك واخدك بالاحضان كمان..
شعبان: انتى باين عليكى اتجننتي افتحي يا نجات احسنلك وعدي اليوم بدل ما اكسر الباب على دماغك ودماغ اللي خلفوكى..
نجات: تصبح على خير يا حاج انا داخله انام وابقى خليك كسر الباب عشان اطلبلك الحكومه سلام..
(وقف شعبان مش مصدق اللي بيحصل وانه دلوقتي بقى في الشارع ومالوش حته ينام فيها و كان متأكد انه لما يروح لسنيه ورباب هيقولوا له نفس الكلام عشان كده خد بعضه ورجع للمعلم جابر.
شعبان: استنى يا معلم انت بتقفل ولا ايه..
جابر: اه بقفل الوقت اتاخر في حاجه ولا ايه يا معلم.
شعبان: معلش يا معلم جابر انا عندي ظروف وعاوز ابات عندك في القهوه النهارده..
( استغرب جابر من كلامه انه مش لاقي حته يبات فيها وهو عنده ثلاث بيوت..
جابر: ظروف ايه اللي تخليك تبات في القهوه يا معلم ايه اللي حصل في الدنيا.
شعبان: من غير كلام كثير يا جابر هتبيتني عندك ولا لا.
جابر: خش يا اخويا نام وانا هقفل عليك و الصبح ابقى اجي افتحلك
( دخل شعبان القهوه وقفل عليه جابر ومشي..
وعند ام فاروق كانت قاعده بتحضر العشا لحد ما جه فاروق قعد جنبها وكان سمير نايم جوه.
فاروق: بقولك ايه يا امه هو الاستاذ اللي جوه ده هيفضل مشرفنا لحد امتى.
ام فاروق: قصدك ايه يعني يا واد اطرده يعني ولا اعمل ايه.
فاروق : انا مالي يا امه تطرديه ولا يغور في 60 داهيه البيوت ليها حرمه ما ينفعش قعدته في وسطنا كتير وبعدين ده عيل طفس بعد السنين دي كلها جاي يقولها عاوز اتجوزك هو نسى اللي عمله زمان.
ام فاروق: ملناش دعوه يا ابني هما اهل في بعض يتجوزها ما يتجوزهاش دي حاجه ترجع لنسمه نفسها.
فاروق: بس انا طلبتها قبله ولو المفروض توافق على حد يبقى انا.
ام فاروق: اااه قول كده بقى انت كل الهيصه دي علشان عاوزها انت ليك وبدل ما كنت مرحب بالواد الوقتى ما انتاش طايقوا لما عرفت انه عاوز يتجوزها ريح بالك نسمه لا هتوافق عليك ولا عليه.
فاروق: هو انتى خلاص حكمتي انها مش هتوافق عليا من غير حتى ما تعرضي عليها الموضوع طيب ما تساليها يا امه ويمكن توافق.
ام فاروق: حاضر يا فاروق هسالها ارتحت كده.. برغم اني عارفه ردها ايه بس هسالها بردو.
فاروق: حبيبتي يا امه ما اتحرمش منك ابدا..
(بعد ثلاث ايام فوق عند نسمه كانت بتتكلم في التليفون مع هيام
نسمه: المهم طمنيني عليكى انتى عامله ايه.
هيام: انا الحمد لله كويسه جدا ومرتاحه اوي حتى رجعت اكمل دراستي تاني.
نسمه: هو انتى كنتى بتدرسي ايه وايه اللي خلاكى تبطلي دراسه.
هيام: انا كنت بدرس إداره أعمال وكنت ناويه اعمل ماجستير لما اخلص بس ما لحقتش اعمل حاجه عشان موضوع منصور اللي قلتلك عليه بس الحمد لله خلاص ربنا خلصني منه علشان كده قلت هرجع اكمل دراستي تاني.
نسمه: امال انتى عايشه ازاي وبتصرفي منين يا هيام.
هيام: اه صحيح انا ما قلتلكيش بصي يا ستي منصور من كتر ما كان مطمن ليا لما دخلت حياته عشان انتقم لابويا كان عامل وصيته انه لو حصله حاجه كل املاكه تتنقل ليا علشان ما كانش ليه حد ولا اخ ولا بنت ولا ابن كان وحيد... وبعد ما الموضوع ده خلص والحكومه اكتشفت جثة منصور والشيخ ورجالتهم في المقبره.. يبقى حسب ما الوصيه بتقول كل حاجه اتنقلتلي وانا دلوقتي عايشه في الفيلا وبصرف من الفلوس اللي في البنك اللي انا لو فضلت اصرف منها عمري كله مش هتخلص.
نسمه: عموما اهي فلوس ابوكي ورجعتلك الراجل ده كان مفتري اوي لما يقتل صاحبه كده غدر عشان فلوس.
هيام: انا والله خوفى كله دلوقتي من واحد كان مشارك منصور وعمل معاه نفس اللي عمله مع ابويا والراجل اتجنن من الصدمه واترمى في المستشفى بتاعة الامراض العصبيه بس عنده ولدين قلبين الدنيا على منصور من زمان ولما عرفوا انه مات بيطالبوا دلوقتي بفلوس ابوهم.
نسمه: وانتى ناويه تعملي ايه في الموضوع ده.
هيام: ما تركزيش انا نفسي بحاول ما اركزش هما ما يقدروش يثبتوا حاجه عليا المهم طمنيني عليكى.
نسمه: والله انا مخنوقه اوي يا هيام ومليش نفس للدنيا كلها.
هيام: ليه كده بس ايه اللي حصل
نسمه: ابن عمي اللي كان مسافر من 10 سنين بلاد بره رجع وجاي بقى عاوز يتحكم فيا ويقولي نتجوز وانا مش عاوزاه والموضوع ده مضايق راكان اوي وخايفه في وقت عصبيه يعمل فيه حاجه.
هيام: طيب وانتى بتحبي مين فيهم قريبك اللي رجع ده ولا الامير راكان.
نسمه: والله انا مش عارفه انا بس مش عايزه مشاكل.
هيام: بس انا عارفه وانتى عارفه وبتضحكي على نفسك.
نسمه: بضحك على نفسي ازاي يعني.
هيام: علشان انتى بتحبي الامير راكان بس خايفه تعترفي انك بتحبي جن كان باين عليكى اوي يعني.
نسمه: كان باين عليا ايه مش فاهمه تقصدي ايه.
هيام: قصدي اقولك ان يوم ما جالك واحنا في الصحراء انتى اول ما شفتيه اطمنتي اوي وكنتى في حضنه زي البيبي الصغير اللي لقى امه.. علشان كده بقولك انتى بتحبيه بس خايفه تعترفى انك بتحبي جن لأن الموضوع مش قليل.
نسمه: والله يا هيام شكلك عندك حق ولحد دلوقتي انا مش عارفه اقوله حاجه وهو قاعد مستنيني تفتكري اعمل ايه.
هيام: والله يا نسمه في المواضيع دي بالذات ما ينفعش حد يقولك تعملي ايه المفروض تمشي ورا قلبك وتشوفي الصح وتعمليه.
نسمه: ما هو انا خايفه اقوله اني بحبه وانا ما اعرفش ايه اللي جاي معاه وخايفه ما اقولوش وافضل ساكته واضيع عمري على الفاضي.
هيام: طيب هسالك سؤال لو انتى كنتى بتحبي قريبك اللي لسه راجع ده هل كنتى هتبقي عارفه الجاي معاه ايه ولا هيبقى في علم ربنا بردو..
نسمه: لا طبعا كله في علم ربنا هو في حد بيعرف الغيب.
هيام: طيب امال ايه اللي مخوفك انتى سيبي قلبك هو اللي يتحكم لانك طول ما انتى بتفكري مش هتعملي حاجه يلا انا لازم انام علشان هروح الصبح اخلص شويه ورق في البنك.
نسمه: ماشي يا حبيبتي تصبحي على خير.
(قفلت نسمه الخط مع هيام وهي بتفكر هتعمل ايه مع راكان وهل هي فعلا بتحبه ولا لا فجاه وهي بتفكر لقت قدامها واحد شكله وحش جدا..
نسمه: اااااااه انت مين وايه اللي دخلك هنا.
حارث: انا اللي جاي اخلص منك وللابد..
•تابع الفصل التالي "رواية هو مين ده" اضغط على اسم الرواية