رواية خطيبتي واخواتها التوأم الفصل العاشر 10 - بقلم رحاب القاضي

 رواية خطيبتي واخواتها التوأم (كاملة جميع الفصول) حصريا عبر دليل الروايات بقلم رحاب القاضي

رواية خطيبتي واخواتها التوأم الفصل العاشر 10

 

_الحلقه العاشره 

ـــــــــــــــــــــــــــــــــــــــــــ

_مش معني اننا شايفين اللي قدامنا متوفره ليه كل حاجه انه كده ما فيش حاجه ناقصاه، ممكن تكون  حاجات كتير متوفرالك انت نقصاه هو... 

_اتملت عيون انس دموع بعد ما معتز ضربه بالقلم قدام الكل، وقرب حازم من معتز ووقف قدام انس وقال.. 

حازم 

انت ايه اللي عملته كده اسمع منه الاول يا اخي.. 

معتز بص لمدير الامن بتاع النادي وقال

هي مش الشرطه جايه الواد ده يتعاقب علي اللي عمله في صاحبه، حتي لو هيتسجن.. 

حازم بحده 

انت بتقول ايه يا معتز، لو سمحت اخرج وانا هحل الموضوع.. 

معتز بعصبيه 

انس لو ما اتعاقبش علي اللي عمله ده انا هبلغ عن امن النادي وهوديكم في داهيه.. 

وبص لياسين وقال

وانت اياك تسيب حقك وخده بالقانون.. 

_جني كانت مركزه علي انس اللي كان هادي جدا بس عيونه اللي كلها دموع بتقول حاجات كتير وقالت.. 

جني

لو سمحت حضرتك هو ما غلطش هو اا.. 

عزت مسك ايدها وقال

جني ما لناش دعوه ويلا بينا من هنا... 

جيلان 

هو اصلا يا بابا كل ده حصل بسببها هي.. 

عزت بجمود

ما اسمعش صوتك خالص يلا قدامي منك ليها... 

_وقبل ما يتحركو الشرطه جات ومعتز سمحلهم ياخدو انس اللي وقف قدام معتز ودموعه نزلت وقال.. 

انس

انت المره دي كسرتني بجد... 

_قال كلامه وطلع مع العسكري، وبص لجني وهو بيمسح دموعه وابتسم بهدوء وكانه بيقولها ما تقليقيش ومشي... 

_في الاستديو بتاع القناه اللي فيها ناني، كان اياد واقف مع منه وقال.. 

اياد. 

الفون مش مجمع خالص مش عارف باظ ولا ايه.. 

منه 

يعني انت هتغلب يا اياد هات واحد. غيره عادي.. 

اياد 

المشكله ان عليه معلومات مهمه.. 

منه 

هو مش اخوك بيدرس هندسة الكترونيات خليه يشوفه ليك وو.. 

_طلعت ناني في الوقت ده ومشيت علي طول، واياد ساب منه وراح وراها بسرعه.. 

اياد 

ناني ناني يا بنتي استني انتي رجليكي دي قطر.. 

ناني 

نعم يا اياد باشا في حاجه؟.. 

اياد 

يعني اتقابلنا صدفه وو.. والله انا مش عارف اقول ايه انتي عامله ايه طيب اهو اي حاجه وخلاص.. 

ابتسمت ناني غصب عنها وقالت

هو حضرتك عايز مني ايه بالظبط؟.. 

اياد 

حلو السؤال ده عشان انا ماليش في اللف والدوران، انتي مخطوبه لرؤوف؟.. 

ناني 

رؤوف مين ومين قالك حاجه زي دي وانت بتسأل ليه؟.. 

اياد 

لا بس كده انا اتضحك عليا، المهم انتي اتقبلتي جوه ولا محتاجه وسطه و.. 

ناني 

نعمم وسطه ايه، انا مطلوبه هنا بالاسم وانا اللي لسه هفكر هوافق ولا لا.. 

اياد 

ايوه يا واثق انت، المهم انتي ساكنه فين بقي في القاهره.. 

ناني بجمود 

بعد اذن حضرتك.. 

مشيت ناني واياد قال

والله نيتي خير بس مدام قاعده هنا في القاهره يبقي هنتقابل كتير هااا.. 

بصتله ناني وقالت

ما تحلمش كتير لاني ممكن ما اوافقش وارجع اسكندريه.. 

اياد ابتسم وقال

واسكندريه مش بعيده برضو يا ناني... 

_سابته ناني ومشيت بس كانت مبتسمه ومبسوطه من اهتمامه بيها اللي اول مره يحصل معاها.. وراح اياد ركب عربيته وفضل يغني ويقول.. 

اياد 

لولا ضحكتها الحلوه وعدتني بحاجات حلوه الحلوه الحلوه عينيه.. 

منه من ورااه 

هي مين دي اللي انت كنت واقف معاها؟. 

اياد 

ياربنا علي الفصلان، نعم يا منه عايزه تعرفي مين دي دد دي قريبة ماما مريم... 

منه بغيظ 

هي الست دي مش بتيجي من وراها حاجه كويسه، علي العموم امسك الفون بتاعك شحن وكان باباك بيرن عليك كتير جوه... 

_اياد اخد الموبيل وكلم معتز اللي زعق فيه وقال اول ما رد علي طول... 

معتز 

انت فين يا زفت انا مش برن عليك من الصبح.. 

اياد 

انا مع منه في مشوار كده، هو في اي طيب؟.. 

معتز 

ربع ساعه وتكون عندي فاهم ولا لا؟.. 

اياد 

حاضر يا بابا مسافة السكه.. 

_قفل معاه ومشي بسرعه وساب منه اللي دخلت وفضلت تسأل علي ناني وعرفت انها المذيعه الجديده في الراديو... 

ــــــ  ــــــــــ 

ـ في الاسكندرية في المطعم اللي كانت فيه ملك مع امجد، وقفت ملك بعد ما شافت سونيا وقالت.. 

ملك 

انتي مين اصلا عشان تقولي كده علي خطيبي يا انسه... 

سونيا ضحكت وقالت

ههههه انسه ايه يا انسه طيب اسألي خطيبك كده شوفي هيقولك ايه؟.. 

امجد. وقف وهو قلقان وقال

ملك تعالي نمشي وسيبك منها خالص.. 

سونيا بصوت عالي 

دلوقتي سيبك منها خالص يا عرة الرجاله، اييه خايف تقولها ان انا الرقاصه اللي كنت ماشي معاها في السر.. 

ملك بدموع 

رقااصه يا امجد وو... 

امجد 

والله العظيم ده كان قبل ما اعرفك يا ملك.. 

سونيا 

يا اختي حلوه وبقيت تحلف وتخاف كمان، بس عرفت تختار هتتجوز قطه مغمضه ما تعرفش بلاويك ونزواتك، يا حبيبتي ده كان الصبح مع واحده والضهر مع في، ها وبالليل مع غيرهم واللي بيبقو النهارده ما بيبقوش بكره..

وقفت في نص المطعم وقالت

ومش بس كده يا حبيبتي ده لسه هيجيبلك هدايه وهيفرشلك الارض ورد واخرة ما يوصل للي عايزه هريميكي علي اوسخ جزمه.. 

_اخدت ملك شنطتها وطلعت وهي بتعيط، وامجد قرب من سونيا وقال... 

امجد. 

وحياة امك لندمك علي اللي عملتيه ده... 

قبل ما ترد عليه قرب منه عمه فوزي البحيري وقال

عيب كده يا ابن اخويا تغلط في مرات عمك.. 

امجد. بصدمه 

نعمم انت اتجوزت دي يا فوزي.. 

فوزي 

وهي مالها دي، دي شرحتلك دلوقتي.. 

سونيا 

ما انا قولتله ما يجيش علي الغوازي هو مش قدهم... 

_طلع امجد بره وهو متعصب وراح لملك اللي كانت واقفه تعيط وقال.. 

امجد 

والله كل ده كان زمان يا ملك.. 

ملك بدموع 

لو سمحت سيبني دلوقتي، انا عارفه انه من ماضيك بس انا ما كنتش فاكره انه كده.. 

امجد مسك ايدها وقال

والله العظيم بحبك يا ملك ومستعد عشانك اعمل اي حاجه بس بلاش تسبيني... 

ملك بعدت عنه وقالت 

انا عايزه امشي لو سمحت، ووقت ما هكون تمام هكلمك... 

امجد 

طيب هوصلك.. 

ملك 

لا بقولك ايه اقعد علي جنب انا مش طايقه وشك، رقاااصه يا امجد رقاااصه.... 

_وسابته ومشيت اخدت تاكسي وراحت البيت وكانت بتعيط واول ما نزلت من التاكسي لقيت خالد واقف تحت البيت.. 

ملك ببكاء

ايه ده هو بابا جه؟.. 

خالد بقلق

ايوه لسه طالع فوق، مالك طيب في حاجه ولا ايه؟.. 

ملك ببكاء

هو ليه كده ليه لما حبيت كان امجد ده كان نادي للنساء... 

خالد اتردد يتكلم بس قال

عشان انتي اختارتي تحبي حد مش مناسب.. 

ملك 

هو في. حد بيختار هو يحب مين يا خالد... 

ابتسم لما نطقت اسمه وقال

هو مش انتي قلقانه تطلعي فوق عشان دكتور بهاء ما يقلقش عليكي.. 

ملك

لا هو مش هيقلق عليا هو هيشمت فيا عشان هو قالي امجد لا وانا ما صدقتوش.. 

خالد 

يعني انتي ناويه تسيبي امجد.. 

ملك بحده 

تف من بوقك قال اسيبه قال ده انا ما صدقت لقيته... 

خالد بغيظ 

طيب لو سمحتي اطلعي فوق... 

ملك بحزن

بابا لو شافني بعيط هيدايق... 

كملت ببكاء وصوت عالي 

وانا مش هعرف ابطل اعيط او امسك نفسي.. 

خالد بغيظ

والله العظيم انتي لو شوفتي شكلك وانتي بتعيطي هتنتحري، اسكتي لو سمحتي.. 

ملك ببكاء

لا انت كداب انا شكلي كيوت اووي وانا بعيط.. 

خالد 

ده مين اللي ضحك عليكي وقال كده.. 

قعدت ملك علي سلم العماره وقالت

والله مش هتكلم معاك تاني بس.. 

قعد. جنبيها وقال

خلاص ما تزعليش، بقولك ايه قومي تعالي معايا.. 

ملك 

هتفسحني ولا ايه.  

خالد 

افسحك؟! لا خليكي تعيطي احسن.. 

قام مشي وهي راحت وراه وقالت

لا استني واااد يا خااالد... 

ــــــــــ #بقلم_الكاتبه_رحاب_القاضي ــــــــــ 

_في القاهره في بيت  معتز كانت مريم لامه هدومها وماشيه واياد بيقولها.. 

اياد 

خلاص يا ماما عشان خاطري ، وانا هروح اطلعه و.. 

مريم بحده 

انت هتعمل كده فعلا ده اخوك، انما انا مش هقعد مع ابوك دقيقه تانيه وصلت انه يحبس ابني يا اياد ويمد. ايده عليه.. 

معتز وقف وقال بعصبيه 

هو ابنك لوحدك، ده ابني انا كمان وانا لازم اربيه كويس واخليه راجل.. 

مريم بعصبيه 

لا معلش انا ابني متربي والربايه عمرها ما كانت انك تهينه او تسجنه وتضيع مستقبله، انا عرفت احمي اياد منك ومن طريقتك الغلط في التربيه بس ومش هسمحلك تأذي انس اكتر من كده.. 

معتز بحزن 

هو وصلت انك تقولي هتحمي ولادي مني، هو انا عدوهم انا ابوهم وخايف عليهم وعايزهم احسن ناس في الدنيا... 

_قبل ما ترد. عليه مريم دخل انس البيت بالمفتاح بتاعه ومعاه حازم، راحتله مريم بسرعه وقالت.. 

مريم 

انت جيت يا حبيبي اا.. 

بعد عنها بسرعه وقال

لو سمحتي خليكي بعيد وكفايه تمثيل بقي ابنك واقف هناك روحيله.. 

_نزلت دموع مريم ودخل انس اوضته وجاب هدومه وطلع مسكه معتز من دراعه جامد. وقال.. 

معتز 

استني هنا انت رايح فين... 

انس بجمود 

ابعد عني واروح فين او ما اروحش فين دي حاجه ما تخصكش... 

اياد بضيق 

عيب يا انس سيب الشنطه دي وتعالي ننزل نتمشي شويه مع بعض.. 

زعق فيه انس وقال

انت كمان ما لكش دعوه بيا وبطل تعمل دور الاخ الكبير عشان مش لايق عليك.. 

معتز بحده 

انت عامل كل ده ليه عشان عايزينك تبقي بني ادم وشخص محترم.. 

انس دموعه نزلت وقالت

لو الاحترام ده هيخليني ابقي زيك فانا مستحيل ابقي زيك، ومن النهارده انا هبقي اوحش بني ادم في الدنيا وهطلعكم انتو التلاته من حياتي لانكم عمركم ما كنتو اهلي انا ماليش اهل انا طول عمري غريب شويه عندكم هنا وشويه عند نيره وحازم  كنت باجي وانا صغير زي الضيف وكنت بروح عند حازم ونيره ضيف برضو انا ماليش مكان عندكم كلكم.. 

_قال كلامه وسابهم ونزل وحازم بصلهم وقال... 

حازم

المفروض واحد زي انس يكون دلوقتي عايش حياته وهو مبسوط وكل حاجه في حياته حلوه ومبهجه بس انتو حرفيا دمرتوه، ليه يا اياد ما تقربش منه رفض يتكلم معاك مره قرب منه اتنين وتلاته ده اخوك، وانت يا معتز بدل ما تمد ايدك وتتعصب احتويه، والهانم اللي ما تعرفش حتي ابنها لما بيناخر بيكون فين كل خوفها ان ما تحصلش خناقه بينه وبين باباه انما هو فين مش مهم... 

معتز بضيق 

خلي بالك منه يا حازم، واحنا ما غلطناش في ناس تتمني ربع العيشه اللي هو فيها بس فعلا اني اتدلع و بيتبعتر علي النعمه... 

حازم 

بجد. ما فيش فايده.. 

_وعند انس اخد عربيته ومشي راح عند نيره، اول ما دخل كان ساكت ومش راضي يتكلم.. 

نيره قعدت جنبيه وقالت 

يا حبيبي قولي في ايه،  طيب تعالي اقولك انا علي حاجه، عارف انا ايوه ما خلفتش وكنت ديما حاسه بنقص في الموضوع ده، بس اول ما انت اتكلمت وكان عندك سنه وكام شهر ونطقت ماما كانت ليا انا ومن وقتها وانا الاحساس ده اختفي عندي حتي لو انت مش ابني الحقيقي بس انا مكتفيه باحساس انك بتعتربني زي مامتك.. 

انس حضنها وفضل يعيط وقال

انا تعبان اووي يا ماما انا قلبي واجعني اوووي... 

نيره فضلت تبطب عليه وقالت 

اهدي با حبيبي ربنا يهون عليك ويريح قلبك... 

ــــــــ #بقلم_الكاتبه_رحاب_القاضي ــــــــــ 

_عند ملك كانت قاعده في الشارع بتاكل سندوتشات كبده ومعاها خالد.. 

ملك 

بجد. طعمها فظيع، انا عمري ما كنت اتخيل اني اقعد علي الرصيف واكل كده... 

خالد 

اكيد دكتور بهاء كان بيرفض انكم تجيبو اكل من الشارع.. 

ملك 

بصراحه لا انا اللي كنت برفض من نفسي اصلها حاجات بيئه بتاعت ناس فقرا انا باكل من اغلي اماكن وو.. 

اخد منها خالد الاكل وقال

روحي طيب كملي اكلك في المطاعم بتاعتك دي.. 

ملك اخدتهم منه وقالت

بس برضو دي طعمها حلو اووي وفي صوص غريب كده فيها محليها جدا.. 

خالد 

صوص ايه ده الراجل صاحب العربيه دي لو سمع صوص دي هيقفلها... 

ملك 

متافورش، دقيقه هرن علي بابا اقوله اني معاك وربنا يستر.. 

خالد 

اطمني انا كلمته قولتله انك معايا بتجيبي حاجات وكده... 

ملك 

طيب عايزه اكل البتاع اللي اسمه... مش فاكره هو عباره عن كور مبعرمه ولونها اصفر وبتبقي في كوبايه وفيها شطه.... 

ضحك خالد غصب عنه وقال

ههههه والنبي ما تشغليش دماغك تاني، اسمه حمص شامي.. 

ملك 

ايوه هو ده ناني مره خلتنا ناكله كان طعمه حلو اووي... 

خالد

علي فكره اي حد بياكل الحاجات دي ولا انتي مش عايشه في مصر.. 

ملك 

ناني وسما بياكلو كده عادي وممكن يقعدو القعده دي بس، ونا يعني مش هكررها تاني برستيجي ما يسمحش.. 

خالد وقف وقال

طيب تعالي اجيبلك الحمص ده عشان اروحك يلا المهم بس انك هديتي خلاص.. 

ملك ابتسمت وقالت

ايوه هديت بجد. شكرا اوووي انت عسل اووي يا خالد والله.. 

خالد 

عسل؟!  يلا والنبي مش ناقص شلل... 

ــــــــــ #بقلم‌_الكاتبه_رحاب_القاضي ــــــــــ 

_ وبعد كام يوم في دبي، كان محمد في الشركه اللي شغال فيها جديد وطلع مع الاجتماع ومعاه مدام فيروز المديره وجيدا بنتها... 

فيروز 

بجد انت ما خيبتش ثقتي فيك خالص يا دكتور محمد، واختيار اني اجيبك من مصر لهنا عشان تمسكلي قسم الاستيراد ده هيضيف لشركتنا كتير.. 

محمد 

ده شرف ليا يا مدام فيروز، وان شاء الله اكون عند حسن ظن حضرتك... 

فيروز 

ان شاء الله يا دكتور محمد.. 

_ومشيت فيروز وقربت جيدا بنتها من محمد وقالت.. 

جيدا 

تيجي نشرب حاجه قبل ما تروح.. 

محمد

اسف جدا. يا انسه جيدا انا لازم اروح لاني سايب مراتي لوحدها في البيت... 

جيدا بضيق

اممم لا طبعا ما يصحش انت لسه عريس جديد.. 

محمد 

بالظبط كده بعد. اذنك.... 

مشي محمد وقربت منها نفين صحبتها وقالت

برطو ما. جاش معاكي سكه، معلش اصل ده مش زي الشله بتاعتنا.. 

جيدا 

ما هو ده اللي هيجنني عليه، بس ان ما خليته يومين بالكتير ويسهر معايا ما ابقاش انا... 

نفين

هنشووف... 

_ورجع محمد البيت واول ما دخل لقي الجو هادي اووي، دخل اوضة النوم ولقي سما نايمه.. 

محمد 

سما.. سمااا انا سايبك نايمه الصبح معقول لسه ما قومتيش سمااااااا.. 

_كانت سما نايمه ومش بترد وهو ما كانش يعرف ون نومها تقيل.. 

محمد قرب منها وقال بخوف 

سمااااا سماااا قوميي انتي كويسه سمااااااا... 

فتحت سما عيونها بشويش وقالت 

في ايه؟.. 

محمد 

انتي كده نايمه ده دبي كلها صحيت وانتي تقولي في ايه كده.. 

سما ببرود 

عايز ايه انت دلوقتي يعني.. 

محمد 

قومي يا سما انتي نايمه من الصبح... 

سما 

لا ما انا اسمي الحقيقي غيبوبه، وبعدين انا قومت كلمت ناني وملك فيديو وعملتلك الاكل ونمت... 

محمد قام وبدا يغير هدومه وقال 

طيب قومي يا سماا، تعالي بقي احكيلك حصل ايه في الاجتماع النهارده انا ااا.. 

بص لسما لقاها نامت تاني، زعق فيها وقال

انتي لحقتي تنامي تاني سمااااااااااا.. 

_قامت سما ومسكت المخده وضربته بيها وقالت وهي متعصبه.. 

سما 

في ايه يخرب بيتك... 

محمد بخوف 

والله ما فيش حاجه اهدي، وبعدين قومي انا عايز اتغدي.. 

سما

الاكل جاهز في التلاجه يدوب تسخنه.. 

محمد 

اومال انتي لازمتك ايه بقي؟.. 

سما نامت وقالت 

لو شايف اني ما ليش لازمه انا ممكن انزل نصر وخليك براحتك هنا.. 

ادايق محمد وطلع وهو بيقول

براحتك يا سما خلي النوم ينفعك.. 

_وطلع محمد وسما جات تنام بس حست انه ادايق فا قامت وهي متدايقه وقالت.. 

سما 

ادي الجواز وادي اللي واخدينه منه.. 

_طلعت سما ولقيت محمد واقف وبيجهز في الاكل وهو عمال يغني ويرقص وبيقول.. 

محمد 

حياتي بقت اجمل بكتير انا حسيت فعلا بالتغير او او او💃🏿💃🏿... 

ضحكت سما وقالت 

هههههههههه ايه ده يا دكتور محمد.. 

محمد باحراج 

انتي ليه بتيجي في اوقات غلط كده لييييه؟.. 

سما وهي بتضحك 

هههههههه انت ايه اللي بتغنيه ده.. 

محمد 

والله ده اعلان والاغنيه بتاعته لاسقه في دماغي.. 

سما 

خلاص حصل خير اوعي هجهزلك انا الاكل... 

محمد قرب منها وهي واقفه وحضنها وقال. 

طبعا جيتي تجهزيلي عشان ما هونتش عليكي اجهز لنفسي... 

سما بضيق 

طيب اوعي يا محمد عشان اعرف اجهزلك.. 

محمد 

تؤ تؤ جهزي واحنا كده. 

لفتله سما وهي حاطه في وشه السكينه وقالت

انا ما بتسمعش الكلام  ليه مش قولت ابعد... 

محمد بخوف 

والله بعدت اهو يا بت المجنونه انا رايح اقعد في الصاله اصلا... 

_وطلع بسرعه وسما اتنهدت بضيق وقالت لنفسها.. 

سما 

اتعدلي يا سما كده ما ينفعش، بس انا مش بحي جو التلزيق ده.. 

ـــــ #بقلم_الكاتبه_رحاب_القاضي ــــ

_ في القاهره كان انس واياد قاعدين في العربيه قدام القناه اللي شغاله فيها ناني... 

انس 

انا عايز افهم انت جايبني هنا ليه؟.. 

اياد 

بصراحه كده انا محتاج مساعدتك.. 

انس 

محتاج مساعدتي انا في ايه ان شاء الله؟.. 

اياد 

انا معجب ببنت شغاله هنا، بس مش عارف اقولها كده ولا عارف حتي الاقي حجه اكلمها بيها وبما انك بتاع بنات فاكيد هتعرف تنفعني... 

انس 

بعيد عن اني بتاع بنات بس اشطا ، هي البنت دي نوعها ايه بتقبل الكلام ولا قافشه.. 

اياد 

قافشه بس دي تقيله تقل، وكل كلامها بحدود.. 

انس 

ههههه يبقي مش هنفعك اذا كان انا طلعان عيني مع واحده نفس القطعيه.. 

اياد

بقي كده يا ابن ابويا هتتخلي عني في اول مره احتاجلك فيها، استني اهي طلعت اهي.. 

انس بص لناني وقال

لا جامده وباين عليها بنت ناس، بص انت ادخل عليها كده وقولها كل اللي جواك خبط لاسق... 

اياد 

تفتكر هينفع.. 

انس

يا عم انزل وروح وانا هقف ليك بره العربيه هنا.. 

_وفعلا نزل انس واياد وراح  لناني وقبل ما تركب العربيه بتاعتها قرب منها وقال.... 

اياد 

ناني استني لو سمحتي.. 

ناني 

حضرتك تاني، خير في ايه؟.. 

اياد اخد نفس وقال

بصراحه كده انا م... 

ناني بصت لانس وقالت 

مش معقول انس، انس معتز ده صح.. 

اياد 

ايوه انس معتز دد.. 

_قبل ما يكمل كلامه سابته ناني وراحت لانس وهي مبسوطه جدا وقالت.. 

ناني 

انس انت ما تعرفش انا بحبك ازاي، انا مش مصدقه اني شوفتك.. 

بص انس لاياد اللي كان متغاظ وقال

احمم والله انا مش عارف اقولك ايه يعني.. 

ناني 

انا من اشد المعجبين بيك انا وملك اختي كنا بنروح نتابع كل ماتشاتك اللي في اسكندريه... 

انس

ده شرف ليا والله... 

قرب منهم اياد وقال 

احمم علي فكره انس ده اخويا.. 

ناني 

بجد. طيب امسك الفون كده صورني معاه يلا.... 

انس وهو كاتم ضحكته 

من غير فلتر يا اياد انا مش بحب اتصور بيه.. 

اياد بغيظ 

مااشي اقف بعيد يا نجم... 

صورهم اياد وناني اخدت الصوره وقالت 

انا مبسوطه اووي اني شوفتك انا مذيعه هنا علي فمره اسمي ناني بهاء... 

انس 

انا كمان مبسوط اني شوفتك واسمك حلو اووي علي فكره.. 

ناني 

والله انت راجل بتفهم، همشي انا بقي وان ساء الله اشوفك تاني انت احلي حاجه حصلتلي من لما جيت هنا.. 

انس وهو بيحاول ما يضحكش

والله ده كتير عليا وكفايه كده عشان ما يتولعش فيا انا وانتي.. 

ناني 

باي يا انس.. 

انس 

باي... 

_مشيت ناني واياد قرب منه وقال وهو متغاظ منه... 

اياد 

بقي انا جايبك تعلمني اشقطها، تقوم انت اللي شاقطها.. 

انس 

ايه القمر ده با ابني لا حقك تتجنن عليها.... 

اياد 

والله ما طلعت منك بفايده واتلم دي مرات اخوك...

انس ضحك وقال

هههه يا عم مش لما تشوفك الاول تبقي تتكلم...  

 ــــ #بقلم_الكاتبة_ رحاب_القاضي ــــــ

_في الاسكندرية في فيلا فوزي البحيري، كان قاعد وقدامه سميره وقالها فوزي بحده.. 

فوزي 

انتي ما بتفهميش بقولك عرضت عليه ورفض بدل المره عشره، دكتور بهاء عامل فيها الشريف الطاهر.. 

سميره بخوف

طيب انا اعمل ايه ما اقدرش اقرب من بنك الدم في المستشفي دي متعلق بيها ارواح ناس.. 

فوزي 

خلاص تبقي روح بنتك اللي عندي قصاد. ارواح الناس دي.. 

سميره ببكاء

حرام عليك انا بعيد عن الشغل ده وفي حالي.. 

فوزي 

انو هددتك مره واتنين وما فيش حد يقدر يديني الدم اللي هناك ده. غيرك انتي وانتي اتعوجتي عليا اهي بنتك بتدفع التمن.. 

سميره 

انتو ايه شياطين مش كفايه الاعضاء اللي بتسرقوها من الجثث لا ده كمان طلعتو بتخلو مرضي تموت مخصوص عشان تاخدو شغلكم وكل ده لو اتكشف هيروح فيها دكتور بهاء اللي انتو مغفلينه،وكل مدراء المستشفيات اللي بتعملو فيها كده.. 

فوزي 

هما اللي مغفلين ومش شايفين شغلهم كويس، وبعدين انا مش ناقص رغي هتنفذي اللي قولته ولا لا... 

سميره ببكاء

اشوف بنتي الاول... 

فوزي 

يبقي اتفقنا... 

ـــــــ #بقلم_الكاتبه_رحاب_القاضي ــــــــــ 

ـ في بيت بهاء دخل البيت دخل البيت لقي ملك متحزمه وواقفه علي ترابيزة السفره وبترقص... 

ملك 

توم توم اتك اتك اتوم اوم اتك اتك علي الطلبه والريق اقرصي ورقصيناا💃🏿💃🏿💃🏿.... 

بهاء بصدمه 

ايه اللي انا شايفه ده قلبتي البيت كباريه يا ملك.... 

ملك بخوف 

يا نهاار اسود. انت ايه اللي جابك بدري.. 

قلع بهاء الجزمه وقال

بترقصي يا بنت ندي ده انتي يومك مش فايت... 

نزلت ملك بسرعه وجريت وهي بتقول 

الحقوووووناااااااي... 

_ــــــــــ ــــــــــ 

_وقدام السنتر اللي بتاخد. فيه جني الحصص بتاعتها كانت طالعه مع سندي وريم صحابها وموبيلها رن برقم غريب.. 

جني

ايوه مين معايا.. 

انس 

معاكي انس وواقف قدامك. اهو يا جني.. 

_بصت جني قدامها بىه السنتر لقيت انس واقل بعربيته، اتوترت وقالت.. 

جني 

اا انت بتعمل ايه هنا.. 

انس

عايز اتكلم معاكي شويه تعالي.. 

جني 

هو ايه اللي انت بتقوله ده مستحيل طبعا... 

انس نزل من عربيته وقال

كنت عارف انك هتعملي كده استحملي بقي اللي هيحصل.. 

_وقرب انس منها هي وصحابها و؟.. 

ــــــــــ 

_في الشقه اللي امجد مخبي فيها نسمه، دخل امجد واتصدم لما لقي نسمه واقعه علي الارض فاقده الوعي، قرب منها بسرعه وقال.. 

امجد بخوف

نسمه نسمه حصل ايه طيب ردي عليااا نسمه... 

_تفتكرو ايه اللي حصل، وهيحصل لابطالنا؟... 

  •تابع الفصل التالي "رواية خطيبتي واخواتها التوأم" اضغط على اسم الرواية