رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي
رواية هو مين ده الفصل الخامس عشر 15
الفصل ال15
(صحت الحاره كلها في اليوم ده على صوت شعبان وهو بيتكلم بحده مع سنيه مراته.
شعبان: بقى بعد كل السنين دي تطلعي انت اللي ورا خراب بيتي يعني انتى اللي حرقتى المخازن بتاعتي والمحلات يا سنيه هانت عليك العشره..
سنيه: والله ما حصل يا اخويا انا ما اعرفش الحاجه دي جات منين والله ما انا ما تظلمنيش يا شعبان ده انا نايمه في حضنك طول الليل وامبارح منظفه البدروم وكان زي الفل وما كانش فيه الحاجه دي ما اعرفش والله جت منين.
شعبان وانتى عاوزاني اصدقك بعد كل ده هو انتي فاكراني مختوم على قفايا.
سنيه: براحتك يا شعبان بس انا ما عملتش كده وانت عارف ان عمري ما اعمل فيك كده ابدا.
شعبان: اديكي عملتي وخربتي بيتي انا همشي وما لكيش دعوه بالعيال تمشي لوحدك زي ما جيتى لوحدك.
(خرج شعبان وهو غضبان جدا لما صحى ونزل يدخل المكنه بتاعه ابنه في البدروم لقى بضاعه متخزنه من بضاعته اللي كانت في محلاته اللي اتحرقت فشك ان سنيه هي اللي خدتهم وحرقت محلاته راح قعد على القهوه.
جابر: خير يا شعبان مالك متضايق ليه كده وصوتك كان طالع انت والجماعه.
شعبان: سيبني في حالي يا جابر ولا عاوزني اقوم من هنا واقعد على قهوه تانيه.
جابر: لا على ايه خليك براحتك انا قلت يمكن في حاجه اقدر اساعد فيها.
شعبان: لا ما فيش خليك في حالك بقى.
( في المستشفى عند نسمه وام فاروق الدكتور كان كتب لام فاروق على خروج وكانت نسمه بتساعدها علشان يمشوا.
نسمه: بقولك ايه انا عاوزاكي لما نروح تحكيلي كل حاجه حصلت من ساعه ما سبتك لحد لما رجعنا دلوقتي.
ام فاروق: حاضر يا بنتي حاضر هحكيلك كل حاجه.
فاروق: تحكيلك ايه انتى هتقتلي القتيل وتمشي في جنازته اكيد انتى اللي عملتى في امي كده وانا مش هسيب حقها خدي بالك.
ام فاروق: اكتم ياض قطع لسانك ونسمه هتعمل فيا كده ليه احنا طول عمرنا جيران وحبايب ملكش دعوه انت واطلع منها.
نسمه: سيبيه يا ام فاروق خليه يخبط علشان لما اجي اخد حقي منه يبقى على حق.
فاروق: والنبي نقطينا بسكاتك ويلا عشان نروح.
(خرجت نسمه مع ام فاروق وابنها وروحوا البيت وصممت ان ام فاروق تقعد معاها في شقتها علشان تراعيها لحد ما تخف.
فاروق: ما بيتها موجود لازمتها ايه قعدتها عندك يعني هو انا مش هعرف اخلي بالي منها.
نسمه: لا مش هتعرف وبعدين البيت واحد ما فرقتش.
ام فاروق: خليك في حالك يا فاروق انا هبقى مرتاحه مع نسمه اكتر على الاقل ارتاح من وشك يومين يلا روح انت يلا.
فاروق: كده ياما ماشي يا ستي ربنا يهني سعيد بسعيده.
(نزل فاروق ودخلت نسمه ام فاروق على السرير في اوضه تانيه وقعدت جنبها.
نسمه: انا عارفه انك تعبانه بس انا عاوزه اعرف ايه اللي حصل لما انا مشيت.
ام فاروق: ولا حاجه يا بنتي انا قعدت اتفرج على التلفزيون واخلي بالي من الاكل وانا قاعده الباب خبط قمت افتح ما لقيتش حد بس لقيت علبه الشيكولاته اللي بره على الترابيزه دي رحت طفيت على الاكل ورجعت فتحتها عرفت انها شوكولاته قلت اخذ واحده ويا ريتني ما اخذتها هي واحده اللي اكلتها وبعدين لقيت الشقه مكركبه شويه قمت اروقها لحد ما تيجي وحصل اللي حصل مصارينى كانت بتتقطع..
نسمه: بس كده هو ده كل اللي حصل.
ام فاروق: اه والله يا بنتي ما اكلتش اي حاجه ثانيه غير هي الشيكولاتايه بس انتى عارفه ده معناه ايه يا نسمه.
نسمه: اكيد عارفه اللي كان باعت الشيكولاته المسمومه دي كان قصده يموتني انا مش انتى بس جت فيكى حقك عليا يا خالتي وحيات النبي ما تزعلي مني.
ام فاروق: ازعل منك على اي يا عبيطه الحمد لله انها جات فيا يا بنتي قدر الله وما شاء فعل.
نسمه: جمايلك بقت كتير على كتافي يا ام فاروق ومش عارفه اردهالك ازاي وانا كل سوابقى معاكى مهببه..
ام فاروق: تردهالي انك تقوليلي ايه اللي مغير حالك ومخليكي بقيتي طول الوقت سرحانه ومش في الدنيا كده.
نسمه: اقوللك ايه بس يا ام فاروق انا لو حكيتلك مش هتصدقيني كل حاجه في حياتي اتغيرت بين يوم وليله انا نفسي مش عارفه اتغيرت ازاي.
ام فاروق: طيب ما تجربي وتحكيلي يمكن ترتاحي.
نسمه: لما يجي وقته يا حبيبتي هحكيلك كل حاجه يلا انا هقوم اعملك لقمه تاكليها عشان تاخدي العلاج بتاعك.
ام فاروق: ربنا يروق بالك يا بنتي هناك عند هادي وهيام كانوا قاعدين بيفكروا هيعملوا ايه في البلوه اللي لقوها في البنك.
هيام: هو مفيش حل غير اللي قلتلك عليه احنا الصبح هناخد بعضنا ومعانا شنطه ونروح البنك ونقول ان احنا عاوزين ناخد الوديعه بتاعتنا هناخدها ونخرج بعد ما نخلص شويه ورق بس كده
هادي: وتفتكري الموضوع بالبساطه دي انا مش مرتاح انا بس خايف عليكى..
( قال هادي الكلام ده من غير ما يحس لانه بيحب هيام بس مش عارف يقولها لانها رفضت الجواز منه.
هيام: نعم خايف عليا ازاي يعني خاف على نفسك طيب على الاقل هادي ما علينا ما تركزيش في الكلام المهم انتى متاكده اننا لما نعمل كده هنعرف نخرج بالحاجه من غير مشاكل.
هيام: على فكره انا اعرف اخرج بالحاجه من هناك من غير ما ندخل اصلا المكان بس انا بقول نمشيها قانوني بدل ما تتحسب سرقه وبرده ما يبقاش في حاجه علينا.
هادي: يعني ايه مش فاهم ازاي يعني هندخل المكان من غير ما ندخله.
هيام لا دي بتاعتي انا بقى المهم قبل ما الجا للموضوع ده هنروح احنا ونحاول ناخذ الوديعه لو فشلنا انا هتصرف.
هادي: ربنا يستر من تصرفاتك.
( تحت عند راكان كان اخذ قسم على نفسه انه مش هيطلع على الارض ثاني الا لما حارث يتحاكم ويخلص منه للابد علشان كده كان منقطع عن نسمه وقلقان عليها طول الوقت ومش عاوز يحاول يوصل لها او يبعتلها حد من طرفه علشان ما يبقاش العين عليها وتتاذي.
راكان: يا ترى يا حبيبتي عامله ايه دلوقتي اكيد بتسالي انا ليه ما بسالش ولا باجي وممكن تكوني كمان فاكراني نسيتك وبعدت عنك بس انا اوعدك اني راجع وقريب قوي اهم حاجه اضمن ان ما حدش هيقدر ياذيكي طول ما انا موجود.
( في الوقت ده كان شعبان لسه راجع من مشوار وطلع البيت ملقاش سنيه فعلا موجوده وعياله كانوا نايمين.
شعبان: يلا تغور في داهيه نسوان غداره.
( اخذ بعضه ونزل قعد على القهوه عند جابر.
شعبان: هاتلنا اتنين شاي يا جابر احسن دماغي هتفرقع.
(قعد جابر جنب شعبان وهو يحط ايده على كتفه.
جابر: ما تريحني يا صاحبي وقولي انت ايه اللي شاغل بالك علشان اقدر اساعدك.
شعبان: قلتلك مفيش حاجه يا جابر الموضوع بسيط وانتهى خلاص.
جابر: لا الموضوع مش بسيط ولا انتهى خلاص.
شعبان تقصد ايه يعني.
جابر: اقصد مراتك اللي انت رميتها في الشارع بعد كل السنين دي هانت عليك العشره طيب كنت اسالني.
شعبان: اسالك عن ايه وعشره ايه انت بتتكلم عن ايه هي جت قعدت تعيطلك عشان تصعب عليك وتقنعني ارجعها.
جابر: لا هي ما جتليش انا شفتها وهي خارجه تعيط وسالتها الموضوع ايه وقالتلي ويا ريتك حكيتلي اللي حصل ما كانش كل ده اتعمل فيها.
شعبان مش فاهم تقصد ايه ولو كنت حكيتلك يعني ايه اللي كان هيتغير.
جابر: لا ده اللي كان هيتغير كثير قوي يعني مثلا لو كنت قلتلك اني شفت جابر صاحبك الفجر وهو واقف قدام بيتك بعربيه بينزل منها حاجات ودخل بيها عندك البدروم كان الموضوع اختلف ولا ايه يا معلم.
( شعبان اتصدم من اللي سمعوا من جابر وما كانش مصدق انه اتضحك عليه بالبساطه دي.
شعبان: انت بتقول ايه يا جابر رجب كان داخل عندي البدروم ومعاه حاجات انت متأكد.
جابر: متاكد زي ما انا شايفك قدامي دلوقتي.
شعبان: يا ابن الغداره يا رجب انا تعمل فيا كده ده انت لحم كتافك من خيري طيب ما شفتش سنيه راحت فين يا جابر.
( قام جابر من مكانه ودخل القهوه وخرج تاني وسنيه معاه.
شعبان: ايه ده انتى هنا يا سنيه.
جابر: امال فاكر هتبقى فين يعني.
سنيه: انا مليش مكان اروحه ولا ليا حد لما المعلم جابر شافني قعدني عنده في القهوه لحد ما يكلمك.
( قام شعبان واخذ سنيه في حضنه واعتذر.
شعبان: حقك عليا يا ست الكل انا غلطان وما تقلقيش اللي عمل كده هجيبه وهعرفه وحقك هيرجع وحياه النبي ما تزعلي مني.
سنيه: عمري ما زعلت منك يا شعبان انا بس صعب عليا نفسي بعد العشره دي كلها ترميني في الشارع ده انا اول بختك واول فرحتك تعمل كده فيا.
شعبان: حقك عليا والله كانت ساعة شيطان تعالي يلا اما اطلعك شقتك تنوريها واللي عملت كده انا مش هسيبها ويمين بالله هكتبلك البيت باسمك بجد علشان متقوليش كلمة مليش مكان دى تانى ابدا.
جابر مراتك ست اصيله يا معلم شعبان ما تزعلهاش تاني وحياه حبيبك النبي واحده غيرها كانت مشيت وسابتك ومفيش واحده من التانيين هتدخلك البيت زي ما انا عارف وعلى فكره معرفتش من الست سنيه لا والله دى الحاره كلها عارفه ان هما مانعينك تخش بيتك ما تقطعش اللي بيحبوك يا شعبان.
( راح شعبان ناحيه جابر واخده في حضنه.
شعبان: كثر خيرك يا معلم جميلك ده هشيله على راسي العمر كله.
جابر: مفيش بينا جمايل يا صاحبي ربنا يروق بالك.
( اخذ شعبان مراته وطلعها البيت وصالحها.. عند سمير في الفندق مطرح ما هو قاعد كان متعصب ومش طايق نفسه وبيتكلم في التليفون مع اخته.
سمير: بقولك مش موافقه وحاولت معاها بدل المره مليون ما فيش فايده دي حتى مش مدياني فرصه اتكلم معاها.
رانيا: يعني ايه يعني مش عاطيالك فرصه لو ما لقيتش فرصه اخلق انت الفرصه يا سمير الموضوع مش صغير البيت اللي عندك ده لو اتباع هيطلع لنا منه اقل حاجه ولا 7 مليون جنيه يا دوب نغطي ديون ابوك اللي سابها قبل ما يموت بخمسه مليون والباقي نقدر نقف بيه على رجلينا شويه ولا انت مستني لما يتحجز علينا.
سمير: مش كل شويه تفكريني بالديون والقرف ده انا نازل مصر مخصوص علشان كده وانتى عارفه اني لا بحب نسمه ولا عاوز اشوف وشها يبقى نصبر شويه لحد ما نخلص الموضوع ده ونطلع بالمصلحه.
رانيا: ما انت بتقول مش عارف تتكلم معاها اهو هتقنعها ازاي.
سمير: كل عقده وليها حلال اصبري بس عليا شويه
(في الوقت ده كانت نسمه اكلت ام فاروق وقاعده في اوضتها زعلانه وبتعيط..
نسمه: كده يا راكان كل ده ما تسالش عني ولا تيجي تشوفني يعني عودتني على وجودك في حياتي وفي الاخر تسيبني لوحدي وفي اكثر وقت محتاجاك فيه انا عايزه اشوفك عاوزه اتكلم معاك في حاجات مهمه عاوزه احكيلك عليها انا مش عاوزه احس ان انا لوحدي ثاني ارجعلي بقى عشان انت وحشتني قوي.
( كانت نسمه بتعيط وصوتها عالى ام فاروق كانت رايحه الحمام وسمعتها خبطت على الباب ودخلت.
ام فاروق ايه ده يا نسمه انتى بتعيطي يا بنتي مالك يا حبيبتي مين اللي مزعلك.
نسمه: مفيش يا خالتي انا كويسه مش بعيط ولا حاجه ده في حاجه دخلت عيني بس.
ام فاروق: هههههه انت بتضحكي عليا يا بت ده انا عجناكي وخبزاكي وحافظاك زي كف ايدي لا تكوني مفكره انك طلعتى لقيتي نفسك كبيره ده انتى متربيه على ايدي.
نسمه: معلش يا خالتي انا بس مشغوله شويه.
ام فاروق: طيب ما تحكيلي يا بنتي ايه اللي شغلك يمكن ترتاحي
نسمه: هحكيلك يا خالتي يمكن فعلا ارتاح لما احكي لحد احسن انا حاسه ان قلبي هيفرقع.
( في الوقت ده كان هادي وهيام متوجهين للبنك علشان يخلصوا الموضوع اللي قالوا عليه بعد ما اتفقوا على كل حاجه دخلت هيام على الموظفه.
هيام: مساء الخير لو سمحتي كنت عاوزه اخذ الوديعه بتاعتي اللي عندكم هنا ممكن تخلصيلي الورق
الموظفه: طبعا يا هانم حضرتك عاوزه تاخديها بسبب مشكله امنيه عندنا ولا في سبب ثاني.
هيام: لا ابدا بالعكس البنك عندكم امان جدا وانا مرتاحه في التعامل معاكم انا بس محتاجه محتويات الوديعه علشان كده جيت اخدها.
الموظفه: حالا هخلص لحضرتك الورق وادخل للمدير يمضيه وتقدري تستلمي الوديعه بتاعت حضرتك.
( دخلت الموظفه عشان تخلص الورق وهيام وهادي كانوا قلقانين جدا.
هادي: تفتكري الموضوع هيخلص كده بهدوء ولا هيبقى في مشاكل اصل انا مش مرتاح.
هيام: انت قلبك خفيف كده ليه المفروض تبقى هادي اكثر من كده انا مش عارفه مين اللي المفروض يبقى قلقان فينا انا ولا انت.
هادي: الموضوع مش راجع لراجل ولا ست الموضوع راجع لاننا لو اتمسكنا هنروح في 60 داهيه ولا انا ولا انت عندنا حد يجري ورانا ويساعدنا نطلع.
هيام: اتكلم عن نفسك انا مامنه نفسي كويس لو حصل اي حاجه عندي اللي هيجري ورايا وقابض حقه مقدم كمان.
هادي: ايه ده يعني انا الوحيد اللي فى خطر بقى على كده.
هيام: مش عاوزاك تحس نفسك في خطر طول ما انت معايا ويا ريت بلاش قلق.
( الموظفه جت وقتها وندهت لهيام.
الموظفه: الورق خلص حضرتك تقدري تخشي تاخدي وديعه حضرتك من جوه بنفسك.
هيام: متشكره جدا ويا ريت تبلغي شكري وتحياتي للمدير.
( دخلت هيام مع هادي ونقلوا الحاجه في شنطه كبيره وشالوها مع بعض وخرجوا وهم خارجين نادي عليهم المدير.
المدير: استنى عندك انت وهي.
هادي بخوف: يا نهار اسود روحنا في داهيه..
•تابع الفصل التالي "رواية هو مين ده" اضغط على اسم الرواية