رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي
رواية هو مين ده الفصل السادس عشر 16
الفصل ال16
(سنيه بعد ما شعبان رجعها بيتها ضمرها ما كانش مرتاح هو اه ظلمها لكن بردو هي كانت عارفه مين اللي حرق مخازنه وقررت ان هي تصارحه وتقوله كل حاجه خصوصا انه بقى كويس جدا معاها..
سنيه: شعبان انا عاوزه اكلمك في حاجه مهمه بس وحياة حبيبك النبي ما تزعل مني.
شعبان: مش هزعل منك انا عايزك انتى اللي ما تزعليش مني على اللي انا عملته معاكي اتكلمي وانا مهما كان اللي حصل هسامحك.
سنيه: هو ده العشم بردو بص يا اخويا من فتره كده نجات كلمتني انا ورباب وقالت عاوزانا نروحلها البيت اخدت رباب ورحتلها ولما رحنا قالت ان انت عايز تتجوز البنت اللي اسمها نسمه انا كنت محروقه من الموضوع ده من بدري بس ما حكيتش لحد لكن هي بقى قالت انك لو اتجوزتها كل حاجه هتروحلها واحنا وعيالنا هنطلع من مولد بلا حمص برغم ان احنا كل واحده فينا كانت فاهمه ان لها بيت وقالت....
شعبان: قالت ايه يا سنيه كملي ما تخفيش.
سنيه: قالت اننا لازم نخليك محتاجنا على طول ما كنتش فاهمه كلامها يعني ايه الاول بس رباب فهمت على طول نجات وقتها قالت ان كل واحده فينا معاها قرشين عشان كده هنستر بيهم وبعتت ناس ولعوا في المخازن والمحلات بتاعتك علشان تحوجك لينا ونبهت علينا ان محدش فينا يديك فلوس وكمان محدش فينا اصلا يعرف هي اتفقت مع مين هي اللي راحت بنفسها اتفقت مع رجاله وحرقوا كل حاجه بس البضاعه اللي كانت جوه المحلات هي خلتهم خرجوها ودوها مكان تبعها كانت قايله لنا ان هي هتبيعها وهتدي لكل واحده فينا نصيبها انا قلتلها مش عاوزه حاجه ومنك لله بعدها ادت لرباب نصيبها وانا ما اخذتش منها حاجه ولما كلمتني وبقولها ده انا مستنيه المعلم عشان يجي يتغدى بهدلتني وقالتلي احنا مش متفقين قلتلها ده جوزي وانا مليش مكان تاني اروحه ده ابو عيالي انا مش هخسر حياتي عشان كده انا متأكده ان هي اللي حطت البضاعه تحت في البدروم انا دلوقتي يا اخويا معايا مبلغ مش قليل بتاعي والله وطبعا من خيرك هتاخده وتبيض المحلات وتبدا من الاول وعارفه كمان مكان البضاعه التانيه فين لو عايز تروح تاخدها بس سامحني بالله عليك يا شعبان وما تزعلش مني.
( شعبان كان مصدوم من اللي سمعوا هل فعلا مراتاته هما اللي حرقوله محلاته ومخازنه وهو كان شاكك في نسمه.
شعبان: انتى متاكده من الكلام اللي بتقوليه ده يا سنيه.
سنيه: ان شاء الله اعدم عينيا يا حبيبي والله حصل انا ما هانش عليا انى ابقى نايمه معاك على فرشه واحده وما اقولكش ربنا يسامحها بقى.
شعبان: اصيله يا سنيه انا مش زعلان منك انتى مهما كان اتزن على ودانك والزن على الودان امر من السحر وبعدين انتى في الاخر الوحيده اللي فتحتيلي الباب انا هعرف اتصرف معاهم ازاي وحقي هاخده واي مليم هاخده منك هرجعهولك بزياده وهكتبلك بردو البيت باسمك.
سنيه:انا مش عاوزة غير انى اعيش مستورة يا حاج ومش عاوزة فلوس ولا حاجه ربنا يخليك ليا يا حبيبي.
(هناك في البنك كان هادي وهيام لسه واقفين مرعوبين لما المدير نده عليهم لفوا علشان يكلموه.
المدير: انتم رايحين فين كده
هيام بثبات: ولا حاجه كان لينا وديعه هنا وخرجناها وماشيين في حاجه ولا ايه.
المدير: اخص عليكى انتى مش فاكراني ولا ايه وانا اللي قلت لازم اجي اسلم عليكى.
هيام: مش واخده بالي والله.
المدير: انا عمك عبد الرحمن صاحب ابوك الله يرحمه كده تيجي لحد هنا وما تدخليش تسلمي عليا.
( هيام ما افتكرتوش اصلا بس عملت نفسها افتكرته وراحت تسلم عليه.
هيام: عم عبد الرحمن والله ما خدت بالي انا اسفه جدا معلش الدنيا تلاهي وانا ما ركزتش والله اخبارك ايه.
المدير: الحمد لله يا بنتي انتى اللي عامله ايه وعايشه ازاي دلوقتي.
هيام: انا الحمد لله كويسه جدا عايشه ما تقلقش بشتغل وعملت لنفسي مستقبل انا كويسه ما تقلقش عليا.
المدير: ومين اللي معاكي ده جوزك.
هيام بتوتر: لا ده خطيبي.
المدير: كده من غير ما حد يعرف مش تقوليلي.
هيام: هو انا كنت اعرف عنك غير دلوقتي... عموما هنعزمك في الفرح ان شاء الله معلش انا لازم امشي يا اونكل اصلي متاخره قوي.
المدير: ماشي يا حبيبتي المهم ابقي طمنيني عليك من وقت للتاني.
هيام: اكيد يا اونكل مع السلامه.
( راحت هيام لهادي اللي كان لسه واقف مش فاهم ايه اللي بيحصل.
هيام: يلا بينا هتفضل واقف متنح كده كتير خلاص خلصت.
هادي: خلصت على ايه مش فاهم الراجل ده كان عايز ايه.
هيام: ده واحد صاحب بابا تقريبا وكان بيقولي انتى ما افتكرتنيش عملت نفسي فاكراه عشان نخلص ونمشي سلم عليا وازيك وازاي الحال وما اعرفش ايه زي ما انت سمعت كده.
هادي: اه بس انا دلوقتي في نظره خطيبك.
هيام: هو احنا يعني هنجيله هنا كل يوم ولا هنعيش معاه فكك منه
( زعل هادي انها بردو لسه مش شايفاه بس كرر ما يستسلمش وهناك عند نسمه كانت لسه قاعده مع ام فاروق وحاطه دماغها على رجلها وبتحكلها.
نسمه: بس يا ام فاروق هو ده كل اللي حصل انتى حتى شفتي بنفسك حاجه من اللي هو عملها لكن هو خلاكى تنسي كل حاجه عشان ما كانش عاوز حد يبقى عارف حاجه عن الموضوع عشان ما يتاذاش انا بقى ما اعرفش حبيته امتى ولا ازاي بس هو ده اللي حصل تفتكرى كده غلط يا خالتي ولا اعمل ايه.
ام فاروق: والله يا بنتي الموضوع ده ليه العجب انا ما اعرفش اقولك مش مصدقاكى لان الحاجات دي حقيقه وبتحصل ومش فاكره كمان ان انتى قلتيلي اي حاجه قبل كده بس انتى بتقولي ان هو اللي خلاني انسى هو اللي انا فهمته بس انه بيخاف عليكى زي ما انتى بتقولي وبيخلي باله من مصالحك وكمان ما خلاش شعبان يعرف يحرقلك المحل ودوقه من نفس الكاس اللي كان عاوز يشربك منه ده معناه انه بيحبك بجد.
نسمه: ايوه ما انا عارفه انه بيحبني بجد وانا كمان حبيته بس هو دلوقتي مستني ان انا اقوله انا بحبك وموافقه على الجواز.
ام فاروق: بصي يا بنتي عشان تبقي عارفه بس الجواز من جن مش حاجه سهله ولا حاجه ممكن تحصل كل يوم لو هو عاوز يتجوزك يتخلى عن حياته تحت ويعيش معاكي زى البني ادم يعني نشوفه ونتكلم معاه ويبقى طبيعي زيك عشان انتى ما تتعبيش او تتاذي.
نسمه: هو في حاجه اسمها كده اصلا يا خالتي يعني ده ممكن يحصل.
ام فاروق: طبعا ممكن يحصل انتى بس اساليه الاول وشوفي هيوافق ولا لا لو وافق يبقى من حبه ليكي خايف عليكى مش عاوز يضرك ولو ما وافقش يبقى هو متمسك باصله اكثر منك وساعتها ما ينفعش توافقي لانك هتتعبي جدا من العيشه معاه وهو على وضعه.
نسمه: خلاص يا خالتي لما اشوفه هقوله الكلام ده واشوف هيوافق ولا لا يا رب يوافق.
ام فاروق: هههههه قد كده بتحبيها علشان كده رفضتي سمير وفاروق يا جزمه... انا كده فهمت..
نسمه: غصب عني يا خالتي قلبي هو اللي حبه مفيش حد بيحب بمزاجه.
ام فاروق: عارفه يختى عارفه وعندك حق كمان..
( بعد ما شعبان عرف كل حاجه ساب سنيه ونزل وهو مقرر انه ينظف حياته من كل الناس السيئه اللي حواليه ويفوق لنفسه راح البيت عند رباب علشان يشوفها هتعترف ولا لا.
شعبان: رباب افتحي الباب عاوز اتكلم معاكي في كلمتين.
( رباب من ورا الباب ردت على المعلم.
رباب: مفيش ما بينا كلام يا معلم اما تعرف تصرف على بيتك ابقى تعالى يا اخويا.
شعبان بغضب: يعني مفيش حاجه عاوزه تقوليلي عليها يا رباب حاجه مثلا تكوني عاوزه تعترفي بيها ليا.
رباب: لا مفيش هيكون في ايه يعني وبلاش لف ودوران انا ممكن اشتكيك على فكره واقول ما بيصرفش عليا انا وعياله
شعبان: انتى فعلا هتبقى تروحي تشتكيني انتى طالق وبالثلاثه كمان يا رباب ابقي روحي بقى اشتكيني وانا هبقى ابعت مصاريف عيالي ليهم كل شهر يلا بالسلامه.
( خرجت رباب تجري على السلم تنده على شعبان.
رباب: استنى يا معلم استنى بس نتفاهم يا نهار اسود عليا وعلى سنيني الله يخرب بيتك يا نجات.
( خرج شعبان من عند رباب وراح لنجات وخبط على الباب بردو ما فتحتلوش وردت من ورا الباب بس.
نجات: عاوز ايه يا معلم ايه اللي جايبك ثاني مش قلنا ما تجيش الا لما تبقى قادر تصرف على بيتك.
شعبان: لا ما انا جاي علشان قدرت خلاص اصرف على بيتي انتى طالق يا نجات طالق بالتلاته كمان ابقي خذي بقى عيالك وروحي عند امك وكل شهر مصاريفهم هتجيلهم يلا بالاذن وعلى فكره انا خدت بضاعتي من المخزن بتاعك وعرفت ان انتى اللي حرقتي محلاتي واذيتيني الحساب ده لسه ما خلصش سلام.
(نجات كانت جوه مش مصدقه اللي هو بيقوله طلقها وخد البضاعه وعرف كل حاجه.
نجات: يا لهوي يا لهوي شعبان مش هيسكت وكمان طلقني يعني خرجت من المولد بلا حمص اعمل ايه دلوقتي قال وانا فكرت اني هسمع خبر طلاق سنيه تقوم تيجي فيا انا.
( تحت عند راكان كان خلص كل حاجه والملك شهبير انتهى من امر حارث لكن الملك شهبير طلب منه انه يستنى معاه شويه علشان يساعده في امور الحكم لمده صغيره.
شهبير: ما تقلقش يا امير كلها فتره صغيره جدا وترجعلها تاني انا مش مصدق ان الامير راكان اللي بتتمناه كله اميرات الجان حب انسيه ومتعلق بيها للدرجه دي.
راكان: الحب ملوش سلطان يا عظمتك بيجي وقت ما يحب وانا حبيتها من وهي لسه جنين وكل ده وانا مستنيها ومنتظر اليوم اللي هقولها فيه ان انا بحبها واعيش معاها بقيه حياتي.
شهبير: بس انت عارف ده معناه ايه ولا لا.
راكان: اكيد عارف هتنازل عن قوتي قبل ما اخرج من هنا المره دي وهرجعلها في هيئه انسان.
شهبير: معلش ده لازم يحصل لكن في اي وقت تحتاجني هتلاقيني جنبك طول الوقت اعرف ان ابوك لسه موجود حتى لو حصل انك اتاذيت في شيء فوق الارض انا سايبلك قوتك الجسديه وكمان تفكيرك العظيم ده غير انك هتبقى انسي غني جدا يعني مش هتحتاج لحد ولو في اي جان صدفك هتعرفه بمنتهى البساطه.
راكان: عارف كل ده عظمتك وبشكرك على كرمك بس انا فعلا مش هبقى عاوز اي حد غير نسمه وبس.
شهبير: بس انا كمان عاوز شيء واتمنى انك تقدر تعمله.
راكان: لو في ايدي هعمله.
شهبير: لو حصل وانجبت من الانسيه دي المفروض ان الجنين يبقى عندنا احنا مش عندكم.
راكان: ما اعتقدش اني هقدر اعمل كده في نسمه واخذ منها طفلها لو انت عاوز تشوف اولادي ابقى اطلع شوفهم انما انا اولادي هينتموا لعالم البشر زي ما انا هنتمي لعالم البشر علشان امهم.
شهبير: افهم من كده ان مفيش ولا امير منهم هينضملنا ولا اميره
راكان: ما اعتقدش ويا ريت ما تحطش الموضوع ده عقبه ما بينا.
( في فيلا هادي كان قاعد سرحان وبيفكر هيخلصوا من الحاجه دي ازاي وكمان ازاي يقدر يخلي هيام تحبه.
هادي: المهم ما قلتليش هتعملي ايه في الحاجه دي وهتخلصي منها ازاي.
هيام: انا مش عارفه انت شاغل بالك بالموضوع ده ليه انا قلتلك هخلص من الحاجه دي ولو حابب نقسم مع بعض هنقسم ما تقلقش انا ليا طريقتي في بيع الحاجات دي من خبرتي في الموضوع ده من شغلى مع منصور.
هادي: انا بس بطمن عليكى و كمان بطمن اننا مش هنروح في داهيه وانتى بتصرفي الحاجه دي
هيام: لا ما تقلقش خالص وخليك مطمن انا مش من النوع اللي بيهبل في حياته.
هادي: هو انا ممكن اسالك سؤال بعيد عن الموضوع ده.
هيام: والله يا ريت لاني واخده بالي انك هتموت وتسال سؤال ومانع نفسك.
هادي: هو انتى رفضتى تتجوزيني ليه هو انا فيا عيب.؟؟
هيام: هو انت مصمم تتجوزني ليه..؟؟؟
هادي: هو انا سالتك سؤال هتردي عليه بسؤال.
هيام: معلش خدني على قد عقلي وجاوبني انت ليه مصمم تتجوزني مع انك ممكن تتجوز اي واحده يعني.
هادي: بس انا مش هحب اي واحده.
هيام: نعم.
( عدى على الكلام ده ثلاث ايام وكانت نسمه تعبت جدا من الزعل علشان راكان ما كانش بيروحلها وهي كانت اتعلقت بيه جدا واخذت على وجوده ام فاروق كانت لسه قاعده معاها لكن لحظت تعبها.
ام فاروق: وبعدين يا بنتي انتى هتفضلي قاعده كده وتدبلي يوم بعد يوم فوقى لنفسك بقى.
نسمه بتعب: وحشني قوي يا خالتي ما كانش بيعدي يوم الا ما بيجي مش عارفه ايه اللي حصل تفتكري حصله حاجه انا عاوزه اشوفه.
ام فاروق: استهدي بالله يا بنتي ايا يكن ايه اللي حصل معاه هنعرف اكيد هيجيلك.
نسمه: لو كان عاوز يجي او فاكرني لسه كان جه من بدري بقالنا اسبوع على الحال ده وما بيجيش ولا بشوفه ولا حتى بعرف حاجه عنه وبندهله زي الاول ما بيردش عليا.
ام فاروق: الغايب حجته معاه اكيد حصل عنده ظرف ولا حاجه مش انتى بتقولي انه كان رايح يخلص من اللي كان بياذيكي ممكن يكون حصل حاجه اخرته.
نسمه: قصدك ايه يا خالتي ان ممكن يكون اذاه.
ام فاروق: انا ما قلتش كده يا بنتي اهدي شويه..
(الباب خبط و ام فاروق قالت انها رايحه تفتح وفتحت لقيت علبه قدام باب الشقه اخذتها ودخلت لنسمه.
ام فاروق: الحقي يا نسمه جايلك علبه ثانيه.
نسمه علبه ايه تاني..
•تابع الفصل التالي "رواية هو مين ده" اضغط على اسم الرواية