رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي
رواية هو مين ده الفصل السابع عشر 17
الفصل ال17
(في شقه نسمه بعد ما الباب خبط وام فاروق فتحت ولقت علبه تانيه قدام الباب ما كانش ينفع انها تفضل ساكته على الموضوع ده.
نسمه: كده كتير يا خالتي انا لازم اروح القسم ابلغ الله اعلم مين اللي بيبعت الحاجات دي المره الاولانيه كنتى هتروحي فيها المره دي بقى هستنى يحصل ايه ثاني.
ام فاروق: طيب يا بنتي مش نفتحها الاول ونعرف فيها ايه قبل ما نروح القسم ونبلغ.
نسمه: والله انا ما بقتش ضامنه حاجه يا خالتي افرضي فيها قنبله ولا حاجه.
ام فاروق: هههههه والله يا بنتي انتى عليكى حاجات قنبله ايه وليه اصلا مين اللي ممكن يعمل فيكى كده.
نسمه: والله انا بقيت بستغرب لو محدش اذاني وبقيت متوقعه الاذيه من اي حد.
ام فاروق: قصدك يعني شعبان ما اعتقدش ده اليومين دول غرقان في المشاكل مع مراتاته من ساسو لراسه.
نسمه: يبقى جت من عند ربنا بس بردو لازم اروح القسم واعرف موضوع العلب اللي بتيجي ده ايه
ام فاروق: خلاص يا بنتي زي ما تحبي استني البس وننزل سوا.
نسمه: لا خليكى انتى يا خالتي انا هروح ومش هتاخر.
( خرجت نسمه وراحت القسم علشان تعرف موضوع العلب ده ايه وفي نفس الوقت عند هادي وهيام كان بيدور الحوار ده بمنتهى البرود.
هيام: مش كل شويه هنفتح الحوار ده انت قولتلي انتى رفضت تتجوزيني ليه وانا من حقي ارفض انى اجاوبك.
هادي: بس انا كمان من حقي اخذ اجابه على سؤالي هو انتى شايفه فيا حاجه غلط.
هيام: الموضوع ملوش اي علاقه انت فيك حاجه غلط ولا لا الموضوع خاص بيا انا.
هادي: طيب فهميني لو عندك اي مشكله نفسيه احنا ممكن نتخطاها سوا انما ما تقفليش على نفسك وترفضي تتكلمي مع حد.
هيام: من فضلك انا هقفل الكلام في النقطه دي وهروح دلوقتي علشان اشوف حل لموضوع الاثار اللي معانا دي وهكلمك ثاني عشان نتقابل ما تقلقش مش ههرب.
( اتعصب هادي جدا لانها فاكره انه شاكك فيها لحد دلوقتي ومش عاوزه تريحه وتقوله هي رفضت تتجوزه ليه.
هادي: استني عندك هو انتى فاكره اني شغال عندك تكلميني وقت ما تحبي وتاخدي بعضك وتمشي وقت ما تحبي انا ليا حق اعرف انتى رافضه تتجوزيني ليه ده اول حاجه ثاني حاجه لما ابقى بكلمك تقفي تردي عليا ثالث حاجه ودي الاهم انا مش شاكك فيكى انك هتهربي وان كنت باجي معاكي في كل حته فده علشان انا خايف عليكى مش علشان شاكك فيكي.
(حست هيام بالحزن في صوت هادي وزعلت جدا انها وصلته للحاله دي.
هيام: انا اسفه قوي يا هادي مش عايزاك تزعل مني ما كانش قصدي اخليك تحس باي حاجه تضايقك وهحكيلك كل حاجه بعدين بس من فضلك سيبني امشي دلوقتي.
هادي: وانا هستناكى تيجي تحكيلي بنفسك.
( مشت هيام وقعد هادي بيفكر شويه وهو حزين عليها لانه متاكد انها رافضه تتجوزوا بسبب حاجه نفسيه مش عيب فيه.
هادي: هسيبك لحد ما تهدي براحتك واكيد لما تهدي هترجعيلي انا حاسس انك بتحبيني زي ما انا بحبك.
( هناك في محل من محلات المعلم شعبان كان اخذ فلوس من سنيه وظبط المحلات وفتح.
شعبان: يلا يا ابني انت وهو شدوا حيلكم انا عاوز المحلات دي تخلص بسرعه علشان ابعت اجيب بقيه البضاعه مش عايزين واقفه حال كفايه كده.
الصنايعي: تحت امرك يا معلم احنا بس ناقص علينا شويه خامات ممكن تبعت تجيبهالنا.
شعبان: خد فلوس اهي روح هات اللي انت عايزه وتعالى بسرعه يلا.
( مشي الصنايعي وبص شعبان لقى نجات جايه هي ورباب وعلى وشهم ملامح الندم.
رباب: سلام عليكم يا معلم.
نجات: ما ترد السلام يا معلم ده حتى السلام لله.
شعبان: اه فعلا السلام لله بس مش ليكوا... انتم عاوزين ايه وايه اللي جابكم هنا تاني.
نجات: المسامح كريم يا معلم احنا غلطنا وعرفنا غلطنا خلاص.
رباب: وان كان على البضاعه ما انت رجعتها ومحلاتك بسم الله ما شاء الله فتحتها تاني اهو يبقى رجع كل حاجه بقى لاصلها ورجعنا احنا كمان.
شعبان: ده لما تشوفي حلمه ودنك انت وهي انا مش هرجعكم ثاني على ذمتي لو وقفتوا على ضوافركم انتم غدارين وما وقفتوش جنبي وقت زنقتي.
نجات: طيب ما سنيه كانت معانا وعارفه كل حاجه اشمعنا يعني سامحتها وكتبتلها البيت وما سامحتناش احنا ولا هو خيار وفقوس.
رباب: او يمكن عشان هي القديمه
شعبان: ولا خيار وفاقوس ولا عشان هي القديمه كل الحكايه انها ما هانش عليها العيش والملح وجت قالتلي كل حاجه بعد اللي انتى عملتيه يا ست نجات عشان تلبسيها في حيطه وكمان ما استخسرتش فيا مالها اديتني كل اللي حيلتها علشان ارجع اقف على رجلي انا لما كتبتلها البيت كتبته عشان هي تستاهل انما انتم ناقصين.
نجات: كده يا معلم يعني هانت عليك العشره.
شعبان: هانت عليكم من قبلي محدش فيكم يجيب سيره العشره يلا اتكلوا على الله من هنا.
( مشت رباب ومعاها نجات وهما زعلانين من اللي هما عملوه والخراب اللي جابوه لنفسهم وقعد شعبان يشرب سيجارته بيتكلم مع نفسه.
شعبان: صحيح الواحد ما بيعرفش الاصيل من الواطي غير وقت الزنقه يلا البني ادم مهما كبر ما بيتعلمش بالساهل.
( في الوقت ده كانت نسمه وصلت القسم وتليفونها رن فجاه برقم هيام وردت.
نسمه: الو ايه يا بنتي انتى فين بقالك كام يوم مش عارفه اوصلك.
هيام بعياط: حقك عليا يا نسمه بس علشان خاطري انا عاوزاكى تجيلي حالا مخنوقه ومحتاجاكى جنبي.
نسمه: طيب اهدي اهدي انتى بتعيطي ولا ايه.
هيام: علشان خاطري تعاليلي انا محتاجاكى.
نسمه: طيب انا في القسم هخلص وهاجيلك على طول ابعتيلي عنوانك في رساله.
هيام: خير في حاجه ولا ايه.
نسمه: لما اجيلك احكيلك كل حاجه.
( قفلت نسمه مع هيام ودخلت للظابط.
نسمه: السلام عليكم.
الظابط: وعليكم السلام اتفضلي ايه شكوتك.
نسمه: حضرتك انا من كام يوم جالي على شقتي علبه كان فيها شيكولاته وانا ما كنتش في البيت جارتي هي اللي اكلت منها ووقعت فجاه وجالها تسمم وطلعت الشيكولاته هي اللي مسمومه
الظابط : وما تعرفيش مين اللي بعتلك العلبه دي.
نسمه: انا لو اعرف اللي بعتلي العلبه ما كانش زماني جيت ومش ده بس اللي حصل.
الظابط: في حد حاول يتواصل معاكي.
نسمه: ابدا ما حدش حاول يتواصل معايا وزي ما جات العلبه الاولانيه جالي العلبه دي كمان النهارده والاثنين مجهولين المصدر انا ما رضتش افتحها وقلت اجيبها واجي على القسم على طول علشان اشوف ايه محتوياتها ومين اللي بيعمل كده معايا.
( اخذ الظابط العلبه من نسمه وحطها قدامه ووطى يسمعها في بودنه احسن يكون فيها قنبله ما سمعش اي صوت فتحها لقى فيها حلويات.
الظابط: العلبه مليانه حلويات ما يمكن حد جايبهالك زياره.
نسمه: حضرتك العلبه الاولانيه كان فيها شيكولاته وطلعت مسمومه تفتكر بقى الحلويات دي هيبقى نظامها ايه ممكن حضرتك تاخذها وتحولها للمعمل يحللها ويعرف هي فيها ايه وكمان ترفع البصمات عن العلبه علشان تشوف مين اللي بيجيبلي العلب دي.
الظابط: انتى هتعلميني شغلى كمان ولا ايه.
نسمه: ولا هعلمك شغلك ولا حاجه يا باشا العلبه عندك اهي وبياناتي همليهالك وانت شوف المطلوب ايه واعمله ورقمي معاك اهو وابقى بلغني بأي مستجدات.
الظابط: تمام اتفضلي انتى دلوقتي.
(خرجت نسمه وهي متعصبه من الظابط الغبي ده.
نسمه: اما صحيح مغفل قال بيقولي انتى هتعرفيني شغلي اذا كنت انت بقولك الشيكولاته كانت مسمومه تقولي دي حلويات ويمكن جايالك زياره غبي صحيح.
( خرجت نسمه من القسم وركبت التاكسي عشان تروح لهيام في العنوان اللي بعتته لها على التليفون في رساله اما عند سمير في الفندق اللي كان قاعد فيه كان بيكلم اخته رانيا كالعاده.
سمير: انا قلتلك انى هلاقي حل للموضوع ده واكيد هلاقي حل انا رايح النهارده اتكلم معاها ثاني وانا واثق انى هطلع بنتيجه جديده المره دي.
رانيا: ايه اللي يخليك واثق قوي كده انك المره دي هتطلع معاها بنتيجه جديده هو في حاجه حصلت انت ما قلتليش عليها.
سمير: ابدا انا بس هفكرها بحاجه حصلت زمان ولو افتكرتها اعتقد ان قلبها ممكن يحن وتوافق على الجواز.
رانيا: تبقى بتحلم نسمه ما بقاش عندها قلب من زمان حتى لو شغلته في الحب مش هيبقى انت الشخص ده انت ناسي انت عملت ايه قبل ما تمشي.
سمير : مش ناسي بس بحاول انسى وللاسف انتى ما بتساعدينيش انسى.
رانيا : علشان مش لازم تنسى لانك لو نسيت مش هتعرف تبرر اللي انت عملته قدامها علشان تخليها تنساه هي كمان.
سمير: طيب تمام اقفلي انتى دلوقتي وهكلمك بعدين.
(قفل سمير الخط مع اخته وهو قاعد يفكر.
سمير: انا بس نفسي افهم هي فلوس عمي كلها راحت فين اكيد يعني ما استثمرتش الفلوس دي كلها في الورشه المعفنه اللي هي فاتحاها دي انا لازم اعرف فلوس عمي راحت فين قبل ما افكر في موضوع البيت والجواز.
( ما عداش كتير على نسمه في الطريق ووصلت الفيلا عند هيام وقابلتها على الباب.
هيام: نسمه يا حبيبتي وحشتيني اتفضلي ادخلي.
نسمه : وانتى كمان وحشتيني مالك بقى قلقتيني عليكى.
( دخلت نسمه هي وهيام وقعدوا في الصالون.
هيام : انا حاسه ان انا واقعه في ورطه ولكن لو هنحسبها بالعقل هي مش ورطه قوي.
نسمه: مش فاهمه حاجه ما توضحي كلامك اكثر علشان نعرف نتكلم.
هيام: الشخص اللي انا قلتلك انه كان مشارك منصور و اكل حقه وابنه بيدور على حقه مني ... ابنه ده بقى اسمه هادي بعت ناس اخذوني وودوني عنده البيت ولما قابلته لقيته انسان لطيف جدا زي ما عرفته بالظبط كان واحشني.
نسمه: لا معلش لحظه واحده اعملي فرامل كده وانتى بتكلميني كان وحشك ولطيف ازاي هو انتى تعرفيه.
هيام: انا عارفاه اكتر من نفسي بس عملت نفسي ما اعرفهوش.
نسمه: وتعرفيه منين بقى يا حبيبتي.
هيام: كان دايما بيجي مع ابوه الاجتماعات وكنت بشوفه كنت الاول بعمل نفسي مش شايفاه علشان منصور ما ياخدش باله وبعد كده ما بقتش اعرف اقابله لان منصور كان بيغير وكان بيتعامل معايا على اني حاجه تخصه بس.
نسمه: طيب وايه اللي حصل لما شفتيه قلتيله.
هيام: برغم اني بحبه ومعجبه بيه من ايامها لكن ما قدرتش افتح بقي واكتشفت ان هو كمان بيحبني حتى طلبني للجواز بس انا رفضت
نسمه: ايه الغباء ده ولما انتى بتحبيه رفضتي ليه اذا كان هو بنفسه اللي جاي يعرض عليكى الجواز.
هيام: انا اتفقت معاه انى هديله نص الفلوس اللي في البنك وحصل اديتهمله وكمان شركتين واديتهمله ولقينا في البنك خزنه فيها اثار تخص منصور طبعا تخصني من بعده اخذناها وهنبيعها وهنقسم فلوسها لكن هو لسه مصمم يعرف انا ليه رفضت الجواز منه وانا مش عارفه اقول له ايه وكل ما اشوفه بضرب لخمه وما بعرفش ارد وابقى حاسه اني كمان دقيقه وهجرى عليه واقوله انا بحبك وما تسيبنيش ولا تبعد عني.
نسمه: يا بختك ده انا راكان وحشني قوي المهم كملي.
هيام: ولا حاجه قلت له انا هبقى احكيلك كل حاجه بعدين ومشيت
نسمه: وانت ايه اللي مخليكى رافضه ان انتى تتجوزيه مع انك بتحبيه اكيد في حاجه انتى ما قلتهاليش.
هيام: برغم يا نسمه ان بابا كان حنين قوي وكنت بحبه لدرجه انى ضحيت بمستقبلي علشان اجيبله حقه من منصور وعملت كل اللى عملته على يدك... الا انه دايما كان في خلافات كثير ما بينه وما بين ماما خايفه لما اتجوز يبقى في نفس الخلافات دي ما بيني وما بين هادي انا لسه مش ناسيه كل المشاكل اللي كانت ما بينهم ومش هقدر اتحملها ده غير عشرتي مع منصور اللي خلتني كرهت الرجاله كلهم من اسلوب التعامل مع كل اللي حواليه عشان كده خايفه.
نسمه: طيب ما تخليه يطمنك بدل ما انتى خايفه على الفاضي وهو طالما بيحبك هيعرف ازاي يخرج الخوف من جواكي.
هيام: تفتكري يعني رايك اني احكيله.
نسمه: انا رأي ان نفسك توافقى على الجواز وعاوزة حد يزقك توافقى..وبصراحه لازم توافقى.
هيام: وانا اتعودت اعمل بنصيحتك المهم طمنيني عليكى بقى كنتى في القسم النهارده بتعملي ايه.
نسمه: يووووه ده الموضوع كبير قوي.
هيام: واحنا يعني ورانا ايه احكيلي.
نسمه: حد من تحت الارض من جماعه ابو راكان حاول ان هو يؤذيني وراكان اتعصب جدا وقال انه هينزل يحل الموضوع ويطلع لكن من وقتها ما شفتهوش وده مخليني زعلانه قوي ووحشني.
هيام: ما يمكن في حاجه اخرته اكيد هيرجع.
نسمه: مش ده بس اللي قالقني من كام يوم جالي على البيت علبه شيكولاته مسمومه وجارتي اكلت منها وكانت هتموت والنهارده جالي علبه حلويات تانيه خدتها ورحت القسم علشان يحللوها ويعرفوا مين اللي بيعمل كده.
هيام: يا نهار اسود ومين اللي ممكن يبعتلك حاجه زي دي وعاوز ياذيكي ليه اصلا.
نسمه: مش عارفه مفيش في بالي حد معين كل الحكايه انى خايفه حد يتاذى حواليا ومش عارفه اوصل لراكان علشان اعرف مين اللي بيعمل كده.
هيام: طيب ليه ما كلمتنيش.
نسمه: انتى بتستعبطي برن بقالي كام يوم ما بترديش عليا كل اللي انا فيه ده كوم بقى وسمير ابن عمي اللي عمال يقرفني كل شويه ده حاجه ثانيه لوحده.
هيام: هو لسه مصمم يتجوزك.
نسمه: مصمم وبإلحاح كمان وما بيبطلش يطلب الموضوع ده بس على مين يا انا يا انت يا سمير يا ابن فرحات.
(اتصدمت هيام لما سمعت الاسم وقامت وقفت.
هيام: بتقولى اسمه ايه.
نسمه: سمير فرحات ابن عمي انتى تعرفيه..
•تابع الفصل التالي "رواية هو مين ده" اضغط على اسم الرواية