رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي
رواية هو مين ده الفصل الثاني والعشرون 22
الفصل ال22
(في الوقت ده تحت الارض عند الملك شهبير كان قاعد مع الوزير بتاعه ازاد وهو باين عليه الحزن بعد ما الامير راكان سابهم للابد
شهبير: تفتكر يا وزير الامير راكان هيبقى في امان من غير قوته.
ازاد: والله مش عارف عظمتك لكن لو انت قلقان عليه ممكن نبعت وراها البصاصين علشان يطمنوك.
شهبير: انا فعلا عملت كده وبعثت وراه البصاصين ممكن يكونوا راجعين دلوقتي واحنا قاعدين نتكلم لكن انا مش مرتاح قلقان عليه.
ازاد: وليه سمحت ليه انه يتجوز من الانس لو هتبقى في الحاله دي يا عظمتك كان ممكن تمنعه.
شهبير: فعلا عندك حق كان ممكن بكل بساطه امنعه من الجواز ده واخليه هنا دايما جنبي لكن ما كانش هيبقى مبسوط وانا ما كنتش هبقى مبسوط علشان هو حزين انا شايف ان سعادته مع الانسيه دي.
ازاد: اللي انت شايفه صحيح يا مولاي الامير راكان فعلا متعلق بالانسيه دي جدا وبيبقى سعيد جدا وفي احسن حالاته طول ما هو موجود حواليها.
شهبير: علشان كده ما قدرتش اكسر فؤاده واقوله ابعد عنها.
(ما خلصش الملك شهبير كلامه مع الوزير بتاعه وصلوا البصاصين اثنين من اعظم بصاصين الملك شهبير.
شهبير: ها طمنوني الامير راكان فين وايه الاخبار فوق الارض.
البصاصين: اخبار ما تسرش يا عظمتك الانسيه اللي بيحبها الامير راكان اختفت وهو لما عرف باختفائها غضب جدا لكن ما قدرش يتصرف ودلوقتي بيتتبع واحد هو شاكك فيه علشان يقدر يوصل للانسيه دي.
ازاد: ما اعتقدش عظمتك انه هيقدر يعمل حاجه طول ما هو بدون قوته للاسف احنا سحبنا منه قوته في الوقت الغلط بالنسبه ليه
( وقف شهبير بكل عظمه وهو غضبان وزعلان على ابنه.
شهبير: وتفتكر يا وزير انا هسيبه ابدا انا هطلع للامير بنفسي وهرجعله قوته وهساعده انه يرجع الانسيه لبيتها علشان يكون سعيد ده ابني الوحيد وانا مش ممكن اسيبه في وقت زي ده وهي حتى لو كانت انسيه دلوقتي تخص الامير واي حد يخصه يبقى يخصني.
ازاد: وانا هاجي معاكي عظمتك انا وكام حارس من الحراس الشداد.
شهبير: جهزوا نفسكم عندنا مهمه فوق الارض ولازم نخلصها باقصى سرعه الامير محتاجنا وما ينفعش يبقى لوحده.
( في الوقت ده كانت نسمه لسه مربوطه على الكرسي وسمير علشان يجبرها انها تنفذ طلباته كان مانع عنها الاكل ومع ذلك ما طلبتوش منه ولا مره لكن بدات تحس بالتعب الشديد ومن كتر حركتها كان الرباط اللي على بقها وقع فضلت تتكلم مع نفسها بحزن
نسمه: كده يا راكان ما تسالش فيا كل الفتره دي وانا اللي حبيتك وفكرت ان انت خلاص اماني ومش هتسيبني ولا هتبعد عني ابدا انا لا يمكن اسامحك ان انت سبتني لوحدي كل الفتره دي البهدله اللي انا فيها دي مش عارفه هتخلص امتى بس لو كنت جنبي كان الموضوع اختلف وفرق معايا انما انك تسيبني بعد ما علقتني بيك مش هسامحك عليها يا ترى انت فين يا راكان مش قلتلي وقت ما تحتاجيني اندهي عليا بقالي قد ايه بنادي عليك وانت مش عارفه بقى سامعني ومطنش ولا مش سامعني انا مليش غيرك يا رب خرجني من اللي انا فيه ده.
(كانت نسمه فاكره ان الامير راكان اتخلى عنها ومش هيجلها تاني ما تعرفش انه بيتتبع خطوات سمير في كل مكان علشان يعرف هي فين في نفس الوقت ده كان فاروق وشعبان وجابر ماشيين بعربيتهم ورا عربيه الراجل اللي تبع سمير وقف الراجل عند مكان ونزل ودخل وقف شعبان واللي معاه يتكلموا.
شعبان: يلا نخش نجيبه من جوه ونقوله يودينا مطرح ما سيده موجود ونعرف هو مخبي نسمه فين ونخلص من الموضوع ده.
جابر: روق دمك يا معلم مش بالسهوله دي ده واد ابن جنيه ولففنا الكرة الارضيه من ساعة ما طلع عالطريق غير اصلا ان احنا لو مسكناه ممكن ما ناخدش منه اي معلومه خصوصا اننا ما نعرفش نسمه جوه ولا لا.
شعبان: يعني ايه هنسيبه يخش ويخرج كده عادي من غير ما نمسكه نرنوا علقه علشان يعرف ان الله حق.
فاروق: لا احنا هنرنه العلقه هو وسمير وهنعمل كل الواجب المهم الاول لازم نخرج البنت بامان وهو دخل المول ده يعني هيخرج احنا هنستناه واول ما هو يطلع هنطلع وراه وانا متاكد انه هيروح مطرح ما سمير موجود فى المكان اللى هو مخبيها فيه خلي عندك صبر بس يا معلم شعبان واللي انت عايزه هيحصل.
شعبان: اللهم طولك يا روح ادينا مستنيين اما نشوف اخرتها مع ابن الرفضي ده.
فاروق: استنوا بقى لما اتصل على امي اطمنها لا احسن دى قلقانه قوي وكل شويه ترن عليا.
شعبان: فيها الخير امك دى والله كلمها طمنها وقولها احنا وصلنا لايه.
( رن فاروق على امه وردت بسرعه بلهفه.
ام فاروق: ايوه يا حبيبي وصلتوا لنسمه ولا لسه.
فاروق: احنا ماشيين ورا عربيه راجل من رجالة سمير ياما علشان نعرف هو مخبي نسمه فين ما تقلقيش ان شاء الله هنرجعلك بيها
ام فاروق: ده الواد شفشق مقطع نفسه عياط في الشارع ومش عاوز ياكل لقمه الا لما هي ترجع والنبي الواد ده هيروح فيها.
فاروق: انزلي ياما الله يصلح حالك طمنيه وقوليله ان احنا هنجيبها وهنرجع على طول وخليه ياكل اي لقمه الواد غلبان.
ام فاروق: حاضر يا ضنايا هنزل اهو بس طمني والنبي يا فاروق لما توصل لاي حاجه ما تسيبنيش قاعده قلقانه.
فاروق: ما انا معاكي ياما على الخط اهو واي حاجه بتحصل ببلغك ما تقلقيش يلا سلام.
( في نفس الوقت ده كانت هيام قلقانه جدا على نسمه لما عرفت انها اختفت وما كانتش قادره تقعد هاديه من غير ما تعرف هي فين.
هادي: علشان خاطري اهدي شويه بقى بقالك ساعه لا على حامي ولا على بارد اقعدي شويه عشان نفكر.
هيام: نفكر في ايه انا قلقانه قوي على نسمه ومش عارفه حصلها ايه واخر مره كانت معايا يعني لو حصلها حاجه انا عمري ما هسامح نفسي.
هادي: وانتى ذنبك ايه هو انتى اللي خطفتيها الله اعلم ايه اللي حصل عموما مفيش في ايدينا حاجه نعملها.
(افتكرت هيام في الوقت ده معلومه مهمه قوي عن سمير وقامت وقفت مره واحده.
هادي: مالك في ايه وقفتى كده ليه مره واحده.
هيام: افتكرت حاجه مهمه جدا
هادي: افتكرتى ايه.
هيام: سمير كان ليه شقه صغيره في مصر هنا انا عارفه مكانها كويس كان منصور بيخبي عنده الاثار وبيعمل مقابلات التسليم في قلب الشقه دي ومالوش اي مكان ثاني يقدر يخبي نسمه فيه لو هو خطفها غير المكان ده انا متاكده انها هناك.
هادي: حتى لو متاكده هتعملي ايه يعني نسمه لو معاه احنا مالناش اي صله قرابه بيها علشان كده ملناش الحق اننا نروح نقوله هي فين.
هيام: نسمه تبقى صاحبتي واكثر من اختي كمان انا هروح هناك لو عايز تيجي معايا تعالى مش عاوز تيجي خليك وانا على الطريق هطلب البوليس وهبلغ.
هادي: استنى عندك هو انا هسيبك تروحي لوحدك.. طيب انا هطلع اغير ونشوف انتى عاوزه تروحي فين بس هنطلب الشرطه قبل ما نروح.
هيام: حاضر يا حبيبي هنطلبها بس عشان خاطري بسرعه.
( طلع هادي عشان يغير هدومه وهيام طلبت الشرطه وبلغتهم بعنوان الشقه ونزل هادي وركبوا عربيتهم ومشيوا بعد نص ساعه كان الراجل اللي رايح لسمير راح في العنوان اللي هو بعتهوله وسمير كان رجع تاني في المكان اللي فيه نسمه وطبعا المعلم شعبان واللي معاه وصلوا نفس المكان وراكان كمان وهيام وهادي كانوا قربوا على المكان دخل سمير عند نسمه اللي كانت قربت تفقد الوعي من كثر التعب.
سمير: انا نفسي اعرف جاي عليكى بايه البهدله دي كلها ما تعملي اللي طلبته منك وخلاص لازمتها اي المرمطه دي.
نسمه بتعب: انا لا يمكن اسلمك تعب بابا وشقاه العمر كله وكمان البيت اللي انا كبرت فيه انت فاسد وفاشل وانا مش ممكن اساعدك على اللي انت بتعمله مش هتعرف تاخذ مني حاجه يا سمير لو عاوز تموتني موتني انا مش خايفه.
سمير: وانتى هتنفعيني بايه ان شاء الله وانتى ميته.
نسمه: اه ممكن تورثني.
سمير: هو انتى بتديني افكار انتى كده كده ميته لانك عرفتى كل حاجه عني وممكن تبلغي وعموما فكره بردو انا اخلص منك واورثك بعدها.. على الاقل اسهل من البهدله اللي انتى عاملاها فيا دي.
نسمه بتعب: انت اللي مبهدل روحك لو كنت حافظت على فلوس ابوك ما كانش زمانك في الوضع ده انت مش هتقدر تاخذ مني اي حاجه وزي ما قلتلك انا في كتير قوي بيدوروا عليا ما تفكرش انى لوحدي.
سمير: هههههه هما فين الكتير دول الا ما شفتلك نفر واحد بس بيسال عنك لسه زي ما انتى واخده في نفسك نفس المقلب ومش عاوزه تقتنعي انك يتيمه ووحيده وملكيش ثلاثه لازمه على الارض.
نسمه: صدقني هتتفاجئ زي ما قلتلك بكميه الناس اللي بتدور عليا.
( نسمه من التعب ما قدرتش تصمد اكثر من كده و اغمى عليها واخر حاجه شافتها كان راكان وهو ماسك سمير والباب بتاع الاوضه وهو بيتكسر.
راكان: انا هعرفك عندها حد يسال عنها ولا لا كل اللي انت عملته فيها هعمله فيك وبالبطيء كمان.
سمير: اعوذ بالله من الشيطان الرجيم انت طلعت منين.
راكان:من تحت الارض انا عملك الاسود اللي هيلازمك طول الوقت
( وصل الملك شهبير في الوقت ده هو والحرس اللي معاه وشعبان ورجب وفاروق وصلوا في نفس الوقت ودخلت هيام هي وهادي يجروا على نفس المكان اللي كله دخل فيه والاوضه فجاه اتملت بالانس والجن.
شعبان: نسمه اهي يا واد يا فاروق.
هيام: يا حبيبتي جرالك اي.
جابر: يلا بينا نفكها بسرعه.
هيام: لو سمحت محدش فيكم يلمسها ما تجيبوش لنفسكم المشاكل.
فاروق: يعني ايه وانتى مالك اصلا انتى تطلعي مين.
هيام: بص وراك الاول قبل ما تتكلم.
(اتدور فاروق وشعبان وجابر بص وراهم وشافوا الملك شهابير والامير راكان وهما واقفين حوالين بعض بعظمه وسمير في وسطهم كانوا مذهولين من المنظر
راكان: ايه اللي جابك يا والدي انت والحرس دول كلهم.
شهبير: ازاي عاوزني اسيبك في حاجه زي دي انت ابني ومن غير قوتك انا خفت عليك علشان كده طلعت اطمن عليك واساعدك ترجع الانسيه تاني.
سمير: انتم مين وبتقولوا ايه هو انتوا جن بجد.
راكان: احنا بنقول ان نهايتك قربت واعتقد انك ما تعرفش انت غلطت مع مين.
شهبير: سيبه يا امير واحنا هنتصرف معاه والحق انت الانسيه دي وخرجها من هنا بسرعه قبل ما يجرالها حاجه.
راكان: ما تعملش معاه حاجه يا والدي انا اللي هتصرف معاه عاوزك بس تتحفظ عليه لحد ما اطمن على نسمه.
( في الوقت ده هيام كانت فوقت نسمه نسبيا بصت نسمه لسمير وابتسمت بتعب.
نسمه: مش قلتلك هتتفاجئ بعدد اللي بيدوروا عليا.
(واغمى عليها تاني اتقدم منها راكان وشالها بعد ما ابوه رجعله قوته واختفى عن نظرهم فجاه.
شعبان: بسم الله الرحمن الرحيم هي البت راحت فين.
فاروق: انا مش فاهم اي حاجه هو مين ده انس ولا جن ولا يطلع مين
هيام: اعتقد ان إجابه كل الكلام ده عند نسمه ما تقلقوش هو اكيد هيرجعها شقتها تقدروا تروحوا وراهم وتشوفوها او ممكن يوديها المستشفى ما تقلقوش هي في امان معاه.
هادي: طيب يلا بينا احنا يا هيام
هيام: لا انا عاوزه اروح لنسمه اطمن عليها.
هادي: صدقيني هوديكى ليها الصبح تطمني عليها انما دلوقتي لازم ترتاحي شويه خصوصا انها بامان زي ما انتى لسه قايله.
هيام: حاضر يلا بينا.
جابر: طيب يا جماعه احنا خلاص لقينا البنت واطمنا عليها برغم اني مش عارف اللي اخدها ده يطلع ايه وجتتي متلبشه بس احنا لازم نمشي دلوقتي.
شعبان: عندك حق يلا بينا يا رجاله.
( وصل البوليس للمكان و ما لاقوش حد موجود كان شعبان خارج هو وفاروق وجابر.
الظابط: احنا جايلنا بلاغ ان في واحده مخطوفه هنا انتوا مين.
جابر: احنا كنا جايين بردو علشان نفس السبب اللي مخطوفه دي من حتتنا لكن الظاهر انه بلاغ كاذب لاننا ما لقيناش حد جوه.
الظابط: يعني المكان خالي ما فيش فيه اي حد ازاي الكلام ده.
شعبان: زي ما بقولك كده اتفضل يا باشا فتش بنفسك.
( دخل الظابط عشان يفتش المكان ومالقاش حد وخرج خد القوه اللي معاه ومشى ورجع شعبان واللي معاه الحاره في الوقت ده كان راكان اخذ نسمه المستشفى ودخلها غرفه والدكاتره جم يجروا يشوفوها كان راكان وقتها ظاهر بهيئته الاداميه وبشكل طبيعي لكل اللي موجودين.
الدكتوره: حصلها ايه.
راكان: مش عارف هي اغمى عليها فجاه ارجوكي طمنيني عليها.
الدكتوره: طب حضرتك استنى هنا وانا هفحصها.
( اخذت الدكتوره نسمه ودخلت بيها غرفه الفحص وبعد شويه خرجت.
راكان: طمنيني يا دكتوره نسمه اخبارها ايه.
الدكتوره: عندها حاله اعياء شديده جدا وضعف عام الظاهر انها ما كانتش بتاكل ده غير ان هي اصلا عندها انيميا حاده ونقص حديد شديد وكل ده طبعا مع بعضه عمل مضاعفات دلوقتي انا علقتلها محلول حديد ان شاء الله لما يخلص هتفوق وهنبتدي معاها العلاج والتغذيه المناسبه علشان تسترد قوتها بسرعه.
راكان: متشكر قوي يا دكتوره ممكن ادخل اشوفها.
الدكتوره: اكيد اتفضل.
(دخل راكان وقعد جنب نسمه وهي فاقده الوعي وكان زعلان قوي عليها.
راكان: سامحيني يا حبيبتي علشان خاطري ما تزعليش مني انا عارف ان انا قصرت معاكي لكن كان غصب عني كل ده كنت برتب الدنيا عشان ابقى معاكي على طول وما سبكيش ابدا وعارف ان غيابي ده سبب مشاكل كثير يا رب لما تصحي تسامحيني.
(في الوقت ده كان وصل هو والمعلم شعبان وجابر للحاره وطلع علشان يطمن امه.
فاروق: سلام عليكم.
ام فاروق وعليكم السلام طمني يا ابني فين نسمه
فاروق: اسكتي ياما احنا حصل معانا النهارده حاجه ولا الف ليله وليله.
ام فاروق: ايه اللي حصل طمني
فاروق: وصلنا لمكانها ويا دوب هناخدها ونمشي فجأه ظهر من العدم واحد واخدها واختفى.
ام فاروق: اختفى...!!!!
•تابع الفصل التالي "رواية هو مين ده" اضغط على اسم الرواية