رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي
رواية هو مين ده الفصل الثالث والعشرون 23
الفصل ال23
(فى بيت شعبان كانت سنيه مستنياه علشان تطمن عملوا ايه في المشوار اللي كانوا رايحينه وفي نفس الوقت بردو كانت غيرانه عليه لانه بيدور على نسمه دخل شعبان من الباب وهو تعبان.
شعبان: سلام عليكم.
سنيه: عليكم السلام يا حاج حمد لله على السلامه يا اخويا طمنى عملتوا ايه.
شعبان: اصبري عليا لما القط نفسي يا سنيه وبعدين احكيلك.
سنيه: حاضر يا اخويا اجيبلك العشا لحد ما ترتاح شويه.
شعبان: لا مالوش لازمه العشا دلوقتي انتى مالك فيكى ايه.
سنيه: مفيش حاجه يا حبيبي انا كويسه.
شعبان: كويسه ازاي تعالي اقعدي جنبي هنا كده.
( راحت سنيه وقعدت جنب شعبان وهو كان عارف انها غيرانه لانه كان بيدور على نسمه فحب يلطف الجو
شعبان: انتى غيرانه عشان كنت نازل ادور على البت نسمه.
سنيه بتوتر: لا ابدا وهغير من ايه يعني يا حاج.
شعبان: ايييي. يا وليه ده انتى عينيكى بتقول كل حاجه من غير ما تنطقي هو انا مش حافظك وعارفك كويس.
سنيه: بص يا حاج بصراحه انا غيرانه فيها ايه يعني اللي بيحب لو ما بيغيرش يبقى ما بيحبش وبعدين انا مليش غيرك انا عارفه انكم كنتم بتدوروا عليها وان مفيش في نيتك حاجه بس عادي عشان انت كنت عاوز تتجوزها قبل كده حسيت بشويه غيره فين المشكله يعني.
شعبان: هههههه شفتي مش قلتلك النسوان عمرها ما بتتغير كلهم عقليه واحده.
سنيه: اخص عليك يا حاج يعني انا خلاص ما بقتش بعجبك.
شعبان: ده انت تعجب الباشا يا باشا.
سنيه: طب قولي بقى حصل ايه.
شعبان: قوليلي انتي الاول رحتى لام فاروق زي ما اتفقنا ولا لا البنت جايه بكره
سنيه: رحتلها يا اخويا والله وقعدنا نتكلم مع بعض وفهمتها كل حاجه واتكلمت معايا بكل ذوق واحترام والله ان جيت للحق الناس دول ناس محترمين وان شاء الله هي وعدتني ان هي هتكلم ابنها وهترد عليا.
شعبان: انا كنت اعرف اكلمه لكن انا ما حبيتش ارخص البت قلت تيجي ما بينك انتى وهي نسوان في بعضيكم احسن ما تيجي مني.
سنيه: ان شاء الله خير احكيلي بقى حصل ايه.
شعبان: والله انا عمال اتوه في الكلام علشان ما اقولكيش اللي حصل لان انا جتتي مش خالصه من ساعتها.
سنيه: ليه هو ايه اللي حصل بالظبط.
شعبان: ده اللي حصل ولا الحواديت بصي يا ستي.
(قعد شعبان يحكي اللي حصل لسنيه وعند ام فاروق كانوا قاعدين نفس القعده هي وابنها وبيتكلموا.
فاروق: بس ياما زي ما بقولك كده فجأه لقينا المكان كله اتملى دخان ولقينا دول قدامنا بسم الله الرحمن الرحيم عينيهم حمراء ومنهم اللي كان طاير ومش لامس الارض انا شفت المنظر ده من هنا وما عدتش عارف اتلم على نفسي وبعدين واحد منهم قرب من نسمه وشالها وفجاه اختفى بس وخرجنا احنا من هناك وجينا على طول والبوليس ايه وصل بعد خراب ملطه.
ام فاروق: يا خرابي كل ده حصل الحمد لله انها بخير على الاقل اطمنا عليها بس بقولك ايه يا فاروق شكلك يعني يا ضنايا مش متضايق ان في واحد ثاني اتدخل في الموضوع يطلع زي ما يطلع بقى جن ولا انس المهم انك مش متضايق يعني.
فاروق: اصل بصراحه ياما دورت الموضوع في دماغي تاني ولقيت ان انا ونسمه ما ننفعش لبعض وبيني وبينك ياما كمان انا لما عرفت انها مش باينه ومختفيه ما حسيتش اني بدور على واحده بحبها قد ما حسيت اني بدور على اختي فعرفت اني ما بحبهاش ولا حاجه وكل ده كان مسألة عند مع نفسي وبس...
ام فاروق:شفت انت ما سمعتش كلامي لما قولتلك عموما انت صبرت ونولت.
فاروق: نولت ايه مش فاهم.
ام فاروق: جايبالك يا واد حته عروسه ادب واخلاق واحترام وتعليم ونسب مفيهاش غلطه من الاخر عروسه زي الكتاب ما بيقول
فاروق: شوقتيني ياما تطلع مين العروسه دي.
ام فاروق: بس هاخد الحلاوه على الكلام اللي بقولك عليه ده.
فاروق: عيني ليكي ياما انطقي بقى.
ام فاروق: ناديه بنت المعلم شعبان جنزيره البنت راجعه بكره من بلاد بره وخلصت تعليم ايه رايك.
( فاروق قام وقف وسرح شويه وبعدين بص لامه.
فاروق: بصي ياما انا مش هقولك ناديه وحشه او فيها عيب انا بس هقولك ان انا ما بحبش حد يعايرني بجهلي انا يا دوب خلصت اعداديه وما دخلتش ثانوي ولا كملت تعليمي يعني بعرف اقرا واكتب بس معيش تعليم عالي وكده.
ام فاروق: وده ايه علاقته باللي انا بقولهولك.
فاروق: لا ده علاقته كبيره قوي البنت جايه من بره ومتعلمه تعليم عالي واكيد هتبقى عاوزه تتجوز واحد نفس تعليمها ومش هتبصلي يبقى بلاش اعلق نفسي في حبال الهوا الدايبه.
ام فاروق: هههههه طيب ولو قلتلك ان البنت بتحبك وعاوزاك انت بس ومش عاوزه غيرك.
( اتصدم فاروق من كلام امه وما كانش مصدق ان فعلا في واحده بتحبه على وضعه وقبلاه بكل ظروفه.
فاروق: انتى بتتكلمي جد ياما ولا بتهزري
ام فاروق: هو الجواز فيه هزار يا منيل.
فاروق: وعرفتى منين الكلام ده.
ام فاروق:من ناديه انا وامها كنا قاعدين مع بعض امبارح وبعدين البنت رنت عليها ولما عرفت انها عندي قالتلها هاتيلي خالتي اسلم عليها وقامت سنيه تعملنا شاي والبنت فضلت تسالني فاروق عامل ايه يا خالتي اخباره ايه يا خالتي طمنيني عليه يا خالتي فانا استغربت وقلتلها في ايه يا ناديه مالك مهتمه كده ليه بفاروق قالتلي بصراحه يا خالتي انا بحبه قوي وانتى عارفه ان انا بحبه من قبل ما اسافر.
فاروق: وهو انتى عارفه فعلا انها بتحبني من قبل ما تسافر ياما.
ام فاروق: بصراحه اه بس انا كنت عارفه انك رامي عينك على نسمه علشان كده ما حبيتش اكسر بخاطر البنت واقولك عليها.
فاروق: يعني انتى متاكده ياما انها بتحبني.
ام فاروق: متاكده يا قلب امك انها بتحبك المهم انك تحبها زي ما هي بتحبك وما تقصرش في حقها وما تزعلنيش منك.
فاروق: ما تقلقيش ياما بس والنبي تكلملنا المعلم شعبان والست سنيه مراته وتشوفي عاوزنا نروح امتى وانا من ايدك دي لايدك دي بس يعني بالنسبه لمصاريف الجواز انا يعني.
ام فاروق: هتتحل وهتدبر ملكش دعوه المهم ان احنا بس نروح نربط كلام مع الناس قبل ما حد يسبقنا يا عبيط.
فاروق: على خيره الله.
(وتحت على القهوه عند المعلم جابر كان قاعد بيحاول يقنع شفشق انه ياكل اي حاجه لحد ما نسمه ترجع.
جابر: يا واد افطر بقى ولا كلك اي لقمه هتفضل صايم يعني عن الاكل بقولك هي كويسه وزي الفل انا شفتها بعيني اللي هياكلها الدود بس هي تعبانه شويه وفي المستشفى اول ما تخف هترجع هنا على طول وتطلع تشوفها يا سيدي وهتنزلك تقعد معاك كمان في الدكان ولا تزعل بس لو هي جت ولقيتك تعبان ولا فيك حاجه هتزعل منك خالص
شفشق: ما تحاولش يا معلم انا مش هحط لقمه في بقي غير لما الست نسمه ترجع تنور شقتها ثاني ده انا ما كنتش بفطر الا معاها وساعات كمان كنا بنتغدى سوا ولما كانت بتجيب لقمه حلوه كانت بتفتكرني بيها انا عاوز اطمن عليها واشوفها وديني عندها المستشفى اشوفها واطمن عليها وبعدين اما ارجع هاكل على طول
جابر: طيب افرض انا ما اعرفش مكان المستشفى هتفضل قاعد من غير اكل.
شفشق: لا انت عارف المستشفى انهي فيهم بس مش عاوز تقولي لو مش عاوز تيجي معايا قولي وانا هروح انا.
جابر: يا ساتر عليك دماغك انشف من الحجر خلاص يا سيدي انا هوديك قفل يلا الدنيا وانا هكلم المعلم شعبان والواد فاروق علشان يجوا معانا.
شفشق: بجد يا معلم هتوديني عند الست نسمه اطمن عليها.
جابر: بجد هوديك انت اصيل يا وله وانا عمري ما اقدر ازعلك ابدا
شفشق: خلاص انا هخش البس هوا وابقى قدامك حالا.
(دخل شفشق عشان يغير هدومه في القهوه وقعد المعلم جابر وهو بيضحك.
جابر: سبحان الله مفيش حد في الحاره ما خليتهوش يحبك يا نسمه وكانك مغناطيس لكل اللي حواليك الله يقومك بالسلامه يا رب ويشفيكى ويرحم ابوك وامك الناس الامراء الطيبين.
(في الوقت ده راكان كان قاعد جنب نسمه على السرير ومستنيها تفوق علشان يطمن عليها ويعتذرلها وكان عمال يفكر يا ترى هتسامحه ولا لا بدات نسمه تتحرك وفهم راكان انها صحت مسك ايدها بسرعه.
راكان: على مهلك يا حبيبتي على مهلك حمد لله على السلامه يا نسمه قلقتيني ووقعتى قلبي
( فضلت نسمه بصاله بتعب وهي ساكته ما بتتكلمش وبعدين دورت وشها بعيد بزعل.
راكان: ايه ده هو انتى هتخاصميني ومش هتكلميني تاني طيب اديني فرصه اشرحلك اللي حصل.
( راكان ملقاش رد بردو من نسمه فكمل كلامه.
راكان: علشان خاطري ما تزعليش مني انا قلتلك ان انا عاوز ابقى معاكي على طول ومع ذلك انتى ما ردتيش عليا ولا قلتيلي حبيتيني ولا لا لكن رغم كل ده انا كنت تحت برتب كل حاجه علشان اطلع فوق الارض وافضل جنبك على طول وابعد اي حاجه ممكن تاذيكي عن طريقنا ده اللي اخرني وخلاني غبت عنك كل ده كان غصب عني يا حبيبتي والله انتى اكثر واحده عارفه ان انا عاوز اشوفك كل ثانيه وكل دقيقه علشان خاطرى ردى عليا سكاتك ده بيوجعني.. طيب مش عاوزه تطمني عليا ولا تشوفيني.
( في الوقت ده نسمه بصتله وعيطت وهي بتعاتبه.
نسمه: انا ماليش دعوه بكل الكلام اللي انت قلته ده انا ليا دعوه بحاجه واحده ان انت قلتلي وقت ما تحتاجيني هتلاقيني ولما احتجتك ما لقيتكش كنت بنادي عليك كثير علشان اكلمك كنت عايزه اقولك حاجه مهمه لكن انت ما ردتش عليا كل الوقت ده ما فكرتش حتى تطلع تطمن عليا مره واحده علقتيني بيك ليه لما انت مش هتسال فيا وهتسيبني لوحدي انا حظي كده وعارفاه هفضل طول عمري اتعلق بالناس وهم يسيبوني ويتخلوا عني.
راكان: انا ما اتخلتش عنك يا نسمه.
نسمه: لا اتخليت عني المفروض كنت اعمل ايه وانا لوحدي ده انت حتى ما فكرتش تقول اشوف يمكن في حد اذاها ولا زعلها ما صعبتش عليك وانا كل يوم بعيط لحد ما انام كنت مستني ايه لما اموت.
(وقف راكان بغضب من كلمتها لانه ما بيحبهاش تقول كده.
راكان: قلتلك بلاش الكلمه دي مش عاوزك تجيبي سيره الموت على لسانك انا لسه ما لحقتش اتهنا بيكي ولا حتى اعرف حبتيني ولا لا او يمكن انا عشان جن ما اتحبش وتكوني مثلا عاوزه انسان شبهك... انا قلتلك السبب اللي خلاني غبت عنك كل ده لكن في سبب ثاني كمان خلاني كنت بحاول اني ما اخرجش حتى ابص عليكى من وقت للتاني وكنت بطمن عليكى انك كويسه من بعيد
نسمه:سبب ايه ده اللي انت هتتحجج بيه عشان تبرر غيابك.
راكان: انا ما بتحججش وما ببررش حاجه انا كنت بحاول ما اعلقش قلبي بيكي اكثر من كده لاني كنت شايف انك مش ممكن تحبيني ولا مره قلتيلى كلمه حلوه ولا مره حتى قلتيلي وحشتني كنت مستنيه مني ايه....ورغم كده بسعى ان انا اظبط كل حاجه تحت علشان اضمن انى هبقى موجود معاكي على طول.
نسمه: كل ده ما يغفرلكش غيابك في الوقت اللي انا كنت محتاجاك فيه.
راكان: لو انتي شايفه إن ده رايك انا بردو مش هبعد عنك وهفضل جنبك لاخر يوم في عمري.
نسمه: وانا مش عاوزاك.
راكان: وانا مش هسيبك.
( الباب خبط في الوقت ده وقطع كلامهم دخول شفشق والمعلم جابر وفاروق وام فاروق.
شعبان: سلام عليكم حمد لله على سلامتك يا ست البنات.
نسمه: الله يسلمك يا معلم شعبان اتفضل.
فاروق: مالك يا نسمه بتعيطي ليه
نسمه: مفيش حاجه كنت تعبانه بس شويه وحسيت بوجع.
ام فاروق: بعيد الشر عنك يا ضنايا حمد لله على سلامتك.
نسمه: الله يسلمك يا خالتي ما اتحرمش منك ابدا.
جابر: الواد شفشق ما داقش ولا لقمه من ساعه ما انتى خرجتى من البيت واختفيتي علشان كده جبتهولك يشوفك يطمن عليكى بنفسه عشان يرضى ياكل حمد لله على سلامتك يا بنتي.
نسمه: الله يسلمك يا معلم جابر تعالى يا شفشق قرب.
( قرب شفشق منها وهو عنيه مدمعه وحزين عليها وعلى تعبها.
شفشق: حمد لله على السلامه يا ست الناس كده تخضيني عليكى وتقلقيني.
نسمه: حقك عليا يا شفشق كان غصب عني المهم لازم تاكل اي حاجه دلوقتي بدل ما تقع من طولك احسن والله ازعل منك.
شفشق: لا ما تزعليش مني انا هاكل وهستناك لما ترجعي علشان نفطر بعد كده سوا زي الاول.
نسمه: ان شاء الله هما يومين وهخرج وارجع البيت وكل حاجه ترجع زي ما كانت.
جابر: لا مؤاخذه يا نسمه يا بنتي هو مين الاستاذ.
فاروق: انا كنت لسه هسال نفس السؤال يا معلم بس ما رضيتش اضايق نسمه يعني.
نسمه: وتضايقني ليه الاستاذ يبقى...!!!
( قاطعها راكان وهي بتتكلم ودخل في الكلام ورد هو.
راكان: انا ابقى زين الرفاعي خطيب نسمه وقريب ان شاء الله هنتجوز واكيد كلكم معزومين انتم اهلها مش ضيوف.
شعبان: طبعا يا ابني كلنا اهلها بس انت طلعت منين فجاه احنا ما نعرفش عنك حاجه.
ام فاروق: ما قلتليش يعني يا نسمه على موضوع الخطوبه ده.
نسمه: مفيش خطوبه ولا حاجه يا خالتي هو بس بيحب يهزر.
راكان: لا انا ما بهزرش ولا حاجه هي بس يا جماعه تعبانه وكمان زعلانه مني علشان ما كنتش موجود الفتره اللي فاتت لكن انا بعد كده هبقى موجود على طول.
•تابع الفصل التالي "رواية هو مين ده" اضغط على اسم الرواية