رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي
رواية هو مين ده الفصل الثاني 2
البارت ال2
(في الوقت ده كانت ام فاروق واقفه في مطبخها بتعمل حلة الملوخيه الشهيره بتاعتها جمب المحشى لما سمعت حد بيصرخ... وكان صوت هي عرفاه كويس بس ده كان بالنسبالها شيء من المستحيلات انها تسمع الصوت ده بالذات بيصرخ.. خرجت تجري للبلكونه وقطعت اغنيتها المعروفه اللي بتقعد تغنيها وهي بتعمل الملوخيه (يا حلاوه طشتي يا جمال تقليتى) خرجت لقت نسمه هي اللي واقفه في نص الشارع وعماله تصرخ والناس ملمومه حواليها وهي بتبص جوه الدكان بتاعها برعب....
نزلت تجري لان برغم ان نسمه لسانها طويل وايدها تقيله ومعوراها قبل كده الا ان امها كانت غاليه عليها اوي وكانت جاره عزيزه زي ما كانت دايما بتقول ونسمه كانت في مقام بنتها.... وصلت لتحت دخلت وسط الناس وقفت جنبها ومدت ايدها حطيتها على كتفها وهي بتقولها...
ام فاروق: اهدي يا ضنايا اهدي يا نسمه ايه اللي حصل بس فهميني يا بنتي... اهدي وفهميني بتصرخي ليه كده... دى عين و صابتك وحياة النبى عين وصابتك..
(بصت نسمه قدامها برعب وهي بتبلع ريقها بصعوبه وبتبص لام فاروق وقالتلها..
نسمه: عفريت يا خالتي عفريت..هو أنا كنت ناقصه يختى قرف البنى ادمين لما يطلعلى عفريت ده غلب ايه ده..
( بصتلها ام فاروق باستغراب عفريت ايه اللي يخوف نسمه دى نسمه دي تخوف بلد... خدتها في حضنها وطبطبت عليها وقالتلها..
ام فاروق: هو فين يا بنتى العفريت ده قل اعوذ برب الفلق اهدي يا حبيبتي اهدي..هو معقول انتى تخافى من عفريت يا نسمه..
نسمه بعياط: انتى عاوزة تنقطينى يا وليه هو أنا مش انسانهو بخاف زيكوا ولا أنا حيطه..
أم فاروق: مش قصدي يا بنتى يقطعنى.. بس أنا مش شايفة حد خالص جوا هو فين ده شوفتيه فين..
نسمه: خرج من البراد يا خالتي والله... خرج من البراد و وقف قدامي وضحك وانا اتلبشت وطلعت اجري.. أنا مش عارفه كان مستخبيلى كل ده فين بس.
(جه المعلم شعبان جنزيره وقف قدامها بسماجه وهو بيقول اثناء لعبه في شنبه..
شعبان: ما انا قلتلك.... لو كنتى وافقتى من يومها ما كانش زمانك دلوقتي خايفه من اي حد في البلد ده انا ضهر يا بت ولا في عفريت حتى يقدر يهوبلك وانتى على ذمتي.. انتى فكرانى قليل ولا ايه..
(هنا ام فاروق عينيها احمرت وبصتله بشر وقربت منه وهي بتمسكه من هدومه وبتهزه وهي بتقوله...
ام فاروق: ذمة مين يا ابو ذمه تفوت قطر.... انت عايز تتجوز نسمه..!!!! ليه الرجاله خلصت اخدها الوبااااا... انت فاكر نفسك مين يا راجل انت...عاوز تتجوز بت من دور عيالك... انت يا نص تذكرة عاوز تاخد نوارة الحارة..
( اتعجبت نسمه من رد فعل ام فاروق برغم خلفاتها معاها وقله ادبها عليها احيانا من دفاعها عنها قصاد شعبان جنزيره.... بصلها شعبان وهو بيشيل ايدين ام فاروق من عليه وبيقول..
شعبان: جرى ايه يا وليه نزلي ايدك دي انتى مالك اصلا... واحد وعاوز يتجوز واحده تتحشري ليه يا وليه يا حشريه.... هي كانت نصبتك امها ولا كانت من بقيت اهلك... كل حى يلزم ادبه ويخليه فى حاله أنا بقول اهو.. هى بس اللى ترد وانتى تكتمى خالص..
ام فاروق بغيظ: كتمه لما تكتم نفسك يا قليل الحيا.. انت كمان ليك عين تتكلم يا جوز الثلاثه ايه عايز تقفلهم ويا ترى بقى لو اتجوزتها هتجيب منها كام عيل يقفلوا بقيت ال 20 ولا ناوي تجيب ال 30..... يا راجل يا ناقص يا عره تتجوز بنت من دور عيالك...
( وقفت نسمه تبص لموقف ام فاروق الدفاعي وهي مذهوله ونست ساعتها هي كانت خايفه من ايه وردت بسرعه على شعبان قبل ما هو يرد على ام فاروق وقالت...
نسمه: ام فاروق تتكلم وتدافع عني وتقول اللي هي عايزاه عندك مانع ولا ايه.... جرى ايه يا جعر هو انت كمان هتتدخل في مين اللي يقفلي ومين لا... ام فاروق طول عمرها جارتي وحبيبتي وحبيبة امي الله يرحمها واللي هي قالته هو نفس اللي انا قلتهولك الصبح هو نفس اللي انا هقولهولك كل مره هتفتح الموضوع ده..... وانجر بقى من قدامي احسن والله اخلي وشك ولا شوارع القاهره..
( بص شعبان لام فاروق ولنسمه وهما واقفين حاطين ايديهم في وسطهم وبيتهزوا زي اللي مسهم شيطان وبيبصوله بشر قبل ما يقول
شعبان: ماشي ماشي ده انتوا نسوان سعرانه.... بس على مين بكره تقعي.... قبلك كتير قالوا لا وطلع في الاخر عندي حق هعهعههعهعهع...بالأذن يا جميل..
(انفض الناس وكل واحد راح على شغله ومشي شعبان قفاه يقمر عيش..
وخدت ام فاروق نسمه تحت بطها ونسمه مستسلمه على غير العاده وطلعوا مع بعض على شقه نسمه دخلوا قفلوا الباب وقعدت ام فاروق على كرسي وقعدت نسمه على الكنبه قدامها وفضل الصمت هو سيد الموقف لمده دقيقتين تقريبا قبل ما تقول نسمه..
نسمه: تشكري يا ام فاروق على وقفتك جنبي ما كانش له داعي والله انك تتعبي نفسك وتنزلي..أنا مش عارفه كل ده بيحصلى ليه... هى البلاوى مش شايفه غيرى عالارض..
ام فاروق: يا بنتى ما تقوليش كده ده انتى بنت الغاليه... والله لولا عصبيتك اللي بزياده وكلامك الصعب اللي بتقوليه ومدت ايدك عليا في الراحه وفي الجايه كان زمانا حبايب اكتر ما كنا كمان..وبعدين لو موقفتش معاكى هقف مع مين امال.. ايام صعبه وهتعدى يا بنتى..
( بصت نسمه لام فاروق والعكس لحد ما انفجروا هما الاثنين في الضحك قبل ما تقول ام فاروق..
نسمه:هههههه والنبى كان بيبقى من غير قصد.. فاكره يوم ما عورتك والله كان بودى اخبط الواد فاروق ابنك بس جت فيكى انتى.. اصل انا موتى و سمى الراجل اللى يتحشر فى خناقة الحريم..
ام فاروق: شاف امه بتتهزق قال يدخل يحجز بنا.. يا لهوى عليكي يا نسمه يعنى انتى كان قصدك فاروق.. الحمدلله انها جت فيا.. ده الواد الحيله يختى.. المهم ما تخدنيش في دوكه... قوليلي عفريت ايه يا ضنايا اللي شفتيه في الدكان...
(وقت ما ذكرت ام فاروق العفريت اتنفض جسم نسمه وهي بتقولها...
نسمه: اه والله يا ام فاروق شفت عفريت دنا مش قادرة اتلم على جتتى من ساعتها..أنا يختى كنت قاعده لا بيه ولا عليا.....
( فلاش باك)
(نسمه قاعده تصب الشاي من البراد مش راضي ينزل قالت: والله ما انا شاربه الشاي..
وقامت تمشي وفجاه سمعت صوت خربطه جامده اتلفت بالراحه وهي مش فاهمه الصوت ده جاي منين وبصت لقت البراد بيترعش وغطاه بيتهز كأن جواه حاجه عايزه تخرج...
وقفت تبص عليه شويه وعينيها مفتوحه على اخرها وهي مش مستوعبه ايه اللي بيحصل....
لسه هتقرب من البراد عشان تشوف في ايه ابعد حاجه جت في دماغها وقتها ان يكون الواد شفشق عامل فيها مقلب وحاطط في البراد ضفدعه ولا فار....
لسه هتقرب لقت دخان كثير بيخرج من البراد بعد ما الغطاء وقع وفضل الدخان ده يتجمع في زاويه في قلب الدكان لحد ما لقت راجل واقف قدامها وسيم جدا لكن عينيه كانت حمرا وتدريجيا بدات ترجع للونها الزيتوني وهي واقفه مش عارفه تتحرك كأنها اتجمدت.... ومد ايده قدامه كأنه بيندهلها وهو بيضحك...
راكان: أنا جايلك مخصوص يا انسيه ومش همشى غير بيكى أو افضل معاكى الاختيار فى ايدك بس القرار محسوم..
(باك)
نسمه: بس يا ام فاروق رحت راقعه بالصوت لميت الحاره كلها والله ما اعرف ده مين ولا كان بيعمل ايه جوه البراد يا اختي تفتكرر يكون عفريت بصحيح يا ام فاروق.. والنبى كلامه كان شبه كلام العفاريت وأنا جتتى مش خالصه..
(فضلت ام فاروق ساكته شويه وهي بتبص لنسمه ومش فاهمه حاجه من اللي هي قالته وبدات تهرش في دماغها كانها بتحاول تستوعب قبل ما تقول بحذر..
ام فاروق: بصي يا نسمه بس من غير مد ايد.... مش يمكن يا بنتي تكوني ما نمتيش كويس ولا حاجه وكان بتهيألك او تكوني فطرتي حاجه تقيله... انا بقول بس يمكن..اصل موضوع العفريت ده ميدخلش المخ وبعدين خارج من البراد ليه كان عاوز يحبس هههههههه..
(بصت نسمه لام فاروق وهي بتتنفس بصوت عالي وكأنها بتحاول تهدي الغضب اللي كبر جواها فجاه وهي بتحاول تبرر لام فاروق من غير ما تمد ايدها عليها...
نسمه: بصي يا ام فاروق انتى ست كبيره وانا والله لما كنت بمد ايدي عليكى ساعات كنت بزعل اوي من نفسى لانك في مقام امي وعيب اني اضربك وما بحبش ازعلك مني على فكره وبجد انا اسفه على اي مره ضربتك فيها بسبب عصبيتي. واصلا مش من الصح إن حد صغير زى حالى يمد ايده على ست كبيرة تحت اى ظرف.
ام فاروق: بتقولي كده ليه دلوقتي يا نسمه هو انا يا بنتي قلتلك حاجه... انا عارفه ان نفسيتك مش مظبوطه من ساعه ما الست امك ماتت وده اللي مقصر فيكى عشان كده اي حاجه هتعمليها مش هزعل منك...
نسمه: مش ده اللي اقصده يا ام فاروق انا قصدي.... انك تبطلي تقولي كلام عبيط بدل ما امد ايدي عليكى المره دي وما اندمش اني عملت كده انا يا وليه بتهيألي انتى تعرفي عني كده.... ده مفيش في الحاره واحده في عقلي تقوليلي كان بتهيألي وما نمتش وفطرت تقيل.... انا شفته بعيني اللي هياكلها الدود دى....ومظنش ان العفاريت بتحبس بشاى ده لو كلامك صح.
( برقت نسمه بعد جملتها وهي بتبص بالتحديد ورا ام فاروق..... ام فاروق خافت اوي من منظرها وقامت وقفت وهي بتقولها....
ام فاروق: استهدي بالله يا نسمه استهدي بالله يا حبيبتي انا ما اقصدش انتى مالك برقتي كده ليه اوعي تكوني ناويه تضربي يا حبيبتي ده انا ما كانش قصدي ده انتى ست العاقلين...طيب اجبلك شيخ طيب ولا اعمل ايه..
( وقفت نسمه وهي بتشاور بايدها ورا ام فاروق وبترجع لورا في نفس الوقت وهي بتقول بخوف...
نسمه: وراكي..!!! وراكي يا ام فاروق....!!! العفريت واقف وراكي العفريت اللي خرج من البراد بصي يا ام فاروق بصي اهو...
(رعشه سرت في جسم ام فاروق في اللحظه دي وكانت خايفه تلف فعلا... ولكن الرعب اللي كان على وش نسمه خلاها تلف غصب عنها وهي بتبص وبتقول..
ام فاروق: هو فين ده يا بنتي اعوذ بالله من الشيطان الرجيم مفيش حاجه ابدا.... استهدي بالله يا نسمه يا حبيبتي ايه اللي جرالك بس يا بنتي...
نسمه بعصبيه: انت بتخرفي بتقولي ايه يا وليه انتى....!!! ما هو واقف في قفاك على طول اهو بصي بصي كويس والله واقف وراكي.... وحياة ربنا واقف وراكي.... طب ورحمه امي واقف وراكي يا وليه....
ام فاروق: لا إله إلا الله قل اعوذ برب الفلق قل اعوذ برب الفلق اشتاتا اشتوت... فين يا بنتي انا مش شايفه حاجه خالص...
(وقفت نسمه تبص لام فاروق وتبص للتاني اللي واقف وراها وبيضحك وهي مستغربه معقول محدش بيشوفه غيرها ووقتها نسمه خدتها الشجاعه وهي بتقولها...
نسمه: يمكن يا ام فاروق عندك حق... واكون تعبانه شويه ولا حاجه انزلي انتى يا حبيبتي وانا هدخل انام حبه وهصحى زي الفل ان شاء الله...أنا يمكن فعلا تقلت فى الاكل بليل قبل ما انام..
ام فاروق: وحياى النبي انا قلت كده... ماشي يا حبيبتي انا هنزل اسلقلك فرخه تتقوتي بيها وانتى خشي نامي شويه وان شاء الله تبقي زي الفل والنبي دي عين وصابتك...
نسمه: اه... هي عين. صح... عين روحي انتى بقى روحي...و ابقى اطلعى اطمنى عليا يا ام فاروق وابعتى للواد شفشق قوليله يقفل الدكان احسن نسيته مفتوح.
( نزلت ام فاروق وهي عماله تدعي لنسمه براحه البال وتقول قرأن... وفتحت الباب وخرجت وقفلته وراها وفي الوقت ده نسمه بصت للي لسه واقف وبيضحك وهي بتبلع ريقها بصعوبه وبتبصله قبل ما تقول....
نسمه: انت مين يا جدع انت وطلعتلي من انهي داهيه انا مش خايفه منك على فكره اتكلم لاوديك في 60 داهيه...أنا الشويتين بتوعك دول ما يدخلوش عليا..
( وقف يبصلها شويه وهو بيضحك قبل ما يروح يقعد على الكنبه ويحط رجل على رجل باستمتاع من منظرها...
رجعت هي لورا جري اول ما شافته قعد قريب منها وقررت كلامها تاني...
نسمه: انت كمان هتقعد يا بجح وكمان حاطط رجل على رجل ما تنطق وتقولي انت مين... ساحر.... ولا دجال تطلع مين انت...؟؟؟؟ يكنش شعبان جنزيره بعتك عشان تخوفني واقتنع بان انا اتجوزه ولا يكون المعلم سلام الدهول بيحاول يخوفني من الدكان عشان اوافق ابيعه.... ده بعدك انت وهو وهو وهو....دنا نسمه فاهم ولا افهمك...
( وقتها مد ايده وحسس على شعره الناعم وهو بيقول...
راكان:اسمك نسمه وعندك 26 سنه وحيدة أمك وابوكى الله يرحمهم ابوكى مات فى حادثه وامك ماتت موتة ربنا بفترة قصيرة وراه متعلمه ومعاكى دبلوم وكان نفسك تكملى تعليم لولا موت امك و اتحولتى التحويله الهباب دى عشان تعرفى تعيشى فى وسط الناس هنا بتحبى الفراخ المحمرة و المصاصه التفاح و الرز بشعريه و البسبوسه سادة وامك كانت دايما تقول عليكى فقر عشان مبتحبيش اللى بالمكسرات وكمان بتسمعى غنوة واحده وهى العيون السود.... وانا مليش اي علاقه بأي حد من اللي انتى قولتى اساميهم دول.... انا ليا علاقه بيكى انتى وجاي علشانك انتى مخصوص... ولا يمكن امشي واسيبك يا اما افضل معاكي يا اما تيجي معايا....تحبى اكمل باقى التفاصيل عنك ولا كفايه كده..
( وقفت نسمه تبصله برعب وهو بيتكلم قبل ما تقوله...
نسمه: والنبي.......!!!!!!!!
( وفقدت وعيها على طول بعد الكلمه دي من الخوف ساعتها وقف هو وقال شويه كلام مش مفهوم وفجاه بعد ما سكت............!!!!!!!!!
•تابع الفصل التالي "رواية هو مين ده" اضغط على اسم الرواية