رواية خطيبتي واخواتها التوأم الفصل الثالث 3 - بقلم رحاب القاضي

 رواية خطيبتي واخواتها التوأم (كاملة جميع الفصول) حصريا عبر دليل الروايات بقلم رحاب القاضي

رواية خطيبتي واخواتها التوأم الفصل الثالث 3

 

_الحلقه الثالثه

ــــــــــــــــــــــــــــــــــــــــــــــ 

ناني بدموع

يا بابا انت بتقول ايه انا لو كنت قولتلك انت ماكنتش هتخليني اوافق.. 

بهاء بعصبيه 

وزعل ابوكي هان عليكي قصاد شغلك يا ناني.. 

ناني 

لا طبعا اا.. 

زعق فيها وقال

ما تتكلميش معايا ولا لسانك يخاطب لساني تاني فاهمه... 

_قال كلامه وسابها ودخل مكتبه، وهي حضنت سما وفضلت تعيط.. 

سما

فضلت اقولك بلاش ما سمعتيش كلامي، اهو عرف من بره وجه بهدلني انا والغلبانه دي.. 

ملك 

انا مش هكلمك بجد عشان انا اتشتمت وانا ما اعرفش اصلا انها كانت مسافره بس انا ديما كده متاخده في الرجلين.. 

سما 

طيب خلاص ونسيب بابا بهدي شويه وندخل نصالحه، وانتي يا ناني عملتي ايه واياد ده قالك ايه.. 

ابتسمت ناني وقالت

كان فاكرني رقاصه.. 

ضحكت ملك وقالت

ههههه دي البدايه اتخانقتو طبعا وقالك مش هاجي البرنامج واطلعي بره وانتي عيطتي ومشيتي واا.. 

سما

عارفه يا ملك لو ما بطلتيش تطبقي مسلسلاتك وروياتك التافهه علينا هقوم الطشك بالقلم علي وشك.. 

ناني 

احسن عشان تبطلي تفاهه، وبعدين انا اتفقت معاه عادي هو مستفز بصراحه وغلس اووي بس وافق.. 

ـــــــــ #بقلم_الكاتبه_رحاب_القاضي ـــــــــ 

_في القاهره كانت جيلان قاعده في كافي وقدامها جني اللي كانت محجبه وماسكه كتاب بتقرأ فيه.. 

جيلان 

يا ست الدكتوره ممكن لو هتذاكري تروحي تقعدي بعيد عني عشان انس جاي ومش عايزاكي تقعدي معانا.. 

جني بضيق

انا مش فاهمه بصراحه ازاي بتعملي كده، ليه بتكدبي علي  خالي وبتقوليلو انك طالعه مع صحابك وانتي بتقابلي البني ادم ده.. 

_في الوقت ده قعد انس جنبيهم وبص لجني بهدوء وقال.. 

انس

ممكن. افهم انا مدايقك في ايه؟.. 

ادايقت جني من نظراته وقامت

انا ما كنتش اقصد حضرتك، انا قاعده بذاكر هناك يا جيلان لما تخلصي قوليلي.. 

مشيت جني وانس ما نزلش عينه من عليها، وقالت جيلان بغيره.. 

جيلان

وبعدين معاك انت بتبصلها كده ليه ما تحترمني شويه.. 

انس

هي جني بتدرس في المدرسه اللي كنا فيها واحنا في ثانوي مش كده؟.. 

جيلان 

يادي جني وسنينها ايوه يا انس، وبعدين هو انت جاي عشاني ولا عشان هي جات معايا.. 

انس

لا طبعا يا حبيبتي عشانك انتي.. 

جيلان 

طيب شيل عينك من عليها وخليك معايا.. 

_وبعد شويه رجعت جيلان البيت ومعاها جني وكانت قاعده عزه مامت جني واخوها عزت ابو جيلان.. 

عزت 

كل ده بره يا بنات، مش قولت ساعه وتيجو.. 

جيلان

قول للست جني اللي كأنها اول مره تشوف كافيهات.. 

عزه

معلش يا حبيبتي هي كانت عايشه في البلد وما تعرفش الحاجات اللي هنا فتلاقيها مبهوره بيها.. 

جني بحزن 

انا طالعه اوضتي اذاكر بعد اذنكم.. 

_واول ما طلعت اوضتها كانت مدايقه جدا من تصرفات جيلان معاها وسهولة مامتها في التعامل مع خالها وبنت خالها، وبعدين لقيت موبيلها بيرن برقم غريب، ردت وسكتت وجالها صوت انس اللي قال.. 

انس

علي فكره انا جيت اقابل جيلان عشان اشوفك انتي.. 

اتوترت جني وقالت

مم مين معايا؟.. 

انس

انس يا جني، بصراحه كده انا معجب بيكي وو.. 

جني بحده 

انت واحد مش محترم ولو كلمتني تاني انا هقول لجيلان انت فاهم ولا لا.. 

_قفلت في وشه وعملت بلوك للرقم وقالت لنفسها بضيق.. 

جني

انا ايه بس اللي جابني من البلد ياريتني كنت فضلت هناك عند عمتي ارحم من العيشه مع جيلان والاشكال اللي تعرفها دي.. 

ـــــــــ #بقلم_الكاتبه_رحاب_القاضي ـــــــــ 

_في نفس الوقت خلص اياد شغله ورجع البيت وكان عمال يغني بصوت وحش جدا.. 

اياد

أنا شاري هواك يا اسمر

بروحي، و فرحتي و عمري

و أيّام حلوة عشناها راحت و انقضت بدري

ياريت ترجع لياليها و أنا و أنت نعيش فيها

و القلب اللّي شغلتُه سنين بهواك، بهواك

لوّعتُه و ضيّعتُه و قلت فداك، فداك

لا أنا بشكي و لا بحكي بسّ قولّي يا حبيبي.. 

مريم راحتله بسرعه وقالت

مين دي هااا اصل انت شبه ابوك وابوك لما حبني كان اهطل زيك كده وبيغني لعبد الحليم.. 

معتز وهو بيتفرج علي التلفزيون

سيبك منها يا معتز وتعالي قولي انا، مين دي منه مش كده؟..

مريم 

نعممم طيب اقسم بالله يا اياد لو فكرت تخطب منه الصفرا بنت خالتك علا الصفرا لكون مطربقه البيت علي دماغ ابوك... 

معتز 

الله وانا مالي هو انا اللي هخطبها ولا هو؟.. 

اياد 

بااااس مش منه طبعا دي واحده كده جات عندي المكتب عايزاني اطلع معاها في برنامج بيتعمل علي النت، بصراحه اول مره واحدن تلفت نظري اووي كده.. 

مريم 

تعالي اقعد كده وقولي هتشوفها امتي تاني ولا هتعملو البرنامج ده امتي عشلن اجي معاك اشوفها؟.. 

اياد 

ميمي فين الغدا انا جعان.. 

طلع انس من اوضته وقال

انا عندي تدريب في النادي ما تيجو معايا ونتغدي كلنا هناك.. 

معتز بجمود 

روحو انتو انا مش عايز اروح مع حد... 

قعد انس جنبيه وقال

هدخل الامتحانات علي فكره وهنجح، وهتدرب برضو بس ما تزعلش مني.. 

قعد اياد جنبيه من الناحيه التانيه وقال

وانا لو ما نجحش هنزله ليك الحجز عندي.. 

معتز 

عارف يا انس اخرك معايا غلطه واحده وما تعرفش انا هعمل فيك ايه؟.. 

مريم 

خلاص طيب ربنا ما يجيب مشاكل نقوم يلا نجهز.. 

ـــــــــ #بقلم_الكاتبه_رحاب_القاضي ـــــــــ

_بعد كام يوم في الاسكندريه كان بهاء قاعد هو وبناته بيتغدو وناني ما كانتش موجوده.. 

بهاء

هي الهانم لسه بره البيت؟.. 

سما 

انا عارفه انها غلطت بس انت عارف ناني عنيده اووي واللي بتصمم عليه بتعمله وخصوصا في شغلها.. 

بهاء بضيق

خلاص خليها عنيده ومالهاش دعوه بيا.. 

ملك 

يا بيبو يعني انت مرتاح وانت زعلان من ناني، اومال فين كلامك انا مش برتاح غير لما اشوف عيونك يا ناني اصلهم بيفكروني بعيون المرحومه امك يا ناني... 

سما 

اهو طلع كلام وخلاص، طيب دي الصبح طلعت ودموعها ماليه عينيها.. 

ملك 

لا وكمان طول الليل يا حرام بتعيط ولا اكلت ولا داقت حتي بوق مايه.. 

بهاء بغيظ

ااه منكم يا بنات ندي انتو، انا اصلا هصالحها بس لازم تعرف انها غلطت لما عملت حاجه من ورايا.. 

سما 

مش هتتكرر تاني خلاص بقي قلبك ابيض.. 

بهاء

وانتي بكره تاخدي اجازه عشان محمد واهله اللي جايين وتقعدي تروقي البيت،وانا كلمت مكتب الخدمه هيبعت شغاله و.... 

سما 

والله عيب يبقي عندك تلات ستات بيوت ما جابتهمش ولاده وتجيب شغاله،احنا ما فيش شغلات هتدخل بيتنا... 

ملك 

ايوه احنا بنغير عليك ومش هندخل ستات غريبه البيت.. 

ضحك بهاء وقال

ههههه ماشي خلاص ابقي ساعدي اختك يا ملك انتي وناني... 

ملك 

حاضر وعقبااالي انا وامجد ياااارب.. 

بهاء

انا عايز افهم حاجه هو انتي ازاي حبتيه بسرعه كده؟.. 

ملك 

عشان هو يتحب بسرعه يا بيبو.. 

كتمت سما ضحكتها وقال بهاء

هو انا عرفت اربيها والله ما عرفت اربيها... 

ملك 

ايه ده يا بابا هو انت ربيت غيري اصلا المهم انا رايحه الشركه هاخد اجازه واجي علي طول.. 

بهاء 

لا طبعا مش هتروحي تاني غير لما يجي يخطبك.. 

سما 

 بابا لو سمحت بلاش ندخل الشغل في مواضيع شخصيه... 

بهاء اتنهد وقال

طيب خلاص هخلي خالد يستناكي ويوديكي ويجيبك.. 

ملك

لا انا هاخد عربية سما... 

سما 

ايه الهبل ده لا طبعا انا ما حدش هياخد عربيتي.. 

ملك 

يعني يرضيك يا بيبو كل واحده فيهم معاها عربيه الا  انا... 

بهاء

كلهم جابو عربيات من فلوس شغلهم مش مضيعينها علي الاكل والخروجات والرويات هاا.. 

ملك 

لازمته ايه بس الذول ده، انا داخله اغير هدوميي.. 

ودخلت ملك جوه وسما قالت لبهاء

في ايه يا بابا مالك، مش معقول الزعل ده كله عشان ناني راحت القاهره.. 

بهاء بضيق

ملك مش عارفه هي بتعمل ايه، والكلام ده بيني بينك انا مستحيل اجوزها لامجد.. 

سما 

نعمممم لا بالراحه كده فهمني ايه الموضوع؟.. 

بهاء

؟؟؟؟؟؟؟؟؟.. 

_بعد شويه نزلت ملك وكان خالد سواق باباها مستنيها، واول ما شافها فتحلها الباب وقال بجمود... 

خالد 

اتفضلي يا ملك هانم.. 

ابتسمت ملك وقالت

والله يا خالد انا في الدنيا دي كلها ما حدش عاملي قيمه غيرك.. 

خالد بجديه

اتفضلي يا هانم لو سمحتي عشان لازم الحق اروح لدكتور بهاء المستشفي.. 

ملك 

بطيتني وارتحت انت كده تلاقيه في عيالك يا خالد... 

_ركبت ملك وخالد قفل الباب وراح ساق العربيه ووداها الشركه، وكان كل شويه يبصلها في المرايه بنظره غريبه هي مش واخده بالها منها..

ـــــــــ #بقلم_الكاتبه_رحاب_القاضي ـــــــــ 

_في شغل ناني كانت واقفه مع التيم بتاعها وهي متعصبه وقالت.. 

ناني

يعني ايه يا رؤوف مش عارف تجيب حتت ممثله لسه صاعده اصلا، اومال احنا هنكبر ازاي.. 

رؤوف 

يا ناني وانا اعملها ايه بتقول عايزه مبلغ فوق اللي محددينه اصلا.. 

ناني 

في داهيه مش عايزين ممثلين خالص.. 

رانيا

انا من رأيي كده خلينا في التريند احسن، اي حد يطلع تريند احنا ننفرد بيه، زي الظابط اللي كان اسمه مالي السوشيال ميديا.. 

رؤوف

ايوه يا ناني هاتي رقمه وانا هتواصل معاه واجيبه.. 

ناني 

انت تسكت خالص يا رؤوف وتحاول تجيبلنا اي حد عشان الحلقه اللي بعد اياد معتز تمام... 

رؤوف بضيق

اوكي تمام يا ناني... 

_ودخلت ناني مكتبها الخاص وكلمت اياد، اللي رد عليها علي طول وقال... 

اياد 

ايوه مين معايا؟.. 

ناني 

حضرتك انا ناني اللي جيتلك من كام يوم و... 

اياد 

ناني الرقاصه.. 

ناني بعصبيه 

ما تحترم نفسك بقي، انا ناني بتاعت برنامج تريند... 

اياد بخبث

مش فاكرك بصراحه ممكن تفكريني بيكي اكتر؟.. 

ناني بحده 

هو ايه ده اللي مش فاكرني، يعني بعد المرمطه اللي حصلتلي عشان اوصلك وبابا اللي مخاصمني لحد النهارده وفي الاخر انت تقولي مش فاكرني اا.. 

اياد 

بااااس ايه يا راديو انا فاكرك والله هو انتي تتنسي انا بس بهزر معاكي.. 

اتنهدت ناني بغيظ وقالت

يعني هو ده وقته علي العموم احنا في انتظار حضرتك بكره انا بعتلك العنوان علي الوتساب وحضرتك ما ردتش عليا.. 

اياد 

ما انا تقلان عليكي.. 

ناني 

نعمممم؟؟.. 

اياد 

ااا قصدي ما اخدتش بالي علي العموم تمام بكره الساعه واحده الضهر هكون عندك..

ناني

اوكي وانا هبعت لحضرتك حد يستناك ويجيبك من اول ما تدخل اسكندريه.. 

اياد 

انتي اللي تكوني في انتظاري وبلاش فشخره ماشي.. 

ناني 

فشخرة ايه انا بجد مش فاضيه.. 

اياد 

وانا كمان مش فاضي يا تيجي انتي وتاخديني بعربيتك كمان ده لو كان معاكي عربيه، ولو مش معاكي هاتر اخدك انا بعربيتي... 

بصت ناني للفون بغيظ وقالت

اوكي في انتظار حضرتك... 

_خلصت كلامها وقفلت في وشه، وهو ضحك وقال.. 

اياد 

يخرب بيت تقل اهلك يا شيخه بس حقك والله... 

ردت عليه منه اللي جات وقفت جنبيه في البلكونه وقالت.. 

منه 

هي مين دي اللي انت كنت بتكلمها.. 

اياد 

 وهي مال خالتي؟.. 

منه

يعني؟.. 

اياد 

هي مش خالتي دي تبقي يعني مال امك يا منه.. 

منه بغيظ 

عادي بعني بسأل مش عايز تقول براحتك.. 

اياد 

ايوه براحتي وبعدين انتي دخلتي ازاي وعديتي كده بسهوله من ميمي... 

منه 

فتحلي انس وو.. 

مريم 

وانا جيتلك يا بت الصفراا.. 

منه 

طنط ممكن تغيري طريقتك دي؟.. 

مريم

ومالها طريقتي يا بنت الصفرااا.. 

اياد كتم ضحكته

خلاص يا ميمي منه جايه تطمن علينا... 

منه

انا جايه اطمن علي ابن خالتي وبس مش علي حد تاني... 

مريم 

بقولك ايه يا اياد والله يا حبيبي بتوع شركات التنضيف عملو كل حاجه تنضف البقع والسواد والغل، انا مستنياهم بقي يعملو حاجه ينضفو بيها الصفار عشان نخلص.. 

ضحك اياد بصوت عالي وقال

ههههههه قولتلك يا منه بلاش تيجي هنا، انتي ما بتسمعيش كلامي وبتيجي...

منه 

انا ماشيه وابقي تعالي يا اياد ماما عايزاك في حاجه مهمه... 

قالت كلامها ومشيت ومريم قالت

ابقي سلميلي علي امك علا الصفره هزعل لو نسيتي.. 

اياد 

خلاص مشيت يا ميمي كفايه عليها كده.. 

مريم 

عارف لو اتجوزت البنت دي هعلقك انت وهي.. 

اياد 

لا انا شكلي كده هتجوز من اسكندريه ايه رئيك.. 

مريم

شالله تتجوز من اخر الدنيا المهم تبعد عن الصفرا وبنتها... 

ـــــــــ #بقلم_الكاتبه_رحاب_القاضي ـــــــــ

_في شركة امجد كانت ملك واقفه عند شئون الموظفين، وفجأه لقيت امجد وقف جنبيها وقال.. 

امجد 

ازاي بس تيجي هنا وتطلبي اجازه وما تجيش تشوفي خطيبك.. 

ملك

بس هو لسه ما بقاش خطيبي وبابا قالي ما اتكلمش معاك خالص.... 

امجد 

ما تسمعيش كلامه عادي، وبعدين كلها اسبوع وهاجي اخطبك ويبقي زيتنا في دقيقنا.. 

ملك 

طيب هاتلي قهوه وتعالي نشربها هنا وبعدين امشي.. 

امجد 

ايوه بقي هو ده الكلام وهجيبلك دونات كمان وانا اللي هجيبهم بنفسي... 

_ومشي امجد من قدامها بس اتصدم لما لقي في بنت واقفه وبتبصله بعصبيه، رجع بسرهه لملك وقال.. 

امجد

امشي بسرعه من هنا يلاا.. 

ملك 

نعممم!.. انت بتطردني.. 

امجد 

هاا لا والله بس انا عندي اجتماع مهم بصي هخلي السواق بتاعي يوصلك.. 

ملك 

معايا سواق بابا تحت، انت كويس طيب.. 

امجد 

انا زي الفل يلا امشي انتي ولو محتاجه حاجه كلميني وانا هخلصلك كل حاجه.. 

ملك بضيق

علي فكره باين اووي انك بتوزعني، شكرا.. 

_مشيت ملك ونزلت تحت وهي مدايقه، وخالد كان واقف بره العربيه مستنيها.. 

ملك 

بقولك ايه انت كمان يا تفرد خلقتك عليا يا هروح لوحدي.. 

خالد 

انتي ليكي عليا اني اوصلك وبس انما لو هتتكلمي معايا ياريت يكون بطريقه افضل من كده.. 

ملك بدموع 

طيب وربنا لانا مروحه لوحدي يا رخم انت والحيوان اللي فوق بس... 

_خلصت  كلامها ومشيت بسرعه وخالد ضحك غصب عنه و؟.... 

ـــــــــ بقلم#الكاتبه_رحاب_القاضي ـــــــــ 

_في المدرسه اللي شغاله فيها سما كانت واقفه بتشرح للطلاب، وفجاه دخل محمد وقال.. 

محمد 

الله اول مره اشوفك وانتي عاقله.. 

سما اتفاجئت وقالت

محمد انت بتعمل ايه هنا؟.. 

محمد ابتسم وقال

جاي اتفرج.. 

سما بعصبيه

وحياة امك.. 

قام ولد من الطلاب وقال

العب يا ميس سمااا.. 

  •تابع الفصل التالي "رواية خطيبتي واخواتها التوأم" اضغط على اسم الرواية