رواية حب ابدي الفصل الثالث 3 - بقلم مجهول

 واية حب ابدي كاملة  بقلم مجهول   عبر مدونة دليل الروايات 

 رواية حب ابدي الفصل الثالث 3

طلع خالد وقالت ليلي لحسن بعصبيه

بيقول ايه المتخلف ده؟..

وقف حسن وراح قعد علي مكتبه وقال

ما تاخديش عليه، خير يا عروسه جايه ليه كده بدري عندي لحقت اوحشك

ليلي بعصبيه

جاتك وحش اما يلهفك، اسمع انا مش بتاعت جواز فاهم ولا لا؟..

حسن

ايه مش بتاعت جواز دي، عيب تقولي كده في بنت تقول علي نفسها مش بتاعت جواز

ليلي

بقولك ايه شغل المجانين ده مش هينفع معايا..

حسن

برضو عيب تقولي كده وانتي بتتعالجي عندي.

قربت منه ليلي وقالت

انت عايز مني ايه، تعرفني منين ولا تعرف عني ايه عشان تيجي تتجوزني..

حسن بهدوء

ما هي دي المشكله اني من اول مره شوفتك فيها وانا مش عارف افكر في حاجه غير فيكي..

ليلي بتوتر

ااا يعني هو انت اي حد يجي يكشف عندك تروح تتجوزو..

ضحك حسن وقال ليها

لا طبعا وانا بتكلم علي اول مره شوفتك فيها، مش علي اول مره جيتي فيها هنا..

ليلي

يعني ايه مش فاهمه؟..

حسن

اول مره شوفتك فيها في الكافي اللي بتروحيه ديما، ومن لما شوفتك بقيت اروح كل يوم بس عشان اشوفك من بعيد ولما جيتي هنا ما كنتش مصدق نفسي ان البنت اللي خايف اكلمها ترفضني جات هي لحد عندي، وكملت اكتر لما مامتك كلمتني وعرفت انك بنت طنط ماجده..

ليلي

انا مش هقدر ارد علي كلامك ده بالقبول خالص، انت ما تعرفش انا مريت بايه ومش مستعده اعيد تجربه فاشله تاني، فياريت تشيل الموضوع من دماغك..

جات تمشي بس قام حسن ووقف قدامها وقال بسرعه

ثواني بس هو مش انتي كنتي جايه تتعالجي عندي، ايه رئيك نعمل فترة العلاج دي واحنا مخطوبين واديني فرصه..

ليلي

لا طبعا و..

قاطعها حسن وقال

يا ستي اسمعي بس انا راجل دغري ومش بحب اللف والدوران، وكنت مستعد اقرب منك واخد الفرصه دي من غير ما انتي تاخدي بالك اصلا، بس لا ضميري ولا اخلاقي تسمحلي بكدا ودخلت البيت من بابه انا كل اللي طالبه فرصه ومش هضغط عليكي في حاجه بعدها..

ليلي

طيب انا هفكر وارد عليك

حسن

تمام وبكره هبقي اكلمك واخد الرد

ليلي

ماشي بعد اذنك

حسن بسرعه قال

استني بس هكلمك علي ايه، وانا مش معايا رقمك

ليلي

اولا انا مستحيل اديك رقمي واحنا لسه ما بقاش في بينا حاجه، تقدر تكلم ماما وتعرف ردي..

ابتسم حسن وقال

تمام يا ليلي، بس معلش بقي وانتي بتفكري عايزك تشوفي حسن بس مش الدكتور حسن..

ما ردتش عليه ليلي ومشيت وهو قعد يشوف شغله وكان كل ما يفتكرها يبتسم مع نفسه، ودخلت عنده مياده وقالت

مياده

سلامتك يا دكتور حسن انت بتضحك مع نفسك..

حسن

في ايه يا مياده، في ايه يا عملي الاسود..

مياده

العياده فضيت اروح ولا اقعد اونسك

حسن

روحي يا مياده شوفي عيالك رمياهم عند حماتك..

مياده

اكل العيش مر يا دكتور حسن، المهم البت الحلوه اللي جات الصبح دي عروسه صح؟..

حسن

انتي عرفتي منين، انتي بتتجسيي عليا يا مياده؟..

مياده

ابدا والله بس لما مدام الهام مامتك كلمتني فبقولها ان في بنت حلوه اووي لما بتجيلك و انت بتقلب سومه العاشق في نفسك، فقلتلي هي مين و..

حسن

اوعي تكوني قولتيلها اسمها

مياده

قولت اسمها عادي هو اسمها حاجه عيب

حسن

اعمل فيكي ايه يا شيخه، اوعي كمان تكوني قولتيلها انها بتتعالج عندي

مياده بخوف

ما هو يا دكتور حسن انت عارف اني طيبه واللي في قلبي علي لسااني..

حسن

روحي يا شيخه منك لله، امشي يا مياده..

مياده

طيب بكره حضرتك هتيجي الساعه كام؟

حسن

مش جاي خاالص يا مياده

مياده

احسن برضو اهو اخد اجازه من مجانينك

حسن بعصبيه

اطلعي بره يا ميااده،وبكره الساعه تسعه تكوني هنا في العياده قبل ما اوصل..

مشيت مياده وهو كان قلقان من ردة فعل مامته لما عرفت ان ليلي كانت بتتعالج عنده، واول ما رجع البيت لقي مامته قاعده مدايقه فقرب منها وقعد جنبيها وقال

حسن

مساء الخير يا ست الكل

الهام

عايز تتجوز مجنونه يا حسن، لييه يا ابني ناقصك ايه؟

حسن بضيق

ليلي مش مجنونه يا ماما، ومحدش بيتعالج عندي مجنون..

الهام

يا سلام يا اخويا اومال بيجو عندك ليه عشان بطنهم وجعاهم ولا يكونش عشان عندهم صدااع.

حسن

لا يا ماما هما بيجو عندي عشان في ناس مريضه نفسيه اذتهم وسببتلهم عقد، فبيجو عندي عشان اطمنهم واسمعهم كلام يريحهم واسمع مشاكلهم..

الهام

انا ماليش دعوه بالكلام ده، انا ابني يتجوز وحده تكون مش ناقصها حاجه، مش كانت مخطوبه تلات سنين والعريس هو اللي سابها وكمان مش مظبوطه..

ادايق حسن وقال لمامته

ماما انا لو ما اتجوزتش ليلي والله ما هتجوز حد خااالص تمام كده..

قال كلامه وساب مامته ودخل اوضته، وهي قعدت متعصبه وقالت بصوت عالي

الهام

اتجوزها يا حسن وشوف مين بقي اللي يحضرلك فرح ولا يدخلك بيت

تاني يوم كان حسن قاعد في العياده بعد ما خلص شغل ومتوتر جدا وجنب منه خالد صاحبه اللي قاله..

خالد

اهدي كده يا ابني وكلم الوليه واعرف رد ليلي ايه؟..

حسن

اسمها طنط ماجده ايه الوليه دي نقي كلامك..

خالد

خلينا احنا قاعدين وانت تديني درس اللهجات بتاعك ده، وخلي المزه تضيع منك..

حسن بغيظ

انت ايه اللي جابك عندي اصلا يا خالد، غور امشي..

خالد

طيب كلم الست وريحني ما تتعبنيش معاك..

اتصل حسن بماجده اللي ردت عليه وقالت..

ماجده

الو ازيك يا حسن يا حبيبي

حسن

الحمد لله يا طنط حضرتك عامله ايه؟..

ماجده

انا كويسه يا حبيبي طول ما انت بخير، كنت مكلمني عايز حاجه..

حسن بتوتر

هو يعني انا كنت عايز اسال حضرتك اااا هي ليلي قالتلك حاجه يا طنط

ضحكت ماجده علي توتره وردت عليه وقالت

هههههه ايوه قالتلي يا حبيبي..

حسن

طيب ما تطمنيني يا طنط بالله عليكي..

ماجده

هي جات وقالتلي يا ماما لو حسن كلملك وسالك عن رأيي قوليلو…. تفتكر قالتلي ايه يا حسن

حسن بغيظ

يا طنط الموضوع مش ناقص انا اعصابي في ذمة الله ارجوكي اتكلمي قالتلك ايه؟..

ماجده

ههههههه قالتلي انها موافقه يا حسن ارتحت كده..

حسن بفرحه كبيره

احلفي هي قالتلك موافقه ولا انتي سمعتي غلط ولا ايه؟

ماجده

هههه والله قالت موافقه، وهنستناك انت والست والدتك يوم الخميس عشان نقرا الفاتحه..

حسن

هو حضرتك فاضيه دلوقتي يا طنط؟

ماجده

ايوه يا حبيبي فاضيه مستنيه ليلي تيجي بس من الشغل..

حسن

طيب انا هعدي علي حضرتك اخدك انتي وعمو محمد في مشوار مهم..

ماجد

حاضر يا حبيبي مستنينك..

قفل حسن مع ماجده وساله خالد وقال

انت واخدهم فين اوعي تكون هتسوحهم بره وتنفرد بالبنت لوحدكم في البيت..

حسن

خالد كلمه تاني وهنهي الصداقه المقرفه دي انا بحذرك اهوو

خالد

طيب قولي رايح فين؟.

حسن

هروح اجيب الشبكه وبدل ما قراية فاتحه بس هتبقي خطوبه..

خالد

لا جامد يا ابو علي تربيتي والله، يلا تروح وتيجي بالسلامه..

حسن

طيب يلا انا ماشي ولا هتبات هنا؟..

خالد

بص انت امشي واقفل عليا والصبح تعالي افتحلي..

حسن

هو ده بيت اهلك دي عياده واكل عيش يا حبيبي، امشي يا خالد بات في بيتكم..

خالد

مانا ابويا طردني عشان كلتله الجيبنه اللي بعتاها جدتي من البلد وخلصت الفطير وهو اتعصب وطردني..

ضحك حسن وقال

ياعم روح هات ليه ربع كيلو بسبوسه بالقشطه وهو هيبقي زي الفل انتو عيله بتاعت بطنكم..

مشي حسن وراح جاب اهل ليلي وبعدبن خدهم وراح عند شغل ليلي وسابهم في العربيه ونزل راحلها..

ليلي

انت بتعمل ايه هنا؟..

حسن

انتي شغاله ايه هنا، وانا اللي كنت فاكرك شغاله حاجه مهمه..

ليلي

انت بتعمل ايه هنا يا حسن؟..

حسن

خدي اذن يا بشمهندسه عشان مامتك وباباكي معايا تحت وعايزين نروح مشوار مهم..

ليلي

انت بتهزر، ماما وبابا معاك تحت ازاي؟..

حسن

انتي لسه هترغي يلاا يا ليلي بسرعه..

_راحت ليلي استئذنت ونزلت ركبت جنب مامتها ورا وصابر كان جنب حسن اللي اخدهم وراح محل دهب وقال..

حسن

عايزك بقي يا ليلي تنقي شبكه حلوه بس بلاش افتري انا لسه عندي شقه هتتظبط ومصاريف فرح وليله كبيره..

ليلي

انت مجنون وربنا مجنون هي مش كانت قراية فاتحه..

حسن

خير البر عاجله يا ليلي، نعملها خطوبه بالمره ومش هنخسر حاجه..

ليلي

بس علي فكره بابا وماما مش هيوفقو اديني بقولك..

جه محمد وقال ليها

ايه رئيك في الخاتم ده يا حبيبتي..

ماجده

السلسله دي جميله اووي..

ابتسمت ليلي علي حماس اهلها واختارت الشبكه، وجه يوم الخطوبه وكان حسن لابس بدله شيك وشكلها حلو، وراح اوضة مامته لاقاها قاعده زعلانه..

حسن

هتسبيني اروح لوحدي يا ماما..

الهام بحزن

وفيها ايه ما انت روحت جيبت الشبكه وعملت اللي في دماغك يبقي وجودي معاك مالوش لازمه..

حسن

يا ماما اقسم بالله ليلي دي طيبه اووي وست العاقلين وبعدين ابنك بنفسه دكتور يعني عارف اذا كانت طبيعيه ولا لاا، وحضرتك شوفتيها وكلمتيها كتير هل لاحظتي انها فيها حاجه غلط..

الهام

اومال كانت بتتعالج عندك ليه؟..

حسن

كانت عندها مشكله في النوم وشوية ارهاق وجاتلي عشان حد معرفه ليهم وواثقين فيا..

الهام

اووف انا مش باخد معاك لا حق ولا باطل استناني بره هلبس واجي اروح معاك..

حضنها حسن وقال

ربنا يخليكي ليا ويباركلي في يا ست الكل..

وبعد شويه كانت ليلي قاعده في اوضتها لابسه فستان جميل عشان الخطوبه، بس متوتره وخايفه من اختيارها، قعدت ماجده جنبيها وقالت

ماجده

انا عارفه انك قلقانه بس صوابعك مش زي بعضها يا بنتي وحسن ابن ناس ومتربي ومش هيعمل زي اللي ما يتسمي..

ليلي

عارفه يا ماما انا وافقت ليه علي حسن، عشان هو الوحيد اللي عرف يخليني ابطل افكر في عمار زي الاول وحتي لو فكرت فيه بلاقي فجأه حسن جه في بالي وخلاني ما ازعلش بالعكس بضحك وبكون مبسوطه من اقل حاجه تحصل بينا..

ماجده

ربنا جبر بقلبك وطبطب عليه بحسن، بعتلك العوض في حسن عشان كده قدرتي بيه تنسي عمار

ارتاحت ليلي بالكلام مع مامتها وجه حسن ولبسها الدهب، وكانت مبسوطه لاول مره من سنين وبرضو هو السبب..

قرب منهم خالد وقال

مبروك يا عريس، الف مليون مبروك يا مرات الغالي..

ليلي لحسن

مين البني ادم ده؟..

حسن

ده خالد صاحبي من الطفوله واجدع حد عرفته في حياتي..

ليلي

اهلا وسهلا يا استاذ خالد

خالد

احب اقولك يا انسه ليلي انك اختارتي احسن دكتور مجانين فمصر..

حسن

خلاص يا خالد الله يبارك فيك روح اقعد

خالد

ومش بس كده حسن ده ادب واخلاق واحترام، ده متربي عشر مرات ده، تحسي اهله كانو كل ما يربوه ينسو فيربوه تاني..

ضحكت ليلب وقال حسن بغيظ

روح امشي يا خالد ارجع بيتكم انا غلطان اني عزمتك..

ضحك خالد ومشي وقال حسن لليلي

بتضحكي علي ايه، ده رخمم

ليلي

بس باين عليه انه بيحبك اوي..

حسن

لا ما انا اتحب برضو، بس افتحي انتي قلبك ومش هتندمي..

اتوترت ليلي وقربت منهم الهام وقالت

الف مبروك يا حسن، مبروك يا ليلي..

ليلي

الله يبارك في حضرتك يا طنط…

الهام

خلي بالك من حسن، ده بيحبك اووي علي فكره

ابتسم حسن لمامته وقال

وبحبك برضو اووي يا اجمل ام في الدنيا..

_ابتسمت ليه الهام ورجعت قعدت مكانها وقررت انها تسيب ابنها يفرح، وان المهم عندها انه يكون مبسوط..

وبعد شهر من الخطوبه كان حسن قاعد في الكافي مستني ليلي اللي جات وقعدت قدامه وقالت

ليلي

نعم قولت عايزني ضروري خير

حسن

يا ليلي اقسم بالله انا خطيبك مش حد من الشارع او غريب عشان تعامليني كده، ده انا حتي لما باجي ازوركم بتسلمي عليا وتسبيني العب طاوله مع باباكي وتدخلي اوضتك

ليلي

بص يا حسن انا بصراحه قلقانه من الخطوبه وخايفه ومش هقدر اكمل دلوقتي ومحتاجه وقت تاني افكر…

حسن بحزن

وانا مش هفرض نفسي عليكي..

قامت ليلي عشان تمشي بس اتصدمت لما لقيت عمار قدامها وقال..

عمار

ليلي كنت حاسس اني هشوفك هنا عامله ايه؟..

ليلي بهدوء

تمام الحمد لله، وانت؟..

عمار

للاسف خسرت كل حاجه شغلي ومراتي سابتني واطلقت وحرمتني من ابني ودلوقتي رجعت مصر وناوي ابدأ من جديد، انتي بقي لسه زي ما انتي صح؟.

ليلي

لا طبعا زي ما انا ازاي، انا ااتخرجت وبقيت بشتغل في شركة هندسه كبيره وو واتخطبت صح يا حسن..

حسن كان قاعد بيبصلها بهدوء، ووقف جنبيها وقال بخبث..

حسن

مش كنتي مش قادره تكملي من شويه؟..

ليلي بغيظ

اخرس خاالص، اعرفك يا عماار دكتور حسن خطيبي..

عمار بضيق

اتخطبتي مبروك..

حسن

هنبقي نعزمك علي الفرح الشهر الجاي ان شاء الله اوعي ما تجيش..

ليلي

فرح مين؟..

حسن

فرحنا يا حبيبتي ولا اا…

ليلي

ايوه ايوه فرحنا طبعا يا حبيبي، يلا بينا بقي عشان توصلني اتاخرت علي البيت..

حسن

طبعا يا حبيبتي يلا بينا..

اول ما طلعو بره الكافي زعقت فيه ليلي وقالت

انت بتستهبل وبتستغل اني مش هقدر ارفض وتدبسني في فرح بعد شهر

حسن

انا اللي استغليتك برضو ولا انتي ، بس القرار ليكي انا مش هفرض حاجه عليكي..

ليلي بهدوء

عارف انا كنت خايفه اشوفه وكنت ديما بدعي ان ما تجيش صدفه تجمعني بيه، بس النهارده لما شوفته لقيت ان انا عادي مش موجوعه زي زمان..

حسن

وايه اللي اتغير بقي؟

ليلي

انت، انا من لما قابلتك وانا بقيت احسن من الاول، دلوقتي وجودك جنبي هو اللي خلاني ابقي قويه قدامه وما ابقاش ضعيفه..

قرب منها حسن وقال

بحبك يا ليلي والله العظيم بحبك..

ليلي ابتسمت وقالت

والله شكلي كده انا كمان اتنيلت وحبيتك وهوافق علي الفرح اللي بعد شهر ده..

طلع حسن موبيله وقال

من الاول بقي قولي كده تاني عشان انا ما اضمنش ممكن نرجع البيت تغيري رئيك وانا لازم يبقي معايا دليل..

ليلي بغيظ

لا مش هستني ارجع البيت انا غيرت رأيي خلاص يا مجنون انت..

مشيت ليلي وحسن ضحك وراح وراها وقال

استني هنا يا بت انتي، والله لهتجوزك يعني هتجوزك..

_ربما صدفه خير من الف معاد، ربما صدفه تكون هي الجبر لقلوبنا علي كل وجع شافته، ربنا كريم اووي وعلي قد ما هنصبر علي قد ما هننول

_خلصت حكايتي الصغيره كده ويارب تكون عجبتكم ❤❤🙈

• يتبع الفصل التالي اضغط على (رواية حب ابدي) اسم الرواية