رواية عريس اونلاين (كاملة جميع الفصول) حصريا عبر دليل الروايات بقلم منار العتال
رواية عريس اونلاين الفصل الخامس 5
روايه "عريس اونلاين"
الفصل الخامس
بقلمى /منار العتال
تيم بغضب:انتى بتكلمينى انا كده؟؟؟؟
روان ركزت فى ملامحه و فى صوته و عرفت انه تيم و بلعت ريقها بتوتر :تيم !!! يا باشا إللى ما يعرفك يجهلك عيل و غلط
تيم بغضب:انتى ازاى تقوليلي روح امك !!!
روان :لا انا قولت بروح امك مش روح امك متقولنيش كلام انا مقولتوش
تيم :وهى تفرق روح امك من بروح امك؟؟؟
روان :اه تفرق
تيم :و تفرق اى ؟
روان:دى بالباء و التانيه من غير و بروح امك يعنى انت روحك فى امك اما روح امك ف دى مدح فيك لان كده انت روح امك و
تيم بدهشه:انتى مستوعبه انتى بتقولي اى و لا انتى هبله ؟
روان:ما هو انت إللى شكلك اتغير يعنى كنت اعمل اى ملاحظتش ان انت
تيم حاول يمسك اعصابه و افتكر كلام مراد معاه انه يعاملها كويس
تيم بابتسامه:خلاص انسي خدى الورد ده
روان بابتسامه:ده علشانى !
تيم بضحك:لا لعم شوقي
ضحكو الاتنين سوا و فتح تيم باب عربيته علشان روان تركب جنبه و ساق
تيم :ساكته لي؟ لسه خايفه منى؟
روان بضحك: بصراحه انت شكلك اتغير خالص مش متخيله ان انت تيم اصلا حساك واحد تانى
تيم بابتسامه:طب ودلوقتى احسن و لا قبل كده ؟
روان بخجل:احم مش لازم اجاوبك يعنى
تيم فهم انها مكسوف و اكتفي انه يبتسم و سكت وحب فيها خجلها ده
تيم وقف بالعربيه قدام مطعم فخم
تيم:يلا انزلي
روان بدهشه:احنا هنقعد هنا؟
تيم:اه يلا انزلي من العربيه
نزلت روان من العربيه و كانت هتتكعبل بسبب الهيلز إللى كانت لبساه بس تيم مسحها بسرعه قبل ما تقع و روان اتأخرت و حست ان قلبها هيخرج من مكانه من كتر ما هو بيبنبض بسرعه و بعدت عنه بخجل و كملوا مشي لحد المطعم و طلعوا قعدوا على طربيزه كانت متزينه بالورد الاحمر و الابيض و روان انبهرت و قعدت على كرسي و الابتسامه مش بتروح من وشها
تيم :احم تشربي اى !؟
روان :اخاف اقولك نسكافيه تنادى بعم شوقي
انفجر تيم من الضحك لدرجه ان كل إللى قاعدين حواليهم كان بيتفرجوا و روان للحظه سرحت فى ضحكته ولاحظت ان عنده غمازه و انه احلي بكتير من غير الشنب و الدقن
تيم وقف ضحك و بص ل روان تانى
تيم:روان ! يا روان ؟
كانت روان سرحانه فيه
روان:هاا؟
تيم:سرحانه فى اى ؟
تيم :طب تشربي اى بجد؟
روان بخجل :خلاص اشرب هوت شوكليت
نادا تيم للجرسون
-اؤمرنى يا فندم
تيم:عاوز واحد قهوه مظبوطه وواحد هوت شوكليت
-تمام
غادر الجرسون و بعد دقايق جاب الطلب
تيم لاحظ ان روان ساكته ف قال يتكلم هو
تيم :ساكته ليه ؟
روان :هقول اى ؟
تيم بتوتر:مش عاوزه تعرفي انا جبتك هنا ليه ؟
روان :ما انت قولتلي علشان تعتذرلي
تيم بنفى:لا و حاجه كمان مقولتلكيش عليها بصراحه
روان بعدم فهم:حاجه كمان اى ؟
تيم بتوتر:بصراحه انا انا انا
روان بضحك:تيم انت علقت؟! انت اى ؟
تيم :بصي انا مش هقولك انا بحبك ! علشان انا بحب الصراحه بس انا معجب بيكى و فيكى حاجه شدانى ليكى معرفش اى هى ف كنت عاوز يعنى منترعش فى جواز يعنى الأول نكون اصحاب و نعرف عيوب بعض و نعرف بعض اكتر انتى اى رايك ؟ و معنديش مانع على فكره نعمل خطوبه و نبقي اصحاب و نتعرف على بعض برضو بس نطول الخطوبه
روان :انت على فكره قولت الكلام إللى انا كنت عاوزه أقوله ومتفقه معاك فى كلامك
تيم بنتهيده:كنت خايف ترفضي
روان بابتسامه:هرفض ليه يعنى ؟
تيم :مش عارف بس سيبك انتى هنعمل خطوبه امتى ؟
روان بتفكير:مش عارفه بس لو عاوز تتكلم فى الموضوع ده قول ل بابا و اتفق معاه
اومأ تيم رأسه بابتسامه واتعشو سوا و خرجو من المطعم
تيم :تعالى هوصلك يلا
روان :ما انا ممكن اطلب اوبر عادى
تيم بتكشيره :ليه هو انتى كنتى خارجه مع سوسن و لا اى ؟
روان بضحك:مقصدش بس
تيم بصرامه:انا قولت هوصلك يعنى هوصلك
روان :خلاص إللى تشوفه
ركبت روان معاه العربيه وفضلو ساكتين لحد ما وصلها للبيت
تيم بابتسامه:تصبحى على خير و متنسيش انا هاجى بكره و هجيب معايا اهلي و نتفق على ميعاد الخطوبه
روان بابتسامه:تمام
نزلت روان من العربيه و طلعت البيت وهى مبسوطه من قلبها متعرفش هى حبيته و لا لا بس هى حاسه انها مرتاحه
....
كان مراد قاعد فى أوضة تيم بيلعب بلاي استيشن
دخل تيم الاوضه و قلع جاكت بدلته و اترمى على السرير
مراد:هاا احكيلي عملت اى !؟
تيم بابتسامه:اتفقت معاها انى هجيب اهلي و نتفق على ميعاد الخطوبه بكره
مراد بفرحه:بجد؟؟و هى وافقت
تيم:ايوا بس قولتلها انى مش بحبها و انى معجب بيها و نكون اصحاب طول فتره الخطوبه و نطولها
مراد بتكشيره:ازاى يعنى ؟ مش بتحبها بس هتخطبها و مخطوبين بس اصحاب دى جديده دى انا اسمع عن إللى مرتبطين يقولو خلينا اصحاب بس مخطوبين و اصحاب دى ازاى؟
تيم :احنا لسه معرفناش بعض كويس ف لازم الأول نبقي اصحاب و نفهم بعض لو حبينا بعض تمام هنستمر لو لا ف هنستمر اصحاب برضو مخسرناش حاجه و هى اتفقت معايا فى الكلام ده
مراد:انتوا الاتنين مجانين والله
تيم بغضب:ولااا احترم نفسك
مراد:بهزر يعم بس المهم هتقول ل مامتك و ابوك ازاى
تيم بتفكير:هحاول اقنعهم بس دلوقتى عاوز انام انا جعان نوم مش قادر
فى صباح اليوم التالى .....
كان تيم قاعد على السفرة وسط باباه و مامته و مراد
تيم:احم
صفاء:فى اى يا تيم انت قاعد تحمحم من الصبح
عز رشوان :ما تتكلم يا ابنى !
تيم بتوتر:بصوا انا عاوزكم تيجو معايا النهارده علشان هخطب بس منافق على ميعاد الخطوبه النهارده
صفاء :انت لسه بتفكر فى البنت دى ؟؟؟
تيم :يا ماما ما انا قريت فاتحه اصلا
عز :لا فهمونى الموضوع انا مش فاهم حاجه
صفاء:سيادته راح قرأ فاتحته على واحده من غير ما يعرفنا و دلوقتى عاوزنا نروح نتفق على ميعاد الخطوبه
عز :الكلام ده بجد يا تيم ؟
تيم :ايوا
عز بابتسامه:الف مبروك يا حبيبي
صفاء بغضب:انت بتباركله على اى ؟؟؟؟
عز:الواد عاوز يخطب يعنى فيها اى معملش حاجه حرام يعنى
صفاء :يعنى انا دلوقتى إللى غلطانه؟!!
تيم:يا ماما محدش قال انك غلطانه بس انتى عاوزانى اتجوز فريده دى و انا مش بطيقها
صفاء بغضب:اخرس يا قليل الادب دى فريده دى ست البنات
عز:ما تسيبي الواد يعمل إللى هو عاوزه هو مش صغير و الجواز مش بالغصب
تيم :ايوا كده يا بوب والله بحبك
عز بضحك:المهم هنروحلهم الساعه كام ؟
تيم بابتسامه:على الساعه ٨ كده بعد المغرب
عز :تمام على بركه الله
صفاء:انا مش موافقه و مش جايه
عز :هو انتى مش موافقه على اى هو انتى شوفتى البنت دى الأول يعنى؟؟
صفاء:هو كده مش موافقه و خلاص
عز:خلاص براحتك هروح انا و تيم و مراد
تيم :بس يا بابا
عز :اسكت انت دلوقتى
تيم سكت و صفاء قامت من على السفرة و هى متعصبة
تيم:هنروح من غير ماما ازاى بس ؟
عز :انا عارف امك كويس هى متعصبة بس دلوقتى لكن هى هتيجى لما تهدى
كانت روان بتحضر نفسها و بتنضف البيت مع مامتها علشان لما يجى تيم و عيلته و تسنيم صاحبتها كانت بتساعدهم
عند الساعه السابعه و النص كان تيم جهز نفسه و لابس بدله سوداء انيقه و حاطط بيرفيوم و لابس ساعته و كان مراد برضو مجهز نفسه و عز و كانوا بيركبوا العربيه لولا ان صفاء وقفتهم
تيم بابتسامه:اخيرا هتيجي معانا
صفاء :مش معنى انى جايه انى موافقه و كمان هنعدى على خالتك سمر و فريده ناخدهم معانا
تيم بصدمه:و اى دخل فريده و خالتى فى الموضوع؟؟ احنا رايحين نتفق على ميعاد الخطوبه
صفاء:مش خالتك و فريده دول من العيله؟؟؟و لو هنا محضروش يبقي انا مش هاجى
تيم بتافف:خلاص يا ماما إللى تشوفيه
ركبوا سوا و مراد كان مخنوق من وجود فريده هو و تيم
وصلو قدام بيت روان و طلعوا و تيم خبط و فتح صلاح و رحب بيهم جدا و قعدوا فى الصالون
كانت فريده بتبص للبيت بقرف هى وسمر مامتها و منى لاحظت ده بس قالت متتكلمش علشان ميحصلش مشاكل
خرجت روان من اوضتها تقابل تيم و عيلته
تيم بابتسامه:اهى دى روان يا بابا
عز بابتسامه:ماشاء الله ذي القمر
روان بخجل:تسلم يا عمو
تيم ل مامته: دى روان يا ماما
صفاء بقرف:اه طيب
استغربت روان رد فعلها بس تيم شوشره على الموضوع و عرفها ب خالته و فريده و برضو بصولها بقرف
منى و تسنيم و صلاح و روان كانوا قاعدين مستغربين نظرات فريده و صفاء و سمر
فريده كانت قاعده بتبص على تيم إللى قاعد لديها ظهره و روان كانت ملاحظه و على آخرها
تيم:طيب يا عمى احنا كنا عاوزين نشوف يوم مناسب نعمل فيه الخطوبه
صلاح:انا من رايي يوم الجمعه الجايه يعنى الاسبوع الجاى يبقي كويس و لا اى ؟
عز بابتسامه:انا موافق
تيم بابتسامه:خلاص يبقي تمام
عز :طول عمرك بتعرف تختار يا تيم
فريده بغيظ:طول عمرك يا تيم اختياراتك بلدى
فى اللحظه دى روان مستحملتش تسكت و قامت بغضب
روان:بلدى اى ياما !!!! انتى مش شايفه نفسك يا عود الكبريت انتى ؟؟ قاعده من ساعه ما جيتى تبصيلي بقرف انتى و امك !! اوعي تفكرينى غلبانه بقي و هسكت لااااا فوقي يا حبيبتى بدل ما افوقك بطريقتى انا مش من جاردن سيتى ياما
يتبع....
•تابع الفصل التالي "رواية عريس اونلاين" اضغط على اسم الرواية