رواية هلع كاملة بقلم اية عبر مدونة دليل الروايات
رواية هلع الفصل الخامس 5
خش احمد وكان ينادي على سالمة
سالمة>> ايوه ايوه “ونزلت من فوق”
أحمد >> تعالي نبيك
سالمة>> شنو ؟
أحمد >> حكيت مع باتك وموسى على موضوع حسن
سالمة سكتت
أحمد>> وماحدش قال شي كلهم اصلا كانو حاسين انه الحكاية طولت
سالمة >> يعني خلاص ؟
أحمد >> حسن ما حكيتش معاه عشان ما نخربلش وجه بس حكيت مع خوته و فهمو عليا وخلاص
كان عندك حاجه بترديها له لميهن ليا
سالمة>> كله دبش واستعملته عطيه بدالهن فلوس
احمد >> تم تم حنكلم خوه الكبير ونتفق معاه
سالمة >> باه
ركبت فوق وبكت على رنت حسن ، ورغم تهديد احمد بس ما قدرتش انها ما تردش
حسن >> مانبيش نسمع منك شي انا اطلعيني عيل وادزيلي عمك يحكي مع خوتي ؟ وينفتر ويهزب ؟ شن يحساب روحه وانتي اصلا شن تحسابي روحك
سالمة >> انا وين كان عقلي قاعده معاك قريب خمس سنين ؟
حسن>> انتي ماحدش اصلا ح يبحت فيك غيري ولا حد حيتحمل الزن و النكد متاعك احمدي ربك اصلا اني درت خطوة رسميه ! انا اللي وين كان عقلي
سالمة صكرت الخط وقعدت مصدومه في كيف شخص ضحكت معاه وفرحت معاه وحباته من قلبها وكانت تشوف فيه انه هو الانسان اللي ح تعيش معاه حياتها يتخلى عليها بكل سهوله !
مسكت تلفونها و طلعت الشفرة كسرتها عشان كانت عارفه حسن لو يبي يوصل فيها حيوصل دابينه رقمها عنده .
//
عند موسى
خش للحوش و ميرا ما لهش حس
موسى >> ميرا !
ميرا>> هناا
مشى شور الدار كانت مصبيه قدام الدولاب
موسى>> مدلها الاوراق ، سجلتك الاسبوع الجاي تبدي
ميرا >> والله ماداروش قصة على التوقيفة
موسى >> لا بس ماتقعديش تغيري فالتخصص كل شويه
ميرا>> لا هضا كان زمان وقت كنت رايقه حاليا نبي ندف روحي عشان نكمل بس
موسى حط مفاتيحه >> شن كنتي اديري
ميرا>> نوازي في دبشي
موسى سكت حط تلفونه فالشحن و طلع يصلي
طلعت ميرا للصالة>> معنديش دبش
موسى>> والعرم اللي كنتي مطرطشتيه فالدار
ميرا>> كله قديم بكل ماتنسش اني ما شريتش دبش اصلا قبل ما نجوز
موسى>> انا خاطري نعرف ليش ديما تحكي وانتي متعصبه ووالعه ، ماعندكش دبش تو نطلعو نشرو انتهي الموضوع
ميرا >> والله ما انا الوالعه انت اللي فيك برود زايد
موسى >> ميرا مروح من الشغل و راسي مصدّع و تيّح صدعلي راسي فالطريق ف ماتنرفزينيش
ميرا>> ياريت تيح كان بنت را اجوزته نحس هو الوحيد اللي ح يتحملك
موسى غمزلها >> مازلنا فيها هو معندش خوات بس عنده بنات عم
ميرا بحتت فيه لانه اول مره يحكي هكي فالعاده كانت لما تنرفزه وتقوله شوف غيري يسكتها ويتنرفز ويصبي يطلع
موسى بعد ما ميرا سكتت و قعدت تبحت فيه >> شنو زعلتي ؟
ميرا >> لا براحتك ” وغيرت الموضوع” دزت امك غدا راه مع عمي احمد مبدري فالكوشه لو تبي
موسى ابتسم عشان عرفها اتهرب >> وانتي ؟
ميرا>> مش جيعانه
موسى>> ياربي علي سيرة مش جيعانه هذي انتي شايفه وزنك كم قعد ؟
ميرا>> عادي خير ما يقعد وزني زايد
موسى>> بس انا مانحبش الرق
ميرا >> بس عليا انا مش سمح السمن ” سكتت شويه” وبعدين انت شن عندك فيه بيش تحب ولا ماتحبش ننقص الروحي ونسمن الروحي
موسى ضحك >> اوكي كولي عشان صحتك مش عشان وزنك
ميرا>> حطلعني بعدين ؟
موسى>> ما بطلي زن وخليني ناكل ونتريح شويه ونطلعو
ميرا>> اوكي معناها حناكل من برا
موسى>> اللهم طولك يا روح
خشت ميرا تكمل في عقاب دبشها وموس اتكى ورقد بدون ما ياكل
//
//
عند البنات عالمغرب هكي
سما >> نحس فراسي ثقيييييل بكل
روان >> نديرو قهوة
سما >> ياريت
نزلت رندة من فوق
روان>> حبي نحسبك فقهوة؟
رندة >> احسبيني
سما >> سالمة مانزلتش بكل
رندة>> مكملتها بكا راسي صدّع منها
سما >> كنها شن صار ؟
رندة >> فركشها عمو احمد مع حسن ماهو
سما>> باهي ما هضا لي تبيه
رندة>> سما عاد خسارة مانك شاهده على كل حاجه حسن اول حب السالمة ماعرفتش غيره وماحبتش غيره ومش حاتحب حد كيف ما حباته حاسه كأنه غدر بيها قاعده متلخبطه ما فهمتش كيف نواسيها
سما>> ياربي تو نشربو القهوة ونركبلها
طلعت روان بالسفرة >> شن في
رندة>> على سالمه فركشت مع حسن رسمي
روان>> يييييييه عليك قصة
سما >> روان كلمتي ميرا لقيتها رانه عليا مبدري وانا راقده
روان>> اه قالت لي بتطلع للسوق هي وموسى و بتكي هنا
سما >> والله شن بتشري
روان>> ما ردت سجلت فجامعة سجلها موسى اليوم قالت لي معايا انا ورنده
سما >> احسن شي انه معاكن بيش ماتقعدش بروحها
روان>> اه موسى يحسابها بتغير تخصصها بس بعد لقاها بتكمل لغات ف سجلها على طول عشان معايا و برضو رندة مش بعيده من كليتنا
رندة>> ماعنديش خلوق نبدا بكل ونحق وجه زياد
سما >> ومن هضا زياد عاد كنكن معش تحكن لي
روان >> هضا زيادة المكلوب المشكله انه حكينا عليه قدامك غير انتي ديما عقلك مش معاك
اللي كان يجري وراها ويلحق فيها من مكان المكان
سما بحتت في رندة >> وانتي ليش ما تبيش
رندة>> خفييييييييف يجري ورا البنات كلهن درهلي كبدي المشكله كل ما نخش محاضرة نلقاه منزل نفس المواد و البريك متاعي نفس البريك متاعه وداير روحه طيب ويبيني مدررره ام كبدي
سما >> اهم شي مش دايرلك مشاكل خليه والله يجري تو يتعبن كرعيه و يوقف
روان>> المشكله انه لا شكل لا عمل ما فهمتش كيف يبيها وواضح انها م تبيش ومش طايقته وبرضو مصمم
سما >> خلوني نركب نشوف سالمة فكني من سيرة زياد ما زياد
رندة>> بعدها تقول كنكن ما تحكن لي
سما ضحكت وخشت مع الباب جاها مسج من رسلان
” برضو ما تبيش تردي عليا ”
صكرت سما تلفونها وتنهدت وقفت فنص الدروج وتفكر في رسلان مرات يطلع شخص كويس وحينظلم معاها ! بس في نفس الوقت هي مش حتريح لو ما حلتش قضية باتها و عرفت من الي طرطشهم وخلا امها تفقد عقلها و حوشهم يصكر و اختها تجوز غصب عنها الولد عمها وبدون عرس ولا شي بس عشان بحجة انه يتريحو عليها وهي برضو تنخطب الاول حد يجي وكل حد يبي يخلي مسؤوليته منهن ، مافيش استقرار مافيش راحة مافيش اي جهد الاي شي فالحياة !
ركبت سما السالمة اللي كانت منهارة بطريقتها
سما >> شن فييه بس
سالمة>> انا قاعده تحت تأثير الصدمة ! مش حانحب في حياتي كيف ما حبيت حسن مش قادره نجاوز اسلوبه معايا وكلامه وكيف تخلى عليا بسهولة معقولة خمس سنين وهم؟ كيف قدر بس
سما >> سالمة مانبيش انكد عليكي الي فيك سادك بس خوذيني انا ك ابسط مثال، شفتي حياتي كيف كانت ! شفتي السعادة لي كنا فيها انا وميرا كان عندنا اب ما يقولش لا على شي نلبسو احسن لبس نطلعو ف اي وقت خشينا احسن جامعات ادلعنا دلع مستحيل حد يتخيله شن صار بعدها ؟ امي انجنت وباتي مات لا وخويا اللي مازال ما شاف شي غارق بدمه
سالمة >> و شن صار بعدها ؟ قدرتي اتخطي قدرتي تعيشي حياة طبيعيه ؟ ديما سارحه وعقلك مش معاك و نسيتي روحك ونسيتي حياتك وعقلك كله في القضية و في امك و في ميرا اختك ، ما يتقارنش اللي انا فيه باللي انتي فيه بس برضو مش حانقدر نحب حد بعد حسن
سما تنهدت>> لا ماتقوليش ما يتقارنش كل حد عنده حاجات يأثرن عليه ممكن انتي صح ماحد مات عندك بس الوجع الي عندك كبير عادي مش شرط تفقدي حد بموت الفقد يجي على اشكال واجد وانا فاهمه عليك وحاسه بيك عشان هكي نقولك ح تحبي صدقيني وانتي اساسا تنحبي من بس اللي يشوفك وما يطيحش بوجه
سالمة ابتسمت >> ربي يخليك ليا ويفرح قلبك ونشوفك مع اللي يريح بالك يارب
على رنت رسلان ، سالمة ابتسمت ، بحتت فيها سما >> فكينييييي من النظرات هذينا
سالمة>> وراس سيمو تردي عشان خاطري كان تبيني ننزل معاكن ونهدرز لوطا ردي
سما غمضت عيونها وردت
سالمة وشوشت >> انا لوطا كملي والحقيني “ونزلت”
سما >> الو
رسلان >> لعند امتى هكي ؟ مش طالب منك شي غير تردي لما نرن بس
سما >> رسلان معنديش طاقه والله العظيم اني نحكي معنديش جهد من اول مكالمة قتلك وفهمتك كل شي
رسلان ابتسم>> بالفتحة مش بالكسرة ، ياستي ردي بمسج عادي راضي
سما >> حتتعب والله مازلت فالبداية فركش كل شي و شوف بنت حلال تعطيك الاهتمام
رسلان>> ومن قالك اني ناقص حنان
سما >> ها امالا عليش ترن عليا ؟
رسلان>> بنطمن عليك مثلا !
سما تنهدت>> انت مش بس حتتعب لا وح اتعبني
رسلان ضحك >> روان وين
سما ابتسمت >> لوطا صاحبك حذاك ولا شن؟
رسلان>> لا بس حاسه تلخبط من يوم شافها
سما >> مانكذبش عليك عزقت دوس الروان قالت لي محد مهتم
رسلان ضحك بصوت عالي >> تحكي جد
سما >> حرام عليك ما تقولش
رسلان >> لا عادي الصقر هضا ما يهزه شي
سما >> بنصكر انا بننزل للبنات
رسلان تنهد >> ومش حتردي بعد نرن طبعا
سما >> ان شاء الله خير
رسلان >> مش حنخليك راه
سما >> حنتنرفز والله
رسلان>> خلاص باي
صكرت سما بدون ما ترد
طلع رسلان الاسير
اسير >> كنك تسهوك ؟
رسلان >> روان قالت لك محد مهتم
اسير رفع حاجبه>> تي على اساس انا مهتم
رسلان ضحك
اسير >> عارف كان ما تخطا وجي وربي نخربلك وجك
رسلان>> اهدا بس 😂 البنت مازال ما تعرفكش
اسير >> حتى انا مش مهتم مش موضوعي تعرف ولا لا “مسك تلفونه” قاعد مليان
رسلان >> بلكي البنت عندها حد في حياتها
اسير >> وعندها شن بندير مش محد مهتم على قولها؟ 😒
رسلان ضحك>> سألت سما قالت لي عزقتلها دوس على صاحبك قالت محد مهتم
اسير >> وكان خليتها تهتم؟
رسلان>> صقر ونعرفك “غمزله” بس بدون لعب اي حاجه شور المدام نخاطوها
اسير >> يا عليك تلزيق ربي يصبرني عليك الفتره هذي لعند ما المدام على قولتك تحن عليك
رسلان غمض عيونه وتنهد >> خليني نطير شور الحوش بكرا عندي شغل بدري
اسير >> تم
//
//
عند موسى وميرا
طلعو للسوق، شرت ميرا كم حاجه وعلى عناد موسى اللي كل شي لا
ميرا >> موسى اخر مره نطلع معاك مكان والله كل شي لا وكل شي قصير وكل شي ضيق؟ هضا السوق وهضا الدبش شن ندير يعني
موسى >> وطي صوتك ، في حاجات واجد انتي اللي تجي عينك الا علي م يلتبسش
ميرا>> خلاص كملت خذيت كم حاجه معش بنشري
موسى خذا الحاجات بدون ما يناقش و دفع لحساب مشت سبقاته شور السيارة
موسى >> اساسا حتى لبستك اللي طالعه بيها تجلط احمدي ربك اني طلعتك
ميرا سكرت الباب بالقوة>> اخر مره نطلع معاك اصلا عارف لو نبي حاجه موت مش حنقولك طلعني
موسى تنهد>> باه عليش تبكي
ميرا >> جيعانه
موسى عرف انه مش هضا السبب ابتسم حرك السياره و مشى شوية درس عند مطعم
موسى>> تبي حاجه معينه
ميرا مسحت دموعها >> لا نفس ديما عادي اصلا معنديش نيه واجد
موسى>> كيف هذي ؟ من الصبح ما كليتيش شي
ميرا>> تو ناكل
صكر موسى الباب غاب شويه و جابلها
موسى>> كولي توا هيا
ميرا فتحت السندوتش و كلت منه شويه
موسى >> كمليه
ميرا>> حناكل بشويه وتو نجوع فالليل عارفني فالليل ماشيه جايه عالمطبخ
موسى ابتسم >> متبيش تقوليلي ليش تبكي
ميرا>> اذكرت طلعاتنا للسوق مع بابا كنا نطلعو انا وسما ونتعاركو وكل وحده فينا تبي بابا يختارلها كان ذوقه سمح وعمره ما قال لا على حاجه يقول اشرن وجيبن دابيني حي ما فيش حاجه تغلا عليكن حتى لما نشرو حاجه تقعد مش عاجبته يخلينا نلفو بعدها نلقاه ماسكها ومحاسب عليها
موسى ابتسم>> الله يرحمه ويغفرله
ميرا >> تكي بيا عند البنات بنهدرز معاهن شويه اكيده بتمشي التيح
موسى>> اه بنحطك عندهن ونمشيله “برم عليها” كملي وكالك
ميرا>> شبعت والله حنكمل فالليل
وصلها موسى عند البنات
ميرا>> مش حتخش
موسى>> وانا جاي بعدين تو نخش
سكرت الباب وخشت للحوش لقت البنات كلهن لوطا
سما >> كنك ؟
روان >> تبكي كنتي ؟
ميرا >> رندة وسالمة وين ؟
روان>> سالمة ركبت تحط تلفونها فالشحن
ورنده خشت الخوخه
ميرا>> ما نبيش نحكي جنبهن على موسى عشان مانزعلهنش بس يابنات مش قادره نحبه مش قادره نعيش انا منبيش نجوز
نبي حوشنا نبي حياتي القديمه
سما >> ميرا حياتنا القديمه مش حترد ماضي خلاص توا فكري في حياتك الي جايه ، احمدي ربك انك طحتي في حد حنون ويحبك كان ممكن عمو عاشور يعطيك الاول حد يدق الباب ووقتها مش حيكون فيه موسى حتعيشي مع حد مش فاهمك ولا فاهم انتي شن تبي
كملت روان >> موسى عاش معاكي معاناتك و مرضك و زعلك و ايامك كلهن وحبك فيهن وتفهم وضعك و راضي بيك رغم انه كلنا عارفين انك مش طايقه روحك وماتبيش حب بكل
ميرا >> نكره روحي مليون مره لما نشوفه كيف يعامل فيا نحس بشعور الشفقه ونظرة الزعل في عيونه
مانحبش نبحت فيه عشان مانشوفش نظراته
موسى جاني في وقت غلط بكل مش قادره نحبه ولا قادره نتقبله ولا نتقبل حياتي
على طلعت سالمة >> انتي امتى جيتي
ميرا>> توا هالوقت ، كنك انتي لخرا ؟ شن فيه
سالمة>> فركشت مع حسن
ميرا>> حكى معاهم احمد ؟
سالمة>> اه خلاص
ميرا>> مش لكي والله مدره كبدي من زمان
سالمة>> وانتي كنك كنه معاك خويا ؟
روان >> قولي هي اللي كنها معاه
سالمة>> معلش يتحمل وين بيلقى زي ميرا اصلا 😂
ميرا ابتسمت
//
عند تيّح وموسى
تيح >> ان شاء الله خير جاي قالب وجك
موسى>> مافي شي
تيّح >> اه بكل وجك منقلب هكي وخلاص
موسى >> حرفيا تعبت قريب خمس شهور على نفس الحال معقوله ما حبتنيش ؟ انا سيء للدرجة هذي
تيح>> انت من كثر مانك كويس لعند مسمطها
البنت صغيره و مازال جرحها جديد ، خصوصا انت قايلي كانت مدلعه عند هلها راه كارثه اللي صايره يا موسى خليها تاخذ وقتها وصدقني ح تحبك وكان ما حباتك بحق
موسى ابتسم >> صحتك كويسة انت ؟
تيّح >> الحمدلله كويس
موسى>> امتى باه بتفرحنا بيك
تيح>> كنها امي ؟ بعدين هذي اخر حاجه نفكر فيها
موسى>> تي كيف هذي ماعنديش خوت انا انت خويا الوحيده نبي نفرح بيك نعنجد هذ
تيح>> انت بس حركلي روحك مع المدام وانا ساهل
موسى>> مش شورك انت بس اشقى بروحك
تيح غمض عيونه>> مانقدرش يا موسى نجيب وحده تتعب معايا ليش انت عارف وضعي وعارف اللي فيها
موسى >> الدكتور قالك تقدر ادير كل شي ” وغمزله” بعدين انت ذيب
تيح ضحك بمجاملة>> خليك فحالك
موسى>> بننزل للمسبح انا
تيح>> ياراجل حتى دبش ما معاك
موسى>>فيه جوا غيار
//
//
عند البنات
يهدرزن كانن حذا جدتهن وسما شافت احمد خش
سما >> عمو
احمد >> ايوا ” وعيونه على تلفونه”
سما >> ما سألتش على ماما ؟ شن صار من هضك اليوم
احمد>> كويسه يا عمو كويسه
سما >> باهي هي شن وضعها ؟
احمد >> مافيش جديد نفس ما خشت
سما >> مافيش تحسن ؟
احمد >> ضحى ، قصدي الممرضة لي هضك اليوم قالت لي انه حالتها كلها شيزوفرينيا ، تسمع في اصوات مش موجوده تحس انه في حد بيأذيها
مش قادره تفصل في عقلها من جوا الحقيقي والي مش حقيقي
سما >> ماما كانت متعلقه بعبودي بكل كانت حاسه انه الدنيا كملت خلاص بجيبتها له ، فقدته والمنظر لي شافاته بيه مستحيل حتقدر اطلعه من عقلها ، لا وبدال ما تزعل على بابا حاطه عليه اللوم انه هو الي ما حافظش عليه
احمد >> اللي عاشاته مش ساهل
سما >> ميرا تزن عليا بتمشي وتشوفها بس بعد ما شفتها انا مستحيل حنخلي ميرا تشوفها اذا كان انا ماتحملتش فمابالك هي
احمد >> ان شاء الله تطلع طيبه الامل في ربي كبير
سما >> تصدق من كثر ما الفقد واعر مش مهم ماما تصح ولا لا اهم شي هي عايشه وموجوده حتى لو كانت مش ماما القديمه وحتى لو مش حواليا بس اهم شي حاسه بيها وبوجودها تكون كيف ما تكون اهم شي عايشه واتنفس بس
احمد ابتسم >> نبيك هكي ديما قويه واسد
سما ابتسمت >> مافيش اخبار من جماعة البحث الجنائي ؟
احمد >> لا صح نبيك اسد بس مش هكي 😂
سما >> غير والله تقول
احمد>> والله مافي الله ماجش منهم اي خبر
سما غمضت عيونها >> يارب
على خشت موسى اللي مروح شعره مبلول
احمد >> عوايدك الزفت اللي مستحيل تبطلهن
موسى>> عوامه يا عمو مش حشيش عاد
احمد >> تي الفاظك يالطيب وسط حوش قاعدين
موسى ضحك >> مااه ما تنابشش
احمد >> تي عمك راه
على طلعت فاطمه >> موسى امتى جيت
موسى >> توا كيف خشيت ، ميرا وين
سما >> مع خوخه هي وباقي البنات تهدرزلهن
سيبهن وخش شورهن سلم علي حنه وقعمز حذاها
موسى >> شن دايره يا امي
خيريه>> الحمدلله وين يالنصاب تجي من برا البرا ما تخش حتى تسلم عليا
موسى>> والله نقعد جاي سريع سريع حقك عليا
خيريه>> كنه شعرك مبلول راك تمرض ” وبحتت في ميرا” كنك ما تفطني الراجلك
ميرا بحتت فيه >> هضا حاله يا خوخه مش صغير هوا
خيريه>> مش راجلك؟ صغير ولا كبير افطنيله
موسى بحت في ميرا وابتسم ب استفزاز>> والله يا خوخه شفتي هضا حالها معايا مش مدورتني بكل 😂”شوية براءة”
خيريه>> لالا ميرا بنيتي عاقله تو تفطن وترد بالها منك ” ضرباته على كتفه” وانت رد بالك منها
موسى >> حاطها في عيوني
ميرا>> ما تعيشش دور المظلوم بس
جا بيرد على خشت فاطمه ما بش يحكي
فاطمه>> نحطلك عشا ولا تعشيت
موسى>> لا ميرا ح ديرلي
فاطمه بحتت في ميرا وهي مش مصدقه>> ان شاء الله ” وطلعت من حذاهم”
ابتسمت ميرا ابتسامة صفرا
موسى>> هي نحن نربحو عندي شغل بدري بكرا
صبت ميرا بدون ما تحكي لبست ايشربها و طلعت
سما بحتت في روان >> ولعتتتت
روان >> عارفه كان ما جا اليوم اللي ميرا حتعشق موسى وهوا اللي معش حيعبرها ما نقعد روان
سما >> اختي ونعرفها غبيه بكل كان ماتضيعه موسى ما فيش كيفه
//
//
روحو موسى وميرا للحوش
ميرا>> غداك اللي مبدري ما كليتش انت نسخنه لكي ولا تبي سندوتش مبدري عقببت انا نزلتهن من السيارة ؟
موسى >> اه فالمطبخ قاعدات، حطي عادي اي حاجه بنخش نصلي
ميرا >> نغير بس
خشت غيرت دبشها لبست بجامة ورفعت شعرها و خشت للمطبخ سخنتله الاكل و جاباته للصالة ، قعمز موسى
ميرا >>ياريت تقول الامك اني نوكل فيك مش قاطعتك بالجوع
موسى >> تو من قال هكي 😂
ميرا>> انت فاهم عاد
موسى مسك الكشيك>> ماتبيش تاكلي انتي
ميرا>> ماتغيرش الموضوع
موسى>> امي فوتيها معش تعدلي على كلامها انتي عارفة ليش تحكي هكي ، وخليني ناكل لاني حتى غدا مش متغدي
ميرا صبت ، مسك يدها >> قعمزي كولي
ميرا>> كليت مبدري فسيارة
موسى >> نص سندوتش ؟ قعمزي بس امسكي الكشيك شويه شويه كولي
ميرا عرفت انه ح يسكن مسكت الكشيك وقعدت جنبه
ميرا>> مُصمم تخليني نسمن ؟
موسى>> وكلت العصافير هذي ان شاء الله تخليك عايشه مش حتسمنك حتى ربع كيلو
ميرا>> بس مش رقيقه واجد انا
موسى ابتسم>> انتي مزة المزز
ميرا برمت و قعدت تلعب بالكاشيك>> صح انت تشوف فيا هكي ؟
موسى يبحت فيها >> انتي سمحه اصلا مش انا بس لي نشوفلك هكي كلهم عارفين سماحتك ، بس انا نشوف فيك بعيوني بعيون موسى
ميرا مش عارف شن خلاها تسأل >> كيف يعني “ونزلت الكشيك وما بتش تبحت فيه ”
موسى >> يعني ممكن تمرضي ولا تتعبي و لاتنقصي ولا تسمني الناس مثلا يشوفوكي يوم حلوه يوم لا على حسب معايير الجمال اللي عندهم ، بس انا نشوف فيك سمحه وجميله في كل وقت وكل ثانيه وانتي تبكي وانتي تضحكي وانتي تهزبي وانتي ناقصه كله سمح عندي
ميرا توترت >> عارف انا مبدري ما قستش الدبش اللي جبناه خليني نشوفه
وصبت وخشت للدار وصكرت الباب وتنفست بسرعه
ميرا>> يارب ساعدني يارب لو انا مش ح نسعده و نريحه باعده من طريقي في اقرب وقت يارب يارب
اما موسى عرف انها هربت رد مسك الكاشيك و كمل اكل
//
//
في مركز الشرطة ، تحديدا في قسم البحث الجنائي
مدير المركز >> طلعلي اوراق ملف 901
المحقق >> قاعد الملف مافيش جديد
مدير المركز >> جميع القضايا اللي ما نحلنش لمهن ليا حتى الي ما فيهنش جديد
المحقق >> تم
طلع المحقق لم الاوراق اللي يخصن القضية هذي وباقي القضايا اللي ما نحلنش وجابهن للمدير
مدير المركز >> اسحب كرسي وقعمز
قعمز المحقق ومسك ملف 901 وطرح الاوراق كلهن قدامه
بعد ربع ساعه تقريبا من زحمة الاوراق >> معقوله مافيش شاهد واحد ؟ مافيش حتى جار سمع صوت حتى بالغلط اكيد كان فيه مقاومة ، ماحدش سمع
مدير المركز >> الشخص الي خاش خش كأنه معاه نسخه من المفتاح او المجني عليه ” عبدالرازق” فتح له الباب يعني يا اما المجرم يعرفه يا اما كان معاه نسخه من المفتاح
المحقق >> في الاوراق والتحقيقات اللي قدامي قالو انهم اثنين مش واحد اللي خشو
مدير المركز >> هكي جانا من قسم الادله كان فيه عفسة كندرتين نوعين مختلفات وهضا يدل على انهم اثنين
المحقق >> يعني شخصين خشو يا اما يعرفو المقتول او ناسخين المفتاح ، و مافيش ولا كاميرات مراقبه رصدنهم ولا في شاهد ولا حد سمع اي صوت
مدير >> عشان هكي الملف معزوق فالرف له قريب سنه ونص مافيش معطيات غير المعطيات هذينا مافيش ادله مافيش شهود ، بس مظطرين نشتغلو فيهن عشان قسم التفتيش حيمر الفترة الجايه ولو لقى اي ملف متصكر تقعدلنا قصة
المحقق >> حنروح بالاوراق معايا بلكي نفهم حاجه ولا نربط حاجه
وخر الكرسي وخذا الاوراق وطلع
- يتبع الفصل التالي اضغط على ( رواية هلع ) اسم الرواية