رواية هو مين ده الفصل الخامس 5 - بقلم اسماء الطبلاوي

 رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي

رواية هو مين ده الفصل الخامس 5

الفصل ال5

( ام فاروق اول ما حست بالجو حر عند نسمه نزلت على طول تحت ودخلت وقفلت بابها بس كانت قلقانه عليها..

ام فاروق: البنت دي فيها حاجه غريبه اليومين دول مش عارفه مالها لازم ابقى جنبها طول الوقت على الاقل عشان خاطر امها الله يرحمها.. 

(فاروق خرج في الوقت ده لقى امه بتكلم نفسها وقف جنبها وهو بيقول..

فاروق: مالك يا امه في ايه بتكلمي نفسك ليه هي زعقتلك ولا حاجه لما طلعتلها..

ام فاروق: ولا زعقت ولا حاجه يا ابني بس البت غريبه ومش عارفه فيها ايه ربنا يروق بالها وبالك..

( في الوقت ده كانت نجات وسنيه ورباب قاعدين مع بعض في بيت نجات لما اتكلمت سنيه وقالت..

سنيه: هااا قوليلي بقى كنت عاوزانا في ايه قلتيلي هاتي رباب وتعالي واديني جبت رباب وجيت خير في حاجه ولا ايه..

رباب: ومن امتى يعني واحده فينا بيجي من وراها الخير للتانيه خشي في الموضوع على طول يا نجات وقولي عاوزه ايه..

نجات: اصبري انتى وهي وانا هتكلم وهقولكم اللي انتم عاوزين تعرفوه اشربوا الاول العصير.. 

رباب بشك: لا معلش مفيش واحده فينا اتعودت تشرب بق مايه في بيت واحده تانيه مننا عشان كده خشي في الموضوع على طول وبلاش لف و دوران..

نجات: طيب اشرب انا.. 

(مسكت نجات كوباية من كوبايات العصير وشربت منها قدامهم عشان تثبتلهم ان مفيش فيها حاجه وبعدين اتكلمت..

نجات: بصي بقى انتى وهي المعلم شعبان اليومين دول حاطط عينه على البنت نسمه وعايز يتجوزها وطبعا احنا مش هنسيب الكلام ده يحصل واظن كفايه عليه تلت نسوان واكتر من كده يبقى حرام..

سنيه: قصدك ايه المفروض نعمل ايه يعني عشان نخليه ما يحبهاش ولا يتجوزها..

رباب: استني يا سنيه ما يتهيأليش ان نجات مش عايزاه يتجوزها وبس نجات مش عايزاه يبص لواحده تانيه اصلا..

نجات: عندك حق انا مش عايزاه يبص لواحده تانيه اصلا وعموما موضوع المخزن اللي اتحرق ده هيشغلوا شويه بس احنا عاوزين نعلمه الادب كل واحده فينا عامله لنفسها قرش للزمن صح ولا لا.

رباب: اه حصل اكيد يعني كل واحده فينا عامله ليها قرش على جنب ما فيش حد ضامن الموت من الحيا يختى... المهم يعني انت بتلفي وتدوري حوالين ايه.

نجات: المخزن بتاع شعبان ولع المره دي من غير ما حد يعرف هو ولع ازاي ولحد دلوقتي مش عارفين يوصلوا لاي حاجه تثبت مين اللي ولعه عشان كده احنا هنستغل الموضوع ده لحسابنا احنا عن نفسنا مستورين بس هو لما يخسر اللي قدامه واللى وراه هيحتاجلنا وساعتها مش هيبص لقدام ولا ورا ولا لوحده تانيه غيرنا معايا ولا ايه..

رباب: يا نهارك اسود ومنيل انتى عايزانا نولعله في محلاته كلها بس ده يبقى خراب بيوت مستعجل..

نجات: افهمي الاول قبل ما تتكلمي احنا يا اختي مش هنخرب بيوت بالعكس هنعمر بيتنا خصوصا ان نسمه مش عايزاه يعني احنا هنجيب رجاله تحرق محلاته والمخازن بتاعته من غير ما يبان لهم اثر بس قبل ما يتحرقوا البضاعه اللي فيهم هتبقى خرجت وراحت لمكان تاني تبعنا تتباع وفلوسها تتقسم علينا احنا التلاته بالشكل ده هيفضل المعلم شعبان محتاجلنا معايا ولا مش معايا.. 

(وقتها سنيه ونجات ورباب بصوا لبعض وكأنهم بيفكروا في الموضوع لحد ما اتكلمت سنيه 

سنيه: انا عن نفسي معاكي و بتهيألى رباب كمان هتبقى معاكي

رباب: انا معنديش مانع طالما مش هيبص بره ولا هيجيب لنا ضره جديده.. 

نجات: يبقى اتفقنا نقرا الفاتحه على الكلام ده..

( هناك عند نسمه كانت واقفه في وسط النار وهي عماله تصرخ ومرعوبه ندهت ندهه واحده باسم راكان لانها حست في الوقت ده بالذات انه امانها اللي ناقصها فجاه راكان ظهر والنار هديت والشقه سليمه كأن مفيش حاجه حصلت فيها ونسمه لسه موطيه على الارض ومرعوبه حضنها راكان وهو بيطمنها..

راكان: نسمه يا حبيبتي افتحي عينيكى ما تخافيش ما فيش حاجه..

( فضلت نسمه تترعش شويه مكانها وبعدين اول ما سمعت صوته رفعت وشها وبصيت ليه وخدته هي في حضنها المره دي..

نسمه: انا مش عارفه ايه اللي حصل النار ولعت ومسكت في المكان كله فجأه... ما تسيبنيش تاني خليك جنبي عشان خاطري..

راكان: انا جنبك على طول يا حبيبتي ما تخافيش وصدقيني اللي عمل كده هيتحاسب انا اسف اوي يا نسمه عشان شفتي حاجه زي دي واوعدك انها مش هتتكرر تاني سامحيني عشان خاطري ما تزعليش مني..

نسمه: انا مش زعلانه منك بالعكس انا مبسوطه ان انت موجود في حياتي خليك على طول قريب مني..

(وقف راكان وشال نسمه ودخلها جوه على السرير وقعد جنبها وحط ايده على وشها..

راكان: نسمه يا حبيبتي انا لازم احاسب اللي عمل كده صدقيني مش هتأخر عليكى بس عشان خاطري خلي بالك من نفسك لحد ما اجي وصدقينى انا طول الوقت حواليكي.. 

نسمه بخوف: لا ما تسيبنيش انا مش عايزه اللي عمل كده يتحاسب المهم انه ما يحصلش تاني عشان خاطري خليك معايا..

راكان: صدقيني مش هتأخر عليكى بس لو انا ما حاسبتش اللي عمل كده هيعمل كده تاني وتالت وانا الامير راكان ما ينفعش حد يعمل معايا كده وما حاسبوش انتى اغلى حاجه عندي وما ينفعش استهتر بحياتك..

نسمه: طيب انا هسيبك تمشي بس اوعدني ما تتاخرش عليا

راكان: اوعدك على قد ما اقدر مش هتأخر عليكى..

( اختفى راكان من جنب نسمه وفضلت هي قاعده زعلانه ان هو مشى وحست انها دخلت في حاجه هي مش قدها بس في مكان تاني كان حارث واقف تاني مع اتباعه وهو غضبان..

حارث: انتوا ازاي تخلوا الامير راكان يعرف باللي احنا كنا هنعمله دلوقتي هيتعمل ليا محاكمه لان انا الوحيد اللي هيشك فيه انا الوحيد اللي عارف بعلاقته بالانسيه دي انتم لازم تخلصوا منها بأي شكل مش لازم يرجع يلاقيها لو انا اختفيت اعرفوا اني بتحاكم... وتنفذوا اللي قلتلكم عليه وتيجوا تخلصوني فورا بحكم العهد اللي ما بينا..

( هز الاتنين راسهم موافقه على الكلام اللي هو قاله واختفوا من قدامه بس راكان كان تحت الارض واقف قدام والده وهو غضبان وبيقول له..

راكان: انا خدت موافقتك على علاقتي بالانسيه وخرجت من العشيره وما عملتش اي مشاكل واتنازلت عن كل حاجه واخترتها هي في مقابل كل ده لكن ان حد يأذيها ده اللي مش هسمح بيه

..

شهبير: انا مش فاهم ايه اللي بتقوله مين اللي اتجرأ واذى الانسيه اللي تخصك وازاي تتهمني بحاجه زي دي.. 

راكان: انا مش بتهمك يا عظمتك انا ببلغك ان في حد اتخطى اوامرك وما عملش حساب لقراراتك وحاول يأذيها وانا مش هسكت..

شهبير: انا كمان مش هسكت انت شاكك في حد..

راكان: اكيد شاكك في حد هو حارث مفيش غيره  محدش ليه مصلحه غيره... 

شهبير: لو حارس اللي عمل كده انا مش هرحمه وهنفيه في السجن ومش هيخرج منه باقي عمره..

راكان: انا ما يهمنيش عظمتك هتعمل فيه ايه انا اللي يهمني اني اخد منك دلوقتي عهد ان مفيش حد هيتعرض لنسمه تاني لانه لو حصل المره الجايه مش هعمل حساب لاي مخلوق لا فوق الارض ولا تحتها.. 

شهبير: من غير تهديد يا امير فهمت خلاص اللي انت عاوز تقوله وهتصرف..

راكان: لا انا مش هستناك تتصرف وانا فوق انا عاوزك تخلص الموضوع ده قدامي حالا قبل ما امشي..

( امر الملك شهبير بإحضار حارث لمحاكمته وفورا كان اعوان الملك شهبير مسكوا حارس وجابوه قدام الملك..

شهبير: انا هسألك سؤال واحد وترد لانك لو كذبت انا هحرقك ده اقل حاجه ممكن اعملها لانك كسرت العهد اللي ما بينى وما بين الامير راكان.. 

حارث: انا تحت امرك يا مولاي وانت عارف..

راكان: المهم تجاوب بصراحه لانك عارف اني هعرف انت بتقول الحقيقه ولا بتكذب.. 

شهبير: استنى انت يا راكان قولي يا حارث مين اللي حاول يأذي الانسيه اللي تخص الامير راكان انت مش عارف المعاهده اللي ما بيني وما بينه في الموضوع ده

حارث: انا صحيح كنت فوق الارض يا مولاي لكن مليش اي علاقه بالموضوع ده وما اعرفش حاجه عنه..

راكان: وانا واثق انك ما تعرفش حاجه عنه ولا كنت في المكان هناك لكن اللي راحوا وحرقوا المكان وحاولوا يأذوا الانسيه كانوا من اتباعك..

حارث: ازاي تقدر تثبت انهم كانوا من اتباعي انا طول عمري مخلص للملك شهبير ولجلالتك من بعده وما اصليش اخطأت ولا عملت حاجه اتحاسب عليها ليه بتقول ان انا السبب عندك دليل على كلامك تقدمه.. 

شهبير: راكان قدر انه يمسك اعوانك اللي اتسببوا في اذيه الانسيه وقالوا انهم عملوا كده بأمر منك.. 

(اتصدم حارس وقتها وما كانش عارف يصدق ولا لا بس كان شاكك انها لعبه من راكان لانه ملك الالاعيب وبيقدر يدخل ذهن اللي قدامه ويعمله حاله من الارتباك حاول يرد بثبات..

حارث: انا ما حصلش مني حاجه زي دي هاتوا الاعوان دول قدامي يقولوا ان انا اللي بعتهم..

راكان: انا لازم امشي عظمتك عشان مغلطش غلطه اتحاسب عليها خلص الموضوع بطريقتك المهم ان ما حدش يتعرض للانسيه دي تاني لان المره الجايه مش هستنى يتعمل محاكمه وهتصرف بطريقتي..

( انصرف وقتها راكان وساب المحكمه مقامه وراح يفرغ غضبه في مكان بعيد.... في الوقت ده في شارع ضلمه كانت واقفه واحده ست مع خمس رجاله وكان الحوار كالتالي..

نجات: دلوقتي فهمتوا هتعملوا ايه انا عاوزه المحلات بتاعته والمخازن تبقى كوم تراب مش عايزه يبقى حيلته حاجه يتسند عليها المهم قبل كل ده ما يحصل وقبل ما تولعوا النار فيهم كل البضاعه اللي عنده في اي محل من المحلات تتحول على المكان اللي انا قلتلكم عليه وحلاوتكم محفوظه وكل اللي هتطلبوه هتلاقوه..

راجل: احنا تحت امرك طالما هتدفعي بس انتى كنتى بتقولي محلين تلاته الوقتي هيبقوا 6 محلات يعني العموله هتزيد شويه.

نجات: وانا هديك اللي هتقول عليه من غير ما اتكلم معاك المهم كل الكلام ده يتم قبل ما النهار يطلع مفهوم..

الراجل: مفهوم قبل ما نهار بكره يطلع هيكون كل شيء خلصان..

نجات: ويبقى يوريني بقى هيروح يتجوز تاني ازاي رجاله عينها فرغه بصحيح..

( مشت نجات وروحت وحكت لسنيه ورباب على اللي هي عملته وهناك في نفس الوقت كانت نسمه قاعده قدام الدكان بتاعها وقاعد شفشق على كرسي قدامها

نسمه: والله يا واد يا شفشق انا اليومين دول بيحصل معايا حاجات تخلي الواحد يتجنن ومش عارفه الاقيها منين ولا منين

شفشق: طب ما تحكيلي يا ست الناس ايه اللي بيحصل معاكي انا برده بير اسرارك وانتى كنتى بتحكيلي على كل حاجه مش عارف ايه اللي حصل وخلاكي تبطلي تتكلمي معايا..

نسمه: ما حصلش بس زي ما تقول كده بدأت اكتم في نفسي وما اتكلمش مع حد اصل انا لو حكيتلك هتقول عليا مجنونه..

شفشق: طب جربي كده ولا هقول عليك مجنونه ولا حاجه ما تبصيش لسنى الصغير انا ياما شفت في حياتي..

نسمه: طيب يا اخويا اتنيل على عينك وروح هاتلنا غدا يلا عشان ناكل سوا.. 

شفشق: هتعزميني على ايه المره دي.. 

نسمه: هعزمك على كباب وكفته يا منيل مش خساره فيك انت الوحيد اللي بتتكلم معايا يلا قوم خد الفلوس اهي واجري بسرعه هاتلنا كيلو كباب وكيلو كفته وتعالى جري..انا هموت من الجوع. 

(شفشق خد الفلوس وقام راح وهو مبسوط فجأه نسمه وهي قاعده لقت المعلم شعبان داخل عليها وغضبان اوي وبيزعق..

شعبان: مش علشان سكتلك مره يبقى كل مره تسلم الجره انتى حرقتى المخزن الاولانى وانا ما اتكلمتش تقومي تكملي على بقية المخازن والمحلات روحي منك لله

نسمه: انت اتجننت يا راجل انت ايه اللي انت بتقوله ده مخازن ايه ومحلات ايه انا مش فاهمه حاجه

شعبان: لا انتي فاهمه كويس انا انا بتكلم على ايه خربتى بيتى الله يخرب بيتك انا لا عايز اتجوزك ولا عايز اشوف وشك بس انا مش هسيب حقي..

نسمه: انت باين عليك اتجننت انا هولع في محلاتك ليه ولا انت فاكر ان انا ممكن اعمل زيك..

شعبان: تعملي زيي في ايه هو انا جيت جنبك..

نسمه: هو انت فاكرني مش عارفه اللي انت كنت بتحاول تعمله والناس اللي انت بعتهم علشان يولعوا في دكانة ابويا بس شوف ربك اهي جات فيك انت..

شعبان: انا ما عملتش حاجه بس خليكي فاكره يا نسمه انها كده ما خلصتش..

( خلص شعبان كلامه ومشى غضبان ونسمه قعدت تفكر مين اللي ممكن يكون عمل كده خدت بعضها وطلعت الشقه وقعدت لوحدها وندهت عليه..

نسمه: راكان انت فين انا عاوز اكلمك..

( ما استنيتش كتير قبل ما يظهر راكان بس كان باين عليه غضبان مش زي كل مره وقالها..

راكان: نعم في حاجه ولا ايه.

( استغربت نسمه من كلامه وانه المره دي ما بيقولش كلام حلو زي كل مره.

نسمه: في ايه مالك بتتكلم كده ليه مش عوايدك يعني.

راكان: هو المفروض اكلمك ازاي يعني.

نسمه: زي ما بتكلمني على طول هو انا زعلتك في حاجه. 

راكان: مش لازم طول الوقت ابقى بكلمك بطريقه تعجبك ساعات ببقى غضبان ومتعصب..

( زعلت نسمه من كلامه لكن وقفت قدامه وحاولت تبان هاديه

نسمه: طيب انا عاوزه اسالك على حاجه المحلات والمخازن بتوع شعبان جنزيره انت اللي حرقتهم..

( اتعصب جدا راكان وقتها ومسكها من ذراعتها بقوه.

راكان: انتى اتجننتى ولا ايه هو انا هسيب كل اللي ورايا واركز مع شعبان وغيره انتى فاكراني ايه بالظبط..

( اتوجعت نسمه جدا من مسكة ايديه وصرخت..

نسمه: اااه سيب ايدي وجعتني.

  •تابع الفصل التالي "رواية هو مين ده" اضغط على اسم الرواية