رواية هو مين ده الفصل السادس 6 - بقلم اسماء الطبلاوي

 رواية هو مين ده (كاملة جميع الفصول) حصريا عبر دليل الروايات بقلم اسماء الطبلاوي

رواية هو مين ده الفصل السادس 6

الفصل ال6

(كانت نسمه واقفه بتبص لراكان وهي زعلانه جدا من تصرفه معاها وما صدقتش ان هو ممكن يتغير فجاه كده وهما لسه في الاول..

نسمه: بقولك سيب ايدي وجعتني في بيني وبينك ايه عشان تمسك ايدي بالطريقه دي.

( اتعصب راكان جدا لانه بيحبها وغصب عنه هو دلوقتي متضايق وعشان خاطرها وهي مش فاهمه كده.

راكان: مش هسيب ايدك وامسكها وقت ما احب انتى بتاعتي لوحدي فاهمه ولا لا. 

نسمه: انا مش بتاعة حد انا بتاعة نفسي ومش هخليك تتحكم فيا زي ما انت عايز مش كل ما اكلمك تزعقلي..

راكان: انتى اتجننتي دي اول مره ازعق عليكى خلاص مش متحملاني.

نسمه: طيب ما تعرفني بتزعق عليا ليه عشان افهم اتحملك ولا لا وبعدين انا عملتلك ايه عشان تزعقلي اصلا. 

راكان: ما عملتيش حاجه انا بس متضايق عشان اللي حصل معاكي واني ما قدرتش احميكى زي ما وعدتك اول ما اتكلمنا..

نسمه: مين اللي قالك ان انت ما قدرتش تحميني لو ما كنتش قادر تحميني ما كانش زماني ندهتلك انت اول واحد لما حصل الحريق.

راكان: يعني انتى مش زعلانه مني.

نسمه: اكيد مش زعلانه منك بس دلوقتي بقيت زعلانه منك عشان مسكت ايدي جامد ووجعتني وكمان زعقت فيا... 

(نسمه وقتها فضلت واقفه وساكته وهو فضل واقف شويه وساكت وبعدين ادور واخذها في حضنه..

راكان: طيب يا ستي انا اسف حقك عليا والله ما كان قصدي ازعلك انا بس اتضايقت جدا من اللي حصل وحسيت اني ما قدرتش احميكي بشكل كافي خصوصا اني وعدتك انك مش هتشوفي اي حاجه من العالم بتاعى ولا هتخافى..

نسمه: صحيح وعدتني بس دي حاجه خارجه عن ارادتك يعني مش بمزاجك خلاص بقى عديها انا اصلا ما ركزتش انا زعلت بس على الشقه لانها بتاعه ماما وبابا الله يرحمهم فكرت اني مش هشوف الشقه تاني.

راكان: والله انتى غريبه اوي يعني كنتى خايفه على الشقه وما كنتيش خايفه على حياتك ده انتى لو كان حصلك حاجه كانت قامت حرب تحت الارض ما كانش هيتنجى منها اي حد.

نسمه: يااااه اد كده بتحبني وممكن تعمل اي حاجه علشاني.

راكان: حقك تقولي كده عشان ما تعرفيش انا بحبك اد ايه لما تبداي تحبيني زي ما انا بحبك هتفهمي يعني ايه حب.

( وهناك في الشقه بتاعة نجات مرات شعبان جنزيره كانت قاعده مبسوطه وبتتكلم في التليفون مع سنيه..

نجات: شفتي اهو اللي انا قلته اتعمل بالظبط..و من ساعة يا اختي ما الحاجه اتحرقت وهو قاعد تحت قدام البيت حاطط ايده على خده زي النسوان.. شويه كده وتلاقيه بيتمحلس لكل واحده فينا حبه عشان تسلفه ويقف تاني على رجليه.

سنيه: وهو بقى احنا ان شاء الله كنا بنعمل كل ده علشان نرجع نسلفه.

نجات: يا هبله هو ما يعرفش ان احنا معانا فلوس اصلا محدش فينا هيعبروا وهنقوله منين انت كنت مضيقها علينا.. بقولك ايه اقفلي اقفلي احسن شكله بيفتح الباب. 

(فتح شعبان الباب ودخل الشقه وهو حزين جدا ونجات مثلت العياط. 

نجات بعياط: اااه يا شقى عمرك يا حبيبي... اااه يا اللي حرقت قلبي اخص عليها تعمل كل ده فيك كانت قالت لا وخلاص.

( شعبان ما كانش فاهم حاجه قرب منها وقعد جنبها..

شعبان: انتى بتتكلمي عن مين اللي عمل كده انطقي يا نجات مين اللي عمل كده فيا وخرب بيتى...

نجات: يا لهوي هو انت ما تعرفش

شعبان: بلاش كلام الالغاز بتاعك ده وعرفيني ايه اللي حصل بالظبط وانتى تعرفي ايه..

نجات: اعرف يا اخويا اللي كل الناس عارفاه وملهمش سيره غيره اعرف ان البنت نسمه هي اللي ورا حرق كل محلاتك ومخازنك كل ده عشان انت كنت عاوز تتجوزها.

( استغرب شعبان انها عارفه انه كان عاوز يتجوز نسمه وبصلها

شعبان: وانتى عرفتى منين انى كنت عايز اتجوز نسمه..

نجات: يا اخويا ده الحاره كلها عارفه انها بتهزقك في الراحه وفي الجايه عشان عاوز تتجوزها مغفله هي هتلاقي احسن من المعلم شعبان جنزيره تتجوزوا. 

شعبان: يعني انتى لو كنت اتجوزتها ما كنتيش زعلتي يا نجات.. 

نجات: وازعل من ايه ده شرع ربنا حد يزعل من الحلال.

شعبان: ما تجيبليش سيرتها تاني بنت ال.....!! انا مش طايق اسمع اسمها في حته..

نجات: طبعا مش هتسمع اسمها بعد اللي عملته يا خرابي على جبروتها تحرقلك كل محلاتك ومخازنك كمان مفيش اي رحمه.

شعبان بغضب: طيب تصبر عليا وتشوف انا هعمل فيها ايه لو ما خليتهاش جاتلي زاحفه تترجاني ارحمها ما ابقاش انا شعبان جنزيره..

( وهناك في مكان بعيد كل البعد عن الحاره كانت قاعده بنت جميله وجنبها راجل كبير في السن بيقولها.

منصور: الناس بتوع الحفر كلموني وقالوا ان المقبره مش هتتفتح الا لما نستدعي امير من الجن امير معين مش اي واحد.

هيام: طيب وبعدين يا باشا انا اظن يعني ان على كلام الشيخ ان الملوك والامراء مش سهل نستدعيهم.

منصور: انا ما ليش دعوه بكل ده يتصرفوا انا اللي ليا ان المقبره تتفتح وبس بأي شكل وتحت اي ظرف.

هيام: ايوه هتتفتح ازاي علشان نفتحها بقى لازم نجيب شيخ كبير وكمان نخليه يسخر لنا حد من الخدم بتوع الامير ده علشان يعرفنا نقدر ازاي نستدعيه.

منصور: هاتى الشيخ اللي انتى عاوزاه واعملي اللي انتى عاوزاه المهم ان المقبره تتفتح وبسرعه.

( عند ام فاروق في الشقه كانت واقفه في المطبخ وبتجهز الاكل لما فاروق دخل عليها وهو متعصب.

فاروق: بقولك ايه يا امه انا عاوز اتجوز.. نسمه بقى ولا غيرها المهم ان انا عايز اتجوز. 

ام فاروق: في ايه يا ابن المسروعه هو انت عاوز تتجوز وخلاص جاهز للجواز يعني..

فاروق: ما أنا هتجوز معاكي في الشقه هنا يا امه يعني لحد ما ربنا يفرجها شويه..

ام فاروق: نعم يا اخويا تتجوز معايا في الشقه هو انا قادره اتنفس وانت قاعد معايا عشان تجيب واحده ثانيه تعيش في وسطينا.

فاروق: خلاص زي ما انتى عاوزه انا هطلع اتكلم مع نسمه واحاول اقنعها بالجواز ولو وافقت هاخذ منها الشقه بتاعتها بالقسط ونتجوز فيها.

ام فاروق: دي كانت قسمت وسطك يا اخويا دي شقة امها وابوها.. دى ممكن تبلعك لو فكرت تقول لها كده لا وكمان عاوز تقول لها نتجوز يا ابني دى ما بتطيقش تشوف وشك هنفضل نعيد ونزيد في نفس الكلام.

فاروق: خلاص ياما خليني قاعد جنبك من غير جواز هموت عازب ارتحتى كده.

ام فاروق: ان شاء الله يا اخويا تموت واقف المهم ما تعمليش مشاكل مع البت ده انا ما صدقت ان احنا رجعنا نتكلم زي الاول..

( خلص فاروق كلامه وخد بعضه ونزل غضبان في نفس الوقت كانت نسمه قاعده قدام الدكان بتاعها بتفكر لما شفشق جه بسرعه وهو بيقولها بخوف..

شفشق: الحقيني يا ست نسمه المعلم بتاع القهوه عاوز يمشيني ده انا بقالي هنا كام سنه وما عملتش اي حاجه.

نسمه: وهو عاوز يمشيك ليه لو انت ما عملتش حاجه هو افترى على خلق الله وخلاص.. وسع ياض من قدامي لما اروح اشوف الراجل ده عاوز ايه..

شفشق: بلاش دلوقتى يا ست نسمه عشان المعلم شعبان قاعد معاه جوه. 

نسمه:اااه قولتلي  المعلم شعبان... انا كده فهمت الراجل عاوز يمشيك ليه طيب ماشي يا شعبان اقعد يا شفشق جنبي دلوقتي وانا هقولك حاجه.. بس اصبر لما يخرج سى زفت من جوه. 

(شويه ونسمه شافت شعبان خارج من عند صاحب القهوه قامت وقفت. 

نسمه: صحيح على رايي اللي بيقولوا شيطان الارض يأذي اكثر من شيطان الجن.

( بصلها شعبان وهو فاهم ان الكلام عليه..

شعبان: انا مش هرد عليكى دلوقتي بس ردي هيوصلك قريب لقحى كلام عليا براحتك بقى..

(مشى شعبان ونسمه راحت ناحية صاحب القهوه وهي بتبصله بغضب.

نسمه: بقى مش عيب عليك يا راجل يا عره تخلي راجل تاني زيه زيك يتحكم فيك ويقولك تقعد مين وتمشي مين من مكانك هو مش شفشق ده عشرة عمرك ومعاك من وهو لسه عيل صغير هان عليك تمشيه عشان خاطر ترضي شعبان جنزيره. 

معلم جابر: معلش يا نسمه انتى عارفه ان شعبان ايده طايله وكلامه بيمشي على اغلب اللي موجود في الحاره وانا ما اعرفش اقوله لا وانت ما تزعلش مني يا شفشق غصب عني يا ابني انت عارف اني بحبك اد ايه.

شفشق: مش زعلان منك يا معلم عشان عارف انه مش بمزاجك انا بس مش هاين عليا العشره..

نسمه: ولا يهمك ياض يا شفشق انا هوقفك معايا في الدكان بتاعي ورزقي ورزقك على الله.

شفشق: بجد يا ست نسمه والله انا كان كل زعلي اني كنت همشي واسيبك بس خلاص طالما كده انا مش زعلان.

نسمه: طيب يلا على الشغل خش كده روق الدكان وظبط الدنيا وبعدين تعالى هاتلنا كوبايتين شاي من على القهوه اللي على اول الشارع عشان نظبط الجمجمه 

معلم جابر: يعني خلاص ما عدتيش هتشربي شاي من عندي تاني 

نسمه: اما ترجع راجل يا اخويا ابقى ارجع اشرب من عندك.

( مشت نسمه واخذت شفشق معاها وراحوا الدكان... وهناك في شقة رباب المعلم شعبان طلع وهو راسم وش الملاك دخل وقاعد جنبها على الكنبه.. 

شعبان: يا صباح الفل يا ست الستات وحياة النبي وحشتيني اخبارك ايه طمنيني عليكى.

رباب: والنبي ايه وحشتك بصحيح. طيب ولما انا وحشتك ما بتجيش تعبرني وتبص عليا ليه هو انا يا راجل مش من بقيت نسوانك.

شعبان:دنتى اجمل نسوانى بس مشاغل يا روح قلبي.

رباب: مشاغل ايه يا راجل هو انا مش عارفه اللي حصل دى الحاره كلها بتتكلم عن مخازنك ومحلاتك اللي اتحرقت.

(بصلها شعبان وهو بيمثل الحزن

شعبان: اه شفتي عملوا فيا ايه يا رباب خربوا بيتي ما هو انا جايلك يا حبيبتي عشان كده عايزك تقفي جنبي عشان ارجع اقف على رجلي من تاني.

رباب: ايوه اقف جنبك ازاي مش فاهمه انزل اشتغل معاك..

شعبان: وانا من امتى بشغل حريم انا مش قصدي كده ده انتى تقعدي وتحطي رجل على رجل ده انتى هانم وست الهوانم انتى تطلبي وتتشرطي من غير ما تروحي ولا تيجي.

رباب: وده من امتى الحب ده كله وبعدين لو انت مش عايزني اشتغل معاك امال عاوزني اقف جنبك ازاي.

شعبان: قصدي يعني انك تسلفيني قرشين ارجع اشتغل بيهم واقف على رجلي زي الاول قلتى ايه.

رباب بضحك: هههههه اقف جنبك واديك قرشين منين يا حسره هو انت كنت بتدينا فلوس علشان نعين منها انت لو كنت بتصرف علينا وتدينا فلوس في ايدنا كان زمانك لقيت قرش دلوقتي تتسند عليه عاوزني بقى اساعدك منين انا لا ورايا ولا قدامي.

شعبان: بقى كده يا رباب انتى شايفه كده يعني.

رباب: على عيني يا قلب رباب انا لو معايا متأخرش عنك يا حبيبي.

(شعبان وقف وهو غضبان وبصلها بقرف.

شعبان: حبك برص يا بعيده انا ماشي جتك القرف سديتي نفسي

(شعبان خد بعضه وهو مقرر انه هينفذ نفس الخطه مع سنيه ونجات يمكن واحده فيهم تديله فلوس عشان يرجع يقف على رجله ثاني... وفي مكان ثاني بعيد خالص عن الحاره كان حارس واقف مع اتباعه في الزنزانه اللي هو اتحبس فيها لما الملك شهبير حكم عليه انه يتنفى في سجن تحت الارض طلب العون من اتباعه..

حارث: كويس انكوا جيتوا انا كنت مستنيكم انا لازم اخرج من هنا وبسرعه انا جاتلي اشاره ان في حد بيحاول يطلب واحد من اتباع الامير راكان او من الخدم بتوعه وانا ما خليتش حد ياخد باله من الاشاره دي....لان دي الحاجه الوحيده اللي ممكن تخرجني من هنا من غير ما حد يحس لانه خروج اجباري انا هستجيب للدعوه دي وهخرجلهم وانتوا هتقعدوا مكاني هنا وتضمنوا ان محدش يعرف اني خرجت من الزنزانه بأي شكل من الاشكال..

اتباعه: تحت امرك يا سيدي.

( وفعلا في اللحظه دي وقف حارث وفرد دراعاته..

حارث: انا بستجيب لدعوه بني الانس للظهور فوق الارض انا احد اتباع الامير راكان.. 

(وفضل يكرر الكلام شويه وفجاه اختفى من الزنزانه.. 

(فوق في مكان شكله حلو ومتزوق على البحر وفي شمع والع مدفون وسط الرمل كان راكان قاعد ونسمه نايمه على رجله.

راكان: انا مبسوط اوي ان انتى بتبقي مبسوطه لما بتيجي هنا لو كان عليا اخليكي هنا على طول وافضل معاكي.

نسمه: انا كمان لو اعرف افضل موجوده هنا على طول هفضل بس انا خلاص ما بقتش بطولي بقى في حد في حياتي ولازم اخلي بالي منه لاني مسؤوله عنه.

(كان غضبان وهو بيقولها.

راكان: هو مين ده اللي في حياتك ومسؤوله عنه فهميني.

نسمه: اهدى بس ما تتعصبش انا بتكلم على الواد شفشق اصل المعلم بتاعه طرده من القهوه وانا اخذته شغلته عندي في الدكان حرام قطع عيشه عشان كده بقيت مسؤوله عنه.

(ضحك راكان ورجع قعد جنبها تاني وقال برقه..

راكان: انتى مجنونه وعايزه تجننيني معاكي.. ليه تبقي مسؤوله عن حد وانتى اصلا مش عارفه تبقي مسؤوله عن نفسك.

نسمه بزعل: ليه ان شاء الله هو انا ما عشتش عمري كله وانا مسؤوله عن نفسي ايه اللي هيحصل يعني هيشتغل بالنهار وبالليل هيدخل الدكان ويقفل على نفسه وينام.

راكان: انا مش قصدي على كده بصي يا نسمه انا استنيت كثير اوي مش ناويه بقى تدخليني حياتك..

( كانت نسمه لسه هتجاوب وفاجاه ملامح وش راكان اتغيرت وقام وقف بغضب وهو بيكلم نفسه.

راكان: هرب...؟؟ ازاي هرب وانا اخد بالي وعامل كل الاحتياطات؟؟؟ انا جاي حالا..

  •تابع الفصل التالي "رواية هو مين ده" اضغط على اسم الرواية