رواية هلع كاملة بقلم اية عبر مدونة دليل الروايات
رواية هلع الفصل السابع 7
رسلان>> انتي رديتي بالغلط ؟
سما ابتسمت>> لا وما تسألنيش ليش رديت
رسلان ضحك>> ياستي مش ح نسأل
سما >> في حاجه ولا زي ما ديما تقول ران نطمن
رسلان >> ران نطمن ، كنت مع اسير حطيته فالحوش وتوا مروح فالطريق مسكت التلفون قلت نجرب حظي بلكي تردي
سما >> تحكي وانت تسوق يعني
رسلان>> اه الطريق فاضية
سما >> وليش طولتو برا
رسلان>> كنت مكسدين مع جماعة اصحابنا وانتي ليش سهرانه؟
سما >>كنت مع البنات ع اساس فاتحات فيلم يتفرجن مع بعضهن واختي بايته معانا وهكي بس حرفيا الفيلم يشتغل بروحه كل وحده عقلها فوادي
رسلان>> وانتي عقلك وين ؟
سما >> شي كنت نتفرج لعند انت رنيت
رسلان>> واضح انه الفيلم ممل بكل اللي رديتي 😂
سما ضحكت>> لا بس مش عارف متوتره عشان بكرا
رسلان>> اول شي اضحكي ديما، ثاني شي مافيش شي يوتر ولا شي ح يتغير نفس قبل نفس بكرا
سما >> عارف شن خاطري ؟
رسلان درس قدام الحوش >> قولي
سما>> خاطري بس يردو هلي يوم واحد ، يكون بابا هو اللي وكيل عليا بكرا ويحكي على شروطي معاك ، كان خاطري نحبك ونعيش حياة طبيعيه وهاديه
خاطري ماما تكون معايا كانت ديما تقولي خاطري نعرف من الي بياخذك بس كنت عناديه و حركتي واجده و نحب نعرف كل حاجه ، كانت تقولي ح يجي اللي يعقلك ونحكيله على هبالك ” كان صوتي يرجف وانا نحكي بس مسكت بكيتي”
رسلان كان يسمع فيها لعند ما قالت ” كان خاطري نحبك ” سكت شوي وهو يسمع فيها تتنفس بسرعه تحاول ما تنزلش دموعها>> هلك مش ح يكونو معاك لانه هضا هكي ربي كاتب وكلنا لها معاك انه الموته كانت واعره وغدره بس هذي الدنيا، امك اللي صارلها قضاء وقدر بس في امل انها تطلع من الي هي في حتى لو امل بسيط بس ما تنسيش انه ربي قادر على كل شي !
اما بالنسبة ليا انا ح تحبيني هذي ما فيهش نقاش😂
سما >> رسلان ماتعبليش قلبي خليني نمشي نشوف الي فاضل من الفيلم قبل ما يطلعن لي البنات
رسلان ابتسم>>بالفتحة مش كسرة
سما ابتسمت >> وصلت ؟
رسلان>> اه توا خاش
سما >> تمام
رسلان>>بتكملي الفيلم
سما>> اها خ نخش جنب البنات
رسلان>> ماتبكيش اه اذكري اني معاك حتى لو انتي مش حابه بس معاك
سما ضحكت>> انت مُتعب بكل
رسلان ابتسم >> تصبحي على خير
سما>>تلاقي الخير
صكرت الخط ومسكت التلفون وبحتت للسما وماكانتش تدعي بغير ” يارب انت عارف اللي فيها حلها من عندك يارب ، يارب انت عارف قلبي والي في قلبي وعارف انه ماعنديش اي مشاعر نعطيهن له ولا قادره نكذب في مشاعري يارب اختارلي الاحسن ”
خشت جوا لقت ميرا عالسرير راقده ورندة على نفس الحال كملت نص الشيبس والشوكلاطات
وسالمة وروان يتفرجن
ردت مكانها جنب سالمه >> شنو؟
سما بصوت واطي>> رسلان ومش عارفه ليش رديت
سالمة>> بداية الوقوع 😂
سما >> بتصكري فمك؟
سالمة>> خلاص سكتت فاتك نص الفيلم
سما>> ع اساس مركزه فيه “خبطت رنده بالمخده” مديلي شوكلاطه كملتي امها علينا
رنده>> حد قاللكن ماتاكلنش كل وحده لاهيتلي بحاجه الله يقطع لي بيتفرج معاكن
ميرا في وسط نومها>> بناات الصوت
روان>> اخرلها مره تبات معانا هذي اه شد حويله موسى
رنده عزقت السما شوكلاطه وسحبت سما مخده واتكت تشوف في ما تبقى من الفيلم
//
//
اما رسلان ف خش للحوش بعد ما صكر من سما
لقى امه واعيه
رسلان>> حاجه مازلتي واعيه
امه>> عارفني ما نطمنش الا لما نحقك خشيت
رسلان ضحك>> كيف بديري بعد نجوز امالا
امه>> اول حاجه مانكش بعيد مني ثاني حاجه هي تكون بنت حلال وتريحك ح انتهني عليك
رسلان ابتسم>> ان شاء الله
امه>> ما تبيش تخليني نشوفها ؟
رسلان>> امي شرحتلك كم مره وضع البنت وما لهش حد و عمها طلب انه كله يكون كلام رجاله ، وانا البنت شفتها ونبيها وعاجبتني
امه>> اهم شي انت متريح
رسلان>> متريح انتي ماتفكريش بعدين ساهل ح تشوفيها تو بعد الدفع نشيلك لها
امه>> والله ؟
رسلان>> من عيوني ، خشي تريحي
خشت امه لمكانها ، عزق المفاتيح وطلع تلفونه من جيبه و خش داره غير دبشه و رقد وسط زحمة تفكيره
//
//
يوم الجمعة “يوم الدفع”
كان كيف الايام العاديه بس في فرق بسيط انه الكل متوتر وكلهم خايفين سما تكنسل او تتعب عليهم خصوصاا انها مش راضية ، ماكانش في حد غير العيله بس ماحد براني
تغدو غدا الجمعة مع بعضهم و ركبو يتريحو على ما جو الرجاله
سالمة >> ماكلمتيش رسلان سألتي كم حد جاي
بحتت فيها وسكتت
سالمة>> خلاص را تاكليني
ميرا>>كذا عطوني شحن تو موسى يرن يلقاه مقفل يدير قصة وانا معنديش راس
روان>>الخوف كويس😂 “وعزقتلها الشحن”
سالمة>> كاين برا مبدري تغدا معاهم
ميرا>> ما شفتش انا نضت متأخر كاني في غيبوبه
رندة >>كملتيها لنا بناتتت الصوت بنات اسس كان روحتي مع راجلك ارحم😒
ميرا ضحكت>> والله مش عارفه كني تقول ليا اسبوع مش راقده
سالمة>> اهو العصر يآذن صبن صبن
//
//
بعد اذان العصر ، روحو من الصلاة خشو للصالون
شويه هكي وجو الرجاله الي من طرف رسلان
كان باته وعمامه الاثنين وخاله الكبير و راجل اخته و اسير صاحبه
اما منه نحن فكان عمو عاشور و عمو احمد وموسى و خالو مجيد ومراد ولده و تيح صاحب موسى اللي كان فرد من العيله اصلا
و سلمو على بعضهم وبدو يحكو وعلى خشت موسى
موسى>> القهوة واتيه؟؟
سالمة >> واتيه هي كلم حد يشيل معاك الحلويات
موسى>> غير خليني نشيل القهوة تو نرد
سما >> شنو ما قالكش شي ؟
سالمه>> دوبهم كيف بدو بسم الله
حكى بات رسلان وقاللهم لو عندكم شروط نحن جاهزين
عاشور >> نحن شرطنا الوحيد انه البنت اتريح كيف ما تعرفو البنت ماعندهش حد وحكيتلكم ظروفها كلهم ، مانبوش شي غير انها ما تشكيش منه ويحافظ عليها
حكى عاشور الكلام هضا وسكت ، رد عليه بات رسلان
اتفقو وكل حد يقول كلمه من عنده كانت طلبه ودفع وخطبه وكله مع بعضه
أحمد >> يبقى مادامنا متفقين العرس مش حايكون في وقت قريب
عاشور بحت في احمد
محمد>> بينه وبينها ماتعرفش النصيب نحن خلينا توا ننوا خير وان شاء الله كله ح يتيسر ونحن مش معترضين على شي مدام كل حاجه بالاتفاق
أحمد >> معناها على بركة الله
شربو الرجالة قهوتهم ودفعو المبلغ المتفق عليه وموسى وتيّح قعدو يهدرزو مع اسير صاحب رسلان وانسجمو معاه
اسير>> بنكلم رسلان قاعد يحرق من مبدري يرن
موسى ضحك>> اطلع برا الصور فاضي مافي حد
تنحنح اسير وطلع
في نفس اللحظة
سما >> تي كنا خذا القهوة ومعش خش
روان >> استني بس خليني نقرب نطلع من الصور بلكي نسمع حاجه
وفي وقتها رن اسير على رسلان
رسلان >> شن صار كنك ماترد
اسير >> تي نحن اول ما خشينا وانت ترن ، ماصار الا كل خير شن ح يسير يعني يا اوڤر😂
رسلان>> بلا حناطه وقولي اتفقو
اسير >> اكيده ما لزونش يعني 😂
رسلان>> حتبان لك خفة الدم هذي
اسير >> خليني نخش سيبت الجماعة وطلعت نكلم فيك
رسلان>> تي اوكي دروحك درت جماعة تم تطلع كلمني اه
اسير>> احترمني عشان نهدرزلك شنصار بعدين
رسلان>> را نفلم عليك مش نحترمك
اسير>> تو نخش نقوللهم رسلان قال معش يبي مازلنا فيها 😂
رسلان >> صكر را بجد ح نفلم 😒😂
صكر اسير وبرم يبي يخش شاف روان ماسكه تلفونها وتمشي شور جهة الباب اللي يخشش عالرجالة
اسير تنحنح رفعت روان راسها وبحتت فيه
اسير >> ابرمي وردي بسررررعه
روان بصدمة سكتت و برمت عطاته بظهرها ومعش شافتله وهوا ابتسم وخش
خشت روان تجري جوا
سما >> كنه وجك
ميرا>> حي علمك شن سمعتي
رنده>> تي احكي كنهم تعاركو ولا شن
روان بحتت في سما >> حقني صاحب رسلان طالعه برا حي علمي كان ما يقولها الاحمد ولا موسى
سما >~ اسير ؟
سالمة>> هضا لي قلتيلي عليه
ميرا بحتت في رنده>> اسير ما اسير😂😒
رنده>> صاحب رسلان ما صاحب رسلان😂
سالمة بحتت فيهن>> عندنا قعده بعدين غير مشن اليوم بس
سما>> ماتخافيش مش ح يحكي شي شن الهبال هضا بيقوللهم شفت روان طالعه يعني 😂
روان>> مش عارفه بس خفت
سما >> يعني ما سمعتي شي🙂
روان>> ما لحقتش نوصل اصلا انا دوبي خشيت قالي ابرمي ردي
رندة>> يغار يغار لا من عشق غار 💃🏻
روان >> بالكبايه في نص راسك راه
على خشت منى عمتهن >> في شن تراجن الرجالة طلعو كلمن موسى يعطيهم الحاجات لي بدزوهن
سالمه>> هي ميرا رني
ميرا بحتت فسالمة😒 ومسكت تلفونها ورنت عليه
موسى>> ايوه
ميرا>> شوف حد منهم بندزو معاه حاجات لهل رسلان
موسى>> تو نجيك
صكرت ميرا وضبح موسى الاسير
اسير >> ايوه
موسى >> قتلك راجي لحظة ما نندريش شن بيدزو غادي
اسير ضحك>> تمام 😂
خش موسى خذا الحاجات و مدهن الاسير
موسى>> عطيهن الرسلان
اسير >> مانوعدكش يوصلن
موسى>> صحتين😂
طلعو الرجالة وركب اسير السيارته وطلع وراهم
تيح>> شكلهم عرب كويسين
موسى>> عقبال دفعك
تيح>> يارا زمري 🙄
موسى >> تي تقول نعزم فيك عالموت ازح
تيح>> هو موت بالنسبه ليا وللي حتحصل فيا
موسى>> ماتكثرش معايا اه😒
تيح>> انت اللي بديت😂
على خشت أحمد >> شن القربج لي عطيته الاسير هضا 🙄
موسى>> حركاتهن جوا اكيده غصبا عن سما دازاته
أحمد ضحك>> كيف ما نحق فيك حركات سالمة اختك هذينا😂
موسى >> اكيده 😂
تيح>> موسى انا بنمشي نطق شور الحوش
موسى>> تم بيناتنا الو
تيح>> تم
خش موسى جوا
فاطمه>> مفتاح طلع؟
موسى>> كنه توا طلع
فاطمه>> ناديه ناديه عقبتله قرعته حرام
طلع موسى ضبح له
تيح>> تي شن فيه
موسى>> امي تقول ضانيتك وناسيتك معقبه قرعتك
تيح>> انقنها فطومه
موسى>> شوية احترام باه😒
خش جابله الحاجات
تيح>> عندنا فطومه ودلع وتبيني نجوز
موسى>> هي غير تحقك بس احتمال تلقاها خاطبتلك بلا ما تحكي
تيح>>خليني نطير معناها😂
عندهم جوا
احمد>> كل شي كيف ما تبي حتى العرس دويت فيه
سما >> ربي يخليك ليا
احمد>> تدلل العروس
سما>> احمد !
احمد >> خلاص طالع 😂
طلع احمد
روان>> تي هيا رنييييييييي لكي ساعه اكيده وصلو من مبدري الساعه قريب ٩
سما>> اخرلك مره تحطيني فموقف هكي 😒
مسكت تلفونها حطت رقم رسلان و رنت
رسلان>> كان نحساب جيبت هلي تخليك ترني را جبتهم من زماننن 😌
سما >> رسلااان 🙄
رسلان ضحك >> ايوه😂
سما >> اسير جاك
رسلان>> من امتى الدلاله هذي؟
سما>> ان شاء الله خير كنك 😒
رسلان>> يعني رانه بدال ما تسألي عليا تسألي عليه😂 انتي اللي ان شاء الله خير
سما>> ما قتلكش كيف حاله انا نسأل طق فيك ولالا عشان دزيتلك معاه حاجات لكي ، الهلك يعني
رسلان ابتسم >> الهلي اهااا ، له ساعه مدرس السياره يهدرز عند وجي ما عطاني شي المودر
سما >> عموما في كيس ابيض فيه عشا هضا له
رسلان>> الاسير؟ وخير ان شاء الله كنه هو اللي جاي يخطب ولا هو الي دفع فيك 😒
سما >> اللهم طولك ياروح ، تي من روان مش مني 🙂
رسلان>> روان محد مهتم؟ 😂
سما ضحكت>> هي اه😂
رسلان>> كيف صار اهتمت ولا شن😂
سما >> حاليا لا😂 بس قالت لي كنا متفقين انه هو انظر شن شرالها وهي بتردها له عموما يعني قطاف بينهم ف قالت لي قولي الرسلان يقوله هكي ١-١ متعادلين
رسلان ضحك >> شكلها ح تكون حرب
سما >> شكلها 😂 خلاص باي
رسلان >> تردي لما نرن اه
سما تنهدت>> ان شاء الله خير
//
//
صكر رسلان من سما ومشا عند اسير
رسلان>> طلع الي جايبينه ليا يا مسخ
اسير>> تي نسيت امه بكل
رسلان>> نسيت اه خساره ما حاسبينك بس
اسير >> والله جد 😂
رسلان>> ومش اي حد اخرى 😂
اسير رفع حاجبه
رسلان فتح باب السياره ومدله الكيس >> هاك خليني نخشش الحاجات جوا على ما استوعبت انت الصدمه
خشش رسلان الحاجات الامه و اخته اللي فرحن بيهن رغم انهن لحد توا ما شافنش سما
رسلان>> عقبولي اه جيعان مش واكل شي
امه>> باهي
طلع الاسير اللي مازال ماسك الكيس
رسلان>> قالت لك هكي واحد واحد متعادلين
اسير>> من قال؟
رسلان>>روان قالت السما قوليله هكي
اسير ابتسم
رسلان >> شنو بدينا؟
اسير >> تي ما قالت لك واحد واحد يعني درتلها حاجه وردتها ليا وخلاص كملت
رسلان >> خلاص كملت اهاااا 😂
اسير>> دابيني حصلت تعشاية خليني نتوكل معندي عليش قاعد قدام وجك
رسلان>> من يوم وغادي ب تحكي بأسلوب توا خاطب انا😌
اسير >>هضا ماناقص 😂
وحرك السيارة ومشى
//
//
عند البنات فالليل بعد كملت الحوسه وكل شي رد كيف ما كان كانو الكبار يهدرزو حذا جدتهم
اما البنات كانن في صور المطبخ
سالمة>> بنات امتحاناتي انا يبدن الاحد حي عليا
سما >> ما فتحتيش فيها كتاب انتي
سالمة>> والله ماعندي نفسيه ولا نيه
سما >> سالمة خلاص اخر سنه خليها تبلط كيف ما تبلط
سالمة>> المشكله انا شايله معايا ماده اصلا من السنه لي قبلها
رنده>> اتقدعن خاشه صيدلة تحسابها لعب
سالمة بحتت فيها >> مادخلكش
روان>> يييييييه بيبدن عاد
على خشت موسى
ميرا >> ياربي منبيش نروح
سما >> ميرا فكينا من حسه
صبت ميرا >> بتروح؟
موسى >> اه هيا
ميرا>> يعني بكرا ماعنديش جامعة انا راه
موسى>> ميرا ؟
ميرا>> اوففففف ” ومشت جوا تلبس”
موسى>> صقر مبروك😂
سما >> الله يبارك فيك ، قبل بنقولك عقبالك 😭😂
موسى ضحك >> لا عادي قولي
على طلعت ميرا >> شن تقول
روان >> راجلك خاطره يجوز اخرى شكله
ميرا >> وانا قلت لا ؟😒
سكتو كلهم وبحتو في موسى الي مادارش اي ردة فعل غير انه صبا وبحت في سالمه >> امي جوا؟
سالمة>> اه
وخش موسى
روان>> ميرا عاد مش هكي
سما >> حسابك معايا بعدين شن الاسلوب هضا ؟
ميرا >> انتي اكثر وحده عارفه اللي فيا
سما >> ماتعودنش عالجلاطه وقلة الادب هكي متربيين نحن ؟
ميرا>> ما قلتش شي شن الاوڤر هضا نبصر ما حتى هوا كان يبصر مفروض انا لي نزعل اصلا 🧘♀️
سما >> تروحي تعتذري منه فاهمه؟ ما قلنالكش حبيه وموتي فيه بس عامليه ب احترام
ميرا >> اوووووف اوف كلكم ضدي وواقفين معاه
سما >> صكري فمك را نصبيلك
ميرا>> انتي تنصحي فيا شوفي كيف تعاملي في رسلان!
سما>> ماتدخليش المواضيع في بعضهن موسى ولد عمك وراجلك يعني مانعرفوش امس ولا اليوم ، بس رسلان اليوم كيف قعد خطيبي ويدوبك نعرفه ف نعامله كيف ما نعامله بعد ما يقعد راجلي ساهل
سالمة>> بنات وطن صوتكن خلاص ماصارش شي
روان>> اهدن خلاص حصل خير
طلع موسى من جوا وامه لاحقته >> هاك عقبتلك عشا
موسى>> لا والله مافي نيه راه
امه>> خوذه بس تجوع بعدين الليل طويل وماعندك من يبي يديرلك
ميرا بحتت في سما وبصوت واطي >> هاه شفتي 😒
سما >> بتسكتي ولا لا ؟
سكتت ميرا وطلع موسى >> هي تصبحو على خير
كلهم>> تلاقو الخير
سما >> ميرا🤌🏻
ميرا>> تي باهي فهمت خلاص 🙂
//
//
روحو موسى و ميرا للحوش و طول الطريق ما حكوش مع بعضهم بكل
خش موسى حط العشا فالمطبخ وخذا دبشه وخش يدوش
ميرا>> ياربييي مانعرفش نعتذر من حدددد 😡
غيرت دبشها ولمت حوسة الدار على طلعت موسى من الحمام
ميرا>> نحطلك تاكل ؟
موسى مصبي يمشط في شعره >> لا بنطلع
ميرا>> وين ؟ الوقت متأخر
موسى>> للحوش الثاني
ميرا>> موسى عاد مش بقصدي يعني قلتها بعدين انت الي كنت تبصر يعني عادي حتى انا بصرت
موسى>> بس انتي ما قلتيهش ببصاره ماشفتيش روحك كيف وانتي تحكي بجديه ! ماشفتيش نظرة الي عادي مش فارقه معايا اللي فعيونك
يعني كأني ما نسوش بكل ، مانبيش شي انا نبيك تحترميني
وكانت اول مره موسى يعلي صوته بطريقة هذي لحد ما خافت
ميرا >> انا اسفه
موسى سكت
ميرا >> والله اسفه ومش قصدي بس هكي طلعت مني بدون ما نفطن
موسى>> عشان انا مش فارق معاك ماتحسبيش في كلامك لما تقوليه
ميرا مسحت دموعها>> وممكن فارق عشان هكي قلتها
موسى >> ميرا ماتلعبيش ب اعصابي
ميرا >> باهي ما تمشيش عارفتك ح تطلع وتمشي للمسبح و تروح عالفجر
موسى >> بعد ترقدي تو نطلع
ميرا>> وراس موسى ما تطلعش
موسى جا مقابلها >> وعليش
ميرا>> هك منبيكش تمشي وانت زعلان مني انا غلطانه اصلا
موسى مسح على راسها >> باهي ماتبكيش خلاص
ميرا >> يعني مش ح تمشي
موسى>> لو قعدتي تبكي ح نمشي
ميرا مسحت دموعها >>باهي خلاص سكتت هاه
موسى ابتسم
ميرا>> نسخنلك ؟
موسى>> باهي
ومشت ميرا من حذاه غسلت وجها وخشت للمطبخ ، وتنهد موسى على قلبه اللي كل ما بيقسى يرد يحن
//
//
في الجامعة عند البنات
كانت رندة طالعه من كليتها وماشيه شور البنات بروحها كانت الجامعه شبه فاضيه لانه اغلبهم كملو محاضرات وروحو ، سمعت صوت حد يمشي وراها التفتت لقاته زياد يمشي بس بعيد عليها
خافت وسرعت خطواتها
زياد>> استني بنحكي معاك
رندة ما ردتش وكملت مشي سريع
زياد سرع خطواته وقرب منها>> بنحكي معاك انا قتلك
رندة>> شن فيه ؟ شنو تبي مني
زياد>> نبيك انتي
رندة>> حول من قدامي خليني نمشي
زياد>> مش ح نحول لحد ما تردي عليا عالفيس ولا تعطيني رقمك
رندة>> انت مريض ولا شنو؟؟
زياد>> لا انا البشع اللي مش عاجبك
رندة توترت>> زياد توا وقت مرواحتنا وح يجي عمي ولا خويا يروح بينا ويحقك تقعدلنا قصة
زياد>> اخر همي مش مدور حد
رندة >> والله العظيم نعيط ونلم متاعين الامن عليك مش طبيعي انت ولا شنو ما نبيكش مش بالغصب
زياد >> لا بالغصب وحا تشوفي!
على صوت روان تنادي من بعيد
روان >> رندة شنو فيه
وخر زياد من قدامها >> يا انا يا انتي
مشى زياد و جت روان لرندة
روان>> حي علمك كنك كنه وجك ؟ شن دارلك احكي
رندة بخوف >> ما فهمتش شن يبي مني المريض المتخلف يبيني نحبه غصب
روان >> مش من جده هضا معقوله هكي ؟
رندة حطت يدها على قلبها >> انتي ما شفتيش وجه ما شفتيش نظرته وهوا يهدد فيا
روان >> اهدي بس تعالي معايا ميرا في الكافيتيريا
مشت رنده مع روان وخشن على ميرا اللي نفجعت لما شافتها
ميرا>> تي كنكم؟
حكتلها روان شن صار
ميرا>> ما تخافيش مش ح يقدر يدير شي ديما اللي يهدد كذاب
رندة >> خوفني الحقير هض
ميرا >> معش تصبي بروحك ديما خلي معاك حد
رندة>> سيبت البنات وكنت ماشيه شوركن نسمع فيه يمشي ورايا يخوف يخوف مش طبيعي والله
ميرا >ا اهو موسى يرن شكله برا
روان>> باهي ردي عشان ما يديرش موضوع زي هضك اليوم
نفخت ميرا وردت >> الو
موسى>> برا انا
ميرا>> اوكي طالعين
//
//
عند سما في الليل اللي من يوم الدفع رسلان ما حكش معاها وفنفس الوقت كانت متريحه عشان ماتبيش يتعلق بيها او مرات هي اتعلق بيه
سالمة>> وين سرحانة؟؟
سما >> شي كالعاده عقلي يشيل ويجيب ، شن درتي في اول امتحان ؟
سالمة >> نص ونص “ومسكت تلفونها وبان على وجها الصدمه”
سما بحتت فيها >> تي شن فيه ؟؟
سالمة مدتلها التلفون>> شوفي شوفي حسن شن دازلي
سما >> تي شن داز ووين
سالمة>> ب ايميل جديد عالماسنجر دزلي شوفي
سما مسكت التلفون وقرت المسج
” انا قاعد في شارعكم ونص واعي ونص لا راه😂”
سالمة تباوعت مع الصور>> حي علي امي وحي باينه عليا سيارته نهاية الشارع مدرس
سما >> اهدي بس انتي مش شورك ب شي كلهم عارفين انك معش تبيه وشفرتك وغيريتها لو صار اي حاجه انتي ما لكش بيها دخل
سالمة>> لو طلع حد تعارك معاه هضا مش واعي يا سما كان فطنله أحمد ح يطلع يدقدقه وحسن مرات يضرب احمد يقتله لانه مش فاطن الروحه مانبيش مشاكل حي علي امي
سما >> شن نديرو باهي مش ح يدير شي هو قالك قاعد فالشارع بس خليه قاعد تو يمل ويمشي
سالمة>> احمد ماسك و يطلق عالفجر ح يروح يحق سيارته برا
وردت جتها رسالة ” لو ما رديتيش عليا ح نطلع فالشارع نعيط ب اسمك و نقلب الشارع على روسكم”
سما >> لالالا زودها هضا بكل
سالمة بخوف >> سما حي عليا را ينزل بابا تخيلي يجي موسى بعدك موسى ما معش تفاهم ح يقتله على طول
سما >> استني بس ح نحاول نشوف حل ” وصبت سما ”
سالمة>> تي وين ماشيه شن بديري
- يتبع الفصل التالي اضغط على ( رواية هلع ) اسم الرواية