رواية سفاح ليلة الزفاف (كاملة جميع الفصول) حصريا عبر دليل الروايات بقلم عادل عبد الله
رواية سفاح ليلة الزفاف الفصل الاول 1
الساعة الرابعة عصرا دخل رجل خمسيني الي قسم الشرطة يتقدم ببلاغ وتبدو عليه علامات الخوف والقلق !!
الضابط : ايوه يا استاذ حضرتك عايز أيه ؟
الرجل : جاي اقدم بلاغ .
الضابط : تقدم بلاغ بأيه ؟
الرجل : انا خايف يكون بنتي وعريسها حصلهم حاجة في شقتهم !!!
الضابط : يعني اي ؟ وضح تقصد اي بالظبط؟
الرجل : بنرن عليهم جرس باب الشقة مفيش حد بيرد وبنتصل بتليفوناتهم مقفولة خبطنا علي الباب كتير بردو مفيش فايدة !!!
الضابط : يمكن نايمين .
الرجل : لا يا فندم ، احنا رنينا الجرس كتير وخبطنا علي الباب لدرجة ان سكان العمارة كلهم اتجمعوا ومفيش اي حد بيرد علينا لمدة اكتر من ساعة .
الضابط : هما متجوزين لسه جديد ؟
الرجل : ايوه يا فندم لسه فرحهم كان البارح والنهاردة الصباحية .
الضابط : طيب انا هاخد قوة واروح معاك وهنحاول تاني ولو اضطرينا هنفتح الشقة ونشوف حصل اي .
ذهب الضابط بصحبة الرجل الي شقة العروسين وحاولوا كثيرا حتي اضطروا لفتح باب الشقة بالقوة !!
عندما دخلوا الشقة وجدوا فستان العروسة ملقي علي الارض داخل غرفة النوم وبعض ملابسها و بدلة العريس وبعض ملابسه مبعثرة علي الارض !!!
لا توجد اي مظاهر لاستخدام العنف داخل الشقة كما لا توجد اي مظاهر لاستخدام القوة في اقتحام الشقة سواء علي الابواب اوالنوافذ !!!
ادوات المطبخ في اماكنها تماما ماعدا كوبين موجودين في غرفة النوم وعليهم اثار عصير فراولة !!
الضابط : واضح ان مفيش اثار لأستخدام العنف داخل الشقة ، اكيد بنتك وعريسها راحوا يقضوا كام يوم من شهر العسل في اي مكان .
الأب : لا يا فندم هما كانوا هيسافروا فعلا وحاجزين السفر لكن بعد ٣ ايام .
الضابط : يمكن حبوا يسافروا بدري وغيروا ميعاد السفر وسافروا النهاردة الصبح او بالليل بعد الفرح ؟
الاب : لا يا فندم مستحيل .
الضابط : اومال تفتكر هيكونوا راحوا فين ؟
هنا صرخت الأم باكية : انا عايزة بنتي يا حضرة الظابط ، انا حاسة ان بنتي حصلها حاجة وحشة !!
حاول الاب تهدئة زوجته ثم قال : معرفش يا فندم ، بعد اذنك انا عايز اعمل بلاغ بغياب بنتي .
الضابط : بص يا استاذ انا مش هقدر اعمل بلاغ الا بعد مرور ٤٨ ساعة علي غيابهم ، انما حاليا مش هقدر اعمل البلاغ ده بشكل رسمي ، لكن انا ممكن احاول اساعدك بطريقة شخصية واعملك بحث في عدة اماكن نحاول نطمن من خلالها ، ولو وصلت لنتيجة هاتصل بيك واكلمك ، قولي اسم بنتك واسم عريسها .
الرجل : بنتي اسمها مروة ٢٤ سنة وعريسها اسمه كريم ٣١ سنة .
عاد الضابط لقسم الشرطة وذهب لرئيسه المباشر .....
الضابط : عندي خبر مش كويس يا فندم .
رئيس المباحث : استر يارب ، خير يا امجد فيه ايه ؟؟
الضابط امجد : فاكر سيادتك اللغز اللي كان مساعد الوزير عامل اجتماع في المديرية بسببه من حوالي شهرين ؟؟
رئيس المباحث : قصدك حادثة العرسان اللي اتكررت ٥ مرات السنتين اللي فاتوا ؟؟
الضابط : ايوه يا فندم ، اتكررت عندنا في دايرتنا النهاردة !!!
رئيس المباحث : عندنا هنا ؟
الضابط : ايوه يا فندم .
رئيس المباحث : اي اللي حصل ؟
الضابط : عريس وعروسته يوم الصباحية اختفوا في ظروف غامضة واهلهم مش عارفين عنهم حاجة .
رئيس المباحث : هنا في دايرتي انا ؟؟؟
الضابط : للأسف ايوه يا فندم .
رئيس المباحث : أمجد ، انت دراعي اليمين هنا في الدايرة .
الضابط امجد : طبعا يا فندم .
رئيس المباحث : لو مش قدرنا نكشف غموض اللغز ده هيكون شكلنا وحش اوي .
الضابط : تؤمرني معاليك ؟؟
رئيس المباحث : نزل رجلتنا في كل شبر في الدايرة يعرفوا اي اللي حصل بالظبط ؟ مش عايز حاجة عن العريس او العروسة اللي اختفوا دول الا لما نكون عارفينها ، مش عايز حد ينام يا امجد وانا ذات نفسي من همشي واروح بيتي الا لما احل اللغز ده .
الضابط امجد : اوامرك يا فندم ، لكن مش هنستني لما يمر ٤٨ ساعة علشان الاجراءات تكون قانونية ؟؟
رئيس المباحث : مفيش وقت ننتظر ، كل دقيقة هتعدي هتبعدنا عن حل اللغز ، اتحرك فورا يا امجد .
الضابط امجد : اوامر سيادتك يا فندم .
رئيس المباحث : انا عايز اعرف رأيك وتخيلك للحادثة دي وللحوادث المشابهة ممكن تكون بسبب اي ؟
الضابط : والله يا فندم مفيش اي معلومات تحت ايدينا دلوقتي علشان نشتغل عليها ، لكن اللي لافت نظري يا فندم ومندهش بسببه ان كل البلاغات المشابهة اللي فاتت بتكون بأختفاء عريس وعروسته بعد الفرح بيوم او يومين واقصي حاجة اسبوع ، وبعده مش بيظهر أي أثر او دليل للوصول لأي معلومة عنهم !!
رئيس المباحث : الأغرب ان كل بلاغ بيكون في مكان غير التاني ، مفيش بلاغين من البلاغات المتشابهة في نفس المكان او حتي في نفس المحافظة !!!
الحلقة ٢ بعد قليل
•تابع الفصل التالي "رواية سفاح ليلة الزفاف" اضغط على اسم الرواية