رواية هلع كاملة بقلم اية عبر مدونة دليل الروايات
رواية هلع الفصل الثاني و العشرون 22
سما >> تعرف بابا يعني ! اشتغلت معاه وشفته!
رسلان نزل الاكل من يده وبحت فيا >> شن خطرلك تسألي ؟
سما >> عارفني مانقدرش نقعد ثانيه بدون مانفكر عقلي يشتغل اربعه وعشرين ساعه وكل مره جايب شي جديد وكل مره يخطر عليا شي
رسلان >> وشن جابلك المره هذي
سما>> اخر فتره هكي قعدت نفكر فيك ، يعني من قبل كان تفكيري ملخبط مش همي من الشخص يلي بيشاركني حياتي توا كيف استوعبت انه في حد معايا وبديت نركز فيك ، كنت ديما حايسه مابين ماما والقضية و ميرا اختي والمستشفيات معش فضيت اصلا اني نفكر في حياتي او حياتنا يعني
رسلان ضحك>> وشن لقيتي ؟
سما >> نحكي بصراحه؟
رسلان>> اخر صراحة ولو قلتي حاجه وندمتي اعتبريني ما سمعتش
حاولت نسيطر على توتري ونفسي المتلخبط بس لازم نقول انا شن نحس بلكي نفهم روحي وبلكي نتريح و يحول الخوف اللي مسيطر على حياتي ، خذيت نفس وبحتت فيه
سما>> رغم الظروف الصعبه اللي مريت بيهن بس تخيل قعدت نقول شن كان ح يسير لو ما فيش رسلان، جيتني في نهاية السنة الاولى من القصة يلي صارت ومن وقتها وانت حوليا رغم رفضي لكي فالبداية ورغم كيف كنت نتهرب منك وما نردش عليك بس يوم عن يوم قعدت لما نبي نطمن نمشيلك ولما نبي نحس اني مش بروحي برضو نجيك مش فاهمه ولا عارفه ليش بس نحس ربي دزك ليا عشان تحميني عشان اطمني، كل ما نفكر شن كانت حتكون حياتي والسنتين هذينا كيف حا يمرن بدونك ما نقدرش نتخيلهن ابدا
رسلان ابتسم >> وانا عايش عشان نكون جنبك
سما >> باهي ليش ؟ عليش ادير هكي لوحده ماعطاتكش حتى فرصة انك تقرب منها ولا حاولت حتى اني نتعرف عليك ، كنت نفكر في روحي والمسؤوليات يلي عليا وما فكرتش فيك خليتك بالاسم متجوز بس ،رغم هكي صابر و ماحاولتش ادير اي شي غصب عني اول مره نحكي بصراحة هكي بس بنفهم ، انا مش صغيره ونفهم يعني شن حايكون بين اي اثنين متجوزين ، ياسيدي غير الشي هضا مثلا ماكنتش من الناس اللي نديرلك في غدا مثلا او اني انوض معاك للعمل ورغم هكي ولا عمرك حسستني اني مقصره
رسلان>> بس انا كنت نفكر فيك ، وكنتي ديما في بالي ماننكرش فالبدايه كان الموضوع اني زعلت لما انتشر الخبر فالشركة وسمعنا يلي صار ، وبعد فتره ولما حكيت مع عاشور وصدفت انك انتي لي تكوني ليا وزاد حكالي عليكي وشنصار في امك قلبي وجعني ، بس بعدها انا بروحي مش فاهم شن لي صار ، بالنسبة لاني ماخذيتش منك شي بالغصب ف هذي مش رجوله شن الفايده اني نجبرك على شي ؟ لا انا ح نكون راضي ولا انتي و الشي هضا مش اول حاجه نفكر فيها ، ما ننكرش اني نبيها معاك “وضحك”
سما انحرجت و حاولت تغير الموضوع >> ممكن مازلت تحس بنفس الشعور انك زعلان عليا بس مش فاهم عشان قعدت تشوف فيا من قريب وحسيت بيا اكثر
رسلان مسك كباية الميه>> او ممكن عشان نحبك مثلا ! “وشرب الميه”
توترت ووجي قعد الوان بزيادة، معش عرفت نكمل كلامي ولا نصبي 😭 قعدت متنحه ومش فاهمه هو يحبني انا ؟ هو قالي انا نحبك؟
رسلان نزل الكباية من يده وكسر التوتر لي انا فيه >> نردو لموضوعنا ، كنت نعرف باتك اها لاني انا بديت نشتغل وباتك كان مدير وقتها
سما>> كم لكي ؟
رسلان>> خمس سنين ، اشتغلت معاه ثلاث سنين وسنتين بعد ما توفي
سما>> كنت تعرفه؟ تعرف شغله ! كان في حد مثلا داير معاه مشكله حد ممكن يكون سبب ف يلي صار؟
رسلان>> انا شتغلت معاه في نفس المكان وهوا مديري يعني كان اللي بينا اوراق وشغل وصباح الخير و السلام عليكم كان يأمن فيا عالحسابات وكل الشغل كان عندي بس غير الشغل ماكنتش نعرف شي
سما >> سامحني كثرت عليك بس انت عارف اني ملخبطه ومش فاهمه شي
رسلان>> عارفك وفاهم بس ممكن تهتمي بصحتك وبحياتك وتبطلي تشغلي دماغك علي ابسط شي، راك ما تاكليش كويس ولا ترقدي كويس معش نبي نشوفك هكي
سما >> كول الاكل صقع ونحن ما كلينش حاجه”وابتسمت”
رسلان>> ماه كنت في محقق واحد قعدت في اثنين عندي فنفس الحوش 😂
سما>> خلاص هاه سكتت كول 😂
//
ثاني يوم
“رسلان”
نضت بعد ما كان عندي تحقيق اليوم لي قبله مع سما، وفوق التحقيق كان في حاجات هكي متلخبطه عندها مش فاهمه روحها هي شن تبي ! بس انا كنت فاهم وعشان هكي قتلها اني نحبها عشان بجد انا نحبها ❤️
ووقتها توترت و ارتبكت و خذت عقلي وقلبي برد فعلها
نضت الصبح وكانت راقده ، طلعت وقبل مانمشي شور الشركة خطمت على اسير
اسير>> صبح يافتاح
رسلان>> اي فتاح بشوفت وجك
اسير>> على اساس وجهك لي بيفتحها عليا
رسلان>> كذا النبي مد قهوه
اسير مدله الكبايه >> مطلعتك بلا فطور🫢
رسلان >> لاء مابيتش نتعبها بس
اسير>> اهو تعرف كيف تعامل الناس كنك تستحقر معايا😒
رسلان>> وانت من قالك ناس
اسير فك منه كباية القهوة>> عدي باه خلي الناس يشربوك قهوة ويستقبلوك من صبح ربي😂
رسلان>> غير اسمعني بس
اسير>> احكي لكي ساعه بتسمعني
رسلان>> امس سألتني لو اني نعرف باتها
اسير>> انا مافهمتش سما عندها بطيء استيعاب يعني لكي قريب سنة مابين معرفه وخطبه و زواج وتوا كيف ركزت انك تعرف باتها ماه تعرف انك تشتغل فالشركة كيف اشتغلت فجأة بالاسقاط النجمي😂
رسلان>> نازله عليك خفة دم عالصبح ؟ سما تفكيرها كلها فالقضية وباتها وامها وحياتها ماكانش شغلها انا ولا فكرت فيا عشان هكي ما سألتش
اسير >> باهي وانت شن رديت؟
رسلان>> قتلها انه مديري فالشغل شن ح نقول يعني
اسير>> باهي وهضا لي ينقال اصلا عليش تفكر مالصبح
رسلان بحت فيه>> انا خايف عليها من التفكير خايف انه تفكيرها يتعبها قعدت نرد عليها باختصار ف اي موضوع يخص القضية لاني نشوف فيها كيف تتعب وتمرض بعد ما تصير اي حاجه
اسير >> انت ادير هكي عشانها وعشان صحتها وعشان انت تحبها ف ماتفكرش
رسلان>> ان شاء الله خير، شنجوك انت مع روان؟
اسير >>يعني انا ممنوع نقول اسم مراتك وانت تقول عادي ؟
رسلان>> تو روان مراتك؟😂
اسير >> لا بس ح تقعد 😌
رسلان>> تي كيف صار
اسير>> متلخبط عشان هكي ماشي وحده وحده
رسلان>> انت تقعد هكي احسن لانك كان خشيت خبط ح تهبد الدنيا
اسير >> زي ما هبدتها انت😂
رسلان>> خرفي ، ماشي للشركه انا
اسير >> اوكي يا شركات 😂 كلها محاسب راك
رسلان>> احكي هنا عندك 😂
//
//
ميرا جت جنب موسى فالسرير>> صباح الخير ، احسن اليوم
موسى >> امتى نضتي
ميرا>> مالش نص ساعه عشان نديرلك فطور وتاخذ دواك
موسى >> خلاص الدوا
ميرا>> لا اكبر غلط انك تاخذ الدوا يوم وتسيبه لما تحس انك كويس هو مضاد يتاخذ ٣ ايام خلاص اليوم اخر يوم
موسى قربها عنده >> حاضر يا دكتورة قلبي انتي
ميرا ابتسمت>> اكيد مستغرب صح ، من زمان وانا نبي نكون معاك هكي بس كنت خايفه والله خايفه من اني نحبك وتعدي زي ما كلهم عدو، خايفه نقول لي فقلبي وبعدها تطلع انك شافق عليا بس ولما تلقاني نحبك تمل ، كنت كل ما نشوفك تحكي بتلفون هكي بروحك نخاف تكون شفت وحده غيري ولما البنات ببصاره يقولن تو موسى يمل ويجوز وحده اخرى ندير ف روحي مش معدله بس والله قلبي يقعد يوجع فيا و كلام عميمه فاطمه انك مش متريح معايا وديما تلوم في عمو عاشور عشان هو سبب زواجنا نقعد ناكل في روحي ونقول صح هو مش مبسوط معايا
موسى قاطعها>> بتبكي نزعل ، انا عمري ما نشوف الغيرك ولا عمره كلام حد اثر عليا كنت حاس بيك رغم انك وجعتي قلبي
ميرا>> يعني زعلتك صح ؟ شن ندير عشان تسامحني
موسى >> ومن قالك زعلان ؟ مانبيش شي غير انك تكوني معايا بس
ميرا مسحت دموعها ورفعت راسها وجت فحضنه>> ماتبش تاكل
موسى>> هي نصلي ونجيك
//
//
في الليل عند مُراد
مجيد >> انا معش كلمت البنات بكل انشغلت
عزيزه >> انا كل مره بنعزم سما معش تصير
على خشت مراد >> من بتعزمو
مجيد >> بنات عمتك معش كلمناهن عيب
عزيره>> ما كلمتهنش
مراد >> من يوم العزومه فحوش جدهن مالهش واجد معش كلمت حد
خش مراد الداره ومسك تلفونه بيرن على سما بس حس انه الوقت متأخر ابتسم واذكر انها كبرت واجوزت ومعش قعد الوضع كيف قبل
دزلها مسج ” بنرن عليك بس خفت الاسد يدير موضوع”
خمس دقايق وردت سما ” بلا هبال خويا انت رن ف اي وقت ياسامط😂”
مراد “بنطمن عليكن بس ”
سما ” مافيش جديد في شي نفس وضعنا”
مراد “تبي اي حاجه دوريني، را يقعد الاخ مش مريحك بس ”
سما ” مراد بلا تصغير عقل😂”
مراد >> تصبحي على خير😂”
سما “وانت من اهلها وتفرحنا بيك ”
مراد “هضا وجي كان عاد دورتك 😪”
حطيت التلفون فالشحن وصبيت ندخن برا
//
//
مرن كم يوم مافيهمش جديد غير عند ماما اللي كانت تعبانه واحمد عنده العلم بس ما يبيش يقوللنا !
و عاشور قال الموسى انه موافق على تيح ، يومها قبل ما يعطي عاشور الموافقه جت فاطمة عند سالمة فالدار
فاطمة >> باتك حكالي على مفتاح
سالمة بشوية عباطه>> شن حكالك
فاطمة قعمزت جنبها >> شوفي مفتاح زي ولدي و طول عمري حاسبته واحد من العيله و مش براني ، بس وين يجي الموضوع للزواج انا امك ومن حقي ننصحك وانتي على كيفك ، ساد خوك اللي ما قدرتش ننصحه ودار ما في راسه
سالمة>> ماما موسى راحته في قعدته مع ميرا صدقيني لو بعد عنها هكي موسى يزعل بس حاليا هو مبسوط والله و ميرا مش كيف ما انتي تفكري راهي كويسه بكل معاه وما تحبش تزعله صح في بداية زواجهم كان الموضوع صعب بس توا الموضوع اختلف وكلنا ملاحظين
فاطمة >> خليني منهم انا نعرف موسى كبير ويعرف مصلحته غير قلب الام شن اديريله ، اسمعيني انتي بس تعرفي مرض مفتاح وخليني نحكيلك كأني صاحبتك ، راه مريض قلب صح حالته ماتعتبرش خطيره بس ماتعرفيش قدام شن يسير ، ممكن يتعب اكثر او ممكن يعني في الامور لخرا مش حيكون كيف الشخص الطبيعي وهضا كله احتمالات بس حطيهن في بالك
سالمة دروحها تحشمت>> ماما را انا صيدلانيه وغير هكي بنت و نعرف 🙊 ف ما تخافيش هضا كله عارفته و عارفه حالت تيح بالتفصيل
فاطمة ضحكت>> معناها انا عليش ننصح يا فانص 😂
على خشت رندة >> كنكم ما كلمتوني نهدرز معاكم
فاطمة>> لا كلا انا ما فيا ما هدرز بنعدي نرقد نعست
سالمة>> ان حظرت الشياطين غابت الملايكه معروفه😂😂
رندة >> نننننننن بارده
فاطمه>> وطن صوتكن را ينوض باتك “وطلعت”
رندة>> كنها ماما شن كانت تقولك؟
سالمة>> كانت تحكيلي على مفتاح عشان مرضه وهكي
رندة>> وانتي شنو ؟
سالمة>> مافيش شي ح يتغير انا نحس اني متريحه بكل
رندة>> معناها ديري لي متريحتله
سالمة>> اهو يرن
رندة>> شويه ونجي راه 😒 قريب نكمل قراية
//
//
كنت يومها مش فاهمه كني من اول ما نضت وانا في بالي رسلان من يوم قالي نحبك وانا ملخبطه ، كل ما انوض ونلقاه فالشغل يوحشني ونقعد نبي نشوفه 🤦🏻♀️ وكل شويه بدون ما نفطن نمسك فالتلفون ونرن عليه بنسمع صوته ما فهمتش ليش اللخبطه هذي
صبيت حكيت مع البنات شويه عالقروب و دوشت و لبست و طلعت شعري مبلول وصقع على خشت رسلان قصاد المغرب هكي
سما >> مش طولت اليوم
رسلان >> ما قتلك اسير عازمني عالغدا بعد الشغل
سما >> لعند المغرب
رسلان حط المفتاح و التلفون عالطاوله وخش للدار ويحكي معايا>> طلعت من الشركة 3 على ما تغدينا و وقعدت معاه شويه طلعنا وصلته للمحل و كسدت معاه شويه وجيت ، فيه تحقيق ثاني ؟
ضحكت >> ليش واخذها تحقيق يعني نسأل عشان وحشتني مثلا
رسلان كان فاتح الدولاب يطلع في تيشرت يلبسه ، صكر الدولاب وبحت فيا >> عندك حراره اليوم ولا شنو ؟
وقرب مني حط يده على راسي >> لا كويسه “ومسك شعري ” كنه مبلول
سما >> تو شن الحناطه هذي 🙄
رسلان >> سما ما تلعبيش ب اعصابي مش ح نقدر ناخذ منك اي كلمه جديه عشان انتي اليوم كويسه بكرا ه تقلبي وانا قلبي خلاص والله
خذا دبشه وخش للحمام وانا ما قدرتش نرد عشان كلامه صح 🙂 كنت كل ما يقرب مني شويه نتوتر و نقعد خايفه ! بس اللي كنت متأكده منه اني ما نبيش نتعلق بيه كنت خايفه انه لما نحبه ه يمشي ويسيبني ، بس هو ما كانش فاهم او ممكن مل مني ، والله ما فهمت شن ندير ولا عارفه كيف هنتصرف
طلعت ولعت التلفزون فالصاله و قعمزت عالكنبه العيون عالتلفزون بس عقلي مش معايا
//
//
عند البنات
كانن وقتها يهدرزن
رندة >> بنات نحس فروحي واحشني ربيع بكل
سالمة >> وشن في بينكم اللي ترايفي عليه😂
رندة>> مافيش بينا شي بس ح يكون بينا😒
روان>> كيف ح طقي فيه؟
رندة>> مش عارفه عندي رقمه بس سماطه اني نرن صح؟
سالمة>> بكل 🙃
رندة>> انتي اس ماحد سألك “وبحتت في روان”
روان>> من رأي سالمه حتى انا 😂
رندة>> ما فيكنش جو بكل 🙂 ح يجي يوم و حتقعدن انتن الاثنين تحوسن فالمطبخ الخطبتي انا وربيع وقولن رندة ما قالت “مسرة العقابي”
على رنت تلفون روان >> خلوني عاد انا نشوف مستقبلي 😂 “وصبت من حذاهن”
رندة>> اسير ؟ 😂
روان هزت براسها وطلعت من حذاهن
سالمة>> انا مستقبلي قصدي تيح ما رنش عليا اليوم
رندة>> متعاركين ولا شنو؟
سالمة>> لالا بس مستعجل انه يدير دفع و كل شي رسمي عشان على قولته مايبيش يحكي معايا من ورا موسى
رندة>> وباهي شن فيه لو درتي خطبه هي مش فاتحه
سالمة>> ماقلتش شي حتى انا هو بس متوتر و كل مره بيحكي الموسى تصير حاجه
رندة>> تحبيه؟
سالمة >> نحبه لدرجة ما كأنيش حبيت وانخطبت قبله تصوري!
رندة>> ما سألكش بكل على الهم حسن ؟
سالمة>> معش تقولي اسمه الحقير ، لالا يعرف اني كنت مخطوبه من قبل طبعا لكن ما سألنيش بكل ، بس نحس بنحكيله انا نحس فيه خاطره يعرف بس متردد
رندة >> ياعيني عالي قعد يحس 😂
سالمة ضحكت على رنت تلفونها >> اهو يرن حياتي
صبت سالمة ترد ورندة المسكينه مسكت تلفونها
رندة >> امتى ترن حتى انت 😂
//
//
عند روان
اسير>> عارفه انك طول اليوم في بالي ؟
روان >> اليوم بس؟
اسير >> من اول ماشفتك بس اليوم بزيادة بكل
روان>>وشمعنى اليوم؟
اسير >> مش فاهم! كل يوم عن يوم نغرق اكثر ، كل ما نسمع رسلان يحكي على سما طول تجي في بالي انتي و اني بنكون معاك ونشوف فيك هكي وانتي معايا في نفس الحوش
روان>> حوش شنو 🙄
اسير ضحك>> تو سيبتي الكلام كله ومسكتي فالحوش😂
روان>> ماه يعني حوش ما حوش تحسه الموضوع كبر 😂
اسير >> روان انا نحكي جد بطلي اتهربي
روان خذت نفس وبجديه >> اسير اوكي المده لي نعرفو فيها بعضنا مش شويه بس برضو مش كبيره ، مانبيش ننخدعو فالبدايات ويكون هضا كله مجرد انبهار بس متاع البدايه بعدها نملو نبي نتأكدو صح نحن شن نحسو !
اسير >> بس انا متأكد ! وبكل اخرى
روان>> من شنو
اسير >> مني انحبك ، وماتقوليهش ليا راه مانبيش نسمعها منك لحد ما انتي تتأكدي
كان رد روان عباره عن سكوت و قلبها يدق و حست انه نفسها شويه وه ينقطع !
قاطعها صوت اسير اللي فهم خوفها >> صوتك وين
روان >> اه ؟ معاك
اسير ضحك>> خوذي نفس 😂 تقول قتلك بنخطفك
روان >> اسيير
اسير >> عيون اسير الاثنين
روان>> انت تحكي جد ؟
اسير >> صح انا ما تاخذيش مني شي جد😂بس المره هذي الوحيده لي ماكنتش فيها نبصر
روان >> ه تراجيني
اسير >> معاك العمر كله ، اهم شي انتي تكوني متريحه
//
//
عند احمد اللي كان يحكي مع ضحى
ضحى >> ما قلتش للبنات على امهن؟
احمد>> مانبيش نشغلهن ، بعدين مش اول مره تنتكس ديما تصيرلها و ترد بعدها كويسه نقوللهن تو يخافن و يتعبن ومش فيدهن شي
ضحى>> بس سما موصيتني انه لو تصير حاجه نقوللها معش عرفت شن ندير
احمد>> عارفها تربش من ورايا و ادور بس ماتقوليلهش شي مش عشان حاجه والله بس عشان صحتها ، ما صدقت هي واختها ردن الحياتهن شويه والتهن
ضحى>> وانت امتى بترد الحياتك؟
احمد>>كيف ؟
ضحى>> انت مش شايف روحك كيف غارق في شغلك و القضية ومش فاضي حتى ساعه الروحك؟
احمد >> الله غالب هضا شغلي
ضحى>> لا مش شغلك انت تهلك في روحك والله
احمد >> تصدقي انه انتي اول حد يفكر فيا؟
ضحى >> احمد 🙄😂
احمد>> لا اله الا الله الواحد ما يقولش كلمة كويسه يعني 😂
ضحى ابتسمت>> الساعه كم شغلك بكرا ؟
احمد>> تواعيني ٧ ونص ؟
ضحى>> اوكي حتى انا طالعه مع محسن الصبح عندي دوام فالمستشفي
احمد>>خلاص معناها نكمل شغلي ونجيك؟
ضحى>> وين تجيني؟
احمد>> مستشفى بوك ؟ 😒
ضحى>>وين الرومانسية لي من خمس ثواني 😂
احمد>> ح نوريها لكي بكرا 😂
ضحى>> انت شكلك رقدت وتحلم ، تصبح على خير😂
احمد >> وانتي من اهلي❤️
//
//
كنت مازلت نتفرج عالتلفزون مره نشوف المسلسل ومره عقلي يودر ويغرق فالتفكير
قطع تفكيري رسلان جا قعمز جنبي>> اديري قهوة !
سما >> كيف ما تبيش تطلع ؟
رسلان >> لا خلاص ما فيا ما طلع توا
سما >> نحسابك بتدوش وترد تمشي الاسير فالمحل
رسلان>> سادني اسير اليوم مليت من وجه 😂
ضحكت وصبيت>> تو ندير قهوة ونجي
مسكني من يدي رديت قعمزت جنبه
رسلان>> على فكرة حتى انتي وحشتيني بكل اليوم!
سما>> مش على اساس كنت نلعب ب اعصابك 😒
رسلان>> بس انا نقولك فيها من قلبي ” وكان يبحت فعيوني ”
توترت وحاولت ما نبحتش فيه >> رسلان تحبني ؟
رسلان ضحك>> مفروض انا اللي نسألك السؤال هضا عشان انا اجابتي واضحه مش اليوم ولا امس
بحتت فيه >> باهي يعني مش ه تسيبني لو شن ماصار؟
رسلان >> ردينا النفس الكلمه ؟
سما >> مشيني على قصاد عقلي بس اعتبرني طفلة و جاوبني
رسلان ابتسم وقرب >> مش هنسيبك لو فاضل في عمري ثانيه حنكون فيها معاك ، ولو قعدنا هكي طول العمر حنقعد معاك وجنبك وما فيش حد ح يخليني نبعد عليك غير اللي خلقني بعد عمر طويل
سما مسكت يده>> وعد صح !
رسلان ضحك >> مش فاهم كنك بس وعد 😂
سما<< نبي نطمن ” وطبست تبحت في يده اللي كانت فيدها”
رسلان>> نعرف انك تحبيني بس خايفه
رديت بحتت فيه >> ومن قالك يا واثق انت ؟
رسلان>> عيونك قالن و صوتك كيف يتوتر و قريب يختفي والكلام محوتك يطلع لما تقعدي جنبي ، خوفك عليا ديما من اني نبعد عليك مكالماتك لما نطلع، قربك مني رقدتك جنبي ومسكتك ليدي ، بس انتي خايفه ومش فاهمه من شنو وعليش
كان كلامه كله صح بس مش قادره نطلع الكلمه مش قادره نقولها له نخاف بعد يعرف يختفي مش فاهمه ولا حاجه ، كنت مش قادره نرد عليه بس ماسكه يده
رسلان قرب مني
سما >> رسلان ماتديرش شي انت ما تبيش خلاص حول كأنه ماصارش شي نحن الاثنين عرفنا لي نبو نعرفوه
رسلان جا عند وذنها>> كويس اني صبرتلك هضا كله وكويس اصلا اني قادر نسيطر علي روحي طول ما كنتي معايا” وضحك”
سما >> رسلان !
رسلان>> مش ح تندمي ؟
سما >> اذكر اني انا اللي بديت
رسلان وخر وجا قدامي
سما بتوتر >> مش تبي قهوة
رسلان ضحك >> ممكن تسكتي بس ! اي قهوة 😂
وقربني منه
//
//
عند سالمة عالفجر
سالمة>> ح تحكي معاه بكرا؟
تيح >> خلاص اه حنخظم عليه فالشركة ونقوله
سالمة>> توترت😂
تيح>> كل ما بنحكي معاه يا يقعد قالب وجه متعارك مع ميرا يا عنده شغل فلشركة يا يوصل فالبنات للجامعه معش حصلته بكل
سالمة>> بكرا البنات عندهن جامعة اصلا ح يحطهم ويمشي للشركة اكيده
تيح >> اه تو ندوره “سكت شويه بعدها قال” عادي نسألك ؟
سالمة حست شن ح يسألها >> قول
تيح >> عليش فسختي خطبتك لي فاتت ؟
سالمة>> تصدق انه من دون الايام كلهن مبدري قلت للبنات اني بنحكيلك
تيح >> وشن بتحكي
سالمة >> علي خطبتي وهكي
تيح>> نسمع فيك
حكت سالمة التيح قصة حسن بس ب اختصار عشان ما تخشش في تفاصيل يجرحنه بس حكتله المهم واللي المفروض يعرفه وكيف انه طلع حقير و ضيع من عمرها سنين ووقت و مشاعر كلهن عالفاضي
وتيح طبعا كان يسمع و كيف اي راجل مش حاب انه يسمع اللي يحبها تحكي علي غيره مهما كانت طبيعة العلاقة بس صبر و خلاها تكمل للأخر وبعد ما كملت كلامها ما سألهش اي سؤال وغير الموضوع كليا
تيح >> بكرا عندك شغل ؟
سالمة فهمت انه مش حاب الموضوع>> اه بس مش ح نطول
تيح >> خلاص الوقت تأخر بكل تريحي
سالمة>> مش ح تسأل اي حاجه؟
تيح >> انتي حكيتي كل حاجه ف خلاص مش مهم عندي نعرف اي شي
سالمة >> لا نبيك تعرف حاجه مهمه بكل
تيح >> شنو ؟
سالمة>> انه انت لما خشيت حياتي ما كأنيش عرفت حد قبلك اصلا ولا حبيت حد ❤️
تيح ضحك >> وتقولولي كنه قلبك تعبان 😪❤️
//
//
سما >> يعني توا هكي نقدر نقولك اني نحبك
رسلان ابتسم >> تصدقي انك واحشتيني وانتي جنبي
سما >> خليك عشان تحس بيا لما نقولك ما اطولش برا ، اصلا كله من اسير
رسلان>> اي اسير بس ” مسك يدي وحضني” انتي فعقلي طول اليوم
سما >> و قلبك ؟
رسلان >> لا هكي نتعب انا ❤️
سما >> قول بس
رسلان>> وفقلبي من زمان بكل
سما >> رسلان ح نموت والله لو سيبتني
رسلان رفع راسه وبحت فيا >> انتي ما تبيش تبطلي دراما؟
سما >> خلاص بطلت عادي نقول نحبك باهي؟😂 ” رفعت راسي و بحتت فيه ”
رسلان>> لو نسمعها مليون مره حتكون كأنها اول مره
ابتسمت وجيت بنصبي
رسلان>> وين مصبيه ؟
سما >> بنديرلك قهوه 😂
رسلان>> الصبح قريب يصبح اي قهوة بس 😂
سما >> ما تبيش نديرلك شي ؟
رسلان>> لو جيعانه صبي كولي انا مانبيش شي الا انك ترقدي فحضني اليوم نايض بدري وتالف شويه ونرقد
سما >> خلاص هنقعد جنبك لحد ما ترقد ونصبي ندوش و ناكل
رسلان غمض عيونه>> نحبك
//
//
ثاني يوم طلع رسلان وقبل ما يمشى للشركة مشى الاسير فالمحل
رسلان>> صباح الخير
اسير >> كنك تقول مصاحبني انت يوم يومين مخطم عليا قبل الشغل 😒
رسلان>> ياراجل صبح مثقل دمك
اسير خذا كباية القهوة لي قدامه وشرب منها>> كنك امس نرن عليك ما تردش
رسلان ابتسم >> شي روحت تالف قعدت شويه ورقدت
حط اسير الكبايه>> شن الابتسامات لي توزع فيهن عالصبح هذيناا ان شاءالله خير😂
كر رسلان كباية القهوة> اطلع جيب قهوتك جاي ومش فاطر راه
اسير>> معنديش حتى حق دخان | كنها سما ما دارتلك قهوة
رسلان>> بتبدا اتحنط ح نقتلك ونطلع 😒
اسير >> دروحه واعر ويغار 😂😂
قعمز رسلان مقابله وشويه ويطربق اسير ضحك
رسلان>> ان شاء الله خير
اسير >> صار قتلي امس رقدت بدري ، لا وطالع مش شارب قهوة وتوزع في ابتسامات وجاي رايق
رسلان مازال مش مركز
اسير بحت فيه وطلع باكو الدخان >> صباحيه مباركه ياحبيبي
رسلان فك منه الباكو>> كلمه زياده ندفنك فالمحل هن وماحد يعلم بيك
اسير ضحك ودار اشاره علي فمه انه سكت🤐 وخذا كباية القهوة و رد ابتسم
رسلان>> ولعلي خليني نتوكل للشركه
اسير طلع الولاعه>> غير راك تقعد سرحان طول اليوم بس
رسلان>> اسير اقسم بالله كلمة اخرى نقربعها بينك وبين روان فوتني 🙄
اسير >> الا المدام 😂 خلاص اربح سكتت ازح
عزق رسلان الولاعه على وجه اسير وطلع يضحك
طلع اسير تلفونه ورن علي روان
روان>> صباح الخيييير
اسير >> صباح اجمل صوت فالدنيا
روان>> شن الروقان لي عالصبح هضا
اسير>> متصبح في وجه رسلان
روان ضحكت>> حرام عليك😂 قاعد فالمحل!
اسير>> اها من شويه جيت
روان>>وقاعد تشرب فقهوة وادخن صح؟
اسير ضحك>> ياعيني علي حفظ الروتين 😂
روان>> انت ما تعرفش تقعد جدي
اسير>> خلاص هاه قعدت😂 انتي وين
روان>> قاعده نلبس عندنا محاضرة اليوم
اسير >> عادي نجي نشوفك عشان وحشتيني
روان>> اسير المحل ماتجيش كل شويه مسيبه بعدين محاضرة وحده و ه نروح
اسير >> يعني ما تبيش تشوفيني؟
روان بهدوء>> لاء يعني نبي بس مانبيش نعطلك وتجي على خمس دقايق
اسير >> عشانك نجي حتى على خمس ثواني شن تحكي انتي
روان >> ليش باهي ؟
اسير >> انتي عارفه ليش كويس بس مخليك على راحتك لحد ما انتي بروحك تهدي و تعرفي اني معاك وجنبك ومش حنكون زي ما في بالك
روان>> انت فاهمني صح
اسير ابتسم>> خوذي وقتك وانا معاك ، خلاص ياعيوني عدي البسي وكلميني لما توصلي
روان>> باهي ح تجي يعني نشوفك
اسير ضحك>> جاي طبعا وحشني عيونك
روان >> خلاص باي😂
صكرت وضحكت و توترت و كل شي 🤦🏻♀️
“نبي واحد اسوري معلش ”
//
//
عند موسى وميرا
من بعد يلي صار بينهم واخيراااااا واخيرا كانو رايقين و متفاهمين بدون حواجز وبدون خوف وبدون توتر
ميرا>> موسى وقت عالجامعة ووقت عالشركة
موسى >> نضت
ميرا>> حنديرلك قهوة على ما لبست
موسى >> تمام
ميرا صبت من جنبه وبرمت>> موسى تعرف اني نحبك بكل صح
موسى عالسرير يحك في عيونه>> لا ما نعرفش
ميرا >> كيف؟ قصدك ما تعرفش بجد على فكرة انحبك اكثر من ما انت تحبني
موسى ضحك وصبا عندها>> هذي مستحيله و ماتقدريش
ميرا >> ليش مستحيله
موسى >> عشان انا حبيتك من اول ثانيه جمعتني بيك بس انتي طولتي
ميرا قربت منه>> مش شرط وماتقولش هكي عشان ح نزعل انا نحبك اكثر وخلاص انتهى النقاش 😡
موسى >> تعرفي انه لو نقعد اليوم كله وانا نسمع فالنقاش هضا مش ح نمل
ميرا >> وقتتت هيا التلفون يرن
طلعت ميرا وموسى خش يلبس
موسى >> ميرا نازل انا
ميرا >> هي لاحقتك ، بنخطمو عالبنات راه احمد طلع بدري و سالمة بيحطها عمو عاشور بس متأخر
موسى>> باهي تمام
خذا موسى مفتاح السيارة ونزل ، كملت ميرا لبسها و خذت شنطتها ولحقاته للسياره
اول ما صكرت الباب وبرمت
ميرا >> شوف كله طويل وواسع وشعري مخششته جوا
موسى ابتسم >> انحبك وانتي تسمعي فالكلام
ميرا >> ماتعودش بس 🙄
موسى ابتسم >> ح نستغرب اصلا لو ما عاندتيش 😂 مش ح تكوني ميرا
ميرا ضحكت >> باهي انت كويس صح مش مريض ؟
موسى>> ميرا عاد خلاص مش مرضه هي حبستيني معاك
ميرا >> يعني طلعت محبوس 😒
موسى مسك يدها >> انتي عارفه لو نقعد معاك العمر كله في مكان واحد مستحيل نفكر نطلع
ميرا >> تعرف ماكنتش نحساب روحي نحبك هكي
موسى >> و امتي عرفتي “ودرس قدام حوش البنات وبيبلهن”
ميرا >> سر 😜
فتحت رندة باب السيارة >> صباح الخير
موسى >> شكلكن مصبيات عند الباب
ركبت روان>> اه طولتو
ميرا >> انا كنت نلبس محوتك لقيت حاجه واسعه اصلا في دولابي “وبحتت فموسى”
روان >> ادبببب 😂
ميرا >> ننزلو بس 😂
وقعدن البنات يتناقرن لحد ما وصلن للجامعه نزلن البنات
موسى >> ردبالك
ميرا >> حفظت والله مش ح نصبي مع حد ولا نحكي مع حد ونقعد مع البنات ونرد على تلفوني ، خلاص نحبك “وسكرت الباب ولحقت البنات”
موسى ابتسم وماكنش قادر يرد كان مازال يحس فروحه يحلم بعد الصبر لي صبره على ميرا ولي كانت فيه هي توا تعامل فيه هكي وتحبه ❤️
//
//
روان >> توا كيف خشيت
اسير >> قاعد عند البوابه انا
روان>> اوكي تلقاني فالكفتيريا
رندة>> اسير جاي ؟
روان>> اه كلمني الصبح قالي خمس دقايق ويمشي
رندة>> انا بنمشي ماوصلت كليتي الا والمحاضرة باديه
ميرا >> حنخش نطلب حاجه نشربها ماطوليش
روان >> خلاص تمام
اسير >>صباح السماحه
روان ابتسمت>> صباح النور
اسير >> تو لازم الخشه الكافتيريا كل صبح
روان >> نطلعو مستعجلين نوصلو نشربو حاجه ونطلعو دغري للمحاضرة
اسير >> قاعده مليانه الشباب كلهم فيها
روان>> وانا شن دخلني بيهم ناخذ فحاجتي ونطلع ، جاي بتعارك؟
اسير >> لا جاي نشوف السماحه😂
روان>> اسيرررر عاد
اسير >> عليك حشم😂
روان >> ماتبيش تمشي للمحل ؟
وصل الاسير مسج على تلفونه من رقم غريب ،مسك تلفونه وقرا المسج
روان>> اسير تسمع فيا ؟
- يتبع الفصل التالي اضغط على ( رواية هلع ) اسم الرواية