رواية مغامرات إلى عالم الأساطير (كاملة جميع الفصول) حصريا عبر دليل الروايات بقلم وفاء هشام
رواية مغامرات إلى عالم الاساطير الفصل التاسع عشر 19
19
أرسل مروان رسالة إلى إسراء بموعد المغامرة القادمة ولكن لم يخبرها بأنها ستكون الأخيرة
فى تجمع عائلي جلس الجميع يتناولون الطعام
وكان مروان وعائلته مدعوون لهذا التجمع
زينب: وشك حلو يا إسراء .. مروان جاتله سفرية برة مصر هيدرس ويشتغل فى جامعة هناك منحة تعليمية يعنى علشان كان من المتفوقين
تركت إسراء الملعقة وحاولت أن تظهر إبتسامة خفيفة وقالت: بجد ...ألف مبروك يا مروان
مروان: الله يبارك فيكى
محمد: وهتقعد اد إيه بقى يا مروان
مروان: مش عارف يا عمى هى المنحة مش محددة الصراحة وكنت بفكر أحضر ماجيستير كمان فممكن السفرية تطول
محمد: وبالنسبه لإسراء؟
صمت قليلا ونظر إليها ورأى الحزن واضح عليها
مروان: مفيش حاجه هتتغير يا عمى وأن شاء الله ا...
محمد: هتسيبها
مروان بصدمه: إيه؟
محمد: بص يا مروان أنا عارف أن دا مستقبلك وحقك يا ابنى بس زي ما قلت السفرية مدتها مش محدده غير كمان إنك عايز تعمل دراسات عليا فممكن تبقى سنه اتنين تلاته خامسه ... وبنتى هتستنى دا كله؟
مروان: بس يا عمى
محمد: مبسش لو هتختار مستقبلك على حساب حياة بنتى فأنا آسف
مروان: يا عمى أنا بحلم باليوم دا من صغري لازم تفهمنى
محمد: أنا فهمك .. بس ذنب بنتى إيه تستناك دا كله، يا أما تأجل سفرك لحد ما تتجوزوا وتاخدها معاك غير كدا أنا آسف مش هعلقها بيك لوقت لا أنا ولا أنت عارفين مدته قد إيه
كادت والدته أن تتحدث ولكن أوقفها والد مروان فهو يريد أن يرى ماذا سيفعل ابنه فى هذا الموقف ويريده أن يأخذ قرارته المستقبليه بنفسه
انتهوا من تناول الطعام وجلسوا يتحدثون قليلا
أما إسراء ومروان فوقفا فى البلكون بمفرديهما
مروان: انتى موافقة على الكلام اللي باباكى قاله؟
نظرت إليه إسراء بدموع وقالت: وأنت عايز تسيبنى!
مروان: مقدرش يا إسراء بس إنتى عارفه أن دا حلمى
إسراء: مكنتش أتوقع أن هيجى يوم وابقى مضطرة أقول لحد اخترنى وضحى بالحاجه اللي بتحلم بيها علشانى
مروان: إسراء أنا بجد عايزك جنبى بس دي فرصة عمرى
إسراء: طب أعمل زي ما بابا قال أجله لحد ما نتجوز
مروان: مش هينفع المدة محدده ولازم أرد عليهم وإلا هيدوها لحد تانى ... وأنا معرفش إذا كانت الفرصة دي هتتكرر تانى ولا لا
إسراء: يبقى أنت كدا بتختار حلمك .. ربنا يوفقك
مروان: إسراء أنا بحبك ♡
نظرت إليه ونزلت دموعها ثم نظرت إلى خاتمه الذى يزين اصبعها واحتضنته بيدها ثم رفعته وقبلته
نظر لها بهدوء عكس الحرب التى بداخله والخوف الذى ينتابه من فكرة أنها ستنزع الخاتم وتعطيه له وتنهى كل شئ
نظرت له والدموع مازالت تنهمر على خديها وقالت: بالتوفيق
ثم ركضت إلى الداخل وتركته ينازع أفكاره
كانت العائلتان تجلسان معا ويتحدثان حتى خرجت إسراء وهي تركض وتذهب إلى غرفتها
نهضت سعاد وركضت خلفها
حاولت فتح باب غرفتها ولكنه مغلق فقد دخلت وأغلقته خلفها
سعاد: يا بنتى افتحى الباب
إسراء ببكاء: سيبونى لوحدى
محمد: افتحى يا بنتى بس وكل حاجه هتتحل
إسراء: علشان خاطرى سيبونى
سعاد: يا بنتى متوجعيش قلبى طب إيه اللي حصل
إسراء بصراخ: سيبونى بقى سيبونى لوحدى
ثم زاد بكائها حتى علا صوت شهقاتها أكثر وباتت مسموعة من الجميع
دخل مروان بعدها وبدا على وجهه الحزن
أمسكه أدهم من ملابسه وقال بغضب: قولتلها إيه؟
نظر إليه مروان وعينيه تحبسان الدموع
أزال يده وتوجه نحو باب غرفة إسراء وطرق الباب بهدوء
مروان بنبرة مختنقه: متزعليش منى ربنا وحده أعلم إنتى إيه بالنسبالى وإنى مستعد أعمل أي حاجه علشانك
بس دا حلمى يا إسراء ... كنت فاكرك أول واحدة هتباركيلى وتشجعينى كنت فاكرك هتقفى جنبى، كلكم بتلومونى ومحدش عارف الحرب اللي جوايا وإزاي هسافر وأسيب أكتر إنسانه حبيتها فى حياتى محدش حاسس بالـنـار اللي جوايا اللي طمنت نفسى أنها هتنطفى أول لما أقولك وأسمع كلامك وتشجيعك وتفرحى معايا .. بس ردت فعلك خنقتنى ... حسستنى أن .. أن أنا أنانى .. أنانى علشان عايز أحقق حلمي اللي ربنا ايداهولى بعد وقت طويل .. بس دا اختبار علشان أشوف هختار مين .. وربنا وحده يعلم قد إيه الإختبار دا صعب على قلبى والله العظيم صعب
جلس على ركبتيه أمام غرفتها وهو يبكى هو أيضا فلم يتوقع ان يُخَيَّر بين حلمه وحبيبته
فُتِحَ باب الغرفة بهدوء ونظرت له إسراء ثم جلست على ركبتيها أمامه
إسراء: أنا آسفه .. أنا اللي كنت أنانيه ... كان لازم أفرح معاك وخصوصا إنك بتحلم بدا من وقت طويل
مروان: أنا آسف
إسراء: متتأسفش ... سافر يا مروان
مروان بصدمه: إيه؟!
إسراء: سافر ... وحقق حلمك وارجع ... هستناك
فرح مروان كثيرا بهذا الأمر وعانق إسراء بشدة
عندما فعل هذا صرخ الجميع وابتعد هو عنها بسرعه دافعا إياها فوقعت على الأرض
إسراء بألم: اااه منك لله يا مروان
أمسك محمد مروان من ملابسه ورفعه لينهض ويصبح أمامه
محمد: أنت بتحضن بنتى يالا
مروان: والله من فرحتى بس مقصدش والله
أدهم: دا غلط ولازم يصلح غلطته
محمد : صح أنت غلطت وهتصلح غلطتك وهتكتب عليها دلوقتى
مروان: هعمل اللي أنت عايزه و ...إيه
ضحك محمد بقوة والجميع من بعده
نظر مروان وإسراء إليهم فى دهشه وهما لا يفهمان ما يحدث
ترك محمد ملابس مروان وجاء إمام ووضع يده على كتفه وقال: أنا هفهمك إحنا اتفقنا علشان عارفين أنكم بتحبوا بعض أننا هنكتب الكتاب الخميس اللي جاي والفرح والدخلة بعد ما ترجع من السفر يا بطل إيه رأيك بقى
مروان: موافق طبعا وكمان علشان اضمن أن عمى ميجوزهاش لحد غيرى
محمد بضحك: هو لو أنا اديتك كلمه مش هكون ادها يا واد ولا إيه
مروان: العفو يا عمى مقصدش بس أنت كنت عايز تنهى الموضوع
محمد: علشان دي بنتى يا مروان وأكيد كل أب عايز الأحسن لبنته وكمان كنت عايز أشوف ردت فعلها قبل ردت فعلك
إسراء: بابا أنا...
محمد: مش عايز غير كلمه واحدة يا موافقه يا لا
نظرت إلى مروان ثم إلى والدها وقالت: موافقه يا بابا
هذا القرار كان مرضيا للجميع وتم عقد القران فى الخامس من أغسطس
عندما دقت الثانية عشر وتم إعلان اليوم السادس من أغسطس نُقِلَ مروان وإسراء إلى المغامرة الأخيرة
كانا يجلسان تحت شجرة كبيرة
كان مروان يمسك الكتاب وإسراء قد وضعت رأسها على كتفه ويراقبان ما سيظهر لهما
ظهرت كتابة تقول: هذه المغامرة ستكون الأخيرة لذلك سننهيها بشكل لائق
رفعت إسراء رأسها من على كتف مروان ونظرت إليه ثم إلى الكتاب بدهشه
إسراء: هي دي آخر مغامرة بجد
مروان بأسف: أيوة .. للأسف
إسراء بحزن: يعنى .. يعنى مش هنيجى لعالم الخيال دا تانى
أمسك مروان يدها وقال: أهم حاجه أن إحنا مع بعض وأنه حتى لو المغامرات خلصت حياتنا مع بعض مش هتخلص
ابتسمت إسراء وعادت تنظر إلى الكتاب
ظهرت كتابة: سأشتاق إليكما حقا
إسراء ومروان: وإحنا كمان
ظهرت كتابة: آسف إذا أزعجتكما ولكن حقا استمتعت معكما
إسراء: وإحنا كمان استمتعنا
ظهرت كتابة: فى المرة السابقه التى قابلتما فيها بيجسوس كان أخويكي هنا أما هذه المرة فأنتما بمفرديكما
نظر كل منهما إلى الأخر ثم سمعا صوت صهيل حصان فنظرا أمامهما فوجدا بيجسوس
نهضت إسراء بسرعة وركضت نحوه وعانقته
نهض مروان خلفها وهو يلمس وجهه
مروان: أهلا بيجسوس
أصدر صهيلا يدل على سعادته وانحنى لهما ليصعدا على ظهره
صعدت إسراء أولا ثم صعد مروان وركب خلفها
حركت إسراء يدها بهدوء على عنق وظهر بيجسوس الذى استمتع كثيرا بهذا
أصدر صهيلا عاليا ثم فرد جناحيه وطار إلى أعلى
نظرت إسراء إلى فوق وهي تغمض عينيها
ابتسم مروان وعانقها من الخلف
نظرت إليه وأحاطت يدها يده التى التفت حول خصرها
مروان: ما تقلعى الحجاب
إسراء بخجل: مروان
مروان: كتبت الكتاب والله
ضحكت بخجل ثم نزعته بهدوء
عندما فعلت نزع هو دبوس شعرها ثم قام بفرده
أصبح شعرها يطير فى الهواء ويصطدم بوجهه
مروان: لا البسى الطرحه تانى
ضحكت إسراء ولملمت شعرها على جانب واحد
بدأ مروان يلمس خصلات شعرها وهو يقرب رأسه من عنقها
مروان بهمس: شعرك حلو
إسراء بخجل: شكرا
ابتسم مروان وعانقها وقال: هتوحشينى
إسراء: هتسافر إمتى
استند بذقنه على كتفها وقال: بعد أسبوع
إسراء: ترجع بالسلامه
هربت دموعها ولم تستطع إخفائها
مروان وهو يمسح دموعها بهدوء: متعيطيش .. هنتكلم كل يوم لحد ما تزهقى منى وهحاول أخلص على طول هذاكر اتنين وأربعين ساعة فى الأربعه وعشرين ساعه
إسراء: لا متتعبش نفسك أنا هستناك
أدارت وجهها له ونظرت فى عينيه وقالت: هستناك يا مروان
أمسك مروان ذقنها بيده وهو يقرب وجهها إليه
نفض بيجسوس ظهره بغضب فأمسكها مروان حتى لا تسقط
مروان: إيه يا بيجسوس
نظر له بيجسوس بغضب ثم أدار وجهه مرة أخرى
إسراء بضحك: شكله سنجل
زاد من سرعته فجأة فخافت إسراء وتمسكت بمروان
إسراء بضحك: خلاص آسفه آسفه مقصدش
مروان: آسفين يا بيجسوس
هدأ بيجسوس من سرعته فأمالت إسراء بجسدها إلى الإمام وهي تحرك يدها بلطف على عنقه ووضعت قبله عليه
إسراء: متزعلش ماشى
أصدر صهيلا مرحا وبدى راضيا لما فعلته إسراء
مروان بغيرة: يا سلام بتبوسى الحصان
إسراء بضحك: إلحق يا بيجسوس فى واحد بيغير هنا
أصدر بيجسوس صهيلا
مروان: وفيها إيه لما أغير مش فاهم
إسراء: فيها إنك كدا بتحبنى
مروان: أيوة بحبك و ...
ضحكت إسراء بشدة فقد أوقعته فعلا
مروان: بتوقعينى فى الكلام يا إسراء
إسراء: أنا محصلش
مروان: بقى كدا طيب
أمسك حجابها ووضعه فوق رأسها
مروان: غطى شعرك بقى بدل ما اتعصب
إسراء: اللاه مش أنت اللي قولتلى أشيله
مروان: ودلوقتى بقولك غطيه
نظرت له إسراء بغضب ثم لفت الحجاب على رأسها عشوائيا وشعرها ينسدل من تحته
مروان: وشعرك دا مش فاهم
إسراء: مفيش حد هنا غيرناااااا
مروان: خلاص ودانى
هبط بيجسوس فى مكان واسع جدا تملئه أشجار الفاكهه والنباتات وفى منتصفه نهر جاري منظره يخطف القلوب
أصدر بيجسوس صهيلا عاليا، مرت دقيقه ووجد مروان وإسراء عدد من الأحصنه المجنحة أمامهم يشبهون بيجسوس ولكن بألوان مختلفة
نظرا إلى بعضهما البعض بدهشه وقالا: ما هذا الجماااال
•تابع الفصل التالي "رواية مغامرات إلى عالم الاساطير" اضغط على اسم الرواية