رواية المتعة الحرام كاملة بقلم عادل عبدالله عبر مدونة دليل الروايات
رواية المتعة الحرام الجزء (3) الفصل الثاني عشر 12
جري سامي وسهام ومعهم الضيوف مروان وزوجته مروة ودخلوا ليستطلعوا الأمر !!!
اتصل سامي بالاسعاف سريعا وبعد دقائق حينما وصلت سيارة الاسعاف ابلغوهم أن نشأت مات بالفعل !!!
كانت صدمة موت نشأت قوية علي الجميع !!!
وكان من بين اكثر المصدومين بموته سهام التي كادت الغيرة أن تقتلها .
وبعد انتهاء العزاء نظرت سهام لزوجها وقالت : مش كفاية كده بقي ؟
سامي : كفاية ايه ؟ مش فاهم !!
سهام : جارنا نشأت مات والعزاء خلص ، كفاية بقي كلام مع مراته .
سامي : وهنتكلم معاها في ايه تاني ؟ احنا وقفنا جنبها بحكم الجيرة ودي الاصول والواجب .
سهام : تمام يا سامي ، بس كده كفاية اوي ، مش عايزة اشوفك بتكلمها تاني ، ولا انت عايز تنفذ وصية المرحوم ؟!
سامي : قصدك ايه ؟
سهام : قصدي انت فاهمه كويس يا سامي .
سامي : طيب خلاص يا سهام انا فعلا مش بتكلم معها الا علشان اجراءات الدفن والعزاء وعموما حاضر مش هكلمها تاني يا سوسو .
سهام : ماشي يا سامي لما نشوف ، قولي عملت ايه في المشروع مع مروان ؟
سامي : هنروح لابن عمك بكره يعملنا دراسة جدوي للمشروع وبعد كده نحدد هنحتاج فلوس قد ايه وهنبدأ امتي .
سهام : طيب انا كمان هتكلم مع يسري اخويا النهاردة وهعرفه اني هبيع جزء من الارض علشان لو عايز يشتريه هو أولي من الغريب .
بعدها اتصلت سهام بأخيها يسري وعندما اخبرته برغبتها في بيع جزء من الارض استشاط غضبا وقال لها : انت اتجننتي يا سهام ؟؟ هتبيعي ايه ؟؟
سهام : هبيع جزء من الارض علشان نعمل مشروع نعيش منه انا وسامي .
يسري : لا انتي كده اكيد اتجننتي !! انتي مش عارفة ان امك الله يرحمها كانت رافضة فكرة بيع الارض دي نهائي ؟!!
سهام : ايوه عارفة ، لكن انا بقولك هبيع جزء من الارض بس مش كلها .
يسري : ولا تبيعي منها متر واحد .
سهام : يعني ايه ؟؟
يسري : يعني علي جثتي يا سهام انك تبيعي متر واحد من الارض .
سهام : ليه كده يا يسري ؟ ده حقي وانا حرة التصرف فيه ، وانا بقولك علشان لو عندك النية تشتري مني انت اولي من الغريب .
يسري : اولا انا مش معايا فلوس اشتري ، ثانيا مفيش حد هيدوس ارض امي برجليه طول ما انا عايش .
سهام : انت بتعقد الامور بالشكل ده كده ليه يا يسري ؟
يسري : مش بعقدها ولا حاجة ، لكن هو ده اللي هيحصل يا سهام ، انا مش هسمح لحد غريب يشتري ارض امي .
سهام : وانا لازم ابيع جزء منها لأني محتاجة فلوسه .
يسري : مش انتي علي ذمة راجل ؟ هو يتكفل باحتياجاتك ، ولا هو طمع في ورثك لما عرف ان عندك ورث ؟!!
سهام : لا يا يسري بعد اذنك انا مسمحش لك انك تتكلمي بالطريقة دي عن سامي جوزي .
يسري : كلامك معناه كده يا اختي ، وعلشان مش نتكلم كلام كتير ملوش لزوم اقفلي علي الموضوع ده مفيش ارض هتتباع .
سهام : وانا بقولك يا يسري شوف نفسك لو عايز تشتري الارض انت اولي من الغريب لأن كده او كده انا هبيع جزء منها .
يسري : يعني بعد كل الكلام ده لسه مصممة علي كلامك ؟!!
سهام : ايوه علشان دي ظروف وانا مضطرة اعمل كده .
يسري : لو بيعتي الارض يا سهام لا انتي اختي ولا اعرفك وهتفتحي علي نفسك بوابة جهنم .
انتهت المكالمة مع اخيها وجلست سهام تبكي .
عاد سامي ولاحظ بكاء سهام فسألها في شغف : مالك يا سهام ايه اللي حصل ؟ بتعيطي ليه ؟
سهام : مفيش حاجة .
سامي : مفيش ازاي وانتي مموته نفسك من العياط كده !!
سهام : يسري اخويا .
سامي : ماله ؟
سهام : رافض اني ابيع الارض وبيقولي علي جثته اني ابيعها .
سامي : وهو ايه دخله بأنك تبيعي الارض او لأ ؟ انتوا قسمتوا الورث وكل حد فيكم اخد نصيبه وهو حر فيه .
سهام : لأ ، هو بيقولي الارض اللي امنا فضلت محافظة عليها طول عمرها مستحيل يقبل اني ابيعها .
سامي : لا بقي معلش ، هو ملوش دخل بحاجة زي كده ، كل واحد حر في الحاجة اللي يملكها ، وبعدين يا ستي اعرضي عليه يشتريها مادام رافض أن حد غريب يشتريها .
سهام : انا فعلا عرضت عليه يشتريها لكنه قالي انه مش معاه فلوس يشتري ورافض اني ابيعها سواء له او للغريب .
سامي : طيب خلاص سبيني انا هتكلم مع يسري واحاول اقنعه بهدوء .
سهام : بلاش يا سامي ، انت ويسري مش بتتفقوا مع بعض وكتير بتتخانقوا ، و اكيد هتشدوا قصاد بعض ، والموضوع ده حساس وخايفة تحصل بينكم مشكلة كبيرة .
سامي : لأ ، انا هحاول اتمالك اعصابي وانا بكلمه و بأذن الله هقدر اقنعه .
سهام : ولو مش اقتنع يا سامي هتعمل ايه ؟؟
سامي : احنا كده او كده هنبيع الارض برضاه او بدون رضاه ، انا هحاول اقنعه بس علشان خاطرك وعلشان مش تزعلوا من بعض ، انما هو ملوش حاجه عندنا علشان نستأذنه وناخد موافقته .
سهام : انا مش عارفه اقولك ايه يا سامي خايفة اقولك نلغي او نأجل المشروع دلوقتي تزعل مني .
سامي : انتي بتقولي ايه ؟! بعد ما اتفقت مع الناس ارجع في كلامي ؟!
سهام : خلاص يا سامي انا هتكلم تاني مع يسري .
سامي : لأ انا اللي هروح اتكلم معاه النهاردة .
سهام : علشان خاطري يا سامي حاول تتفاهم معاه بالراحة .
ارتدي سامي ملابسه وهم بالنزول فقالت له سهام : استني يا سامي انا جاية معاك .
سامي : ليه ؟ انتي بردو خايفة تحصل مشكلة كبيرة ؟
سهام : بصراحة ايوه .
سامي : انا قولتلك مش هيحصل حاجة وعلي العموم تعالي معايا مفيش مشكلة ، بس ياريت بقي بسرعة .
نزل سامي وسهام وذهبوا ليسري وبمجرد ان شاهدهم يسري عرف سبب مجيئهم معا في هذا الوقت !!
فاشتاط غضبا وقال لها : ما دام جيتي ومعاكي جوزك يبقي عايزين تتكلموا في نفس الموضوع !!!
سامي : طيب نقعد الاول وبعدين نتكلم يا يسري .
يسري : اتفضلوا اقعدوا واتكلموا في اي موضوع ماعدا موضوع الارض .
سامي : واذا كان موضوع الارض هو الموضوع اللي جايين نتكلم فيه !!
يسري : وانت يخصك في ايه انك تتكلم في ارض امي ؟؟
سامي : دي ارض سهام مراتي وانا وهي واحد.
يسري : دلوقتي بتقول انت وسهام واحد !!! مش سهام دي اللي انت اتجوزت عليها اعز صاحبة لها ؟!!
سامي : احنا قفلنا علي كل المواضيع القديمة دي ودلوقتي احنا بنتكلم في موضوع الارض .
يسري : موضوع الارض ده شئ يخصني انا واختي انت ملكش دخل به .
- يتبع الفصل التالي اضغط على ( رواية المتعة الحرام ) اسم الرواية