رواية المتعة الحرام كاملة بقلم عادل عبدالله عبر مدونة دليل الروايات
رواية المتعة الحرام الجزء (3) الفصل الخامس عشر 15
سهام : مش عارفة ، هقوم اشوف مين .
سامي : لأ خليكي انتي هتفتحي وانتي كده ؟!! انا هقوم اشوف مين ؟
قام سامي يرتدي ملابسه وذهب ونظر من العين السحرية للباب فوجد شاهي !!
فقال لسهام ” بصوت منخفض ” : ايه قلة الذوق دي !! في حد بيروح لحد في الوقت ده !!! مش نرد عليها وتعالي ندخل ننام .
سهام : لأ مينفعش ، استني انا هشوفها عايزة ايه .
فتحت سهام الباب وسألت شاهي : خير يا شاهي فيه ايه ؟؟
شاهي : اسفة يا حبيبتي اني جيت في وقت مش مناسب ولا ايه ؟!
سهام : لا يا شاهي ، بيتك يا حبيبتي ، اتفضلي .
شاهي : لمبة الحمام عاملة ماس وبتكهرب وعايزة سامي جوزك ييجي يصلحها .
نظرت سهام لها بغيظ وقالت : استني للصبح وشوفي كهربائي .
شاهي : مش هينفع اقعد من غيرها للصبح علشان الحمام .
سهام : سامي مش هيعرف يصلحها .
شاهي : لأ ، بيعرف ، هو صلحها قبل كده .
نظر لها سامي وسهام تسأله وتكاد تنفجر غيظا : انت دخلت عندها قبل كده وصلحتلها اللمبة ؟
سامي : نشأت الله يرحمه كان طلب مني من فترة وطلعت معاه صلحتها له .
سهام : نشأت ؟!!
سامي : ايوه .
ردت شاهي : ايوه نشات الله يرحمه فعلا قال لاستاذ سامي في مرة وهو طلع معاه صلحها ، معلش هي بتعطل كتير .
سهام : طيب اتفضلي انتي وكمان خمس دقايق هنيجي انا وسامي علشان يصلحها .
قفلت سهام الباب ثم امسكت بسامي وقالت له : انت دخلت عند الست دي من غير ما اعرف ؟؟
سامي : ده هي مرة واحدة لما نشأت طلب مني .
سهام : وانت من امتي بتصلح الكهرباء يا سامي ؟!
سامي : يا حبيبتي الموضوع بسيط مش محتاج كهربائي وشوفت نشأت الله يرحمه مرتبك ومش عارف يتصرف ، ولما طلب مني مش رضيت احرجه وطلعت عملتها وهو كان واقف معايا .
سهام : اوعي تكون بتكدب عليا يا سامي ؟ اوعي يكون في بينك وبين الست دي حاجة من ورايا ؟!
سامي : يا حبيبتي اطمني مفيش حاجة .
سهام : طيب يلا تعالي معايا نروحلها علشان نخلص وندخل ننام .
سامي : زي ما تحبي لكن انا كنت مش عايز اعملها .
سهام : لا خلاص مادام وعدناها يلا بينا .
بعدما عادوا من عند جارتهم كانت سهام في قمة غضبها وقالت له : الست دي مستفزة وحركاتها مستفزة اكتر !!
سامي : ما انا قولتلك بلاش !!
سهام : الظاهر اني كنت غلطانة ، الست دي لو كلمتني بعد كده مش هرد عليها وهقاطعها نهائي ، لازم نقطع علاقتنا بها نهائي ولا حتي كلمة صباح الخير .
سامي : كده احسن فعلا ، نغير الموضوع بقي احسن ، عايز اقولك خبر حلو .
سهام : خير ؟
سامي : بكره هنوقع عقد شغل مهم جدا وهناخد نشغل لمدة ست شهور .
سهام : الف مبروك يا حبيبي ، هو ده الكلام .
سامي : ادعيلنا ربنا يوفقنا ونكبر مشروعنا .
سهام : يارب تكبر يا حبيبي وتبقي قد الدنيا كلها .
في اليوم التالي عاودت شاهي الاتصال بسامي مرة اخري فتجاهلها سامي فارسلت له رسالة تهديد ” انا البارح كنت ممكن اقول لمراتك علي كل حاجة لكن لما شوفتك خوفت وقولت انك طلعت شقتي مع جوزي مرة واحدة مش حبيت اطلعك كداب لو مش هترد عليا مفيش قدامي حل الا اني اقولها علي كل حاجة ” .
رد عليها سامي ” نأجل الكلام لبكره علشان عندي عقد عمل مهم هنوقعه النهارده في الشركة ” .
شاهي ” لو مش كلمتني بكره هقولها ” .
سامي : حاضر اوعدك هنتكلم بكره .
شعر سامي بخطر شديد يهدد حياته وهو لا يستطيع مقاومته !!!
وبعد ان انهي عمله جلس وحيدا في الشركة حتي يصل للقرار الصواب .
عندما شاهده شريكه مروان سأله : مالك يا سامي ؟ شكلك متضايق !! في حاجة في الشغل مضيقاك ؟
سامي : لا ابدا بالعكس .
مروان : المفروض تكون فرحان بالعقد اللي وقعناه النهاردة !!
سامي : ايوه طبعا الحمد لله ، انا مشغول بموضوع تاني بعيد عن الشغل .
مروان : يعني ممكن اساعدك فيه لو مش عندك مانع .
ابتسم سامي ” ابتسامة مصطنعة ” : لا لا الموضوع مش مستاهل .
مروان : ماشي يا سامي علي راحتك ، هتمشي دلوقتي ولا هتفضل قاعد ؟؟
سامي : لا انا همشي .
مروان : طيب يلا علشان اوصلك في طريقي .
سامي : ماشي يا مروان .
مروان : انت صحيح مش ناوي تشتري عربية بدل اللي بعتها ؟
سامي : هشتري ان شاء الله بس مش دلوقتي .
مروان : طيب ما تاخد جزء من الفلوس اللي اخدناها النهاردة وتشتري اللي انت عايزه !!
سامي : لا انا مأجل موضوع العربية دي كام شهر كده انما دلوقتي في حاجة اهم هعملها بالفلوس .
مروان : حاجة ايه ؟
ابتسم سامي : لا دي بقي خليها مفاجأة .
وقبل منزله بمسافة نزل سامي من سيارة مروان فسأله مروان : هتنزل هنا ليه ؟ خليك اوصلك لحد البيت .
سامي : لا انا هنزل هنا علشان رايح مشوار .
مروان : ماشي يا حبيبي ، عايز حاجة ؟
سامي : لا يا حبيبي شكرا ، سلام .
وبعد عدة ساعات عاد سامي الي منزله فسألته سهام : عملت ايه يا حبيبي ؟
تعجب سامي من سؤالها وقالها : في ايه ؟
سهام : عملت ايه في عقد الشغل اللي كنتوا هتعملوه النهاردة ؟
ابتسم سامي : ايوه الحمد لله تمام .
سهام : بالتوفيق ان شاء الله ، اومال مالك كده شكلك مشغول بحاجة !!!
سامي : لا ابدا مفيش حاجة ، يلا جهزي الاكل علشان جعان جدا .
في اليوم التالي نزل سامي لعمله صباحا ثم اتصلت به شاهي !!
امسك سامي بهاتفهه ونظر فيه لثواني ثم رد عليها …
سامي : ايوه يا شاهي .
شاهي : اسمها صباح الخير، في حد بيرد علي حد الصبح ويقوله ايوه !!
سامي : معلش لسه مش شربت القهوة بتاعتي ومش مركز .
شاهي : طيب عملت ايه في الشغل بتاع البارح ؟
سامي : تمام الحمد لله .
شاهي : يعني ممكن نتكلم النهاردة ؟
سامي : ماشي يا شاهي نتكلم .
شاهي : طيب هنتكلم فين ؟
سامي : زي ما تحبي .
شاهي : تحب نتقابل بره وتيجي نقعد نتكلم عندي ؟
سامي : خليها بره في اي مكان احسن ؟
شاهي : طيب ما تيجي في شقتي احسن ؟
سامي : ما بلاش يا شاهي ؟؟
شاهي : علشان خاطري .
سامي : طيب ماشي ، هجيلك امتي ؟
شاهي : في اي وقت ، بس قولي قبلها بساعة علشان ارتب نفسي .
سامي : خلاص متفقين .
- يتبع الفصل التالي اضغط على ( رواية المتعة الحرام ) اسم الرواية