رواية غوي بعصيانه قلبي كاملة بقلم نهال مصطفي عبر مدونة دليل الروايات
رواية غوي بعصيانه قلبي الفصل الثامن و الثلاثون 38
-من كتاب خُلق القلب عصيـًا :
“ظننت يومًا أن رسائلي وقصة حُبي المجيدة ستكون تراثًا أدبيًا للعشاق ، طاقة نور لكل اثنين اختلفا ، افترقا ! أردت أن تكون كلماتي حبل الوصل المنعقد بقلوبهم مهما ابتعدا ..
ظننت أن سلاح حُبي سيُنافس رسائل حب غادة السمان ومى زيادة ..
كل هذا تدفق من قلبي لأني عشت حبًا بمذاق التوت ، وأردت أن أوزعه على الجميع بعدي .. أن أعري قلبي وأصرخ بأعلى صوت لدي وأعلنها صراحة أن الحب هو جنة الله على الأرض ..
واليوم وأنا أقف أمام محرقة أيامي وذكرياتي .. ويعلن الدخان المتصاعد خيبة قصتي الزائفة معك ، سقطت الدنيا من بين يدي وبتُ أحذر الجميع من نار الحب بعدما خُدعت بجنته المؤقتـة …”
~رسيل.
•••••••
-هل أنا استاهل ده كله ؟!
اعتدل لينام على جنبه ناحية الجهة المُطلة عليها وسألها باهتمام :
-أنا مش فاهم حاجة ، مين ده وأيه حكايته ؟! أنتِ افتكرتي حاجة ؟!
هزت رأسها بالموافقـة ، فـ تلهف لسماع ما تذكرته:
-احكي ، افتكرتي أيه ؟!
-هحكيلك …
كانت كلمتها خافتة مترددة ، صمتت بعدها طويلًا تُراجع قرارها المفاجئ ، كيف ستروي إليه جرحًا غائرًا كهذا ؟! من سيكون لتعري قلبها أمامه ، ولماذا ؟! انتفضت من نومتها وهربت منه ومن المأزق الذي أوقعت نفسها بجوفه .. تمتمت بعجل :
-مفيش حاجة ..
وثب خلفها إثر نهوضها المفاجئ وقلقها الملحوظ :
-استنى ! هتروحي فين .
تحججت :
-الحمـام ..
لمع الكذب فـ عيونها التي اخفضتهم سريعـًا ، كشف أكذوبتها قائلًا بثقة :
-حياة !
كادت أن تخطو خطوة للأمام ولكنه عاق خُطاها قائلًا بنبرة أكثر حدة :
-هروبك مش حل !
-ولا أني أحكي لك حل .. ؟
رد بحسـم :
-لا حل ، مفيش مخلوق ممكن يساعدك في اللي أنتِ فيه ده غيري ..
-بصفتـك مين ؟!
رفع حاجبه قائلًا بشك :
-جوزك مثـلًا ..
زفرت بوجهه باختناق ودفعته بإصرار مغادرة المكان الذي يجمعهم سويا ، منفردة بجروحها العميقة دون السماح لمخلوق آخر أن ينبش بهما ..
مرت دقائق قليلة وقف فيها حائرًا كيف يكتسب ثقتها ، حسم قراره وغادر الغرفة متبعًا خُطاها حتى وقعت عيناه على شعرها الأسود الذي يغطي ظهرها واقفة أمام الشرفة الزجاجيـة ..
اقترب منها ببطء وهو يقول بهدوء :
-بلاش بصفتي جوزك ، بس ماينفعش أكون معاكي من بداية الحدوتـة ، وتنهيها لوحدك من غيري ..! أحنا الاتنين في مركب واحدة لحد ما توصلنا لدار الأمان سوا أو نغرق سوا .
-أنت عايز أيه ..؟
-عايز أعرف حالتك وصلت لفيـن ؟! وافتكرتي أيه !
طالعته بصمت مريب ما بين حيرتها في الكتمان أم الإفصاح ، حتى يأس عاصي من جوابها قائلًا :
-طيب بلاش أنا ، تيجي نروح للدكتورة بتاعتك ؟
شـردت لدقائق ثم أخذت نفسًا عميقًا وغاصت في تلك التفاصيـل القليلة التي تذكرتها عن الماضي ، زغللت أنظارها في العتمة المرصعة بالأنواع الصناعية أمامها وقالت بخفوت :
-واضح أن ذكريات الماضي كلهـا ضلمة .. ضلمة ما تختلفش عن الحاضـر .
ثم طالعته بعيونها الذابلة :
-طلع النسيان للي زيي هدية ، مش عقاب !
لم يقطع خلوتها مع قلبها الذي شرعت في فتحه ، عقد ذراعيه أمام صدرته منصتًا باهتمـام ، فأكملت :
-كُنت واقفـة قدام المراية بختار أحلى فستان عندي ، كنت بلم شعري لأنه مش بيحبـه مفرود ، افتكر يومها رفضت أحط ميك أب على ملامحي لانها كانت منورة من غير حاجة .. كان الوقت بدري ، الشمس لسه مضحكتش للكون بس قلبي أنا اللي ضحك للعالم وقتها .. نزلت أجرى من البيت عشان أقابله خصوصا لما عرفت أنه لغى سفره عشاني …
لمعت عيناها بدموع الحسرة وابتلعت ما بجوفها من أكاذيب هواها الزائف ، دنى منها خطوة سُحلفية باهتمام :
-كملي ..
تقطرت دمعة من عينيها وقالت :
-معرفش أيه اللي حصل ، فجاة وقعت على الشط ، كنت حاسة بكل حاجة بس مش قادرة أقاوم ولا أقف على رجليا ، كان كابوس ، كابوس مش بشوف فيه غير غدر وخيانة وعجز وحسرة .. حسيت فيه بأبشع أحساس ممكن أي حد يتخيله .. أخد مني كل حاجة بدون وجه حق ، ، روحي وحبي وضحكتي ومستقبلي ، طبع ختم أنانيته على كل حتة فيا ، أخد كل ده بمنتهى الوحشية ومن غير ذرة رحمة ، شعور بشع ، فجأة كل المشاعر الجميلة اللي جوايا اتحولت لكره وغضب ونفور .. !!
“تظنه ضمادًا هو الذي جاء كجرح إضافي لا أكثر ”
هذا ما تجول في خاطرها وهي تسرد بشاعة الحدث ، تغلفت كلماتها بالبكاء المكتوم وهي تطالع ملامحه بعتب :
-نفس الموقف عشته مرتين ، كل حاجة حصلت ما بينـا كانت مش مفهومة بالنسبة لي ، صورته كانت بتطاردني في كُل لحظة وأنا معاك ، مكنتش عارفة أنا مع حبيب ولا عدو .. أنا فين وأيه اللي بيحصل فيـا ؟! طيب أنا كنت معاك حياة اللي أنقذتها وأمنت على نفسها معاك ، ولا رسيل اللي نبشت في مقبرة جروح الماضي وبقيت الأشباح تطاردها هنا وهناك !
انهمرت عبراتها وقالت بعجز :
-دماغي وقفت عند الموقف ده ، أنا مش قادرة افتكر حاجة تاني ، حاسه أن الموقف ده هو البير الغويط اللي أنا وقعت فيه وضاع فيه أيديا الحاضر والمستقبل ..
ثم قفلت جفونها بهدوء وتساءلت بتيـهٍ :
-أنا مين .. وليه بيحصل معايا كل ده ..؟ وليـه بحكي لك أنت بالذات ؟!
-حياة .. !!
ابتلع بقية سؤاله عن حقيقة الاعتداء على روحها ، وتقاسمت حمرة الغضب معالم وجهة وهو يحاول نفي كل ما أدركه من مغزى كلماتها ، أخذ يدق الأرض بمشط قدمه ، ساد الصمت بينهم طويلًا حتى تفوه متسائلًا ومحاولًا تمالك أعصابه قدر الإمكان :
-مين هو ؟!
ترددت قبل أن تُجيبه ، تراجعت خطوة للخلف وهي تحدجه بعيونهـا الحائرة ، حتى فاض صبره وتفجر غضبه صارخًا مع صوت تحطيم الزجاج الفازة التي طاحت بها يده :
-بقول لك مين هو ؟!
انتفضت من مكانها بذعرٍ وبللت حلقها الذي جف ، تحركت ببطء نحو هاتفه المتروك على المنضـدة ومسكته بكفها المرتعش وقالت بتوجس :
-افتحه …
فتح هاتفه على الفور فكانت صورة قاسم أمامه ، أخذ يعاين الصورة وشرعت هي الأخرى في سرد ما يدور بخاطرها :
-لما شفته في الفندق اتخنقت حسيت أني عايزة أهرب من المكان اللي هو فيه ، بس لما نداني باسمي ” رسيل ” ، قولت ده يعرفني ، ووقتها كنت تايهه عايزة أعرف الحقيقة وبس .. عشان كده روحت له الأوضة بتاعته ووو للأسف …
التقت أعينهم التائهة للحظات أشار لها بحاجبه أن تُكمل ، فأطرقت بخفوت :
-حاول يكرر غلطه و يعتـٰـدي عليا تاني وو
بعدما تأمل الصورة وتحولت ظنونه ليقين هتف بغلٍ وهو يتوعد أمامه صورته :
-يا ابن الـ*** ، وديني ما هرحمك ولو كنت في بؤ السبع .
اقتربت منه بخوف :
-هتعمل ايه ؟
لزم الصمت لبرهة ثم قال وهو متأهب للذهاب :
-هتشوفي ..
توقفت أمامه بترجي :
-استنى ، هتروح فين ؟
جهر بغضب :
-هروح أجيبه من تحت الأرض ..
وقفت أمامه راجيـه بدموعها :
-خليك هنا ، متروحش مكان ، أنا جوايا خوف وإحباط هيقتلوني ، مش عايزة أبقى لوحدي ، شكل الحيطان مرعب ، أنا بترعب لوحدي ، خليك هنـا .
صمت للحظات ثم قال بعدما حسم قراره :
-ادخلي غيري لبسك ، هننزل .
-هنروح فين ؟!
-هتعرفي .. يلا البسي لحد ما هعمل تليفـون .
••••••••
” في قصـر دويدار ”
أصبحت تتقلب بجواره على طرف السرير بقلق ، منكمش في لحافها بتوجس في الغُرفة المظلمة التي لم يشع منها ألا نور شاشة ” التابلت ” الخاص بتميم ، لاحظ قلقها وتقلبها ، قفل الحاسوب وقال بهدوء:
-بدل القلق ده كُله ممكن نتكلم .
لم تتحرك من نومتها وقالت بفتور :
-هنقول أيه ؟!
-هنقول أن اللي عملتيه غلط يا شمس ، وأنا ما رضتش اعتابك وأنت متعصبـة لأنك للاسف على حق ، وبتحاولي تظهرلي الحق للنور في مكان ماشافش غيـر الظُلم !
أخذت تستمع إليه باهتمام ، تنهد تميم بوجع وأكمل :
-أيام احتلال اليهـٰود لأحد الدول الأجنبية في القرون القديمة ، كانت الحرب على أخرهـا ، والجماعة دول أضعف ما عندهم المواجهة ، كل الرجالة راحت تحارب عدوها الصهيوني ، وسابت بيوتها وستاتهم ومشيوا ، وقتها اليهود استغلوا ده وبدل ما يروحوا على ساحة المعركة ، هجموا على القرية دي بكل قوتهم وقاموا بالاعتـٰداء على جميع السيدات ..
اعتدلت شمس في نومتها لتستريح على ظهرهـا وهي تستمع إليه باهتمـام حتى أكمل :
-طبعا العار والخزى خيم على وجه الستات ، كلهم اتعرضـوا للأغتصـٰاب الجماعي من عدوهم إلا ست واحدة كانت خارجة من بيتها وماسكة في أيدها رأس الجندي اللي حاول يقـربها ، وفضلت تصرخ بكل فخر وهي بتقول ” يا أما يقتـلنٰـي يا أقتلـٰه “.. تعرفي حصل أيه بعد كده ؟
حان منها صوت الأنيـن منصتة إليـه :
-أيــه؟
-كل الستات هجموا عليهـا وقتٰلوها ، عشان يقتـٰلوا معاها صوت الحق ، عشان لمـا أزواجهم يرجعوا من الحـرٰب ، مش يلوموا عليهم ، وليـه مدافعوش عن نفسٰهم زي الست دي .. اتكاتر صوت الشـٰر على الحق لحد ما دفنوه … دفنوه عشان محدش يعايرهم ولا يكون أحسن منهم .
ثم تنهد بحرقة :
-أهو أحنـا بقينا عايشين في الزمن ده ، وبالأخص في القصـر ده ، أن الحقيـقة اختفت كل ده ومظهرتش للنور معناه أن سيف الشر بيقطع لسـان كُل واحد بيحاول يقول الحق ..
نهضت شمس من نومتها معاتبة :
-أنت كُنت عايزني اسكت لها بعد اللي عملته معاك ومع حياة ومع جدتي ؟! دي ست القٰـتل بيجري في دمهـٰا ، أنا مش هعرف اسكت لها بعد النهاردة ؟!
-هل مواجهتك ليها حل ؟! بالعكس دي فتحت أبواب شرها في وشنـا .. عبله المحلاوي مستعدة تعمل أي حاجة عشان تحافظ على مكانتهـا .
أعلنت شمس بتحدٍ :
-وأنا وراها ، شوفت الحكاية اللي أنت لسه قايلها ! أنا بقا الست دي ، يا أقتلها يا تقتلني ؟! أنا مش هسمح لها تاخد مني تاني حد يخصني ..؟
لاحظت ابتسامته المحياه على وجهه التي جاءت منافيـة لمغزى الحديث ، رمقته باستغراب :
-أنت بتبتسم ليـه ؟!
جُملتها العفوية تُشبه إنبعاث الضوء من زاوية صغيرة في جوفه الذي ظلّ مظلمًا لسنين طويلة ، أطال النظر إليـها وقال بأمل يتدفق في مقلتيـه :
-اعتبره اعتراف صريح بأني حد مهم في حياتك مش عايزة تخسريه ؟!
تضاربت رغباتهـا مع قناعتها وهي تسترجع ما قالته بعفوية ، انتفضت مقلتيها هنا وهناك حرصًا منها ألا تلتقي بعيونه الكاشفـة وقالت هاربـة من حصار نظراته :
-أنا هنام ، تصبح على خيـر .
تكومت تحت غطاءها وهي تعاتب نفسها عما أفصحت به بتلقائيتها ، بدأ سؤاله يخربش على جدار عقلها تارة وجدار قلبها طورًا ، حتى غاصت في أعماق الحيـرة واستسلمت للنوم الذي اتخذته كهدنة من تلك الحـرب الشرسة التي اندلعت بها ..
•••••••
“بعد الثانيـة عشـر من متتصف الليـل ”
خرجت ” نوران ” من الغرفة تتسلل كاللصوص وتخطو بحرصٍ كي لا يراها أحد حتى وصلت إلى الحديقة الخلفيـة بالقصر وانفجر خوفها وحرصها الشديد بوجه كريم الذي لم يكف عن الاتصال بهـا ، فهتفت معاتبة بجزع :
-تصدق انا غلطانة اني اديتك رقمي ، اقولك على حاجة انا هغيره خالص ..
كريم بحيرة :
-ممكن تهدي …؟
-اف ؟ هديت أهو ، ايه المهم اللي ينزلني اقابلك في الساعة دي ؟!
تجولت عيني كريم بالحديقة حولهم للحظة ثم زفر متنهدًا :
-انا كنت عند مراد من شوية ، وحالته كانت صعبة اوي ..
جهرت نوران بصوت عالٍ باعتراض واضعة يديها على خصرها :
-وأنت جاي تقول الكلام ده بعد ما أخوك جرجرها وبهدل البنت ، بصراحة يستاهل ، دانا نفسي اشوفه عشان أكسر دماغه بنفسي ..
حدجها كريم معارضًا :
-وبالنسـبة للي عمله عاصي في هدير ؟! ده عادي بالنسبة لك ؟!
-عاصي قال قدامنا انه مش قصده يوقعها ، اختك اللي وقعت لوحدها ..
تفوه كريم باصرار :
-قصده ولا مش قصده متنكريش انه السبب في اللي حصل لهدير ..
وبخته باعتراض :
-وانا مالي بكل ده ، هو أنا اللي وقعتها ، روح حل مشكلتك مع ابنك خالتك الغريب ده اللي عمري ما استريحت له .
-مش موضوعنا ، وهدير وعاصي سيبك منهم ، المهم عايزك تساعديني نرجع مراد لعالية ..
ضحكت باستهزاء :
-انت بتحلم ! أخوك الهمجي ده يروح يتعالج مش يتجوز .
-يا نوران افهميني ، أنتِ الوحيدة اللي قاعدة مع عالية طول الوقت ، وهتعرفي تاخدي وتدي معاها فالكلام ، عايزك تفهمي منها لو فعلا بتحب مراد وفي سوء فهم حصل ما بينهم ، نحاول نصلحه سوا ونجمعهم ..
ثم اقترب منها متوسلًا :
-مراد بيصفي حساباته وهيسيب البلد كلها ويسافر ، أنا مش عايـز اخسر أخويا ، أنا اتربيت بعيد عنه ، جيه الوقت اللي اقف جمبه ، مراد طول عمره وحيد وبعيد عننا وانا مش عارف ازاي الحياة كانت وخداني كده عنه ، ممكن يا نوران تساعديني ؟
فكرت قليـلًا ثم قالت :
-طيب سيبني أفكر الاول وأعرف عاليـة عايزة أيه !
ثم تراجعت سريعًا :
-بس ده مايغيرش رأيي بردو أن أخوك يستاهل كل ده .. أوعى تكون أنت كمان غبي كده زيه !
تبسم كريم بطيف ابتسامة وهو يقول بفخر :
-أنا مفيش أطيب ولا أحن مني ، والأيام هتثبت لك ده ..
حدجته بإنكار :
-وتثبت لي ليه ؟! الكويس كويس لنفسه .. تصبح على خير يا هندسة .
-استنى بس ..
تأفف بضيق :
-في أيه تاني ؟!
-متغيريش رقمك والكلام الأهبل ده عشان المرة الجايه هتلاقيني جيت لك من الشباك ، ومش بعيد عليا وأنتِ عارفة ..!
تبسمت بتحدٍ :
-بلاش ، عشان أنت اللي مش عارف أنا ممكن أعمل فيك أيه لو كررتها ..
مجرد ما أردفت جملتها ولت ظهرها مغادرة لتضب حقائب قلبها التي فُتحت أمامه على مصرعيها بدون رقابة منها .. وهي تلوم نفسها :
-أيه الهبل ده !! مش ناقصه غير سي كريم كمان !
••••••••
” صباحـًا ”
صف عاصي سيارته أمام قريته السياحيـة بالغردقة ،وفك حزام الأمان ثم ولى إليهـا يتأمل ملامحها النائمـة بحب ممررًا ظهر كفه على وجنتها الناعمة مناديًا باسمها الذي أطلقـه عليها :
-حيـاه ….!
فتحت جفونها ببطء :
-أحنـا فين ؟
ثم تفحصت المكان حولها وكررت سؤالها :
-أحنا هنا بنعمل أيه ؟
-أهدي ممكن ، انزلي يلا نرتاح ساعتين عشان عايزك فايقـة النهاردة .
حاولت استيعاب كلماته ولكنها كررت حيرتها متسائلة :
-بردو أحنا جينا هنا ليـه ؟
-عشان تعرفي كل حاجة .. ممكن تنزلي بقا .
حررها من حزام الأمان وقال بهدوء :
-انزلي يلا مش عايز أسئلة كتيـر ..
هبط من سيارته وأشار للسائس كي يصف السيارة بمكانها ، نزلت ” حياة ” خلفه وانتظرته قليـلاً حتى جاء وغلغل أصابعه بكفها المرتجف وقال بهمس :
-مفيش داعي للخوف ده على فكرة ، أنتِ معايا في أمان .
أومأت بخفوت وتابعت خُطاه بصمت حتى وصل إلى جناحه الخاص ، قفل الباب عليهم بعدما طلب لها الإفطار ، رمقته بتردد حتى قطعه بحزم :
-ارتاحي شوية لحد الأكل ما يجي ..
جلست على طرف السرير بتوجس وهى تراقبـه يجري العديد من الاتصالات الهاتفيـة بشرفة الجناح الذي يفصل الزجاج بينهم فلم تفهم منها إلا أن عصبيته فاقت الحد ، امتدت عيونها وأذانها محاولة منها أن تسمع شيئًا ولكن بدون فائدة ، نهضت إثر صوت الباب لتفتحه ، إذًا بالندال يجر أمامه طاولة الطعام ، شكرته بخفوت حتى انصرف ، جاء عاصي في هذه اللحظة مغيرًا جلده تمامًا راسمًا على وجهه ابتسامة طفيفة وقال :
-يلا عشان نفطر .
-ماليش نفس .
حدجها بحدة :
-اسمعي الكلام من غير مقاوحة ، لو سمحتي اتفضلي عشان تاكل وتنامي ..
-انا مش هنام ولا أعمل أي حاجة غير لما تقول لي جينا هنا ليه ؟!
قفل جفونه للحظة كي يتمالك أعصابه ثم قال :
-طيب اقعدي ناكل وهقولك بعدها عشان ماينفعش ننزل وأنت مأكلتيش حاجة من امبارح .. يلا اقعدي ..
جلست مرغمة لأوامره واكتفت بالقليل من الخضراوات ولكنه لم يجبرها أكثر على تناول المزيد ، انهى الثنائي إفطارهم الذي ختمه عاصي قائلًا :
-ترتاحي شويه ولا نقوم ننزل ..
-هنروح فين الأول ؟
مسك كفها بحنو ثم قال :
-هنتعرف سوا على رسيل قنديل المصـري ..
بدهشـة :
-أيه ؟!
هز رأسه متسائلًا :
-يلا ؟!
تحمست بمزيج من الخوف والقلق :
-تمام …
•••••••
“عودة إلى القصـر ”
-صاحيـة بدري ليه يا عاليـة ؟!
لمست أقدام عاليـة أخر درجة من السُلم فتوقفت إثر سؤال عبلة الأخيـر ، فأجابت بضيق :
-عندي جامعـة والامتحانات قريب وكفاية لحد كده اهمال .
هللت عبلة بفرحة :
-برافو عليكي ، أيوة كده أنا عايزاكي قوية ، كل اللي فات ده ارميه تحت رجيلكي ..
أومات بخفوت وتأهبت للمغادرة :
-تمام .. بعد أذنك .
-استنى يا عاليـة ، طنط يسرية من أول ما عرفت باللي حصل لك وهي متأثرة وعايزة تقعد معاكي شوية ..
ثم مالت على أذانها بهمس :
-وشكلها كده عايزة تخطبك لابنها وليــد ، حقا يا عاليـة لو حصل هيبقى عوض ربنا بحق ، أصلك متعرفيش ابنها شغال في الخارجيـة وباباه سفير ، أنا مش عارفة ازاي كنت بأجل الموضوع ده من زمان ..!
أحست عاليـة بالاختناق ثم قالت بضيق :
-مامي عندي جامعة ، ومش وقته الكلام ده ..
جاء كريم من أعلى وألقى تحية الصباح :
-صباح الخيـر ..
التوى وجه عبلة بضيق :
-أنت هنا يا كريم ؟!
-ااه يا خالتو ، جيت أخد حاجات لهدير والوقت اتاخر فنمت .
أردفت عبلة بضجـر :
-بصراحة كده يا كريم من وقت اللي عمله أخوك في بنتي وأنا ..
قاطعتها عاليـة بحزم :
-مامي ، كريم ملهوش دخل بكل اللي حصل ..
غير كريم مجرى الحديث قائلًا :
-تعالى أوصلك في سكتي ..
أومات عالية بالايجاب ، فسبق كريم خُطاها ، تأهبت أن تلحق به فأوقفتها عبلة :
-كلامنا ما خلصش يا عالية ..
تجاهلتها عالية وهربت من أسر ولعنة أمها متبعة خطاوي كريم ، أما عن عبلة فأخذت حقيبتها ومفاتيحها وغادرت البيت هي الأخرى …
” بالطابق العلوي ”
انتهت شمس من أداء صلاة الصبح ، ما أن فرغت من صلاتها سبقها تميم بحب :
-تقبـل الله ..
-منـا ومنكم ..
ثم قامت من فوق سجادتها واقتربت منه :
-تحب تفطر أيه ؟!
-سيبك مني ، أنتِ مش بتروحي جامعتك ليه ؟ على فكرة أنا مش بحب الإهمال ده ..
أجابت بتردد :
-معاك حق والله ، أنا فعلًا مقصرة وكنت بفكر اسيب السنة دي كلها …
-تفتكري ده حل ؟
-مش عارفة يا تميم ، حياتي كلها اتشقلبت أنا مابقتش فاهمـة بيحصل أيه ولا عارفة اتأقلم ، أنا متلخبطـة أوي .
-عشان كده حجزت لنا كلنا نغير جو وفرصـة عشان ترتبي أولوياتك ..!
ثم صمتت للحظات وسألها بتخابث :
-نمتي كويس النهاردة ؟
أومات بخفوت ثم ردت عليه :
-اااه نمت ، وأنتَ ؟
-بصراحة لا ، منمتش خالص .
-ليه كده .. ؟
اقترب منها بمقعده المتحرك ثم قال :
-البركة فيكي !
-أنا ؟ ليـه بس ؟!
ابتسم بمكـرٍ :
-هربتي قبل ما تجاوبي على سؤالي ، وسبتي دماغي تودي وتجيب لوش الصبـح .
-هااه ؟! أي سؤال؟! أنا مش فاكرة !
أنكرت فهمها لمغزى كلماته ، كي لا تقع في فخه مرة ثانية حتى قال معترفًا وهو يحتوى كفها :
-بعد اللي حصل إمبارح وأنت بقيتي حد مهم أوي في حياتي يا شمس ، حد مش حابب أخسره باقي عمري … مش هقول كلام لسه بدري عليـه ، بس أنا من أول وقت شفتك فيه اطمنت ، يمكن شعور الأمان هو اللي جابني لحد عتبة بيتك ..
أؤمن أن العلاقات بين البشر لا تُقاس بالحب بقدر ما تقاس بالأمان، الحب يتوهج ويخبو أحيانًا أما الأمان فهو شعور دائم متصل، أن أستأمنك على عيوبي وزلاتي، على تلك الأشياء التي أخاف قولها لنفسي مع يقيني التام بإنك لن ترمي يومًا ما استأمنتك عليهِ في وجهي …
زاغت عينيها بتوتر حتى تفوهت بحيرة تمتمت بخفوت :
-يعني أيه …. تمـيم.
ضغط على كفها المرتجف ثم قال بهدوء :
-الموضوع مش مستاهل الخوف ده كله ، أنا حسيت بحاجة فحبيت أعبر عنها ، وعلى فكرة أنا مش مستعجل خالص ، خدي وقتك على أقل من مهلك ..
تسارعت ضربات قلبها وتعالت أنفاسها المضطربة وغمغمت :
-أنا … أنا مـ.ش فاهمة ، وقتي في أيه ؟
-أيه يا دكتورة ! كنت فاكرك أذكى من كده ؟
ردت بشرود :
-أنا مقدرة مشاعرك وو
ثم تنفست بصوت مرتفع وضحكت بتوتر انعكس بحُمرة ملامحها وأخذ تلوح بيسارها كي تخلق المزيد من الهواء :
-تمـيم ، أنا جعانـة وأنت ؟
غمز بطرف عينه :
-شوفي هتفطرينا أيه وياريت في السريع عشان في مشوار مهم ورانا ..
وثبت بحماس كي تهرب منه ومن عيناه القاتلة وقالت بتنهيدة عاليـة :
-حالًا .. هجهز الفطار وأجي …
••••••••
-طبعًا مكنتش متخيـل أن الأيام تجمعنـا تاني ؟!
أردفت عبلة جُملتها الأخيرة على أذان العم حسين الذي باغتته بزيارتها الغيـر متوقعـة ، أجابها تحت غلاف صدمته :
-نورتي يا هانم ، تعالى اتفضلي ..
ردت بحدة :
-أنا مش جايـة اضايف ، هما كلمتيـن ملهمش تالت ..
-تحت أمرك يا عبلة هانـم ؟
-قول لي تعرف أيه ، أيه السر اللي عندك عشان تميـم دويدار يجيلك لحد هنـا ؟!
تأوه العم بمرارة مستندًا على عكازه :
-اااه !! هو نفس السـر اللي جابك هنـا عشان تتأكدي منه ..
تلون وجه الحرباء وقالت بغضب :
-بس أنت عاقل وما قولتش حاجة لتمـيم ؟!
-قولت له اللي يخليه يحط رجله على اول سلمة للحقيقة ، بس مسيره هيوصل ، سواء دلوقت او بعدين .
اقتربت عبلة بنيرانها التي كادت أن تحرقه :
-ما تلعبش بالنار وعيش الكام يوم اللي باقيين لك في سلام ، وزي ما سكتت زمان ، اسكت دلوقتي !
تبسم بغرابة :
-وأروح فين من ربنا ؟؟ مش كفايـة سكوت لحد كده والحق ترجعيه لصحابه !!
-أنت عرفت أزاي أن عاصي مش ابني؟!
نور ضوء الحق بوجهه :
-منك ، لسه قايلة بعضمة لسانك أهو !
وقعت عبلة في فخ شرها ، تراجعت للخلف خطوة ثم عادت إليه بقوة :
-اسمعني يا راجل أنت ، عشان أنا عارفة طريقة التعامل مع أشكالك بتكون أزاي .. تاخد كام ؟
-نص نصيب عاصي بيه دويدار ..
-دا انت بترسم على تقيـل بقا ؟!
أومىء بمكـرٍ :
-ونص نصيب الهانم الصغيـر ..
-كمان ؟!
-ماهي كمان مش بنتك ، ولا أيه ؟!
بدا الارتباك يقاسم معالم وجهها فتفوهت بحرقة :
-أنت بتقول أيه يا جدع أنت ؟! انت اتجننت !! انا ممكن امحيك من على وش الدنيا .. وبعدين أنت فاكر حد هيصدق الجنان بتاعك ده ؟
رد باستسلام :
-قادرة وتعمليها يا هانم .. عموما أنا مش بقول كلام ، أنا معايا الدليـل كمان ..
سقط قلب عبلة بين كفيها وقالت بقلق :
-دليل أيه ؟!
حسم العم حسين المقابلة وقال :
-المقابلة انتهت يا عبلة هانم .. ااه ومش أنا اللي ابيع ضميري بشوية ورق ملون زيك ، بس صوت الحق هيجيلـه يوم ويظهر ..
حدجته عبلة بغلٍ :
-كل كلمة قولتها هتتحاسب عليـها …
ثم تركته مسرعة وانصرفت تهرول من أمامه ، مجرد ما صعدت سيارتها هاتفت فريد بلهفـة :
-فريد ، أنا عايزة مساعدتك ضروري ..
••••••••
-هنا بقى يا ستي بيت ” قنديل المصري ” .. أبوكي .
قال عاصي جملتـه الأخيرة وهو يشاور بسبابته على أحد المنازل العريقة التي تتسم بالأصالة والفخامة ، فتحت رسيل الباب ودلفت من السيارة تتفقد أنحاء المنزل بعيونها الشاردة ، نزل عاصي وراءها ووقف بجوارها :
-ماينفعش حد يشوفك دلوقتي .
-ليـه ؟
-عشـان مش وقتـه ، دلوقتي أنا عايز رسيـل تفتكر وترجع لنفسها وتسترجع قوتها ، عشان في حرب كبيرة مستنياكي..
دارت إليه بذهولٍ :
-حرب أيه ؟! ومع مين ؟
نصب قامتـه وشرع في رواية ما توصل إليـه :
-الحادث اللي حصل لكم في البحر ، أدى لوفاة والدك ، وطبعا أنتِ مفقودة ، وأخواتك كمان اختفوا من الوسط كله ، يقال أنهم هربوا ، وناس بتقول طلعوا رحلة صيد وغرقوا .. لسه التحريات شغالة ..
أغرورقت عيونها بالدموع وهي ترتجف :
-يعني أنا لوحدي ! هفضل أدور ورا أمل باهت ؟!
ثم أجهشت بالبكاء وهي تتمسك برأسها :
-أنا عايزة أهرب من هنا .. أنا مش عايزة افتكر حاجة ، أنا راضيـة بالنسيان ..
ربت على كتفها :
-أهدي ممكن !! بقولك لسه التحريات شغالة ..
-طيب أنا ينفع ادخل البيت ؟
-ماينفعش دلوقتِ مش عايزين نلفت النظر ، خاصة أن ابن عمك بعد ما استولى على ورثكم كله مش هيسيبك لو عرف أنك لسه عايشة .. واحدة واحدة وأنا معاكي ومش هسيبك ..
ألقت نظرة أخيرة على البيت المقفول على ذكرياتهـا وقالت بنبرة مرتجفـة :
-يلا بينـا ، أنا مش عايزة اقعد هنا ..
مسك كفها بقوة وطالع عيونها بإصرارٍ :
-أنا معاكي ومش هسيبك ، مش عايزك تشيلي هم حاجة .. يلا أركبي …
••••••••
-وبعدين فيك ، أنا عندي مذاكرة ، هتفضل كل شـوية ترن عليا كده مش هينفع !
اردفت نوران جملتها بفظاظة وضيق من رنين كريم المتواصل ، صعد كريم سيارته وقال :
-أحنا مش بينا اتفاقيات ولا لا ؟! وارد تلاقيني بكلمك كل شوية !
-وانا مش فاضيـة لصداعك ده ؟
ضحك كريم بصوت هدر ثم قال :
-أنا لقيت حتة فكرة جهنميـة هترجع علاقة عاليـة ومراد ..
-وانا قولت لك مش موافقة ولسه معرفش دماغ عاليـة فيها أيه ؟
دور كريم سيارته متأهبًا للمغادرة :
-ما ده اللي مكلمك عشان تعرفيه النهاردة من عاليـة ، أنا بصراحة حاولت أقررها النهاردة ، بس هي رفضت الكلام في الموضوع خالص .. المهم هعتمد عليكِ !
اصدرت إيماءة خافتة :
-هحاول بس مش وعد ، أما نشوغ اخرتها معاك أنت واخوك ده أيه !!
ضحك كريم بصوت مسموع :
-اخرتها تبات ونبات ونخلف صبيان وبنات ..
-أيه الخفـة دي ؟!
قالت جملتها باستنكار توارت خلفه ضحكتها ، طوى كريم الأمر مغيرًا مجرى الحديث :
-طول عمري … أنا هروح اطمن على هدير دلوقتِ وبعدين هرجع عشان اجيب عالية من الجامعة ، مش عايزة حاجة !
-أنت هتقول لي خط سيرك !! يلا يا بابا من هنا أنت هتصاحبني ولا أيه ؟؟
رفع حاجبه متعجبًا :
-كمان !! يلا لولا بس المصلحة كنت هرد عليكي رد تاني ..
-ولا تقدر ..
كانت كلمتها بتحدٍ حيث انهت المكالمـة بعدها على الفور وهي تقول بعناد :
-هو مفكرني واحدة من البنات الفرافير اللي يعرفهم ولا أيه !!
•••••••••
” عودة إلى الغردقـة ”
على ” الياخت ” الخاص بعاصي دويدار وفي منتصف البحر تقف حياة شاردة متأملة الموج وهدوءه حولها ، تفكر فيما أخبرها به وكيف ستواجه تلك المآسي بمفردها ، تأملت السماء المُلبدة بالغيوم فوقهـا فأحست بصقيع الكون حولها وهي تقف بمفردها بوجه هذه العاصفة القوية ..
طوق خصرها من الخلف وضمها إليه بنعومة ورفق وهمس إليهـا :
-الحيوان اللي عمل فيكي كده هجيبـه راكع تحت رجليكي ..
وحقك وحق اخواتك هرجعه كله ، أنا معاكِ لنهايـة الطريق .
جاءها بالوقت المناسب ، الوقت الذي تشكو فيه من الوحدة ومرها ، ساند ظهرها لتتكئ عليه وترمي فوقه جميع همومها ، تمتمت بحزن :
-وايـه اللي يخليك تورط نفسك في كل ده مع واحدة حياتها بالشكل ده ؟
ضمها أكثر إليه وهو يستنشق عبير شعرها المتطاير وقال :
-عشان أنتِ عندي مش أي واحدة ، أنتِ الواحدة اللي ماينفعش يجي بعدها حد تاني !
كان لكلماته صدى يدوي بجدار عنقها حتى تحولت أنفاسه لقُبلات خفيفة منه تتدلل فوقه ، أغمضت جفونها وعاشت معه تلك اللحظة التي روت فؤادها العطش والثائر مع هدوء ثورتها وأنفاسها ..
تمتم قلبها بميثاق الاعتراف عن شعوره بقربه :
“-يبدو أن الغيوم والسَماء والبحر يأخذوني إليك ..بينما يعجزُ الطريقُ الوعر الساكن بظُلمتي عن ذلك ! ”
تملصت من أسره بالملدوغـة وقالت بتوتر ورجفة :
-من فضلك ..
تفهم الأمر سريعًا وحاول أن يمتص غضبها قائلًا :
-أسف عارف أعصابك تعبانة ، بس حبيت أقولك أني في ضهرك ومعاكي وأني عمري ما هسيبك ..
بد الارتباك يجتاح جسدها :
-تمام تمام ، ولحد ما ده يحصل متضغطش عليا ، أنا مش حابة أي تقارب بينـا ، واللي حصل ، أنا اعتبرته حلم وانتهى ومش عايزة افتكره تاني… ياريت كل واحد فينا يلزم حدوده ..
اقترب منها سابحًا في سماء عينيها وقال :
-بالنسبة لي اللي حصل بينا كان أجمل حلم وواقع أنا عشته ،مهما حاولنا نهرب منه أحنا الاتنين .. أنتِ سكنتي في روحي على سهوه مني ..
انبسقت دمعة من طرف عينيها :
-أنا مش مراتك ولا حبيبتك وبلاش توهم نفسك بحاجة مش موجودة .
قطب حاجبيه مُعارضًا :
-أنت اللي بتحاولي تصدقي حاجة مش مقتنعة بيها ..
-لو سمحت ما تحكمش عليـا ، أنت تعرفني منين أصلا عشان تحلل شخصيتي!
مسك كفها وسحبها خلفه إلى غرفته الخاصة بالمركب ، فتح حقيبته الجلدية وأخرج منها كتابها ” خُلق القلب عصيًا ”
قلب في صفحاتها حتى عثر على الصفحة التي يُريدها وقرأ ما كتبتـه :
” المشاعر أول وثيقة تبدأ بين قلبين ، رجل وإمراة ذابا في بعضهما كما يذوب السُكر بالماء ، على من يقع اللوم يا ترى ! على السكر الذي لا يقاوم الماء أم على الماء التي ذوبت السكر بها !
خدعونا فقالوا :
-أن الحب الحقيقي يبدأ بعد الزواج !
والزواج ما هو إلا وثيقة ختاميـة لنيران المشاعر التي توقدت بالقلب ، اعتراف صريح بأن سُكري يحن إلى ماءك باستمرار ، الحب الحقيقي هو مفتاح الزواج ، غير ذلك لا تُصدق أكذوبتهم ..”
فارقت عينيه الكتاب وانتقلت إليها :
-ده كلامك على فكرة ..
أخذت الكتاب من يده وغرقت في كلماته بشغفٍ حتى سألها حائرًا :
-من رأيك اللوم على السكر ولا الماء !
رفعت جفونها بحيـرة :
-أنت قرأت الكتاب ده !
-مش كله ، بس حابب نقراه سوا ، كل كلمة متكوبة في الرواية دي من قلبك وروحك ، وأنا حابب أقرأك مع أني مش بهوى الكتابه ، بس هويتك أنتِ ..
ارتعش الكتاب بيدها حتى سقط منها بجوف الحقيبة مرة آخرى من حدة كلماته التي رجت قلبها ، مالت لتأخذه فوقعت عيناها على تلك ” اللؤلؤة ” النادرة التي أرسلها فريد مع عبلة لتُريها لعاصي ، مسكت اللؤلؤة بذهول وقالت شاردة :
-أنا حاسة أني شوفتها قبل كده !
- يتبع الفصل التالي اضغط على ( رواية غوي بعصيانه قلبي ) اسم الرواية