رواية موضوع عائلي الفصل الخامس 5 - بقلم رحاب القاضي

 رواية موضوع عائلي (كاملة جميع الفصول) حصربا عبر دليل الروايات بقلم رحاب القاضي

رواية موضوع عائلي الفصل الخامس 5

 

_الحلقه الخامسه

ــــــــــــــــــــــــــــــــــــــــــــ 

نور بحده  

هو ماله اصلا طلعت ولا مطلعتش مش من حقه يمد ايده عليا كان من باقي اهلي ميخليه في حاله ويسيبني فحالي.. 

_قرب منها فرجعت بضهرها لورا وهي بتتمني الأرض تنشق وتبلعها من قدامه.. 

وقال وهو متعصب من بين اسنانه 

حالك هو حالي ي نور وطول مانا عايش هتتعوجي عليا هوريكي ايام سودا ووريني هتطلعي البلكونه ولا هتقفي فالشباك تاني ازاي... 

نور 

انا حره انت ملكش كلام عليا.. 

زعق يونس فيها وقال

 انتي طلعتي ولا نزلتي اخرك بيتي وتبقي تحت امري، ومش عشان سيبتك تتعلمي وتبقي دكتوره هتشوفي نفسك عليا  فووقي انا يونس الصاوي يا روح امك... 

عيطت وقالتله بعصبيه_

هو بالعافيه ي اخي بقولك مش عايزاك مش بطيقك.. 

اتعصب اووي وشدها من شعرها وقال_

 مش بمزاجك ي نور بمزاجي انا ولو اللي سمعته اتكرر تاني هندمك ع اللحظه اللي رفصتيني فيها.. 

_زقها بعيد فوقعت ع الارض وهي بتعيط وزعق فيها جامد وقال.. 

يونس

 فاهمه ولا لا؟.. 

قربت ام نور منه وطبطبت ع كتفه وقالتله بسرعه 

حقك عليا انا ي يونس يبني هي هتنفذلك كل كلامك ولو عملت غير كده انا بنفسي هقصفلك رقبتها بس متزعلش انت.. 

بصلها بعصبيه وقال وهو ماشي _

عقليها ي حماتي انا مش عايز ازعلها بس هي اللي بتعصبني بحركاتها دي.. 

_مشي يونس فقامت ودخلت اوضتها وهي زعلانه من مامتها انها متدافعتش عنها قدامه.. 

دخلت فايزه وراها وزعقت فيها _

وبعدين معاكي متتلمي عشان ما تحصلش مشاكل.. 

اتعصبت نور وردت عليها وهي بتعيط _

انتي لي بتعملي فيا كده ده مد ايده عليا وانتي مهنش عليكي تقوليلو حتي ليه.. 

ادايقت فايزه وقالتلها

خطيبك وخايف عليكي.. 

نور 

هو مش خطيبني ولا هيكون خطيبي، بس للاسف هو لو لاقي حد يقفله مكنش عمل فيا كده.. 

زعقت فايزه  فيها وقالتلها _

ومين اللي هيقفله انا ولا انتي ولا يكون ابوكي اللي مش قادر يتحرك من ع السرير، فوقي لنفسك انا وانتي لولا يونس وحمايته لينا كان زمانا لقمه طريه تحت ضرس اقل عيل فالحاره.. 

_دمعت عيون نور وهي بتسمع كلام مامتها اللي كملته وقالت بكل هدوء... 

فايزه

اعقلي ي نور وبلاش تخسري يونس اللي بنات الحته كلهم يتمنو منه نظره.. 

_طنشت نور كلامها وراحت فضلت تذاكر وهي بتمسح دموعها اللي بتنزل كل شويه... 

ـــــــــ #بقلم_الكاتبه_رحاب_القاضي ـــــــــ 

_ وقبل الفجر بشويه كان مازن في شقة ريهام وفي اوضة نومها بيلبس هدومه وهي قالتله.. 

ريهام 

طيب ما تخليك بايت عندي يا حبيبي النهارده.. 

مازن بجمود

مش هينفع عشان ماما وكمان عشان محمد هيروح يصلي الفجر وهو وراجع بيجي يطمن عليا.. 

ريهام وقف جنبيه وقالت

هو انت في حاجه مديقاك مني؟.. 

مازن بضيق

مش عارف، بصي هو في بنت كده شغلاني شويه.. 

ريهام بحده 

بنت مين دي ان شاء الله وبتقولها في وشي.. 

مازن 

لا مش اللي في دماغك انا بس هي صعبانه عليت شويه وكنت عايز اساعدها لانها بتعاني من مرض نفسي وو.. 

ريهام بحزن 

انا بعت الدنيا كلها عشانك يا مازن، ومستعده اعمل اكتر من كده بس في الاخر تقول للكل انك بتحبني ونبقي مع بعض الناس كلها، فا ما تجيش تجرحني وتعرف بنت صغيره عليا.. 

مازن مسحلها دموعها وقال

خلاص طيب مش هشوفها تاني خلاص.. 

ريهام ابتسمت وقالت

ربنا يخليك ليا يا حبيبي، روح يلا عشان ما حدش ياخد باله... 

مازن 

تمام يا قلبي... 

‌‌_وطلع مازن من عندها ودهل شقتهم لقي محمد في وشه، فاتوتر جدا وقاله.. 

مازن 

محمد انت ايه اللي مصحيك بدري اوي كده، لسه الفجر.. 

محمد 

انت كنت فين؟.. 

مازن بتوتر

اا انا كم كنت عايز اروح اصلب بس الجو ساقعه وكسلت.. 

محمد بهدوء 

طيب حاول تكبر دماغك من الكسل ده ويلا بينا نروح نصلي مع بعض... 

مازن 

طريقك اخضر يا شيخ محمد، انا السرير بيناديني هبقي بكره اصلي معاك... 

_ وسابه ودخل نام ومحمد نزل راح صلي الفجر ورجع لقي هاجر صاحيه ولابسه هدوم الصلاه... 

محمد

غريبه فكرت هاجي الاقيكي نايمه زي كل يوم... 

هاجر بهدوء

ما انت لما قومت انا ما جاليش نوم وقولت اقوم اصلي، صوتك جميل اووي في الاذان.. 

محمد ابتسم وقال

شكرا يا هاجر، هبقي كل يوم هصحيكي وانا. نازل تصلي... 

هاجر 

اايييه طب فكر بس تصحيني وانا نايمه، انا لو عايزه اصحي هصحي قال يصحيني قال.. 

محمد بخبث

لا هصحيكي هتبقي صعبه اول كام يوم بس هتتعودي بعد كده... 

هاجر بغيظ. 

بقولك ايه انت مش هتمشي كلامك عليا وروح نام يلا... 

محمد قرب منها وقال

وانا قولت هصحيكي وبعدين انتي تعرفي ان فضل صلاة الفجر عظيم جدا.. 

هاجر اتنهدت وقالت

فاهمه بس انا يعني... اوف اتنيل صحيني معاك بس. دي اخر مره هتمشي فيها كلامك. عليا.. 

محمد ضحك وقال

ههههههه تمام النهارده بعد المغرب هنروح لاهلك عشان عازمينا علي العشا، وبعدها هنرح نشتري بقي الحاجات اللي هتلبسيها مع الحجاب.. 

هاجر فرحت وقالت

انا البيت وحشني جدا بجد.. 

محمد بهدوء

هاجر هو انتي مبسوطه معايا ولا بتحاولي تتعودي وخلاص... 

هاجر بضيق

انا عايزه انام بعد اذنك.. 

_ راحت نامت ومحمد بصلها بجمود وطلع بره الاوضه قعد في الصاله... 

ــــــ #بقلم_الكاتبه_رحاب_القاضي ــــــ 

_ تاني يوم في بيت اهل هاجر، طلعت ولاء من اوضتها وراحت وقفت قدام باباها ومامتها وقالت.. 

ولاء

ايه رئيكم يا جماعه شكلي حلو النهارده؟.. 

حمدي

انتي طول عمرد زي القمر يا حبيبتي، بس ليه الشياكه دي كلها النهارده؟.. 

فاطمه قامت وقالت وهي داخله المطبخ

والله كان نفس سؤالي يا حمدي ليه الشياكه دي كلها ده انتي رايحه الجامعه يعني العريس مش واقف علي الباب.. 

ولاء بضيق

يعني هو لازم يبقي في عريس يا ست فاطمه عشان اتشيك، انا قرىت اهتم بنفسي وابقي حلوه علي طول.. 

حمدي

شاطره يا حبيبتي، بس شكلنا كده هنخلص جلسات عند الدكتوره قريب.. 

ولاء بحماس

ادعيلي انت يا بابا وانا هخف وهبقي زي الفل، يلا بقي سلام عشان ما اتاخرش علي المحاضرات... 

_طلعت  فاطمه وهي ماسكه في ايدها صنية الشاي وقالت... 

فاطمه 

مش هتنزلي غير لما تفطري يلاا.. 

ولاء

معلش يا ماما بس انا لازم امشي بسرعه يلا باااي... 

ومشيت ولاء وحمدي قال

هاجر اتجوزت وولاء راحت الجامعه وانا اجازه من الشغل والبيت فضي علينا يا فطومه.. 

فاطمه ابتسمت وقالت 

طيب بحيث انك اجازه والبنات مش موجودين ايدك معايا بقي نمسح الشقه وبعدين انزل هاتلي الطلبات من تحت عشان عزومة جوز بنتك النهارده تبقي حاجه تشرفنا.. 

لوي حمدي بوقه وقال

اممم امسح معاكي واجيب طلبات ده ياريتني روحت الشغل احسن.. 

_ وفي الجامعه كانت ولاء قاعده في المكان اللي قابلت فيه مازن قبل كده وبتقلب في موبيلها وجه هو قعد جنبيها ومدلها كوباية قهوه وقال.. 

مازن 

صباح الفل.. 

ابتسمت ولاء واخدت منه القهوه وقالت

صباح النور، كنت هزعل لو ما كنتش جيت.. 

مازن بصلها وابتسم وقال

للحق ما كنتش جاي، بس وانتي زعلانه بتبقي غبيه وممكن تعملي مصيبه قولت ارحم الكوكب من الكارثه دي واجي.. 

ضحكت ولاء وقالت

ههههه لا هحاول اضبط نفسي بعد كده.. 

مازن 

طيب مش هتروحي محاضرتك بقي؟.. 

ولاء بضيق

لو. انت عايز تروح روح.. 

مازن 

ثواني بقي دي مش كليتك اصلا وانتي مش عايزه تروحي المحاضره ممكن اعرف ايه السبب ؟.. 

ولاء بضيق

مش عايزه اشوف صحابي هيدايقوني لو ما كنتش انا وداخله هيكون وانا طالعه.. 

مازن مسك ايدها وقال

تعالي. معايا وما تخافيش... 

_ اخدها مازن وراح المدرج بتاعها ودخل وهو ماسك ايدها قدام الكل وخلاها قعدت في الصف الاول وقالها بصوت واطي.. 

مازن 

هتخلص المحاضره وتيجي بسرعه علي المكان بتاعنا اوكيشن.. 

ابتسمت ولاء وهزت راسها بسرعه وقالت

حاضر، شكرا يا مازن.. 

_ ابتسملها بهدوء وطلع وكانت هناء في عيون مراقباهم بكل حقد وهما صحابها القدام.. 

سالي

امم ده الموضوع شكله مطول بقي.. 

علي بغيظ 

كله بسببكم انا فضلت اقولكم اقرب منها خوفوتوني لحد ما جه غيري وخدها اهو.. 

مي بسخريه

هو انت عاجبك فيها ايه اصلا، دي عبيطه وعيله في نفسها كده... 

عمر

خلاص بقي انت وهي الدكتور دخل... 

ـــــــــ #بقلم_الكاتبه_رحاب_القاضي ــــــ

_وفي بيت نور كانت لابسه وخارجه، بس وقفتها فايزه لما سألتها.. 

 فايزه

انتي رايحه فين؟... 

ردت عليها نور بعصبيه 

هكون رايحه فين يعني الجامعه ي ماما.. 

الام 

طيب كلمي يونس وقوليلو الاول مش ناقصين مشاكل وفضايح.. 

 ردت عليها نور وهي بتزعق 

لا مش هكلمه وملوش دعوه اصلا.. 

مسكتها  فايزه من دراعها جامد وقالت _

انتي لو مقولتيلوش ي نور انا اللي مش هطلعك من البيت.. 

_سابتها فايزه ودخلت المطبخ ، وهي غصب عنها مسكت موبيلها وكلمته وهي مدايقه جدا.. 

رد عليها

 عايزه اي؟.. 

قالتله وهي متعصبه 

رايحه الجامعه.. 

رد عليها ببرود 

لا.. 

نور

هو اي اللي لا انا عندي محاضرات مهمه.. 

زعق ورد عليها 

وانا قولت لا، وكلمتي هتمشي عليكي ولو خرجتي من البيت ي نور هكسرلك رجلك.. 

قفل فوشها فرمت هي الموبيل ع السرير وفضلت تعيط... وبعدين موبيلها رن ولما شافت اللي بيرن عليها، قامت بسرعه وقفلت الباب وردت وقالت.. 

نور

ايوه يا احمد.. 

احمد

انتي مش جايه الجامعه ولا ايه النهارده؟.. 

نور

لا يا حبيبي مش جايه النهارده خالص.. 

احمد 

ليه يعني في حاجه معاكي ولا ايه؟.. 

نور مسحت دموعها وقالت 

ما فيش بس بابا تعبان شويه ولازم افضل جنبيه.. 

احمد

طيب خليكي عندك وانا هجيلك حالا ابعتيلي بس اللوكيشن.. 

نور بقلق

لا لا مالوش لزوم هو بقي كويس خلاص.. 

احمد

يا ستي الحمد لله انا بس بتلكك عشان اجي اتعرف علي اهلك ممكن بقي تبعتي اللوكيشن.. 

نور بخوف 

لا بحد. مش هينفع دلوقتي خالص يا احمد لو سمحت.. 

احمد بحده 

انا مش فاهم انتي ليه بتتهربي من الموضوع ده كل ما افتحه معاكي، علي العموم براحتك انا لازم اقفل...

قفل معاها وهي قالت

منك لله يا يونس انت السبب في كل اللي بيحصل ده، بس انا عمري ما هتجوزك انت خلاص ما بقتش مناسب ليا حتي لو هموت مش هكون ليك.. 

ــــــــ #بقلم_الكاتبه_رحاب_القاضي ـــــــــ 

_ في الجامعه كانت ولاء ماشيه جنب مازن وقالتله.. 

ولاء

بس واول ما هلصت المحاضره طلعت بسرعه قبل ما يقربو مني انا بجد مش عايزاهم، تخيل انت لو كنت واحد مش كويس شوفت كنت هوقع نفسي في ايه بسببهم... 

مازن 

كل واحد يتحمل نتيجة قراراته وزي ما قولتلك هما مش كويسين وقربك منهم هيرجع حالتك للصفر.. 

بصتله وابتسمت وقالت

شكرا اووي يا مازن بجد، انت عارف انا ما كنتش ببقي مبسوطه في الجامعه خالص، وكنت عايزه اعمل صحاب وذكريات عشان كده قربت من ناس مش كويسه وكنت فاكره انهم صحابس بس انت احسن منهم... 

بصلها مازن وقال

انتي ازاي كده بجد، ازاي انتي بالبراءه دي يا بنتي؟.. 

ولاء بحده 

انت بتترق ولا ايه قصدك اني عبيطه، طيب اهو انت.. 

ضحك مازن وقال 

ايوه انا عبيط عشان خليتك تفهمي قصدي غلط، انا اللي اقصده اني ما قابلتش بنت في حياتي غير وكانت متصنعه بتتعامل بطريقه مش قادر اقبلها معادا انتي حاسس ان ولاء من جوه زي من بره بالظبط وده مريحني في التعامل معاكي يا صديقتي.. 

ولاء ابتسمت وقالت

هو واضح انك بتقول كلام حلو فشكرا.. 

مازن بصلها بضيق وقال

بس كدا شكرا العفو يا ستي، تيجي تشرب حاجه قبل ما تمشي.. 

ولاء

لا انا لازم امشي لان هاجر اختي وجوزها جايين عندنا النهارده وعايزه اروح اساعد ماما في تجهيز العشا وكده.. 

مازن بقلق سألها وقال

ثواني بس معلش هو انتي لما شوفتك اول مره في العماره كنتي رايحه فين؟.. 

ولاء بهدوء

كنت رايحه لاختي هي متجوزه هناك واحد اسمه محمد حامد او الشيخ محمد، انت اكيد تعرفه مش انت ساكن هناك؟.. 

مازن بتوتر

اا لا مش ساكن هناك ده انا كنت وقتها عند واحد صحبي... 

ولاء

تمام همشي انا بقي.. 

مازن 

اا طيب ممكن رقمك، يعني عشان اكلمك اعرف انتي جايه ولا لا... 

ولاء بحماس

بجد انت عايز تعرف انا باجي ولا لا.. 

مازن 

ايوه فيها ايه؟.. 

ولاء

بصراحه كده انا ما فيش حد. بيهتم بيا خارج بيتنا يعني، انت احسن اخ في الدنيا بجد.. 

اتنهد مازن وقال

اخ امم طيب هاتي الرقم يلاا... 

_ واديته الرقم بتاعها ومشيت، ومازن قال لنفسه بسخريه... 

مازن 

طلعت اخت مرات اخويا الله واكبر وبعدين فيها ايه ما انا طلعت اخ في الاخر وكده احسن برضو... 

_ ومشي هو كمان وراح لصحابه وفضل قاعد معاهم شويه وما رجعش البيت... 

ــــــــ #بقلم_الكاتبه_رحاب_القاضي ـــــــــ

_ وبالليل في بيت صبري اخو شهد، طلعت من اوضتها وكان اخوها قاعد بيتعشي وبصت هي لزهره مراته اللي قالت.. 

زهره 

بقولك ايه يا اخويا البت هاجر صاحبة شهد جات عند بيت ابوها وشهد عايزه تروح تسلم عليها.. 

صبري بحده 

غوري يا بت انتي خشي جوه، واياكي اعرف انك بتكلمي البت دي اللي الله واعلم خطيبها سابها ليه يوم فرحها اكيد معيوبه.. 

شهد بحده 

هاجر دي بنت محترمه جدا وما فيش زيها ولو فيها حاجه وحشه ما كانش اتجوزها شيخ في ليلتها.. 

صبري قرب منها وقال بعصبيه 

انتي بتردي عليا يا بت انتي تعالي اديني قلمين بالمره.. 

بصت شهد للارض وقالت بخوف

انا اسفه ما كانش قصدي والله... 

صبري بحده 

غوري ودخلي جوه بوشك ده، اهي اللي بتدافغي عنها اتجوزت وانتي لسه قاعده في وشي زي الهم.. 

_ دخلت شهد وفضلت تعيط، ودخلت عندها زهره وقالت.. 

زهره 

انا عايزه افهم هو انتي دموعك ما بتخلصش ما خلاص بقي يا بت.. 

شهد ببكاء

حتي صحبتي مش مخليني اشوفها.. 

زهره 

حقك عليا انا، بصي سيبك منه وانا هظبطلك يوم تروحيلها بيت جوزها... 

حضنتها شهد وقالت

حبيبني يا زهره ربنا ما يحرمنيش منك ابدا... 

ــــــــ #بقلم_الكاتبه_رحاب_القاضي ــــــ 

_ وفي محل للملابس المحجابات كان محمد وهاجر هناك وجابت حاجات كتير وجات وقفت قدام مرايه ومسكت طرحه صغيره وعملتها علي شكل ايشارب وقالت لمحمد.. 

هاجر

ها ايه رئيك كده شكلي حلو صح؟.. 

محمد 

هو انتي كده محجبه اصلا ما رقبتك باينه؟.. 

هاجر

بس مداريه شعري.. 

محمد بهدوء

هو يعني ايه حجاب يا هاجر انك تداري شعرك بس، يعني لو لبستي بدلة رقص وداريتي شعرك تبقي انتي كده محجبه؟.. 

هاجر بتوتر

لا طبعا بس انا مش لابسه بدلة رقص.. 

محمد 

يعني هو لازم بدلة رقص، يا بنتي اللي اقصده ان لبسك نفسه حجاب لوحده وحجاب لشعرك وحجاب للسانك وحجاب لتفكيرك وفي حجاب لبصرك.. 

هاجر بصت للطرحه اللي فايدها وقالت

يعني دي ما تنفعش.. 

_ وقفها محمد قدام المرايا وجاب طرحه طويله شويه ولفها ليها بطريقه حلوه جدا ووقف وراها وقال.. 

محمد

ها ايه رئيك كده؟.. 

ابتسمت هاجر وقالت

انت كنت شغال كوافير حريمي قبل كده ولا ايه؟.. 

ضحك محمد بصوت عالي وقال

ههههههههه لا بس بشوف ماما وهي بتلبس الحجاب وفي فتره ايدها اتكسرت وكنا بنروح للدكتور فعلمتني اعملهالها... 

هاجر

اممم كويس  لقيت حاجه كويسه في امك.. 

بصلها محمد بحده وهي ضحكت وقالت

لا مش قصدي اغلط فيك، بص خلاص معلش.. 

محمد اتنهد وقال

انا هروح ادفع الحساب وجاي.. 

هاجر 

متشكره يا شيخ محمد.. 

محمد ابتسم وقال

اقل واجب يا مدام الشيخ محمد.. 

_ وراح محمد يدفع الحساب وهاجر افتكرت اللي حصل بينها وبين عادل اللي كان خطيبها قبل كده و..

_ فلاااااش باااك..

_ كانو واقفين في محل الموبيله وهاجر كانت مدايقه وهو عمال يضحك وقالها..

عادل 

خلاص والله هجيبلك اللي عايزاه انا كنت بهزر معاكي..

هاجر ضربته علي كتفه وقالت

هزارك رخم علي فكره قال تقولي مش هنلحق نتهني بيهم،يلا روح حاسب..

عادل 

يالهوي علي النكد طيب مش هحاسب غير لما تضحكي..

هاجر 

محسسني انك هتحاسب من جيبك يا حبيبي دي فلوس بابا..

ضحك عادل وقال

ههههه لا ما هو عمي مالكيش دعوه،واضحكي يلا عشان اروح احاسب بضمير...

ابتسمت هاجر وهو مسك ايدها وباسها وقال

ايوه كده خلي قلبي يفرح بضحكتك يا اول واخر حب في حياتي..

هاجر اتكسفت وقالت

طيب خلصني يلا لسه قدامنا حاجات كتير.. 

عادل 

طيب بالراحه بس ما تزوقيش.. 

_ بااااك... 

اتملت عيونها دموع وقالت لنفسها 

انسيه يا هاجر ما يستاهلش، خليكي في حياتك وعشيها زي ما تكون وخلاص... 

محمد وقف جنبيها وقال

في حاجه انتي كويسه؟.. 

هاجر مسحت دموعها وقالت

ايوه انا كويسه، يلا بس نروح عشان  اديقت شويه.. 

مسك محمد ايدها وقال

بلاش تبصي لوراكي يا هاجر وقتها هتلاقي نفسك ديما كويسه وبجد مش كلام وخلاص.. 

هاجر بهدوء

صح انت صح تعالي بقي عشيني الاول قبل ما نروح.. 

محمد 

امال احنا لسه عاملين ايه في بيت ابوكي، هو اخرنا عصير قصب.. 

هاجر بلا مبالاه

قصب قصب اهو اللي يجي منك احسن منك.. 

ــــــــ #بقلم_الكاتبه_رحاب_القاضي ـــــــــ 

_وكانت الساعه عدت 12 بعد نص الليل..

 وكانت نور قاعده بتذاكر المحاضرات اللي فاتتها النهارده بعد مصحبتها  بعتتهم ليها، وكانت كل شويه تبص لموبيلها اللي بيرن باسم يونس ومش راضيه ترد.. 

_وتحت بيتهم ع القهوه كان يونس قاعد وهو مش مبطل رن عليها، عارف انها زعلانه وهو زعلان من نفسه انه مد ايده عليها بس هو بيغير عليها بشكل جنوني.. 

جاله يوسف صاحبهه وقال

يونس انا مروح يلا بينا.. 

رد عليه يونس وهو بيبص ع شباك اوضة نور 

لا انا قاعد.. 

قعد يوسف جنبه وقاله

تلاقيها نامت تعالي نروح وبكره ابقي كلمها وصالحها.. 

ادايق يونس وقاله بعصبيه 

منامتش لسه صاحيه النور لسه مولع وهي بتنام والنور مطفي، وبعدين كبر دماغك وروح روح.. 

يوسف 

يبني القهوه شطبت والصنايعيه نامو جوه تعالي روح حتي عشان ابوك ميزعلش.. 

زعق فيه يونس 

امشي ي يوسف وانزل من ع دماغي مش ناقصك.. 

ادايق يوسف ع حال صاحبه وقاله 

يخربيت ام الحب اللي مبهدلك ي اخويا.. 

اتنهد يونس ورد عليه _

امشي ي يوسف وبطل رغي.. 

_قام يوسف مشي وهو فضل قاعد ومش مبطل رن عليها، بص لفوق ولاقاها واقفه فالشباك وهي لابسه حجابها وبتبص للسما وبعدين بصتله هو واتخضت ورجعت لورا بسرعه وهي خايفه منه.. 

قربت من موبيلها اللي بيرن بأسمه وردت وهي خايفه ليزعل انها كانت واقفه فالشباك.. 

نور_

الو.. 

يونس بهدوء_

لسه فاكره تردي عليا ي نور؟.. 

اتوترت وردت عليه _

كنت بذاكر.. 

يونس _

طيب متزعليش وكفايه سهر وروحي نامي.. 

نور بعصبيه _

انت كمان هتتحكم فيا انام امتي ومنامش امتي.. 

رد عليها بزعيق 

ايوه واطفي النور واقفلي الشباك ونامي ي نور ولو هتروحي الجامعه بكره ابقي رني قوليلي.. 

اتنهدت بنفاذ صبر وقالت

حاضر حاجه تاني ي يونس؟.. 

يونس بهدوء _

ايوه.. 

نور _

خير؟.. 

يونس

بحبك ي نور.. 

اتنهدت بضيق وما ردتش وهو قال بحزن _

مقويه قلبك عليا اووي ي دكتوره نور.. 

ردت عليه وهي بتتهرب منه _

انا رايحه انام تصبح ع خير.. 

_قفلت الموبيل فبص هو للشباك ولقاها فعلا طفت النور، فقال بدموع لمعت فعينه.. 

يونس 

وانتي من اهل الخير ي احلي نور.. 

_قام هو كمان ورجع بيتهم واول مدخل البيت لقي باباه حامد الصاوي قاعد مستنيه وهو متعصب... 

يونس

خير ي حج اي اللي مصحيك لحد دلوقتي؟.. 

رد عليه حامد بعصبيه 

قاعد مستنيك، كنت فين لدلوقتي ي يونس؟.. 

ضحك يونس وقاله _

مش كبرت انا ع الاسئله دي، وبعدين ابنك كبير الحاره وموقفها ع رجل يعني متخافش عليه ي ابو يونس ولا صح الشيخ محمد هو الكبير يا ابو محمد .. 

جه يدخل اوضته فزعق حامد بصوت عالي 

ياتارا ردت عليك الست الدكتوره اللي كنت قاعدلها تحت البيت ولا سابتك وطنشتك.. 

اتعصب يونس وقال 

حاجه تخصني انا وهي ي حج متشغلش بالك.. 

حامد _

مش هشغل بالي هي كلمتك ولا لا، بس هشغل بالي بانك هتتجوزها امتي؟.. 

يونس بضيق_

لما ربنا يأذن ي حج حامد.. 

حامد _

امتي برضو، اصحابك اللي اصغر منك اتجوزو وبقي كل وحده معاها بدل العيل تلاته، انت بقي اي اللي يخليك. تقعد اكتر من كده وانت بقي عندك 30 سنه، ولا الهانم لسه مرضيتش عليك؟.. 

قرب يونس منه وقاله بهدوء _

لما نور توافق وتخلص جامعتها هتجوزها، انما افرض نفسي عليها واخليها تعيش معايا وهي مش موافقه مش هيحصل... 

حامد بسخريه _

وهي ليها عين ترفض بعد مبقيت تصرف عليها وع اهلها وع ابوها العيان، ده حتي هدومها انت بتجيبهالها وبتصرف عليها  شقاك وهي فالكليه اهو وحده غيرها تتمنالك الرضا ترضي مش تتفرعن عليك.. 

اتعصب يونس وقاله_

بص ي حج انا سيبتك تتحكم فكل حاجه تخصني زمان من اول مخلتني اطلع من الاعداديه ومكملش تعليمي واشتغل معاك فالموقف والعطاره وانك بعد. ما امي ماتت وهناء اطلقت رفضت تخليني اروح معاها وكل واحد فيكم كان بيعاقب التاني فيا ، لحد مخلتني اتخانق وابقي شاب مشبوه وبيخوف عشان ابقي الكبير بعدك وانا قولتلك حاضر ي اباا وسكت، بس عند نور مش هسكت الا دي دي روح ابنك فيها ي حج حامد واللي بيني وبينها محدش ليه دعوه بيه.. 

مشي من قدام حامد وهو بيقول بهدوء 

تصبح ع خير ي حج.. 

_طلعت مرات ابوه اللي كانت بتسمع كلامهم من ورا باب اوضتها.. وقالت لحامد بخبث.. 

عظيمه

احلق شعر راسي ان مكانت سحراله البت دي بنت فوزي.. 

حامد 

خلينا قاعدين اما نشوف اخرتها مع الست الكتوره دي.. 

_ تفتكرو ايه اللي هيحصل؟.... 

ــــــــــــــــــــــــــــــــــــــــ

  •تابع الفصل التالي "رواية موضوع عائلي" اضغط على اسم الرواية